JAP DORËHEQJE TË PAREVOKUESHME NGA KRYESIA SI DHE DETYRA E SEKRETARIT TË PËRGJITHSHËM PRANË BISHM-it

OPINIONE

R. ELEZAJ: JAP DORËHEQJE TË PAREVOKUESHME NGA KRYESIA SI DHE DETYRA E SEKRETARIT TË PËRGJITHSHËM PRANË BISHM-it

19 shkurt 2004 / TN

Rexhep ELEZAJ

Duke e konsideruar ecurinë e tanishme të levizjës sonë kombëtare brenda Mërgatës shqiptare si të padefinuar në disa aspekte, posaçërisht duke i patur parasysh raportet e acaruara politike brenda saj, si dhe rrethanat mjaftë të vështirësuara për punë dhe veprimtari të mirëfilltë kombëtare dhe intelektuale, pastaj atmosferën e mosdurimit dhe të ndikimeve ideologjike dhe partiake që kanë mbretëruar gjatë dy viteve të fundit edhe në kryesinë e Bashkimit të Intelektualëve Shqiptarë në Mërgim (BISHM), poashtu me divergjencat dhe mospajtueshmëritë rreth shumë pikëpamjeve politike dhe jopolitike të cilat shpeshherë arrinin shkallën e konflikteve të ashpra, duke mos u pajtuar me nivelin dhe mënyrën e angazhimit të disa anëtarëve, mospajtimi me pikëpamjet dhe sjelljet të cilat, në një apo mënyrë tjetër e kanë stimuluar ose ndihmuar mendësinë e kufizimit të shprehjës së fjalës dhe mendimit të lirë të intelektualit rreth çështjeve kyçe siç është ajo e organizimit të mërgatës shqiptare mbi baza kombëtare e jo partiake, siç janë bindjet ose përcaktimet politike dhe fetare të intelektualit, kritikat joparimore kryesisht të bazuara mbi hamendje dhe interesa të ngushta personale, etj, japë dorëheqje të parevokueshme nga kryesia dhe detyra e sekretarit të përgjithshëm pranë këtij asociacioni.

I vetëdijshëm për rolin dhe kontributin e pamohueshëm që ka dhënë asociacioni i intelektualëve shqiptarë në Gjermani, brenda tij edhe për mundin e përbashkët që kemi dhënë së bashku me shumë shokë për të mirën e Kosovës dhe gjithë kombit shqiptar gjatë periudhës së kaluar dymbdhjetë vjeçare, aktin e dorëheqjes e konsideroj të imponuar edhe nga rrethanat e përgjithshme nëpër të cilat aktualisht po kalon Kosova dhe gjithë shqiptarët, i sigurtë se të gjitha dëshirat dhe anagzhimet e mia personale kanë qenë dhe do të mbesin të palëkundshme për jetësimin sa më të shpejtë të pavarësisë së Kosovës, për një liri të denjë njerëzore, për një sistem shoqëror të tipit më demokratik perëndimor në gjithë hapësirën shqiptare, ku askush nuk do të ndjehët i favorizuar ose i diskriminuar në çfardo aspekti dhe fome qoftë.

Prandaj, duke iu mbetur përjetësisht besnik parimeve tona kombëtare, politike si dhe vlerave të moralit dhe shpirtit të pastër shqiptar, me këtë rast daklaroj se nuk mund të pajtohem me ata të cilët në emër të ideologjive të ndryshme ose për interesave personale na e sugjerojnë tjetërsimin, qoftë nga traditat dhe historia jonë shekullore, qoftë për të ikur nga identiteti personal e familjar, që do të ishte në kundërshtim të plotë me idealet kombëtare të gjyshërve dhe stërgjyshërve tanë, në emër të cilave ideale dhanë jetën dhe u sakrifikuan me mijëra shqiptarë.

Rexhep Elezaj
Gjermani, 19. 02. 2004