Përmbajtja:

• Në Kampin Bondstill u bë ndërrimi komandës, komandant i ri është Rik Erlandson

• Solana thotë se nuk duhet pritur deri në vitin 2005 për ta zgjidhur problemin e Mitrovicës

• Nga vizita e kryeministrit Rexhepi në Itali

• Gjenerali Xheri Bek thotë Shtetet e Bashkuara janë të gatshme të qëndrojnë në Kosovë aq sa është e nevojshme

• Punëtorët e gjyqësisë kanë hyrë në një grevë të pakënaqur me rrogat e vogla

• UNMIK-u thotë se dialogu për çështje teknike ndërmjet Prishtinës dhe Beogradit pritet të fillojë më 4 mars

• Përfaqësuesit e institucioneve të BE-së vizituan fshatin Magurë të Lipjanit

• Haziri ka kërkuar në Bruksel projekte që sigurojnë infrastrukturë më të mirë në rajon

• Përfaqësuesit e Ombudspersonit të Kosovës biseduan në Prizren me minoritetet joserbe

• Nënkoloneli Xhonson ka kërkuar nga qytetarët e Dardanës që t'i përgjigjen aksionit për dorëzimin e armëve

• Në Skënderaj u mbajt një protestë kundër arrestimit të tre eprorëve të TMK-së

• Nënkryetari i BDI-së thotë se projektligji i Qeverisë për Shkupin është i disfavorshëm për shqiptarët

• Në Hagë përfundon paraqitja kundër Millosheviqit

• Në Marok të paktën 564 të vdekur nga tërmeti

• Ngriten aktakuzat e para ndaj të burgosurve

• Putin shkarkon kabinetin qeveritar

• CIA thotë se Al-Kaida e vendosur për të sulmuar Shtetet e Bashkuara

• Në qytetin Mosul vriten dy gjeneralë irakianë

• Amerika kërkon veprime nga Koreja e Veriut

• Prokurori ka ngritur aktakuza kundër 69 personave për dy sulme vetëvrasëse në Stamboll

• Rrëzohet një helikopter amerikan, vdesin dy anëtarë të ekuipazhit

Në Kampin Bondstill u bë ndërrimi komandës, komandant i ri është Rik Erlandson

 

Kampi Bondstill, 25 shkurt 2004 - Sot në kampin ushtarak amerikan Bondstill afër Ferizajit u zhvillua ceremonia e ndërrimit të komandës së Brigadës Shumëkombëshe të Lindjes.

 

Në këtë ceremoni morën pjesë Presidenti i Kosovës Ibrahim Rugova, shefi i UNMIK-ut Hari Holkeri, komandanti i KFOR-it Holger Kamerhof, komandanti i TMK-së Agim Çeku, shefja e Zyrës amerikane Marsi Ris dhe mysafirë të tjerë.

Komandanti i gjertanishëm i kësaj brigade, gjenerali Xheri Bek ia dorëzoi detyrën gjeneralit Rok Erlandson dhe kjo është hera e dhjetë që nga viti 1999 që po bëhet ndërrimi i komandës. Me këtë rast u tha se NAT0 mbetet e përkushtuar për Kosovën dhe do të përkrahë fuqishëm.

Komandanti Erlandson tha se divizioni i 34 i këmbësorisë dhe njësitë e tjera janë të trajnuara mirë dhe janë të gatshme të vazhdojnë misionin në Kosovë. Ai theksoi se ushtarët janë të trajnuar mirë dhe ata do ta kryejnë pjesën e tyre të punës.

 

Por ai shtoi se në fund do të varet nga njerëzit e mirë të Kosovës që të qëndrojnë dhe të bëjnë të ardhmen e tyre të ndritur dhe shpreson se do të jetë një realitet, tha Elandson.

 

 

Solana thotë se nuk duhet pritur deri në vitin 2005 për ta zgjidhur problemin e Mitrovicës

 

Prishtinë, 25 shkurt 2004 - Pas takimeve me udhëheqësit e institucioneve të Kosovës dhe ata ndërkombëtarë, përfaqësuesi i lartë për Poltikë të Jashtme dhe Siguri, Havier Solana në një takim me gazetarë ka thënë se Bashkimi Evropian, përveç ndihmës ekonomike, do ta ndihmojë Kosovën edhe politikisht. Solana tha se BE do të japë 100 milionë euro për Kosovën, fonde të cilat do të shkojnë në projektet sociale, ekonomike dhe të infrastrukturës politlike.

Por, ai kërkoi angazhim më të madh të udhëheqësve kosovarë, sidomos në procesin e implementimit të standardeve për Kosovën. Njëherit ai bëri thirrje për rifillimin e dialogut ndërmjet Prishtinës dhe Beogradit, që sipas tij mbahet të nisë në fillim të marsit.

Solana tha se nga bisedat që ka zhvilluar në Prishtinë me udhëheqësit e këtushëm ka parë një angazhim të tyre dhe gatishmëri që të jenë drejtpërdrejt të inkuadruar në këto procese. Sipas Solanës udhëheqësit e Kosovës tash për tash duhet të angazhohen në implementimin e standardeve e të mos përqendrohen shumë për zgjedhjet parlamentare që do të mbahen në vjeshtë.

 

Shqetësimi i BE-së, tha Solana, është se ky mekanizëm gjithsesi duhet parë progres në këto procese përderisa udhëheqësit e këtushëm kërkojnë ndihmë nga Bashkimi Evropian. Sipas tij, ndihma do të jetë ekonomike dhe politike dhe shtoi se gjysma e vitit 2005 nuk është larg kur procesi i implementimit të standardeve duhet përmbyllur me sukses në mënyrë që të hapen bisedat për statusin final të Kosovës.

Solana tha se tashmë është caktuar një takim për muajin mars ndërmjet Prishtinës dhe Beogradit, ku sipas tij do të bisedohet për persona të zhdukur dhe energjetikën.

Ndërkaq, duke folur rreth problemit të Mitrovicës, shefi i diplomacisë evropiane, Havier Solana tha se nuk duhet pritur deri në vitin 2005 për ta zgjidhur këtë problem, sepse kjo është data kur duhet të vlerësohet puna e standardeve.

 

 

Nga vizita e kryeministrit Rexhepi në Itali

 

Veronë, 25 shkurt 2004 - Në ditën e dytë të vizitës së tij në Itali, kryeministri i Kosovës dr. Bajram Rexhepi pati disa takime në rajonin e Veronës. Fillimisht ai u takua me zotin Paulo Zanoto, kryetar i Bashkisë së Veronës.

 

Pas bisedës së përzemërt dhe miqësore me zotin Zanoto, kryeministri u takua edhe me Këshillin bashkiak para të cilit mbajti nji fjalim rasti. Me kët rast Kryeminsistri Rexhepi dhe zoti Zanoto nënshkruan një memorandum mirëkuptimi në fushat për të cilat është përgjegjëse Qeveria e Kosovës. Pas këtij takimi ata mbajtën një konferencë të përbashkët për shtyp.

Kryeministri Rexhepi u takua edhe me përfaqësues të qeverisë italiane në Veronë, me shefin e karabinjerisë dhe shefin e Guarda di Finanza për rajonin e Veronës. Me këtë rast Kryeministri falenderoi ata për punën e mirë dhe ndihmën që kanë dhënë për Kosovën. Gjatë këtij takimi kryeministri ritheksoi nevojën e angazhimit të tyre të mëtutjeshme në Kosovë.

Kryeministri Rexhepi me bashkpunëtorë vizitoi edhe Komandën Jugore të trupave të NATO-s, kurse sonte ai do të takohet edhe me Asociacionin e Gazetarëve.

Sot pritet që Kryeministri të takohet me zyrtarë të lartë të qeverisë italiane, thuhet në një njoftim të Zyrës për Informim Publik e Kryeministrit.

 

 

Gjenerali Xheri Bek thotë Shtetet e Bashkuara janë të gatshme të qëndrojnë në Kosovë aq sa është e nevojshme

 

Prishtinë, 25 shkurt 2004 - Shtetet e Bashkuara të Amerikës mbeten të angazhuara në Kosovë pavarësisht luftës kundër terrorizmit, tha komandanti i Sektorit të Lindjes, gjenerali amerikan Xheri Bek. Ai ka shtuar se ushtarët e tij janë të sigurtë sepse ata respektohen nga shqiptarët, por edhe nga serbët dhe minoritetet tjera që jetojnë në Kosovë.

 

Ai i bëri këto komente në prag të përfundimit të misionit të tij në Kosovë në një intervistë të gjatë në radion "Evropa e lirë" "Nuk ka kurrëfarë rëndësie fakti se unë do të largohem dhe në vendin tim do të vijë dikush tjetër, respekti do të mbetet. Nuk shoh ndonjë rrezik të madh për ushtarët tanë. Ne jemi të gatshëm menjëherë të reagojmë nëse diçka do të ndodhë brenda sektorit", ka thënë gjenerali Bek, i cili sot përfundon misionin e tij në Kosovë.

 

Ai ka shtuar se sfida më e madhe me të cilën janë përballur forcat amerikane të KFOR-it në Sektorin e Lindjes është liria e lëvizjes dhe, siç u shpreh, është thellësisht i bindur se në gjithë Sektorin e Lindjes ka liri të lëvizjes. Sipas tij është bërë një përparim i madh në lirinë e lëvizjes, por kjo nuk do të thotë se ka në tërë Kosovën.

Duke shfaqur opinionet rreth krahasimit ndërmjet situatës në Bosnje dhe në Kosovë, gjenerali Bek tha se është ide e keqe të krahasohet Bosnja dhe Kosova. Ai nënvizoi se Kosova është duke treguar përparim të madh dhe ky përparim që po tregohet dëshmon edhe për faktin se forcat amerikane janë të gatshme të qëndrojnë në Kosovë aq sa është e nevojshme, duke mbështetur misionin e OKB-së dhe duke krijuar mundësi që rruga e përparimit të vazhdojë.

 

 

Punëtorët e gjyqësisë kanë hyrë në një grevë të pakënaqur me rrogat e vogla

 

Prishtinë, 25 shkurt 2004 - Punëtorët e gjyqësisë së Kosovës sot kanë hyrë në një grevë në shenjë pakënaqësie me rrogat e vogla. Grevistët kërkojnë përmirësimin e gjendjes së tyre ekonomike. Kryetari Këshillit grevist Naim Shala, tha se punëtorët kanë qenë të detyruar të ndërmarrin këtë hap sepse nuk mund të jetojnë me një rrogë prej 120 eurosh në muaj.

 

 

UNMIK-u thotë se dialogu për çështje teknike ndërmjet Prishtinës dhe Beogradit pritet të fillojë më 4 mars

 

Prishtinë, 25 shkurt 2004 - Dialogu për çështje teknike ndërmjet Prishtinës dhe Beogradit pritet të fillojë më 4 mars, bëjnë të ditur burimet nga administrata ndërkombëtare. UNMIK-u thotë se nuk ka kurrëfarë pengesash për nisjen e këtij procesi.

 

Sipas administratës ndërkombëtare kryesues të pavarur ndërkombëtarë jashtë UNMIK-ut do të ndërmjetësojnë takimet e palëve në dialog. Xholi Dikson do të kryesojë grupet për energji dhe telekomunikacion, ndërkaq një përfaqësues nga UNDP-ja do të udhëheqë grupin për kthim.

 

Po ashtu u bë e ditur se grupin për persona të zhdukur do ta drejtojë një përfaqësues i Komitetit Ndërkombëtar i Kryqit të Kuq.

 

 

Përfaqësuesit e institucioneve të BE-së vizituan fshatin Magurë të Lipjanit

 

Lipjan, 25 shkurt 2004 - Përfaqësuesit e institucioneve të BE-së që janë prezente në Kosovë, të Shtyllës së katërt të UNMIK-ut dhe të Agjencisë Evropiane për Rindërtim vizituan sot fshatin Magurë të Lipjanit për t'u njohur me programin e integrimit të personave të kthyer, i cili financohet dhe mbështette nga Bashkimi Evropian.

Shefi i Zyrës holandeze, e cila përfaqëson edhe presidencën irlandeze të BE-së, Peter bas Beker, tha se Magura është një shembull i suksesit. Ai shtoi se kthimi i personave të zhvendosur është një nga standardet për Kosovën që duhet përmbushur. "Ne vërtet mendojmë se ëshë e mundur ta bëjmë kthimin e tyre dhe fshati Magurë është njëri nga shembujt e tillë të suksesit", tha Beker.

Përfaqësuesit e fshatit informuan mysafirët me kushtet e banorëve të Magurës dhe me procesin e kthimit të ashkalinjve në këtë fshat, por ata theksuan problemin e panunësisë për banorët e këtueshëm. Ndryshe në këtë fshati deri më tash janë kthyer 27 famulje të ashkalinjve dhe janë ndërtuar 27 shtëpi për ta.

Shefja e Zyrës për kthimin e të zhvendosurve pranë UNMIK-ut Pegi Higs tha se të kthyerit po përballen me shumë probleme, duke veçuar atë të sigurisë.

 

 

Haziri ka kërkuar në Bruksel projekte që sigurojnë infrastrukturë më të mirë në rajon

 

Bruksel, 25 shkurt 2004 - Kryetari i Asociacionit të Komunave të Kosovës, Lutfi Haziri i cili ndodhet në një vizitë dyditëshe në Bruksel është takuar dje me Stefano Saninon, këshilltar i kryetarit të Komisionit Evropian, Romano Prodi dhe me zyrtarë të tjerë në Bruksel.

 

Në këtë takime, ku kanë marrë pjesë përfaqësues të disa shteteve, z. Haziri është përqëndruar te zhvillimi ekonomik lokal dhe te bashkëpunimi ndërkufitar në rajon, që sipas tij duhet të inkurajohet me projekte që sigurojnë infrastrukturë më të mirë në komunat Gjilan, Kumanovë dhe Preshevë si pjesë e mikrorajonit.

 

 

Përfaqësuesit e Ombudspersonit të Kosovës biseduan në Prizren me minoritetet joserbe

 

Prizren, 25 shkurt 2004 - Sot në Prizren një delegacion i institucionit të Ombudspersonit të Kosovës ka zhvilluar një takim me minoritetet joserbe (boshnjakë, turq, romë, ashkalinj, egjiptianë dhe goranë), në mënyrë që të dëgjojë mendimet e tyre për situatën e tanishme, problemet si dhe perspektivat e jetës së tyre në Kosovë.

Qëllimi i Ombudspersonit është që të organizojë takime të tilla informuese dhe diskutime në mënyrë të rregullt me minoritetet në Kosovë. Situata e komuniteteve joshqiptare është një ndër çështjet aktuale më sensitive në fushën e të drejtave të njeriut në Kosovë, thuhet në një komunikatë të Obudspersonit.

 

 

Nënkoloneli Xhonson ka kërkuar nga qytetarët e Dardanës që t'i përgjigjen aksionit për dorëzimin e armëve

 

Dardanë, 25 shkurt 2004 - Përfaqësuesi i KFOR-it në Dardanë, nënkoloneli Riçard Xhonson, në një takim me drejtuesit e komunës së Dardanës, ka shfaqur brengosje për numrin e madh të armëve ilegale, që gjenden në duar të qytetarëve.

 

Ai ka kërkuar nga qytetarët që t'i përgjigjen aksionit për dorëzimin e armëve. Bëhet e ditur se drejtuesit e komunës së Dardanës kanë shfaqur gatishmërinë se do ta mbështesin KFOR-in në këtë aksion.

 

 

Në Skënderaj u mbajt një protestë kundër arrestimit të tre eprorëve të TMK-së

 

Skënderaj, 25 shkurt 2004 - Në Skënderaj u mbajt një protestë kundër arrestimit të eprorëve të lartë të TMK-së të arrestuar ditë më parë nga pjesëtarë të KFOR-it dhe të policisë së UNMIK-ut. Protestuesit me flamuj e pankarta në duar, si dhe me portretet e të arrestuarve të TMK-së parakaluan nëpërmjet rrugës kryesore të qytetit.

 

Protestuesit kërkuan lirimin e menjëhershëm të katër eprorëve të TMK-së, të cilët nën dyshimin se kanë bërë krime lufte gjenden në arrest. Protesta përfundoi pa ndonjë incident.

 

 

Nënkryetari i BDI-së thotë se projektligji i Qeverisë për Shkupin është i disfavorshëm për shqiptarët

 

Shkup, 25 shkurt 2004 - Për herë të parë projektligjin e Qeverisë maqedonase për ndarjen e Shkupit e kanë kritikuar edhe përfaqësuesit e partive shqiptare në Qeverinë maqedonase. Kështu, nënkryetari i BDI-së, deputeti Rafiz Haliti, u shpreh se propozimi i Qeverisë për qytetin e Shkupit është i disfavorshëm për shqiptarëte e kryeqendrës, pasi sipas tij, pjesa dërmuese e tyre mbeten në zonat rurale.

 

Ai ka propozuar se tri komunat rurale me shumicë shqiptare t'i bashkangjiten komunave urbane të Shkupit. Gjithashtu ka kërkuar që komunës urbane të Çairit që do të ketë shumicë shqiptare të mos i merren institucionet me rëndësi vitale, të cilat me propozimin e Qeverisë maqedonase i takojnë komunave me shumicë maqedonase. Nënkryetari i BDI-së u shpreh se propozimi i Qeverisë për qytetin e Shkupit është i disfavorshëm për shqiptarët.

 

 

Në Hagë përfundon paraqitja kundër Millosheviqit

 

Hagë, 25 shkurt 2004 - Prokurorët në procesin kundër ish-dikatorit jugosllav, Sllobodan Millosheviq, në Hagë, kanë thënë se do ta mbyllin paraqitjen e çështjes dy ditë para kohe.

Njoftimi bëhet tri ditë pasi gjykata bëri të ditur dorëheqjen e kryegjykatësit, Riçard Mej, brenda tre muajve për shkak të sëmundjes.

Problemet shëndetësore të Millosheviqit tashmë kanë shkaktuar vonesa në gjyq prej më shumë se njëqind ditësh.

 

 

Në Marok të paktën 564 të vdekur nga tërmeti

 

Rabat, 25 shkurt 2004 - Njoftohet se të paktën 564 veta kanë humbur jetën nga një tërmet i fuqishëm që goditi të martën pjesën veriore të Marokut.

 

Zyrtarë vendorë dhe punonjës të ekipeve të shpëtimit thonë se numri i të vdekurve mund të rritet, ndërkohë që ekipet largojnë rrënojat dhe arrijnë në fshatrat e izoluara të rajonit të shkatërruar përreth qytetit port të Mesdheut Al-Hokeima, rreth 300 kilometra në verilindje të kryeqytetit, Rabat.

Rreth 250 të lënduar nga tërmeti janë dërguar nëpër spitale vendore dhe kazermat ushtarake në atë zonë. Ekipe ushtarake dhe civile shpëtimi janë dërguar për të kërkuar për të gjallë, ndërkohë që helikopterët dërgonin furnizime dhe pajisje kërkimi dhe shpëtimi në rajonin e largët malor.

Zyrtarë vendorë thonë se të paktën një fshat është shkatërruar plotësisht dhe se shtëpi janë shembur në shumë fshatra të tjerë. Shumë shtëpi të atij rajoni ishin ndërtuar me tulla balte.

 

 

Ngriten aktakuzat e para ndaj të burgosurve

 

Uashington, 25 shkurt 2004 - Shtetet e Bashkuara kanë ngritur aktakuzat e para ndaj dy prej të burgosurve në Gjirin Guantanamo në Kubë që mbahen atje për dy vjet.

Departamenti i Mbrojtjes në Uashington tha se dy persona, një nga Jemeni dhe tjetri nga Sudani, ishin roje personale të Osama Bin Laden-it, dhe janë akuzuar me planifikimin e kryerjes së krimeve të luftës.
Të dy ata do të paraqiten para një gjykate ushtarake të ngritur posaçërisht për këto raste në një ditë që ende nuk është njoftuar.

Zyrtarët e Pentagonit thonë se nuk do të kërkojnë dënimin me vdekje.

 

 

Putin shkarkon kabinetin qeveritar

 

Moskë, 25 shkurt 2004 - Presidenti rus Vladimir Putin ka bërë të ditur në një falim në televizion se ka urdhëruar shpërndarjen e qeverisë. Ai tha se kryeministri Mikhail Kasyanov kishte dhënë dorëheqjen. Zëvendëskryeministri Viktor Kristenko ka marrë përsipër detyrën e drejtimit të qeverisë.

Putin këmbënguli se veprimi i tij nuk ishte kritikë për qeverinë, duke thënë se qëllimi i tij ishte të bënte të qartë se çfarë shtegu do të ndjekë Rusia pas zgjedhjeve presidenciale të muajit të ardhshëm.

 

 

CIA thotë se Al-Kaida e vendosur për të sulmuar Shtetet e Bashkuara

 

Uashington, 25 shkurt 2004 - Drejtori i agjencisë amerikane të zbulimit (CIA), Xhorxh Tenet, tha se al-Kaida mbetet e vendosur për të sulmuar Shtetet e Bashkuara.

Tenet dëshmoi të martën para Komisionit të Senatit amerikan për Zbulimin, ku tha se forcat amerikane kanë kapur ose vrarë një numër mjaft të madh udhëheqësish të grupit sa për të krijuar boshllëqe të mëdha në hierarkinë e tij.

Por, ai tha se ndërmarrja e sulmeve kundër Shteteve të Bashkuara mbetet një prej objektivave kryesore të rrjetit terrorist të Osama bin Ladenit.

Tenet tha gjithashtu se grupi terrorist ka përhapur ideologjinë e tij nëpër grupe të tjera terroriste islamike, duke siguruar në këtë mënyrë që Shtetet e Bashkuara do të përballen me kërcënimin e terrorit edhe nëse al-Kaida shkatërrohet.

 

 

Në qytetin Mosul vriten dy gjeneralë irakianë

 

Mosul, 25 shkurt 2004 - Në dy incidente të ndara është vrarë një zyrtar i lartë i policisë dhe një ish-gjenerali i ushtrisë irakaine në qytetin Mosul, ka bërë të ditur sot policia.

Koloneli i policisë Abdel Azel Hazem Kafoudhi ka thënë se "tre persona të panjohur nga automobili ka shtënë kundër gjeneralit Hikmat Mahmud Mohamed, udhëheqës i sektorit administrativ të policisë së qytetit, kur ai ishte duke dalë nga banesa. Sulmuesit janë arratisur.

Në një incident tjetër është vrarë Abdel Ilah al Anaz, gjeneral i dikurshëm i ushtrisë së Sadam Huesinit, nga persona të panjohur të cilët kishin hapur zjarr në automobilin e tij.

 

 

Amerika kërkon veprime nga Koreja e Veriut

 

Uashingbvton, 25 shkurt 2004 - Shtetet e Bashkuara të Amerikës i kanë bërë thirrje Koresë së Veriut që ta shkatërrojë të gjithë dhe njëherë e mirë, arsenalin e vet bërthamor. Kërkesa amerikanë u bë në hapjen e bisedimeve gjashtëpalëshe rreth programit të armëve bërthamore të Veriut që po zhvillohet në Pekin.

Ndihmëssekretari amerikan i Shtetit, Xhems Keli, kërkoi shkatërrimin e plotë, të verifikueshëm dhe njëherë e mirë të arsenalit bërthamor të Koresë së Veriut, duke përfshirë këtu dhe një program për pasurimin e uraniumit.

Kjo shihet si pengesa kryesore për arritjen e rezultateteve pozitive nga takimi, pasi Veriu nuk e pranon ekzistencën e programit të pasurimit të uraniumit.

 

 

Prokurori ka ngritur aktakuza kundër 69 personave për dy sulme vetëvrasëse në Stamboll

 

Stamboll, 25 shkurt 2004 - Prokurori shtetëror turk ka ngritur aktakuza kundër 69 personave të dyshuar për dy sulme vetëvrasëse në muajin dhjetor në Stamboll, në të cilat u vranë 63 veta.

Ndonëse ende nuk është bërë e njohur përmbajtja e aktakuzës, mediat kanë njoftuar se për pesë të akuzuar prokurori ka kërkuar burgim të përjetshëm. Nga 69 të akuzuar, 50 prej tyre ndodhen në burgje.

 

 

Rrëzohet një helikopter amerikan, vdesin dy anëtarë të ekuipazhit

 

Bagdad, 25 shkurt 2004 - Dy anëtarë të ekuipazhit kanë vdekur si pasojë e rrëzimit të një helikopteri ushtarak amerikan afër qytetit Haditha në Irakun perendimor, tha një zëdhënës ushtarak, njofton Rojter.

Zëdhënësi tha se rrëzimi është shkaktuar për shkak të mosfunksionimit të mekanikës.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |