Përmbajtja:

• Presidenti Rugova ngushëllon kryetarin e Kuvendit me rastin e vdekjes tragjike të Presidentit të Maqedonisë

• Holkeri ngushëllon familjen e Trajkovskit

• Kryetari i BSPK-së Bahri Shabani pati dje një takim me shefin e UNMIK-ut, Hari Holkerin

• Daci i ka cilësuar të pavërteta informacionet se parlamenti nuk po e kryen punën si duhet

• Ligjëratë për muajin e historisë së zezakëve në Amerikë

• Në Mitrovicë mbrëmë u shënua 15-vjetori i grevave të minatorëve

• Filloi ndërtimi i koridorit të shpresës për fshatrat e Grykës së Karadakut

• Mbrëmë në Prishtinë vdiq shkrimtari i njohur për fëmijë Zejnullah Halili

• Grupi i punës për zgjedhjet në Kosovë bëri publike rekomandimet përfundimtare

• Kryetari i Parlamentit Evropian thotë se parakusht për inkuadrimin e Kosovës në BE janë standardet para statusit

• Pegi Hiks shpreson se gjatë këtij viti kthimi i të zhvendosurve serbë do të shënojë rritje

• Çapell i cilëson të pavërteta akuzat e mediave dhe politikanëve serbë se gjendja e serbëve në Kosovë është e mjerueshme

• Serbët nuk dëshirojnë t'u kërkojnë falje shqiptarëve për krimet në Kosovë

• Probleme serioze me gjendjen e të drejtave të njeriut në Shqipëri

• Zyrtarët e lartë evropianë shprehin ngushëllime për vdekjen e Trajkovskit

• Për shkak të vdekjes të Trajkovskit anulohet konferenca e Mostarit

• Zyrtarët e Federatës së B e H konfirmojnë vdekjen e Trajkovskit

• Presidenti maqedons Trajkovski ka humbur jetën nga rrëzimi i avionit

• Në Bosnjë është rrëzuar avioni i Presidentit të Maqedonisë Boris Trajkovski

• Maqedonia sot në Dublin paraqet kërkesën për anëtarësim në Bashkimin Evropian

• Opozita në Shqipëri ka ndërprerë protestat për t'i filluar më 20 mars

• Parlamenti i Maqedonisë miratoi propozimin për riorganizimin territorial të Shkupit

• Qeveria izraelite dhe palestineze planifikojnë një takim mes kryeministrave të tyre

• Kancelari gjerman viziton SHBA-të

• Nga shpërthimi i gazit në Siberi kanë humbur jetën 15 veta

• Vriten dy plasetinezë dhe një izraelit

• Janë vrarë pesë punëtorë humanitarë afganë

• Thellohet kriza në Haiti

Presidenti Rugova ngushëllon kryetarin e Kuvendit me rastin e vdekjes tragjike të Presidentit të Maqedonisë

 

Prishtinë, 26 shkurt 2004 - Presidenti i Kosovës Ibrahim Rugova, me rastin e vdekjes tragjike të Presidentit të Maqedonisë Boris Trajkovski, i ka dërguar një telegram ngushëllimi kryetarit të Kuvendit të Maqedonisë Lupçe Jordanovski.

"Me rastin e vdekjes tragjike të Presidentit të Maqedonisë Boris Trajkovski dhe të bashkëpunëtorëve të tij, Ju shpreh ngushëllimet e mia dhe të popullit të Kosovës.

E çmojmë lart kontributin e Presidentit Trajkovski për zhvillimin, prosperitetin dhe demokracinë në të mirë të të gjithëve në Maqedoni.

Ju lutem që familjes Trajkovski dhe familjeve të tjera që kanë humbur më të dashurit e tyre t'ua përcillni ngushëllimet e mia të sinqerta", thuhet në ngushëllimet e Presidentit Rugova drejtuar kryeparlamentarit të Maqedonisë.

 

 

Holkeri ngushëllon familjen e Trajkovskit

 

Prishtinë, 26 shkurt 2004 - Shefi i UNMIK-ut Hari Holkeri është shprehur se është i tronditur dhe i pikëlluar të thellë em të mësuar lajmin për vdekjen e Presidentit të Maqedonisë, Boris Trajkovski. Holkeri i ka shprehur ngushëllime familjes së Trajkovskit, Qeverisë dhe popullit të Maqedonisë.

"Unë dhe UNMIK-u kemi pasur raporte shumë të mira me Presidentin Trajkovski. Lutemi që familja e tij dhe Maqedonia të gjejnë forcë për të tejkaluar këtë periudhë të vështirë", thotë Holkeri në ngushëllimet e tij.

 

 

Kryetari i BSPK-së Bahri Shabani pati dje një takim me shefin e UNMIK-ut, Hari Holkerin

 

Prishtinë, 26 shkurt 2004 - Kryetari i Bashkimit të Sindikatave të Pavarura të Kosovës, Bahri Shabani, në një takim me kryeadministratorin e Kosovës, Hari Holkeri, e ka njoftuar atë për pakënaqësitë e punëtorëve të Kosovës dhe për grevat e paralajmëruara në fillim të muajit të ardhshëm.

 

Poashtu është biseduar edhe për procesin e privatizimit dhe për mundësinë e pensionimit të parakoshëm të ish-punëtorëve të ndërmarrjeve shoqërore.

Z. Shabani tha se nga Holkeri ka marrë premtimin se kërkesat e punëtorëve janë marrë me shumë seriozitet dhe se ai u ka bërë thirrje që të mos hyjnë në grevë. Por, Shabani tha se shprehjen e pakënaqësisë së punëtorëve nuk mund ta ndalë asnjë institucion derisa nuk plotësohen kërkesat e tyre.

 

 

Daci i ka cilësuar të pavërteta informacionet se parlamenti nuk po e kryen punën si duhet

 

Prishtinë, 26 shkurt 2004 - Në fillim të mbledhjes së Kryesisë së Kuvendit të Kosovës, kryeparlamentari, Nexhat Daci, e ka njoftuar Kryesinë me takimin e që ka pasur me Përfaqësuesin e lartë për Siguri dhe Politikë të Jashtme të Bashkimit Evropian, Havier Solana dhe pajtimin e plotë për punët që duhet të kryejnë institucionet e vendit për përmbushjen e standardeve për Kosovën.

 

Kryesia ka vendosur që të kërkojë nga Qeveria hartimin sa më të shpejtë të ligjeve që ndihmojnë përmbushjen e standardeve. Kryesia ka vendosur që Qeverisë t'ia kalojë rekomandimet e Komisionit për Çështje Gjyqësore, Legjislacion dhe Kornizë Kushtetuese lidhur me projektligjin për Odën Ekonomike të Kosovës, me të cilin kërkohet mendimi i ekzekutivit lidhur me amendementet e propozuara në këtë projektligj.

Në mbledhjen e sotme janë shqyrtuar edhe kundërshtimet e koalicionit "Kthimi" në katër ligje të miratuara në Kuvend: Ligjin për transportin rrugor, në Ligjin për shëndetësinë, në atë kundër diskriminimit dhe ligjin për bashkëpunim me Tribunalin Penal të Hagës.

Lidhur me emërimin e anëtarit të Kryesisë nga Grupi parlamentar "Të tjerët" është thënë se në dy takime të tre anëtarëve të Kryesisë me deputetët e Koalicionit "Vatan", nuk është arritur të gjendet zgjidhja. Ka mbetur që "Vatan" të bëjë të gjitha propozimet e mundshme, anëtar kryesie të zgjidhet kandidati i cili fiton më shumë vota nga deputetët e Grupit parlamentar ATë tjerët, thuhet në një njoftim nga kjo mbeldhje.

Ndërkaq, në një deklaratë para mediave kryeparlamentari Daci i ka cilësuar të pavërteta informacionet sipas të cilave parlamenti nuk po e kryen punën e tij siç duhet.

"Sot e kam lutur prapë Qeverinë që në parlament të vijnë ato ligje që do të na ndihmojnë në përmbushjen e standardeve, d.m.th. ligjet bazike për ekonomi, për drejtësi, për të drejtat e qytetarëve të Kosovës dhe çdo gjë që do ta lehtësonte jetën në Kosovë", tha Daci dhe shtoi se parlamenti është i gatshëm ta sponsorizojë dha të finalizojë ligjet. "Kjo është e vërteta dhe çdo gjë tjetër nuk është e vërtetë dhe është propagandë politike", tha ai.

Daci tha gjithashtu se shpreson që do të gjendet një zgjidhje edhe për kthimin e deputetëve serbë në Kuvend. Ndryshe, ende nuk dihet data e saktë se kur do të mbahet mbledhja e ardhshme e Kuvendit, por pritet që ajo të mbahet kah mesi i marsit.

 

 

Ligjëratë për muajin e historisë së zezakëve në Amerikë

 

Prishtinë, 26 shkurt 2004 - Xhems Erli nga Instituti amerikan Smithsonian, do mbajë një ligjëratë në Universitetin e Prishtinës, të premtën më 27 shkurt. Ai do të flasë për rëndësinë që e ka në Shtetet e Bashkuara "Muaji i historisë së zezakëve", në Bibliotekën Kombëtare dhe Universitare në Prishtinë.

Erli është drejtor i Departamentit për Studime dhe Komunikime Kulturore në Qendrën e Programeve të Folklorit Popullor dhe Studimeve Kulturore që gjendet në kuadër të Institutit Smithsonian, Uashington.

 

 

Në Mitrovicë mbrëmë u shënua 15-vjetori i grevave të minatorëve

 

Mitrovicë, 26 shkurt 2004 - Në qendrën e kulturës "Rexhep Mitrovica", në organizim të Forumit të Rinisë të LDK-së në Mitrovicë, dje u shenua 15-vjetori i grevave të minatorëve të Trepçës.

Pas intonimit të Himnit kombëtar të pranishmit i nderuan me një minutë heshtje të gjithë minatorët e vdekur. Pastaj foli kryetari i degës së Forumit të Rinisë të LDK-së në Mitrovoicë Safet Kamberi, i cili theksoi se "përkujtojmë me pietet të lartë sakrificën e minatorëve të Minierës së Stan Tërgut, grevës së shkurtit të vitit 1989, që tronditi themelet e ish jugosllavisë dhe njëherit ishte edhe gurëthemel për shtetin e pavarur të Kosovës".

"Ne sot po përkujtojmë sakrificën e atyre që na udhëzuan që sot të jemi të lirë dhe që të mund të ndërtojmë ardhmërinë tonë ashtu siç dëshirojmë ne", tha Kamberi, cili ceku se fatkeqësisht nga një gjigant indistrual që i prinin mu minatorët e Trepçës Mitrovica ka mbetur një nga qytetet me gjendje më të vështirë sociale. Ai bëri thirrje që të ndërmerren të gjitha masat që Trepça prapë të vihet në funksion të plotë.

Po ashtu para të pranishmëve foli edhe kryetari i Sindikatës së Minatorëve të Trepçës Hasan Potoku.
Manifestimi vazhdoi me një program të pasur kulturor.

 

 

Filloi ndërtimi i koridorit të shpresës për fshatrat e Grykës së Karadakut

 

Gjilan, 26 shkurt 2004 - Ministri i Tronsporit dhe Telekomunikacionit, Zef Morina në një ceremoni dje ka përuruar fillimin e punimeve në hapjen e rrugës Zhegër-Stançiq, e cila në fazën e parë do të shtrihet deri në Shurdhan.

Parashihet në fazën tjetër kjo rrugë të ndërtohet deri në kufi me Maqedoninë dhe të jetë një portë shumë e rëndësishme edhe për Kosovën, përmes së cilës do të lidhet me koridorin e tetë ndërkombëtar të trafikut.

Xhemajl Hyseni, zëvendëskryetar i komunës së Gjilanit tha me këtë rast se rruga Gjilan-Zhegër-Stançiq është një nga projektet më madhore të karakterit kombëtar dhe ndërkombëtar, sepse ajo lidhë fshatra, qytete, rajone, shtete e kontinente.

 

Ndërtimi i kësaj rruge, e cila lidhë edhe shumë vendbanime shqiptare të Kosovës dhe të Maqedonisë, ka qenë jo vetëm një ërndërr e kahershme, por edhe një gjakim i shumë gjeneratave të përparshme.

Ministri Zef Morina theksoi se shpreson se rikonstrumi i kësaj rruge do të shënojë progres të mëtejmë në zhvillimin ekonomik të kësaj ane, e në veçanti do të ketë efekt pozitiv në parandalimin e zhvendosjes së popullatës nga fshtarat e kësaj Gryke.

Morina tha se kjo rrugë ka qenë njëri nga prioritetet kryesore të Ministrisë së Transporteve, ndërtimi i së cilës do të mundësojë veç tjerash edhe lidhjen më të mirë të vendbanimeve që shtrihen në rripin e vargmaleve të Karadakut, përkatësisht në zonën kufitare me Maqedoninë me vendbanimet shqiptare në pjesën e rajonit të Kumanovës.

Kjo rrugë ka gjatësi 11 kilometra, nga Zhegra deri në Stançiq, ndërsa në fazën e tashme ajo do të ndërtohet deri në Shurdhan dhe është e gjatë 8 kilometra, ndërsa gjerësia e saj do të jetë 6 metra. Projekti ka vlerën mbi 527 mijë euro dhe parasheh zgjerimin e rrugës ekzistuese dhe shtruarjen e saj me tampon, në trashësi prej 30-35 cm.

 

 

Mbrëmë në Prishtinë vdiq shkrimtari i njohur për fëmijë Zejnullah Halili

 

Prishtinë, 26 shkurt 2004 - Papritmas mbrëmë në Prishtinë, në moshën 59-vjeçare, vdiq shkrimtari i njohur për fëmijë Zejnullah Halili.

Autor i shumë veprave për fëmijë, shkrimtari Halili tërë krijimtarinë e tij ia ka kushtuar lexuesve më të vegjël, duke shkruar me përkushtim të madh për botën e tyre.

I ndjeri një kohë të gjatë ka punuar në Redaksinë për fëmijë të Radio Prishtinës, pastaj në Redaksinë e revistave të ndërmarrjes së dikurshme "Rilindja", ku ka qenë edhe kryeredaktor i "Gazetës për fëmijë".

Varrimi i shkrimtarit Zejnullah Halili bëhet sot në vendlindjen e tij në fshatin Kokaj të komunës së Gjilanit.

 

 

Grupi i punës për zgjedhjet në Kosovë bëri publike rekomandimet përfundimtare

 

Prishtinë, 26 shkurt 2004 - Grupi i punës për zgjedhjet në Kosovë bëri dje publike rekomandimet përfundimtare në lidhje me kornizën rregulluese, të cilat ia ka dërguar kryeadministratorit të Kosovës Hari Holkeri.

 

Shefi i OSBE-së në Kosovë Paskal ka thënë se ky dokumentacion do t'i japë z. Holkerit njohuri të konsiderueshme për të menduar për faktorët kryesorë në procesin e zgjedhjeve.

 

Sipas këtyre rekomandimeve, Parlamenti i Kosovës do të vazhdojë të ketë 120 vende, ku 100 prej tyre do t'u ndaheshin subjekteve politike në bazë të proporcionit të votave që do të fitojnë.

 

Në këto zgjedhje do të ketë vetëm një njësi zgjedhore. Njëherësh ende është e paqartë nëse do të votohet me lista të hapura apo të mbyllura. Grupi i punës rekomandon që mandati i Parlamentit nga tre vjet që është tash të bëhet katër vjet.

Vendimet përfundimtare do t'i marrë Kryeadministratori i Kosovës, i cili do të shpallë datën e zgjedhjeve.

Shefi i Misionit të OSBE-së në konferencën e djeshme për gazetarë ka lavdëruar punën e grupit, duke shtuar se në rekomandime figurojnë edhe çështje për të cilat nuk ka koncensus, sidomos nëse Kosova duhet të jetë një apo disa njësi zgjedhore, nëse do të ketë lista të hapura apo të mbyllura.

 

 

Kryetari i Parlamentit Evropian thotë se parakusht për inkuadrimin e Kosovës në BE janë standardet para statusit

 

Londër, 26 shkurt 2004 - Problemi kryesor për vendet e Ballkanit drejt inkuadrimit evropian është korrupsioni, thotë Pet Koks, kryetar i Parlamentit Evropian. Në një takim në Londër, Koks i ka bërë një vështrim bashkësisë evropiane në prag të zgjerimit në lindje dhe sfidat aktuale që e presin komunitetin evropian.

Kur është fjala për çështjen e Kosovës, përkatësisht zgjidhjen e statusit përfundimtar të saj, si parakusht drejt inkuadrimit evropian, z. Koks thotë se qëndrimi është i njohur, standardet para statusit. Ai thekson rëndësinë e vazhdimit të procesit të bisedimeve ndërmjet Prishtinës dhe Beogradit.

 

"Nëse vështrohen marrëdhëniet ndërmjet Serbisë dhe Kosovës dhe Serbisë e Malit të Zi, vërehet se këto marrëdhënie janë komplekse. Për të ndërtuar strukturat evropiane ne duhet të dimë cilat janë bazat solide për ndërtimin e tyre", ka thënë ndër të tjera, kryetari i Parlamentit Evropian.

 

 

Pegi Hiks shpreson se gjatë këtij viti kthimi i të zhvendosurve serbë do të shënojë rritje

 

Prishtinë, 26 shkurt 2004 - "Megjithë rritjen prej 33 për qind të numrit të kthyerve serbë në Kosovë ne nuk mund të jemi të kënaqur, por shpresojmë se në vitin 2004 ky numër do të shënojë rritje", tha Pegi Hiks, zyrtare në Zyrën koordinuese për kthim në UNMIK. Çelësi për kthimin e tyre, sipas zonjës Hiks, është plotësimi i kërkesave të tyre, kuptohet konform mundësive ekzistuese.

"Për të arritur rezultate edhe më të mira në kthimin e serbëve ne duhet të sigurojmë kushte për jetesë dhe sigurinë e lëvizjes. Këtu krahas ndërkombëtarëve duhet të angazhohen edhe institucionet vendëse, gjë që vullneti i angazhimit të vendorëve nuk mungon. Qeveria e Kosovës për kthim ka dhënë 7 milionë euro nga buxheti i konsoliduar i saj", ka thënë zonja Hiks.

 

 

Çapell i cilëson të pavërteta akuzat e mediave dhe politikanëve serbë se gjendja e serbëve në Kosovë është e mjerueshme

 

Prishtinë, 26 shkurt 2004 - Policia ndërkombëtare në Kosovë hodhi poshtë akuzat e shpifura në disa shkrime të botuara në mediat e Beogradit dhe të politikanëve serbë se gjendja e serbëve në Kosovë është e mjerueshme.

 

Këto deklarime i bëri zëdhënësi i policisë së UNMIK-ut Derek Çapell, i cili i cilëson të pavërteta dhe thotë se gjendje e sigurisë në Kosovë është e qëndrueshme dhe në mënyrë të veçantë sulmet me motive etnike kanë shënuar rënie.

 

Por, fatkeqësisht mediat serbe çdo vrasje të serbëve në Kosovë e cilësojnë me motive etnike dhe ato i legjitimojnë të kryera nga terroristët shqiptarë. Kjo nuk është e vërtetë thotë Çapell. Sipas tij shumë krime kanë ndodhur prej komunitetit të njëjtë.

"Fatkeqësia më e madhe është kur grupe të caktuara i përdorin këto vrasje për qëllime të veta", ka thënë Çapell. Ai ka shtuar se në mediat e Beogradit është shkruar se 40 serbë janë vrarë në Lipjan, që nga ardhja e forcave paqeruajtëse në Kosovë, që është një gënjeshtër. Numri i vrasjeve, thotë ai, është 22 dhe vetëm në një rast pas përfundimit të luftës janë vrarë 14 persona.

 

Është ky rast i Grackës në qershor të vitit 1999 kur në Kosovë ende nuk ka pasur polici ndërkombëtare thotë Derek Çapell. Po ashtu në mediat e Beogradit thuhet se në rajonin e Lipjanit nga 17 mijë serbë sa ishin në vitin 1999 tash aty jetojnë vetëm 2000. Edhe kjo është gënjeshtër thotë Çapell.

 

Sipas tij të dhënat e vërteta janë se pas përfundimit të luftës në komunën e Lipjanit kanë jetuar pak më shumë se 9000 serbë, ndërkaq edhe tash aty jetojnë rreth 900 serbë, ka nëvizuar Çapell, duke shtuar se gjendja e sigurisë në mënyrë të veçantë për pjesëtarët e komunitetit serb, kudo që jetojnë ata është përmirësuar dukshëm.

 

 

Serbët nuk dëshirojnë t'u kërkojnë falje shqiptarëve për krimet në Kosovë

 

Prishtinë, 26 shkurt 2004 - Serbët nuk dëshirojnë t'u kërkojnë falje shqiptarëve për krimet e bëra nga regjimi i Millosheviqit. Po ashtu mund të numërohen me gishta të dorës edhe qytetarët e tjerë në Serbi, të cilët mendojnë se shqiptarëve duhe t'u kërkohet falje.

 

Këto komente i bëri publicisti serb nga Beogradi Nikolla Radash. Ai ka ardhur në Kosovë për të marrë pjesë në promovimin e revistës së përmuajshme e cila mbanë emrin "Dialogu për Kosovën".

  

 

Probleme serioze me gjendjen e të drejtave të njeriut në Shqipëri

 

Uashington, 26 shkurt 2004 - Në kapitullin për Shqipërinë, raporti i Departamentit të Shtetit thekson se gjendja e të drejtave të njeriut në këtë vend, vazhdon të mbetet e dobët në disa fusha dhe megjithë përparimet e bëra, ka ende probleme serioze.

Policia thuhet në raport, keqtrajton të ndaluarit dhe të arrestuarit dhe herë pas here kryen edhe arrestime arbitrare. Në muajin janar të vitit 2003, policia në Korçë keqtrajtoi një shtetas i cili vdiq më pas në spital. Fillimisht autoritetet e fshehën rastin si helmim, por pas ndërhyrjes së zyrës së Avokatit të Popullit, hetimet arritën në përfundimin se vdekja ishte shkaktuar nga hemorragjia si rezultat i keqtrajtimit.

Në Shqipëri thuhet në raportin e Departamentit amerikan të Shtetit, niveli i krimeve të dhunshme vazhdon të jetë i lartë dhe shumë prej tyre kanë të bëjnë me gjakmarrjen ose konfliktet e bandave kriminale.

Korrupsioni, thuhet në raport, përbën një problem mes forcave policore dhe pagat e tyre të ulta si dhe korrupsioni tejet i përhapur në gjithë shoqërinë, e bëjnë atë të vështirë për t=u luftuar.
Raporti i Departamentit të Shtetit thekson se pjesa më e madhe e sistemit gjyqësor nuk funksion në mënyrë të pavarur dhe me efektivitet për shkak të trysnisë politike, kërcënimit, korrupsionit të thellë, rryshfeteve dhe burimeve të pamjaftueshme.

Një problem tjetër serioz për Shqipërinë është trafiku i qenieve njerëzore, veçanërisht i grave dhe fëmijve. Policia vazhdon të jetë e përfshirë në këtë trafik. Organizatorët e trafikut edhe kur arrestohen, shpesh lirohen për mungesë provash, ose edhe në se gjykohen marrin dënime për krime më të lehta.

 

 

Zyrtarët e lartë evropianë shprehin ngushëllime për vdekjen e Trajkovskit

 

Bruksel, 26 shkurt 2004 - Me rastin e vdekjes tragjike të Presidentit të Maqedonisë, kryetari i Parlamentit Evropian Pat Koks i ka shprehur ngushëllime familjes së tij dhe popullit maqedonas.

"Posa kemi mësuar për fatkeqësinë tragjike të aeroplanit me të cilin presidenti Trajkovski udhëtonte për në Bosnjë dhe jam thellë i tronditur dhe i pikëlluar për vdekjen e tij.

 

Kemi patur kënaqësinë ta mirëpresim presidentin Trajkovski vitin e kaluar në PE dhe iu shpreh ngushëllimet e mia më të thella familjes së presidentit, miqëve dhe popullit të Maqedonisë, me rastin e vdekjes së tij tragjike", thuhet në deklaratën e kryetarit të Parlamentit Evropian, Pat Koks.

Ndërkaq, përfaqësuesi i lartë i BE-së për Politikë të Jashtme dhe Siguri, Havier Solana, ka shprehur dhembje për siç ka thënë shkuarjes së një 'burri të madh' dhe një miku të Evropës. "Kjo është një ditë tragjike për Maqedoninë, për popullin e saj, por edhe për shumë evropianë. është shprehur Solana.

"Presidenti Trajkovski ka qenë një burrë i madh, njeri i cili ka punuar për progresin e vendit të tij, jo vetëm në reforma, por edhe në afrimin e përshpejtuar në Bashkimin Evropian", thoët Solana.
Poashtu keqardhje të thellë për vdekjen e Trajkovskit ka shprehur edhe kryetari i Komisionit Evropian Romano Prodi.

 

 

Për shkak të vdekjes të Trajkovskit anulohet konferenca e Mostarit

 

Mostar, 26 shkurt 2004 - Është anuluar konferenca ndërkombëtare për investimet, e cila është dashur të mbahet sot në Mostar, pas rrëzimit të avionit presidencial maqedonas, në të cilin ndodheshin Presidenti i Maqedonisë Boris Trajkovski dhe tetë pasagjerë dhe anëtarë të ekuipazhit.

Për shkak të motit të lig, shiut të fuqishëm dhe mjegullës së dendur në B e H - udhëtimin për në Mostar e ka anuluar kryeministri shqiptar Fatos Nano, presidenti i Serbisë dhe Malit të Zi dhe kryeministri sllovak.

 

 

Zyrtarët e Federatës së B e H konfirmojnë vdekjen e Trajkovskit

 

Sarajevë, 26 shkurt 2004 - Presidenti i Maqedonisë ka humur jetën nga rrëzimi i avionit afër vendit Stolac në Hercegovinën lindore, ka konfirmuar zëdhënësi i Ministrisë së Punëve të Brendshme të Federatës së Bosnjës e Hercegovinës Nexhad Vejzagiq.

Ai u ka thënë gazetarëve se ekipet e shpëtimit që janë dërguar në terren kanë gjetur mbeturinat e avionit të Presidentit maqedonas dhe se askush nuk ka mbijetuar aksidentin.

Supozohet se avioni për shkak të motit të lig është përplasur në malin Hërgud mes Stolacit dhe Lubinjës.

Sipas lajmeve të pakonfirmuara, me Presidentin Trajkovski në avion ndodheshin këshilltarja e tij Ginka Ilkova-Boshkoviq dhe tre anëtarë të kabinetit të tij.

 

 

Presidenti maqedons Trajkovski ka humbur jetën nga rrëzimi i avionit

 

Dublin, 26 shkurt 2004 - Presidenti i Maqedonisë Boris Trajkovski ka humbur jetën kur avioni me të cilin po udhëtonte është përplasur në malet e Bosnjës jugore, tha kryeministri i Irlandës Berti Ahern.

Ahern foli shkurt pas takimit me kryeministrin maqedonas në Dublin. Ai tha se takimi është anuluar "për shkak të lajmit tragjik se Presidenti Boris Trajkovski ka vdekur nga rrëzimi i avionit në Bosnjë", njofton Rojter.

 

 

Në Bosnjë është rrëzuar avioni i Presidentit të Maqedonisë Boris Trajkovski

 

Mostar, 26 shkurt 2004 - Njoftohet se avioni i Presidentit të Maqedonisë Boris Trajkovski është rrëzuar sot në jug të Bosnjës e Hercegovinës, 50 km në jug të Mostarit.

Trajkovski bashkë me anëtarët e një delegacioni maqedonas po udhëtonte në konferencën ndërkombëtare për investime në Mostar. Kontrolli i fluturimeve në orët e paradites ka humbur kontaktin me avionin qeveritar maqedonas, i cili në atë moment ndodhej mbi qytetin Stoc.

Policia dhe ekipet e shpëtimit ndodhen në terren dhe po përpiqen të verifikojnë se çfarë ka ndodhur me avionin.

Ende nuk dihet se sa anëtarë të delegacionit maqedonas ndodheshin në avion dhe për çfarë tipi avioni bëhet fjalë.

 

 

Maqedonia sot në Dublin paraqet kërkesën për anëtarësim në Bashkimin Evropian

 

Shkup - Dublin, 26 shkurt 2004 - Maqedonia pritet të parashtrojë sot zyrtarisht në Dublin të Irlandës aplikimin për anëtarësim në Bashkimin Evropian. Këtë e konfirmoi kryeministri maqedonas Branko Cërvenkovski para nisjes së delegacionit maqedonas për në Irlandë.

Aplikimi do t'i dorëzohet kryeministrit irlandez Berdi Ahen si kryesues aktual i Bashkimit Evropian.
"Parashtrimi i aplikimit është ngjarje e madhe dhe e rëndësishme që në masë të madhe do të definojë rrugën nëpër të cilën do të ecim gjatë periudhës së ardhshme si popull dhe si shtet", ka deklaruar kryeministri maqedonas para nisjes së delegacionit të Maqedonisë në Dublin.

 

Ai ka shtuar se Maqedonia duhet të kalojë edhe një rrugë shumë të vështirë në realizimin e reformave dhe harmonizimin e legjislaturës me vendet e Bashkimit Evropian.

 

 

Opozita në Shqipëri ka ndërprerë protestat për t'i filluar më 20 mars

 

Tiranë, 26 shkurt 2004 - Tryeza e partive opozitare në Shqipëri vendosi dje në Tiranë që të ndërpresë protestat për t'i filluar ato me 20 mars. Ndërkohë, partia më e madhe opozitare e Salih Berishës nuk e hedh poshtë mundësinë e arritjes të një koncensusi politik me socialistët në pushtet për çështje të rëndësishme si përmirësimi i kodit elektoral, ligji për pronat dhe shpejtimin e reformave.

Spartak Ngjela, sekretar i PD-së për Marrëdhëniet me publikun, e konsideron uljen e socialistëve në tryezën e bisedimeve me opozitën të vetmen rrugë që u ka mbetur atyre pasi kanë dështuar sipas tij në qeverisjen e vendit dhe në garantimin e votës së lirë.

 

 

Parlamenti i Maqedonisë miratoi propozimin për riorganizimin territorial të Shkupit

 

Shkup, 26 shkurt 2004 - Parlamenti i Maqedonisë miratoi me shumicë votash propozimin për riorganizimin territorial të Shkupit. Kundër këtij propozimi votuan vetëm dy deputetë, ndërkaq deputetë e partive opozitare maqedonase gjatë votimit nuk ishin të pranishëm në kuvend.

 

Në këtë propozim theksohet se nxjerrja e ligjit për qytetin e Shkupit ka për qëllim rrumbullakësimin e rregullativës ligjore me të cilën realizohet reforma e sistemit të pushtetit vendor me kornizën e re kushtetuese.

 

Me këtë propozim Shkupi është ndarë në nëntë komuna, ndërkaq ekziston mundësia alternative që Haraçina gjithashtu të inkuadrohet në kuadër të kryeqytetit, por për këtë do të bisedohet në fazën e dytë.

 

 

Qeveria izraelite dhe palestineze planifikojnë një takim mes kryeministrave të tyre

 

Jeruzalem, 26 shkurt 2004 - Qeveria izraelite dhe palestineze planifikojnë një takim të nivelit të lartë mes kryeministrave të tyre Ariel Sharon dhe Ahmed Korej. Siç u konfirmua nga të dyja palët, drejtuesit e zyrave të dy kryeministrave janë takuar në parapërgatitjen e këtij takimi.

 

Bisedimet kanë qenë pozitive thuhet në Jeruzalem. Megjithatë nuk është bërë me dije se kur do të zhvillohet takimi Sharon - Korej.

 

Nga ana tjetër presidenti palestinez Jaser Arafat ka shprehur dhe njëherë gatishmërinë e tij për një marrëveshje paqësore me Izraelin. Siguria dhe paqja nuk janë me interes vetëm për palestinezët por edhe për izraelitët, theksoi Arafat në Ramallah.

 

 

Kancelari gjerman viziton SHBA-të

 

Berlin, 26 shkurt 2004 - Kancelari gjerman Gerhard Shrëder udhëton sot për në Shtetet e Bashkuara të Amerikës ku do të takohet edhe me presidentin amerikan Xhorxh Bush. Stacioni i parë i vizitës së tij do të jetë Çikago. Atje Shrëder do të mbaj një fjalim para përfaqësuesëve të ekonomisë amerikane.

 

Takimi me presidentin Bush është paraparë të zhvillohet të premten. Kjo është vizita e parë e kancelarit Shrëder në Shtëpinë e Bardhë prej dy vitesh.

 

Në qendër të bisedimeve pritet të jetë konflikti i Irakut. Edhe pse Shrëder ka përjashtuar mundësinë e angazhimit ushtarak gjerman në Irak, Gjermania është e gatshme të ndihmojë në sektorin civil dhe të ofrojë faljen e borxheve për vendin arab.

 

 

Nga shpërthimi i gazit në Siberi kanë humbur jetën 15 veta

 

Moskë, 26 shkurt 2004 - Nga shpërthimi i gazit në qytetin siberian Çita kanë humbur jetën 15 veta dhe janë plagosur të paktën 17 të tjerë, njofton Ministria ruse e Emergjencës.

Shpërthimin e ka shkaktuar rrjedhja e gazit në një restoran në qytetin Çita, cili ndodhet afër kufirit me Mongolinë dhe Kinën.

Nga shpërthimi plotësisht është shkatërruar ndërtesa. Shpërthimet e gazit janë dukuri e shpeshtë në Rusi për shkak të mirëmbajtjes së dobët të infrastrukturës.

 

 

Vriten dy plasetinezë dhe një izraelit

 

Gaza, 26 shkurt 2004 - Dy palestinezë dhe një izrealit janë vrarë sot në mëngjes në një konflikt në Gaza, njoftuan burimet izraalite të sigurimit.

Incidenti ka ndodhur në kalimin kufitar Erez nga Rripi i Gazës në Izrael. Së pari dy militantë palestinezë për arsye të panjuhura kanë vrarë një izrealit e pastaj pjesëtarët e sigurimit izrealit kanë vrarë ata dy.

Grupi palestinez i Brigadave të martirëve Al-Aksa kanë thënë se dy palestinezët kanë qenë anëtarë të grupit të tyre.

 

 

Janë vrarë pesë punëtorë humanitarë afganë

 

Kabul, 26 shkurt 2004 - Pesë punëtorë humanitarë të një organizate joqeveritare afgane janë vrarë të mërkurën në pritë në lindje të vendit, ka bërë të ditur ministri afgan i Punëve të Brendshme Ali Ahmad Xhalali.

Ai ka thënë se humanitarët i takonin Solidaritetit Nacional Afgan (FPF), organizatë joqeveritare e cila ndihmonte në punët e rindërtimit të Afganistanit. Në këtë sulm janë plagosur edhe dy humunitarë.

 

 

Thellohet kriza në Haiti

 

Nju Jork, 26 shkurt 2004 - Këshilli i Sigurimit pritet të zhvillojë të enjten një takim urgjent për të gjetur një zgjidhje për krizën që po thellohet në Haiti.

Takimi mbahet një ditë pasi Franca propozoi një plan, që përfshin dislokimin e një force civile ndërkombëtare dhe ndihmë ndërkombëtare për të përgatitur terrenin për zgjedhjet presidenciale në vend.

Ministri i jashtëm francez, Dominik dë Vilpen, tha se ishte koha për një kapitull të ri në historinë haitiane.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |