Në Rahovec u mbajt takimi i të rinjve të kësaj ane me Kryesinë e FR të LDK-së

“Rinia e Rahovecit e interesuar për rrjedhat politike në vend”

Rahovec, 20 shkurt 2004 / TN – Dje, Salla e Shtëpisë së Kulturës “Mensur Zyberaj” në Rahovec ishte e mbushur me të rinj dhe të reja të cilët kishin ardhur për të marr pjesë në debatin e organizuar nga dega e këtushme e FR të LDK-së, me Kryesinë Qëndrore të FR të LDK-së, të kryesuar nga Sejdë Tolaj, nënkryetar e në përbërje edhe të Avni Gashit, sekretar i përgjithshëm e Malsore Gashit e Ilir Fetahut, anëtar.

I pranishëm në këtë debat ishte edhe sekretari i degës së LDK-së, z.Fadil Sokoli. Këtë takim e hapi Muhamedali Hoti, kryetar i degës së FR-së, ndërsa më pas të pranishmit i përshëndeti nënkryetari i FR të LDK-së, Sejdë Tolaj, i cili ndër tjera tha se:

“Siç e dijmë të gjithë ne Presidenti dr.Ibrahim Rugova, me rastin e 14 vjetorit të themelimit të LDK-së, vitin 2004 e ka shpallur si vit të LDK-së, ngase sivjet LDK-ja mbush 15 vjet të themelimit të saj, 15 vjet të punës, angazhimit dhe sakrificave drejt realizimit të lirisë dhe pavarësisë së Kosovës.”.

Ne si FR i LDK-së, këtë vit e kemi cilësuar si vit i të rinjve dhe ky takim është në vazhdën e takimeve që ne po i realizojmë me të rinjët e të gjitha komunave të Kosovës, për të komunikuar drejtpërdrejt me ta në mënyrë që të njoftohemi për së afërmi me kërkesat dhe nevojat e të rinjve anemban Kosovës.

Më pastaj u kalua në komunikim të drejtpërdrejt ku nga të pranishmit u shtruan një varg pyetjesh në të cilat u përgjigjen musafirët nga Qendra.

Të rinjtë e pranishëm në sallë me pyetjet e tyre dëshmuan se janë shumë të interesuar për t’u njohur më për së afërmi me zhvillimet politike në vend, por edhe me aktivitetet e realizuara dhe projektet për të ardhmën si nga Kryesia Qëndrore ashtu edhe nga dega e Rahovecit e FR të LDK-së.

Pas përfundimit të debatit u shfaq një program artistik i grupeve vendore të të rinjve.