Dy lajme nga Podujeva

Dy lajme nga Podujeva

Kryetari i komunës së Podujevës: Përvoja interesante dhe të dobishme

Ajova (SHBA) – Podujevë, 3 mars 2004 (TN) - Këtë javë në Quad City të shtetit Iowa (Ajova) kemi pasur në program trajnimi me temën për ndarjet politike të këtij shteti, bashkëpunimin ndërmjet zyrtarëve lokalë dhe zyrtarëve të shtetit, mirëkuptimi për çështjet me interes të përbashkët në nivelin lokal dhe shtetëror, tha kryetari i komunës së Podujevës Agim Veliu.

Veliu informoi se kryetarët e 10 komunave të Kosovës u pritën nga Kancelari dr. John T. Blong dhe në Senat e Kongres takuan kongresistë dhe senatorë, kurse në takimin me zyrtarë lokalë të Ajovës u bisedua edhe për qeverisjen e shtetit, përvojat e funksionimit të organeve shtetërore dhe çështjet me interes të përbashkët.

Gjatë ditëve në vijim kryetarët e komunave do të takohen me kryetarin e Bashkisë së Illinois Mark Shwiebert, kryetarin e qytetit ruaral qytetin Eldridge Frank Wood.

“Java e parë në Washington dhe në Illinois ishte një përvojë mjaft interesante dhe e dobishme”, deklaroi kryetari Veliu duke njoftuar se aktualisht po i vazhdojnë trajnimet në shtetin Ajova të SHBA-ve.

Asistentja për shkëmbime kulturore në Zyrën Amerikane në Prishtinë znj. Afërdita Krasniqi ka njoftuar se qëllimi i vizitës së kryetarëve të komunave ka të bëjë me përkrahjen e zhvillimit të pushtetit lokal në Kosovë, kurse organizator i këtij programi tre javor është Univerziteti i Georgetown – Qendra për zhvillim dhe Arsim Ndërkulturor, sponsoruar nga Departamenti i shtetit Amerikan, përkatësisht Byroja e çështjeve arsimore dhe kulturore e Zyrës së programeve të shkëmbimit të përvojave.

Kryetarët e dhjetë komunave të Kosovës: Prishtinës, Podujevës, Fushë Kosovës, Kaçanikut, Suharekës, Gllogovcit, Vitisë, Rahovecit, Leposaviqit dhe Shtërpcës vazhdojnë trajnimin në SHBA.


Shoqatat e dala nga lufta protestuan në Podujevë

Podujevë, 3 mars 2004 (TN) – Qytetarë të shumtë të Podujevës protestuan sot në qendër të qytetit duke kërkuar lirimin e ish luftëtarëve të UÇK-së dhe rishqyrtimin e politikës së UNMIK-ut ndaj Kosovës.

Protestuesit defiluan në rrugën “Zahir Pajaziti” duke mbajtur në dorë pankarta ku shkruanet: “Liri për çlirimtarët”, “Poshtë UNMIK-u”, “Institucione zgjohuni”, “Poshtë Rezoluta 1244” si dhe borohoritën emrat e Komandant Remit dhe luftëtarëve tjerë.

Në sheshin e flamurit protestuesve iu drejtuan, kryetari i Shoqatave të dala nga lufta Afrim Kuleta dhe nënkryetari i këtyre shoqatave në nivel qendror Sherif Krasniqi të cilët ndër tjera theksuan se arrestimet e fundit në Prizren janë vazhdimësi e politikës së UNMIK-ut sikur edhe arrestimet e mëhershme që u bënë në komunat tjera.

Protesta kaloi e qetë dhe pa probleme, kurse u organizua nga Shoqata e Veteranëve, shoqata e invalidëve dhe shoqata e familjeve të dëshmorëve të UÇK-së.