Përmbajtja:

• Presidenti Rugova priti Kryemisnirin e Shqipërisë Fatos Nano

• Kryeministri Nano u takua me shefin e UNMIK-ut Hari Holkerin

• Nano u takua me Dacin dhe Rexhepin

• Qeveria e Kosovës për kthimin e sigurtë të të zhvendosurve

• Nano tha në një tribunë se Kosova tashmë e ka kalaur fazën e emergjencës

• Banka Botërore ka ndarë 15 milionë dollarë ndihmë në fushat e menaxhimit të financave publike në Kosovë

• Takimi për energjetikë ndërmjet Prishtinës dhe Beogradit do të mbahet të enjtën

• Punëtorët e gjyqësisë i dhanë fund grevës

• Novicki ka reaguar ndaj një deklarate të Melihate Tërmkollit

• Kryetarë komunash nga Kosova në vizitë në SHBA

• Varrimi i Presidentit të Maqedonisë do të bëhet të premtën

• Cërvenkovski kërkoi nga kreu i NATO-s të sqarime për aksidentin ajrore ku humbi jetën Trajkovski

• Në katër shpërthimet në Bagdad janë vrarë të pakten 75 njerëz

• Në Qerbela janë vrarë të pakten 50 njerëz

• Të paktën 25 njerëz janë vrarë në pesë shpërthimet në qytetin e shenjtë Qerbela

• Në një atentat të sotëm është vrarë këshilltari i Arafatit

• Shëprthim në Bagdad - 33 të vrarë

• Vritet një ushtar amerikan në Bagdad

• Uashingtoni hedh poshtë akuzat e ish-presidentit haitian

• Shtetet e Bashkuara përshëndesin kushtetutën e përkohshme irakiane

• Amerikanët do të ndërhyjnë në Haiti

• BE vendos sanksione tregtare ndaj Shteteve të Bashkuara të Amerikës

• Në disa shpërthime në Bagdad e Qerbela janë vrarë të pakten 124 njerëz

• Persona të armatosur kanë vrarë 29 persona në Pakistan

• Persona të armatosur kanë vrarë 17 persona në Pakistan

Presidenti Rugova priti Kryemisnirin e Shqipërisë Fatos Nano

 

Prishtinë, 2 mars - Presidenti i Kosovës Ibrahim Rugova priti sot Kryeministrin e Shqipërisë Fatos Nano, me të cilin bisedoi për situatën aktuale në Kosovë dhe për thellimin e bashkëpunimit mes dy vendeve në të gjitha fushat e jetës. Presidenti Rugova pasi i uroi mirëseardhje zotit Nano, e falenderoi për ndihmën që Shqipëria i ka dhënë Kosovës gjatë luftës dhe pas saj.

 

Fillimisht Presidenti Rugova e ka njoftuar Kryeministrin shqiptar për progresin që është arritur në Kosovë në të gjitha fushat e jetës, si dhe me objektivat për zhvillim ekonomik, për procesin e privatizimit, investimet si dhe për integrimin e grupeve etnike në shoqërinë dhe shtetin e Kosovës, por edhe për bashkëpunimin me UNMIK-un në realizimin e rrugës së përmbushjes së standardeve, duke thënë se shumë standarde tashmë janë përmbushur.

 

"Unë insistoj që njohja formale e pavarësisë së Kosovës të bëhet sa më shpejt sepse do të qetësonte popullin e Kosovës e rajonin", tha Presidenti Rugova.

Poashtu Presidenti Rugova tha se në këtë takim është biseduar për një bashkëpunim më të frytshëm në të gjitha fushat e jetës në mes të dy vendeve, Shqipërisë dhe Kosovës, për integrim në NATO. Pra Kosova (si dhe Shqipëria) aspiron integrimin në NATO dhe në BE dhe në miqësi të përhershme me SHBA-të.
 

Presidenti Rugova tha se dy vendet konkretisht do të bashkëpunojmë në fushën e energjetikës që është me rëndësi për Kosovën dhe Shqipërinë, por edhe në fushat e tjera, duke shtuar se duhet të kryhet më në fund ndërtimi i autostdradës Prishtinë-Durrës.

Në fund të prononcimit të tij para mediave, Presidenti Rugova kërkoi përkrahjen e Shqipërisë në planin ndërkombëtar për njohjen formale të pavarësisë së Kosovës si dhe thellimin e marrëdhënieve mes dy vendeve.

Nga ana e tij, Kryeministri Fatos Nano në fillim tha: "Kam kënaqësinë të ndaj me ju emocionet e një kulminacioni të vizitës sime në Prishtinë, ku me Presidentin Rugova, tashmë më vital se çdoherë tjetër, më funksionues se në raport me simbolet përfaqësuese dhe të nderuara të shqiptarëve të Kosovës që ai i ka patur në vitet e rezistencës, në vitet e afirmimit ndërkombëtar të Kosovës".

Zoti Nano tha se në takimin e sotëm janë biseduar programe bashkëpunimi, të cilat lidhin institucionet e Shqiprëisë me ato të Kosovës, dhe siç u shpreh, "me të njëjtët aleatë të mëdhenj ndërkombëtarë, me një axhendë zhvillimi normal që po na afron për të na integruar në Evropën e bashkuar, në NAT0 dhe në realitetet moderne ku jeton edhe vetë Ballkani i ri".

Kryeministri Nano bëri të ditur se Presidenti Rugova "me çeljen e kohës dhe me shkrirjen e borës do të vijë në Tiranë të sjellë informacione të freskëta dhe optimiste edhe shumë shqiptarëve të Shqipërisë që e nderojnë dhe e respektojnë".

Në fund Nano tha: "Kjo vizitë na dha të gjithëve prova të hapësirave tona për të krijuar standarde qeverisëse të kohës, pra edhe aftësive tona për statusin e vendeve që e meritojnë integrimin sovran në BE".

 

 

Kryeministri Nano u takua me shefin e UNMIK-ut Hari Holkerin

 

Prishtinë, 2 mars - Kryeministri i Shqipërisë Fatos Nano pati dje pasdite një takim me dyer të mbyllura me shefin e UNMIK-ut Hari Holkerin. Në një deklaratë shumë të shkurtër pas këtij takimi Nano tha se kishte pasur një shkëmbim të frytshëm mendimesh me z. Holkerin pas vizitës së këtij të fundit në Tiranë dy javë më parë.

 

Nano tha se në Kosovë po vazhdon përparimi rreth angazhimit të misionit të OKB-së dhe autoriteteve të ligjshme të Kosovës të cilat po e nxisin përparimin me plotësimin e standardeve që janë të nevojshme për të gjithë.

Kryeministri Nano gjatë ditës së sotme do të zhvillojë takime edhe me përfaqësuesit e institucioneve më të larta të Kosovës.

 

 

Nano u takua me Dacin dhe Rexhepin

 

Prishtinë, 2 mars - Kryetari i Kuvendit të Kosovës Nexhat Daci u takua me Kryeministrin e Shqipërisë Fatos Nano. Pas takimit, Daci tha se me Kryeministrin shqiptar ka biseduar për sfidat nëpër të cilat po kalon Kosova dhe mundësitë se si po i sheh Kuvendi zgjidhjen e statusit përfundimtar të Kosovës.

"Kërkova nga Kryeministri shqiptar ndihmë të vazhdueshme që argumentet që ka Kuvendi i Kosovës, që Shqipëria si shtet normal t=i manifestojë nëpër strukturat ndërkombëtare dhe të argumentoje e të lobojë të vërtetën për Kosovën", u shpreh Daci pas takimit.

 

Ndërkaq Fatos Nano tha se Kuvendi i Kosovës është vendi që i përpunon aftësitë qeverisëse të Kosovës, me vizion për hapësirë të barabartë për të gjithë përfaqësuesit në partneritet shumë produktiv me UNMIK-un. "Besoj se viti 2005 është vit i mjaftueshëm për të treguar aftësi të përbashkët dhe një qeverisje të mirë ndërmjet dy vendeve me kufij të hapur, por të mbyllur për keqbërësit", tha kryeministri Fatos Nano.

Pas takimit mes Kryeministrit të Shqipërisë Fatos dhe atij të Kosovës Bajram Rexhepi, ata thanë se angazhohen për vazhdimin e bashkëpunimit në fushën e energjetikës, turizmit dhë n fusha e tjera me interes të përbashkët.

 

 

Qeveria e Kosovës për kthimin e sigurtë të të zhvendosurve

 

Prishtinë, 2 mars - Në Prishtinë sot po mbahet një takim pune për parimet udhëzuese të Kombeve të Bashkuara për zhvendosje brenda vendit. Trajnohen organet vendore e ndërkombëtare të involvuara në këto çështje.

Marrin pjesë strukturat qeverisëse të Unmik-ut, strukturat vendore, OSBE-së, agjencitë, NGO-të si dhe organizatat donatore. Këtë takim me prezencën e tyre e përkrahën edhe administratori Holkeri dhe kryeministri Rexhepi.

Kryeministri Rexhepi tha se është i bindur se ky takim do t'u krijojë mundësi të gjithëve që të angazhohen në zhvillimin dhe përparimin e proceseve të filluara demokratike. "Ky takim është rast që të na ndihmojë ndihmojë në përcaktimin e veprimtarive në çështjet e zhvendosjes brenda vendit.

 

Qeveria e Kosovës është për krijimin e një ambienti që mundëson kthimin e sigurtë dhe dinjitoz të të zhvendosurve. Qeveria angazhohet për krijim të kushteve të cilat të kthyerve do tu garantojnë jetë të qetë të sigurtë dhe me perspektivë", tha Rexhepi.

Edhe administratori Holkeri theksoi rëndësinë e kësaj çështjeje si një ndër tetë standardet që duhet të plotësohen.

 

 

Nano tha në një tribunë se Kosova tashmë e ka kalaur fazën e emergjencës

 

Prishtinë, 2 mars - Kryeministri i Shqipërisë Fatos Nano dje pasdite mori pjesë në një tribunë me pjesëmarrjen e intelektualëve dhe analistëve të politikës së mediave. Ai me këtë rast foli në temën: "Integrimet evroatlantike të Shqipërisë".

 

Në këtë temë Nano ka vlerësuar se Kosova tashmë e ka kalaur fazën e emergjencës, apo atë që ai e ka quajtur fazë e solidaritetit. Sipas tij Kosova ndodhet në një periudhë tejet delikate, ngase aktualisht është koha e angazhimit të përbashkët të institucioneve ndërkombëtare dhe atyre vendore për të përmbushur standardet e përcaktuara nga bashkësia ndërkombëtare".

 

Ai ka shfaqur besimin se diku në gjysmën parë të vitit 2005 afrohet faza e tretë, ajo e statusit përfundimtar të Kosovës. Nano është angazhuar për një ekonomi për një ekonomi të hapur, për një shoqëri të tregut të lirë, për institucione demokratike, administratë civile, për siguri të kufijve e të tjerë.

Ai ka folur edhe për realitetin aktual në Shqipëri dhe ka thënë se pavarësisht nga kundërshtimet e shumta politike atje, të gjitha forcat politike në Shqipëri kanë një synim të përbashkët: integrimin e Shqipërisë në strukturat evroatlantike.

Këtë tryezë të rrumbullakët e organizoi Aksioni për Nisma Qytetare në Prishtinë.

 

 

Banka Botërore ka ndarë 15 milionë dollarë ndihmë në fushat e menaxhimit të financave publike në Kosovë

 

Prishtinë, 2 mars - Banka Botërore e ka mbështetur financiarisht Kosovën me 15 milionë dollarë në 18 muajtë e ardhshëm. Këtë lajm e konfirmoi në takimin me ministrin e Financave Ali Sadriun përfaqësuesi i Bankës Botërore për Kosovë Sidi Bubakar.

 

Me këtë rast u diskutuan çështjet aktuale të ekonomisë së Kosovës dhe mënyrat e vazhdimit të asistencës dhe mbështetjes së Bankës Botërore.

Ministri Sadriu tha se nga përfaqësuesi i Bankës Botërore mori informatën se Kosovës i dedikohen për 18 muajtë e ardhshëm 15 dollarë ndihmë në fushat e menaxhimit të financave publike dhe krijimin e një ambienti të mirë të biznesit.

 

Përveç ndihmës për ndërmarrjet e vogla dhe të mesme, asistenca në periudhën afatmesme do të dedikohet edhe për zhvillim të sektorëve në bujqësi, enrgjetikë dhe miniera, ka thënë ministri Sadriu.

Ndërkaq z. Bubakar tha se ka marrë shumë këshilla nga Ministria e Financave lidhur me draftin e strategjisë, dhe se ekipi i tij do të kthehet në Uashington për të inkorporuar të gjitha këto komente, duke shpresuar se do të gjejë mënyra për të vazhduar mbështetjen e nevojshme për Kosovën.

 

 

Takimi për energjetikë ndërmjet Prishtinës dhe Beogradit do të mbahet të enjtën

 

Prishtinë, 2 mars - Zëdhënësja e UNMIK-ut Izabela Karlovic ka konfirmuar se takimi i nëngrupeve të punës për energjetikë ndërmjet Prishtinës dhe Beogradit do të mbahet të enjtën në Prishtinë, por pa dhënë detaje të tjera.

 

Ajo ka shtuar se të gjitha detajet do të bëhen të ditura të mërkurën.

Takimi tjetër i paraparë që të disutohet çështja e të zhdukurve të luftës është shtyrë ngase anëtarët shqiptarë të grupit në Prishtinë kanë dhënë dorëheqje, duke u solidarizuar me thirrjet e nënave të familjarëve të zhdukur se fati i këtyre personave nuk mund të trajtohet si një çështje teknike.

Ndërkaq, zyrtarët e UNMIK-ut thonë se po bëhen përpjekje që takimi për të zhdukurit të organizohet më 9 mars në Beograd.

 

 

Punëtorët e gjyqësisë i dhanë fund grevës

 

Prishtinë, 2 mars - Punëtorët e Gjykatave të Kosovës i dhanë fund grevës një javore pas premtimeve të institucioneve të Kosovës se kërkesat e tyre që kanë të bëjnë me rritjen e pagave do të realizohen. Udhëheqësit e këshillit grevist thanë sot se greva ndërpritet për kohë të pacaktuar dhe ajo mund të fillojë përsëri nëse kërkesat nuk realizohen.

Punëtorët e administratës së gjykatave dhe prokurorive, në shumë komuna të Kosovës, i dhanë fund grevës njëjavore pas një takimi të zhvilluar dje me drejtues të Ministrisë së Shërbimeve Publike. Naim Shala, udhëheqës i këshillit grevist tha se në takimin e djeshëm janë dhënë premtime të arsyeshme se do të punohet në realizmin e kërkesave të punëtorëve të gjykatave në një afat të shkurtër.

 

Sipas tij institucionet e Kosovës kanë kohë të majftueshme që me një angazhim më të shtuar të realizojnë kërkesat e punëtorëve të gjykatave që kanë të bëjnë kryesisht me nivelizimin dhe ngritjen e pagave.

 

 

Novicki ka reaguar ndaj një deklarate të Melihate Tërmkollit

 

Prishtinë, 2 mars - Ombudspersoni i Kosovës Marek Atnoni Novicki ka reaguar ndaj një deklarate të Melihate Tërmkollit, kryetare e Komisionit për Barazi të Gjinive, gjatë promovimit të Projektligjit për Barazi të Gjinive, e cila kinse e ka akuzuar Ombudspersonin për shkelje flagrante të të drejtave të njeriut.

"Kjo deklaratë, përveç që ishtë e gabueshme dhe shpifëse për punën e Institucionit të Ombudspersonit, ishte edhe e befasueshme për mua. Ajo zbulon që edhe anëtarët e Kuvendit të Kosovës, në veçanti ata që supozohet të jenë të përfshirë në promovimin e të drejtave të njeriut, si duket nuk hamenden të kritikojnë gjërat të cilat, si duket, nuk i kanë kuptuar në tërësi", thuhet në reagimin e Novickit.

"Është fakt që une e kam kritikuar Projektligjin e ri për Barazi të Gjinive, por jo për shkak të caqeve dhe qëllimit të tij, të cilin unë e përkrah në masë të madhe, por për shkak që Projektligji përfshin edhe themelimin e një Ombudspersoni të ri të specializuar në mbrojtjen e barazisë së gjinive", thotë Novicki.

"E përsëris dëshpërimin tim rreth vërejtjeve të gabueshme dhe diskredituese të znj. Tërmkolli rreth Ombudspersonit dhe punës së tij dhe shpresoj që ato nuk do të jenë shkatërruese për bashkëpunimin e mëtutjeshëm mes Institucionit të Ombudspersonit dhe Kuvendit të Kosovës", thekson mes tjerash në reagimin e tij Ombudspersoni i Kosovës, Marek Antoni Novicki.

 

 

Kryetarë komunash nga Kosova në vizitë në SHBA

 

Uashington, 2 mars - Ka disa ditë që nje grup zyrtarësh të lartë bashkiakë shqiptarë e serbë nga Kosova ndodhet në Shtetet e Bashkuara në kuadër të një programi katërjavor për specializim e shkëmbim përvoje.

 

Programi ku marrin pjesë 15 kryetarë komunash, financohet nga Departamenti amerikan i Shtetit, dhe zhvillohet me ndërmjetsinë e qendrës ndërkulturore pranë universitetit Xhorxhtaun dhe shoqatës lobiste, Këshillit Kombëtar Shqiptaro Amerikan.

Pjesë e këtij programi ishte edhe diskutimi zhvilluar këto ditë në qëndrën Udrou Uillson në Uashington. Kryetarët e komunave, shqiptare e serbe u përpoqën të shprehnim shqetësimet me te cilat ndeshen zonat e tyre. Dhe problemet që ata shtruan ishin të shumta e ndonjëhere krejt të ndryshme, në varësi me përkatësinë e tyre etnike.

Pa mohuar ndihmën e dhënë nga komuniteti ndërkombetar, Kryetari i Komunës së Prishtinës, Ismet Beqiri foli rreth veshtirësive në infrastrukturë; furnizimin me ujë dhe energji, dhe shtoi se gjatë programit në Shtete e Bashkuara dhe vizitave në bashkitë e qyteteve të ndryshme do të përpiqet të mësoje nga përvoja e kolegëve të tij amerikanë.

Kryetari i komunës së Suharekës, Sali Asllanaj tha se komuna e tij ndeshet me problemin e papunësise, dhe shtoi se statusi ende i papërcaktuar i Kosovës vazhdon të shkurajojë investuesit vendas e të huaj për zhvillime në ekonomi.

Ndërsa, Agim Veliu, kryetar i Komunës së Podujevës u shpreh i pakënaqur me ecurinë e procesit të privatizimit. Ai tha se shumë ndërmarrje ose prona të përfshira në listat e privatizimit tashmë mbahen të bllokuara, megjithë aftësitë e tyre prodhuese.

"Problemet ekonomike dhe papunësia përbëjnë shqetësim edhe për banorët e Leposaviçit", tha kryetari Velimir Bojoviç, i kësaj komune të banuar kryesisht nga serbë.

 

Por zoti Bojoviç është kunder vazhdimit ose shpejtimit të procesit të privatizimit të pronave, ndërkohë që sipas tij, rreth 200 mijë serbë të Kosovës ende ndodhen në qendra refugjatesh në Serbi. "Në se kryehet procesi i privatizimit, atehere çdo të ndodhte me pronat e braktisura të serbëve të shpërngulur", pyet i shqetesuar zoti Bojoviç.

Debati vazhdoi gjatë me pyetje, përgjigje e kundërpërgjigje, në kerkim të rrugëve për përmirësimin e gjendjes.

Drejtori i zyrës për studime evropiano lindore,pranë qëndrës Udrou Uillson, Martin Stelzinger thotë se çështjet dhe problemet që e shqetësojnë Kosoven dhe banorët e saj njihen prej kohësh thuajse nga të gjithë.

 

Prandaj, qellimi i kësaj tryeze të rrumbullaket ishte më tepër nxitja e dialogut të hapur shqiptaro serb në nivel ndërkomunal, dhe paraqitja e problemeve nga një këndvështrim sa më i përbashkët@, thotë zoti Stelzinger.

Tryeza e rrumbullakët u drejtua nga Mark Baskin, ish administratori i Unmikut për Prizrenin gjatë viteve 1999-2000 dhe njohës nga afër i problemeve të rajonit, thuhet në një njoftim të Z.A.

 

 

Varrimi i Presidentit të Maqedonisë do të bëhet të premtën

 

Shkup, 2 mars - Qeveria e Maqedonisë dje pasdite ka marrë konfirmim zyrtar se është bërë identifikimi i trupit të pajetë të Presdientit maqedonas Boris Trajkovski, i cili humbi jetën tragjikisht gjatë rrëzimit të aeroplanit në afërsi të Mostarit.

 

Bëhet e ditur se trupat e pajetë të Presidentit të ndjerë Trajkovski dhe shoqëruesve të tij të mërkurën do të sillen në Shkup, ndërkaq të premtën do të bëhet ceremonia e varrimit.

Varrimi i Presidentit të ndjerë Trajskovski do të bëhet të premtën në varrezat e Butelit në Shkup në Alenë e kolosëve me nderime të larta shtetërore dhe ushtarake. Ndërkaq, varrimi i tetë anëtarëve të kabinetit të Trajkovskit do të bëhet të enjten.

Deri më tash pjesëmarrjen në varrimin e presidentit të ndjerë Trajkovski e kanë paralajmëruar më shumë se 20 udhëheqës të shteteve ose qeverive të vendeve të rajonit dhe Evropës.

 

 

Cërvenkovski kërkoi nga kreu i NATO-s të sqarime për aksidentin ajrore ku humbi jetën Trajkovski

 

Shkup, 2 mars - Kryeministri i Maqedonisë Branko Cërvenkovski u ka kërkuar zyrtarëve të NATO-s të ndihmojnë në sqarimin e rrethanave që përcollën vdekjen e presidentit Boris Trajkovski. Cërvenkovski në një letër dërguar sekretarit të përgjithshëm të NATO-s Shefer kërkoi që personalisht të sigurohet që NATO-ja plotësisht të bashkëpunojë me hetimet zyrtare lidhur me rrëzimin e aeroplanit në Bosnje.

 

"Në asnjë mënyrë askush nuk mund t'i shmanget përgjegjësisë për rrëzimin e aeroplanit", ka thënë Cërvenkovski. Ai madje ka kërkuar që Aleanca t'i vërë në dispozicion të gjitha të dhënat relevante për aksidentin e rrëzimit të aeroplanit, ku humbi jetën presidenti Boris Trajkovski.

 

 

Në katër shpërthimet në Bagdad janë vrarë të pakten 75 njerëz

 

Bagdad, 2 mars - Në katër shpërthimet, që ndodhen sot në një xhami shiite në Bagdad, janë vrarë të pakten 75 njerëz, kanë thënë zyrtarët e spitalit të afërm, njofton Rojter. Në njoftim thuhet gjithashtu së të 75 trupat e pajetë ndodhen në morgun e spitalit.

 

 

Në Qerbela janë vrarë të pakten 50 njerëz

 

Qerbela, 2 mars - Në shpërthimet e sotme raketore në dhe rreth një spitali në qytetin irakian Qerbela, kur rreth një milion shit festonin Ditën e sotme të Shenjtë të tyre, janë vrarë të pakten 50 njerëz, trupat e pajetë të të cilëve janë parë në morgun e spitalit, njofton AFP. Mjekët kanë thënë se presin që numri i viktimave të jetë rreth 100 sosh.

 

 

Të paktën 25 njerëz janë vrarë në pesë shpërthimet në qytetin e shenjtë Qerbela

 

Qerbela, 2 mars - Të paktën 25 njerëz janë vrarë në pesë shpërthimet që ndodhën sot në mëngjes në qytetin e shenjtë shiit Qerbela, në të cilin mbi një milion besimtarë po festonin kremtën e tyre fetare, njofton Rojter.

Pas shpërthimeve në Qerbela mbretëronte panik. Besimtarët ishin mbledhur të martën në Qerbela gjatë festës së ashurës, përkatësisht në shënimin e përvjetorit të vrasjes së imamit Huesin, nip i profetiti Muhamet, i varrosur në këtë qytet të shenjtë. Sipas njoftimeve bëhet fjalë për shpërthime të automobilave bombë afër mauzoleut të Huseinit.

 

 

Në një atentat të sotëm është vrarë këshilltari i Arafatit

 

Gaza, 2 mars - Një person i armatosur e ka vrarë me armë zjarri këshilltarin për media të liderit palestinez, Jaser Arafat në një atentat të sotëm (e martë), njofton BBCword.

 

Atentati ka ndodhur jashtë zyës zyrës së Arafatit në qytetin Gaza. I vrari Hlil al-Zaben ka qenë gazetar i shquar, i cili gjithashtu ka qenë këshiltar i Arafatit për të drejta të njeriut. Ai është qëlluar me dhjetëra plumba kanë thënë burimet zyrtare palestineze.

I njëjti burim thotë se forcat izraelite kanë vrarë po sot një palestinez të paarmatosur në Bregun Perendimor gjatë një operacioni arrestimi.

 

 

Shëprthim në Bagdad - 33 të vrarë

 

Bagdad, 2 mars - Të paktën 33 njerëz janë vrarë sot nga shpërthimet në një xhami të shenjtë shiite në Bagdad, thanë burimet spitalore, njofton Rojter. Ata kanë thënë se tashmë 33 trupa ndodhen në morgun e spitalit.

 

 

Vritet një ushtar amerikan në Bagdad

 

Bagdad, 2 mars - Një ushtar amerikan është vrarë dhe një tjetër është plagosur kur kryengritësit kanë hedhur një bombë mbi automjetin e tyre, ka thënë zëdhënësi ushtarak amerikan. Ai ka shtuar se bomba ka shkatërruar automjetin që e drejtonin ushtarët në Bagdad, njofton Rojter.

 

 

Uashingtoni hedh poshtë akuzat e ish-presidentit haitian

 

Uashington, 2 mars - Zyrtarë të lartë të administratës së Presidentit Bush mohuan me forcë pohimet e ish presidentit haitian, Zhan Bertrand Aristide, se Shtetet e Bashkuara e detyruan atë të jepte dorëheqjen.

Zëdhënësi i Shtëpisë së Bardhë, Skot Meklelen, i cilësoi akuzat si absurde. Ai tha se zyra e zotit Aristide kishte rënë në kontakt me ambasadën amerikane në Porto-Prense para se ai të jepte dorëheqjen dhe kishte kërkuar ndihmën amerikane për t=u larguar nga vendi.

Edhe Sekretari i Shtetit Kolin Pauëll i cilësoi akuzat si qesharake. Ai tha se Uashingtoi dërgoi një avion për ta marrë zotin Aristide pasi ai kishte dhënë dorëheqjen.

 

 

Shtetet e Bashkuara përshëndesin kushtetutën e përkohshme irakiane

 

Uashington, 2 mars - Administrata e Presidentit Bush përshëndeti miratimin e kushtetutës së përkohshme nga Këshilli Qeverisës irakian. Sekretari i Mbrojtjes Donald Ramsfeld e quajti ditën e hënë ditë historike për popullin e Irakut.

 

Ai tha se garancitë për të drejtat e njeriut të përfshira në këtë dokument janë të pashmebullta jo vetëm për Irakun por për gjithë Lindjen e Mesme.

Këshilli Qeverisë prej 25 anëtarësh arriti marrëveshjen të hënën pas disa ditë debatesh shpesh herë të zjarrta nën mbikëqyrjen e administratorit amerikan në Irak, Paul Bremer.

 

 

Amerikanët do të ndërhyjnë në Haiti

 

Uashington, 2 mars - Shtetet e Bashkuara thonë se do të përdorin trupat e tyre për të vendosur rendin në Haiti.

Por, Uashingtoni thekson se situata në këtë vend nuk është një çështje e Uashingtoinit, por një çështje për të gjithë kontinentin amerikan.

Sekretari i mbrojtjes, Donald Rumsfeld, tha se mbi dy mijë trupa amerikane mund të dislokoheshin në Haiti.
Por këto do të ishin vetëm një fraksion i forcës paqeruajtëse të Kombeve të Bashkuara.

Zyrtarët amerikanë thanë se donin të takoheshin me një grup haitianësh me influencë për të parë, se cilat ishin nevojat më emergjente.

 

 

BE vendos sanksione tregtare ndaj Shteteve të Bashkuara të Amerikës

 

Bruksel, 2 mars - Bashkimi Evropian ka vendosur sanksione tregtare ndaj Shteteve të Bashkuara të Amerikës të para në historinë e marrëdhënieve ndëratlantike, kanë njoftuar mbrëmë masmediat e huaja.

Uashingtoni ka shprehur keqardhje për vendimin e Bashkimit Evropian të vendosë sanksione tregtare kundër Shteteve të Bashkura të Amerikës. Komesioneri i BE-së për Tregti, Paskal Lami tha se sanksionet do të ngriten kur Shtetet e Bashkuara t'i ndryshojnë ligjet kontestuese.

 

Sa më shpejt që ata e tërheqin ligjin aq më parë do të ngriten sanksionet. Ai ka thënë se është i gatshëm t'i tërheqë sanksionet në ditën kur presidenti i Shteteve të Bashkuara ta tërheq ligjin, ka thënë Lami.

Ndërkaq, zëdhënësja e Komisionit Evropian tha se BE nuk kishte zgjidhje pasi priti dy vjet që SHBA-të ta ndryshojnë ligjin i cili kompanive amerikane u mundëson përfitime nga taksat e reduktuara dhe eksporti.

 

 

Në disa shpërthime në Bagdad e Qerbela janë vrarë të pakten 124 njerëz

 

Bagdad, Qerbela 2 mars - Në disa shpërthimet që ndodhen sot në një xhami shiite në Bagdad dhe në Qerbela, janë vrarë të pakten 124 njerëz, njofton Rojter.

Trupat polake në Qerbela dhe trupat amerikane në Bagdad kanë thënë se shpërthimet janë shkaktuar nga sulmet me mortaja që kanë të sinkronizuara kudnër shiitëve.

Trupat amerikane thanë se muajin e kaluar kanë guerilët e Al Kaidës kishin planifikuar të sulmojnë shiitët.

Të paktën pesë shpërthime kanë tronditur Qerbelanë, qytet i shenjtë ku ndodheshin mbi dy milionë shiitë të Irakut dhe Iranit. Koloneli Raed Nabil, shef i policisë së qytetit, tha se të paktën 70 irakianë dhe iranianë janë vrarë në këto sulme.

 

 

Persona të armatosur kanë vrarë 29 persona në Pakistan

 

Kueta, Pakistan, 2 mars - Persona të armatosur kanë hapur zjarr sot (e martë) kundër besimtarëve muslimanë shiitë gjatë një rituali religjioz në qytetin Kueta në jugperendim të Pakistanit dhe kështu kanë vrarë 29 persona dhe kanë plagosur mbi 150 të tjerë, ka bërë të ditur prefekti i qytetit, njofton AP.

 

 

Persona të armatosur kanë vrarë 17 persona në Pakistan

 

Kueta, Pakistan, 2 mars - Persona të armatosur kanë hapur zjarr sot (e martë) kundër besimtarëve muslimanë shiitë gjatë një rituali religjioz në qytetin Kueta në jugperendim të Pakistanit dhe kështu kanë vrarë 17 persona dhe kanë plagosur 33 të tjerë, kanë bërë të ditur zyrtarët e qytetit, njofton Rojter. Në qytet është shpallur ora policore, por ende nuk është arrestuar askush.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |