|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

OPINIONE

Koment

Sa na kushtojnë nënpunësit e kryeministrit

18 shkurt 2004 / TN

 

Çerçiz LOLOÇI

 

Megjithëse selia e kryeministrisë ka një departament të shtypit dhe të informimit, ka edhe një faqe web-i që pasqyron tërë veprimtarinë e Këshillit të Ministrave dhe posaçërisht të kryeministrit Nano, marrja e informacionit për probleme të caktuara prej këtyre zyrave është krejtësisht e pamundur. Edhe burimet konfidenciale e kanë akoma më të vështirë që të japin ndonjë të dhënë, pas urdhrit të vitit të shkuar të zotit Nano që ndalonte dhe penalizonte një veprim të tillë nga çdo dikaster, urdhër ky që u zhvlerësua me një vendim të Gjykatës kushtetuese pas kërkesës së bërë nga disa shoqata gazetarësh. Një institucion që e kontrollon kryeministrinë, Kontrolli i Lartë i Shtetit gjithashtu nuk të jep ndonjë informacion rreth shkeljeve që mund të bëhen dhe janë bërë nga aparati i Këshillit të Ministrave, përveç që të përmend një faturë prej 83 milionë lekësh, të cilat janë shkelje dhe abuzime me fondet publike nga një janari 2002 deri në 30 qershor të 2003.

 

40 milionë më shumë për 22 punonjës të rinj

 

Pavarësisht këtyre pengesave dhe pavarësisht një praktike jashtëligjore të zyrave të shtetit, gjenden sërish burime për të dhënë deri në detaje se çfarë ndodh në aparatin e Këshillit të Ministrave. Kështu fondi i pagave ka pësuar një ndryshim të ndjeshëm nga viti 2002 në vitin 2003 me një shtesë prej  39.954 mijë lekë ose 50% më tepër, nga shtimi i organikës me 22 punonjës ose 11.2% të numrit të përgjithshëm.

 

Rekrutimi i këtyre punonjësve ka një skemë formale ligjore: bëhen njoftimet në shtypin e përditshëm, pranohet konkurrimi me punonjës pa kontratë ose me kontratë provizore dhe në të gjitha rastet zbatohet një skemë nepotike që ka lidhje, ose me vetë kryeministrin, ose me këshilltarët më të afërt dhe kryesisht me treshen Nano-Isaku-Barçi. Studentë të kualifikuar dhe posedues të disa masterave, në disa prej universiteteve më të dëgjuara perëndimore, janë të parët që zhgënjehen nga ky konkurrim, sepse në çdo rast punësohen në zyra qeveritare, njerëz të pakualifikuar dhe që kanë kaluar pa kontratë dy-tremujorshin në këto zyra.

 

Burimet pohojnë se gjatë vitit 2002, në strukturën e shpenzimeve të fondit të pagave një peshë të madhe zë shpërblimi për pagesat jashtë orarit të punës. Këto pagesa janë dhënë, për shoferët e deri te drejtorët e drejtorive, të cilat kapin shumën 8.841 mijë lekë ose 8% të fondit të pagave të realizuar në fakt. Vetëm për nëpunësit civilë pagesat kapin vlerën prej 3.671 mijë lekë ose 3.1%. Burime konfidenciale pohojnë për TemA se për gjashtëmujorin e parë të vitit 2003, fondi i pagave nga 82.739 mijë lekë është realizuar 81.739 mijë lekë. Gjithashtu duhet theksuar se fondi i pagave për vitin 2003, në krahasim me vitin 2002, ka ardhur duke u rritur, konkretisht: për vitin 2002 fondi i pagave është realizuar 115.700 mijë lekë, ndërsa për vitin 2003 është planifikuar në shumën 160.000 mijë lekë ose me një rritje 38.3%. Kjo rritje në vitin 2003, krahasuar me vitin 2002 vjen si pasojë e rritjes së numrit të punonjësve të disiplinuar në organikë, të cilët nga 202 punonjës janë rritur në në 345 ose më tepër 58%.

 

Shkelje të tjera

 

Tregues të tjerë negativë dhe humbje të mëdha për buxhetin e shtetit janë shkaktuar nga zëra dhe nëpunës të tjerë të Këshillit të Ministrave. Shkeljet dhe abuzimet më evidente janë në zërin e dietave të mbikëqyrësve të Farudin Arapit, për shpenzime pa kriter në biseda telefonike. Burimet thonë se "investimet gjatë vitit 2002 janë pakësuar me 34 milionë lekë. Ky pakësim ka ardhur si rrjedhojë e prokurimit të fondeve për investime të çelura në favor të disa ministrive të ndryshme, si p.sh. blerje autoveturash dhe rikonstruksione të ndryshme në favor të Drejtorisë së Shërbimeve Qeveritare (DSHQ). Pakësimi i fondeve për investime në favor të DSHQ-së në shumën 20.000 mijë lekë është bërë në datën 3.12.2002.

 

Transferimi i fondeve buxhetore në fund të vitit ka sjellë mosrespektimin e afatit kohor për realizimin e procedurave të tenderit të hapur". Investimet për vitin 2002 janë realizuar në masën 28% ose më pak për vlerën 10.932 mijë lekë.  Për vitin 2002 në strukturën e shpenzimeve operative, peshën specifike më të madhe e zënë shpenzimet telefonike, të cilat kapin shumën 90.682 mijë lekë ose 50.2% e totalit, shpenzimet për pritje e përcjellje kapin shumën 11.510 mijë lekë ose 6.4% të totalit të shpenzimeve. Në shpenzimet operative të administratës së Kryeministrisë, një peshë të madhe zënë ato telefonike, udhëtim e dieta të "Grupit të mbikëqyrjes së fimave piramidale", të cilat kapin shumën 2.654 mijë lekë ose 1.5% të totalit. Të ndara sipas qëllimit respektivisht janë: shpenzime telefonike 1.183 mijë lekë dhe shpenzime udhëtim e dieta 1.471 mijë lekë.

 

Para me shumicë nga ministri i Pakicave

 

Kriza e qeverisjes që është reflektuar veçanërisht dy-tre vjetët e fundit ka eksperimentuar edhe ministër pakicash (zyrtari i lartë nuk u mor vesh asnjëherë  se me çfarë detyre konkrete merrej në qeveri) si dhe ka lënë shkak për emërime / çemërime në administratën e kryeministrisë sipas parimeve nepotike. Administrata shqiptare dhe sidomos aparati i Këshillit të Ministrave ka qenë një front i rëndësishëm punësimi: shpura e kryeministrit Pandeli Majko largonte njerëzit e Nanos, stafi i kryeministrit Ilir Meta largonte të emëruarit e kryeministrit të dorëhequr dhe treshja e Nanos pastronte gjithçka nga Majko-Meta. Në një nga këto kabinete qeveritare ka ekzistuar edhe një ministër i Pakicave Kombëtare që, për më shumë se një muaj vejevinte korridoreve, sepse nuk i gjenin dot as edhe një zyrë.

 

Burimet pohojnë megjithatë se edhe prej tij janë kryer shkelje në dëm të financave të shtetit. Me mandatpagesën nr. 14, datë 01.02.2002 ish-ministri "I pakicave kombëtare" dhe shoferi i ministrit, jane paguar 5 netë fjetje në hotel në shumën 10.000 lekë respektivisht për secilin, pa bashkëlidhur fletën e fjetjes në hotel; dëmi ekonomik i tyre kap shumën 20.000 lekë. Ka qenë po ky ministër si dhe shoferi i tij që kanë shkuar për katër ditë në Sarandë dhe janë paguar (mandatpagesa nr. 25, datë 26.02.2002) shpenzime për udhëtim e dieta për tetë ditë; dëmi është 16.000 lekë.

 

Ministrat, drejtorët e drejtorive dhe shoferët janë punonjësit më të privilegjuar në administratën e kryeministrisë. Por shkeljet vazhdojnë edhe më tej.

 

Me mandatpagesën nr. 25, datë 26.02.2002, një punonjës i Farudin Arapit është paguar dy herë për të njëjtin shërbim në Vlorë, duke përfituar më tepër 5.400 lekë. Me mandatpagesën nr. 101, datë 30.04.2002, si rrjedhojë e llogaritjes së gabuar, të shpenzimeve udhëtim e dieta për ditët e qëndrimit me shërbim, një punonjëse ka përfituar më tepër shumën 1.200 lekë. Disa shofera kanë qendruar më shërbim në disa rrethe nga 10 deri 15 ditë në muaj duke përfituar mesatarisht nga 33 mijë lekë deri 50 mijë lekë. Vlen të theksohet se të kësaj natyre janë dhe dietat e marra nga nëpunësit e kontrollit të firmave piramidale, të cilat janë të larta. Nga kontrolli i ushtruar për kuadrimin e llogarisë 580 "Xhirim vlerash monetare" rezultoi se kjo llogari paraqitet e mbyllur dhe për rrjedhojë të gjitha tërheqjet me çek nga banka janë dokumentuar në debi të llogarisë "Arka".

 

Por nuk është vetëm ministri i Pakicave që ka përfituar në mënyrë të padrejtë. Më 18.03.2002 është paguar ish-Ministri i Integrimit, me 61.5 Euro për trajtim me ushqim, shumë e cila është përfshirë në faturën e hotelit nr. 39875, datë 13.03.2002.

Më datë 24.03.2002; nr. 30, datë 09.05.2002 dhe nr. 30, datë 31.03.2003 janë paguar për përdorim minibari në hotele shoferi me 9.9 USD, 5.35 USD këshilltari dhe nga 9 Euro secili dy shoqëruesit e kryeministrit.

 

Më datë 09.04.2002 dhe nr. 4, dt. 28.04.2002 janë paguar respektivisht zëdhënësi i shtypit me 5.85 Euro, sipas faturës së hotelit nr. 103202, datë 12.04.2002 dhe këshilltari në shumën 13.06 Euro për shpenzime telefoni.

 

Më datë 12.04.2002 është rimbursuar shoqëruesi me 14.31 Euro për shpenzime ushqimi dhe telefoni, sipas fatures së hotelit nr. 277484, datë 17.04.2002, ndërkohë që është trajtuar me dietë të plotë për shërbimin në Angli.

 

Më datë 17.04.2002 është paguar zëdhënësi i shtypit më shumën 27.75 Euro për shpenzime telefoni, sipas faturës së hotelit nr. 07353, datë 18.04.2002.

 

Më  datë 26.06.2002 është paguar shoferi, në shumën 75 USD, nga të cilat 40 USD për fjetje në hotel dhe 35 USD dietë ditore. Nga kontrolli i dokumentacionit rezulton se siguracioni i makinës për dalje jashtë shtetit është bërë në emër të këshilltarit, ndërsa fatura e shoferit për fjetje në hotel nuk është origjinale, por një dokument në gjuhën shqipe, i paqartë, dhe për më tepër i plotësuar në datën 28.05.2002, pra një muaj para shërbimit.

 

Suveniret e kushtueshme

 

Abuzime me financat e buxhetit të këshillit të ministrave vërehen edhe në blerjen e dhuratave. Me urdhër-pagesën nr. 89, është xhiruar vlera 104.000 lekë në favor të subjektit "Souvenir Klajda", për blerje dhuratash të ndryshme. Sipas procesverbalit nr. 62, për artikullin "Vazo kristali jeshile" është miratuar çmimi 19.500 lekë, ndërsa subjekti ka vendosur çmimin 29.500 lekë. Në disa raste janë blerë artikuj të njëjtë por me çmime të ndryshme dhe konkretisht "Skënderbe i vogël", "Skënderbe i mesëm" dhe "Skënderbe i madh", "Shqiponjë Argjendi në filigram", çmimet e të cilëve variojnë nga 10.000, 30.000 dhe 35.000 lekë. Me urdhër-pagesën nr. 204, është xhiruar shuma 93.600 lekë, po ky shërbim i kryer nga ky subjekt është realizuar me 86.400 lekë.

 

Me urdhër-pagesën nr. 184, datë 13.06.2002 është xhiruar në favor të "Uzinës Dinamo" sh.a. vlera 944.400 lekë, ku ka një dëm ekonomik në shumën 10.090 lekë.

 

Në artikullin letër për fotokopje janë shpenzuar më tepër 10.800 lekë.

 

Burimet pohojnë se në 7 raste, në shumën 1.333 mijë lekë në faturat e pritje-percjelljeve janë likuiduar edhe shpenzimet për transportin e delegacioneve me mjetet e DSHQ, ndërsa në 3 raste, në shumën 1.100 lekë, janë kryer pagesa edhe për blerje cigare.

 

Tenderat

 

Tenderat janë një zë tjetër ku janë regjistruar shkelje dhe humbje të shumave të konsiderueshme financiare. Në 2002 janë zhvilluar 6 tendera me 45 000 mijë lekë dhe janë lidhur 6 kontrata me vlerë 42 722 mijë lekë, nga të cilat: 3 tendera të hapur me fond 32 000 mijë lekë, 2 tendera të kufizuar, me fond 5 500 mijë lekë dhe 1 tender i drejtpërdrejtë me fond 7 500 mijë lekë.

 

Në tenderin  "Abonimet në organet e shtypit periodik për vitin 2002", është shkaktuar një dëm prej 7 505 mijë lekë nga ofertuesi, ndërsa në tenderin "Blerje letër A 4", dëmi është  3 000 mijë lekë.

Në tenderin "Blerje nafte dhe benzine" ka një humbje prej 18 999 mije lekë, në tenderin  "Blerje goma të reja për automjetet", ka një dëm ekonomik prej 2 455 mijë lekë, në tenderin "Riparimi i automjeteve të Merzedes - benz", humbja është 7 498 mijë lekë, kurse shpenzime të tepërta janë bërë edhe për riparim dhe zëvendësim të mjeteve të këmbimit për makina të ndryshme në aparatin e kryeministrisë.

 

Humbje janë shënuar edhe në tenderat e zhvilluara gjatë gjashtëmujorit të parë të vitit 2003. Kështu janë zhvilluar 4 tendera me 12 850 mijë lekë dhe janë lidhur 4 kontrata me vlerë 9 037 mije lekë, nga të cilat 3 tendera të hapur me 10 450 mijë lekë dhe 1 tender i kufizuar, me 2 400 mijë lekë. Në tenderin "Abonimin e Aparatit të Këshillit të Ministrave, dëmi është 4 457 mije lekë, në tenderin "Blerje materiale kancelarie" dhe "Blerje bojëra për fax, printer fotokopje", humbja shënohet në shifrën e 1 108 mijë lekë, në tenderin "Blerje bojra për fax, printer fotokopje", ka një dëm prej 1 737 mijë lekë.