Përmbajtja:

• Presidenti Rugova ngushëllon familjen e shkrimtarit Zejnullah Halili

• Disa organizata joqeveritare kërkojnë nga Holkeri që të vendosë për lista të hapura në zgjedhje

• Kryeministri Rexhepi vazhdon vizitën në Itali

• Me nderime u varros shkrimtari Zejnullah Halili

• UNMIK-ut thotë se dialogu për çështje teknike ndërmjet Prishtinës dhe Beogradit mund të rifillojë me 4 mars

• Koalicioni serb "Kthimi" sot do t'i dorëzojë UNMIK-ut vërejtjet për planin rreth zbatimit të standardeve

• Kuvendi i Kosovës do të angazhohet në zgjidhjen e problemeve të minatorëve

• Grupi i Krizave thekson se shqiptarët kudo në Ballkan janë për pavarësinë e Kosovës

• BSPK shpreh habinë që hartimi i Rregullores për pagat është bërë pa konsultimin e kësaj organizate

• Podujevë: Shiu i mbrëmshëm ka shkaktuar vërshime në fshatrat përgjatë lumit Llap

• Në Brezovicë ka filluar konferenca dyditore mbi "Dialogun social" ku po debatohet për propozim-projektligjin për punë

• Kërkohet që dialogu Prishtinë - Beograd të mbahet pas kthimit nga Serbia të kufomave të identifikuara të shqiptarëve

• Punonjësit e administratës së gjyqësisë vazhdojnë grevën të pakënaqur me pagat e tyre

• Në vitin 2005 pritet të startohet me fondet për sigurimet shëndetësore për të gjithë të punësuarit

• Trupat e të aksidentuarve nga Bosnja kthehen të dielën në Maqedoni

• Është gjetur trupi i pajetë i Presidentit maqedonsa Boris Trajkovski dhe të tetë të tjerëve

• Katër shpërthime në Athinë

• Solana në Shkup i jep mbështetje Maqedonisë

• Vazhdojnë kërkimet për avionin e rërzuar të Presidentit maqedonas

• Tre ditë zie në Maqedoni për vdekjen e Trajkovskit

• Lokalizohet vendi ku është rrëzuar avioni i Presidentit maqedonas

• Pauell: Presidenti i Haitit duhet të shqyrtojë me kujdes nëse mund të qëndrojë në postin e tij

• SHBA heqin kufizimet për udhëtime në Libi

Presidenti Rugova ngushëllon familjen e shkrimtarit Zejnullah Halili

 

Prishtinë, 27 shkurt 2004 - Me rastin e vdekjes së shkrimtarit Zejnullah Halili, Presidenti i Kosovës Ibrahim Rugova i ka dërguar familjes Halili një telegram ngushëllimi.

"Shkrimtari Zejnullah Halili gjatë viteve të vështira të Kosovës, me veprën dhe me drejtimin e revistave, si dhe me punën konkrete, dha kontribut të madh për lirinë, pavarësinë dhe demokracinë e vendit tonë.

Zejnullah Halili do të mbetet në historinë e letërsisë si njëri ndër shkrimtarët më të famshëm në fushën e letërsisë për fëmijë të Kosovës dhe të botës shqiptare", thuhet në telegramin e ngushëllimit të Presidentit Rugova dërguar familjes Halili.

 

 

Disa organizata joqeveritare kërkojnë nga Holkeri që të vendosë për lista të hapura në zgjedhje

 

Prishtinë, 27 shkurt 2004 - Disa organizata joqeveritare (KACI, Reforma 2004, Rrjeti i Grupeve të Grave në Kosovë), kanë protestuar sot para selisë së UNMIK-ut dhe i kanë dërguar një letër shefit të UNMIK-ut, Hari Holkeri, në të cilën kanë kërkuar që në zgjedhje të aplikohet sistemi i listave të hapura.

 

Kjo është një formë e presionit mbi Holkerin që të vendosë për lista të hapura të kandidatëve para se të nënshkruajë kornizën e rregullativës për udhëheqjen e zgjedhjeve në Kosovë.

Këto shoqata kanë kritikuar grupin e punës për shkak se nuk ka qenë transparent në punën e tij.

 

 

Kryeministri Rexhepi vazhdon vizitën në Itali

 

Romë, 27 shkurt 2004 - Në vazhdim të vizitës një javore në Itali, kryeministri i Kosovës, Bajram Rexhepi, u takua dje me ministrin e Jashtëm të këtij vendi Franko Fratini. Me këtë rast u bisedua për zhvillimet më të reja në Kosovë dhe për aktivitetin e Qeverisë së Kosovës.

 

Fratini u përqëndrua në angazhimin e Qeverisë italiane e posaçërisht të Ministrisë së Jashtme për të ndikuar drejtpërdrejt në arritjen sa më të shpejtë të standardeve në Kosovë, integrimin në rrjedhat e standardeve evropiane, dhe ndikimin e institucioneve të Bashkimit Evropian.

 

 

Me nderime u varros shkrimtari Zejnullah Halili

 

Gjilan, 27 shkurt 2004 - Shkrimtari i njohur Zejnullah Halili, dje në orët e mbrëmjes u varros me nderime në fshatin Kokaj të Gjilanit. Merrnin pjesë një numër i madh familjarësh, miqsh, bashkëpunëtorësh e dashamirësh të artit letrar.

Zejnullah Halili vdiq parmbrëmë në moshën 59 vjeçare. Pjesën më të madhe të kohës ka punuar në programet e në revistat për fëmijë.

 

Ai ka qenë gazetar e redaktor i programit për fëmijë në Radio Prishtinë, e pastaj ka qenë kryeredaktor i revistës "Gazeta e Pionierëve" dhe i revistës letrare "Pionieri". Ai ka lënë prapa një opus prej rreth 20 veprash të zhanreve të ndryshme letrare për fëmijë e për të rritur.

 

 

UNMIK-ut thotë se dialogu për çështje teknike ndërmjet Prishtinës dhe Beogradit mund të rifillojë me 4 mars

 

Prishtinë, 27 shkurt 2004 - Zyrtarët e UNMIK-ut kanë bërë të ditur se dialogu për çështje teknike ndërmjet Prishtinës dhe Beogradit do të fillojë më 4 mars në Prishtinë. Misioni i OKB-së në Kosovë dhe Qeveria e Serbisë janë pajtuar parimisht që ky dialog ndërmjet Kosovës dhe Serbisë e Malit të Zi të fillojë më 4 mars, sipas një marrëveshjeje që kishin arritur një javë më parë në Prishtinë kryeadministratori i Kosovës Hari Holkeri dhe Nebojsha Çoviq.

 

Zëdhënësi i Misionit të UNMIK-ut, Sunil Narula tha se synimi i UNMIK-ut është që dialogu teknik të rifillojë javën e parë të marsit. Ai tha se grupi i parë do të fillojë për çështjet e energjetikës, ndërkaq sa i përket vetë axhendës ajo është përpiluar nga ekspertë, tha z. Narula. Sipas tij çështja e të zhdukurve nuk do të jetë temë diskutimesh në takimin e parë të grupeve punuese.

Sunila Narula tha se takimi i parë i grupeve për energjetikën do të mbahet në Prishtinë, por vendi i saktë ende nuk është përcaktuar, ndërkohë që takimet e tjera mund të vazhdojnë në Beograd.

 

 

Koalicioni serb "Kthimi" sot do t'i dorëzojë UNMIK-ut vërejtjet për planin rreth zbatimit të standardeve

 

Prishtinë, 27 shkurt 2004 - Koalicioni serb "Kthimi" sot do t'i dorëzojë UNMIK-ut vërejtjet për planin e punës rreth zbatimit të standardeve për Kosovën, ka thënë deputeti serb në Parlamentin e Kosovës Oliver Ivanoviq.

 

Përfaqësuesit e koalcionit "Kthimi" janë takuar dje në Prishtinë me shefin e UNMIK-ut, Hari Holkeri, i cili u ka thënë se vërejtjet e tyre dhe ato të Nju-Jorkut do t'i kyçë në versionin final të planit. Njoftohet se Ivanoviq ka kërkuar që nëpërmjet vërejtjeve të sqarohet dokumenti standardet për Kosovën dhe që standardet të jenë të matshme dhe transparente.

 

 

Kuvendi i Kosovës do të angazhohet në zgjidhjen e problemeve të minatorëve

 

Prishtinë, 27 shkurt 2004 - Kuvendi i Kosovës do të angzhohet në zgjidhjen e problemve të minatorëve të Kosovës, duke nxitur Qeverinë dhe institucionet tjera, ka thënë Fatmir Sejdiu, anëtar i Kryesisë së Kuvendit.

 

Ai tha se duhet të "angazhohemi edhe më tepër", por nuk beson në një zgjidhje të shpejtë të këtij problemi. Këto komente ai i bëri pas një takimi që pati në Kuvend me një delegacion të minatorëve në kuadër të "Javës së minatorit".

"Minatorët ndodhen në pozitë tejet të rëndë dhe institucionet duhet të angazhohen më tepër në zgjidhjen e këtij problemi. Pesëmbëdhjetë vjet pas grevës së njohur të vitit 1989 nuk është e drejtë që minatorët të vuajnë për kafshatën e gojës", këto ishin disa nga shqetësimet që ata shprehën gjatë këtij takimi me z. Sejdiu.

Sipas Miftar Hysenit, menaxher i Minierës së Stan Tërgut institucionet e vendit nuk kanë bërë sa duhet për problemin e minatorëve.

 

 

Grupi i Krizave thekson se shqiptarët kudo në Ballkan janë për pavarësinë e Kosovës

 

Prishtinë, 27 shkurt 2004 - Grupi Ndërkombëtar i Krizave në një raport të publikuar ka konstatuar se kauza e Shqipërisë së Madhe ose ndryshimi i kufijve as nuk ka mbështetje të madhe politike në vendet me shqiptarët dhe as nuk është e justifikuar moralisht.

 

Në raportin e kësaj organizate thuhet se Ushtria Çlirimtare e Kosvës dhe Ushtria Çlirimtare Kombëtare fituan mbështetje popullore në Kosovë dhe në Maqedoni kur iu larguan synimeve nacionaliste për panshqiptarizëm dhe u përqëndruan tek kërkesat për më shumë të drejta për njerëzit që përfaqësonin.

 

Po ashtu në raportin që u publikua dje theksohet se AKSH-ja që mbështeste hapur konceptin e "Shqipërisë së madhe" nuk fitoi kurrë besueshmërinë. Shqipëria nuk është e interesuar për ndryshimin e kufijve, ndërkaq në Kosovë thuhet në këtë raport, mbetet një rrezik për konflikt pasi statusi përfundimtar i saj nuk ësht zgjidhur ende.

 

Por Grupi i Krizave thekson se shqiptarë kudo në Ballkan janë për pavarësinë e Kosovës dhe pavarësia është çështje krejt e ndryshme nga ajo e Shqipërisë së Madhe.

 

Kjo organizatë mendon se gjendja në Maqedoni dhe në Luginën e Preshevës nuk paraqet ndonjë rrezik për krizë të afërt. Në raport thuhet se në synimet afatgjata nacionalizmi shqiptar do të zbutet me zbatimin e plotë të marrëveshjeve ndërkombëtare, si dhe me trysni ndaj ekstremistëve shqiptarë dhe politikanëve që kanë lidhje me ta.

 

 

BSPK shpreh habinë që hartimi i Rregullores për pagat është bërë pa konsultimin e kësaj organizate

 

Prishtinë, 27 shkurt 2004 - Projektrregullorja për nivelizimin e pagave të punëtorëve të Shërbimit Civil në Kosovë, e cila është hartuar me përkrahjen e Agjencisë Ëvropiane për Rindërtim në bashkëpunim me Ministrinë e Shërbimeve publike dhe me Ministrinë e Ekonomisë e Financave do t'i dërgohët së shpejti për miratim Qeverisë së Kosovës.

 

Sekretari i përhershëm i Ministrisë së Shërbimeve Publike, Bahri Hyseni shpjegon se në nivelizimin e pagave përfshihen punëtorët e të gjitha institucioneve të Kosovës në të gjitha nivelet. Ai ka thënë se në këtë projektrregullore nuk përfshihet nivelizimi i pagave të ndërmarrjeve publike, siç janë KEK-u, Posttelekomi i Kosovës dhe ndërmarrjet tjera publike.

Mirëpo, nënkryetari i Bashkimit të Sindikatave të Pavarura të Kosovës, Ukë Bashota ka shfaqur habinë që hartimi i Rregullores për pagat është bërë pa konsultimin e kësaj organizate. Ai ka theksuar se BSPK është shumë e interesuar që të bëhet nivelizimi i pagave.

Drejtuesit e BSPK-së dje janë takuar me përfaqësuesit e Qeverisë së Kosovës për të diskutuar lidhur me Projektligjin për marrëdhënien e punës, por kanë diskutuar edhe rreth çështjes së projektrregullorës për nivelizimin e pagave të punëtorëve të Shërbimit Civil.

 

 

Podujevë: Shiu i mbrëmshëm ka shkaktuar vërshime në fshatrat përgjatë lumit Llap

 

Podujevë, 27 shkurt 2004 - Reshjet e mbrëmshme të shiut në komunën e Podujevës kanë shkaktuar vërshime në të dy anët e lumit Llap, ndërkaq, sot gjendja sa vjen e përkeqësohet për shkak të rritjes së nivelit të lumit Llap.

Sipas Drejtorisë për mbrojtje civile dhe emergjencë që mbrëmë shumë qytetarë kanë kërkuar ndihmë meqë uji ka vërshuar shtëpi banimi, por edhe në lokalet e ndryshme në qytet.

Fshtrat më të goditura nga vërshimet e mbrëmshme janë Pollata, Metehia, Kërpimehu, Zakuti, Dobërdoli, Bajçina, Bradashi, Letanci, disa lagje të qytetit, fshatrat Lupç, Popovë, Majac, njoftoi drejtori i DMCE Fatmir Gashi.

Mirëpo, burime nga terreni njoftojnë se gjendja po përkeqësohet edhe në fshatrat Sfeçël, Bellopojë, Gërdofc, kurse në Kushevicë dhe Brainë rrugët janë të paklaueshme njoftohet nga këshilltari i Kuvendit komunal Fahri Hoxha. Sipas tij, liqeni i Batllavës ka rritje të madhe të nivelit të ujit dhe rreziku për fshatrat e Batllavës është evident.

Sipas z. Fatmir Gashi gjendje alarmante po mbretëron edhe në qytet ku niveli i ujit të lumit Llap është në nivel të daljes nga shtrati. "Disa familje të përmbytura nga uji që janë larguar nga shtëpitë po ndihmohen me gjëra ushqimore e higjienike, por mbetet problem çështja e strehimit", njoftuan në Drejtorinë për politikë sociale dhe shëndetësi.

 

 

Në Brezovicë ka filluar konferenca dyditore mbi "Dialogun social" ku po debatohet për propozim-projektligjin për punë

 

Brezovicë, 27 shkurt 2004 - Në Brezovicë ka filluar punimet dyditore konferenca për "Dialogun social" të organizuar nga Ministria e Punës dhe Mirëqenies Sociale. Në këtë konferencë partnerët socialë, si dhe ekspertë ndërkombëtarë po debatojnë për çështje të ndryshme që rregullojnë aspektin e punësimit në Kosovë.

Gjatë debatit të djeshëm është theksuar se një prej çështjeve të rëndësishme është kontrata kolektive dhe efektet e saj dhe se kjo ndikon edhe në procesin e privatizimit, investimet e jashtme, krijimin e ndërmarrjeve.

 

Me këtë rast u theksua se projekligji për punë është i domosdoshëm dhe miratimi i tij nga Kuvendi i Kosovës duhet të bëhet më së largu deri në muajin maj të këtij viti. Ekspertë të ndryshëm ndërkombëtarë për projektligjin mbi promovimin e punësimit përmenden edhe format se si mund të konkretizohet ky pilot-program.

Në këtë konferencë po ashtu u theksuar se statusi i padefinuar i Kosovës vazhdon të mbetet pengesë kyçe në realizimin e interesit të qytetarit të Kosovës.

 

 

Kërkohet që dialogu Prishtinë - Beograd të mbahet pas kthimit nga Serbia të kufomave të identifikuara të shqiptarëve

 

Prishtinë, 27 shkurt 2004 - Këshilli Koordinues i Asociacioneve Familjare për Pengjet, të Zhdukurit dhe Familjet me Viktima të Luftës në Kosovë, ka kërkuar që dialogu Prishtinë - Beograd të mbahet vetëm pas kthimit të pakusht nga Serbia të kufomave të identifikuara të shqiptarëve, që kjo çështje të mos trajtohet si çështje teknike dhe që në bisedime të përfshihen edhe anëtarë të këtij asociacioni.

 

 

Punonjësit e administratës së gjyqësisë vazhdojnë grevën të pakënaqur me pagat e tyre

 

Prishtinë, 27 shkurt 2004 - Rreth 120 punëtorë që punonjnë në organet gjyqësore tash dy ditë janë futur në grevë të pakënaqur me kushtet në të cilët ndodhen. Sipas tyre ata nuk do të fillojnë punën deri në realizimin e kërkesave të tyre.

 

Grevistët e organizuar nga sindikatat kërkojnë që pagat e tyre të nivelizohen me ato të punëtorëve të shërbimeve publike, 25 për qind në rritje page, si dhe 200 euro kompensim nga viti i kaluar.

 

Punonjësit po qëndrojnë në ndërtesën e Gjykatës komunale në Prishtinë thonë se pagat janë 100-130 euro. Ndërkaq anëtari i Këshillit grevist Milaim Bislimi thotë se ata do të qëndrojnë në grevë deri në grevë deri në plotësimin e kërkesave të tyre.

 

 

Në vitin 2005 pritet të startohet me fondet për sigurimet shëndetësore për të gjithë të punësuarit

 

Prishtinë, 27 shkurt 2004 - Vënia e bazave për krijimin e sigurimit shëndetësor ishte qëllimi i një takimi pune të organizuar nga Agjencioni Komisiomer i Përkujdesjes Shëndetësore të mbajtur në Prishtinë, ku morën pjesë ekspertë të shëndetësisë kosovare. Me këtë rast u tha se në vitin 2005 pritet të startohet me fondet për sigurimet shëndetësore për të gjithë të punësuarit.

Në këtë takim u prezentua modeli i veprimit dhe politika zhvillimore në marrëdhëniet ndërmjet Ministrisë së Shëndetësisë dhe të Financave, që do të marrin vendimin mbi strategjinë e financimit të shëndetësisë publike.

Implementimi i fondeve për sigurime shëndetësore nga Ministria e Shëndetësisë ende nuk është gati, u tha në këtë takim. Ndërkaq zyrtarët e Ministrisë së Financave nuk kanë vendosur lidhur me politikën e vetë se a do ta përkrahin këtë agjencion apo jo.

 

 

Trupat e të aksidentuarve nga Bosnja kthehen të dielën në Maqedoni

 

Shkup, 27 shkurt 2004 - Trupi i pajetë i Presidenti maqedonas Boris Trajkovski dhe i të tjerëve nga Bosnja do të të transferohen në Maqedoni të dielën e ardhshme, ka njoftuar qeveria maqedonase.

Poashtu ajo ka konfirmuar se janë gjetur trupat e të gjithë udhëtarëve të avionit të rrëzuar të enjtën.
Nga Shkupi bëhet e ditur se tashmë është gjetur edhe kutia zezë e avionit të rrëzuar.

 

 

Është gjetur trupi i pajetë i Presidentit maqedonsa Boris Trajkovski dhe të tetë të tjerëve

 

Sarajevë, 27 shkurt 2004 - Është gjetur trupi i pajetë i Presidentit maqedonsa Boris Trajkovski dhe të tetë të tjerëve, të cilët vdiqën nga rrëzimi i avionit, thanë zyrtarët maqedonas dhe boshnjakë, njofton Rojter.
"Nuk ka të mbijetuar. Trupat janë gjetur të vdekur", tha Mirsad Teskerexhiq, koordinator i ekipit të kërkimit.

 

 

Katër shpërthime në Athinë

 

Athinë, 27 shkurt 2004 - Mbrëmë në Athinë kanë ndodhur katër shpërthime: dy para selisë së Partisë Socialiste, PASOK dhe dy para Demokracisë së Re. Policia ka njoftuar se përveç dëmeve materiale nuk ka pasur viktima.

Në të katër rastet kanë shpërthyer bombola të vogla gazi. Deri më tash askush nuk e ka marrë përgjegjësinë për këto shpërthime.

 

 

Solana në Shkup i jep mbështetje Maqedonisë

 

Shkup, 27 shkurt 2004 - Në Shkup sot për qëndron përfaqësuesi i lartë për Politikë të Jashtme dhe Siguri i BE-së Havier Solana. Pas takimit me kryeministrin maqedonas Branko Cërvenkovski, Solana ka thënë: "Ky është një moment kur duhet treguar unitetin e shtetit me qëllim që të vazhdojë rruga drejt Evropës. BE vazhdon të jetë me ju dhe t'ju mbështes".

Cërvenkovski nga ana e tij ka nënvizuar se vizita e Solanës në Shkup është gjest i miqësisë dhe i mbështetjes për vendin dhe qytetarët.

 

 

Vazhdojnë kërkimet për avionin e rërzuar të Presidentit maqedonas

 

Mostar, 27 shkurt 2004 - Sot në mëngjes kanë vazhduar kërkimet për të gjetur avionin e rrëzuar dje të Presidentit maqedonas Boris Trajkovski. Ekipet e shpëtimit, pjesëtarët e SFOR-it dhe ekipet e tjera, që nga shtatë e mëngjesit po kërkojnë në hapësirën ku supozohet se është rrëzuar avioni i Trajkovskit.
Zyrtarët e B e H kanë hedhur poshtë pohimet se dje janë gjetur pjesët e avionit të rrëzuar.

 

 

Tre ditë zie në Maqedoni për vdekjen e Trajkovskit

 

Shkup, 27 shkurt 2004 - Qeveria e Maqedonisë ka shpallur tre ditë zie për atë që duket vdekje e presidentit të vendit, Boris Trajkovski. Të gjithë flamujt shtetërorë do të jenë në gjysëm shtize pas rrëzimit të avionit me 9 anëtarë në bord.

Këshilli i Sigurisë kombëtare në Shkup ka vlerësuar të enjten në mbrëmje se të gjitha institucionet e sistemit po kryejnë detyrimet e tyre ligjore dhe kushtetuese me kapacitet të plotë dhe po ndërmarin të gjitha masat dhe aktivitetet për rrethana të tilla.

Por, kryetari i partisë më të madhe opozitare, VMRO DPMNE, Nikolla Gruevski u largua nga mbledhja pasi tha se qeveria do të duhej të vazhdonte të merrte masa për të kërkuar të mbijetuarit.
Sipas Gruevskit është e papranueshme që qeveria ka shpallur të vdekur delegacionin.

 

 

Lokalizohet vendi ku është rrëzuar avioni i Presidentit maqedonas

 

Mostar, 27 shkurt 2004 - Ekipe të shpëtimit në Bosnjë thanë se kanë lokalizuar vendin ku është rrëzuar avioni i Presidentit maqedonas, Boris Trajkovski. Një zyrtar i Bosnjës ka thënë se në atë zoznë janë gjetur edhe gjurmë të gjakut të njeriut.

Në ekipet e kërkimit janë angazhuar edhe helikopterë, por thuhet se zona e lokalizuar ka qenë shumë e minuar gjatë luftës në Bosnjë të viteve 99. Ekspertë të çminimeve po dërgohen në zonë.

 

 

Pauell: Presidenti i Haitit duhet të shqyrtojë me kujdes nëse mund të qëndrojë në postin e tij

 

Uashington, 27 shkurt 2004 - Sekretari amerikan i Shtetit Kolin Pauell tha se presidenti i Haitit Aristid duhet të shqyrtojë mënyrat se si mund t'i shërbejë tani më së miri popullit haitian. Pauell shprehu gjithashtu zhgënjim rreth udhëheqësit haitian, duke thënë se zyrtarët amerikanë nuk kanë parë ende atë lloj përparimi që kishin shptresuar gjatë presidencës së zotit Aristid.

Administrata e presidentit Bush gjatë gjithë krizës së Haitit ka mbajtur të njëjtin qëndrim, duke thënë se zoti Aristid duhet të jetë në gjendje të përfundojë mandatin e tij, i cili përfundon në fillim të vitit 2006.

 

 

SHBA heqin kufizimet për udhëtime në Libi

 

Uashington, 27 shkurt 2004 - Shtetet e Bashkuara hoqën kufizimet e udhëtimit për në Libi, një hap i madh ky drejt normalizimit të marrëdhënieve me qeverinë e Tripolit.

Në një deklaratë të Shtëpisë së Bardhë thuhej se ky veprim është në përgjigje të vendimit të Libisë për të hequr dorë nga përpjekjet për të zhvilluar armë të shkatërrimit në masë.

 

Në deklaratë thuhej gjithashtu se heqja e kufizimeve të udhëtimit ka për qëllim të ndihmojë qeverinë libiane të hedhë themelet për rikthimin në bashkësinë ndërkombëtare.

Libia është ende në listën amerikane të vendeve që sponsorizojnë terrorizmin.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |