|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

OPINIONE

Reagim

Shefi i Departamentit të Drejtësisë së UNMIK-ut, Pol Kofi, do të na tregojë përralla me mbret, duke mohuar faktin se ka pasur një varg vrasjesh politike në Kosovë

25 shkurt 2004 / TN

 

Shkruan: Kadri Osmani-MANI

 

Dhe për t`ia kthyer me rraxhë hakun, për përrallën e trilluar, unë po ia tregoj një barcoletë që po qarkullon nëpër Kosovë, me titull:

 

ELEFANTI

 

“Pse elefanti s`ka shkuar në shkollën fillore?”

“Sepse nuk e ka zënë dera e shkollës!“

„Përse elefanti s`ka shkuar në shkollë të mesme?“

„Sepse nuk e kanë pranuar pa e mbaruar shkollën fillore!“

„Përse elefanti s`ka shkuar në fakultet?“

„Sepse është punësuar në UNMIK!“

 

Njeriu i parë i drejtësisë Pol Kofi mohoi të ketë pasur vrasje politike në Kosovë (!?), duke mos dhënë përgjegje pse deri më tash asnjë nga kryesit e këtyre vrasjeve nuk është arrestuar dhe pse ka dështuar në këtë drejtim departamenti që ai drejton.

 

"Nuk dua të them se ka pasur vrasje politike", tha Kofi. Por ai pohoi se në disa segmente ka krim të organizuar, por jo si në disa vende të tjera, duke theksuar kontrabandën me cigare, trafikimin me njerëz etj. Ai tha se lufta kundër korrupsionit mbetet prioritet i lartë i UNMIK-ut.

 

(Shefi i Departamentit të Drejtësisë së UNMIK-ut mohon se ka pasur vrasje politike në Kosovë!?

Prishtinë, 10 shkurt 2004)

 

Zotni  Pol Kofi, unë jam një humorist, dhe Ju jeni bërë për humor-(të zi!): emri “Pol”-ma kujtoi Polin e Veriut, akullnajat që sjell ai gjithandej, kurse emri-“Kofi”- ma kujtoi kofi-nin pas të vjelave!!

 

Zotni, thuhet se njerëzit e bëjnë historinë, dhe Ju sikur qëllimisht po bëni një histori të keqe, të shëmtuar, për veten Tuaj, për familjen dhe popullin Tuaj!?! Këtë historia nuk do t`ua falë kurrë: ju po i lozëni fëmijët lazdranë!?- po të mos ishte kështu, Ju mund t`i pyesni fëmijët seriozë kosovarë, dhe ata do të Ju tregonin me emër e me mbiemër të dyshimtit e deritashëm, dhe krimnelët potencialë.

 

Deklarata Juaj është aq qesharake, dhe pas pesë vjete!?! E nëse është e vërtetë se Ju vërtet nuk dini, përse nuk jepni dorëheqje me faqe të bardhë, për paaftërsinë Tuaj!? Dhe një person me ndërgjegje, jo për aq atentate në njerëz, por për aq atentate në zogj pulash, do të jepte dorëheqje, ngase do ta brente ndërgjegjja për paaftësinë e kryerjes të detyrës.

 

Si mund ta quani veten: Shef i Departamentit të Drejtësisë!?! Dhe njëkohësisht ta lozni Shefin e Departamentit të Shtrëmbërisë!?!

 

Dhe Ju jeni i plotëfuqishëm, dhe as keni menduar se dikush mund të Ju japë vërejtje, apojo? Por ja që ka njerëz që nuk Jua kanë frikën: unë jam pensionist-AHV, dhe në të ardhura asnjë ligj nuk mund të më dënojë. Kurse për burg, kurrë falë mos Ju qofsha! Kur i kam vuajtur 17 vjet në burgjet e Serbisë pushtuese, jam i gatshëm t`i vuaj edhe aq e më tepër nën pushtimin e UNMIK-ut.

 

Dhe që nuk e thashë rastësisht, po Jua përsëdys- nën pushtimin e UNMIK-ut: sepse e keni zbehur rolin e çlirimtarëve, dhe në liri nuk vriten njerëzit, politikanët më në zë, dhe krejtësisht të pafajshëm. Pikërisht ata që do ta bënin Shtetin e Kosovës, por Ju doni të rrini përjetësisht në Kosovë, andaj mbase ato vrasje edhe për Ju janë të mirëseardhura, apojo!?!

 

Dolët vetë sheshit, kur thoni se jeni fort të interesuar për kontrabandën e- cigareve!!! Ju nuk e ditkeni një thënie tonën: Në shtëpinë e të varurit, nuk përmendet litari; kurse Ju po vajtoni-litarin!!!

 

Unë personalisht, prej Jush s`kërkeoj drejtësi, dhe e mallkoj “drejtësinë” Tuaj.

 

Shëndet.

23.2.2004

 

-----------

 

Lexoni e (mos) besoni!

 

Shefi i Departamentit të Drejtësisë së UNMIK-ut mohon se ka pasur vrasje politike në Kosovë!?

 

Prishtinë, 10 shkurt 2004 - Shefi i Departamentit të Drejtësisë së UNMIK-ut Pol Kofi paraqiti sot raportin e punës njëvjeçare të këtij deprtamenti. Kofi tha se Avdyl Jakupi, i njohur si komandant "Çakalla" dhe Xhemal Hyseni i njohur si komandant "Xhejmi Shea" së shpejti do t'i ekstradohen autoriteteve të Maqedonisë. Sipas Kofit, kërkesën zyrtare e ka bërë ministri i Drejtësisë së Maqedonisë Ixhet Mehmeti.

"Vendimi më i dëshirueshëm për ne do të ishte që Avdyl Jakupi dhe Xhemal Hyseni t'u dorëzohen autoriteteve maqedonase", tha Kofi. Ndërkaq sa i përket Shefket Musliui, ai tha se me gjithë insistimet e Serbisë vendimi do të merret pas përfundimit të gjykimit kundër Musliut.

Njeriu i parë i drejtësisë Pol Kofi mohoi të ketë pasur vrasje politike në Kosovë (!?), duke mos dhënë përgjegje pse deri më tash asnjë nga kryesit e këtyre vrasjeve nuk është arrestuar dhe pse ka dështuar në këtë drejtim departamenti që ai drejton.

 

"Nuk dua të them se ka pasur vrasje politike", tha Kofi. Por ai pohoi se në disa segmente ka krim të organizuar, por jo si në disa vende të tjera, duke theksuar kontrabandën me cigare, trafikimin me njerëz etj. Ai tha se lufta kundër korrupsionit mbetet prioritet i lartë i UNMIK-ut.

Kofi paralajmëroi ngritjen e akuzave kundër përgjegjësve të trazirave në burgun e Dubravës të vitit të kaluar dhe kundër disa firmave të mëdha për shkak të borxheve ndaj KEK-ut.

Kofi tha se në të ardhmen "ekziston shpresa" se do të ketë ministri të drejtësisë.