Përmbajtja:

• Zgjedhjet në Kosovë: Sistemi me lista të hapura shkakton konfuzion te votuesit

• Një delegacion i Parlamentit Evoripian sot arrin në Prishtinë

• Holkeri thotë se kthimi i të zhvendosurve mbetet një ndër prioritetet e UNMIK-ut

• Morina në Malishevë ka premtuar asfaltimin e rrugës Lubizhdë – Mrasor

• Në Gjykatën e Gjilanit ka vazhduar procesi gjyqësor ndaj Shefket Musliut dhe katër bashkëluftëtarëve të tij

• Një gjerman është akuzuar për zjarvënie ku patën vdekur pesë shqiptarë

• Subjektet politike shiptare në Luginë të Preshevës kanë debatuar për themelimin e Këshillit Nacional

• Në Nepal janë vrarë 29 ushtarë dhe policë dhe të pakten 10 kryengritës

• Në Kashmir janë vrarë të pakten 6 persona dhe 12 të tjerë janë plagosur

• Të paktën 29 minatorë kanë vdekur nga një shpërthim në Kinë

• Keri fiton sërish, Eduards tërhiqet?

• 170 të vrarë në disa shpërthime

• NASA: Gjenden prova të ekzistencës së ujit në Mars

• Irak: Bartja e sovranitetit në qershor

• Janë arrestuar 15 pesona lidhur me sulmet vetëvrasëse në Irak

• Venezuelë: Në përleshjet me trupat qeveritare janë vrarë 2 protestues të opozitës

Zgjedhjet në Kosovë: Sistemi me lista të hapura shkakton konfuzion te votuesit

 

Prishtinë, 3 mars 2004 - Sven Lindholm, zëdhënës i OSBE-së tha se përparësia e sistemit me lista të mbyllura, që edhe kësaj radhe me gjasë do të përdoret, edhe pse kjo mbetet të përcaktohet nga PSSP-ja, nuk është aq i thjeshtë, sepse duhet të merren parasysh shumë çështje.

 

"Një prej çështjeve që e favorizon sistemin me lista të mbyllura është përfaqësimi gjinor në parlament", tha Lindholm, në një deklaratë për gazetën "Bota sot". Ai tha se edhe në sistemin me lista të hapura, edhe me atë me lista të mbyllura, është sërish partia ajo e cila vendos për kandidatët e mundshëm që do t'i ketë në listë.

Lindhoml ka sqaruar problemet të cilat i ka shkaktuar sistemi me lista të hapura në zgjidhjet e para komunale të mbajtura në Kosovë. "Në zgjedhjet e para komunale, kur është përdorur sistemi me lista të hapura, ka pasur një numër të madh fletëvotimesh jovalide (të pavlefshme), ngase në të shumtën e rasteve votuesit kanë qenë të hutuar për mënyrën se si duhet votuar. Ndërsa, në zgjedhjet tjera, kur janë përdorur listat e mbyllura, numri i fletëvotimeve jovalide ka rënë dukshëm", tha ai.

Zëdhënësi i OSBE-së tha se një prej standardeve është që të ruhet kuota prej 30 për qind e përfaqësimit gjinor.

Dy karakteristikat që e veçojnë sistemin me lista të mbyllura janë thjeshtësia për të votuar dhe përfaqësimi i denjë i gjinisë femërore. Ajo që e veçon këtë sistem nga ai me lista të hapura, është edhe fakti tjetër se sistemi me lista të mbyllura do të kushtojë më lirë.

 

Lindholm mori shembull se sistemi me lista të hapura do të shkaktojë sërish konfuzitet tek votuesit, sepse nëse përdoret lista e hapur, votuesit në ditën e zgjedhjeve, para vetës, do ta kenë një fletëvotim të gjatë me emrat e të kandiduarve, për çka do ta kenë më vështirë për të gjetur kandidatin e dëshiruar, ndërsa me përdorimin e sistemit me lista të mbyllura do të jetë një fletëvotim i vogël, ku janë të renditura vetëm partitë, që do të mundësojë lehtësi për votuesin.

 

"OSBE nuk ka ndonjë qëndrim konkret se cili sistem zgjedhor të përdoret në këto zgjedhje, por, sido që të jetë, për përdorimin e sistemit me lista të hapura apo të mbyllura do të vendoset nga përfaqësuesi special i sekretarit të përgjithshëm", - tha zëdhënësi i OSBE-së.

Edhe zyrtarët e lartë të LDK-së thonë se sistemi me lista të hapura do të shkaktonte konfuzion total te votuesit. Në fletëvotim do të gjendeshin me mijëra emra të të gjitha partive e koalicioneve të mundshme dhe votuesi jo vetëm që humb kohë, por edhe mund të gabojë në rrumbullakësimin e kandidatit.

 

Dhe kjo është arsyeja e vetme që LDK preferon sistemin me lista të mbyllura, sepse është më i thjeshtë dhe më efikas gjatë votimit, por edhe gjatë numërimit të votave. Në LDK thonë se sistemi me lista ta hapura, me një zonë zgjedhore, nuk praktikohet askund në botë.

Problemi me lista të hapura a të mbyllura është mistifkuar tejmase nga OJQ-të e ndryshme, të cilat ashiqare nuk e njohin këtë problematikë.

 

 

Një delegacion i Parlamentit Evoripian sot arrin në Prishtinë

 

Bruksel, 3 mars 2004 - Një delegacion i Parlamentit Evropian prej sot deri në të premtën do të qëndrojë në Kosovë. Udhëheqëse e këtij delegacioni do të jetë Doris Pak, njohëse e mirë e zhvillimeve në rajon. Nga Brukseli njoftohet se kjo vizitë konsiderohet si demostrim i përkushtimit të Parlamentit Evropian për situatën në Kosovës.

Në prag të udhëtimit për në Kosovë, eurodeputetja e PE Pak ka thënë se dëshiron të diskutojë konkretisht me të gjitha palët të involvuara për të gjitha problemet që prekin Kosovën dhe kosovarët.

 

Doris Paka deklaroi se statusi përfundimtar i Kosovës duhet të gjendet sa më parë dhe se para kësaj duhet të hapet diskutimi për këtë dhe për të gjetur një zgjidhje të mundshme.

 

Ajo ka thënë se statusi i Kosovës duhet të gjendet deri në gjysmën e kësaj dekade sepse nuk ka nevojë për zhagitje.

Interesimi i veçantë i delegacionit të PE do të jetë situata e pakicave në Kosovë dhe në këtë kuadër shefja e Komisionit për Evropën Juglindore Doris Pak është e mendimit se serbët e Kosovës duhet të kenë mundësi të mbesin në Kosovë dhe të ndiehen këtu si në shtëpitë e tyre dhe për këtë duhet të kujdesen shqiptarët.

 

 

Holkeri thotë se kthimi i të zhvendosurve mbetet një ndër prioritetet e UNMIK-ut

 

Prishtinë, 3 mars 2004 - Kthimi i të zhvendosurve dhe sigurimi i kushteve për jetesë të tyre është dhe mbetet një ndër prioritetet e misionit të UNMIK-ut në Kosovë, ka thënë kryeadministratori i Kosovës Hari Holkeri.

 

Ai i bëri këto komente me rastin e një takimi pune lidhur me parimet udhëzuese të OKB-së për zhvendosjen brenda vendit të organizuar nga UNHCR-ja në Prishtinë.

Holkeri ka theksuar se kthimi i të zhvendosurve në Kosovë ka shënuar rezultate krahasuar me vitet e mëparshme, por për një një kthim të mirëfilltë duhet angazhim më i madh i të gjithë aktorëve që merren me këtë çështje si nga ana e institucioneve vendore ashtu edhe ndërkombëtare.

 

 

Morina në Malishevë ka premtuar asfaltimin e rrugës Lubizhdë – Mrasor

 

Malishevë, 3 mars 2004 - Ministri i Transportit dhe Posttelekomunikacionit të Kosovës, Zef Morina së bashku me bashkëpunëtorët e tij ka zhvilluar dje një vizitë në pesë fshatra të Malishevës.

 

Me këtë rast ministri Morina ka premtuar asfaltimin e rrugës Lubizhdë - Mrasor e gjatë 14 kilometra që lidhë fshatrat e Lubizhdës, Turjakës, Panorcit, Rudit dhe Llapçevës. Rruga do të asfaltohet së shpejti pasi mjetet i kanë siguruar dhe po presin që ato të sigurojnë edhe banorët e këtyre fshatrave, ka thënë ministri Zef Morina.

 

Kjo rrugë shpie deri tek Ujëvaret e Mirushës si dhe te një shpellë e pahulumtuar në Panorc të kësaj komune. Ndërtimi i kësaj rruge do të kushtojë rreth 1.400.000 euro nga e cila shumë rreth 400 mijë euro duhet të grumbullohen nga banorët e këtyre lokaliteteve.

 

 

Në Gjykatën e Gjilanit ka vazhduar procesi gjyqësor ndaj Shefket Musliut dhe katër bashkëluftëtarëve të tij

 

Gjilan, 3 mars 2004 - Në Gjykatën e Qarkut në Gjilan ka vazhduar procesi gjyqësor ndaj ish-komandantit të UÇPMB-së Shefket Musliu dhe katër bashkëluftëtarëve të tij. Në seancën e djeshme u mor në pyetje i akuzuari i dytë Besim Arifi, por ai ka zgjedhur mbrojtjen në heshtje, duke mos u përgjigjur në pyetjen e kryetarit të trupit gjykues.

 

 

Një gjerman është akuzuar për zjarvënie ku patën vdekur pesë shqiptarë

 

Berlin, 3 mars 2004 - Shtypi gjerman njofton se një zjarrfikës gjerman është akuzuar për vënie të zjarrit në një bllok apartamentësh në qytetin Irli të Gjermanisë në nëntorin e kaluar. Si pasojë e zjarrit humbën jetën pesë anëtarë të familjes Bunjaku nga fshati Shkabaj, ish-Gllanasellë i komunës së Drenasit dhe një 82-vjeçare gjermane.

Gjermani i akuzuar mund të dënohet me burgim të përjetshëm nëse shpallet fajtor. Identiteti i tij nuk është bërë i ditur.

 

 

Subjektet politike shiptare në Luginë të Preshevës kanë debatuar për themelimin e Këshillit Nacional

 

Preshevë, 3 mars 2004 - Subjektet politike shqiptare që veprojnë në Luginë të Preshevës kanë mbajtur dje një takim të përbashkët ku është diskutuar themelimi i Këshillit Nacional.

 

Gjatë këtij takimi u shqyrtua edhe çështja e shpalljes së zgjedhjeve të parakohshme lokale për Kuvendin komunal të Preshevës, pasi kanë kaluar më tepër se tre muaj nga vendosja e masave të parakohshme në Kuvendin komunal të Preshevës.

 

Në këtë takim, përveç liderëve të subjekteve politike shqiptare të Luginës, ishin të pranishëm edhe përfaqësuesit e Misionit të Vëzhguesve ndërkombëtarë të vendosur në Preshevë.

 

 

Në Nepal janë vrarë 29 ushtarë dhe policë dhe të pakten 10 kryengritës

 

Katmandu, 3 mars 2004 - Kryengritësit maoistë kanë vrarë sot (e mërkurë) 29 ushtarë dhe policë gjatë përleshjeve të sotme në lindje të kryeqytetit Katmandu, njofton BBCWorld. Po kështu, autoritet zyrtare thonë se të pakten 10 kryengritës janë vrarë gjatë këtyre luftimeve.

 

 

Në Kashmir janë vrarë të pakten 6 persona dhe 12 të tjerë janë plagosur

 

Xhamu, Kashmir, 3 mars 2004 - Të pakten 6 vetë janë vrarë dhe 12 të tjerë janë plagosur gjatë një tentimi për sulm vetëvrasës në Kashmirin e administruar nga India, ka bërë të ditur policia, njofton BBCWorld.

 

Në njoftim thuhet se militantët kanë hapur zjarr në automjetet e policisë të parkuara pranë burgut, por janë vrarë nga rojet e burgut. Automjeti transportonte një grup të burgosurish në gjykatën e kryeqytetit Xhamu.

 

 

Të paktën 29 minatorë kanë vdekur nga një shpërthim në Kinë

 

Pekin, 3 mars 2004 - Të paktën 29 minatorë kanë vdekur nga shpërthimi në një minierë thëngjilli në veri të Kinës, njofton agjencia kineze e lajmeve Ksinhua.

Pronari i minierës nuk posedon lejen e qeverisë për prodhim.

Minierat kineze të thëngjillit janë më të rrezikshmet në botë dhe me numrin më të madh të minatorëve që pësojnë me vdekje. Vetëm vitin e kaluar kanë humbur jetën 6.702 minatorë në aksidentet e ndryshme.

 

 

Keri fiton sërish, Eduards tërhiqet?

 

Uashington, 3 mars 2004 - Senatori Xhon Keri i shtetit Maseçusets korri një numër fitoresh në garat e djeshme, thuajse duke i siguruar emrimin si kandidat i Partisë Demokratike për t=i bërë sfidë Presidentit Bush në zgjedhjet e nëntorit.

Nga Nju Jorku në Kalifornia, nga Ohajo në Gjeorgjia, Senatori Keri mbizotëroi garat e ditës më të madhe të zgjedhjeve paraprake të Partisë Demokratike.

Senatori Xhon Eduards i Karolinës së Veriut nuk arriti të siguronte asnjë fitore në dhjetë garat e së martes, megjithëse u paraqit shumë mirë në shtetin Gjeorgjia. Agjencitë amerikane të lajmeve njoftojnë se Senatori Eduards ka vendosur të tërhiqet nga gara presidenciale. Ai do ta bëjë këtë njoftim të merkurën në shtetin e tij, Karolinën e Veriut.

 

 

Irak: 170 të vrarë në disa shpërthime

 

Bagdad, 3 mars 2004 - Një numër shpërthimesh të bashkërenduara vetëvrasëse në Bagdad dhe qytetin Qerbela shkaktuan vdekjen e 170 vetave, të cilët po festonin Hashurenë, një nga ditët më të shënuara të myslimanëve shiitë.

Zyrtarët në Bagdad thonë se tre autorë shpërthimesh vetëvrasëse vranë 58 veta në afërsi të faltores Kazamija të kryeqytetit. Njoftohet se një autor i mundshëm shpërthimesh është arrestuar.

Më në jug, në qytetin e shenjtë shiit të Qerbelasë, një gërshetim sulmesh vetëvrasëse, shpërthime bombash të telekomanduara dhe zjarr mortajash shkaktoi vdekjen e 112 vetave ndërkohë që më shumë se një milion besimtarë ishin mbledhur për ceremonitë fetare përreth xhamisë së Imam Husenit dhe xhamisë Abaz. Më shumë se 400 njerëz u plagosën në këto dy sulme.

 

 

NASA: Gjenden prova të ekzistencës së ujit në Mars

 

Kemp Dejvid, 3 mars 2004 - Agjencia amerikane e hapësirës, Nasa njoftoi se një prej sondave të saj në planetin Mars ka gjetur prova të ekzistencës së ujit në planetin e kuq.

Në një konferencë shtypi që dha të martën, një zyrtar i lartë i Nasës tha se roboti Opportunity ndodhet në një zonë të Marsit që dikur ka qenë e zhytur në ujë.

Ai tha se ky zbulim përbën një hap gjigant përpara në përpjekjet për të përcaktuar nëse në Mars kanë ekzistuar dikur kushtet e jetës.

Sonda Opportunity dhe binjakja e saj, sonda Spirit, po kryejnë kërkime në anët e kundërta të Marsit, për të gjetur shenja uji, elementit kryesor që bën të mundur jetën.

 

 

Irak: Bartja e sovranitetit në qershor

 

Uashington, 3 mars 2004 - Shtetet e Bashkuara thonë se bartja e sovranitetit në duart e Irakianëve do të bëhet sipas planit në muajin qershor, përkundër vargut të sulmeve me bomba, nga të cilat thonë zyrtarë irakianë janë vrarë të paktën njëqind e tetëdhjetë veta.

Një zëdhënës i Shtëpisë së Bardhë tha se Amerika do të mbetet në Irak për aq kohë sa nevojitet për ta përmirësuar sigurinë.

Por klerikët shiitë irakianë kanë akuzuar koalicionin e udhëhequr nga amerikanët për dështim të parandalimit të sulmeve ose për mos dhënie të mjeteve në duart e irakianëve për ta mbrojtur veten.

 

 

Janë arrestuar 15 pesona lidhur me sulmet vetëvrasëse në Irak

 

Bagdad, 3 mars 2004 - Policia e Bagdadit dhe trupat amerikane kanë arrestuar 15 pesona, ndër të cilët edhe 4 vetë, që supozohet të jenë iranianë, lidhur me sulmet vetëvrasëse kundër besimtarëve shitë në Bagdad dhe Qerbela, ka bërë të ditur sot (e merkurë) një zyrtar, njofton AP.

 

 

Venezuelë: Në përleshjet me trupat qeveritare janë vrarë 2 protestues të opozitës

 

Karakas, Venezuelë, 3 mars 2004 - Dy protestues të opozitës janë vrarë gjatë përleshjeve me trupat qeveritare pasi zyrtarët elektoralë të kundërshtarëve të presidentit Hugo Çavez kishin dështuar të mbledhin nënshkrime të mjaftueshme për një referendum kundër tij, njofton Rojter.

 

Të pakten 6 persona janë vrarë dhe dhjetëra të tjerë janë plagosur gjatë protestave të dhunshme pesëditëshe në Venezuelë.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |