Përmbajtja:

• Presidenti Rugova dënon atentatin ndaj ministrit Çeku

• Hari Holkeri dënoi sulmin në Pejë

• Kryeministri i Kosovës Bajram Rexhepi fillon sot vizitën disa ditëshe në Itali

• Ministri Çeku dhe tre të lënduar janë liruar nga spitali

• Delegacioni i grave të senatorëve amerikanë është pritur nga kryekuvendari Daci dhe kryeministri Rexhepi

• Në takimin e sotëm të 15 ministrave të jashtëm të BE pritet që për Kosovën të raportojë edhe Havier Solana

• LDK-ja denon ashpër aktin kriminal në Pejë

• Në Pejë është plagosur ministri Ethem Çeku së bashku me katër persona të tjerë

• Gjilan: Drejtorëve të drejtorive u vazhdohet mandati deri më 31 mars

• Gjilani është zgjedhur në mesin e pesë komunave përfituese në projektin "Delta II"

• Podujevë: Përgjysmohet numri i familjeve që jetojnë në fshatrat kufitare

• Në Gjakovë interesim i shtuar për anëtarësim në LDK

• Një delegacion i Prishtinës vizitoi Mariborin

• Kosova gjatë dhjetë vjetëve të fundit ka humbur rreth 20 mjë hektarë tokë bujqësore

• Në Klinikën e Infektologjisë në Prishtinë është evidentuar edhe një pacient me virusin e sidës

• Kryqi i Kuq Ndërkombëtar nuk do të jetë ndërmjetësues ndërmjet Prishtinës dhe Beogradit

• Prokurori i Tribunalit të Hagës do të përfundojë të mërkurën paraqitjen e akuzave kundër Millosheviqit

• Limaj, Balaj dhe Musliu më 27 shkurt do të paraqiten në një konferencë statusore në Tribunalin e Hagës

• Gjykatësi Mej në procesin gjyqësor kundër Millosheviqit dha dorëheqje për arsye shëndetësore

• Tre shqiptarë janë vrarë dhe katër të tjerë janë plagosur në Reçicë të Madhe të Tetovës

• Gjashtë të vdekur nga gazi në një minierë afër Vlorës

• Izraelitët kanë arrestuar 8 palestinezë

• Zjarr në qendrën e gjithësisë në Indi, disa të vdekur

• Gjashtë të vrarë në një sulm vetëvrasës në Kirkuk

• Njoftohet për 37 minatorë të vdekur nga shpërthimi i gazit

• Bin Ladeni është gjallë në Afganistan

• Arrin në 13 numri i viktimave nga sulmi vetëvrasës në Kirkuk

• Nga një sëmundje misterioze kanë vdekur mbi 300 fëmijë afganë

• Dhjetë të vrarë në Kirkuk, Ramsfeld në Bagdad

• Dy persona kanë humbur jetën nga përplasja e dy helikopterëve japonezë

• Gjykata botërore për barrierën izraelite

• Rebelët marrin qytetin e dytë në Haiti

• Britania kufizon vendet e reja të BE-së

• Ushtria ugandeze në ndjekje të autorëve të masakrës

Presidenti Rugova dënon atentatin ndaj ministrit Çeku

 

Prishtinë, 23 shkurt 2004 - Presidenti i Kosovës, Dr. Ibrahim Rugova, dënon ashpër atentatin ndaj ministrit për Ambient dhe Planifikim Hapësinor, z. Ethem Çeku, dhe shoqëruesve të tij.

Presidenti kërkon që rasti të hetohet urgjentisht dhe autorët e këtij sulmi të nxirren para drejtësisë së Kosovës.

Ky akt kriminal është i drejtuar kundër institucioneve demokratike të Kosovës dhe dëmton procesin e konsolidimit të institucioneve të vendit tonë.

Presidenti Rugova u dëshiron shërim të shpejtë ministrit Çeku dhe të lënduarve të tjerë në këtë sulm.

 

 

Hari Holkeri dënoi sulmin në Pejë

 

Prishtinë, 23 shkurt 2004 - Kryeadministratori i Kosovës Hari Holkeri dënoi sulmin në Pejë ndaj ministrit Çeku dhe katër personave të tjerë.

 

Holkeri thekson se ishte tronditur thellë nga shpërthimi i parëmbrëmshëm dhe se e dënon këtë sulm i cili siç tha minon ligjin dhe rregullin dhe është kundër procesit demokratik në Kosovë.

 

 

Kryeministri i Kosovës Bajram Rexhepi fillon sot vizitën disa ditëshe në Itali

 

Prishtinë, 23 shkurt 2004 - Kryeministri i Kosovës Bajram Rexhepi ka udhëtuar dje për një vizitë zyrtare në Itali, ku do të ketë takime me zyrtarë të lartë të Qeverisë italiane me të cilët do të bisedojë për çështjet e inkurajimit të investimeve të bizneseve italiane në Kosovë.

Para nisjes kryeministri Rexhepi ka dënuar ashpër atentatin ndaj ministrit Çeku, duke kërkuar efikasitet më të madh të organeve përgjegjëse. Atentati kishte për qëllim vrasjen, por fatmirësisht ministri nuk është në rrezik, ka thënë kryeministri Rexhepi.

 

 

Ministri Çeku dhe tre të lënduar janë liruar nga spitali

 

Pejë, 23 shkurt 2004 - Në lidhje me shpërthimin e së shtunës në Pejë, zëdhënësi i policisë së UNMIK-ut Xhon Singëlton tha se ende nuk dihet sasia dhe lloji i eksplozivit që shkaktoi shpërthimin sepse hetimet janë duke u zhvilluar nga një njësit për krime serioze nga Prishtina.

Bëhet e ditur se ministri Ethem Çeku dhe tre të lënduarit e tjerë kanë dalë sot nga spitali dhe ata do të mjekohen në shtëpi. Në spital ka mbetur vetëm Erzen Bytyçi, ka thënë burimet spitalore.

 

 

Delegacioni i grave të senatorëve amerikanë është pritur nga kryekuvendari Daci dhe kryeministri Rexhepi

 

Prishtinë, 23 shkurt 2004 - Delegacioni i grave të senatorëve amerikan, organizator të "Lutjes amerikane të mëngjesit", i cili po qëndron në një vizitë në Kosovë, dje është pritur nga kryetari i Kuvendit të Kosovës Nexhat Daci dhe kryeministri Bajram Rexhepi.

 

Me këtë rast është biseduar për zhvillimet e fundit në Kosovë dhe për thellimin e miqësisë ndërmjet Kosovës dhe Shteteve të Bashkuara të Kosovës. Ky delegacion e ka vizituar edhe Qendrën e Rehabilitimit të Nënës dhe Fëmijës në Prishtinë.

"Ndodhemi në Kosovë për t'i vizituar miqtë tanë të rinj këtu, me të cilët javë më parë u takuam në Amerikë nga të cilët u informuam për përpjekjet e njerëzve këtu për një jetë më të mirë", tha Grejs Nelson, bashkëshortja e senatorit Bill Nelson nga Florida.

 

 

Në takimin e sotëm të 15 ministrave të jashtëm të BE pritet që për Kosovën të raportojë edhe Havier Solana

 

Bruksel, 23 shkurt 2004 - Në takimin e sotëm të 15 ministrave të jashtëm të Bashkimit Evropian në Bruksel pritet që për Kosovën të raportojë edhe shefi i diplomacisë të BE-së Havier Solana. Ai do të paraqesë idetë e reja se si BE mund të ndihmojë në zbatimin e standardeve për Kosovën.

 

Merret vesh se në këtë raport Solana do të kërkojë rol më të madh në Kosovë dhe do të kërkojë që të ndihmohet vendi drejt realizimit të politikës evropiane atje. Sips këtij dokumenti i cili bëhet publik sot Solana konsideron se është i nevojshëm bashkëpunimi më i ngushtë ndërmjet UNMIK-ut dhe përfaqësuesve të Bashkimit Evropian.

Solana e sheh Kosovën si element kyç të politikës së BE-së në rajon. Përfaqësuesi i lartë i BE-së sugjeron edhe zgjërimin e aktiviteteve në Kosovë si dhe mbështetjen e Evropës për arritjen e standardeve.

Havier Solana nesër do të vizitojë Prishtinën ku do të takohet me përfaqësuesit më të lartë të UNMIK-ut dhe të institucioneve të Kosovës.

 

 

LDK-ja denon ashpër aktin kriminal në Pejë

 

Prishtinë, 23 shkurt 2004 - LDK-ja denon ashpër aktin kriminal në Pejë më 22 shkurt, ku u plagos ministri i Mjedisit dhe i Planifikimit Hapësinor Ethem Çeku dhe katër persona të tjerë.

Për LDK-në aktet e tilla kriminale janë të drejtuara kundër rendit stabilitetit dhe progresit në Kosovë.

LDK-ja kërkon nga organet kompetente, që të marrin masa adekuate në zbardhjen sa më të shpejtë të rastit, thuhet në një komunikatë të Kryesisë së LDK-së.

 

 

Në Pejë është plagosur ministri Ethem Çeku së bashku me katër persona të tjerë

 

Pejë, 23 shkurt 2004 - Të shtunën në orët e mbrëmjes në afërsi të Palestrës së Sportit në Pejë në një shpërthim që ka ndodhur në automobilin e tij është plagosur ministri i Planifikimit Hapësinor të Kosovës Ethem Çeku së bashku me katër persona të tjerë.

 

Autoritetet e policisë thanë se në mesin e të plagosurve ishin edhe dr. Ali Berisha, kryetar i Degës së AAK-së në Pejë, Erzen Bytyçi shoqërues i tyre si dhe eprorët e TMK-së nga Zona e Tretë Asllan Krasniqi dhe Istref Berisha.

 

Ata menjëherë janë dërguar në qendrën spitalore të Pejës për shërim dhe gjendja shëndetësore e tyre është në përmirësim e sipër dhe jashtë rrezikut për jetë. Tash për tash nuk dihen motivet e këtij sulmi as edhe autorët e tij.

Policia tha se ende nuk dihet sasia dhe lloji i eksplozivit të përdorur. Hetimet rreth këtij akti më të ri në Komunën e Pejës po i bën policia e UNMIK-ut dhe SHPK-ja.

Këtë sulm e ka dënuar Qeveria e Kosovës, e cila tha se një akt i tillë kriminel paraqet sulm kundër institucioneve të Kosovës dhe bie ndesh me proceset demokratike në Kosovë.

Në një komunikatë të AAK-së thuhet se akti ka prapavijë të qartë politike dhe është kryer nga shërbëtorët e Millosheviqit dhe të regjimeve të Beogradit.

Ndërkaq, Ministria e Mjedisit dhe Planifikimit Hapësinor thotë se barra kryesore për këtë atentat bie në policinë e UNMIK-ut e cila nuk ka dëshmuar seriozitet në parandalimin e akteve të tilla kriminale.

 

 

Gjilan: Drejtorëve të drejtorive u vazhdohet mandati deri më 31 mars

 

Gjilan, 23 shkurt 2004 - Kuvendi Komunal i Gjilanit, në seancën e pesëmbëdhjetë të radhës, ka marrë vendim për vazhdimin e kontratave për drejtorët e drejtorive deri më 31 mars 2004.

 

Lutfi Haziri, kryetar i Kuvendit, duke e arsyetuar këtë propozim para këshilltarëve tha se drejtorëve të tashëm u ka kaluar mandati në fund të vitit 2003, ndërsa nuk mund të lejohet që Bordi i Drejtorëve të punojë me kapacitet të reduktuar deri në riorganizimin e shërbimit civil, projekt ky që tashmë është miratuar edhe nga Kuvendi, ndërsa komisioni po punon në ndryshimin e statutit të komunës, për të krijuar mundësi për zbatimin e tij.

Mirëpo, një numër i anëtarëve të asamblesë nuk janë dakorduar që drejtorëve t`iu vazhdohet mandati. Izmi Zekaj ka kërkuar që të mos iu vazhdohet mandanti këtyre drejtorëve, pasi që ata nuk kanë raportuar asnjëherë për punën e tyre, por ka propozuar që Kuvendi të marrë vendim për shpalljen e konkursit për drejtorë të rinj.

Xhemail Hyseni, zëvendëskryetar i komunës tha se Dega e LDK-së është e kënaqur në përgjithësi me punën e shërbimit civil komunal dhe në veçanti me Bordin e drejtorëve, prandaj nuk u pajtua që drejtorët e deritashëm duhet të flaken si lecka, pas një pune trevjeçare që kanë bërë deri tani.

Sipas Qemajl Mustafës, drejtorët që nuk kanë sjellë raport asnjëherë, nuk kanë të drejtë morale të kërkojnë t'iu vazhdohet kontrata. Nazmi Musa ishte i mendimit se duhet t`u vazhdohet mandati vetëm shtatë drejtorëve, ndërsa duhet të emërohen katër ushtrues të rinj të drejtorëve, derisa të shpallet konkursi. I pakënaqur që propozimi i tij nuk u nxor në votim, Musa e lëshoi mbledhjen.

Kuvendi ka miratuar edhe buxhetin e specifikuar për vitin 2004, të cilin e ka prezentuar para këshilltarëve drejtori i financave, Zijadin Maliqi si dhe rregulloren për vendosjen e tatimit në pronë, ndërsa propozim rregulloren për organizimin e transportit brenda territorit të komunës së Gjilanit e ka kthyer në Komitetin përkatës për strukturim.

 

 

Gjilani është zgjedhur në mesin e pesë komunave përfituese në projektin "Delta II"

 

Gjilan, 23 shkurt 2004 - Gjilani është njëra nga pesë komunat e Kosovës, e cila në një konkurrencë jashtëzakonisht të madhe, është përzgjedhur nga Instituti për Hulumtime Zhvillimore (Riinvest) si dhe Instituti për Shoqëri të Hapur (OSI) në projektin për zhvillimin e ndërmarrjeve lokale nëpërmet aksioneve dhe aleancave "Delta II".

Programi parasheh organizimin e katër punëtorive, hartimin dhe aprovimin e strategjive të zhvillimit ekonomik lokal, hartimin e projekteve dhe implmentimin e tyre, organizimin e një konference të donatorëve si dhe udhëtimet studiuese të zyrtarëve në botën e jashtme, thotë Fadil Osmani, zyrtar për projekte i Kuvendit të Komunës në Gjilan.

Komuna e Gjilanit edhe deri tani është dëshmuar e suksesshme në projektet e këtilla dhe ajo i vlerëson si shumë të nevojshme bashkëpunimin reciprok dhe krijimin e lidhjeve midis institucioneve të ndryshme, të cilat po japin kontribut në nxitjen dhe stimulimin e zhvillimit ekonomik në Kosovë.

Në kushtet bashkëkohore është shumë i rëndësishëm shkëmbimi i përvojave me institucionet e këtilla serioze siç janë "Riinvest" dhe "OSI" dhe me vendet në tranzicion, sepse kjo ndihmon zhvillimin strategjik.

Përzgjedhja e Gjilanit në këtë projekt do të thotë se kjo komunë është e aftë të koordinojë faktorët e ndryshëm lokalë dhe të shfrytëzojë potencialin e tyre për aktivitete frytdhënëse.

 

 

Podujevë: Përgjysmohet numri i familjeve që jetojnë në fshatrat kufitare

 

Podujevë, 23 shkurt 2004 - Komunën e Podujevës aktualisht e përbëjnë 76 fshatra dhe tri lagje të qytetit derisa me Statutin e komunës është parapara që qyteti të ketë pesë lagje. Në vijën kufitare me Serbinë janë përfshirë 24 fshatra në hapësirën prej 94 km.

"Regjistrimi i familjeve në këto fshatra është kah përfundimi dhe nga evidencat e mbledhura konstatohet se migrimi i popullatës në fshatrat pranë kufirit, por edhe në disa fshatra të tjera është i madh dhe pothuaj që disa fshatra kanë mbetur pa asnjë banorë", tha koordinatori i Komiteteve të fshatrave Latif Mehmeti.

 

Në bazë të raportit të publikuar njoftohet se fshati Reçicë me 1.218 ha sipërfaqe ka mbetur pa asnjë banor, kurse para luftës së fundit ka pasur 15 familje. Asnjë banor nuk jeton edhe në fshatin Përpellac ku para luftës kanë jetuar 7 familje, sikurse është zbrazur edhe fshati Muhazob ku kanë jetuar 12 familje.

Sipas evidencës së përgatitur nga korrdinatori për komitetet e fshatrave, një familje e vetme jeton në Rakinicë ku ka pasur nëntë familje, fshati Bllatë tashmë ka 3 familje nga të cilat dy me nga vetëm një anëtar derisa para luftës aty kanë jetuar 11 familje.

Ndër arsyet kryesore që përmenden nga banorët e këtyre vendbanimeve janë siguria jo e mjaftueshme pranë kufirit, infrastruktura e dobët dhe rrugët që nuk mundësojnë qarkullim të lirë.

 

 

Në Gjakovë interesim i shtuar për anëtarësim në LDK

 

Gjakovë, 23 shkurt 2004 - Në një takim të Degës së LDK-së në Gjakovë, në të cilën morën pjesë edhe Alush Gashi, anëtar i Kryesisë qendrore të LDK-së dhe Jakup Kastrati e Tomë Hajdari, anëtarë të Këshillit të Përgjithshëm të LDK-së dhe zyrtarë lokalë, u theksua se ekziston interesim i shtuar për anëtarësim në LDK.

Në këtë takim Afrim Sylejmani, nënkryetar i degës së LDK-së në Gjakovë, foli lidhur me angazhimin e përditshëm të kësaj Dege në zbatim të vendimeve dhe të Programit të dalë nga Kuvendi IV i LDK-së, duke theksuar se në tërë strukturën organizative të LDK-së në komunën e Gjakovës ekziston një entuziazëm i shtuar për veprim, andaj edhe kërkoi zbatimin e plotë të premtimeve në fushatën elektorale të zgjedhjeve vendore dhe nacionale të shkuara.

Poashtu diskutuan edhe pjesëmarrësit e tjerë të cilët kontribuan në rrumbullakësimin e raportit për gjendjen aktuale në këtë Degë, duke dhënë propozime konkrete për përmirësim të punës, si në nivel të Degës, ashtu edhe të pushtetit komunal.

Alush Gashi në emër të Kryesisë qendrore të LDK-së, paraqiti të dhëna lidhur me Programin e LDK-së për këtë vit, si dhe domosdonë e mbështetjes së pushtetit demokratik në nivel lokal dhe qendror, duke shprehur optimizëm se organizimi i LDK-së në këtë komunë, si edhe në tërë Kosovën, është garancë i vazhdimit të zhvillimit të institucioneve demokratike në Kosovë.

Nga kjo mbledhje iu dha mbështetje e fuqishme strukturave demokratike të nivelit vendor dhe mbi të gjitha Presidentit Rugova dhe institucioneve të tjera.

Dega e LDK-së në Gjakovë u zotua për angazhim të shtuar në ndihmë familjarëve që kanë humbur të dashurit e tyre në luftën e fundit, si edhe zhvillimit të rrjetit humanitar në tërë komunën.

 

 

Një delegacion i Prishtinës vizitoi Mariborin

 

Prishtine, 23 shkurt 2004 - Kryeshefi i Ekezekutivit të KK të Prishtinës Sami Hamiti, i shoqëruar nga bashkëpunëtorët, më 20 dhe 21 shkurt të këtij muaji ka qëndruar në Maribor të Sllovenisë në një vizitë pune, ku është pritur nga kryebashkiaku i këtij qyteti Boris Saviq.

Qëllimi i vizitës ka qenë njohja nga afër me arritjet në qeverisjen lokale, përvojat, planifikimin hapësinor, denacionalizimin, infrastrukturën dhe çështje të tjera me interes të dyanshëm. Në qender të kësaj vizite pune ka qenë sidomos përvoja e arritur e këtij qyteti në fushën e planifikimit hapëinor, në kohën kur edhe Prishtina, përkatesisht Drejtorati për Planifikim dhe Urbanizem i Prishtinës po bën përpjekje maksimale të hartojë një strategji adekuate për planifikim hapëinor.

 

Tashmë dihet se Prishtina ka ngecje në këtë plan karshi simotarve të saja në Evropë. Nga ana tjeter dihet se Maribori ka fituar edhe çmimin e parë në Evrope në fushën e planifikimit hapsinor, prandaj përvojat e marra atje do të shërbejnë shumë për projektet e reja në kryeqytetin tonë. Delegacioni nga Prishtina ka vizituar edhe Entin për Planifikim Hapësinor të Mariborit dhe janë këmbyer përvojat në këtë fushe.

Kryebashkiaku i Mariborit së bashku me ekspertë të fushave të ndryshme pritet të vizitojë Prishtinën gjatë muajit prill të këtij viti ku do të qëndrojë edhe në Kuvendin Komunal të Prishtinës.

 

 

Kosova gjatë dhjetë vjetëve të fundit ka humbur rreth 20 mjë hektarë tokë bujqësore

 

Prishtinë, 23 shkurt 2004 - Zyrtarët e Ministrisë së Bujqësisë në Kosovë thanë se gjatë dhjetë vjetëve të fundit Kosova ka humbur rreth 20 mijë hektarë tokë bujqësore të kualitetit të lartë me ndërtime të banesave të shtëpive, objekteve ekonomike, moteleve, hoteleve, pompave të benzinës e të tjerë.

 

 

Në Klinikën e Infektologjisë në Prishtinë është evidentuar edhe një pacient me virusin e sidës

 

Prishtinë, 23 shkurt 2004 - Burimet nga Klinika e Infektologjisë bëjnë të ditur se kohë më parë numrit prej 54 rasteve të të infektuarëve me virusin HIV dhe sëmundjes vdekjeprurëse sida, të cilët sipas statistikave të Institutit Kombëtar të Shëndetësisë që nga viti 1986 deri në fund të vitit të kaluar janë evidencuar në Kosovë, si vjet iu shtua edhe një rast i ri.

 

Këtë fakt e pohon shefi i repartit për HIV dhe sida në Klinikën e sëmundjeve infektive në Prishtinë dr. Ilir Tolaj. Ai thotë se rasti i ri me këtë sëmundje është kthyer nga Gjermania dhe i cili pacient kishte filluar trajtimin atje dhe për fat të keq është ndërprerë trajtimi këtu për shkak të mungesës edhe të diagnostikimit adekuat të gjendjes së tij të sistemit mbrojtës, por edhe mungesës së barëve që aplikohen për këtë qëllim.

 

 

Kryqi i Kuq Ndërkombëtar nuk do të jetë ndërmjetësues ndërmjet Prishtinës dhe Beogradit

 

Prishtinë, 23 shkurt 2004 - Kryqi i Kuq Ndërkombëtar nuk do të jetë ndërmjetësues ndërmjet Prishtinës dhe Beogradit, por do ta ketë rolin e lehtësuesit të bisedimeve, ka thënë drejtoresha e Departamentit për Informim në Misionin e UNMIK-ut në Prishtinë Hua Xhiang. Ajo thotë se dialogu do të ndodhë ndërmjet Prishtinës dhe Beogradit dhe Kryq i Kuq Ndërkombëtar nuk do të udhëheqë e as ndërmjetësoi dialogun.

 

 

Prokurori i Tribunalit të Hagës do të përfundojë të mërkurën paraqitjen e akuzave kundër Millosheviqit

 

Hagë, 23 shkurt 2004 - Prokurori i Gjykatës Penale Ndërkombëtare për ish-Jugosllavinë do të përfundojë të mërkurën paraqitjen e akuzave të tij kundër ish-diktatorit Sllobodan Millosheviq pasi procesi gjyqësore ishte shtyrë për shkak të gjendjes shëndetësore të të pandehurit i cili po përgjigjet para Tribunalit të Hagës për krime lufte ndaj njerëzimit dhe gjenocid në Bosnje, Kroaci dhe në Kosovë.

 

 

Limaj, Balaj dhe Musliu më 27 shkurt do të paraqiten në një konferencë statusore në Tribunalin e Hagës

 

Hagë, 23 shkurt 2004 - Ish-luftëtarët e UÇK-së Fatmir Limaj, Haradin Balaj dhe Isak Musliu më 27 shkurt do të paraqiten në një konferencë statusore në Tribunalin e Hagës, kanë bërë të ditur burime e Tribunalit të Hagës.

 

 

Gjykatësi Mej në procesin gjyqësor kundër Millosheviqit dha dorëheqje për arsye shëndetësore

 

Hagë, 23 shkurt 2004 - Gjykatësi Riçard Mej në procesin gjyqësor kundër Millosheviqit dha dorëheqje për arsye shëndetësore. Kryesuesi i Tribunalit të Hagës Theodor Meron tha se dorëheqja do të hyjë në fuqi prej 31 marsit. Një zëdhënësi i gjykatës tha se ky hap nuk do të ndikojë në seancat e planifikuara në rastin e Milosheviqit në të cilin prokuroria duhet të rrumbullakësojë punën e vetë të mërkurën.

 

 

Tre shqiptarë janë vrarë dhe katër të tjerë janë plagosur në Reçicë të Madhe të Tetovës

 

Tetovë, 23 shkurt 2004 - Në fshatin Reçicë të Madhe të Tetovës ka ndodhur një incident i rëndë ku nga të shtënat me armë zjarri janë vrarë tre shqiptarë dhe katër të tjerë janë plagosur.

 

Kanë humbur jetën Nergim Hazbiu (1975), Milaim Tahiri (1976) dhe Shefki Hasani i lindur në vitin 1973. Njëri nga katër të plagosurit, Besim Ramadani ndodhet në rrezik jete, ndërkaq lëndime më të lehta kanë marrë Selman Rexhepi, Fatmir Rexhepi dhe Besim Arifi.

Sipas policisë incidenti ka ndodhur kur një person i panjohur në afërsi të një kafiterie në Tetovë ka urdhrëruar vozitësin e taksi-veturës të drejtojë drejt fshatit Reçicë, ku të njëjtëve u janë bashkangjitur edhe dy persona të tjerë të armatosur me autamatik.

 

Dy personat e panjohur e kanë urdhëruar vozitësin që t'i dërgojë në lokalin "Sharri" ku kanë thyer xhamat e veturës dhe kanë shtënë breshëri plumbash në personat e pranishëm në lokalin e lartëpërmendur.

Ministria e Brendshme e Maqedonisë nuk ka dhënë njoftime të hollësishme, por ka thënë se bëhet fjalë për qërim hesapësh midis grupeve kriminele.

 

 

Gjashtë të vdekur nga gazi në një minierë afër Vlorës

 

Vlorë, 23 shkurt 2004 - Të paktën gjashtë minatorë kanë gjetur vdekjen pas një shpërthimi në mëngjes në minierën e bitumit pranë Vlorës. Njoftohet se 18 minatorë të tjerë janë plagosur pas një shpërthimi të gazit në minerën e bitumit në Selenicë, rreth 160 kilometra në jug të Tiranës.

Shtatë prej të plagosurve ndodhen në gjendje shumë të rëndë në spitalin rajonal të Vlorës dhe pritet që të transportohen për në spitalin e Brindizit, Itali, dhe atë të Tiranës.

Në vendngjarje kanë shkuar grupet e posaçme të shpëtimit si dhe forca të policisë.

Helikopterë të NATO-s janë angazhuar në transportimin e të plagosurve në drejtim të Brindizit dhe Tiranës.
Miniera e bitumit në Selenicë është më e madhja e këtij lloji në Shqipëri e çelur të paktën 70 vjet më parë nga italianët.

 

 

Izraelitët kanë arrestuar 8 palestinezë

 

Betlehem, 23 shkurt 2004 - Forcat izraelite kanë shkatërruar shtëpinë e palestinezi në një fshat afër Betlehemit, ndërkohë që kanë arrestuar tetë palestinezë në territoret e pushtuara palestineze, duke përfshirë edhe një punonjës shëndetësor, njoftojnë burimet palestineze (IPC e wAFA).

 

 

Zjarr në qendrën e gjithësisë në Indi, disa të vdekur

 

Nju Delhi, 23 shkurt 2004 - Një zjarr ka përfshirë tërë linjën e qendrës indiane të gjithësisë në Sriharikota në shtetin Andra Pradesh, duke vrarë disa njerëz.

Shkaku i zjarrit nuk dihet por disa kanale televizive spekulojnë të hënën se kanë qenë shkëndijat që shkaktuan shpërthimin në një motor, njofton Frans Press.

 

 

Gjashtë të vrarë në një sulm vetëvrasës në Kirkuk

 

Kirkuk, 23 shkurt 2004 - Një sulmues vetëvrasës ka vrarë veten dhe të paktën pesë persona në një stacion policor në qytetin verior të Irakut Kirkuk, ka thënë një zyrtar i policisë dhe punjosësit shëndetësorë, njofton Rojter.

"Për momentin kemi gjashtë të vdekur dhe gjashtë të plagosur", ka deklaruar Ihsan Hasan dhe një punonjës i emergjencës për Rojterin.

Zyrtarët e policisë thanë se sulmin e ka kryer një sulmues vetëvrasës me automobil.

 

 

Njoftohet për 37 minatorë të vdekur nga shpërthimi i gazit

 

Shangaj, 23 shkurt 2004 - Njoftohet për 37 minatorë të vdekur pas një shpërthimi të gazit në minierën e thëngjillit te qyteti Xhisi në verlindje të Kinës.

Gazi helmues, i akumuluar për shkak të ventilimit të dobët të minierës, pamundëson ekipet e shpëtimit të hyjnë në galeri.

 

 

Bin Ladeni është gjallë në Afganistan

 

Kabul, 23 shkurt 2004 - Udhëheqësit e rrjetit terrorist Al Kaida, Osama bin Laden dhe Ajman al Zavahiri jetojnë në Afganistan, ka bërë të ditur një qendër informative talibane.

"Liderët e lëvizjes talibane, komandantët tanë ushtarakë dhe posaçërisht mysafirët Osama bin Laden dhe Ajman al Zavahiri janë gjallë dhe aktualisht ndodhen në Afganistan, të angazhuar me planifikimin e operacioneve kundër amerikanëve", theksohet në një komunikatë që e ka nënshkruar "Qendra për informim e mulla Omarit", e cila i është dërguar agjencisë së lajmeve Frans Press.

 

 

Arrin në 13 numri i viktimave nga sulmi vetëvrasës në Kirkuk

 

Kirkuk, 23 shkurt 2004 - Një zyrtar i policisë ka thënë se një sulmues vetëvrasës me autobombë ka vrarë 13 veta dhe ka plagosur 51 të tjerë në një sulm ndaj stacionit policor në Kirkuk, në fushatën e fundit kundër irakianëve që bashkëpunojnë me trupat amerikane.

"Pjesët e sulmuesit vetëvrasës, këmbët dhe duart e tij, janë shpërndarë jashtë stacionit policor", ka thënë Amxhad Reda, një polic gjithashtu i plagosur në këtë sulm, njofton Rojter.

Guerilët kanë vrarë mbi 300 policë që kanë bashkëpunuar me trupat amerikane.

 

 

Nga një sëmundje misterioze kanë vdekur mbi 300 fëmijë afganë

 

Kabul, 23 shkurt 2004 - Mbi 300 fëmijë afganë kanë vdekur nga pasojat e një sëmundjeje misterioze në provincën veriore afgane.

Zv.guvernatori i provincës Badakshan Shamsur Rehman ka deklaruar se bëhet fjalë për sëmundjen e sistemit të frymëmarrjes e cila fillon me simptomet e ngjashme me ato te gripi, por më vonë shkaktohet bllokimi i frymëmarrjes nga e cila fëmijët ngulfaten.

Rehman gjithashtu ka thënë se numri i fëmijëve të vdekur mund të jetë më i madh, meqenëse vështirë mund të arrihet deri te rajonet e largëta të vendit. Ai i ka bërë thirrje Organizatës Botërore të Shëndetësisë që të dërgojë pajisje mjekësore për t'u shmangur katastrofa me përmasa të gjera.

 

 

Dhjetë të vrarë në Kirkuk, Ramsfeld në Bagdad

 

Kirkuk, 23 shkurt 2004 - Bilanci më i ri i sulmit vetëvrasës në stacionin policor në Kirkuk është 10 të vrarë dhe 42 të plagosur.

Sipas Rojterit në morgun e spitalit ndodhen dhjetë të vrarë nga automobili bombë i cili shpërtheu në një sulm mbi stacionin policor që ndodhet në pjesën kurde të qytetit të Kirkukut.

 

Ndërkohë, në Bagdad ka arritur sekretari amerikan i Mbrojtjes Dolad Ramsfeld dhe kjo është vizita e tij e katërt në Irak gjatë një viti. Atë në aeroportin e Bagdadit e priti administratori amerikian Pol Bremer.

 

 

Dy persona kanë humbur jetën nga përplasja e dy helikopterëve japonezë

 

Tokio, 23 shkurt 2004 - Dy persona kanë humbur jetën, ndërkaq një tjetër është lënduar rëndë të hënën kur dy helikopterë japonezë janë përplasur gjatë stërvitjeve dhe me atë rast janë rrëzuar në një rajon malor, kanë bërë të ditur autoritetet.

Ekipet e shpëtimit kanë gjetur copat e fluturakeve në një lartësi 336 metra në majet e malit Aoime ndhe kanë shpëtuar katër anëtarë të ekuipazhit.

 

 

Gjykata botërore për barrierën izraelite

 

Hagë, 23 shkurt 2004 - Konflikti i hidhur ndërmjet Izraelit dhe palestinezëve do të kalojë në Hagë ku Gjykata Botërore përgatitet për të dëgjuar argumentet rreth ligjshmërisë së barrierës së sigurisë që Izraeli po e ndërton në Bregun Perëndimor.

Mijëra protuestues janë mbledhur në Hagë për të protestuar kundër murit ndarës.

Asambleja e Përgjithshme e OKB-së ka kërkuar nga Gjykata që të jap një opinion këshillues dhe jo detyrues rreth ligjshmërisë së murit. Ky është një nga rastet më të ngarkuara politikisht që sillet para Gjykatës. Do të fillojë me tri orë paraqitje të fjalës nga ana e palestinezëve.

Ka shumë gjasa që të përfshihet edhe prezantimi vizuel i ndikimit të barrierës mbi jetërat e njerëzve në Bregun Perëndimor.

 

 

Rebelët marrin qytetin e dytë në Haiti

 

Port o Prins, 23 shkurt 2004 - Rebelët në Haiti i kanë ndjekur forcat e policisë jashtë qytetit të dytë të vendit, Kep Haitien që është fortesa e fundit e presidentit Aristide në veri të vendit.

Korrespondentët thanë se ndërsa rebelët hynë në këtë qytet, banorët vendas festuan nëpër rrugë dhe filluan vjedhjen e ndërtesave.

Sulmi i rebelëve në aeroportin e qytetit, Kep Haitien, pasi hasi në një rezistencë të vogël, çoi në djegjen e një stacioni policie në qendër të qytetit.

Njoftimet thonë se më shumë 200 të burgosur u liruan nga qelitë e tyre, kur policët braktisën pozicionet.
Njoftimet më të fundit, bëjnë të ditur se rebelët janë larguar tashmë nga ky qytet.

 

 

Britania kufizon vendet e reja të BE-së

 

Londër, 23 shkurt 2004 - Qeveria britanike pritet që të paralajmërojë kufizime të reja të imigracionit. Ndryshimet vijnë në prak të një fluksi të mundshëm të imigrantëve nga dhjetë vendet që do t'i bashkohen BE-së në muajin maj.

Deri tani, Britania së bashku me Irlandën kanë mbajtur një politikë të derës së hapur para zgjerimit të BE-së në Maj.

Qasja origjinale ishte që t'u mundësohet qytetarëve të dhjetë vendeve të reja, përfshirë edhe Poloninë dhe Republikën Çeke, që të hyjnë në Britani dhe të punojnë pa probleme.

 

 

Ushtria ugandeze në ndjekje të autorëve të masakrës

 

Kampala, 23 shkurt 2004 - Ministri i Mbrojtjes së Ugandës thotë se personat përgjegjës për masakrën më të fundit në veri të vendit do të marrin të njëjtin trajtim.

Ministri, Amama Mbabazi, tha se ushtria e vendit të tij është vënë në ndjekje të rebelëve, të cilët dyshohet se janë anëtarë të grupit të quajtur "Ushtria e Qëndresës së Zotit".

Ky grup, besohet se ka vrarë më shumë 190 persona në veri të vendit pranë qytetit Lira.

Një deputet në atë zonë tha se shumica e viktimave - ku përfshiheshin edhe gra edhe fëmijë - ishin djegur të gjallë në kasollet e tyre.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |