Reagim mbi debatin e zhvilluar në RTK, në emisionin "Aktualitet" më 26 shkurt , mbi konfliktin ndërmjet drejtuesve të Universitetit të Prishtinë dhe një grup studentësh

27 shkurt 2004 / TN

Albana Balliu SOPA

E nderuar RTK!

Në mbrëmjen e 26 shkurtit, ndoqa me vëmendje emisionin e drejtëpërdrejtë satelitor “Aktualitet” në valët e RTK. Megjithëse nuk kisha lidhje direkte me temën që po trajtohej, pra me konfliktin ndërmjet një grupi të drejtuesve të Universitetit të Prishtinës dhe një grupi studentësh, instikti im gazetaresk më bëri që ta ndiqja deri në fund emisionin me vëmëndje. Gjatë transmetimit të emisionit më bëri shumë përshtypje- dhe për fat të keq në kontekst negativ-, qëndrimi i njëanshëm i drejtueses së emisionit, e cila quhej Alma.

Kjo jo vetëm për kahjet e gabuara që i jepte zhvillimit të debatit, por dhe për replikat e saj, të cilat herë pas here paraqesnin jo vetëm tendenciozitet dhe mungesë kulture, por dhe mangësi të etikës gazetareske. Nuk e di nëse zonja, apo zonjusha që drejtonte emisionin ka kryer studimet në degën e gazetarisë, por në drejtimin e një emisioni të tillë motoja duhej të ishte “ Gazetari duhet të jetë neutral, por objektiv”.

Në rastin konkret drejtuesja kishte aftësi të të folurit rrjedhshëm, por i mungonte llogjika e shëndoshë etike, madje vihej re dukshëm tendencioziteti, duke krijuar një atmosferë konfliktuoze dhe në disa raste konfuze në studio.

Gjatë bisedës drejtuesja gjatë gjithë kohës vuri në dukje faktin se drejtuesit e Universitetit duhet të tregohen në të gjitha rastet të hapur për mediat, por anashkaloi faktin se dhe mediat duhet të jenë po aq të hapura, e mbi të gjitha objektive ndaj publikut dhe për të arritur këtë, gjëja më elementare do të ishte ftuarja në studio 50% me 50% nga të dy grupet, d.m.th. pedagog dhe student nga grupi akuzues dhe pedagog e student nga grupi i akuzuar.

Nisur nga vetë përvoja ime si studente për IT-Multimedia, mund t´ju them se në shumë degë që kanë lidhje me informacion dhe mediat, një ndër lëndët që zhvillohet në universitetet perëndimore është dhe “komunikimi”, pra ku studentët mësojnë mënyrat komunikative së bashku me aspektet estetike.

Mendimi im është që për tema të tilla të ndjeshme RTK-ja duhet të bëjë një përzgjedhje më të mirë të drejtuesve, të cilët duhet të jenë të pajisur jo vetëm me diplomën e gazetarit, por dhe të posedojnë ndër të tjera aftësi profesionale komunikative e mbi të gjitha kulturë e etikë gazetareske.

Me respekt
Albana Balliu Sopa
Danimarkë