Kronikë nga Podujeva

Kronikë nga Podujeva

Podujevë: Qeveria komunale diskutoi për progaramin e punës për 2004 dhe sistematizimin e vendeve të punës në shërbimin civil

Podujevë, 19 shkurt 2004 (TN) – Qeveria komunale e Podujevës sot mbajti takimin nën udhëheqjen e u.d të Kryeshefit të ekzkeutivit Mehmet Gashi e ku mori pjesë edhe kryetari i komunës Agim Veliu.

Në këtë takim Këshilli i Drejtorëve ngriti Shtabin komunal në përbërje prej pesë anëtarësh i cili do të merret me përgatitjen e kushteve dhe bashkërendimin e veprimeve për aerofotografimin. U.d i Kryeshefit ekzekutiv Mehemt Gashi kërkoi nga drejtorët e drejtorive që të përgatisin raportet e punës për vitin 2003 si dhe programin për vitin vijues, kurse u diskutua gjithashtu edhe për procesin e sistematizimit e vendeve të punës në shërbimin civil të komunës.

Në këtë kuadër në mbledhjen e Qeverisë komunale u kërkua që procesi i sistematizimit të afatizohet dhe të merren për bazë nevojat reale për funksionimin më efikas të administratës komunale.

Kryetari i komunës së Podujevës z. Agim Veliu kërkoi nga Këshilli i drejtorëve ushtrimin e plotë të përgjegjësive dhe kompetencave me qëllim të ngritjes së efikasitetit të shërbimeve në shërbimin civil.


Kryetarët e Komiteteve të fshatrave të komunës së Podujevës u njoftuan me projektin e rilevimit aerofotogrametrik


“Qëllimi i rilevimit aerofotogrametrik është harmonizimi i dokumentacionit kadastral me gjendjen në terren në mënyrë që qytetarët t’i realizojnë të drejtat e tyre më lehtë dhe më shpejt”, theksoi para udhëheqësve të Komiteteve të fshatrave drejtori i DKGJP z. Tahir Sahiti duke shtuar që aerofotografimi do të mundësojë edhe planifikimin hapësinor, mbledhjen e taksave si dhe planifikme tjera të rëndësishme.

Ai tha se komuna do të themelojë shtabet për rilevim si dhe do ta bëjë përgatitjen e terrenit në bashkëpunim me pronarët e parcelave dhe AKK-në. Drejtori Sahiti në vazhdim të takimit apeloi kryetarët e komiteteve të fshatrave që të mbajnë takime me qytetarët për ti njoftuar ata me rëndësinë e këtij projekti si dhe obligimet që kanë në fazën përgatitore. Ndër obligimet e qytetarëve z. Sahiti përmendi: përgatitjen dhe sinjalizimin e gurëve të mezhdave të kufijve të parcelave për çka ata do të kenë ndihmën e ekspertëve të DKGJP-së.

Sipas projektit madhësia e shenjave të sinjalizimit rreth gurëve të mezhdave duhet ti ketë dimensionet 40x40 cm dhe se secili qytetar për parcelat e veta duhet ti zbulojë gurët si dhe ta bëjë përtërirjen eventuale me gurë të rinjë. Gurët duhet të vendosen në çdo thyerje të mezhdave të parcelave, kurse në pjesët urbane (qytet) kërkohet ndarja e objekteve fizike (shtëpive) në pjesë të ndryshme.

Në këto raste duhet të bëhet gëlqerosja e pikave kufitare në pullazet e atyre objekteve në të dy anët. “Para rilevimit aerofotogrametrik, institucionet dhe qytetarët duhet të ndërmarrin veprime në përgatitjen e terrenit, ndër të cilat: sinjalizimi i shenjave që nënkupton përgatitjen dhe gëlqerosjen e figurave apo përgatitjen dhe sinjalizimin e pikave të rrjetit referent KOSOVARE F01, pikave trigonometrike, poligonale dhe lidhëse.

Sinjalizimin e pikave të matura me GPS dhe pikave tjera trigonometrike do ta bëjnë ekspertët e drejtorisë për gjeodezi, kadastër dhe pronë, kurse përgatitjen, sinjalizimin e gurëve të mezhdave të kufijve të parcelave do ta bëjnë vet qytetarët” thuhet ndër të tjera në projektin e Qeverisë dhe Agjensionit Kadastral të Kosovës. Sipas projektit bartës të përgjegjësive për përgatitjen e terrenit për rilevim janë Agjensioni Kadastral i Kosovës, komunat dhe DGJKP-të.

Lidhur me çështjet teknike dhe përgatitjet për realizimin e projektit foli edhe shefi i kadastrit z. Shefqet Maloku i cili tha se DKGJP posedon me bazën e kadastrit por me projektin e ofruar të aerofotografimit do të mundësohet përfshirja e ndryshimeve që kanë ndodhur në terren. “Një fotografim i tillë është bërë në vitin 1958 dhe prej atëherë e deri më 1999 mungon dokumentacioni” tha z. Maloku.

Në takimin e sotëm kryetarët e komiteteve të fshatrave shtruan pyetje dhe kërkuan sqarime plotësuese në mënyrë që ky projekt të realizohet më mirë. Me diskutimet e tyre u angazhuan Ramadan Mahmuti, Zeqir Zeqiri, Abaz Llugaliu, Musa Vllasa, Fadil Berisha, Sami Uka, Hakif Hoxha, Bajram Uka, Beqir Hoxha, Bedri Blakçori, Sahit Llalloshi, Ramdan Azizi, Avdullah Rama, Hetem Ajeti, etj.

Në bazë të planit dhe programit të Ministrisë së Shërbimeve Publike dhe Agjensionit Kadastral të Kosovës për rekonstruimin dhe azhurimin e kadastrit në Kosovë, komuna e Podujevës nisi me përgatitjet për realizmin e këtij projekti të rëndësishëm të rilevimit aerofotogrametrik të terrenit dhe zonave kadastrale.


Deri në fund të shkurtit DKGJP do të shpërndajë mbi 10 mijë vërtetime për rregullimin e asisitencës sociale
Podujevë, 19 shkurt 2004 (TN) - Shefi i sektorit për kadastër dhe gjeodezi i Podujevës Shefqet Maloku njoftoi sot se prej 22 janarit e deri më sot shërbimi që ai drejton ka rregulluar dhe shpërndarë mbi 5 mijë vërtetime të gjendjes së patundshmërisë për qytetarët dhe familjet që kanë kërkuar këto dokumente të cilat u nevojiten për rregullimin e asistencës sociale.
“Aktualisht janë dhënë 4203 certifikata për gjendjen e patundshmërisë dhe 799 fletë poseduese në bazë të kërkesave të qytetarëve dhe po aq kërkesa tjera janë duke u rregulluar dhe do të shpërndahen”, deklaroi z. Maloku i cili njoftoi se këto dokumente u nevojiten qytetarëve për ta rregulluar çështjen e asistencës sociale.
Maloku tha se stafi i DKGJP po punon edhe ditëve të vikendit në mënyrë që qytetarët të mos presin, ndërkaq që grumbullimin e palëve para sporteleve dhe zyrave të kësaj drejtorie ai e quajti të panevojshme meqë pengohet rrjedha normale e kryerjes së më të shpejtë të punëve për rregullimin e dokumenteve të kërkuara.
z. Maloku tha se deri në fund të këtij muaji DKGJP pritet të rregullojë dhe shpërdajë mbi 10 mijë vërtetime për rregullimin e asistencës sociale.