Në Han të Elezit u mbajt takimi i të rinjve të kësaj ane me Kryesinë e FR të LDK-së

“Forumi i Rinisë i LDK-së është organizata më e fuqishme dhe më masive e të rinjve në Kosovë”

Hani i Elezit, 19 shkurt 2004 / TN - Dje, Salla e Shtëpisë së Kulturës në Han të Elezit ishte e mbushur përplot me të rinj dhe të reja të cilët kishin ardhur për të marr pjesë në debatin e organizuar nga dega e këtushme e FR të LDK-së, me kryesinë qëndrore të FR të LDK-së.

Këtë takim e hapi Arta Laqi, anëtare e kryesisë së degës së FR-së, ndërsa më pas të pranishmit i përshëndetën edhe Ziber Xhoni, kryetar i degës së FR-së, dhe Zylbehar Hasallari, kryetar i degës së LDK-së në Han të Elezit.

Më pas të pranishmëve iu drejtua nënkryetari i FR të LDK-së, z.Sejdë Tolaj, i cili tha se debati i sotëm është i një rëndësie të veçant ngase po zhvillohet në kuadër të Vitit të LDK-së të proklamuar nga presidenti i Kosovës dr.Ibrahim Rugova, në ceremoninë e shënimit të 14 vjetorit të LDK-së.

Ne si FR i LDK-së, këtë vit e kemi cilësuar si vit i të rinjve dhe ky takim është në vazhdën e takimeve që ne po i realizojmë me të rinjët e të gjitha komunave të Kosovës, për të komunikuar drejtpërdrejt me ta në mënyrë që të njoftohemi për së afërmi me kërkesat dhe nevojat e të rinjve anemban Kosovës.

Më pastaj u kalua në komunikim të drejtpërdrejt ku nga të pranishmit u shtruan një varg pyetjesh në të cilat u përgjigjen z.Sejdë Tolaj, Avni Gashi dhe Ilir Fetahu.

Duke u përgjigjur në një pyetje z.Tolaj, ndër tjera tha:” Forumi i Rinisë i LDK-së tani po hyn në vitin e 15 të veprimtarisë së vet të suksesshme dhe si rezultat i kësaj është edhe anëtarsimi i saj në organizatat e rëndsishme ndërkombëtare të të rinjve siç janë: “Demokratët e rinj të botës”, “Konzervatorët e rinj të Evropës si dhe “Të rinjtë e partive popullore të Evropës”. Pas përfundimit të debatit z. Tolaj ishte mysafir i një emisioni të drejpërdrejt i radios lokale “Sharri”.