|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

SHOQËRIA KULTURORE „ILIRIA“ NË ROTTWEIL TË GJERMANISË

VATËR E VEPRIMTARISË  SË PASUR DHE PUNËS SË SUKSESSHME

23 shkurt 2004 / TN

• Në Kuvendin zgjedhor të mbajtur dje, u zgjodh kryesia e re dhe u përcaktuan kahet e aktivitetit të ardhshëm
• Kjo vatër kulturore shqiptare konsidrohet si një nga  asociacionet më të organizuara shqiptare në Gjermani, e cila po arrin rezultate të dukshme në  veprim, thellimin e bashkëpunimit me qytetin dhe  klubet shqiptare në Baden Württemberg e Gjermani, theksoi Zenel Osmanaj, kryetar që në fillim të këtij kuvendi.

Çerkin BYTYÇI

Pjesëmarrësit e Kuvendit zgjedhor të Shoqërisë Kulturore Shqiptare “Iliria” në Rottweil të Gjermanisë, fillimisht  kundërshtuan idenë për bashkimin e pjesës veriore të Mitrovicës komunës së Zveçanit dhe kërkuan nga  institucionet shtetrore të Kosovës që me këmbëngulësi t`iu ndalin hovin tendencave që shpesh paraqiten për ndarjen e Mitrovicës. – Diaspora shqiptare e cila dha kontribut të madh për çlirimin e Kosovës është e indinjuar me idetë e tilla çorroditëse të cilat ngadalsojnë proceset e  demokaratizimit dhe pavarësimit të plotë e të shpejtë të Kosovës, u tha në këtë  tubim të kësaj vatre kulturore shqiptare, e cila konsiderohet në mesin e  klubeve dhe asociacioneve më aktive në Gjermani.

Sportistit dhe kampionit evropian  në boks Luan Krasnqit, i cili jeton në Rottweil, qytetin ku vepron shoqëria”Iliria”, pjesëmarrësit e kuvendit zgjedhor i shprehën urimet dhe përgëzimet për  titullin e fituar para disa ditësh – kampion evropian në boks, titull ky i cili  nderon në veçanti këtë qytet dhe shqiptarët që jetojnë vite me rradhë  në te si dhe gjithë sportëdashësit e shqiptarët kudo që janë.

Në raportin e punës që në vazhdim e parqiti sekretari i këtij asociacioni Artan Ferizaj, u potencua se “Iliria” në Rottweil gjatë periudhës së shkuar dy vjeçare arriti rezultate të dukshme në planin e organizimit të bashkatdhetarëve dhe manifestimeve të shumta kulturore. – Mbi të gjitha është forcuar bashkëpunimi me qytetin nikoqir dhe asociacionet e këtushme, kurse  prezentimi i suksesshëm i traditave kulturore shqiptare  para miqve tanë gjerman, bëri që kjo shoqëri të gëzoj reputacion pozitiv dhe të dëshmohet si vatër e organizuar mirë dhe me sukses, si shoqëri  e përbërërë nga pjesëtarët e popullit  të lashtë e me kulturë, i civilizuar dhe i organizuar mirë.

Mu për këtë, si subjekt më i organizuar i qytetarëve  të huaj, qyteti i Rottweilit, kohë më parë i ndau lokalin falas dhe investoi afro 13 mijë euro, të cilat, anëtarët e “Ilirisë” i shfrytëzuan për blerjen e materialit ndërtimor dhe me punë  vetëmohuese, këtë objekt e bënë që tua kanë lakmi gjithë qyteti dhe të gjitha klubet shqiptare në diasporë. Është lokal tejet funksional, modern, me bibliotekën në themelim, me dhomën e kompjuterëve, me sallën e biliardit, dhomat për zhvillim të aktiviteteve  etj., që mundësojnë  punë e organizim solid të bashkatdhetarëve në Rottweil me rrethinë. Këtu me sukses organizohen takime letrare, takime familjare, kremtime e menaifestime nga më të ndryshmet, në të cilat  çdo herë me sukses prezentohen para publikut shqiptar e gjerman  nxënësit e shkollës shqipe në Rottweil, me valle, këngë e recitime, tha Artan Ferizaj.

- Brenda periudhës dy vjeçare, shoqëria “Iliria”  nga aktivitetet e shumta të zhvilluara dhe kontributi i anëtarëve, realizoi  afro 50 mijë euro, të cilat u shfrytëzuan për paisjen e lokalit me mjetet e nevojshme e orendi si dhe për organizimin e manifestimeve kulturore e artistike, shënimin e datave të rëndësishme nga historia jonë kombëtare dhe mbajtjen e festave të shumta, tha Feriz Ademaj, duke e prezentuar  informatën  e ecurive financiare të kësaj shoqërie.

Pjesëmarrësit e kuvendit e përkrahën nismën  për të ndihmuar  familjen e  Shaqir Ruhanit nga Prishtina, dhe me këtë rast tubuan 410 euro dhe 200 euro të tjera u ndanë nga fondi i shoqërisë që do ti dërgohen  kësaj familje. Aksione të tilla humanitare, u potencua me këtë rast, duhet të organizohen më shpesh sepse  në Kosovë dhe në trojet shqiptare pasojat e luftës janë tejet të theksuara dhe ndihma e diasporës është  edhe mëtej mëse e nevojshme.

Për të koordinuar edhe më mirë aktivitetet, aksionet dhe organizimet e mërgimtarëve tanë në Baden Württemberg të Gjermanisë, u shtrua domodoja e  riaktivizimit të Bashkësisë së Klubeve shqiptare , e cila, vite me rradhë ka heshtur dhe është pasivizuar. Mu për këtë, përfaqësuesit e klubeve  “Agimi” nga Tuttlingeni, “Kosova” nga Singeni, dhe “Shqiponja” nga Albstadti  që prezentuan në këtë Kuvend zgjedhor,  e mbështetën nismën e anëtarëve të SHKSH “Iliria” nga Rottweili,  që të  ftohet një takim i klubeve dhe shoqërive kulturore e sportive në Baden Württemberg për riorganizimin e këtij asociacioni tejet të nevojshëm dhe të rëndësishëm

Pjesëmarrësit e Kuvendit zgjodhën kryesisnë e re prej 13 anëtarëve kurse kryetar u zgjodh Zenel Osmanaj, nënkryetar Adem Shabanaj, sekretar  Artan Ferizaj dhe arkatar Skender Ferati. Ndërkaq, anëtarë të kryesisë u zgjodhën Adem Dodolli, Artan Hasani, Sadik Hajredini, Din Guri, Liman Gashi, Nuridin Gashi, Hetem Shala, Skender Ahmetxhekaj e Ramiz Poroshtica. Në komisionin mbikqyrës u zgjodhën  Feriz Ademaj, Shaban Bulliqi e Ferit Hoxha.

Duhet të theksojmë se  në këtë kohë kur shumë klube shqiptare në Gjermani po mbyllen dhe po e shuajn aktivitetin e tyre, në qytetin e Rottweilit, po vazhdohet me  punën intensive kulturore, shoqërore e kombëtare. Është arritur, për fat të mirë të ruhet  atmosfera vëllazërore e cila garanton që edhe mëtej të punohet në mënyrë të organizuar. Është pozitive që nuk ka patur probleme të theksuara, ndaj edhe asgjë nuk e ka penguar aktivitetin e anëtarëve të zellshëm të “Ilirisë”.  Kështu duhet të vazhdohet edhe mëtej, duke e kultivuar tolerancën, mirëkuptimin dhe forcimin e marrdhënieve vëllazërore. Kjo është formë më e mirë për ti ndihmuar Kosovës dhe shqiptarisë në tërësi.