Përmbajtja:

• Hollbruk: Zgjidhja përfundimtare e gjendjes në Ballkan nënkupton shpalljen e Kosovës shtet të pavarur

• Deklaratë e kryetares së Forumit të Gruas së LDK-së për protestën e djeshme rreth sistemit zgjedhor

• Holkeri pritet të nënshkruajë rregulloren për zgjedhjet parlamentare në Kosovë

• Kryeministri Rexhepi pati takime të rëndësishme në Itali

• Gjykata Supreme e Kosovës liron gjeneral Veselin

• Komiteti i Kryqit të Kuq do të kryesojë grupin për çështjen e personave të zhdukur

• USAID-i mbështetë ndryshimin e sistemit zgjedhor dhe votimin me lista të hapura në Kosovë

• Në Stan Tërg u shënua 15-vjetori i grevës së përgjithshme të minatorëve

• Rregulla të reja për tifozët e Euro 2004

• Të akuzuarit nga Tribunali i Hagës Limaj, Balaj dhe Musliu u shprehën se nuk ndiehen fajtorë

• Takimi i Pekinit nuk zgjidh ndryshimet

• I bëhen homazhe Presidentit maqedonas

• Krerët e institucioneve të Luginës së Preshevës dënojnë arrestimet e fundit në Bujanoc

• Amerikanët po humbin durimin me Aristidin

• Plaçkitjet dhe vrasjet hakmarrëse kanë përfshirë kryeqytetin e Haitit

Hollbruk: Zgjidhja përfundimtare e gjendjes në Ballkan nënkupton shpalljen e Kosovës shtet të pavarur

 

Sarajevë, 28 shkurt 2004 - Riçard Hollbruk, arkitekti i marrëveshjes së Dejtonit ka paralajmëruar se është i gatshëm që të angazhohet në diplomacinë amerikane, nëse kandidati i demokratëve fiton në zgjedhjet presidenciale amerikane. Hollbruk thotë se në atë rast Ballkanin do ta bënte prioritet të politikës së jashtme amerikane.

"Nëse më ofrohet rasti të jem në shërbim të administratës në cilindo pozicion, do ta bëj Ballkanin prioritet kryesor", ka thënë Hollbruk për gazetën e Sarajevës "Dnevni avaz".

Ish-ndërmjetësi amerikan për Ballkanin, ka thënë hapur se zgjidhja përfundimtare e gjendjes në rajon "nënkupton edhe shpalljen e Kosovës shtet të pavarur", sepse serbët e "kanë humbur Kosovën", thotë ai.

"Serbët në Beograd duhet të përballen me realitetin dhe të zgjedhin ose Kosovën ose Evropën", ka thënë shrehimisht Hollbruk, duke shtuar se ndarja e Malit të Zi nga Serbia poashtu është fare e qartë.

Nëse e serbët e zgjedhin Kosovën, do ta humbasin edhe atë, por edhe Evropën, por nëse zgjedhin Evropën, atëherë tërë Ballkani me kohë do të hyjë në Bashkimin Evropian, duke përfshirë B e H, Maqedoninë, Kosovën, Malin e Zi, Shqipërinë dhe Kroacinë, thekson ish-ambasadori amerikan në OKB.

Gjithashtu Hollbruk i konsideron qesharake disa kërkesa të politikanëve në Serbi se humbja e Kosovës do të kompensohet me territore të tjera, sepse, siç ka thënë, situata e tanishme është rezultat kryekëput i gabimeve të tyre, si dhe për faktin se kanë humbur katër luftëra, të cilat i kanë filluar vetë, ka thënë mes tjerash Hollbruk për këtë gazetë të Sarajevës.

 

 

Deklaratë e kryetares së Forumit të Gruas së LDK-së për protestën e djeshme rreth sistemit zgjedhor

 

Prishtinë, 28 shkurt 2004 - Një deklaratë e dhënë dje nga znj. Edita Tahiri para mediave në një "protestë" të disa OJQ rreth sistemit zgjedhor për zgjedhjet e ardhshme nacionale në Kosovë është vetëm një gënjeshtër ordinere dhe një veprim i ulët në shërbim të interesave të disa OJQ të cilat kanë marrë para të mëdha për shfaqje të tilla duke mos u brengosur shumë madje të përdhosin çdo familje shqiptare dhe vlerat aq të çmuara të kombit, thuhet në një deklaratë të Melihate Tërmkollit, kryetare e Forumit të Gruas, deputete dhe anëtare e Kryesisë së LDK-së.

Znj. Tahiri po të interesohej vetëm pak për qëndrimin e partisë në të cilën thirret ende do të shihte se qëndrimi i LDK-së për sistemin e listave të mbyllura është qëndrim i LDK-së dhe LDK gjithsesi ka Kryetar dhe President të Kosovës Dr. Ibrahim Rugovën.

Qëndrimi për këtë sistem, pra është përcaktim i gjerë i LDK-së, i Kryesisë së LDK, i Forumit të Gruas së LDK-së, i Forumit të Rinisë së LDK-së, i të gjitha degëve të saj, madje edhe mekanizmave të tjerë institucionalë, siç është Komisioni për Barazi Gjinore i Kuvendit të Kosovës, dhe të gjitha këto janë shumica e qytetarëve të Kosovës, thekson zonja Tërmkolli.

Në fakt ky nuk është sistemi përzgjedhës i LDK-së, sepse LDK ka insistuar dhe insiston në nxjerrjen e Ligjit zgjedhor dhe një sistem të shumicës i kombinuar me sistemin proporcional i cili do të ishte shprehja më e lartë e një sistemi demokratik dhe që do të siguronte stabilitet më të madh të institucioneve.

 

Ky sistem, thota ajo, nuk është përmendur asnjëherë nga goja e znj. Tahiri dhe të gjithë atyre OJQ të cilat çirreshin para mediave për gjoja demokraci e transparencë. Nuk ka dalë asnjëherë nga goja e tyre ta thonë një fjalë të vetme për vendet e rezervuara për serbët dhe minoritetet e tjera që është burimi kryesor i strukturës jostabile të institucioneve. Ata dhe ato e dinë pse nuk e bëjnë këtë, thotë në këtë deklaratë zonja Tërmkolli.

Një gjë është e sigurt se pavarësisht për cilin variant do të vendosë z.Holker, LDK do të fitojë edhe në zgjedhjet e ardhshme nacionale dhe pikërisht për faktin se është parti e realizimit të interesave kombëtare dhe parti që kultivon demokracinë e brendshme dhe në institucione, nënvizon në deklaratën e saj, Melihate Tërmkolli, kryetare e Forumit të Gruas së LDK-së.

 

 

Holkeri pritet të nënshkruajë rregulloren për zgjedhjet parlamentare në Kosovë

 

Prishtinë, 28 shkurt 2004 - Kryeparlamentari i Kosovës, Hari Holkeri pritet të nënshkruajë sot rregulloren për zgjedhjet parlamentare në Kosovë, e cila përcakton sistemin zgjedhor me lista të mbyllura në tërë Kosovën vetëm si një njësi zgjedhore. Si të tillë këtë rregullore e kanë kundërshtuar disa parti politike dhe përfaqësues të shoqërisë civile.

 

 

Kryeministri Rexhepi pati takime të rëndësishme në Itali

 

Romë, 28 shkurt 2004 - Kryeministri i Qeverisë së Kosovës, Bajram Rexhepi, i cili po qëndron në një vizitë një javshe në Itali, dje e pati një varg takimesh të randësishme.

Ai fillimisht u takua me udhëheqësin e Partisë Demokratike Majtiste Pietro Fassino. Në këtë takim u diskutuan zhvillimet aktuale politike në Kosovë si dhe angazhimi i matejm i qeverisë italiane në Kosovë. Udhëheqësi i të Majtës Demokratike Fassino, deklaroi se përkrah një angazhim më të madhë të Italisë në proceset demokratike dhe të zhvillimit të Kosovës.

 

Ai tha se përkrah angazhimet në rrugën e Kosovës drejt zgidhjes së statusit final. Zoti Fassino me këtë rast inkurajoi kryeministrin Rexhepi dhe Qeverinë që ai udhëheq në drejtim të implementimit dhe plotësimit të standardeve për Kosovën. Në këtë bisedë të gjatë dhe miqësore z. Fassino ripohoi gadishmerinë e Italisë për të ndihmuar zhvillimin e Kosovës.

Më pastaj kryeministri Rexhepi u takua me kardinalin Anxhelo Sadano, sekretar i shtetit të Vatikanit. Në këtë takim të dy bashkëbiseduesit u pajtuan për nevojën e angazhimit për vlera demokratike dhe paqe të qendrueshme në Ballkan.

 

Kardinali Sadano deklaroi se gjithsesi duhet të respektohet dëshira dhe vullneti i popullit dhe inkurajoi kryeministrin Rexhepi në rrugën që ai dhe Qeveria e tij janë duke ndjekur për plotësimin e standardeve.

Po sot pasdite kryeministri Rexhepi u takua edhe me z. Francesko Rutteli, udhëheqës i Qendrës Demokratike, dhe z. Sergio Matarela ish zëvendësministër në kohën e qeverisë së Prodit.

 

Gjatë këtij takimi ata kanë përkrahur angazhimet e Qeverisë së Kosovës dhe premtuan ndihmën për zhvillimin më të shpejtë ekonomik të Kosovës, thuhet në një njoftim të Zyrës së Kryeministrit për Informim Publik.

 

 

Gjykata Supreme e Kosovës liron gjeneral Veselin

 

Prishtinë, 28 shkurt 2004 - Gjykata Supreme e Kosovës e ka liruar si të pafajshëm gjeneral Sali Veselin, ish-komandant të Zonës së Dytë Mbrojtëse të TMK-së në Prizren.

Gjeneral Veseli ishte akuzuar se kishte nxitur vrasjen e Ekrem Rexhës, të njohur si 'komandant Drini'.
Gjykata e Qarkut në Prizren, më 24 mars të vitit të shkuar e pati dënuar Sali Veselin me dhjetë vjet heqje lirie.

Gati një vit më pas Gjykata Supreme e Kosovës e ka shpallur të pavlefshëm vendimin e Gjykatës së Qarkut në Prizren dhe Sali Veselin e ka shpallur të pafajshëm dhe e ka liruar nga vuajtja e dënimit.

Gjeneral Sali Veseli ishte arrestuar pak kohë mbas luftës, dhe procesi gjyqësor ndaj tij ishte njëri ndër proceset më të gjata.

Ai ka qenë njëri ndër katër komandantët e zonave të TMK-së, që ishin arrestuar për krime të kryera në periudhën e pasluftës.

 

 

Komiteti i Kryqit të Kuq do të kryesojë grupin për çështjen e personave të zhdukur

 

Prishtinë, 28 shkurt 2004 - Përfaqësuesit e Kryqit të Kuq Ndërkombëtar kanë pranuar ftesën e shefit të administratës ndërkombëtare në Kosovë, Hari Holkeri, për të kryesuar grupin punues për çështjen e personave të zhdukur në dialogun për çështje teknik ndërmjet Prishtinës dhe Beogradit. Komiteti i Kryqit të Kuq Ndërkombëtar ka kumtuar se këtë rol e ka pranuar për shkaqe humanitare.

 

 

USAID-i mbështetë ndryshimin e sistemit zgjedhor dhe votimin me lista të hapura në Kosovë

 

Prishtinë, 28 shkurt 2004 - Zyra e Agjencisë Amerikane për Zhvillim në Kosovë (USAID) mbështet ndryshimin e sistemit zgjedhor dhe votimin me lista të hapura në zgjedhjet e ardhshme parlamentare të Kosovës.

 

Shefi i kësaj zyreje Dejl Fajfer në një intervistë dhënë "Zërit të Amerikës", thotë se qytetarët e Kosovës duhet të kenë të drejtën të zgjedhin vetë përfaqësuesit e tyre. Ai ka theksuar se USAID-i ka mbështetur fuqishëm ndryshimin e sistemit zgjedhor në një mënyrë të tillë që jo vetëm të ketë lista të hapura, por edhe zona zgjedhore.

 

Në fakt duhet të ketë zona zgjedhore për të pasur lista të hapura. Sipas tij ka mundësi të krijohen zona në shumë mënyra edhe pa regjistrim të popullësisë, atëherë njerëzit do të kenë një listë të zgjedhur të atyre që ata njohin në zonën e vetë për të cilët mund të votojnë.

 

 

Në Stan Tërg u shënua 15-vjetori i grevës së përgjithshme të minatorëve

 

Mitrovicë, 28 shkurt 2004 - Minatorët e "Trepçës" në prani të përfaqësuesve të institucioneve më të larta të Kosovës, si dhe liderë politikë të asaj kohe, kanë shënuar dje në Stan Tërg 15-vjetorin e grevës së përgjithshme të minatorëve.

 

Rikujtojmë se minatorët ishin ndër të parët që kundërshtuan okupimin e Kosovës nga Serbia, si dhe u angazhuan kundër ndryshimeve të Kushtetutës së vitit 1974, me të cilën faktikisht regjimi serb suspendoi mëvetësinë e atëhershme politike të Kosovës.

 

 

Rregulla të reja për tifozët e Euro 2004

 

Lisbonë, 28 shkurt 2004 - Tifozët e ndeshjeve të futbollit të finaleve të kampionatit evropian 2004 në Portugali do të përballen me teste për të provuar se sa të pirë mund të jenë, ndërsa arrijnë për të parë ndeshjet.

Testet për pije alkoolike midis tifozëve nuk do t'i bëhen çdokujt nga 500 mijë tifozët që priten të shohin ndeshjet e Euro 2004, por ata do t'i nënshtrohen rregulave të tilla në rrethana të veçanta.

Ndeshjet midis 16 ekipeve fillojnë në qershor dhe pajisje të ngjashme me ato që përdoren për të matur sasinë e alkoolit të pirë nga shoferët, do të përdoren dhe do të jenë pranë stadiumeve ku zhvillohen ndeshjet.

Limiti i alkoolit në gjak që lejohet në Portugali është 0.5 gram për një litër. Ata tifozë që kanë më shumë se dyfishin, pra 1.2 gram nuk do të lejohen të hyjnë në stadium.

Organizuesit e kampionatit, UEFA thanë se një nga sfidat e autoriteteve portugeze është kontrolli i turmave, transporti dhe zbatimi i kufizimeve alkoolike.

 

 

Të akuzuarit nga Tribunali i Hagës Limaj, Balaj dhe Musliu u shprehën se nuk ndiehen fajtorë

 

Hagë, 28 shkurt 2004 - Të akuzuarit nga Tribunali i Hagës Fatmir Limaj, Haradin Balaj dhe Isak Musliu dje pasdite i kanë hedhur poshtë akuzat plotësuese për krimet e luftës. Secili prej tyre individualisht ka thënë se nuk ndiehet fajtor, duke u përgjigjur në pyetjen e gjyqtarit lidhur me pikat plotësuese me të cilat i ngarkon Tribunali i Hagës.

Prokuroria e Tribunalit në rastin kundër Fatmir Limajt dhe të tjerëve ka zgjeruar aktakuzën kundër tyre duke shtuar si vepër të re krimi edhe "pjesëmarrjen në ndërmarrje e bashkuar kriminale që ka pasur për qëllim dhunën ndaj popullatës civile serbe dhe shqiptare" që janë quajtur për ta si kolaboracionistë.

Tre të akuzuarit shqiptarë të Kosovës, ish-pjesëtarë të UÇK-së janë deklaruar se ndiehen të pafajshëm për vepra të reja që u ngarkohen e që thuhet t'i kenë kryer gjatë vitit 1998.

Deri më tash vetëm Fatmir Limaj nga të tre të akuzuarit ishte akuzuar edhe për përgjegjësi komanduese, ndërkaq tash me këtë aktakuzë është ngarkuar edhe i akuzuari Isak Musliu. I akuzuari i parë Fatmir Limaj ka thënë se nuk pranon të ketë pasur një kamp të tillë në Llapushnik.

 

 

Takimi i Pekinit nuk zgjidh ndryshimet

 

Pekin, 28 shkurt 2004 - Raundi i fundit i bisedimeve gjashtëpalëshe mbi programin bërthamor të Koresë së Veriut ka përfunduar me një pranim të ministrit të jashtëm Kinez, Li Zhaoxing se ende ekzistojnë ndryshime serioze.

Konferenca përfundoi më vonë nga ç'ishte planifikuar në mes njoftimeve se Korea e Veriut po kërkonte ndryshime të minutës së fundit të deklaratës së përbashkët.

BBC thotë se nuk duket të ketë pasur ndonjë shenjë të arritjes gjatë katër ditë bisedimeve.
Uashingtoni kërkon që Phenjani të japë siguri se do të çmontojë të gjitha objektet bërthamore që ka në shkëmbim të ndihmës dhe garancive të sigurisë.

Por Phenjani akuzon Uashingtonin se ende mban politikë armiqësore ndaj tyre.

 

 

I bëhen homazhe Presidentit maqedonas

 

Shkup, 28 shkurt 2004 - Homazhe nga e gjithe bota po i bëhen Presidentit maqedonas, Boris Trajkovski i cili humbi jetën pasi avioni i tij u rrëzua në Bosnjë Hercegovinë, të enjten. Kanë filluar ndërkohë përgatitjet për një funeral shtetëror.

Zyrtarët e NATO-s në Bosnjë-Hercegovinë e kanë konfirmuar se ekipet e kërkimit kanë gjetur trupat e të nëntë personave që ishin në bord të avionit që barte presidentin maqedonas, Boris Trajkovski që u rrëzua të enjten.

Ekipe boshnjake dhe maqedonase të mjekësisë ligjore shkuan në vendin e ngjarjes për të filluar procesin e identifikimit zyrtar. Dy kutitë e zeza janë nxjerrë nga avioni i rrëzuar.

Maqedonia mban tri ditë zie zyrtare për presidentin Trajkovski.

 

 

Krerët e institucioneve të Luginës së Preshevës dënojnë arrestimet e fundit në Bujanoc

 

Bujanoc, 28 shkurt 2004 - Krerët e institucioneve të Luginës së Preshevës i kanë gjykuar negativisht arrestimet e fundit dhe bastisjet e forcave serbe të sigurimit të cilat kanë arrestuar dy shqiptarë.

 

Prefekti i Bujanocit Nagip Arifi ka deklaruar se kjo është një tendencë drejt destabilizimit të gjendjes në rajon dhe kundër institucioneve të Luginës së Preshevës. Ai tha se nuk ka qenë aspak i njoftuar lidhur me rastin nga ana e policisë ngase në aksionin e pardjeshëm është arrestuar edhe një punëtor i administratës komunale, cila udhëheqet nga vetë ai.

 

 

Amerikanët po humbin durimin me Aristidin

 

Uashington, 28 shkurt 2004 - Situata në kryeqytetin haitian po përkeqësohet dhe në një shenjë të qartë se qeveria amerikane po humb durimin me presidentin e vendit, në një deklaratë të administratës amerikane thuhet se presidenti Aristide duhet të verë nën kontroll përkrahësit e tij dhe t'i japë fund asaj që u përshkrua si dhunë e verbër që po përfshin kryeqytetin.

Gangsterë të armatosur që kanë deklaruar aleancë me presidentin Aristide kanë filluar grabitjet e portit dhe vrasje të civilëve të pafajshëm.

Qeveria amerikane duket se sugjeron se dora e presidentit është pas këtij kaosi dhe i kërkon atij të marrë masat e nevojshme për ta ndaluar atë.

 

 

Plaçkitjet dhe vrasjet hakmarrëse kanë përfshirë kryeqytetin e Haitit

 

Porto Prens, 28 shkurt 2004 - Anarkia ka përfshirë kryeqytetin e Haitit, Porto Prins, me plaçkitje dhe vrasje hakmarrëse. Ndërkohë kryengritësit kërcënuan të marrin nën kontroll kryeqytetin dhe presidenti Zhan-Bertrand Aristid refuzoi përsëri të jepte dorëheqje.

Gjendja në Porto Prens doli jashtë kontrollit, ndërsa bandat e forcave të armatosura besike të presidentit Aristid qarkullonin nëpër kryeqytet, duke kërcënuar të digjnin shtëpitë e kundërshtarëve të tij.

Ambasada amerikane në Porto Prins i bëri thirrje presidentit Aristid si dhe kryengritësve që të ndalin dhunën. Po dje, Presidenti Bush tha se administrata e tij po vazhdon përpjekjet për arritjen e një zgjidhjeje politike në Haiti, por ai nuk i kërkoi drejtë për drejtë zotit Aristid që të jepte dorëheqjen.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |