Shtimi i interesimit për librin dhe mëtimi për dalje nga kriza kulturore

Libri apo lexuesi në krizë...?!

Podujevë, 19 shkurt 2004 (TN) – Krahasuar me vitet paraprake, gjatë vitit të kaluar vërehet shtim i interesimit për librin sepse vetëm për dy muajt e parë të këtij viti numri i lexuesve është rritur për 27%, deklaroi sot drejtori i Drejtorisë për kulturë, rini e sport i komunës së Podujevës z. Nexhmi Balaj i cili pohoi se megjithate ekziston krizë e përgjithëshme kulturore.

“Në bazë të statistikave të vitit 2003, numri i lexuesve në bibliotekën e qytetit është rritur. Janë evidentuar mbi 1250 lexues të grupmoshave të ndryshme dhe gjithësej 11.250 libra të lexuara”, tha z. Balaj. Sipas tij, interesim të shtuar për librin po tregojnë nxënësit dhe studentët që kryesisht kërkojnë botime të reja të gjuhës shqipe, por po shtohet numri i atyre që po lexojnë edhe literaturën ekzistuese në gjuhën angleze që numëron gjithësej 4700 ekzemplarë.

Në bibliotekën e qytetit në Podujevë ka 17. 994 ekzemplarë librash të letërsisë për fëmijë dhe të rritur, trashëgimi kulturore, filozofi, art, etj. Drejtori Nexhmi Balaj njoftoi aktualisht funksionojnë edhe biblioteka e Lluzhani ku ka 4750 ekzemplarë librash, në Orllan 2800, në Llapashticë 1700 dhe në SHMT “Fan S. Noli” ka 2570 libra.

Nga librat më të kërkuar në Podujevë sipas të dhënave të DKRS janë botimet e Ismail Kadaresë, Sabri Hamitit dhe Bilall Xhaferit, mirëpo edhe perla të letërsisë botërore në gjuhën angleze të cilat vitin e kaluar i ka dhuruar Biblioteka Univerzitare e Mançesterit të Anglisë.

“Këtë vit biblioteka jonë është pasuruar me kompletin e Studimeve arkeologjike dhuratë nga Muzeu i Kosovës si dhe libra nga Biblioteka Universitare e Kosovës”, njoftoi z. Balaj. Ai tha se lexuesit kërkojnë botime të reja e sidomos ato botime të publikuara pas viteve të ’90-ta të cilat i mungojnë bibliotekës së qytetit në Podujevë. “Ne kemi problem edhe me ambientin e papështatshëm, mungesën e sallës për lexim dhe hapësirën e pamjaftueshme edhe pse kujdesi për librin është në nivelin më të lartë”, pohoi Balaj duke njoftuar se është kryer sistematizimi i librit sipas zhanreve.

Drejtori Nexhmi Balaj mendon se libri dhe vetë lexuesit llapjanë po mëtojnë të dalin nga kriza e cila ka kapluar kulturën përgjithësisht. Në lidhje me këtë ai deklaroi se aktualisht kultura po absorbohet nga interneti e që dallon esencialisht nga ajo që ofron libri “sepse më së paku bëhet fjalë për petkun e gjuhës dhe të kulturës shqiptare”, deklaroi Balaj.

“Institucioni ynë po vazhdon me përpjekjet e pandalshme për krijimin e vlerave të qëndrueshme të kulturës. Vitin e kaluar Qendra e Kulturës e Podujevës ka botuar dy libra të reja me çka numri i botimeve ka arritur në 14”, tha z. Balaj dhe njoftoi se po bëhen përgatitje që të hapet ekspozita e bibliotekës individuale të intelektualëve të komunës së Podujevës.