Dy lajme nga Podujeva

Dy lajme nga Podujeva

Podujevë: Qeveria e Tirolit të Austrisë vazhdon të ndihmojë fermerët e Orllanit

Podujevë, 20 shkurt 2004 (TN) – Menagjeri i info qendrës së Orllanit z. Agim Abdullahu njoftoi sot se në kuadër të ndihmës për bujqësinë dhe zhvillimin e kushteve për turizmin në rajonin e Liqenit të Batllavës, Qeveria e Tirolit të Austrisë solli për fermerët e Orllanit 20 pompa për mjelje me pajisje përkatëse.

“Vlera e këtyre donacioneve për 20 familjet që do të përfitojnë këto mjete arrinë në 6600 euro dhe se ato do tu jipen fermerëve që edhe më parë janë ndihmuar me nga 3 lopë të racës së mirë nga Austria”, tha Abdullahu.

Ai sqaroi se fermerët që përfitojnë këto mjete do të lidhin kontratë me Miniqumshtoren në Orllan për grumbullimin dhe shitjen e qumshtit në mënyrë të organizuar. Kohë më parë Qeveria e Tirolit të Austrisë ka ndihmuar fermerët e rajonit të fshatrave të Orllanit me lopë dhe pajisje për miniqumshtoren e cila ka kushtuar 30 mijë euro.

Sipas zyrtarit të kësaj Qeverie z. Peter Logar buxhetin e planifikuar për Info Qendrën Tiroli po e investon në ngritjen dhe përmirësimin e kushteve të bujqësisë dhe blegtorisë në kuadër të zhvillimit të rajonit turistik.

Fshatarët e Orllanit ndihmohen më drejtëpërdrejtë në këtë mënyrë, ka pohuar Peter Logar.


Podujevë: Komuniteti i fshatit Llapashticë ka grumbulluar mbi 70 mijë euro për asfaltimin e rrugës

Podujevë, 20 shkurt 2004 (TN) – Kryetari i Komitetit të fshatit Llapashticë e Epërme z. Ramadan Muçiqi njoftoi sot se komuniteti i këtij fshati ka grumbulluar deri më tash mbi 70 mijë euro për asfaltimin e rrugës së gjatë 5 km.

“Asfaltimi i rrugës Podujevë-Llapashticë mundëson lidhjen e fshatrave Katunishtë, Llapashticë e ulët, Popovë dhe 13 lagje të Llapashticës së Epërme me gjithësej 5200 banorë”, njoftoi z. Muçiqi. Ai deklaroi se aksionin për grumbullimin e mjeteve për asfaltimin e rrugës i cili ka filluar vitin e kaluar, u janë përgjegjur mbi 70% të familjeve nga 270 sa ka fshati Llapashticë.

Banorët e Llapashticës, sipas kryetarit të komunitetit pritet të vazhdojnë aksionin në mënyrë që të grumbullojnë mbi 100 mijë euro, mirëpo ata presin edhe ndihmën e komunës dhe të Ministrisë së Postelekomunikacionit meqë rruga që planifikohet të asfaltohet është rrugë regjionale që do të lehtësojë qarkullimin e njerëzve.

“Asfaltimi i kësaj rruge hyn në radhën e prioriteteve të identifikuara që ka zënë vend në Strategjinë e zhvillimit ekonomik lokal të komunës sonë”, pohoi Muçiqi i cili ndër prioritetet tjera të këtij fshati përmendi edhe instalimin e rrjetit të ujësjellësit në fshat e sidomos në shkollë si dhe ndërtimin e një objekti shkollor për ciklin e ultë që do tu shërbente fëmijëve të katër lagjeve të fshatit.