E marte, 24 shkurt 2004

E marte, 24 shkurt 2004

Përmbajtja:

Takimi Rugova-Solana: Ndihmohet Kosova në procesin që të jetë sa më afër BE-së, NATO-s
Solana ka propozuar një partneritet evropian për Kosovën para ministrave të BE-së
Zëdhënësja e Solanës thotë se misioni i KFOR-it në Kosovë do të vazhdojë të jetë nën kontrollin e NATO-s
UNMIK-u nuk i përjashton donacionet nga Beogradi për zhvillimin ekonomik të Mitrovicës
Kryeparlamentari Daci ka ngushëlluar Servet Pëllumbin për tragjedinë në minierën e Selenicës
Komandanti i BSHV-së në Mitrovicë e vlerëson pozitivisht gjendjen e sigurisë në këtë qytet
Komandanti i Zonës së Dytë të TMK-së është transferuar nga Burgu i Dubravës në atë të Mitrovicës
Ndarja e pjesës veriore të Mitrovicës dhe bashkimi i saj me Zveçanin është e papranueshme, thotë Tefik Ujkani
Në një fshat afër Pejës vritet më armë zjarri Zekë Selmanaj
Gjyqësisë në Mitrovicë i mungojnë gjykatësit dhe prokurorët, thotë Nowicki
Aeroinçizimi për komunën e Mitrovicës do të bëhet prej datës 5 deri më 25 mars
Në protestat e djeshme të serbëve u kërkua kthimi i ushtrisë dhe policisë serbe në Kosovë
"ProCredit Bank" do të kreditojë fermerët llapjanë
FR i LDK-së shpall një konkurs që ka si temë 24 marsin 1999
Tirana përshëndet miratimin e Ligjit për themelimin e Universitetit të Tetovës
Një tërmet i fortë godet Shkupin
Pakistani nis një operacion ndaj Al-Kaedës
Nga tërmeti në Marok vdesin 150 njerëz
Ka arritur në 40 numri i viktimave në Marok
Marinsat amerikanë mbërrijnë në Haiti
Koreja optimiste për afrimin e bisedimeve
Zgjedhjet në Irak ndoshta këtë vit
Tërmet në Maroko: të paktën 20 veta kanë humbur jetën
Bush i gatshëm të fillojë fushatën
Opozita në Haiti nuk heq dorë nga kërkesa për dorëheqjen e presidentit
Gjashtë të vdekur nga rrëzimi i një avioni italian

Takimi Rugova-Solana: Ndihmohet Kosova në procesin që të jetë sa më afër BE-së, NATO-s


Presidenti Rugova tha se e ka njoftuar zotin Solana me progresin që është arritur në Kosovë në planin ekonomik, me objektivat kryesore që duhet të vazhdojë privatizimi, zhvillimi ekonomik, një siguri për investime, por edhe për integrimin e grupeve etnike në shoqërinë dhe në vendin tonë. Njëherit ai tha se pret ndihmë dhe përkrahje të mëtejshme të BE-së për Kosovën.
- Ne do të vazhdojmë me përmbushjen e standardeve - tha Presidenti Rugova - ndërsa që ne një pjesë e kemi përmbushur dhe ato duhet të vlerësohen - tha ai, duke theksuar se institucionet e Kosovës do të punojnë së bashku me UNMIK-un si partnerë në këtë plan, sidomos në zhvillimin ekonomik të Kosovës.


"Ne patëm mundësi që të bisedojmë atje dhe vazhduam bisedën tonë sot këtu", tha Solana, sidomos "për situatën në Kosovë, në të gjithë rrafshet: politike, ekonomike, etj".
Solana tha se në bisedë me Presidentin kishte insistuar në zbatimin dhe implementimin e procesit të standardeve. Dhe kjo, sipas tij, do të finalizohet në javët e ardhshme, kur shefi i UNMIK-ut Holkeri t'ia prezentojë këtë plan Presidentit, Parlamentit, Qeverisë. Ai shprehu bindjen se ky proces do të implementohet ashtu siç duhet.
"Në emër të Bashkimit Evropian, unë shpreha vazhdimin e mbështetjes sonë për Kosovën, jo vetëm në aspektin politik, por edhe në atë ekonomik", theksoi Solana, duke shtuar se BE-ja ka siguar një mbështetje financiare për procesin e standardeve dhe përkujtoi se në vitet e kaluara në Kosovë BE ka shpenzuar mbi 900 milion euro.

"Pra, ne do të vazhdojmë të mbështesim proceset këtu, dhe besojmë e shpresojmë se do të kemi të arritura pozitive dhe konstruktive. Unë këtë më duhet t'ua them qytetarëve të Kosovës, ashtu siç ia thashë edhe Presidentit Rugova", tha Solana.
Pasi përkujtoi se Kosova do t'i ketë zgjedhjet nacionale në tetor të këtij viti, Solana porositi që liderët e vendit tani ta përqëndrojnë tërë energjinë në çuarjen përpara të procesit për përmbushjen e standardeve, dhe premtoi se në këtë mënyrë Kosova do të ketë mbështetjen e vazhdueshme të bashkësisë ndërkombëtare e në veçanti të Bashkimit Evropian.
Solana në interesimin e gazetarëve tha se "dialogu mes Prishtinës dhe Beogradit është absolutisht i nevojshëm" dhe shtoi se është me rëndësi që të fillojë ky proces.


Solana ka propozuar një partneritet evropian për Kosovën para ministrave të BE-së

Bruksel, 24 shkurt 2004 - Në Bruksel po i zhvillon punimet takimi dyditor i ministrave të jashtëm të Bashkimit Evropian. Ndër temat që u diskutan ditën e parë ishte edhe Ballkani dhe kryesisht për zhvillimet e fundit në Kosovë dhe Serbi.

Bëhet e ditur se ministrat e jashtëm të vendeve të BE-së kanë kërkuar angazhim më të madh nga vendet e BE-së për t'i ndihmuar institucionet e Kosovës në çështjen e standardeve.
Shefi i Politikës së Jashtme të BE-së Havier Solana në këtë takim ka paraqitur një raport të posaçëm kushtuar situatës në Kosovë. Ministrat theksuan se politika e OKB-së në implementimin e standardeve dhe udhëzimin e BE-së të promovojë perspektivën evropiane për Kosovën dhe që ta përforcojë dhe përfaqësojë në mënyrë paralele të njëjtin proces.
Me këtë rast u përkrah në tërësi synimi i shefit të UNMIK-ut Hari Holkeri që të prezentojë planin për implementimin e standardeve.
Ministsrat e Bashkimit Evropian kanë përshëndetur dhe mirëpritur këtë raport të Havier Solanës dhe u kanë bërë thirrje institucioneve përkatëse të BE-së që të shqyrtojnë propozimet e tij dhe në bazë të tyre të marrin vendimet e duhura.

Ministrat kanë nënvizuar se përmbushja e standardeve në Kosovë dhe përpjekjet për promovimin e perspektivës evropiane për Kosovën janë elemente përforcuese të një procesi të njëjtë.

Nga ana e tij, Solana ka propozuar edhe një partneritet evropian për Kosovën, duke nënvizuar se perspektiva e integrimit të Kosovës në Bashkimin Evropian sikur dhe pjesët e tjera të rajonit të Ballkanit, është esenciale për stabilitetin afatgjatë të rajonit.

Havier Solana nesër do të vizitojë Kosovën ku do të përcjellë të njëjtat porosi për plotësimin e standardeve në Kosovë.
Ky raport u paraqit në prag të vizitës së Solanës në Kosovë, ku ai do të zhvillojë bisedime me përfaqësuesit e institucioneve të Kosovës.

Zyrtarët nga nga kabineti i tij kanë bërë të ditur se Solana gjatë ditës së sotme në Prishtinë do të inkurajojë kosovarët që ata të merren me implementimin e standardeve dhe të kërkojë nga ata që të vazhdohet me procesin e negociatave me Beogradin për çështje praktike, pavarësisht nga trazirat politike që aktualisht sundojnë në Serbi.


Zëdhënësja e Solanës thotë se misioni i KFOR-it në Kosovë do të vazhdojë të jetë nën kontrollin e NATO-s

Bruksel, 24 shkurt 2004 - Kristina Gallah, zëdhënëse e Havier Solanës, thotë se misioni i KFOR-it në Kosovë do të vazhdojë të jetë nën kontrollin e NATO-s. Ajo tha se BE do të luajë një rol shumë aktiv për të arritur përparime në procesin e plotësimit të standardeve deri në fund të këtij viti.
Gallah ka thënë se rekomandimet kryesore që z. Solana i bëri para ministrave të jashtëm të BE-së janë që viti 2004 do të jetë një vit shumë i rëndësishëm për plotësimin e standardeve, BE dëshiron të luajë një rol shumë më aktiv në mbështetje të procesit të potësimit të standardeve, të funksionimit të institucioneve demokratike, shtetit ligjor të të drejtave të gjitha bashkësive, të drejtën e pronës, zhvillimin ekonomik dhe në veçanti dialogun ndërmjet Prishtinës dhe Beogradit.

Këto kommente zëdhënësja e Solanës i bëri në një intervistë për radion "Evropa e lirë".


UNMIK-u nuk i përjashton donacionet nga Beogradi për zhvillimin ekonomik të Mitrovicës

Mitrovicë, 24 shkurt 2004 - UNMIK-u nuk i përjashton donacionet nga Beogradi për zhvillimin ekonomik të Mitrovicës edhe për periudhën e ardhshme, përkundër faktit se Qeveria e Serbisë deri më tash ka financuar kryesisht strukturat paralele serbe. Ky planifikim është bërë nga zyrtarët e UNMIK-ut dhe pushtetit lokal në kuadër të planit për zhvillimin ekonomik të Mitrovicës.

Administratorja komunale e UNMIK-ut në Mitrovicë Mina Jarvenpa gjatë prezentimit të planit tha se ka nevojë që situata politike të jetë stabile dhe të gjenden donatorë që të bindën për të investuar në ekonominë e Mitrovicës.

Zonja Jarvempa nuk përjashtoi mundësinë që Beogradi nëpërmjet donacioneve të ndihmojë në planin për zhvillimin ekonomik të Mitrovicës. Sipas saj, Mitrovica nuk ka aq shumë donatorë për të larguar ndonjerin nga ta. "Donatorët e deritashëm Qeveria e Kosovës, Qeveria e Serbisë dhe investitorët e huaj do të na duhen edhe në të ardhmen", tha zonja Jarvenpa. Sipas saj gjendja aktuale politike në Mitrovicë nuk paraqet pengesë për zhvillimin ekonomik.
Ky plan do të marrë formën përfundimtare në fund të muajit mars dhe në të do të përfshihet Kombinati "Trepça", të cilën shefi i Shtyllës së katërt të UNMIK-ut Nikolas Llambsdorf e sheh si kontribut për zhvillimin ekonomik të Mitrovicës.
Kryesuesi i Shtyllës së katërt të UNMIK-ut premtoi se pjesët e "Trepçës" do të bëhen kompani moderne në të ardhmen, por ai theksoi nevojën e investimeve të vazhdueshme në këtë kombinat.


Kryeparlamentari Daci ka ngushëlluar Servet Pëllumbin për tragjedinë në minierën e Selenicës

Prishtinë, 24 shkurt 2004 - Kryetari i Kuvendit të Kosovës, Nexhat Daci nëpërmjet një telegrami ka ngushëlluar homologun e tij shqiptar Servet Pëllumbin me rastin e tragjedisë në minierën e Selenicës.
"Në emër të Kuvendit të Kosovës dhe në emrin tim pranoni ngushëllimet më të thella për vdekjen e minatorëve në Minierën e bitumit në Selenicë të Vlorës.

Populli i Kosovës ndjen dhembje të madhe për këtë tragjedi që i ndodhi dje Shqipërisë, në të cilën humbën jetën dhe u lënduan kaq shumë minatorë. Ju lutem që ngushëlimet tona t'ia përcillni familjarëve të të goditur si dhe urimet që të lëndurit të shërohen sa më shpejt", thuhet në telegramin e kryeparlamentarit Daci.


Komandanti i BSHV-së në Mitrovicë e vlerëson pozitivisht gjendjen e sigurisë në këtë qytet

Mitrovicë, 24 shkurt 2004 - Komandanti i Brigadës Shumëkombëshe Verilindje në Mitrovicë, Ksavier Mishel e vlerësoi pozitivisht gjendjen e përgjithshme të sigurisë në Kosovë me theks të veçantë në këtë qytet.

Në konferencën e tij të parë me gazetarë, komandanti Mishel tha se Mitrovica është rajon që kërkon më tepër kujdes për shkak të specifikës së problemit por që aktualisht kërkon vetëm një mbikëqyrje të rreptë të policisë. Megjithatë ai theksoi se në raste të domosdoshme Brigada e KFOR-it është e gatshme të intervenojë.


Komandanti i Zonës së Dytë të TMK-së është transferuar nga Burgu i Dubravës në atë të Mitrovicës

Mitrovicë, 24 shkurt 2004 - Komandanti i Zonës së Dytë Mbrojtëse të TMK-së Selim Krasniqi ësht transferuar nga Burgu i Dubravës në atë të Mitrovicës, që gjendet në pjesën veriore të këtij qyteti, ndërkaq tre të akuzuarit tjerë mbahen në Burgun e Dubravës.

Njoftohet se ky transferim është bërë pa dijeninë e avokatit të tij mbrojtës. Avokati Rukiqi thotë se askush nuk ka qenë i informuar për transferimin e Selim Krasniqit në burgun e Mitrovicës.
Edhe familjarëve të tjerë nuk u është lejuar që të takohen me të dyshuarit për krime lufte Milaim Latifin, Xhavit Elshanin dhe Bedri Zyberajn, të cilët edhe mëtej po mbahen në paraburgim në burgun e Dubravës.


Ndarja e pjesës veriore të Mitrovicës dhe bashkimi i saj me Zveçanin është e papranueshme, thotë Tefik Ujkani

Mitrovicë, 24 shkurt 2004 - Lidhur me promovimin e planit strategjik të zhvillimit ekonomik të komunës së Mitrovicës, që është bërë të hënën e kaluar nga ana e administratës komunale të UNMIK-ut, drejtori i Drejtorisë për Ekonomi dhe Financa, Mr. Tefik Ujkani, ka parë të të arsyeshme të sqarojë disa gjëra.
Është e vërtetë se në pranverë të vitit 2003, janë formuar gjashtë grupe punuese, në të dy pjesët e qytetit, për zhvillimin e konomik të komunës. Në atë kohë u formuan grupet punuese për ndërmarrjet shoqërore dhe zonat industriale, ndërmarrjet e vogla, për bujqësi dhe mbrojtje të ambientit, për resurse njerëzore dhe grupet punues për urbanizëm dhe kadastër, thotë Ujkani.
Sipas tij, qëllimi i formimit të këtyre grupeve punuese ishte që të hartohet një strategji e përgjithshme për zhvillimin ekonomik të komunës me qëllim të integrimit të plotë të qytetit.
Si anëtar i grupit punues për zhvillim ekonomik për ndërmarrjet shoqërore dhe zonat industriale në komunën e Mitrovicës, ai konsideron se çfarëdo ndërlidhje e punës së grupeve punuese me propozimin e ESI (Iniciativa Evropiane për Stabilitet), për ndarjen e pjesës veriore të qytetit dhe bashkimin e saj komunës së Zveçanit, e cila edhe ashtu është për mua jolegjitime, nuk është rezultat i punës së grupeve punuese dhe as mendim i anëtarëve të tyre, pra as i tij, andaj është e papranueshme.
Poashtu, asnjëherë në grupet punuese nuk është përmendur Serbia si donatore legjitime për investime të mundshme në Kosovë, prandaj edhe kjo mundësi e përmendur në promovimin e planit strategjik, është e papranueshme, thotë z. Ujkani dhe thekson se mbetet pranë qëndrimit fillestar dhe qëllimit të mirë e të arsyeshëm, se plani strategjik, ai i dhënë për diskutim publik nga administrata komunale e UNMIK-ut, duhet të jetë në funksion vetëm të integrimit të qytetit dhe assesi në funksion të ndonjë ideje apo propozimi tjetër që bie ndesh me intersat e komunës legjitime dhe qytetarëve të saj, thotë Ujkani.


Në një fshat afër Pejës vritet më armë zjarri Zekë Selmanaj

Pejë, 24 shkurt 2004 - Në fshatin Kërstovc të Pejës dje me armë zjarri është plagosur për vdekje Zekë Selmanaj (34). Organet policore nuk e kanë bërë të ditur emrin e dorasit, por thuhet se ai është i njohur për policinë. Dorasi është arratisur dhe ai po kërkohet nga policia.
Viktima pas një trajtimi në spitalin e Pejës, për shkak të plagëve të rënda është dërguar në Qendrën Klinike Universitare të Prishtinës, ku edhe vdes.
Sipas policisë, motivet e kësaj vrasjeje janë mosmarrëveshjet pronësore.


Gjyqësisë në Mitrovicë i mungojnë gjykatësit dhe prokurorët, thotë Nowicki

Prishtinë, 24 shkurt 2004 - Ombudspersoni i Kosovës Marek Antoni Nowicki është takuar dje me kryetarin e Gjykatës së Qarkut në Mitrovicë Kapllan Baruti dhe me Prokurorin Publik të gjykatës së lartëpërmendur.

Pas një bisede të gjatë për administrimin e gjyqësisë në Mitrovicë, u fol edhe për fusha të ndryshme në të cilat ende ka probleme por edhe për ato në të cilat ka përparim.
Gjatë këtij takimi bashkëbiseduesit erdhën në përfundim se njëri ndër problemet kryesore të gjyqësisë në Mitrovicë është mungesa e gjykatësve dhe prokurorëve të cilët do të punonin në raste të cilat sa vijn e shtohen në mënyrë të vazhdueshme pranë kësaj gjykate.
Pjesë e rëndësishme e bisedës ishte edhe çështja nëse është i përgatitur sistemi gjyqësor për kodin dhe procedurën e re penale, të cilët në fakt do të ndryshonin mjaft ligjin në këtë rajon.
Vizita në Mitrovicë është pjesë e shqyrtimit të Ombudspersoni sa i përket sistemin gjyqësor në Kosovë, thuhet në një njoftim të Zyrës së Ombudspersonit.


Aeroinçizimi për komunën e Mitrovicës do të bëhet prej datës 5 deri më 25 mars

Mitrovicë, 24 shkurt 2004 - Drejtoria për Gjeodezi, Kadastër dhe Pronë e Kuvendit të Komunës njofton se aeroinçizimi (rilevimi areofotogrametrik) për komunën e Mitrovicës, do të bëhet prej datës 5 deri më 25 mars 2004. Përgatitjet për realizimin e këtij aktiviteti shumë të rëndësishëm shoqëror në komunën e Mitrovicës, janë në vlugun më të madh dhe për këtë është formuar edhe shtabi në nivel komunal.
Shtabi komunal për aeroinçizim do të angazhojë ekspertët kadastral të drejtorisë përkatëse për ofrimin e ndihmës dhe sqarimeve të nevojshme qytetarëve nëpër të gjitha bashkësitë vendore, gjatë takimeve që do të mbahen me ta nëpër institucionet shkollore në këto mjedise.
Shtabi komunal për realizimin e këtij aktiviteti shoqëror njofton pronarët e të gjitha kategorive të pronave, se janë të obliguar që deri më datën 5 mars 2004, të përfundojnë përgatitjen e terrenit për aeroinçizim, përkatësisht të bëjnë sinjalizimin e mezhdave të pronave të tyre, sipas instruksioneve të ekspertëve kadastral që do t'i japin gjatë takimeve me qytetarë.


Në protestat e djeshme të serbëve u kërkua kthimi i ushtrisë dhe policisë serbe në Kosovë

Mitrovicë, 24 shkurt 2004 - Nën organizimin e të ashtuquajturit "këshillit nacional serb" në Mitrovicë dhe në Graçanicë dje u organizuan protesta të minoritetit serb lidhur me vrasjen e mëhershme të dy serbëve që ndodhi në afërsi të Lipjanit javën e kaluar. Policia e UNMIK-ut nuk ka dhënë shenja se bëhet fjalë për vrasje me motive etnike.
Në këto protesta të serbëve si rëndom u kërkua kthimi i policisë dhe ushtrisë serbe në Kosovë. Po kështu u kërkua edhe kthimi i postblloqeve të KFOR-it në pjesë të ndryshme të Kosovës, kryesisht aty ku jeton pakica serbe.


"ProCredit Bank" do të kreditojë fermerët llapjanë

Podujevë, 23 shkurt - Drejtoria për bujqësi, pylltari dhe zhvillim rural në bashkëpunim me Stacionin e Veterinës organizuan një takim me fermerët e komunës së Podujevës me temën kreditimi i lopëve qumështore. Për kushtet e kreditimit pjesëmarrësit i njoftoi veterinari dr. Fadil Sadikaj dhe agronomi Qerim Halilaj të cilët njoftuan se "ProCredit Bank" jep kredi për fermerët e interesuar në vlerën prej 250 deri në 50 mijë euro në kohën 1-3 vjet.
Sipas ligjëruesve për kreditë 1 vjeçare kamata është 10% kurse për ato tre vjeçare kamata është 13.5%. Zyrtari i Drejtorisë për bujqësi i Podujevës Eset Abdullahu tha se çmimi fillestar për një lopë qumështore është 1300 euro me TVSH dhe shpenzimet e doganës, kurse ligjëruesit njoftuan fermerët e Podujevës se raca e lopëve “Simental” vjen nga Austria dhe Zvicra dhe se grumbullimin e qumështit e bën kompania “Devolli” përkatësisht qumshtorja “Vita” me çmimin 0.30 – 0.31 euro.


FR i LDK-së shpall një konkurs që ka si temë 24 marsin 1999

Prishtinë, 24 shkurt 2004 - Me rastin e shënimit të manifestimit tradicional "Dita e Shpresës", kushtuar pesëvjetorit të fillimit të sulmeve ajrore të NATO-s në Kosovë, Forumi i Rinisë i LDK-së dhe redaksia e revistës "Arena" shpallin këtë konkurs:
për ese (shkrime) që i kushtohen rëndësisë së kësaj dite në historinë më të re të Kosovës. Tri punimet më të mira do të shpërblehen.
Gjithashtu, shkrimet e përzgjedhura nga juria profesionale do të botohen në një publikim të veçantë, promovimi i të cilit do të bëhet me rastin e shënimit të kësaj dite, më 24 mars 2004.
Të drejtë pjesëmarrjeje në këtë konkurs kanë të gjithë të rinjtë prej moshës 16-30 vjeç. Punimet duhet të jenë të radhitura në kompjuter dhe nuk duhet të jenë më të gjata se dy faqe, fonti 14.

Punimet dorëzohen me disketë (floppy) në zyret e Forumit të Rinisë të LDK-së, ose në e-mail adresat në internet;
frldk@ldk-kosova.org info@ldk-kosova.org frldk@hotmail.com Afati i dorëzimit të punimeve është deri me 10 mars 2004


Tirana përshëndet miratimin e Ligjit për themelimin e Universitetit të Tetovës

Tiranë, 24 shkurt 2004 - Ministria e Punëve të Jashtme përshendet miratimin nga ana e Parlamentit Maqedonas të Ligjit për themelimin e Universitetit të Tetovës.
MPJ vlerëson se nënshkrimi i këtij vendimi nga Presidenti Trajkovski do të mundësojë krijimin në këtë Universitet të kushteve të domosdoshme, në përputhje me standartet ndërkombëtare, të studimeve cilësore dhe bashkëhohore për gjithë qytetarët e Maqedonisë.
Tirana zyrtare përshendet autoritetet e Maqedonisë fqinje për angazhimin e tyre politik dhe programor për zbatimin e gjithë parametrave të Marrëveshjes së Ohrit si bazë e zhvillimit dhe kompaktësimit demokratik të shoqërisë në Maqedoni.

"Në këtë kuadër në shfaqim mirëkuptimin dhe mbështetjen tonë të plotë për këto hapa civilizuese të cilat shprehin seriozitetin e proceseve të bashkëpunimit në rajon", thuhet në një komunikatë të Ministrisë Jashtme shqiptare.


Një tërmet i fortë godet Shkupin

Shkup, 24 shkurt 2004 - Një tërmet prej 4.5 deri ne 5 gradë të shkallës Richter, goditi Shkupin, të martën në mëngjes rreth orës 9.20 me atë lokale.
Sipas zyrtarëve, epiqendra e tërmetit ishte në zonën e Shkupit.
Korrespondenti i BBC-së atje thotë se shumë qytetarë të Shkupit, të shqetësuar lanë shtëpitë dhe apartamentet e tyre dhe dolën nëpër rrugë.
Për një periudhë të shkurtër kishte ndërprerje të energjisë elektrike si dhe të rrjetit të telefonise celulare. Deri tani nuk ka njoftime për dëme.


Pakistani nis një operacion ndaj Al-Kaedës

Islamabad, 24 shkurt 2004 - Trupat e Pakistanit kanë nisur një ofensivë të re, kundër të dyshuarve si anëtarë të Al-Kaedës dhe talebanëve, në një zonë në kufi me Afganistanin. Sipas njoftimeve të para ushtria ka kapur 25 të dyshuar dhe ka shkatërruar dy shtëpi.
Banorët e zonave njoftuan se kishin parë helikopterë ushtarakë të fluturonin në orët e para të mëngjesit. Pakistani, është një prej aleatëve kyç të Shteteve të Bashkuara, në luftën kundër terrorizmit.


Nga tërmeti në Marok vdesin 150 njerëz

Rabat, 24 shkurt 2004 - Nga tërmeti në Marok kanë gjetur vdekjen të paktën 150 njerëz dhe me qindra janë plagosur, njoftuan zyrtarët lokalë. Dëme të mëdha materiale janë shkaktuar në qytetin e vogël Imzueren dhe Ait Kamara në provincën verilindore Al Hokeima.
Edhe agjencia marokene e lajmeve MAP thotë se numri i të vdekurve ka arritur në 150, pas një njoftimi të mëparshëm se bëhej fjalë për 82 të vdekur.


Ka arritur në 40 numri i viktimave në Marok

Rabat, 24 shkurt 2004 - Ka arritur në 40 numri i viktimave nga një tërmet i fuqishëm prej 6,3 ballësh që goditi sot veriun e Marokut rreth portiti detar mesdhetar Al Hokeima, thanë zyrtarët, njofton Rojter.
Një zëdhënës civil i mbrojtjes në Al Hokaima tha se fshati Ait Kamara "krejtsisht është shkatërruar" dhe "atje ka shumë të vdekur".
"Deri më tash punonjësit e emergjencës kanë gjetur trupat e 15 të vdekurve vetëm në këtë fshat", tha ai.
Agjencia marokene e lajmeve thotë se 40 njerëz kanë humbur jetën në provincën Al Hokaima. "Shumë viktima ndodhen në fshatrat e Al Hokaimës", thotë kjo agjenci.


Marinsat amerikanë mbërrijnë në Haiti

Port o Prens, 24 shkurt 2004 - Ndërsa rebelët në Haiti kanë paralajmëruar se do t'i drejtohen kryeqytetit të vendit, Port-au-Prince, rreth 50 marinsë amerikanë kanë mbërritur atje për të mbrojtur ambasadën amerikane.
Duke ngarë makinat e tyre në qendër të qytetit, ushtarët kaluan pranë barrikadave të djegura të ngritura prej mbështetësve të presidentit, Jean-Bertrand Aristide.
Barrikadat janë ngritur jashtë pallatit presidencial pranë aeroportit.
Sipas BBC-së, atje njerëzit po përgatiten për një sulm.


Koreja optimiste për afrimin e bisedimeve

Seul, 24 shkurt 2004 - Koreja e Veriut ka thënë se është optimiste për bisedimet e kësaj jave që kanë siqëllim të zgjidhin krizën lidhur me programin e saj të armëve bërthamore.
"Rrethanat, në të cilat do të zhvillohen bisedimet janë më të favorshme se të kohëve më parë," tha se zëvendësministri i jashtëm koreanoverior, Kim Gye-gwan, në vigjilje të takimit të së mërkurës. Koreja e Jugut, SHBA-ja, Rusia, Japonia dhe Kina do të marrin pjesë në këto bisedime.


Zgjedhjet në Irak ndoshta këtë vit

Nju JOrk, 24 shkurt 2004 - Sekretari i Përgjithshëm i Kombeve të Bashkuara, Kofi Anan ka thënë se zgjedhjet në Irak mund të zhvillohen nga fundi i vitit, nëse irakianët bien dakord se si duhet të zhvillohen ato.
Në një raport të prezentuar para Këshillit të Sigurimit, zoti Anan tha se kishte shumë çështje për t'u zgjidhur, përfshirë edhe atë se çfarë administrate do të merrte pushtetin nga koalicioni aktual nën udhëheqjen amerikane.
Zëdhënësi i OKB-së, Ahmed Fawsi tha se periudha e llogaritur nga ekspertët si periudhë përgatitore është 8 muaj.
"Pra duhet më pak se një vit për të përgatitur terrenin për zgjedhje dhe kjo përfshin shumë gjëra," tha zoti Fawsi.


Tërmet në Maroko: të paktën 20 veta kanë humbur jetën

Rabat, 24 shkurt 2004 - Të paktën 20 veta kanë humbur jetën në një tërmet të fuqisë prej 6,3 ballësh të Rihterit që ka goditur Marokon. Tërmeti ka goditur provincën verioperendimore Al Hokeima në brigjet e Mesdheut. Njoftimet thonë se rreth 40 të tjerë janë plagosur. Disa lokalitete janë shkatërruar plotësisht, njofton Frans Press.


Bush i gatshëm të fillojë fushatën

Uashington, 24 shkurt 2004 - Më shumë se tetë muaj përpara zgjedhjeve presidenciale në Shtetet e Bashkuara, Xhorxh Bush ka dhënë shenja se ai është gati të fillojë fushatën për të qëndruar në postin e tij.
Gjatë një fjalimi, Bush mbrojti punën e tij të deritanishme dhe sa demokratët nuk do të bënin më shumë për të shpëtuar Amerikën nga rreziqet. Presidenti ka ndërmend që gjatë fushatës së tij t'i paraqesë demokratët si jo shumë të aftë në sektorin e sigurisë, aq më tepër që në këto "kohë kërcënimi nga jashtë".
Gjatë një fjalimi, ai foli për zgjedhjen që duhet të bënin votuesit amerikanë.


Opozita në Haiti nuk heq dorë nga kërkesa për dorëheqjen e presidentit

Port Prens, 24 shkurt 2004 - Udhëheqësit e opozitës në Haiti thonë se megjithëse kanë shtyrë marrjen e vendimit nëse të paranojnë apo jo një plan për ndarjen e pushtetit, ata nuk do të heqin dorë nga kërkesa që Presidenti Zhan-Bertrand Aristide të japë dorëheqjen.
Ata thanë në kryeqytetin Porto-Prenc se ranë dakord ta shtynin deri të martën marrjen e vendimit lidhur me planin e paqes të mbështetur nga komuniteti ndërkombëtar, me kërkesën e sekkretarit amerikan të shtetit, Kolin Pauëll.
Udhëheqësit e opozitës ngulin këmbë që Presidenti Aristide të japë dorëheqjen para përfundimit të mandatit të tij të tanishëm në shkurt të vitit 2006. Shtetet e Bashkuara dhe aleatët e tyre që hartuan planin e paqes kanë thënë se nuk do ta bëjnë largimin e zotit Aristide nga pushteti pjesë të marrëveshjes së paqes.


Gjashtë të vdekur nga rrëzimi i një avioni italian

Romë, 24 shkurt 2004 - Gjashtë pasagjerë dhe piloti i avionit Cesna 500, mbeturinat e të cilit janë zbuluar sot mëngjes në malin Kresia në Sardenjë, kanë humbur jetën, ka bërë të ditur aviacioni ushtarak italian.
Në avion përveç dy pilotëve ndodheshin dy mjekë dhe infermierë të spitalit Brocu në Kalari të cilët po ktheheshin pasi kishin dorëzuar një zemër për transplantim. Avioni i vogël u zhduk rreth orës 6.00 në mëngjes gjatë kthimit në Kalari nga Roma.