Reshjet e shumta të shiut në komunën e Mitrovicës kanë shkaktuar vërshime dhe dëme të konsiderueshme

Reshjet e shumta të shiut në komunën e Mitrovicës kanë shkaktuar vërshime dhe dëme të konsiderueshme

Mitrovicë, 27 shkurt 2004 / TN / Hysni SYLA - Shiu që ka rënë gjatë tërë natës, ka bërë që pothuaj të gjithë lumenjtë e komunës të dalin nga shtrati i tyre, me ç’rast edhe janë bërë vërshime në shumë pjesë të komunës, të cilat kanë rrezikuar edhe jetën e qytetarëve dhe kanë shkaktuar dëme të konsiderueshme.

Gjendja më e rëndë ishte në një pjesë të “Bairit”, ku lumi Lushta ka dalur nga shtrati dhe ka vërshuar rreth 20 shtëpi. Probleme të mëdha nga reshjet e shiut dhe vërshimet si pasojë e këtyre reshjeve, janë shkaktuar edhe në një pjesë të *Iliridës” dhe në vendbanimet deri në Tunelin e Parë, nëpër të cilat kalon lumi “Trepça”. Për shkak të daljes nga shtrati, ky lum ka shkaktuar edhe dëme në rrugën që shpie për në Stan Tërg.

Vërshime të rrezikshme ka patur edhe në fshatin Vaganicë dhe fshatrat tjera përreth. Në këto fshatra lumi “Lushta” dhe lumenjtë tjerë më të vegjël që kanë dalur nga shtrati, kanë vërshuar dhjetra hektarë tokë buke dhe kanë rrezikuar shumë shtëpi banimi, si dha kanë dëmtuar rrugët dhe rrjetin elektrik.

Për shkak të gjendjes së krijuar, zëvendëskryetari i Kuvendit të Komunës, Mursel Ibrahimi, kryeshefi i Ekzekutivit, Mustafë Pllana dhe drejtori i Drejtorisë për Urbanizëm, Gani Beshiri, kanë vizituar zonat e përfshira nga vërshimet dhe kanë urdhëruar organet kompetente që të marrin të gjitha masat e nevojshme për evitimin e rreziqeve për qytetarë dhe pasojat e vërshimeve.

Kontribut të posaqëm në ofrimin e ndihmës popullatës dhe evitimin e pasojavë të vërshimeve kanë dhënë pjestarët e Zonës së IV-të Mbrojtëse të TMK-së, të cilët kanë dalur menjëherë në zonat e rrezikuara.

Poashtu edhe Brigada e Zjarrëfikësve e komunës ka intervenuar me kohë për ofrimin e ndihmës për popullatën e rrezikuar dhe për zbutjen e pasojave të reshjeve të mëdha të shiut. Pjestarët e kësaj brigade kanë intervenuar me popmpat e tyre motorike me sukses për largimin e ujit nga shtëpitë e rrezikuara, në disa prej të cilave niveli i ujit të grumbulluar kishte arritur thellësinë prej 120 centimetrash.