Përmbajtja:

• Zyra e Presidentit Rugova dënon ndalimin e gjeneral Çekut nga autoritetet hungareze

• B. Rexhepi: Bashkësia ndërkombëtare duhet ta detyrojë Serbinë t'i tërheqë fletarrestet ndaj personaliteteve në Kosovë

• BE do të shfrytëzojë autoritetin që akuzat e Beogradit ndaj personaliteteve të Kosovës të zhduken nga rrjetet e Interpolit

• Brajshou vizitoi komunën e Prizrenit

• Gjilan: UNMIK-u nuk lejon komunën të ndajë mjete për TMK-në

• Gjeneral Agim Çeku u kthye në Prishtinë: letë të jetë kjo hera e fundit

• Sot hyri në fuqi Kodi i ri doganor në Kosovë

• Pas ndalimit disaorësh, autoritetet hungareze kanë liruar komandantin e TMK-së Agim Çeku

• Fatos Nano e filloi vizitën dyditëshe në Kosovë

• Takim promovues kushtuar Ligjit për barazi gjinore

• Podujevë: Përmbytjet kanë shkaktuar probleme të mëdha

• Fatos Nano sot arrin për një vizitë dyditëshe në Kosovë

• Dyzetë pjesëtarë të TMK-së u kthyen dje nga një trajnim në Çeki

• Në Gjykatën e Qarkut në Gjilan po mbahen dy procese gjyqësore ndaj shqiptarëve të Luginës së Preshevës

• Pandeli Majko në Shkup ka shprehur ngushëllime për vdekjen tragjike të presidentit Trajkovski

• Shkupi akuzon SFOR-in për gabime në komunikime pas përplasjes së aeroplanit që shkaktoi vdekjen e Trajkovskit

• Presidenti i Haitit ka mbërritur sot në Republikën Qendrore të Afrikës

• Marinsat amerikanë në Haiti

• 11 Oskarë për Lord of the Rings

• Marrëveshje për kushtetutën e përkohshme në Irak

• Uashingtoni i shqetësuar për përqëndrimin e madh të pushtetet në Kremlin

• Putin ka propozuar kandidatin për kryeministër të Rusisë

Zyra e Presidentit Rugova dënon ndalimin e gjeneral Çekut nga autoritetet hungareze

 

Prishtinë, 1 mars 2004 - Muhamet Hamiti, zëdhënës i Presidentit të Kosovës Ibrahim Rugova, ka lëshuar dje një deklaratë, me të cilën dënohet ndalimi i gjeneral Agim Çekut, komandant i përgjithshëm i Trupave të Mbrojtjes së Kosovës (TMK), nga autoritetet hungareze.

Në deklaratën e zëdhënësit Hamiti thuhet:

"Presidenti Ibrahim Rugova e dënon ashpër ndalimin e gjeneral Agim Çekut nga autoritetet hungareze.
Ndalimi i gjeneral Çekut është akt i papranueshëm për institucionet dhe popullin e Kosovës, ka thënë Presidenti Rugova.

Autoritetet hungareze nuk kanë të drejtë që mbi baza të akuzave të konstruktuara të një shtetit fqi të Kosovës, që ka qenë okupator i vendit tonë, të ndalojnë qytetarë të Kosovës, personalitete të shquara apo bartës të funksioneve të rëndësishme të Kosovës.

Për popullin e Kosovës fletarrestet e Beogradit janë të papranueshme.

Prandaj, Presidenti i Kosovës Ibrahim Rugova kërkon nga autoritetet hungareze që të lirojnë menjëherë gjeneral Agim Çekun dhe ta trajtojnë atë në pajtim me personalitetin e tij dhe postin që ai mban në Trupat e Mbrojtjes së Kosovës", thuhet në fund të deklaratës së zëdhënësit të Presidentit të Kosovës.

 

 

B. Rexhepi: Bashkësia ndërkombëtare duhet ta detyrojë Serbinë t'i tërheqë fletarrestet ndaj personaliteteve në Kosovë

 

Prishtinë, 1 mars 2004 - Kryeministri i Kosovës, Bajram Rexhepi ka deklaruar se bashkësia ndërkombëtare duhet ta detyrojë Serbinë t'i tërheq fletarrestet ndaj personaliteteve në Kosovë. Ai ka theksuar se arrestimi i sërishëm i komandantit të TMK-së, Agim Çeku mund ta rrezikojë edhe takimin e 4 marsit të grupeve të punës ndërmjet Prishtinës dhe Beogradit.

 

Kryeministri Rexhepi thotë se këto arrestime për shkak të presionit të pamjaftueshëm presioni të pamjaftueshëm të bashkësisë ndërkombëtare kundër Serbisë për të tërhequr fletarrestet banale dhe për shuarjen e strukturave paralele.

Kryeministri Rexhepi ka thënë se gjatë qëndrimit në Itali ka realizuar një vizitë të suksesshme si në aspektin politik ashtu edhe në atë ekonomik.

Këto komenti ai i bëri dje në aeroportin e Prishtinës me t'u kthyer nga Italia, ku siç tha ka realizuar një vizitë të suksesshme si në aspektin ekonomik ashtu edhe në atë politik. Është kërkuar që Italia të jetë shumë më aktivisht e kyçur në rrjedhat aktuale politike në Kosovë dhe në rajon.

 

 

BE do të shfrytëzojë autoritetin që akuzat e Beogradit ndaj personaliteteve të Kosovës të zhduken nga rrjetet e Interpolit

 

Bruksel, 1 mars 2004 - Zyrtarët e Bashkimit Evropian thonë se gjëra të tilla si arrestimi i gjeneral Çekut nuk do të ndodhin më as atij, por as edhe ndaj politikanëve të tjerë nga Kosova. Ata kanë përcjellë ngjarjet e ditës së djeshme dhe faktin se është përsëritur i njëjti skenar si në Slloveni me shumë shqetësim.

Zyrtarët e BE-së përsëritën qëndrimin se nuk përkrahin metoda të këtilla, sidomos kur bëhet fjalë për akuza të ngritura që nga koha e sundimit të regjimit të Milosheviqit dhe në këtë kuadër nga Brukseli premtohet se komandanti i forcave të TMK-së, gjenerali Agim Çeku apo cilido individ që në këtë mënyrë është i akuzuar në Beograd nuk do të ballafaqohet më me momente të këtilla të pakëndshme, siç ndodhi dy herë në Lubjanë dhe Budapest.

 

BE siguron se do të shfrytëzojë tërë autoritetin në mënyrë që akuza të tilla të zhdukën nga rrjetet e Interpolit.

 

 

Brajshou vizitoi komunën e Prizrenit

 

Prishtinë, 1 mars 2004 - Zv.kryeadministratori i Kosovës Çarlls Brajshou vizitoi sot Kuvendin e komunës së Prizrenit ku bisedoi me kyetarin e saj Eqrem Kryeziu. Brajshou vlerësoi punën dhe aktvitetin dhe komunës së Prizrenit dhe theksoi se ajo njihet si e para në Kosovë në realizimin e projekteve.

Duke folur për institucionet paralele, Brajshou tha se ato janë formuar në mënyrë ilegale. "Ne e dimë se ka institucione paralele nëpër Kosovë dhe Hari Holkeri në Këshillin e Sigurimit e ka bërë këtë të qartë se këto institucione janë kundër interesave të të gjithë banorëve të Kosovës, madje edhe kundër komuniteteve".

 

Ai tha se këto institucione kryesisht janë ilegale dhe janë kundër interesave të komuniteteve në emër të cilave thirren se janë në shërbim të tyre.

Brajshou me këtë rast vizitoi fshatin Novak i banuar me serbë për t'u njohur me jetën dhe problemet e tyre, ku kanë filluar kthimin nëpër shtëpitë e tyre vitin e kaluar, si dhe romët e kthyer në Landovicë.

 

 

Gjilan: UNMIK-u nuk lejon komunën të ndajë mjete për TMK-në

 

Gjilan, 1 mars 2004 - Komuna e Gjilanit i ka planifikuar në buxhetin e sivjetëm 210 mijë euro për infrastrukturën e TMK-së, por ky fakt e ka nxitur këshilltarin e UNMIK-ut, Sharl Mesie që të reagojë në seancën e fundit të Kuvendit dhe të kërkojë nga anëtarët e asamblesë që të rishikojnë edhe njëherë këtë pozicion para se ta miratojnë buxhetin e specifikuar.

TMK-ja është përgjegjësi e rezervuar e UNMIK-ut dhe komunat nuk kanë të drejtë të ndajnë mjete, ka thënë Mesie, duke e përsëritur vërejtjen që më herët e kishte bërë edhe në Komitetin për politikë dhe financa.

Kryeshefi ekzekutiv Enver Muja tha se planifikimi i mjeteve për TMK-në është bërë në bazë të vullnetit politik të qytetarëve të Gjilanit, të cilët kanë shprehur dëshirën që të ndihohet në ndërtimin e kazermës së ngelur në gjysmë.

Muja ka sqaruar se përkundër faktit që komuna i ka paraparë 210 mijë euro për kazermën e TMK-së, kryeadministratori i Kosovës, Hari Holkeri ka të drejtë ta anulojë këtë pozicion dhe të ndërmarrë edhe masa tjera, nëse vlerëson se ndarja e buxhetit nuk është bërë në bazë të kritereve të caktuara.

Sidoqoftë ai propozoi që këshilltarët ta miratojnë buxhetin e specifikuar, me pozicionin e mjeteve të parapara për TMK-në, por duke e vënë pranë sqarimin se kjo shumë mund t`i bartet TMK-së, nëse kryeadministratrori dhe Ministria e Ekonomisë dhe Financave japin lejen për këtë.

 

 

Gjeneral Agim Çeku u kthye në Prishtinë: letë të jetë kjo hera e fundit

 

Prishtinë, 1 mars 2004 - Rreth orës 15.00, sot në aeroportin e Prishtinës u kthye komandanti i TMK-së gjeneral Agim Çeku, i cili dje u ndalua për disa orë nga autoritetet kufitare hungareze në aeroportin e Budapestit.

Me të zbritur nga avioni, gjenerali Çeku deklaroi para mediave se nuk ka asnjë sqarim dhe asnjë koment përveç atij që ka bërë para katër muajve kur gjithashtu ishte ndaluar për të njëjtat arsye në Slloveni. Ky është rasti i njëjtë dhe i njëjti arsyetim, u shpreh Çeku.

Me këtë rast gjeneral Çeku u shprehu mirënjohje të gjithë faktorëve ndërkombëtarë dhe vendorë që janë angazhuar për lirimin e tij, duke uruar që kjo të jetë hera e fundit.

Kjo është bërë e tepërt dhe theksoi se UNMIK-u, Departamenti i Drejtësisë, policia e UNMIK-ut duhet të bëjnë diçka që kjo të ndërpritet dhe të zhvleftësohen fletarrestet serbe.

Gjenerali Agim Çeku në aeroportin e Prishtinës u prit nga eprorët e lartë të TMK-së dhe shumë qytetarë.

 

 

Sot hyri në fuqi Kodi i ri doganor në Kosovë

 

Prishtinë, 1 mars 2004 - Sot ka hyrë në fuqi Kodi doganor, të cilin e kohë më parë e ka nënshkruar edhe kryeadministratori i Kosovës. Kodi i ri do të mundësojë një mbikëqyrje më të madhe të eksport-importit të mallrave nga Kosova dhe do të ndikojë dukshëm në rritjen e buxhetit të Kosovës.

Ky kod është një pjesë shumë e rëndësishme e legjislacionit dhe i plotëson të gjitha standardet evropiane si dhe ato të organizatave doganore botërore dhe përputhet me regullat moderne të doganave, tha Kris Pier Litie. Ai ndër gjërat më të rëndësishme vlerësoi provizionet të cilat do të ndihmojnë në zhvillimin ekonomik të vendit, si dhe të inkurajojë aktivitetet e importuesve.

 

"Ky kod është rregullluar dhe monitorohet gjatë gjithë kohës, çka do të thotë se kompanitë individuale do të monitorohen nga doganat. Kjo do të thotë se ato nuk mund të shtijnë mall në Kosovë pa paguar taksat. Ata pra do të paguajnë taksat për të gjitha komponentat që u duhen për prodhimin e produktit të tyre, ekskluzivisht për eksportim nga Kosova, e cila gjë do të bëjë një rritje financiare në buxhetin e përgjithshëm", tha Litie.

 

Çështje tjetër me rëndësi që përfshihet në këtë kod janë ndryshimet në garancionet bankare. Këto garancione dihet se nuk kanë qenë të mundëshme të bëhen deri më sot sepse sistemi bankar i garancioneve nuk ka ekzistuar, thotë Litier. "Tani ekziston edhe tranziti i të mirave materiale në garacinet bankare, sepse e dini se një gjë e tillë ka qenë e pamundur deri më tani, sepse sistemi i garancionit bankar në Kosovë nuk ka ekzistuar.

 

Kjo do të thotë se në të kaluarën çdo tranzicion i të mirave materile është dashur të bëhej nën mbikëqyrjen e doganës në mënyrë që të sigurohej fitimi, sepse ne duam të jemi të sigurtë që të gjitha të mirat materiale të cilat sillen në Kosovë, por që deklarohen si të mira materiale tranzitore, do ta lëshojnë Kosovën", tha Litie.

 

 

Pas ndalimit disaorësh, autoritetet hungareze kanë liruar komandantin e TMK-së Agim Çeku

 

Budapest - Prishtinë, 1 mars 2004 - Autoritetet e Hungarisë e kanë ndaluar dje në aereportin e Budapestit komandantin e TMK-së, gjeneral Agim Çekun, në bazë të një fletarresti lëshuar nga Beogradi të cilat e akuzojnë gjeneral Çekun për krime kundër serbëve në Kosovë.

 

Zyrtarët e Misionit të OKB-së në Kosovë thanë se kanë marrë njoftime nga Ministria e Jashtme e Hungarisë se gjeneral Çeku është liruar dhe ai sot do të kthehet në Kosovë.

Njoftohet se shefi i UNMIK-ut, Hari Holkeri ka biseduar personalisht në orët e pasditës së djeshme edhe me ministrin e Jshtëm të Hungarisë, i cili siç thuhet, e ka siguruar atë se gjeneral Çeku është i lirë dhe sot do të kthehet në Prishtinë.

Ndalimi i gjeneral Çekut ka nxitur reagime të rrepta të institucioneve vedndore në Kosovë, të cilat vëjnë në dukje me zemërim se kjo nuk është hera e parë që personalitete të Kosovës ndalohen në bazë të fletarresteve të Beogradit.

Një përvojë të ngjashme, gjeneral Çeku e përjetoi edhe në tetor të vitit të kaluar në Slloveni kur autoritetet e atjeshme e ndaluan atë më shumë se 12 orë në bazë të një fletarresti të lëshuar nga Beogradi.

 

 

Fatos Nano e filloi vizitën dyditëshe në Kosovë

 

Prizren, 1 mars 2004 - Kyeministri i Shqipërisë Fatos Nano, ndodhet për një vizitë dyditëshe në Kosovë. Pas mbërritjes në Prishtinë, Nano i shoqëruar nga kryeministri i Kosovës Bajram Rexhepi dhe Zv.kryeadministratori Çarlls Brajshou përuruan pikën e ronovuar doganore në Morinë.

Nano tha se kjo është një ngjarje e rëndësishme, cila do të thellojë dhe zgjerojë bashkëpunimin mes Shqipërisë dhe Kosovës.

Ndërkaq Bajram Rexhepi tha se vija kufitare e Morinës tashmë ka marrë pamjen e një pike moderne doganore. Edhe Brajshou mbështeti këtë projekt si dhe projektet e tjera që do të bëhen.

Këtë e projekt e ka financuar Banka Botërore me 900 mijë dollarë.

Kjo është vizita e parë e Kryeministrit shqiptar Fatos Nano në Kosovë.

 

 

Takim promovues kushtuar Ligjit për barazi gjinore

 

Prishtinë, 1 mars 2004 - Komisioni për Barazi Gjinore i Kuvendit të Kosovës dhe Zyra e Qeverisë për qeverisje të mirë, të drejta të njeriut, mundësi të barabarta dhe çështje gjinore mbajtën sot një takim promovues të Ligjit për barazi gjinore të miratuar nga Kuvendi i Kosovës.

 

Duke përshëndetur të pranishmit, Melihate Tërmkolli, kryetare e Komisionit për barazi gjinore të Kuvendit të Kosovës, theksoi se ky Kigj i aprovuar nga ana e Kuvendit të Kosovës dëshmon përkushtimin e institucioneve për realizimin e barazisë gjinore dhe për demokratizim të vendit. Ajo me këtë rast përshëndeti edhe të gjitha subjektet dhe ekspertët që kontribuan për hartimin e këtij ligji.

Në emër të Qeverisë së Kosovës, ministri i Arsimit, Rexhep Osmani, theksoi se ky Ligj është një argument i fuqishëm për të dëshmuar rëndësinë që institucionet tona i kushtojnë çështjes së barazisë gjinore në të gjitha segmentet e shoqërisë sonë. Realizimi i barazisë gjinore përbën edhe një fryt të arritjeve në realizimin e standardeve në Kosovë.

 

 

Podujevë: Përmbytjet kanë shkaktuar probleme të mëdha

 

Podujevë, 1 mars 2004 - Si pasojë e reshjeve të shiut dhe shkrirjes së borës ditëve të fundit përmbytjet kanë shkatuar probleme të mëdha në shumë fshatra të komunës së Podujevës, deklaroi sot drejtori i Drejtorisë për mbrojtje civile dhe emergjencë, Fatmir Gash. Situata aktuale është më e qetë sepse niveli i ujit ka rënë, mirëpo qytetarët po ballafaqohen me pasojat e vërshimeve dhe të përmbytjeve.

 

Raportet nga terreni njoftojnë se fshatrat më të goditura nga vërshimet e ditëve të fundit janë: Zhitia, Pollata, Metehia, Kërpimehu, Pakashtica, Zakuti, Dobërdoli, Bajçina, Bradashi, Letanci, Lupçi, Popova, Majaci, Sfeçla, Bellopoja dhe disa lagje në qytet.

 

Brigada e zjarrfikësve e Podujevës deri më sot ka interevenuar në 16 raste për thithjen e ujit nga vendbanimet dhe shtëpitë dhe në 3 raste ka evakuar familjarë nga shtëpitë ku kishte depërtuar uji, ndërkaq që NKPSH ka intervenuar në hapjen e kanalizimeve, lumenjve e përrockave në qytet dhe fshatra.

Përmbytjet kanë çrregulluar edhe procesin mësimor në disa shkolla të komunës së Podujevës. Në fshatin Popovë mësimi nuk po zhvillohet fare sepse uji ka depërtuar në lokalet e shkollës. Probleme ka edhe në Batllavë, Lluga, Lupç dhe Batllavë.

 

 

Fatos Nano sot arrin për një vizitë dyditëshe në Kosovë

 

Prishtinë, 1 mars 2004 - Kryeministri i Shqipërisë, Fatos Nano arrin sot për një vizitë dyditëshe në Kosovë. Ai do të marrë pjesë në ceremoninë e inaugurimit të pikës doganore në Morinë, si dhe do të zhvillojë takime me udhëheqësit më të lartë ndërkombëtarë e vendorë në Kosovë. Qëllimi i kësaj vizite është thellimi i bashkëpunimit ndërmjet UNMIK-ut dhe institucioneve vendore me Shqipërinë

 

 

Dyzetë pjesëtarë të TMK-së u kthyen dje nga një trajnim në Çeki

 

Prishtinë, 1 mars 2004 - Dyzetë pjesëtarë të Gardës së së TMK-së u kthyen dje nga një trajnim në Ostrava të Republikës Çeke, ku ishin për një kurs aftësimi në fushën e kërkim-shpëtimit dhe ndërhyrjes së shpejt. Ky është trajnimi i shtatë me radhë që TMK-ja realizon në këtë fushë dhe me këtë fundit përmbyllet ky cikël i trajnimeve të tilla jasht vendit.

 

 

Në Gjykatën e Qarkut në Gjilan po mbahen dy procese gjyqësore ndaj shqiptarëve të Luginës së Preshevës

 

Gjilan, 1 mars 2004 - Në Gjykatën e Qarkut në Gjilan po mbahen dy procese gjyqësore ndaj shqiptarëve të Luginës së Preshevës. Kështu më 7 mars të vitit 2003 në pikëkalimin kufitar ndërmjet Kosovës dhe Serbisë në magjistralen Gjilan - Bujanoc u vranë nga forcat serbe Shaban Bajrami dhe Besim Xhemaili me pretekst se ata kinse kanë sulmuar punktin policor të serbëve në këtë vendkalim kufitar.

 

Në Gjykatën e Qarkut në Gjilan po mbahen në arrest dhe po gjykohen babai dhe vëllai i Shaban Bajramit dhe Basri Xhemailit, të cilët po akuzohen për "terrorizëm, fabrikim dhe zotërim të materialit eksplodues me qëllim të kryerjes së atentateve terroriste".

Avokati mbrojtës në këtë proces dhe njëherësh edhe avokat mbrojtës në procesin kundër ish-komandantit të UÇPMB-së, Shefket Musliut, Halit Azemi thotë se klienti i tij Musliu ka thënë se incidenti në kufirin Kosovë-Serbi ka qenë atentat i përgatitur nga forcat serbe kundër tij.

 

 

 

Pandeli Majko në Shkup ka shprehur ngushëllime për vdekjen tragjike të presidentit Trajkovski

 

Shkup, 1 mars 2004 - Ministri shqiptar i Mbrojtjes Pandeli Majko është takuar dje në Shkup me homologun e tij maqedonas Vllado Buçkovski, të cilit i ka shprehur ngushëllimet e tij dhe të Qeverisë së Shqipërisë për vdekjen tragjike të presidentit të Maqedonisë Boris Trajkovski dhe shoqëruesve të tij.

 

Ministri Majko ka thënë se presidenti Trajkovski ishte arkitekt i bashkëjetesës në Ballkan. Ai ka shtuar se në ceremoninë e varrimit të Presidentit maqedonas do të marrë pjesë edhe delegacioni shqiptar në krye me presidentin Alfred Moisiu.

Ministri Majko nënshkroi në librin e ngushëllimit, ndërkaq homologu i tij maqedonas Buçkovski tha se Shqipëria e dëshmon se mike e sinqertë e Maqedonisë.

 

 

Shkupi akuzon SFOR-in për gabime në komunikime pas përplasjes së aeroplanit që shkaktoi vdekjen e Trajkovskit

 

Shkup, 1 mars 2004 - Kryeministri i Maqedonisë Branko Cërvenkovski nëpërmjet një kumtese të zyrës së tij ka akuzuar misionin paqeruajtës ndërkombëtar në Bosnje SFOR për gabime në komunikime pas përplasjes së aeroplanit që shkaktoi vdekjen e presidentit Boris Trajkovski. Kryeministri Cërvenkovski është takuar me një zyrtar të lartë të SFOR-it në Sarajevë për ta diskutuar këtë çështje. Në kumtesën e kryeministrisë së Maqedonisë thuhet se SFOR-i ka pranuar kritikat.

 

 

Presidenti i Haitit ka mbërritur sot në Republikën Qendrore të Afrikës

 

Bangui, 1 mars 2004 - Presidenti i Haitit Zhan Bernar Aristid, i cili është arratisur nga vendi i tij të dielën, ka mbërritur sot në kryeqytetin e Republikës Qendrore të Afrikës.

Dëshmitarët kanë thënë se e kanë parë Aristidin kur ka mbërritur në portin Mpoko. Atij mirëseardhje i ka uruar ministri për telekomunakacion Parfe Mbaje.

 

 

Marinsat amerikanë në Haiti

 

Port o Prens, 1 mars 2004 - Grupi i parë i disa qindra marinsave amerikanë, që janë urdhëruar të dislokohen në Haiti, ka mbërritur në kryeqytetin e vendit Port o Prens.

Detyra e tyre është të përgatisin terrenin për dislokimin e një force më të madhe paqeruajtëse, përfshirë forca franceze e kanadeze, dërgimin e ndihmave humanitare dhe mbrotjen e qytetarëve amerikanë.

Marinsat po dislokohen në një qytet ku mungon ligji. Megjithëse është vendosur një ndalim-qarkullimi gjatë natës në të gjithë kryeqytetin dëgjohen të shtëna armësh.

Banda të armatosura besnike të presidentit të larguar sillen ende nëpër rrugë, por tani nëpër rrugë ka edhe grupe që thonë se janë me forcat rebele që kontrollojnë veriun e vendit.

 

 

11 Oskarë për Lord of the Rings

 

Holivud, 1 mars 2004 - "The Return of the King" (Kthimi i Mbretit), pjesa e fundit e triologjisë epike "The Lord of the Rings" (I zoti i unazave), ka fituar çmimet Oscar si filmi më i mirë, si dhe për regjizorin më të mirë.

Ky film ishte paralajmëruar se do të merrte lavdinë në Ceremoninë e Çmimeve Oskar dhe ai fitoi në të 11 kategoritë në të cilat ishte kandiduar.

Kjo reflekton numrin e madh të shikuesve të filmit nëpër kinema duke nxjerrë fitime deri në një miliardë dollarë deri tani, diçka që është arritur vetëm nga filmi Titanik .

Çarliz Theron dhe Shon Pen fituan çmimet për aktoren dhe aktorin më të mirë përkatësisht në filmat "Monster" dhe "Mystic River".

Si Tim Robins ashtu edhe Rene Zelueger morën çmimet e para Oskar për rolet e tyre shoqëruese.
Tim Robins pritej të fitonte çmimin për portretizimin e tij prekës të një personi të dëmtuar emocionalish nga abuzimi me të gjatë fëmijërisë në filmin "Mystic River".

Dhe nuk u shpreh shumë çudi kur Rene Zelueger, e cila nuk ka mundur të marrë ndonjë çmim Oscar gjatë viteve të kaluara, fitoi çmimin për kategorinë e aktores më të mirë në rol shoqërues.

Ceremonia e këtij viti ka shënuar një kthim në shkëlqimin e zakonshëm për herë të parë që nga sulmet e 11 shtatorit në vitin 2001, dhe shumë aktorë ishin veshur me ngjyra të çelta dhe të shkëlqyera krahasuar me pamjen më serioze gjatë ceremonive të dy viteve të shkuara.

 

 

Marrëveshje për kushtetutën e përkohshme në Irak

 

Bagdad, 1 mars 2004 - Afati i vendosur nga administratori amerikan në Irak, Pol Bremer, që Këshilli Qeverisës Irakian të arrijë marrëveshje për kushtetutën kalimtare u kapërcye me një ditë.

Por pas diskutimesh intensive dhe mosmarrëveshjesh të thella lidhur me rolin e Islamit dhe nivelin e autonomisë për rajonet kurde, duket se është arritur një marrëveshje.

Kushtetuta, apo ligji administrativ kalimtar, është në fakt një dokument i përkohshëm që do të zbatohet vetëm deri kur të mbahen zgjedhjet kombëtare në Irak.

Por si koalicioni, ashtu edhe fraksionet irakiane të përfaqësuara në Këshillin Qeverisës Irakian besojnë se shumica e asaj që është përfshirë në këtë ligj do të mbetet edhe në kushtetutën përfundimtare.

 

 

Uashingtoni i shqetësuar për përqëndrimin e madh të pushtetet në Kremlin

 

Uashington, 1 mars 2004 - Këshilltarja amerikane për siguri kombëtare Kondoliza Rajs ka deklaruar se ekzistojnë "arsye të mira për shqetësim" sa i përket Rusisë, për shkak të rrezikut nga "përqendrimi tepër i madh i numrit të autorizimeve në Kremlin".

"Ekzistojnë arsye të mira që të jemi të shqetësuar dhe këtë ia kemi bërë me dije krerëve rusë", ka thënë zonja Rajs për gazetën gjermane "Velt", duke u përgjegjur në pyetjen nëse e shqetëson Rusia kur është fjala për demokracinë në atë vend.

Rajs ka thënë se "vërehen disa trende shqetësuese, sidomos Presidenca e fuqishme së cilës asnjë institucion nuk është në gjendje t'i kundërvehet. Duma ka ndikim të dobët. Judikatura, sipas shumë ekspertëve, vetëm sa nuk e ka humbur mëvetësinë, ndërkaq një pjesë e ish-media të pavarura elektronike sot në pjesën më të madhe kontrollohen nga shteti", ka thënë Rajs.

 

 

Putin ka propozuar kandidatin për kryeministër të Rusisë

 

Moskë, 1 mars 2004 - Presidenti rus Vladimir Putin ka propozuar Mihal Fradkovin për kryeministër të Rusisë. Fjala është për një zgjedhje të papritur, meqenëse Fradkov nuk ka qenë më mesin e kandidatëve në të cilët kanë bërë me dije analistët rusë. Fradkov aktualisht është përfaqësues i Rusisë në Bashkimin Evropian.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |