Dhjetë kryetarë të komunave të Kosovës fillojnë programin zyrtar të vizitës në SHBA

Dhjetë kryetarë të komunave të Kosovës fillojnë programin zyrtar të vizitës në SHBA

Podujevë, 24 shkurt 2004 (TN) – Asistentja për shkëmbime kulturore në Zyrën Amerikane në Prishtinë znj. Afërdita Krasniqi njoftoi se sot ka filluar programi zyrtar i vizitës së dhjetë kryetarëve të komunave të Kosovës në SHBA, në mesin e të cilëve edhe kryetari i komunës së Podujevës Agim Veliu.

“Qëllimi i vizitës së kryetarëve të komunave ka të bëjë me përkrahjen e zhvillimit të pushtetit lokal në Kosovë” deklaroi Krasniqi. Ajo njoftoi se organizator i këtij programi tre javor është Univerziteti i Georgetown – Qendra për zhvillim dhe Arsim Ndërkulturor, kurse është sponsoruar nga Departamenti i shtetit Amerikan, përkatësisht Byroja e çështjeve arsimore dhe kulturore e Zyrës së programeve të shkëmbimit të përvojave.

Kryetarët e dhjetë komunave të Kosovës: Prishtinës, Podujevës, Fushë Kosovës, Kaçanikut, Suharekës, Gllogovcit, Vitisë, Rahovecit, Leposaviqit dhe Shtërpcës sot fillojnë programin zyrtar me seminarin që mbahet në Georgetown University ku do të flitet për temat e udhëheqjes, zhvillimit të bashkëpunimit dhe ndryshimit perosnal e të organizuar.”Bashkëpunimi dhe zgjidhja e problemeve në mënyrë kreative do të mbulohet gjatë këtij seminari”, thuhet në itinerarin e programit të vizitës.

Kryetarët e komunave të Kosovës që po marrin pjesë në programin e shkëmbimit të përvojave në Washington DC do të kenë rastin të njoftohen nga profesorë të Georgetown University me përbërjen e shoqërisë amerikane, vlerat shoqërore, çështje racore, minoritare e gjinore në SHBA, etj. ku pjesëmarrësit do të kenë mundësi të krahasojnë përvojat e tyre me përvojat amerikane.

Në kuadër të projektit „Kosovo Mayors Exchange“, po sot kryetarët e komunave të Kosovës do të vizitojnë Washington DC-në për të mësuar historinë e Amerikës. Me këtë rast ata do të vizitojnë Shtëpinë e Bardhë, Monumentet Kombëtare: Linkoln, Xheferson, Ruzvelt, Uashington, varrezat e Arlingtonit, Memorialin e luftës së Vietnamit dhe Koresë, Galerinë nacionale amerikane, Muzeun e historisë dhe muzeun e Holokaustit.

Gjatë ditëve të ardhshme të vizitës në SHBA, kryetarët e komunave do të takohen me personelin e Universitetit Georgetown, përfaqësues të Departamentit të Shtetit, do të vizitojnë zyrën e kryetarit të Bashkisë së Washington DC, etj.