Përmbajtja:

• Holkeri sot viziton Tiranën ku do të takohet me udhëheqësit më të lartë të Shqipërisë

• Edhe në takimin Holkeri-Rexhepi dhe Lambsdorf nuk është gjetur ndonjë solucion që të dilet nga zhbllokimi i privatizimit

• Përfaqësuesit e institucioneve të Kosovës e kundërshtojnë fuqishëm aktivizimin e grupit të lartë Çoviq – Hakerup

• Ministri Çeku u takua me ministrin turk Osman Pepe

• Për shkaqe teknike shtyhet për pasdite seanca e sotme e Kuvendit, deputetët serbë bojkotojnë mbledhjen

• Studentët protestuan për gjendjen në Universitetin e Prishtinës

• Katër eprorët e TMK-së sot u paraqitën para gjykatësit ndërkombëtar në Prishtinë

• Nesër në Prizren nisin protestat kundër arrestimit të katër eprorëve të TMK-së

• Katër serbë në ekipin e Kosovës për bisedime me Beogradin

• Filloi nënshkrimi i Peticionit në përkrahje të themelimit të një universiteti ndërkombëtar në Mitrovicë

• Për themelimin e Operas dhe Baletit nuk janë respektuar procedurat juridike dhe kriteret profesionale

• Nuk i zhvillon punimet seanca e sotme e Kuvendit, deputetët serbë bojkotojnë

• Parlamentarët kosovarë thellojnë bashkëpunimin me parlamentarët e Shqipërisë

• Eprorët e TMK-së sot paraqiten para gjykatësit ndërkombëtar

• Të rinjtë e Therandës kanë potencial në dinamizimin e rrjedhave

• Çeku ka vizituar komandën e Zonës së Dytë të TMK-së në Prizren dhe familjet e të arrestuarve

• Kompleksi industrial "Trepça" inauguroi qendrën e kontrollit sistematik shëndetësor për punëtorët

• Policia e Shkodrës kapi pesë kilogram e gjysmë drogë të tipit heroinë dhe arrestoi një person

• Në qytetin Burgas të Bullgarisë u zbulua një shtypshkronjë e dollarëve amerikanë

• Shqiptarët kërkojnë që gjuha shqipe të jetë gjuhë e dytë zyrtare në Shkup

• Shrëder u bën thirrje palestinezëve dhe izraelitëve t'i rikthehen planit ndërkombëtar për paqe

• Bush ka hedhur poshtë kritikat për të dhënat e zbulimit para luftës për Irakun

• Në një sulm vetëvrasës vriten dy irakianë dhe plagosen tetë ushtarë të koalicionit

• Keri ruan kryesimin në garën për president

• India e Pakistani afër marrëveshjes?

• Në Irak vazhdon polemika rreth zgjedhjeve

• Berluskoni thotë se Londra, Parisi dhe Berlini po krijojnë rrëmujë në Evropë

• Mbi 11 civilë irakianë të vrarë sot në një sulm vetëvrasës

• Mbi 200 njerëz kanë humbur në një shpërthim të fuqishëm në Iran

• Gjenerali Sançez thotë se trupat amerikane do të qëndrojnë me vite në Irak

Holkeri sot viziton Tiranën ku do të takohet me udhëheqësit më të lartë të Shqipërisë

 

Prishtinë, 18 shkurt 2004 - Shefi i UNMIK-ut, Hari Holkeri sot do të vizitojë Tiranën ku do të takohet me presidentin Alfred Moisiun, kryeministrin Fatos Nano, dhe ministrin e jashtëm Kastriot Islami dhe ambasadorin e OSBE-së në Tiranë, Osmo Liponen.

 

Në fokus të takimeve pritet të jenë bashkëpunimi institucional ndërmjet Qeverisë së Shqipërisë dhe UNMIK-ut e institucioneve të Kosovës, shqyrtimi i mundësive për përfshirjen e Kosovës në proceset integruese dhe përmbushja e standardeve.

Bisedimet e z. Holkeri dhe Tiranës zyrtare pritet të përqëndrohen edhe rreth dialogut Prishtinë - Beograd, si dhe për çështje të tjera me interes për të dyja vendet.

 

 

Edhe në takimin Holkeri-Rexhepi dhe Lambsdorf nuk është gjetur ndonjë solucion që të dilet nga zhbllokimi i privatizimit

 

Prishtinë, 18 shkurt 2004 - Kryeadministratori i Kosovës, Hari Holkeri u takua dje pasdite në Prishtinë me kryeministrin Bajram Rexhepi dhe shefin e Shtyllës së katërt të UNMIK-ut, Nikolas Lambsdorf, me të cilët bisedoi në lidhje me procesin e privatizimit. Sipas zëdhënëses së UNMIK-ut, Izabela Karlovic, ishte një takim jozyrtar, në të cilin përfaqësuesit e lartë të administratës ndërkombëtare dhe asaj vendore kanë shkëmbyer mendime për zgjidhjen e procesit të bllokuar të privatizimit. Mirëpo, edhe në këtë takim nuk është arritur të gjendet ndonjë sollucion për të dalë nga zhbllokimi i procesit të privatizimit.

Holkeri ka kërkuar që anëtarët e Qeverisë së Kosovës të marrin pjesë në Bordin drejtues të AKM-së. Ndërkaq, kryeministri Rexhepi ka kërkuar nga UNMIK-u të shqyrtojë kërkesat dhe argumentet e Qeverisë dhe të propozojë një zgjidhje, e cila do të përcaktojë nëse qeveritarët do të mbesin ose jo në këtë bord.

Ndër kërkesat është edhe shkarkimi i drejtoreshës së AKM-së Marija Fuçi. Rexhepi edhe dje ka akuzuar udhëheqjen e Agjencionit Kosovar të Mirëbesimit se poi ndryshon politikat operative sipas kërkesave të Beogradit.

 

 

Përfaqësuesit e institucioneve të Kosovës e kundërshtojnë fuqishëm aktivizimin e grupit të lartë Çoviq – Hakerup

 

Prishtinë, 18 shkurt 2004 - Përfaqësuesit e institucioneve të Kosovës e kanë cilësuar si të panevojshëm aktivizimin e grupit të lartë punuese i themeluar nga një marrëveshje ndërmjet Çoviqiti dhe ish-shefit të UNMIK-ut, Hakerup. Madje, ata thonë se kjo sjell pengesa edhe për dialogun për çështje praktike.

Në këtë aspekt Ramush Tahiri, këshilltar i kryetarit të Kuvendit të Kosovës thotë se ka kaluar koha, kur për Kosovën është folur pa praninë e palës kosovare dhe se në këtë fazë kur institucionet vendore sipas tij janë funksionale, nuk ka kurrfarë arsye që ky grup i lartë punues i themeluar qysh në kohën e kryeadministratorit Hans Hakerup të funksionojë edhe mëtutje.

 

Ai ka shtuar se nëse eventualisht aktivizohet një grup i tillë, vendimet e atij grupi nuk do të jenë obligative për institucionet e Kosovës.

 

 

Ministri Çeku u takua me ministrin turk Osman Pepe

 

Ankara, 18 shkurt 2004 - Ministri i MMPH-së Ethem Çeku në vizitën që është duke ia bërë Turqisë dje është takuar me ministrin turk të Mjedisit Osman Pepe, me drejtorin e përgjithshëm të mjedisit Musa Demirbash, drejtorin e përgjithshëm të planifikimit Osman Tuzun, me drejtorin e Parqeve Nacionale dhe Mbrojtjes së Mjedisit Mustafa Kemail Yalinkiliq, ku kanë biseduar rreth fushës së mjedisit, ujërave, planifikimit hapësinor, ndërtimit etj.

 

Gjatë takimit të ministrit Çeku me ministrin homolog turk Pepe është biseduar për të arriturat dhe vështirësitë e ministrisë së Mjedisit në Kosovë si dhe u shkëmbyen përvoja reciproke në mes vete. Po ashtu në këtë takim u bisedua edhe për mundësinë e bashkëpunimit të ndërsjelltë në lëmin e Planifikimit Hapësinor, mjedisit, ujërave dhe banimit.

 

 

Për shkaqe teknike shtyhet për pasdite seanca e sotme e Kuvendit, deputetët serbë bojkotojnë mbledhjen

 

Prishtinë, 18 shkurt 2004 - Për shkak të disa problemeve teknike, seanca e sotme e Kuvendit të Kosovës, e cila është dashur të fillojë në orën 10, është shtyrë për në orën 14.00. Kjo ka ndodhur për shkak se grupet parlamentare nuk janë marrë vesh rreth renditjes së deputetëve në sallën e renovuar të Kuvendit.

Ndërkohë janë takuar Kryesia e Kuvendit dhe kryeparlamentari Daci për të zgjidhur këtë problem.
Përndryshe në rend dite të kësaj seance është shqyrtimi i dytë i pesë projektligjeve, shqyrtimi parë i dy projektligjeve si dhe diskutimi rreth funksionimit të strukturave paralele në Kosovë.

Deputetët serbë kanë vendosu të mos marrin pjesë në seancën e sotme për shkak të, siç thonë "ikonagrafisë së vendosur në ndërtesën e parlamentit". Depuetët serbë thonë se pikturat me pamje nga Ldhja e Prizrenit dhe kthimit të Skënderbeut në Shqipëri janë diskriminuese dhe se favorizojnë historinë e shqiptarëve.

 

 

Studentët protestuan për gjendjen në Universitetin e Prishtinës

 

Prishtinë, 18 shkurt 2004 - Për shkak të gjendjes së rënduar në Universitetin e Prishtinës, nisma "Për një universitet Tjetërqysh" ka organizuar sot një protestë në platonë para Bibliotekës Universitare në Prishtinë, me moton "12 pa 5 minuta".

Kjo protestë u mbajt si reagim ndaj vazhdimit të status kuosë, e cila si protagonist kryesor ka udhëheqjen e Universitetit të Prishtinës. Ndërkaq në 12 pa 5 minuta studentët e mblodhën para rektoratit duke protestuar me pipa dhe avionë prej letre në formë të indeksave dhe në këtë mënyrë studentët shprehën revoltën e tryre për gjendjen aktuale në universitet.

Përfaqësuyeist e kësaj nisme thanë se kjo është vetëm fillimi, duke paralajmëruar forma të tjera të protestës.

 

 

Katër eprorët e TMK-së sot u paraqitën para gjykatësit ndërkombëtar në Prishtinë

 

Prishtinë, 18 shkurt 2004 - Komandanti i Zonës së dytë të TMK-së gjeneralbrigade Selim Krasniqi, togeri Milaim Latifi, kapiteni Xhavit Elshani dhe nënkoloneli Bedri Zyberaj, sot në Gjyaktën e Supreme të Kosovës në Prishtinë kanë dhënë deklaratat e para para gjykatësit ndërkombëtar Lin Slattengren, i cili është nga Gjykata e qarkut të Prizrenit.

 

Sipas avokatëve mbrojtës, të gjithë pandehurit kanë heshtur para gjykatësit dhe marrja e tyre në pyetje do të vazhdojë edhe gjatë ditëve të ardhshme.

Ata janë paraburgosur më 16 shkurt me akuzat për krime serioze.

 

 

Nesër në Prizren nisin protestat kundër arrestimit të katër eprorëve të TMK-së

 

Prishtinë, 18 shkurt 2004 - Përfaqësuesit e tri shoqatave të dala nga lufta arrestimin e katër eprorëve të lartë të TMK-së dhe ish-luftëtarëve të UÇK-së e konsiderojnë si luftë të re ndaj vlerave të luftës së UÇK-së dhe janë një vazhdimësi e politikës së gabuar të administratës ndërkombëtare. Krerët e këtyre shoqatave thonë se janë të indinjuar me qëndrimin e qeverisë së Kosovës.

Ata paralajmëruan se që nga dita e nesërme do të fillojnë me protesta në rrugë kundër arrestimit të katër eprorëve të TMK-së.

Kështu nesër në Prizren në orën 13.00 fillon protesta e parë në sheshin Shadërvan, pastaj të premtën në Malishevë, e pastaj edhe në të gjitha qendrat e Kosovës.

Gjithashtu ata thanë se "do të bëjnë çmos për t'u ndalur kjo fushatë e egër që po bëhet kundër çlirimtarëve, ndaj familjeve të tyre, të cilat kanë dhënë çdo gjë dhe kanë qenë të gatshme edhe të sakrifikojnë tërë familjen e vet për lirinë e Kosovës".

 

 

Katër serbë në ekipin e Kosovës për bisedime me Beogradin

 

Mitrovicë, 18 shkurt 2004 - Përfaqësuesist serbë të koalicionit "Kthimi" kanë caktuar sot përfaqësuesit e tyre në ekipin në bisedimet e autoritetet e Beogradit.

Kështu në ekipin e Kosovës do të jetë ministri i Bujqësisë në qeverinë e Kosovës Goran Bogdanoviq, ministri koordinator në qeverinë e Kosovës Milorad Todoroviq, këshilltari në kabinetin e shefit të UNMIK-ut Nenad Radoslavleviq dhe anëtari i Kryesisë së Kuvendit të Kosovës Oliver Ivanoviq, njoftojnë mediat serbe.

 

 

Filloi nënshkrimi i Peticionit në përkrahje të themelimit të një universiteti ndërkombëtar në Mitrovicë

 

Mitrovicë, 18 shkurt 2004 - Me iniciativën e disa studentëve të shkencave politike, në Mitrovicë filloi nënshkrimi i Peticionit në përkrahje të themelimit të një universitetit ndërkombëtar në Mitrovicë.

Ideja për themelimin e një universiteti të tillë në Mitrovicë është përmendur një kohë të gjatë nga intelektualët mitrovicas dhe së fundi është paraqitur edhe nga Kryeministri i Kosovës Bajram Rexhepi në Konferencën e fundit për Mitrovicën të mbajtur në Londër dhe kjo ka hasur në përkrahje të fuqishme nga shumica e të pranishmëve.

Kjo iniciativë ka hasur në përkrahjen e Kuvendit Komunal të Mitrovicës, partive politike, intelektualëve dhe shpresohet se do të përkrahet edhe nga të gjithë qytetarët e Mitrovicës.
Nënshkrimi i këtij Peticioni së shpejti do të fillojë edhe në pjesën veriore të qytetit.

Ky peticion pastaj do t'u dorëzohet institucioneve të Kosovës, UNMIK-ut dhe zyrave diplomatike të akredituara në Prishtinë.

 

 

Për themelimin e Operas dhe Baletit nuk janë respektuar procedurat juridike dhe kriteret profesionale

 

Prishtinë, 18 shkurt 2004 - Komisioni për Kulturë, Rini dhe Sport i Kuvendit të Kosovës, duke pasur parasysh paqartësitë e krijuara rreth themelimit të Operas dhe Baletit nga ana e Ministrisë për Kulturë, Rini, Sport dhe Çështje Jorezidenciale, mosrespektimin e procedurave juridike e kritereve profesionale, si dhe jotransparencën në veprim, më 9.01.2004 organizoi dëgjimin publik nga i cili nxori disa konkluzione.

Në këto konkluzione thuhet se nisma për themelimin e Operas dhe Baletit të Kosovës është bërë, por nuk është jetësuar as përafërsisht në baza profesionale dhe të akteve juridike përcjellëse.
Themelimi i Operas në kuadër të Filharmonisë së Kosovës mund të pranohet vetëm si një bërthamë nga e cila sa më shpejt duhet të dalë institucioni i mëvetësishëm i Operas dhe Baletit të Kosovës.

Themelimi dhe përbërja e Këshillit të Filharmonisë, pjesë e së cilës është Opera, dhe e Këshillit Artistik duhet të jenë transparent. Profesionistët duhet të konsultohen më shumë dhe të inkuadrohen në themelimin e Operas dhe Baletit të Kosovës.

Veprimet e deritanishme kanë qenë jotransparente dhe përqendrimi është bërë në një realizim skenik e jo për themelim të mirëfilltë të institucionit.

Nuk është respektuar instituti i konkursit dhe nuk janë bërë kontrata, ndërsa pagat dhe honoraret nuk janë dhënë sipas procedurave të obligueshme.

Kërkohet një bashkëpunim më korrekt dhe më i drejtpërdrejtë i Ministrisë për Kulturë, Rini, Sport dhe Çështje Jorezidenciale me Komisionin për Kulturë, Rini dhe Sport të Kuvendit të Kosovës, thuhet në një njoftim të këtij komisioni.

 

 

Nuk i zhvillon punimet seanca e sotme e Kuvendit, deputetët serbë bojkotojnë

 

Prishtinë, 18 shkurt 2004 - Për shkak të disa problemeve teknike, seanca e sotme e Kuvendit të Kosovës nuk i ka zhvilluar punimet. Kjo ka ndodhur për shkak se grupet parlamentare nuk janë marrë vesh rreth renditjes së deputetëve në sallën e renovuar të Kuvendit. E paraparë që të fillojë në orën 10,00 ajo është shtyrë për në orën 14.00, por rreth orës 15,00 ajo u anulua për sot.

Ndërkohë janë takuar Kryesia e Kuvendit dhe kryeparlamentari Daci për të zgjidhur këtë problem, por megjithatë nuk kanë gjetur ndonjë zgjidhje.

Përndryshe në rend dite të kësaj seance është shqyrtimi i dytë i pesë projektligjeve, shqyrtimi parë i dy projektligjeve si dhe diskutimi rreth funksionimit të strukturave paralele në Kosovë.

Deputetët serbë kanë vendosur të mos marrin pjesë në seancën e sotme për shkak të, siç thonë "ikonagrafisë së vendosur në ndërtesën e parlamentit". Deputetët serbë thonë se pikturat me pamje nga Lidhja e Prizrenit dhe e kthimit të Skënderbeut në Shqipëri janë diskriminuese dhe se favorizojnë historinë e shqiptarëve.

 

 

Parlamentarët kosovarë thellojnë bashkëpunimin me parlamentarët e Shqipërisë

 

Tiranë, 18 shkurt 2004 - Komisioni për Transport dhe Telekomunikacion i Kuvendit të Kosovës i udhëhequr nga Edita Tahiri, kryetare, në kuadër të vizitës disaditëshe që po bën në Shqipëri, zhvilloi një sërë takimesh me strukturat përkatëse të Kuvendit dhe të Qeverisë së Shqipërisë.

 

Komisioni pati takim me zëvendëskryetaren e Kuvendit të Shqipërisë, zonjën Magbule Çeço, me kryetarin e Komisionit për Industri dhe Transport, Eduard Alushi, nënkryetarin për Politikë të Jashtme të Kuvendit, Besnik Mustafaj, ministrin e Transportit dhe Komunikacionit, Spartak Poçi.

Gjatë këtyre bisedave u vunë në pah mundësitë e thellimit të bashkëpunimit të ndërsjellë e të këmbimit të përvojave në sistemin ligjvënës, si dhe në fushat të tjera të punës së komisioneve dhe kuvendeve.

Me këtë rast ministri Poçi i njoftoi parlamentarët kosovarë me dinamikën e ndërtimit të autostradës Durrës B Morin, e cila do të shtrihet më tutje nëpër Kosovë, deri në Merdar. Të dy komisionet ishin të njëjtit mendim se kjo rrugë është me rëndësi jetike, jo vetëm për Shqipërinë dhe Kosovën, por edhe më gjerë për rajonin.

 

Kjo rrugë u tha se përbën një aortë të pazëvendësueshme të zhvillimit ekonomik të Shqipërisë dhe Kosovës, të ndërlidhjes e rinjohjes shqiptare, si dhe një mundësi për bashkëpunim e ndërlidhje më të shumanshme të të dyja vendeve.

 

 

Eprorët e TMK-së sot paraqiten para gjykatësit ndërkombëtar

 

Prishtinë, 18 shkurt 2004 - Komandanti i Zonës së dytë të TMK-së gjeneralbrigade Selim Krasniqi, togeri Milaim Latifi, kapiteni Xhavit Elshani dhe nënkoloneli Bedri Zyberaj sot do të japin deklaratat e para para gjykatësist ndërkombëtar Lin Slattengren.

Ata janë paraburgosur më 16 shkurt me akuzat për krime serioze.

 

 

Të rinjtë e Therandës kanë potencial në dinamizimin e rrjedhave

 

Therandë, 18 shkurt 2004 - Në kuadër të projektit " 2004 Viti i LDK-së - Viti Juaj" dje në Therandë u mbajt një debat i Kryesisë qendrore të FR të LDK-së me të rinjtë e këtij qyteti. Këtë tubim e shpalli të hapur kryetari i degës së FR të LDK-së në Therandë, Bekim Kryeziu, ndërsa të pranishmit më pas i përshëndeti edhe kryetari i Kuvendit Komunal të Therandës dr.Sali Asllanaj.

Në fjalën e tij përshëndetëse kryetari i FR të LDK-së z.Lulzim Zeneli, theksoi se ky është një rast i veçantë që të debatohet për të gjitha çështjet që i preokupojnë të rinjtë e këtij qyteti. "Kosova ka hyrë në një proces i cili është përcaktues për të ardhmen e saj dhe Theranda ka potencial rinor që të ndikojë pozitivisht në dinamizimin e rrjedhave në vend, fakt ky që është argumentuar shumë herë dhe sot po rikonfirmohet", tha z. Zeneli i cili në vazhdim shtoi se "Kosovës dhe perspektivës së saj i nevojitet një qeverisje stabile dhe efikase, qeveri që me punën e vet do të reflektonte përgjegjësi ndaj qytetarëve të Kosovës.

 

Të rinjtë e LDK-së kanë barrën dhe përgjegjësinë që të jenë katalizator të këtyre proceseve, tha ai. Ky takim është një rast i mirë të afirmohen politikat e të rinjve të LDK-së dhe të përcillet mesazhi shumë i qartë pro një dinamike më të theksuar në të gjitha proceset në vend, theksoi në fjalën e tij kryetari Zeneli.

Në vazhdim pjesëmarrësit në debat diskutuan një varg çështjesh që janë preokupuese për të rinjtë dhe qytetin e Therandës.

 

 

Çeku ka vizituar komandën e Zonës së Dytë të TMK-së në Prizren dhe familjet e të arrestuarve

 

Pizren, 18 shkurt 2004 - Komandanti i TMK-së, gjeneral Agim Çeku dje në orët e pasditës ka vizituar komandën e Zonës së Dytë të TMK-së në Prizren. Çeku me zyrtarë të kësaj zone ka biseduar për situatën e krijuar, duke thënë se duhet të gjenden forma për tejkalimin e saj dhe arritjen e qëllimeve të përbashkëta për të ardhmen e TMK-së.

 

Gjeneral Agim Çeku më pas ka vizituar familjen e gjeneralit Selim Krasniqit në Drenoc të Rahovecit, si dhe familjen e Bedri Zyberajt në Drenoc të Malishevës, të cilët para dy ditësh u arrestuan nga policia ndërkombëtare nën dyshimin se kanë bërë krime lufte në vitet 1998/1999.

 

 

Kompleksi industrial "Trepça" inauguroi qendrën e kontrollit sistematik shëndetësor për punëtorët

 

Mitrovicë, 18 shkurt 2004 - Kompleski industrial Trepça inauguroi qendrën e kontrollit sistematik shëndetësor të punëtorëve. Në këtë qendër do të bëhet kontrollimi mjekësor falas për punëtorët në "Trepçë" dhe atë për herë të parë pas dhjetë vjetëve. Projekti për ndërtimin e kësaj qendre ka kushtuar 140 mijë euro, mjete këto që janë siguruar nga buxheti i Kosovës dhe disa donacione të bashkësisë ndërkombëtare.

Menaxheri ndërkombëtar i kompleksti "Trepça" Pol Nels ka thënë se kontrolli shëndetësor do të ndihmojë klasifikimin mjekësor të punëtorëve të regjistruar në Trepçë, disa prej të cilëve pritet të pensionohen. Në këtë qendër deri më tash janë realizuar 400 kontrollime mjekësore.

 

 

Policia e Shkodrës kapi pesë kilogram e gjysmë drogë të tipit heroinë dhe arrestoi një person

 

Shkodër, 18 shkurt 2004 - Policia e Shkodrës kapi dje pesë kilogram e gjysmë drogë të tipit heroinë dhe arrestoi një person 27-vjeçar, i cili akuzohet si mbajtës dhe shpërndarës droge.

 

Gjatë kontrollit në banesën e të arrestuarit policia zbuloi sasinë e sipërshënuar heroinë që është sasia më e madhe e drogave të forta të kapura gjatë viteve të fundit në Shkodër.

 

Ndërkohë, disa raste të trafikut të drogës të zbuluara javëve të fundit ne veri të Shqipërisë kanë hedhur dyshimet tek policia për ekzistimin e një linje të re të trafikut nga Shqipëria në drejtim të Malit të Zi dhe Evropës.

 

 

Në qytetin Burgas të Bullgarisë u zbulua një shtypshkronjë e dollarëve amerikanë

 

Sofje, 18 shkurt 2004 - Në qytetin Burgas të Bullgarisë policia ka zbuluar një shtypshkronjë të dollarëve amerikanë me ç'rast dy persona janë arrestuar. Policia bëri të ditur se shtypshkronja ishte pjesë e rrjetit kriminal ndërkombëtar dhe u zbulua gjatë aksionit të përbashkët me policinë amerikane, i cili filloi në Kaliforni.

 

 

Shqiptarët kërkojnë që gjuha shqipe të jetë gjuhë e dytë zyrtare në Shkup

 

Shkup, 18 shkurt 2004 - Ndarja territoriale në Maqedoni po shoqërohet me shumë debate. Një nga temat e këtij debati është përdorimi zyrtar i gjuhës shqipe në pushtetin lokal të Shkupit. Sipas ekspertëve ka kundërthënie mes Kushtetutës dhe ligjit të ri të ndarjes territoriale.

 

Ekspertët vlerësojnë se me ndarjen e re territoriale veç tjerash duhet të rregullohet edhe përdorimi i gjuhës shqipe në nivel të qytetit të Shkupit. Kjo çështje sipas tyre duhet të zgjidhet që të mos ketë kundërthënie ndërmjet Kushtetutës dhe propozim-ligjit për qytetin e Shkupit, i cili parasheh përdorimin zyrtar të gjuhës shqipe vetëm nëse në dy nga nëntë komunat e Shkupit shqiptarët përbëjnë mbi 20 për qind të popullatës së përgjithshme.

 

 

Shrëder u bën thirrje palestinezëve dhe izraelitëve t'i rikthehen planit ndërkombëtar për paqe

 

Berlin, 18 shkurt 2004 - Kancelari gjerman Gerhard Shrëder u ka bërë thirrje palestinezëve dhe izraelitëve që t'i rikthehen planit ndërkombëtar për paqe në Lindjen e Afërt. Schröder, i cili u takua në Berlin me kryeministrin palestinez Korai, theksoi më tej se procesi i paqes mund të vazhdohet vetëm nëpërmjet dialogut direkt mes dy palëve. Në të njejtën kohë, Shrëder dhe ministri i jashtëm gjerman Joshka Fisher shprehën mbështetjen e mëtejshme të Gjermanisë për Palestinën.

 

 

Bush ka hedhur poshtë kritikat për të dhënat e zbulimit para luftës për Irakun

 

Uashington, 18 shkurt 2004 - Presidenti amerikan Xhorxh Bush ka hedhur poshtë kritikat se i ka zmadhuar të dhënat e zbulimit para luftës për Irakun, duke thënë sesi mendimin e tij se ai vend ka armë për shkatërrim në masë e ndanin edhe Kongresi dhe Këshilli i Sigurimit të OKB-së.

Bush këtë deklartë të bëri duke iu drejtuar mijëra ushtarëve amerikanë në Fort Polk, të cilët sapo ishin kthyer ose po shkonin në Irak.

Të dhënat e zbulimit për Irakun dhe mënyra në të cilën administeata e Bushit i përdori u bënë çështje kyçe për fushatën parazgjedhore presidenciale, pasi ish-shefi i inspektorëve amerikanë Dejvid Keli deklaroi se të dhënat ishin të gabuara se Iraku posedon armë të shkatërrimit në amsë.

Bush ka thënë se edhe ish-presidenti Bill Klinton dhe Kongresi në vitin 1998 "e caktuan këtë si politikë të Shteteve të Bashkuara për ndërrimin e regjimit të Irakut".

 

 

Në një sulm vetëvrasës vriten dy irakianë dhe plagosen tetë ushtarë të koalicionit

 

Bagdad, 18 shkurt 2004 - Tetë ushtarë të koalicionit janë plagosur sot në mëngjes në një sulm me autobombë në Irak, duke vrarë vetveten dhe dy irakianë në një sulm vetëvrasës në qytetin Hilla, ka thënë zëdhënësi ushtarak, njofton Rojter.

Nënkoloneli Robert Stërzeleski, zëdhënës i forcave polake, i tha Rojterit se gjashtë nga ushtarët e plagosur janë polakë, një hungarez dhe një amerikan.

 

 

Keri ruan kryesimin në garën për president

 

Uashington, 18 shkurt 2004 - Kryesuesi i garës për kandidatin demokrat për president amerikan, senatori Xhon Keri, ka fituar në votimin më të fundit midis përkrahësve demokratë në shtetin Uiskonsin.

Por kurorëzimi i senatorit Keri ka mbetur ende pezull. Votuesit në shtetin Uiskonsin kanë siguruar që konkurimi të vazhdojë edhe për të paktën dy javë deri super-të martën kur të thonë fjalën e tyre votuesit edhe në dhjetë shtete të tjerë, përfshirë Nju Jorkun dhe Kaliforninë.

Xhon Keri vazhdon të jetë kryesuesi i garës, ai ka fituar në 15 nga 17 shtetet ku është votuar deri tani, por duket se mesazhi populist i kandidatit tjetër, senatorit John Edwards, që thekson rëndësinë e krijimit të vendeve të punës në Amerikë, po godet atje ku duhet.

 

 

India e Pakistani afër marrëveshjes?

 

Nju Delhi, 18 shkurt 2004 - Zyrtarë të lartë nga India dhe Pakistani takohen sot për të aprovuar një kalendar bisedimesh të gjera për çështje për të cilat të dy vendet kanë pasur mosmarrëveshje të thella për rreth 50 vjet. Pas dy ditë bisedimesh në kryeqytetin paksitanez Islamabad zyrtarët e nivelit më të ulët arritën një marrëveshje lidhur me strukturën e dialogut.

Hollësitë nuk janë njoftuar ende, por korrespondentët thonë se mendohet që të ngrihen grupe bilaterale për të shqyrtuar çështje të tilla si Kashmiri, armët bërthamore, terrorizmi, droga dhe tregtia.

 

 

Në Irak vazhdon polemika rreth zgjedhjeve

 

Bagdad, 18 shkurt 2004 - Disa anëtarë të Këshillit Qeverisës Irakian thonë se nuk e mbështesin më planin amerikan për zgjedhjen e një qeverie të përkohëshme përmes konferencave rajonale.

 

Anëtarët në fjalë, të cilët përfaqësojnë shiitët, sunitët dhe kurdët, thonë se sistemi i konferencave rajonale ka krijuar tashmë shumë polemika pas hedhjes poshtë nga kleriku kryesor shiit i vendit, Ayatollah Ali al-Sistani.

Disa anëtarë të Këshillit thonë se koalicioni i drejtuar nga Shtetet e Bashkuara duhet t=ja dorëzojë sovranitetin Këshillit të tanishëm Qeverisës deri sa të krijohen kushtet për zgjedhje të drejtpërdrejta. Por të tjerë thonë se as kjo nuk do të pranohej nga shumica e irakianëve pasi Këshilli është emëruar nga Shtetet e Bashkuara.

 

 

Berluskoni thotë se Londra, Parisi dhe Berlini po krijojnë rrëmujë në Evropë

 

Romë, 18 shkurt 2004 - Udhëheqësit britanikë, gjermanë dhe francezë takohen të merkurën në Berlin ndërkohë që udhëheqës të vendeve të tjera evropiane po i akuozjnë ata se po përpiqen të mbizotërojnë Bashkimin Evropian.

 

Kryeministri italian, Silvio Berluskoni, tha dje se Londra, Parisi e Berlini po krijojnë atë që ai e cilësoi si rrëmujë në Evropë. Kryeministri britanik, Toni Bler, presidenti francez, Zhak Shirak, dhe kancelari gjerman, Gerhard Shrëder, thonë se kanë në plan të diskutojnë rreth mënyrave për t=u dhënë shtytje ekonomive evropiane në prag të takimit të plotë të nivelit të lartë të bllokut që do të mbahet muajin tjetër në Bruksel.

 

 

Mbi 11 civilë irakianë të vrarë sot në një sulm vetëvrasës

 

Bagdad, 18 shkurt 2004 - Të paktën 11 civilë irakianë janë vrarë të mërkurën në mëngjes kur dy sulmues vetëvrasës kanë tentuar të sulmojnë bazën e koalicionit ku janë të sistemuar trupat ndërkombëtare, ka thënë zëdhënësi i forcave të koalicionit.

Sulmi jashtë kampit Çarli në qytetin Hillah gjithashtu ka plagosur 44 irakianë të tjerë dhe 58 forca të koalicionit, duke përfshirë hungarezë, polakë dhe një amerikan. Gjenerali polak Mjeçislav Bienek e ka quajtur "sulm të koordinuar terrorist".

Zëdhënësja Hilari Uajt ka thënë se sulmi ka ndodhur afër disa shtëpive afër kampit ushtarak dhe janë vrarë burra, grua dhe fëmijë", njofton AP.

 

 

Mbi 200 njerëz kanë humbur në një shpërthim të fuqishëm në Iran

 

Teheran, 18 shkurt 2004 - Mbi 200 njerëz kanë humbur jetën dhe 350 janë lënduar sot në mëngjes në një shpërthim të fuqishëm në trenin i cili në verilinndje të Iranit po transportonte benzinë, pleh artificial dhe squfur, njofton AP, duke cituar agjencinë iraniane të lajmeve.

"Numri i të vdekurve ka tejkaluar 200, ndërkaq shërbimet e emergjencës në spital kanë transferuar rreth 350 të lënduar", ka thënë Vajid Barkçi, zyrtar i shërbimit të emergjencës në krahinën Khorasan.

Pesëdhjetë e një vagonë janë hedhur në ajër, ndërkohë që dridhja e tokës është ndier në një qark prej 10 km. Pesë fshatra janë shkatërruar, ndërkaq dritaret e shtëpive në qytetin Nashapurtu, 20 km larg vendit të shpërthimit, janë thyer.

 

 

Gjenerali Sançez thotë se trupat amerikane do të qëndrojnë me vite në Irak

 

Madrid, 18 shkurt 2004 - Komandanti i forcave amerikane në Irak në një intervistë të publikuar të mërkurën ka thënë se trupat amerikane do të qëndrojnë me vite dhe do të ndihmojnë irakianët për të ruajtur rendin në Bagdad për të paktën 12 muajt e ardhshëm.

"Dua të them se kemi biseduar për vite, jo për muaj", ka thënë gjenerali Rikardo Sançez për gazetën spanjolle "El pais", i pyetur se sa gjatë forcat amerikane do të qëndrojnë në Irak.

"Irakianët na kanë thënë se nuk na duan këtu, por as nuk thonë se duhet të shkojmë. Kjo është shumë e komplikuar", ka thënë gjenerali Sançez, njofton Rojter.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |