Podujevë: Vërshimet kanë shkaktuar çrregullime dhe probleme të mëdha

Dy lajme nga Podujeva

Podujevë: Vërshimet kanë shkaktuar çrregullime dhe probleme të mëdha

Podujevë, 1 mars 2004 (TN) - Si pasojë e reshjeve të shiut dhe shkrirjes së borës ditëve të fundit vërshimet kanë shkatuar probleme të mëdha në shumë fshatra të komunës së Podujevës, deklaroi sot drejtori i Drejtorisë për mbrojtje civile dhe emergjencë Fatmir Gashi në takimin me zv. kryetarin e komunës z. Agim Kikaj dhe u.d të Kryeshefit të Ekzekutivit Mehmet Gashin ku u shqyrtua ecuria dhe zhvillimet pas përmbytjeve dhe motiti të lig që vazhdon të mbretërojë në rajonin e Llapit.

z. Gashi tha se situata aktuale është më e qetë sepse niveli i ujit ka rënë, mirëpo qytetarët po ballafaqohen me pasojat e vërshimeve dhe të përmbytjeve. Raportet nga terreni njoftojnë se fshatrat më të goditura nga vërshimet e ditëve të fundit janë: Zhitia, Pollata, Metehia, Kërpimehu, Pakashtica, Zakuti, Dobërdoli, Bajçina, Bradashi, Letanci, Lupçi, Popova, Majaci, Sfeçla, Bellopoja dhe lagjet e Duriqëve, Haxhiajve, Fushalive dhe Blakqorëve në qytet.

Brigada e zjarrfikësve e Podujevës deri sot ka interevenuar në 16 raste për thithjen e ujit nga vendbanimet dhe shtëpitë dhe në 3 raste ka evakuar familjarë nga shtëpitë ku kishte depërtuar uji, ndërkaq që NKPSH ka intervenuar në hapjen e kanalizimeve, lumenjëve e prrockave në qytet dhe fshatra. DMCE njoftoi se Zona e Pestë e TMK-së ka shprehu gatishmëri që të ndihmojë në tejkalimin e situatës duke hapur rrugët dhe pastruar shtretërit e lumenjëve dhe prrockave.

Gjatë ditëve të vikendit ka pasur disa intervenime për hapjen e rrugëve në fshtarat Popovë ku mbi 20 familje kanë probleme me qarkullimin e lirë për shkak të dëmtimit të rrugës nga vërshimet, në Lagjen e Qunakëve në Lluga, në Pakashticë, Repë, Lupç, Segashë, etj. “Sot ekipet tona kanë intervenuar në Popovë e Majac ku kanë evkuar dy familje, kurse Divizioni për menagjimi e emrgjencave nga Prishtina ka pastruar rrugën Batllavë-Orllan ku pati shembje të dheut”, tha Fatmir Gashi. Ai njoftoi se ura tek Xhamia e qytetit është e pakalueshme pas dëmtimeve nga rritja e nivelit të ujit në lumin Llap.

Vërshimet dhe përmbytjet kanë çrregulluar edhe vijueshmërinë e nxënësve në disa shkolla të komunës së Podujevës. Mr. Shpejtim Bulliqi drejtor i drejtorisë për arsim njoftoi se në Popovë mësimi nuk po mbahet fare sepse uji ka depërtuar në lokalet e shkollës. “Probleme ka edhe në Batllavë, Lluga, Lupç dhe Batllavë”, theksoi Bulliqi.

Zyrtarët e drejtorisë për politikë sociale dhe shëndetësi kanë interevenuar me gjëra ushqimore vetëm në një familje të evakuar, kurse KFOR-i çek e sllovak ka intervenuar në fshatin Bradash dhe fshatra tjera duke dërguar ujë të pijshëm me cisterna për shkak të ndotjes së bunarëve në të dy anët e lumit Llap.

Karitasi i Prishtinës vazhdon të ndhmojë skamnorët llapjan

Podujevë, 1 mars 2004 (TN) – Karitasi i Prishtinës shpërndau ndihma në artikuj higjienik dhe veshmbathje për 15 familje skamnore llapjane, njoftoi sot kordinatori i Karitasit në fshatin Lluzhan Zejnun Bunjaku.

z. Bunjaku deklaroi se lista e përfituesve të këtyre ndihmave është bërë në bashkëpunim me Drejtorinë për politikë sociale dhe shëndetësi, kurse ndihma e ofruar nga Karitasi përmbanë veshmbathje për fëmijë, gra dhe njerëz të moshuar. “Karitasi në bashkëpunim me drejtorinë për politikë sociale ka kompletuar dokumentacionin për 40 fëmijë jetimë të komunës së Podujevës i cili do të dërgohet në Lipeland Lipshtat të Gjermanisë dhe pritet që në të ardhmen këta fëmijë të ndihmohen me mjete materiale”, tha Bunjaku.

Sipas Zejnun Bunjakut Karitasi i Prishtinës përkujdeset për shumë familje skamnore llapjane që nga viti 1999 kur është hapur nëndega në Lluzhan.

“Karitasi i Prishtinës deri më tash ka ndihmuar mbi 8248 familje me gjendje jo të mirë sociale, kurse prioritet u është dhënë familjeve që rrisin jetimë”, tha Bunjaku.