Përmbajtja:

• Holkeri bisedoi në Tiranë me Moisiun dhe Nanon

• Kryeministri Rexhepi thotë se qeveria e tij beson në pafajësinë e katër oficerëve të TMK-së të arrestuar para dy ditësh

• Gjenerali amerikan Xheri Bek thotë se po largohet nga Kosova me mbresa të shkëlqyeshme

• Tiranë: Holkeri e Angjeli nënshkruan marrëveshjen për mbrojtjen reciproke të investimeve

• U mbajt seanca e rregullt e Kuvendit të Kosovës

• Një njeri i armatosur ka grabitur 20 euro dhe 5 mijë dollarë në Bashkësinë Islame të Kosovës

• Fatos Bytyçi nga Nju Jorku kërkon drejtësi në Beograd për vrasjen e tre vëllezërve të tij më 1999

• Policia këshillon qytetarët të mos investojnë në lojën piramidale "Bota e argëtimit"

• Abramovic: Perëndimi të mos ngrejë kërkesa të parealizueshme për Kosovën

• Në Palluzhë të Drenasit u bë zbulimi i pllakës përkujtimore të gazetarit Bekim Kastrati

• Forumi i Rinisë i LDK-së është organizata më e fuqishme dhe më masive e të rinjve në Kosovë

• Sipas zëdhënëses së UNMIK-ut, ekzistimi i strukturave paralele nuk është pengesë për dialogun Prishtinë-Beograd

• Trupat amerikane të KFOR-it dhe ato të TMK-së në Viti nënshkruan një marrëveshje për partneritet

• SHBA suprimojnë ndihmën për Serbin nëse qeveria e re zgjedhet me votat e socialistëve

• Misioni policor i BE-së hedh poshtë pohimet se në rrethinat e Tetovës dhe Gostivarit po stërviten grupe terroriste

• Amerikanët kanë vrarë një sulmues afër një burgu në Bagdad

• Shpërthim para shtëpisë së kryeministrit të turqve qipriotë

• Fillojnë bisedimet për ribashkimin

• Hauard Din tërhiqet nga garat presidenciale

• Shreder, Shirak e Bler nuk pranojnë kritikat

• Plagosen dy ushtarë amerikanë

• Arrin në 309 numri i viktimave të tragjedisë në Iran

• Janë vrarë dy ushtarë amerikanë dhe një irakian nga një shpërthim

• Amnesty International shpreh shqetësimin e saj për kushtet e të burgosurve në Shqipëri

• Në Iran - ditë zie pas viktimave të shumta

• Shtatë ekstremistë u arrestuan në qytetin e Bakubas

• OKB-ja mirëpret planin izraelit për tërheqjen e kolonëve nga Rripi i Gazës

Holkeri bisedoi në Tiranë me Moisiun dhe Nanon

 

Tiranë, 19 shkurt 2004 - Kryeadministratori i Kosovës Hari Holkeri mbrëmë në Tiranë ka takuar udhëheqësit më të lartë të Shqipërisë, presidentin Alfred Moisiu dhe kryeministrin Fatos Nano.

Pas takimit me Moisiun, Holkeri ka deklaruar se përfaqësuesit ndërkombëtarë po bëjnë të gjitha përpjekjet që qytetarët e Kosovës të aftësohen për të marrë në dorë drejtimin e vendit të tyre.

 

Ai tha se Rezoluta 1244 tregon qartë se është vullneti dhe vetëvendosja e popullit të Kosovës ajo që do ta zgjidhë fatin e tyre, por vendimi përfundimtar për statusin e Kosovës do të merret nga Këshilli i Sigurimit të OKB-së.

Ndërkaq, Presidenti i Shqipërisë Alfred Moisiu ka theksuar: "Ne jemi të bindur se zgjidhja e statusit përfundimtar të Kosovës do të ndihmojë ndjeshëm në rritjen e sigurisë dhe stabilitetit në rajon dhe më gjerë".

Moisiu tha se Shqipëria është e bindur se e ardhmja e Kosovës do të përcaktohet nga vetë qytetarët e saj me vullnetin e tyre të lirë dhe në mirëkuptim me faktorin ndërkombëtar. Ai shtoi se diskutimet me Holkerin kanë qenë të lidhura edhe me shkëmbimet tregtare dhe ekonomike ndërmjet Prishtinës dhe Tiranës.

 

Poashtu ai ka theksuar se Shqipëria e quan të domosdoshme që Kosova të përfshihet aktivisht në axhendën e bashkëpunimit rajonal, sidomos në procesin e integrimit të Ballkanit Perëndmor dhe në strukturat evroatlantike. Ai theksoi disa herë se e ardhmja e Kosovës është në familjen evropiane.

Z. Holkeri, pas takimit me presidentin Moisiu është takuar mbrëmë edhe me ambasadorin e OSBE-së në Tiranë Osmo Liponen, si dhe me kryeministrin Fatos Nano. Në qendër të këtyre bisedimeve në këto takime sipas informacionit zyrtar ka qenë siguria në Ballkan dhe përpjekjet që duhet bërë që Ballkanin ta bëjnë pjesë të Evropës. Ndërkaq gjatë ditës së sotme do të takohet me ministrin e jashtëm Kastriot Islami.

Në vazhdim të vizitës, pritet të nënshkruhet midis autoriteteve të Prishtinës dhe të Tiranës edhe një marrëveshje e re për mbrotjen e investimeve. Kjo është marrëveshja e dytë më e rëndësishme në marrëdhëniet ekonomike në të dy anët e kufirit.

 

 

Kryeministri Rexhepi thotë se qeveria e tij beson në pafajësinë e katër oficerëve të TMK-së të arrestuar para dy ditësh

 

Prishtinë, 19 shkurt 2004 - Kryeministri i Kosovës, Bajram Rexhepi është takuar dje me komandantin e TMK-së, gjeneralin Agim Çekun dhe bashkëpunëtorët e tij. Ai ka thënë me këtë rast se qeveria e tij beson në pafajësinë e katër oficerëve të TMK-së, të arrestuar në fillim të javës, nën dyshimin se kanë bërë krime lufte.

"Unë jam shumë i bindur në pafajësinë e tyre dhe shpresoj se me një trajtim fer e korrekt, do të dëshmohet se ata janë më tepër të akuzuar në bazë të spekulimeve ose thashethemeve dhe sa më shpejt të lirohen dhe t'u bashkangjiten TMK-së", ka thënë kryeministri Rexhepi.

 

Mirëpo, kjo deklaratë e tij nuk përputhet me atë që e ka shfaqur dy ditë më parë. Në të vërtetë deklaratën e cilësuar si tejet zbehtë të ekzekutivit të lëshuar menjëherë pas arrestimit të katër eprorëve ai e arsyetoi me mosmbledhjen e Qeverisë deri dje dhe me faktin se reagimet sado të ashpra qofshin nuk po bëjnë asnjë ndikim në këtë proces.

 

 

Gjenerali amerikan Xheri Bek thotë se po largohet nga Kosova me mbresa të shkëlqyeshme

 

Ferizaj, 19 shkurt 2004 - Komandanti i forcave amerikane të KFOR-it në Bondstill, gjenerali Xheri Bek, pak ditë para përfundimit të tij në Kosovë, veçoi sundimin e ligjit dhe ndërtimin e tolerancës ndëretnike si dy synimet më të rëndësishme që duhet të kenë kosovarët për ndërtimin e një ardhmërie të sigurtë.

 

Pas një takimi lamtumirës me kreun komunal të Ferizajt, gjenerali Bek tha se po largohet nga Kosova me mbresa të shkëlqyeshme, me kujtime të mira dhe duke lënë shumë miqë prapa. Ai nënvizoi se ka qenë një mision shumë i mirë dhe ka pasur shumë përparime jo vetëm këtu, por në gjithë Kosovën, u tha gazetarëve gjenerali amerikan.

 

 

Tiranë: Holkeri e Angjeli nënshkruan marrëveshjen për mbrojtjen reciproke të investimeve

 

Tiranë, 19 shkurt 2004 - Shefi i UNMIK-ut Hari Holkeri dhe ministri shqiptar i Ekonomisë Anastas Angjeli, nënshkruan sot në Tiranë Marrëveshjen për nxitjen dhe mbrojtjen e investimeve të huaja. Holkeri marrëveshjen e ka vlerësuar si rezultat i bashkëpunimit të shkëlqyeshëm mes Kosovës dhe Shqipërisë.

Në ditën e dytë dhe të fundit të vizitës në Tiranë, Holkeri pas takimit me ministrin e Jashtëm Kastriot Islami tha se dialogu mes Prishtinës dhe Beogradit do të zhvillohet vetëm ndërmjet përfaqësuesve të tyre. Ai gjithashtu ka theksuar si lajm shumë të rëndësishëm nga Kosova, faktin se serbët kanë pranuar të përfshihen në grupet punuese.

Ministri Islami i dha mbështetje të plotë dhe të pandërprerë të Shqipërisë për UNMIK-un, Qeverinë e Kosovës dhe forcimin e institucioneve demokratike në Kosovë.

Holkeri dhe ministri Islami, biseduan për zhvillimin e mëtejshëm të marrëdhënieve mes Tiranës dhe Prishtinës.

Holkeri theksoi se Shqipëria dhe UNMIK-u, kanë dhe angazhohen të kenë edhe më tej një bashkëpunim të frytshëm në të gjithë lëmenjtë dhe veçmas në luftën kundër krimit të organizuar.

 

 

U mbajt seanca e rregullt e Kuvendit të Kosovës

 

Prishtinë, 19 shkurt 2004 - Kuvendi i Kosovës sot i zhvilloi punimet në seancë plenare, duke proceduar sipas rendit të ditës, të miratuar më parë nga kryesia e Kuvendit.

 

Fillimisht shefat e grupeve parlamentare diskutuan për çështje procedurale, ndërkaq Arsim Bajrami, shef i Grupit parlamentar të PDK-së, kundërshtoi edhe sot ndërrimin e radhitjes së vendeve të deputetëve në sallën e Parlamentit dhe kërkoi nga kryesia e tij zgjidhjen e këtij problemi. Koalicioni serb "Kthimi" bojkotoi mbledhjen e sotme.

Ndryshe, deputetët sot miratuan Ligjin për barazi ligjore dhe në parim Projektligjin për transportin e mallrave të rrezikshme. Është shtyrë për mbledhjet e ardhshme diskutimi i Projektligjit për Odën ekonomike dhe Projektligji për materialin fidanor.

Prezentimin e Projekligjit për transporrtin e mallrave të rrezikshme e bëri ministri, Zef Morina, i cili tha se ky projektligj është përgjigje ndaj nevojave për një ligj modern dhe gjithpërfshirës në sektorin e transportit të mallrave të rrezikshme. Morina tha se ligji sqaron përgjegjësitë në këtë fushë dhe promovon zhvillimin e këtij sektori përmes kornizës ligjore.

Kuvendi me shumicë votash, pas shqyrtimit nen për nen, ka miratuar edhe Ligjin për barazi gjinore i cli mëton të promovojë të drejta të brabarta, pa marrë parasysh gjininë e qytetarit.

Kuvendi, ndërkaq, ka shtyrë për seancat e radhës shqyrtimin e Projketligjit për Odën ekonomike dhe atë Projektligjin për materialin fidanor.

 

 

Një njeri i armatosur ka grabitur 20 euro dhe 5 mijë dollarë në Bashkësinë Islame të Kosovës

 

Prishtinë, 19 shkurt 2004 - Në një njoftim të policisë së UNMIK-t thuhet se gjatë natës së 17 shkurtit një njeri i armatosur ka hyrë në zyrën e Bashkësisë Islame të Kosovës, ka lidhur rojen e sigurimit të objektit dhe ka grabtur 20 mijë euro dhe 5 mijë dollarë amerikanë. Sipas policisë nuk ka pasur të lënduar.

 

 

Fatos Bytyçi nga Nju Jorku kërkon drejtësi në Beograd për vrasjen e tre vëllezërve të tij më 1999

 

Beograd, 19 shkurt 2004 - Fatos Bytyçi, vëlla i Ilir, Agron dhe Mehmet Bytyçit, të vrarë në Petrovo Sello në Serbi në vitin 1999, ka shkuar në Beograd për të biseduar me prokurorin special për krime lufte Vladimir Vukçeviq. Fatosi kishte ardhur nga Nju Jorku për të kërkuar drejtësi dhe përfundimisht të mësojë se kush i ka vrarë vëllezërit e tij dhe vrasësit e tyre të nxirren para drejtësisë.

 

Ministri serb i policisë Dushan Mihajlloviq ka deklaruar më herët se i di kush janë vrasësit e vëllezërve Bytyçi. Fatosi thotë se urdhërin për vrasjen e vëllezërve të tij e ka dhënë Goran Radosavleviq - Guri, komandant aktual i xhandarmërisë së Serbisë.

Ilir, Agron dhe Mehmet Bytyçi, me preardhje nga Przireni, shtetas amerikanë, ishin nxjerrë nga burgu i Prokuples më 8 korrik të vitit 1999, ku ishin duke vuajtur dënimin prej 11 ditësh për qëndrim ilegal në Serbi.

 

Ata ishin dërguar më bazën e njësive speciale antiterroriste dhe pas dy ditësh ishin ekzekutuar, pastaj ishin varrosur në një varrezë masive, në të cilën ndodheshin edhe shumë shqiptarë nga Kosova.
Vëllezërit Bytyçi ishin arrestuar në Serbi pasi kishin dërguar atje një familje rome nga Prizreni, shkruan në një reportazh gazeta "Danas" e Beogradit.

 

 

Policia këshillon qytetarët të mos investojnë në lojën piramidale "Bota e argëtimit"

 

Gjilan, 19 shkurt 2004 - Sipas policisë, nëpër qytetet e Kosovës po bredhin individë të ndryshëm, të cilët po i inkurajojnë qytetarët për të investuar në lojërat e fatit. Duke e parë rrezikun që përmbajnë lojërat e këtilla, të cilat më shumë u përngjajnë skemave piramidale, policia e Gjilanit i këshillon qytetarët që të mos e provojnë fatin në biznese të këtilla të ndyta, sepse do të jenë humbës.

Sipas policisë, lojërat e këtilla janë të përhapura mjaft në Evropë, ndërsa Shqipëria është rasti më i freskët, ku shumë njerëz u mashtruan dhe i humbën paratë e tyre. Dikush po provon tash që kjo t`i ndodhë edhe Kosovës.

Qytetarët duhet ta kenë të qartë se nga paratë e tyre mund të kenë përfitime vetëm organizuesit e këtyre lojërave, ata që në plan të parë duket se ju mirëpresin dhe ju ofrojnë një rast të mirë për të fituar shpejt.

Për të hyrë në garë, juve do t`iu kërkohen 1.000 euro, ndërsa duhet të aderoni anëtarë të rinj në lojë, në mënyrë që t`i fitoni nga 500 euro prej secilit dhe kjo, në dukej të pare, do t`iu mashtrojë se mund të bëheni një përfitues i madh.

Në të vërtetë, këta njerëz do të zhduken pasi që t`i kenë mbledhur paratë tuaja. Policia rikujton rastin me Shqipërinë si shembullin më të keq të këtyre lojërave dhe kërkon prej qytetarëve që të mos krijojnë hapësirë që kjo të ndodhë edhe në Kosovë.

Parulla e këtyre lojërave "me ne fitojnë të gjithë" në të vërtetë duhet të kuptohet si "me ne të gjithë humbin". Policia thotë se ka informacione që në Kosovë po operon një kompani që quhet "Fun World" ose "Bota e argëtimit", e cila në fakt provon t`I mashtrojë njerëzit.

 

 

Abramovic: Perëndimi të mos ngrejë kërkesa të parealizueshme për Kosovën

 

Uashington, 19 shkurt 2004 - Ambasadori Morton Abramovic tha se parapëlqen që në Kosovë të ekzistojë një qeveri me kompetenca të plota, të largohej UNMIK-u dhe të krijohej një qeveri e vërtetë dhe e efektshme. "Por komuniteti ndërkombëtar ka vendosur të ndjekë një rrugë tjetër dhe Kosova nuk ka alternativë tjetër, veç zbatimit të saj", thotë Abramovic në një intervistë dhënë "Zërit të Amerikës".

Duke folur për standardet, ai tha se gjatë këtij viti, duhet bërë përparim për gjithë standardet sidomos në garantimin e sigurisë për pakicat, nxitjen e kthimit të të zhvendosurve, krijimin e të drejtave civile për të gjithë. "Por nga ana tjetër është e rëndësishme që Perëndimi të mos ngrejë kërkesa të parealizueshme", tha Abramovic, duke shtuar se disa prej tyre, janë të pakuptueshme, e aq më tepër kur kërkohet realizimi i tyre brenda një viti.

"Standartet duhen parë në një mënyrë shumë praktike. Ka shumë reforma që duhen bërë. Por në 2005 nuk duhet kërkuar një shoqëri të përkryer, një shoqëri që nuk ekziston sot në asnjë vend të Ballkanit. Megjithatë, standartet janë një gjë e rëndësishme që duhet të bëjë populli i Kosovës. Ato do të ndihmojnë për të krijuar një vend të mirë dhe banorëve të Kosovës u duhet të punojnë shumë për t'i realizuar", tha Abramovic.

"Unë kam shprehur edhe më parë shqetësim se politika e standarteve para statusit, ishte një përpjekje për ta shtyrë zgjidhjen e çështjes së Kosovës, me shpresë se do të gjendej një formë që Serbia dhe Kosova të gjenin një gjuhë të përbashkët. Për mendimin tim, fuqitë e mëdha, ende nuk e kanë as vetë të qartë dhe nuk e kanë menduar se çfarë procesi do të ndjekin, pasi të japin vlerësimin se standartet janë plotësuar", tha ames tjerash në këtë intervistë Morton Abramovic.

 

 

Në Palluzhë të Drenasit u bë zbulimi i pllakës përkujtimore të gazetarit Bekim Kastrati

 

Drenas, 19 shkurt 2004 - Në 33-vjetorin e lindjes dhe dyvjetorin e vrasjes së gazetarit të ish-ushtarit të UÇK-së Bekim Kastrati në fshatin Polluzhë të Drenasit u bë zbulimi i pllakës përkujtimore.

 

Në këtë ceremonial morën pjesë familjarë, përfaqësues të gazetës "Bota sot", gazetar i së cilës ishte Bekim Kastrati, pastaj përfaqësues të degëve të LDK-së nga Drenasi, Skënderaj, Klina, Malisheva dhe qytetarë të shumtë.

Për veprimtarinë luftarake dhe gazetareske të Bekim Kastratit foli Mehdi Syla nënkryetar i LDK-së në Drenas, ndërkaq në emër të gazetës "Bota sot" foli Bajrush Morina, redaktor përgjegjës.

 

Ai e çmoi lart kontributin e gazetarit Kastrati në gazetën ku ai punoi dhe kërkoi që vrasësit e tij gazetarë dhe veprimtarëve të tjerë të zbulohen sa më parë nga hetuesia. Në emër të Partisë Nacionaldemokratike të Kosovës foli Hajriz Demaku.

Në fund u bë zbulimi i pllakës përkujtimore të gazetarit Bekim Kastrati e ngritur nga familja, si dhe u vunë kurora lulesh.

 

 

Forumi i Rinisë i LDK-së është organizata më e fuqishme dhe më masive e të rinjve në Kosovë

 

Hani i Elezit, 19 shkurt 2004 - Në Han të Elezit u zhvillua një debat i FR të këtushëm të LDK-së, me Kryesinë qendrore të FR të LDK-së. Këtë takim e hapi Arta Laqi, anëtare e kryesisë së degës së FR-së, ndërsa më pas të pranishmit i përshëndetën edhe Ziber Xhoni, kryetar i degës së FR-së, dhe Zylbehar Hasallari, kryetar i degës së LDK-së në Han të Elezit.

 

Më pas të pranishmëve iu drejtua nënkryetari i FR të LDK-së, Sejdë Tolaj, i cili tha se debati i sotëm është i një rëndësie të veçantë ngase po zhvillohet në kuadër të Vitit të LDK-së të proklamuar nga presidenti i Kosovës Ibrahim Rugova, në ceremoninë e shënimit të 14-vjetorit të LDK-së. Në këtë takim u tha se Forumi i Rinisë i LDK-së është organizata më e fuqishme dhe më masive e të rinjve në Kosovë.

"Ne si FR i LDK-së, këtë vit e kemi cilësuar si vit i të rinjve dhe ky takim është në vazhdën e takimeve që ne po i realizojmë me të rinjtë e të gjitha komunave të Kosovës, për të komunikuar drejtpërdrejt me ta në mënyrë që të njoftohemi për së afërmi me kërkesat dhe nevojat e të rinjve anemban Kosovës", u tha anë fillim të debatit.

 

Më pastaj u kalua në komunikim të drejtpërdrejt ku nga të pranishmit u shtruan një varg pyetjesh në të cilat u përgjigjën Sejdë Tolaj, Avni Gashi dhe Ilir Fetahu.

 

Duke u përgjigjur në një pyetje Tolaj, ndër tjera tha: "Forumi i Rinisë i LDK-së tani po hyn në vitin e 15-të të veprimtarisë së vet të suksesshme dhe si rezultat i kësaj është edhe anëtarësimi i saj në organizatat e rëndësishme ndërkombëtare të të rinjve siç janë 'Demokratët e rinj të botës', 'Konservatorët e rinj të Evropës' si dhe 'Të rinjtë e partive popullore të Evropës".

 

 

Sipas zëdhënëses së UNMIK-ut, ekzistimi i strukturave paralele nuk është pengesë për dialogun Prishtinë-Beograd

 

Prishtinë, 19 shkurt 2004 - Ekzistimi i strukturave paralele në Kosovë, sipas zëdhënëses së UNMIK-ut, Izabela Karlovic nuk paraqet pengesë për vazhdimin e dialogut ndërmjet Prishtinës dhe Beogradit. Ajo shtoi se nuk ekzistojnë kushte ose parakushte për vazhdimin e dialogut. Sipas saj, dialogu është i natyrës teknike, pra aty do të bisedohet vetëm për çështje teknike e jo për çështje politike.

 

Pra për këto bisedime ekzistimi i enklavave serbe nuk paraqet problem. Karlovic po ashtu ka thënë se kjo çështje është diskutuar në KS të OKB-së dhe vetë Sekretari i Përgjithshëm Kofi Anan ia ka tërhequr vërejtjen Beogradit për ndalimin e burimeve që bëjnë finacimin e tyre. Karloviq nuk pati përgjigje edhe lidhur me zhbllokimin e procesit të privatizimit.

Ndërkaq, zëdhënësi i Shtyllës së katërt të UNMIK-ut, Kris Pjer Litie, tha se procesi i privatizimit është duke vazhduar. Ai shtoi se ky proces nuk është i ndërprerë, por janë duke u bërë disa avancime në politikën operacionale të tij dhe korrigjimi i disa gabimeve të lëshuara në fillim të këtij procesi.

 

 

Trupat amerikane të KFOR-it dhe ato të TMK-së në Viti nënshkruan një marrëveshje për partneritet

 

Viti, 19 shkurt 2004 - Trupat amerikane të KFOR-it dhe ato të TMK-së në Viti nënshkruan një marrëveshje për partneritet, sipas të cilës ato zotohen në rindërtimin e Kosovës.

 

Këtë marrëveshje e nënshkruan komandanti i Batalionit II - 135 të KFOR-it, nënkoloneli Pol Cimerman dhe komandanti i Brigadës 263 i TMK-së, majori Ahmet Vishi. Në bazë të kësaj marrëveshjeje këto dy njësite ushtarake do të jenë partnere në rindërtimin e Kosovës, thotë nënkoloneli Pol Cimerman.

 

 

SHBA suprimojnë ndihmën për Serbin nëse qeveria e re zgjedhet me votat e socialistëve

 

Beograd, 19 shkurt 2004 - SHBA nuk do t'ia suprimojnë ndihmën Serbisë menjëherë, nëse qeveria e re do të zgjedhet me votat e deputetëve të socialistëve, ka thënë amasadori amerikan në Beograd, Uiliam Montgomeri.

 

"Mendoj që asnjë organizatë ose shtet nuk do t'ia suprimonte ndihmën menjëherë Serbisë për shkak të përkrahjes së socialistëve. Mirëpo, çështje është se çfarë vendimesh do të mund të marrë ajo qeveri, dhe këto vendime ose mungesa e vendimeve do ta caktojë nivelin e ndihmës së ardhshme", ka thënë Montgomeri.

 

Testi i parë për qeverinë e re do të jetë më 31 mars, kur sekretari amerikan i Shtetit duhet ta konfirmojë se pushteti në Beograd e mbështet Marrëveshjen e Dejtonit, se janë duke u respektuar të drejtat e njeriut dhe që po bashkëpunon me Gjykatën e Hagës. Si një nga kushtet, gjatë këtij viti po përmendet edhe ekstradimi i Ratko Mladiqit.

 

 

Misioni policor i BE-së hedh poshtë pohimet se në rrethinat e Tetovës dhe Gostivarit po stërviten grupe terroriste

 

Shkup, 19 shkurt 2004 - Misioni policor i Bashkimit Evropian në Shkup hedh poshtë pohimet e drejtuesit të partisë më të madhe të opozitës maqedonase VMRO-DPMN, Nikolla Gruevski se në rrethinat e Tetovës dhe Gostivarit po stërviten grupe të reja terroriste.

 

Misioni "Proksima" njohurinë e tij mbi gjendjen e sigurisë në terren lidhur me këtë rast konkret e mbështet në të dhënat e Ministrisë së Punëve të Brendshme të Maqedonisë. Kështu tha zëdhënësja Shina Tompson e BE-së dhe e Misionit policor "Proksima" në një takim me gazetarë.

Deklaratat e Gruevskit i përgënjeshtruan edhe liderët e partive politike shqiptare dhe të LSDM-së në pushtet.

 

 

Amerikanët kanë vrarë një sulmues afër një burgu në Bagdad

 

Bagdad, 19 shkurt 2004 - Guerilët kanë shkrepur mbrëmë me dhjetra mortaja dhe raketa mbi një burg amerikan në Bagdad, por trupat amerikane en atë rast kanë vrarë një irakian, kanë thënë sot zyrtarët ushtarakë amerikanë, njofton Rojter.

Sulmuesit kanë shkrepur 33 mortaja dhe pesë raketa mbi burgun Abu Garib, ku amerikanë mbajnë me qindra irakianë të arrestuar. Forcat e koalicionit kanë vrarë një armik kur ai përpiqej të ikte nga vendi i ngjarjes. Forcat amerikanë kanë arrestuar me atë rats edhe 55 të tjerë.

 

 

Shpërthim para shtëpisë së kryeministrit të turqve qipriotë

 

Nikozi, 19 shkurt 2004 - Para shtëpisë së kryeministrit të turqve qipriotë Mehmet Ali Talat ka shpërthuyer sot në mëngjes një bombë, vetëm disa orë para fillmit të bisedimeve të liderëve të bashkësisë greke dhe turke në Nikozi për ribashkimin e ishullit.

Në këtë shpërthim nuk ka pasur të lënduar, ndërkaq Talat menjeherë pas incidentit ka bërë të ditur se bisedimet për ribashkimin e Qipros do të mahen.

 

 

Fillojnë bisedimet për ribashkimin

 

Nikozi, 19 shkurt 2004 - Presidenti greko-qipriot, Tassos Papadopolous dhe udhëheqësi turko-qipriot, Rauf Denktash, fillojnë sot në Nikozia një raund të ri bisedimesh.

Këto bisedime sponsorizohen nga Kombet e Bashkuara dhe synojnë ribashkimin e ishullit pas 30 vjetëve ndarje.

Ata kanë rënë dakord të negociojnë deri nga fundi i marsit.

Pas kësaj kohe, sekretari i përgjithshëm i OKB-së, Kofi Annan, do të vendosë për çështje për të cilat dy palët nuk pajtohen.

Në rastin e arritjes së marrëveshjes, për të do të votohet në referendume të veçanta në të dy pjesët e ishullit.

 

 

Hauard Din tërhiqet nga garat presidenciale

 

Uashington, 19 shkurt 2004 - Gara për kandidatin për president nga radhët e demokratëve në Amerikë ka hyrë në fazën finale me tërheqjen e ish-guvernatorit të Vermontit, Hauard Din. Senatori Xhon Keri është ende kryesues, por sfiduesi i tij më serioz që ka mbetur, senatori Xhon Eduards, nuk po i humb shpresat për një fitore të mundshme.

Demokratët që deri tani kanë votuar për Kerin e kanë justifikuar këtë me aftësinë që ata mendojnë se ka ai për të mundur George Bushin.

 

 

Shreder, Shirak e Bler nuk pranojnë kritikat

 

Berlin, 19 shkurt 2004 - Udhëheqësit e Gjermanisë, Francës dhe Britanisë kanë paraqitur një varg propozimesh që synojnë reformimin e Bashkimit Evropian dhe të ekonomive të vendeve anëtare të tij.

Mirëpo, ata kanë hedhur poshtë kritikat se janë përpjekur të diktojnë mënyrën se si duhet të zhvillohet BE-ja.

Shumë vende anëtare të BE-së kanë shprehur shqetësimin e tyre rreth takimit që u mbajt në Berlin, duke thënë se tre vendet në fjalë, po i përjashtojnë ato nga marrja e vendimeve thelbësore për të ardhmen e Bashkimit Evropian.

Kancelari gjerman, Gerhard Shrëder, presidenti francez, Zhak Shirak, dhe kryeministri britanik, Toni Bler, bënë thirrje për reforma të thella në politikat ekonomike dhe sociale për t'i bërë më konkuruese vendet e BE-së.

Ata po ashtu duan të krijojnë edhe një post të ri komisioneri evropian për çështjet ekonomike.

 

 

Plagosen dy ushtarë amerikanë

 

Falluxha, 19 shkurt 2004 - Një kolonë ushtarake amerikane është sulmuar nga guerilët në Irakun Perëndimor me mortaja dhe me atë rast janë plagosur dy ushtarë amerikanë.

Sulmi është kryer në rrugën ndërmjet Falluxhës dhe Ramadisë, në të cilën sulmet e tilla ndaj ushtarëve amerikanë janë të shpeshta.

 

 

Arrin në 309 numri i viktimave të tragjedisë në Iran

 

Teheran, 19 shkurt 2004 - Numri i viktimave në Iran nga shpërthimi i dhjetra vagonave të trenit me kemikalje ka arritur në 309. Ky është konfirmimi i fundit i kësaj tragjedie që ndodhi të mërkurën, duke shkatërruar edhe disa fshatra, njofton AP, duke cituar guvenatorin e krahinës.

 

Ndërkaq numri i të lënduarve ka arritur në 450, gjysma e të cilëve janë shtrirë në spital. Ndërkohë presidenti iranian Mohamed Khatami ka urdhëruar hetimet lidhur më këtë tagjedi me përmasa katastrofe.

 

 

Janë vrarë dy ushtarë amerikanë dhe një irakian nga një shpërthim

 

Bagdad, 19 shkurt 2004 - Nga shpërthimi i një bombe janë vrarë dy ushtarë amerikanë dhe një irakian në qytetin Khalidija, thotë ushtria, njofton Rojter.

"Dy ushtarë janë vrarë dhe një është plagosur sot paradite nga shpërthimi i një bombe skaj rrugës afër Khalidisë", tha një zëdhënës ushtarak në Irak. "Të paktën një irakian poashtu është vrarë". Ai nuk ka saktësuar nëse bëhet fjalë për civil irakian.

 

 

Amnesty International shpreh shqetësimin e saj për kushtet e të burgosurve në Shqipëri

 

Londër, 19 shkurt 2004 - Organizata për mbrojtjen e të drejtave të njeriut, Amnesty International ka shprehur shqetësimin e saj për kushtet e të arrestuarve që mbahen në rajonet e policisë në Shqipëri.

 

Ajo thotë se nga vizitat e saj në 4 rajone policie vuri re se këto vende janë të mbi ngarkuara me të burgosur dhe në kushte të këqia higjeno-sanitare. Ky grup citon një të burgosur, i cili tha se kushtet në rajonin e policisë ku ai mbahej i përngjanin kopshtit zoologjik.

Amnesty International i ka bërë thirrje Shqipërisë të ndërtojë qendra të tjera për të arrestuarit, duke krijuar më shumë hapësirë në burgjet dhe rajonet e policisë, si dhe të rikonstruktojë ndërtesat ekzistuese për të plotësuar standardet minimale.

Amnesty International u ka bërë gjithashtu thirrje autoriteteve shqiptare që të respektojë të drejtat bazë të njeriut për të burgosurit në bazë të ligjit ndërkombëtar, ndërkohë që ata mbahen në izolim.

 

 

Në Iran - ditë zie pas viktimave të shumta

 

Teheran, 19 shkurt 2004 - Pas shpërthimit të djeshëm të një treni në verilindje të Iranit, ku humbën jetën rreth 300 vetë, ekziston frika se në zonën e aksidentit mund të ketë shpërthime të tjera.

Forcat qeveritare kanë izoluar zonën për të shmangur aksidentet e ndryshme në rast të shpërthimit të mundshëm të disa vagonave të trenit me karburant që nuk janë prekur nga shpërthimi i së mërkurës.

Shumica e viktimave të shpërthimit ishin zjarrfikës dhe fshatarë që u ishin mbledhur në skenën a aksidentit kur disa vagona shpërthyen papritmas. Katastrofa filloi kur disa vagona u shkëputën nga treni dhe dolën jashtë shinave.

Për viktimat e aksidentit është shpallur ditë zie dhe është ngritur një komision ministror për hetimin e rastit.

 

 

Shtatë ekstremistë u arrestuan në qytetin e Bakubas

 

Bagdad, 19 shkurt 2004 - Një zëdhënës i ushtrisë amerikane në Bagdad tha se 7 ekstremistët u arrestuan në qytetin e Bakubas, 60 kilometra në veri të kryeqytetit. Ata u arrestuan nga divizioni i 4 i ushtrisë amerikane së bashku me 15 persona të tjerë gjatë një sulmi kundër asaj që u përshkrua si një celulë kundër koalicionit.

Bakuba është qëndra e të ashtuquajturit Trekëndëshi Suni, ku sulmet kundër ushtarëve amerikanë janë bërë thuajse diçka e përditshme. Policia irakiane tha se ky grup dyshohej se kishte gisht në një numër sulmesh të kohëve të fundit në atë zonë.

 

 

OKB-ja mirëpret planin izraelit për tërheqjen e kolonëve nga Rripi i Gazës

 

Gaza, 19 shkurt 2004 - I dërguari i Kombeve të Bashkuara për Lindjen e Mesme mirëpriti planin e kryeministrit izraelit Ariel Sharon për tërheqjen e kolonëve nga Rripi i Gazës.

Terje Roed-Larsen tha se tërheqja mund të ripërtërijë bisedimet e ngecura të paqes. Megjithatë, ai paralajmëroi që një tërheqje e tillë duhet të bëhet me bashkëpunimin e palestinezëve dhe të komunitetit ndërkombëtar.

Ambasadori amerikan në Kombet e Bashkuara, Xhon Negroponte, tha se ndërsa është vështirë të kritikohet çdo lloj tërheqjeje, Uashingtoni ende mendon që plani i paqes i mbështetur nga komuniteti ndërkombëtar është mënyra më e mirë për arritjen e paqes së qëndrueshme në Lindjen e Mesme.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |