NANO NUK KA ÇFARË TË KËRKOJË NË KOSOVË

OPINIONE

NANO NUK KA ÇFARË TË KËRKOJË NË KOSOVË

19 shkurt 2004 / TN

Ali ALAJ

Nga gazeta Korrieri, mësova se “në fillim të marsit të ardhshëm, Fatos Nano,paska për të vizituar Kosovën?! Kjo vizitë,do të ndodhka sipas ftesës që ia paska bërë kryeadministratori, Hari Holkeri gjatë vizitës së tij në Tiranë. Nëse është kështu, e mbase duhet të jetë, atëherë udhëtimi i Holkerit në Shqipëri (më 18 shkort, 04) del si shumë i çuditshëm, për të mos thënë edhe i trishtë. Janë shumë faktorë që flasin në disfavor të kësaj vizite.

Së pari,koha kur realizohet:Shqipëria po jeton në ankthin e pritjes së një shthurjeje të paralajmëruar për të shtunën e 21 shkurtit.Pothuaj i tërë populli,gjitha partitë opozitare,kasta intelektuale e Shqipërisë i kërkojnë “Nano,ik”. Dhe, pos bashkëtarafistëve të tij, Nanos – mos shko i paska thënë edhe Hari Holkeri dhe kjo qenka bërë – me vet faktin se ia paska thënë – “Nano,eja – në Kosovë”.

Vetëm kjo ftesë, në mos pastë asgjë tjetër sekrete që të kenë biseduar,e implikon shumë rrezikshëm kryeadministratorin e Kosovës në punët e brendshme të një shteti sovran, i cili, këtë herë së paku, e ka radhën vet t’i zgjidhë krizat e brendshme. Është shumë e dëmshme, politikisht dhe ndërkombëtarisht të vihesh në anën e njeriut, të cilit shumica absolute e popullit të tij – ia kërkon dorëheqjen dhe largimin nga skena politike e Shqipërisë, sepse me një akt të tillë, me dashje apo pa të – secili që ndërhynë asisoji – bëhet palë në kontest, për të mos thënë në konflikt. Meqë është kështu,atëherë, Holkeri i ka bërë një shërbim shumë të keq demokracisë në Shqipëri,dhe i ka bërë shumë keq Kosovës.

Të ftohet Nano për vizitë Kosovës,thënë më së buti,është përpjekje për t’ia larë këtij (Nanos, pra) mëkatët që ka fituar në takimin me kryekriminelin Millosheviq në Kretë të Greqisë. Mandej, t’ia falësh mëkatin tjetër që e ka bërë ndaj Kosovës – me deklaratën tjetër, “se kryeqytet i shqiptarëve të Kosovës është Beogradi”. E të mos flasim për mëkatët tjera, sigurisht shumë më të rënda që ka bërë Nano ndaj Kosovës në marrëveshjet e tij me Milloshqviqin. Prandaj, nëse Holkeri vërtetë e ka ftuar Nanon të vijë në Kosovë, i ka bërë një fyerje shumë të rëndë Kosovës dhe popullit të saj.

Së dyti,kjo ftesë i bëhet Nanos,pas takimit që Holkeri ka patur me ultranacionalistin shovenist, Çoviq në Prishtinë,dy ditë para se kryeadministratori të udhëtonte për në Tiranë. Edhe sikur këtu të mos ketë kurrfarë ndërlidhjesh, vetëm konotacioni më i rëndomtë është është shumë indikativ,sepse dihen përpjekjet e politikës imperialiste të Serbisë, që Tiranën dhe zyrtarët e saj të fusë si pykë mes saj e Kosovës. E kaluara dëshmon për dëmë shumëdimensionale nga një pykëzim i tillë që politika e Shqipërisë ka lejuar t’i ndodhë.

Duke qenë kryeadministrator i Kosovës i autorizuar nga sekretari i përgjithshëm i Kombeve të Bashkuara, me ftesën e tillë bërë Nanos, Holkeri e ka rreshtuar edhe organizatën botërore në njëren anë të palëve në luftën politike në Shqipëri.Unë besoj se ai nuk e ka këtë mandat nga OKB-ja, sikundër që nuk e ka as mandatin e popullit të Kosovës, ta ftojë për vizitë njeriun që ka bërë një varg të këqijash mbi shpinën e tij, që kanë rezoltuar nga takimi famëkeq Nano-Millosheviq.

Së treti,ftesa bëhet në vitin që Kosova do t’i ketë zgjedhjet e veta parlamentare,ndaj të cilave ende pa u shpallur dita e mbajtjes së tyre,kryhet një atentat shumë perfid dhe ndjellakeq. Sepse – shtrojmë pyetjen çfarë mund të sjell një njeri si Nano? – pos fatëkeqësive. Njeriu, që ditën që i bëhet thirrja për të ardhur në Kosovë, në kuadër të përpjekjeve të tij për ta ruajtur karrigën e kryeministrit, daklaron se “Shqipëria mund të bëhet si Qipro në 25 vjetët e shkuara, e harruar nga bashkësia ndërkombëtare.”Të rikujtojmë- gjatë këtyre 25 vjetëve që i përmend Nano, Qipro ka qenë dhe ende është e ndarë.

Me këtë nuk po them asgjë që nuk e di secili shqiptar. Por, po e them se kam përshtypjen se me këtë Nano paralajmëron mbase ndarjen e Shqipërisë!!? Dhe, nëse mendon kështu për Shqipërinë, atëherë kemi shumë më pak shpresë së të njejtën formulë nuk e mendon edhe për Kosovën. Ku ta dimë se çfarë haberi i ka shkuar atij nga Beogradi. Për karrigën e tij,ky soj “politikani”, është në gjendje edhe shpirtin ta shesë. Edhe babait ia ka ndërruar emrin – prej Thanasit, në Atanasos. Dmth. – prej shqiptari, e ka bërë grek.

Pra, këto janë disa nga arsyet që tregojnë se Holkeri ka gabuar rëndë kur e ka ftuar Nanon “Eja në Kosovë”.

Dhe, nëse ai (Nano, pra) do të shkel në mars në Kosovë, atëherë, populli duhet ta injorojë tërësisht, sikundër që po këtë duhet ta bejnë edhe institucionet e Kosovës. Le të takohet Nano vetëm me sivëllëzërit e tij (apo servilët politik) dhe me përfaqësuesit e “povratakut”.