Përmbajtja:

• Holkeri dhe Rugova në Klinë: Serbët duhet të tregojnë vullnet për t'u integruar në shoqërinë kosovare

• Holkeri dhe Rugova vizitojnë sot Klinën dhe Pejën

• Solana të hënën raporton për Kosovën para ministrave të BE-së

• Gjenerali Bek tha se Shtetet e Bashkuara mbetën të përkushtuara për popullin e Kosovës

• UNMIK-u reagon ndaj miratimit të Ligjit për bashkëpunim me Gjykatën e Hagës nga Kuvendi i Kosovës

• Jipen premtime që minatorët e "Trepçës" të kthehen në vendet e tyre të punës

• Zëdhënësja e UNMIK-ut thotë se nuk ka indikacione se vrasja e dy serbëve të ketë qenë me motive etnike

• Parmbrëmë në Pejë u plagos një pjesëtar i TMK-së

• Muharrem Shabani jep dorëheqje nga të gjitha organet dhe nga anëtarësia e LDK-së

• "Nisma për një Universitet Tjetërqysh" nuk merret me kërcënime

• Gratë e senatorëve amerikanë nesër vizitojnë Kosovën

• Greqia i kërkon ndihmë NATO-s

• Opozita sot në protestë në Tiranë

• Shqiptarët protestuan në rrugët e Shkupit kundër ndarjes territoriale

• Presidenti maqedonas e ka dekretuar ligjin për themelimin e Universitetit të Tetovës

• Departamenti amerikan i Shtetit e përshëndeti vendimin e Trajkovskit për nënshkrimin e ligjit për UT

• Deputetët e pozitës dhe opozitës maqedonase vazhduan polemikat për ligjin për ndarjen territoriale

• Së shpejti amerikanët në Libi

• Gjykatësi lejon martesat e homoseksualëve

• Në Iran përfunduan zgjedhjet parlamentare

• Katër ushtarë amerikanë janë plagosur, një irakian është vrarë

• Nga ethet vdesin 215 persona në Indonezi

Holkeri dhe Rugova në Klinë: Serbët duhet të tregojnë vullnet për t'u integruar në shoqërinë kosovare

 

Klinë, 21 shkurt 2004 - Shefi i UNMIK-ut Hari Holkeri dhe Presidenti i Kosovës Ibrahim Rugova po vizitojnë sot Klinën dhe Pejën.

Kreu i UNMIK-u dhe ai i Kosovës fillimisht qëndruan në Kuvendin komunal të Klinës dhe nga funksionarët lokalë u njoftuan për zhvillimet aktuale në këtë mjedis. Kryetari i komunës Ramë Manaj, pasi foli për zhvillimet aktuale në kë komunë, theksoi se situatën e rëndon çështja e personave të zhdukur gjatë luftës dhe papunësia e madhe me mbi 60 për qind.

 

Manaj tha se gjatë luftës në këtë komunë janë vrarë mbi 300 persona dhe 137 janë rrëmbyer dhe kërkoi të zbardhen krimet që kanë ndodhur këtu. Ai u angazhua kundër enklavizimit të serbëve dhe tha se serbët vazhdojnë të instrumentalizohen nga Beogradi. Poashtu në këtë takim folën në të njëjtën vijë edhe përfaqësuesi i PSHDK-ë dhe ai i AAK-së.

Duke folur para udhëheqjes komunale, Holkeri tha se duhet të krijohen kushte për të kthyerit, sepse ky është një prej standardeve dhe ardhmja e Kosovës varet nga përmbushja e tyre.

Presidenti Rugova në këtë takim foli progresin që është bërë në Klinë, sikur edhe në tërë Kosovën, në vitet e pasluftës, ndonëse, siç tha, Klina ka qenë një nga komunat më të shkatërruara gjatë luftës.

Duke folur për procesin e kthimit, Presidenti tha se "jemi për kthimin në baza individuale". "Si shumicë ofrojmë mbrojtje për të gjitha pakicat, pra edhe për serbët, por edhe serbët duhet të tregojnë vullnet për t'u integruar në shoqërinë kosovare", tha ai. Po ashtu ai shtoi se "pas luftës në Kosovë të gjithë jemi më pak".

Pas takimit me udhëheqjen komunale, Holkeri dhe Rugova folën para gezetarëve dhe familjarëve të të zhdukurve që kishin dalë për të protestuar para Kuvendit komunal.

Pastaj kryeadministratori dhe Presidenti vizituan fshatin Binçë me serbët e kthyer dhe u premtuan atyre kushte më të mira të jetës dhe punës. Por Holkeri dhe Rugova thanë se dëshira për t'u kthyer nënkupton edhe obligimin për t'u integruar në shoqërinë kosovare.

Serbët e kthyer në këtë fshat u ankuan pë kushtet e këqija dhe mungesën e sigurisë për të lëvizur.
Presidenti Rugova u tha serbëve se Kosova e ka vendin në Evropën e integruar, prandaj edhe serbët e Kosovës do të jenë pjesë e këtij integrimi.

Pas Klinës Holkeri dhe Rugova po vizitojnë Pejën.

 

 

Holkeri dhe Rugova vizitojnë sot Klinën dhe Pejën

 

Prishtinë, 21 shkurt 2004 - Shefi i UNMIK-ut Hari Holkeri dhe Presidenti i Kosovës Ibrahim Rugova do të vizitojnë sot Klinën dhe Pejën. Përveç takimeve me zyrtarët lokalë dhe ndërkombëtarë ata do të vizitojnë edhe dy enklava serbe - Binçën dhe Bellopojën.

 

 

Solana të hënën raporton për Kosovën para ministrave të BE-së

 

Bruksel, 21 shkurt 2004 - Në takimin e të hënës së 15 ministrave të jashtëm të Bashkimit Evropian, pritet që për Kosovën të raportojë edhe shefi i diplomacisë së BE-së Havier Solana. Siç njoftohet nga Brukseli, Solana pritet të paraqesë idetë e reja sesi BE-ja mund të ndihmojë në zbatimin e standardeve për Kosovën.

 

Idetë e Solanës, të cilat do të bëhen publike të hënën, kryesisht kanë të bëjnë me "mënyrat dhe mjetet për përforcimin e mëtejmë të kontribuitit të BE-së për zbatimin e Rezolutës 1244 e në veçanti për zbatimin e standardeve".

 

Poashtu ai do të kërkojë që politika e BE-së në Kosovë të jetë më transparente dhe që BE të hapë mundësinë edhe për participimin e kosovarëve nëpër programet e ndryshme të trajnimit në vendet e BE-së.

Menjeherë pas takimit të ministror në Bruksel, Solana të nesërmen, më 2 shkurt, do të vizitojë Prishtinën, ku do të takohet me përfaqësuesit më të lartë të UNMIK-ut dhe të institucioneve të Kosovës.

 

 

Gjenerali Bek tha se Shtetet e Bashkuara mbetën të përkushtuara për popullin e Kosovës

 

Ferizaj, 21 shkurt 2004 - Komandanti i forcave paqeruajtëse amerikane, Xheri Bek në kampin e këtyre trupave në "Bondstill" ka thënë se Shtetet e Bashkuara janë të përkushtuara për popullin e Kosovës. Prandaj edhe numri i ushtarëve amerikanë në Kosovë do të mbetet i pandryshuar. Këto komente gjenerali Bek i ka bërë në konferencën e fundit para largimit të tij nga Kosova.

 

Ai tha se gjatë kësaj kohe në sektorin lindore të komanduar nga forcat amerikane është arritur mjaft përparim në shumë fusha, sidomos në kthimin e të zhvendosurve dhe sigurimin e lëvizjes së lirë për të gjithë qytetarët. Gjenerali Bek tha se Brigada Shumëkombëshe e Lindjes që udhëhiqet nga trupat amerikane do të mbetet e pandryshuar megjithë transformimet që po ndodhin në kuadër të forcave paqeruajtëse dhe NATO-s në përgjithësi.

 

Gjenerali Bek tha se e ardhmja e Kosovës është në duart e popullit të Kosovës dhe porositi që për të qenë të suksesshëm duhet të mbajtur mend dy gjëra: sundimin e ligjit dhe tolerancën ndaj të tjerëve. Ai shtoi se Misioni i KFOR-i ka qenë dhe është krijimi i një ambienti të qetë dhe të sigurtë për të gjithë në Brigadën Shumëkombëshe të Lindjes dhe transferimi i përgjegjësive tek institucionet civile.

Edhe gjenerali Rik Erlandson, i cili më 25 të këtij muaji merr komandën e këtyre trupave amerikane tha se ndryshimet edhe nëse ndodhin do të jenë shumë të vogla. Ai tha se forcat e divizionit 38 të këmbësorisë që do të zëvendësojnë divizionin e tij në muajin gusht të këtij viti dhe tashmë kanë filluar stërvitjet me të njëjtin numër, sikurse ai i trupave që ndodhën në Kosovë.

Në Kosovë janë aktualisht rreth 4000 ushtarë amerikanë të cilët janë vendosur në sektorin lindor të KFOR-it. Të dy gjeneralët amerikanë u kanë bërë thirrje qytetarëve të Kosovës që të angazhohen në sundimin e ligjit dhe tolerancës si kushte për përparimin në Kosovë.

 

 

UNMIK-u reagon ndaj miratimit të Ligjit për bashkëpunim me Gjykatën e Hagës nga Kuvendi i Kosovës

 

Prishtinë, 21 shkurt 2004 - Misioni i OKB-së ka reaguar nëpërmjet një komunikate ndaj miratimit të Ligjit për bashkëpunim me Gjykatën Ndërkombëtare në Hagë nga ana e Kuvendit të Kosovës. UNMIK-u thotë se me këtë rast Kuvendi i Kosovës ka tejkaluar përgjegjësitë e veta.

 

Në komunikatë thuhet se kjo çështje është e drejtë e rezervuar për shefin e UNMIK-ut dhe se për këtë ky mision dhe Qeveria e Kosovës janë pajtuar që projektligji në fjalë të shqyrtohet nga Kuvendi, por që aprovimin e tij ta bëjë shefi i UNMIK-ut në formë të një rregulloreje.

 

 

Jipen premtime që minatorët e "Trepçës" të kthehen në vendet e tyre të punës

 

Mitrovicë, 21 shkurt 2004 - Agjencia Kosovare e Mirëbesimit ka mbajtur një takim me gazetarë ku u ka bërë thirrje minatorëve të "Trepçës" që të ndalojnë veprimet unilaterale dhe të vazhdojnë dialogun.

 

Sipas menaxherit ndërkombëtar nga AKM-ja Pol Nils veprimet e tilla vënë në rrezik programin vazhdues për rifillimin e prodhimit të kufizuar në minierë. Ai thotë se ka menduar se me fillimin e prodhimit një pjesë e madhe e punëtorëve që i plotësojnë kushtet dhe që janë nën moshën 50-vjeçare mund të punojnë, jo menjeherë, por brenda muajve të ardhshëm.

Nils tha se "kurrë më parë nuk kemi qenë më afër riaktvizimit të minierës, ndërkaq do të ishte keq nëse bëni pengesa, që do ta vështirësojnë këtë proces", ka thënë ai.

Edhe menxhari i minierës Miftar Hyseni u premtoi minatorëve se do të bëjë çmos që të gjithë punëtorët të kthehen në vendet e tyre të punës, megjithëse mundësitë janë të kufizuara.

 

 

Zëdhënësja e UNMIK-ut thotë se nuk ka indikacione se vrasja e dy serbëve të ketë qenë me motive etnike

 

Prishtinë, 21 shkurt 2004 - Zëdhënësja e policisë së UNMIK-ut në Prishtinë, Anxhella Xhozef, duke komentuar vrasjen e dy pjesëtarëve të minoritetit serb në Grackë të Lipjanit, ka thënë thënë se deri më tash nuk ka të arrestuar dhe se motivet e vrasjes tash për tash nuk dihen. Ajo tha se nuk ka indikacione se vrasja mund të ketë qenë krim me motive etnike apo politike.

Zëdhënësja thotë se incidenti mund të ketë ndodhur brenda për brenda komunitetit serb. Ajo shtoi se ky incident mund të ketë lidhje me dy të vrarët dhe marrëdhëniet ndërmjet tyre.

 

 

Parmbrëmë në Pejë u plagos një pjesëtar i TMK-së

 

Pejë, 20 shkurt - Parmbrëmë rreth orës 21:00, në rrethana të pasqaruara dhe nga persona, deri më tani, të panjohur, në afërsi të restoranit "Korona" në Pejë, derisa po hynte në makinën e tij, është plagosur kapterr Ramadan Elshani, pjesëtar i Brigadës 333 " Adrian Krasniqi" të Zonës së Tretë të TMK-së.

 

Me këtë rast, kapterr Elshani, është goditur nga dy plumba dhe menjeherë i është nënshtruar një operacioni kirurgjik në spitalin e Pejës. Gjendja e tij është e mirë dhe është jashtë rrezikut për jetë.

 

 

Muharrem Shabani jep dorëheqje nga të gjitha organet dhe nga anëtarësia e LDK-së

 

Vushtrri, 21 shkurt 2004 - Kryesia e degës së LDK-së në Vushtrri ka miratuar dorëheqjen e Muharrem Shabanit nga të gjitha organet dhe nga anëtarësia e LDK-së. Në një kumtesë të kësaj dege thuhet se Muharrem Shabani tash e tutje dëshiron të vazhdojë me punën profesionale në institcionet e drejtësisë.

Shabani dy ditë me parë i ishte drejtuar me shkrim Kryesisë së degës së LDK-së në Vushtrri ku njoftonte për dorëheqjen e tij nga të gjitha organet e LDK-së.

Të përkujtojmë se kohë më parë këshilltarët e Kuvendit komunal të Vushtrrisë e shkarkuan Muharrem Shabanin nga posti i kryetarit.

 

 

"Nisma për një Universitet Tjetërqysh" nuk merret me kërcënime

 

Prishtinë, 21 shkurt 2004 - Nisma "Për një Universitet Tjetërqysh" reagon ndaj një njoftimi për media të Unionit të Pavarur të Studentëve të Fakultetit Juridik, në të cilin thuhet se kinse nisma "Për një Universitet Tjetërqysh" qëndron prapa akuzave dhe letrave kërcënuese që u janë drejtuar profesorëve të Fakultetit Juridik.

Kjo nismë mohon një gjë e tillë kategorikisht ngase, siç dihet, kërcënime të tilla janë dërguar nga të shtuquajturat "Lëvizja 2004" dhe "Lëvizja për një rend të ri në Universitet".

"Ne aktivistët e nismës 'Për një Universitet Tjetërqysh' distancohemi nga letra të tilla kërcënuese, të cilat, konsiderojmë se bëhen me qëllim që të shkaktohet konfuzitet në opinion dhe në mesin e studentëve, dhe fakti që ato drejtohen në mënyrë anonime më së miri shfaq joseriozitetin dhe qëllimet meskine të atyre që i drejtojnë ato (kërcënimet)", thuhet në këtë reagim.

 

 

Gratë e senatorëve amerikanë nesër vizitojnë Kosovën

 

Prishtinë, 21 shkurt 2004 - Nesër në Prishtinë mbërrin një delegacion i grave të senatorëve të SHBA-ve, organizatorë të Lutjeve të Mëngjesit.

Në orën 11:00, në hotelin "Grand", delegacioni, të cilin e shoqëron Fatmir Mediu, kryetar i Partisë Republikane të Shqipërisë, do të ketë një takim me kryeparlamentarin, Nexhat Daci, kryeministrin, Bajram Rexhepi, bashkë me pjesëmarrësit e sivjetshëm kosovarë në Lutjet e Mengjesit: Flora Brovina, Alush Gashi dhe Bujar Dugolli, si dhe me deputetet Sanie Aliaj dhe Zylfie Hundozi.

Më pastaj delegacioni i grave të senatorëve amerikanë do të vizitojë Qendrën e Rehabilitimit të Nënës dhe Fëmijës.

 

 

Greqia i kërkon ndihmë NATO-s

 

Athinë, 21 shkurt 2004 - Në Greqi janë mbajtur bisedime të nivelit të lartë të sigurisë për të bërë plane në rast të një sulmi terrorist të mundshëm në Lojërat Olimpike të Athinës.

Qeveria greke po i kërkon NATO-s ndihmë ushtarake për të inkurajuar më tej operacionin e sigurisë që Greqia po organizon vetë ku janë të përfshirë dhjetra-mijëra policë dhe ushtarë.

Sekretari i përgjithshëm i NATO-s, Jaap De Hoop Scheffer që i ka premtuar ndihmë Greqisë, zhvilloi bisedime me kryeministrin grek, Kostas Simitis mbi masat që janë të nevojshme për mbrojtjen e Lojrave.
Ka njoftime se NATO mund të dislokojë avionë survejimi dhe forca të marinës gjatë zhvillimit të Lojërave Olimpike.

 

 

Opozita sot në protestë në Tiranë

 

Tiranë, 21 shkurt 2004 - Opozita në Tiranë organizon sot një demonstratë proteste që synon largimin nga posti të kryeministrit, Fatos Nano.

Organizatorët e demonstratës thonë se ajo do të jetë paqësore, kurse autoritetet kanë paralajmëruar se nuk do të tolerojnë aktet e dhunës nga ana e protestuesve.

Përfaqësues të faktorit ndërkombëtar në Tiranë, ditët e fundit janë angazhuar që të shmangin përsëritjen e akteve të dhunës që u shënuan në fund të protestës së dy javëve më parë.

Me këto zhvillime lidhen edhe disa vendime të qeverisë për uljen e tarifave të telefonave dhe faljen e borxheve për faturat e papaguara të energjisë për mijëra familje në të gjithë vendin.

 

 

Shqiptarët protestuan në rrugët e Shkupit kundër ndarjes territoriale

 

Shkup, 21 shkurt 2004 - Ndërsa Parlamenti i Maqedonisë debatonte lidhur me ndarjen territoriale të këtij vendi, në organizim të Partisë Demokratike Shqiptare, me mijëra qytetarë shqiptarë protestuan në rrugët e Shkupit lidhur me propozimin e ri të ndarjes territoriale.

 

Sipas pjesëmarrësve është e palejueshme që në qytetin e Shkupit të mos jetë asnjë komunë me shumicë shqiptare. Protestuesit kërkonin që në kuadër të qytetit të Shkupit të ekzistojë komuna e Kalasë me shumicë shqiptare.

PDSH mendon se zgjidhja më e mirë për decentralizimin e pushtetit është zvogëlimi i numrit të komunave nga 123 sa ka aktualisht në 29. PDSH nga protesta e porositi BDI-në që të përdorë veton lidhur me krijimin e komunave.

 

 

Presidenti maqedonas e ka dekretuar ligjin për themelimin e Universitetit të Tetovës

 

Shkup, 21 shkurt 2004 - Presidenti maqedonas Boris Trajkovski nënshkroi ligjin e miratuar nga Parlamenti maqedonas për themelimin e Universitetit shtetëror në Tetovë. Presidenti Trajkovski theksoi se ky institucion plotëson një drejtë themelore njerëzore dhe pret që ky institucion i ri të jetë në përputhje me standardet e larta evropiane në fushën e arsimit.

Ndërkaq, nëpërmjet një komunikate theksohet se kjo mund të arrihet nëse Universiteti i Tetovës ndjek një politikë të hapur ndaj studentëve të të gjitha grupeve etnike.

 

 

Departamenti amerikan i Shtetit e përshëndeti vendimin e Trajkovskit për nënshkrimin e ligjit për UT

 

Uashington, 21 shkurt 2004 - Departamenti amerikan i Shtetit e përshëndeti vendimin e presidentit Trajkovski dhe bëri thirrje që Universiteti i Tetovës të jetë gjithëpërfshirës për të mundësuar studimin e të gjithë qytetarëve të Maqedonisë.

 

 

Deputetët e pozitës dhe opozitës maqedonase vazhduan polemikat për ligjin për ndarjen territoriale

 

Shkup, 21 shkurt 2004 - Deputetët e pozitës dhe opozitës në Parlamentin e Maqedonisë edhe në seancën e djeshme vazhduan me polemika të ashpra për shqyrtimin e ligjit për ndarjen e re territoriale të vendit. Ndërkaq, partitë e pozitës premtojnë se në fazën e dytë do të merren parasysh vërejtjet dhe sygjerimet, opozita maqedonase vlerëson se me këtë ndarje territoriale në Maqedoni do të bëhet pastrim etnik!

Deputetët e Bashkimit Demokratik për Integrim dhe Lidhjes Socialdemokrate të Maqedonisë në diskutimet e tyre disa herë kanë ritheksuar se bëhet fjalë për fazën e parë të këtij ligji dhe se në fazën e dytë do të merren parasysh sygjerimet dhe vërejtjet.

 

 

Së shpejti amerikanët në Libi

 

Uashington, 21 shkurt 2004 - Njoftime nga Uashingtoni sugjerojnë se SHBA së shpejti mund të heqë embargon mbi shtetasit amerikanë për të shkuar në Libi. Sipas njoftimeve, embargo e vendosur në vitet '80 nga presidenti Regan, mund të hiqet nga fillimi i javës që vjen.

SHBA ka rivendosur ndërkohë praninë e saj diplomatike në Tripoli. Tani gjëra po shkojnë më tej. Heqja e embargos shihet si hapi i parë drejt lehtësimit të sanksioneve që SHBA ka vënë mbi Libinë.

Dhe për këtë ka arsye të mira. Një ngrohje e marrëdhënieve mund të lejojë kompanitë amerikane të naftës që u larguan kur Amerika vuri sanksione të ashpra, të kthehen në Libi.

 

 

Gjykatësi lejon martesat e homoseksualëve

 

San Francisko, 21 shkurt 2004 - Një gjykatës në San Francisko ka refuzuar të ndalojë martesat e seksit të njëjtë në këtë qytet. Kjo është hera e dytë që një lëvizjeje i mohohet e drejta për të ndaluar martesat e seksit të njëjtë.

Një grup i njohur si Fushata për Familjet Kaliforniane është përpjekur të bindë një gjykatës se nxjerrja e liçensave për çifte homoseksualësh ishte shpenzim i kotë i parave të taksapaguesve dhe do të shkaktonte dëme.

Por argumenti nuk u pranua. Çështja do të rikthehet në gjyq pas pesë javësh dhe ndërkohë autoritetet këtu kanë thënë se do të vazhdojnë të japin liçensa martesore për çifte homoseksualësh.

Më shumnë se 3 mijë çifte janë martuar këtu qëkur bashkia filloi të jepte liçensa, të enjten e kaluar. Kryetari i bashkisë, Gavin Newsom beson se ndalimi i martesave të të njëjtit seks është një formë diskriminimi.

 

 

Në Iran përfunduan zgjedhjet parlamentare

 

Teheran, 21 shkurt 2004 - Zyrtarët amerikanë kanë shprehur në mënyrë të përsëritur shqetësim rreth ndalimit të kandidatëve reformistë iranianë nga Këshilli Mbikqyrës konservator i vendit për të vënë kandidaturën në zgjedhje.

 

Duke cituar këto skualifikime dhe vendime të tjera kundër partive reformiste, zëdhënësi i departamentit të shtetit, Adam Ereli, tha se nuk ka nevojë të pritet rezultati i zgjedhjeve për të thënë që mundësitë e popullit iranian për të zgjedhur qeverinë e vet ishin kufizuar.

"Këto veprime nuk përbëjnë zgjedhje të lira e të drejta dhe nuk janë në përputhje me standartet ndërkombëtare".

 

 

Katër ushtarë amerikanë janë plagosur, një irakian është vrarë

 

Bagdad, 21 shkurt 2004 - Katër ushtarë amerikanë janë plagosur, ndërkaq përtkhyesi i tyre irakian është vrarë sot, kur një sulmues në pritë ka sulmuar kolonën e tyre në jug të Bagdadit, tha ushtria amerikane, njofton Rojter

"Katër ushtarë janë plagosur dhe përkthyesi i tyre është vrarë nga armët e vogla në një pritë 22 km nga Iskandaria. Dy makina civile janë shkatërruar në atë sulm", ka thënë zëdhënësi ushtarak amerikan.

 

 

Nga ethet vdesin 215 persona në Indonezi

 

Xhakarta, 21 shkurt 2004 - Nga ethet denga deri më tash në Indonezi kanë vdekur mbi 200 persona, ndërkaq 11 mijë janë infektuar, ka bërë të ditur sot Ministria e Shëndetësisë së këtij vendi.
"Që nga 21 janari deri më tash janë regjistruar 11.013 raste, ndërkaq nga pasojat e etheve denga kanë vdekur 215 persona", ka thënë zëdhënësja e Ministrisë së Shëndetësisë.

Ethet denga, të cilat e bartin një lloj i veçantë i mickojave Indonezinë e godasin çdo vit, duke filluar nga janari, kurse kulminacionin e arrin në maj ose qershor, kur fillojnë shirat tropikale. Por sivjet numri i të vedekurve është dyfish më i madh sesa një vit më parë.

 

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |