Përmbajtja:

• Presidenti Rugova nderohet nga Komunuelthi i Pensilvanisë si mik i Shteteve të Bashkuara të Amerikës

• Nëse standardet nuk përmbushen shtyhen bisedimet për statusin përfundimtar të Kosovës, thotë Holkeri

• Pesë pjesëtarë të TMK-s të arrestuar nga policia ndërkombëtare u liruan dje pasdite

• Deklaratë e Zyrës së Presidentit në lidhje me arrestimet e pjesëtarëve të TMK-së

• Reagim i Kryeministrit Rexhepi ndaj arrestimit të Selim Krasniqit

• Nëntë kompani përmbushin kriteret për të marrë pjesë në tenderin e telefonisë mobile

• Ministrja e Shëndetësisë së Kosovës do të vizitojë Shqipërinë

• Fillon ndërtimi i qendrës së parë të kardiokirurgjisë

• AAK kundërshton ashpër arrestimet e djeshme

• Dialogu Prishtinë-Beograd për çështje teknike mund të fillojë në fund të shkurtit apo në fillim të marsit

• Institucionet e Kosovës kundërshtojnë përfshirjen e "Qendrës koordinuese serbe" në dialogun për çështje teknike

• Shtabi i përgjithshëm i TMK-së arrestimet e pjesëtarëve të saj i cilëson si një goditje ndaj luftëtarëve të UÇK-së

• Të rinjtë e Gjilanit, Kumanovës dhe Preshevës ndërtojnë ura bashkëpunimi në rajon

• Në Shtime u përurua Qendra Sociale, e cila do të përkujdeset për 35 mijë banorë

• Regjistrimi i popullsisë është një nga prioritetet e Entit të Statistikës

• Brovina: "Nuk jam anëtare e grupit punues për bisedime"

• KK i Podujevës aprovoi buxhetin e komunës për vitin 2004

• Del Ponte thotë se po hetohen dy raste për krime lufte në Kosovë gjatë viteve 1998/1999

• Nano i hapur për hetim anti-korrupsion

• Mark Camaj ambasador i ri i Unionit serbo-malazez në Tiranë

• Policia malazeze ka arrestuar një shtetas shqiptar me dy kg heroinë

• Presidenti maqedonas nuk e ka nënshkruar Ligjin për zyrtarizimin e Universitetit të Tetovës

• Qindra anëtarë të sindikatave të Maqedonisë kanë protestuar në Shkup

• Opozita kërkon një qeveri teknike që do të përgatiste kushtet për zgjedhjet e ardhshme në Shqipëri

• Vritet një ushtar amerikan

• Të paktën 17 persona kanë humbur jetën në Brazil

• Të paktën 25 ushtarë amerikanë janë plagosur në një aksident në Kuvajt

• Paralajmërim britanik për sulme në Arabinë Saudite

• Holanda do të kthejë azilantë

• Arrestohen 5 veta për vrasjen e Akila al-Hashimit

• Khatami bën thirrje për pjesëmarrje në votime

Presidenti Rugova nderohet nga Komunuelthi i Pensilvanisë si mik i Shteteve të Bashkuara të Amerikës

  

Prishtinë, 17 shkurt 2004 - Presidenti i Kosovës, Dr. Ibrahim Rugova, ka marrë një fletëlavdërim nga Komonuelthi i Pensilvanisë si "mik i Shteteve të Bashkuara të Amerikës" dhe njeri që punon për të "përmbyllur kornizën ligjore për pavarësinë e Kosovës". Gjenerali Xheri Bek, komandant i Brigadës Multinacionale të KFOR-it Lindja, i cili ishte për një vizitë lamtumirëse te Presidenti i Kosovës ditën e hënë, ia dorëzoi Dr. Rugovës fletëlavdërimin e nënshkruar nga zëvendësguvernatorja e Pensilvanisë, znj. Kethrinë Bejkër Noll (Catherine Baker Knoll).   Më poshtë po e japim tekstin e plotë të fletëlavdërimit.

 

"President Rugova, si zëvendësguvernatore e Komonuelthit të shquar të Pensilvanisë, jam e nderuar të lartësoj arritjet tuaja si President i Kosovës. Miqësia juaj ndaj Shteteve të Bashkuara të Amerikës ka qenë në të mirë si të Kosovës ashtu edhe të Shteteve të Bashkuara. Fryma juaj e ngrohtë e bashkëpunimit është diç drejt së cilës aspirojnë të gjithë njerëzit e këtij Komonuelthi të shquar dhe të kombit:

I dua më fort ëndrrat për të ardhmen sesa historinë e të kaluarës. Tomas Xheferson (Thomas Jefferson)

Puna juaj për të krijuar kuvendin e zgjedhur me votë të lirë, forcën policore të vendit tuaj si dhe Trupat e Mbrojtjes së Kosovës demonstron angazhimin tuaj për t'i shërbyer popullit. Pensilvania mirëpret miqësinë tuaj të provuar.

Puna juaj me forcat e tjera politike shqiptare të Kosovës dhe përpjekja për të përmbyllur kornizën ligjore për pavarësinë e Kosovës ka rëndësi shumë të madhe dhe, prandaj, ju ftoj që të vini në Komonuelthin e Pensilvanisë për t'i forcuar marrëdhëniet tona me Kosovën si shoqëri të lirë e demokratike.

Përmes veprimeve tuaja gjatë gjithë jetës, ju keni përçuar vullnetin e mirë dhe harmoninë e popullit të Kosovës dhe keni vendosur standarde që duhet t'i ndjekin të tjerët.

 

Teksa vazhdoni të promovoni parimet e karakterit të mirë dhe të jetesës me domethënie për t'i arritur objektivat tuaja, kujtohuni që gjithmonë t'u përmbaheni fuqishëm parimeve si në kohë vështirësish ashtu edhe në kohë suksesi.

Në emër të 12 milionë qytetarëve të Pensilvanisë, dua t'ju shpreh lavdatë për arritjet tuaja të jashtëzakonshme dhe t'ju falënderoj për miqësinë tuaj ndaj Shteteve të Bashkuara.

 

Vazhdofshi me suksese të mëdha dhe paqe në gjithë përpjekjet tuaja në të ardhmen", thuhet në fund të tekstit të fletëlavdërimit të nënshkruar nga Kethrinë Bejkër Noll (Catherine Baker Knoll) zëvendësguvernatore e Pensilvanisë.

 

 

Nëse standardet nuk përmbushen shtyhen bisedimet për statusin përfundimtar të Kosovës, thotë Holkeri

 

Prishtinë, 17 shkurt 2004 - Nëse standardet nuk përmbushen deri në vitin 2005 mund të shtyhet fillimi i bisedimeve për statusin përfundimtar të Kosovës, tha sot shefi i UNMIK-ut Hari Holkeri, duke folur para mediave për vizitën e tij në Nju Jork, Londër dhe Bruksel. Ai tha se në të gjitha këto qendra të vendosjes ka marrë përkrahjen për vazhdimin e procesit të implementimit të standardeve.

 

Holkeri nuk saktësoi ndonjë arsye për pohimin e tij, por shtoi se serbët nuk po marrin pjesë në grupet punuese, duke lënë të kuptohet se mospjesëmarrja e serbëve është një nga arsyet që do të bëhet shtyrja e bisedimeve rreth statusit të Kosovës.

Sipas Holkerit vazhdimi i dialogut me Beogradin është shtyrë për shkaqe teknike, ndërkaq në delegacionin e Beogradit ai tha se sheh një "partner serioz" për bisedime.

 

Ndërkaq, duke folur për procesin e privatizimit, Holkeri tha se gjatë takimeve që ka pasur në Këshillin e Sigurimit ka marrë mbështetjen për vazhdimin e privatizimit. "Të gjithë bashkëbiseduesit e mi, përkatësisht të gjithë 15 anëtarët e KS kanë shprehur interesim të madh për vazhdimin e privatizimit në Kosovë", tha Holkeri. Në lidhje me sugjerimet dhe vërejtjet e palës serbe në tekstin e standardeve, ai tha se do t'i shqyrtojë ato qëndrime, por theksoi se pala serbe dhe qeveria serbe nuk mund dhe as që kanë të drejtë veto për standardet.

Njëherit ai paralajmëroi se do të ketë një takim me Bordin e AKM-së ku do të shqyrtohet mundësia e zhbllokimit të procesit të privatizimit.

 

 

Pesë pjesëtarë të TMK-s të arrestuar nga policia ndërkombëtare u liruan dje pasdite

 

Prishtinë, 17 shkurt 2004 - Pesë persona të arrestuar nga forcat e kombinuara të policisë dhe KFOR-it në Prizren dhe Prishtinë, janë liruar pasdite, ndërkaq gjenerali i TMK-së, Selim Krasniqi, togeri Milaim Laftifi, kapitem Xhavit Elshani dhe nënkolonel Bedri Zyberaj edhe mëtutje po mbahen në arrest.

 

 

Deklaratë e Zyrës së Presidentit në lidhje me arrestimet e pjesëtarëve të TMK-së

 

Prishtinë, 17 shkurt 2004 - Arrestimi i disa pjesëtarëve të TMK-së, të dyshuar se kanë kryer krime serioze, duhet parë si veprim të organeve për zbatim të ligjit ndaj individëve e assesi damkosje të insitucionit të rëndësishëm të Kosovës, Trupave të Mbrojtjes të Kosovës (TMK), thuhet në një deklaratë të Zyrës së Presidentit të Kosovës në lidhje me këto arrestime.

"Si në çdo shoqëri dhe vend demokratik ku ka sundim të ligjit, të arrestuarit duhet të trajtohen në pajtim me procedurën adekuate ligjore për të dëshmuar fajësinë apo pafajësinë e tyre", thuhet në këtë deklaratë.

 

 

Reagim i Kryeministrit Rexhepi ndaj arrestimit të Selim Krasniqit

 

Prishtinë, 17 shkurt 2004 - Lidhur me arrestimin e gjeneral Selim Krasniqi, komandant i Zonës së Dytë të Trupave Mbrojtëse të Kosovës dhe 3 oficerëve të tjerë të këtyre trupave ka reaguar kryeministri Bajram Rexhepi.

 

Kryeministri Rexhepi në emër të Qeverisë insiston në trajtimin individual e të izoluar të këtyre rasteve pa implikuar organizatën të cilës i takojnë personat në fjalë. Në këtë drejtim, Qeveria insiston në procedimin sa më të shpejtë të këtyre rasteve në mënyrë që të gjitha provat eventuale të ekzaminohen në procedurë të drejtë e të hapur gjyqësore, thuhet në komunikatën për opinion të kryeministrit Bajram Rexhepi.

 

Qeveria vazhdimisht ka theksuar se asnjëri nuk duhet të jetë mbi ligjin dhe se e njëjta duhet të vlejë për të gjithë personat pavarësisht nga përkatësia etnike apo funksioni që mund të kenë. Qeveria rithekson përkrahjen e saj për TMK-në si një institucion tejet i rëndësishëm, integriteti i të cilit si tërësi duhet të respektohet dhe të mbrohen nga të gjithë, thuhet të komunikatën për opinion të kryeministrit Bajram Rexhepi.

 

 

Nëntë kompani përmbushin kriteret për të marrë pjesë në tenderin e telefonisë mobile

 

Prishtinë, 17 shkurt 2004 - Bordi i ART-së, në mbledhjen e mbajtur më 13 shkurt, ka shqyrtuar punën e deritanishme në procedurat parakualifikuese të telefonisë mobile. Duke u mbështetur në kushtet e parapara nga Ministria TPT për fazën e parë, ka konstatuar se kompanitë e poshtëshënuara:

Kosova International Telecommunication LLC eless International, Turkcell, Albacell, Mobimak, Consortium, "Motorola"&ASG Cosmo A &Others, Tele2, Kostel, Alliance Liquid Assets Groups Backbone Communications dhe Mobikos&Mobitel kanë përmbushur kriteret e përcaktuara dhe si të tilla mund të marrin pjesë në tenderin për telefoninë mobile.

ART në bashkëpunim me MTPT-në do të precedojë më tutje konform Ligjit për Telekomunikacionin, thuhet në një njoftim të Bordit të ART-së.

 

 

Ministrja e Shëndetësisë së Kosovës do të vizitojë Shqipërinë

 

Prishtinë, 17 shkurt 2004 - Prej 18 deri më 20 shkurt, ministrja e Shëndetësisë së Kosovës, Dr.Resmije Mumxhi me bashkëpunëtorët do të bëjë një vizitë pune në Shqipëri.

Ministrja Mumxhi do të ketë takime zyrtare në Ministrinë e Shëndetësisë të Shqipërisë. Pritet të vazhdohen marrëveshjet e deritashme me interes të përbashkët dhe për mundësitë e zhvillimit të mëtutjeshëm të bashkëpunimit të ndërsjellë.

 

 

Fillon ndërtimi i qendrës së parë të kardiokirurgjisë

 

Prishtinë, 17 shkurt 2004 - Të enjtën organizohet një solemnitet me rastin e fillimit të ndërtimit të Qendrës Medicinale INTERMED në lokacionin Qyteti Italia afër Prishtinës.

Qendra Medicinale inkuadron në vete ndërtimin e qendrës së parë të kardiokirurgjisë në Kosovë.
Në këtë solemnitet janë të ftuar përfaqësuesit më të lartë të vendit dhe ndërkombetarë, përfaqësues të mjeksisë kosovare dhe mysafirë të tjerë.

 

 

AAK kundërshton ashpër arrestimet e djeshme

 

Prishtinë, 17 shkurt 2004 - Aleanca për Ardhmërinë e Kosovës (AAK) thekson se e ka pritur me indinjatë të thellë lajmin për arrestimin e gjeneral Selim Krasniqit, komandant i Zonës II Mbrojtëse dhe tre eprorëve të tjerë të lartë të Trupave Mbrojtëse të Kosovës.

"AAK beson në drejtësinë, rendin dhe ligjin, por nuk u beson improvizimeve të tilla të drejtësisë dhe kundërshton ashpër arrestimet që shkojnë në favor të politikës ditore. Ky dhe veprime të tjera të tilla janë në vazhdën e eksperimenteve me drejtësinë që po bëhen në Kosovë", thuhet në një komunikatë të AAK-së.

"AAK konsideron se bashkëpunëtorët e Millosheviqit kurrë nuk mund të vendosin drejtësi në Kosovë.

 

Po të kishte drejtësi këtu, atëherë dje do të duhej arrestuar udhëheqësi, mbështetësi dhe nxitësi i të gjitha situatave destabilizuese dhe bandave kriminale në Kosovë, Nebojsha Çoviq dhe jo luftëtari i lirisë, gjenerali Selim Krasniqi", thotë AAK dhe konsideron se "arrestimet e djeshme goditën edhe njëherë drejtësinë në Kosovë dhe ato janë të drejtuara po ashtu kundër vlerave madhore të UÇK-së, TMK-së, paqes, stabilitetit dhe të ardhmes së Kosovës".

 

 

Dialogu Prishtinë-Beograd për çështje teknike mund të fillojë në fund të shkurtit apo në fillim të marsit

 

Prishtinë, 17 shkurt 2004 - Kryeadministratori i Kosovës, Hari Holkeri dhe shefi i të ashtuquajturës "Qendra koordinuese serbe për Kosovën", Nebojsha Çoviq, janë dakorduar gjatë takimit të djeshëm në Prishtinë, që dialogu për çështje teknike ndërmjet Prishtinës dhe Beogradit mund të fillojë në javën e fundit të muajit shkurt, apo në javën e parë të muajit mars. Po ashtu ata janë pajtuar që delegacioni i Prishtinës duhet të jetë me përbërje shumetnike.

 

Ndërkaq, përfaqësuesit e serbëve të Kosovës, të cilët do të marrin pjesë në delegacionin e Prishtinës ende nuk kanë caktuar përfaqësuesit e tyre. Me sugjerimin e Çoviqit, Holkeri gjithashtu ka pranuar që të mbledhë grupin punues, i themeluar me marrëveshjen Hakerup - Çoviq në vitin 2001.

 

Takimi i tij do të mbahet në mars. Nga ky takim nuk është njoftuar ku do të zhvillohen bisedat, mirëpo mediat serbe njoftuan se Prishtina do të jetë vendi i rifillimit të dialogut shqiptaro-serbë.

Sipas një kumtese për media të UNMIK-ut, Holkeri ka theksuar se shpreson që serbët do të marrin pjesë në grupet punuese. Ai shfaqi shpresën se koalicioni "Kthimi" do t'ia dorëzojë emrat deri të mërkurën.

Ndërkaq, pas kthimit në Beograd, Çoviq lidhur me gatishmërinë e palës serbe për bisedime ka thënë: "Ne jemi të gatshëm dhe mund të hapim çfarëdo teme: të zhdukurit, kthimin, energjetikën, transportin dhe telekomunikacionin.

 

Ekzistojnë njerëzit, zëvendës apo ndihmësministra, që janë ekspertë, të cilët do t'i udhëhiqnin grupet e punës. Në këtë kuptim bisedimet ndërmjet Prishtinës mund të fillojnë që nesër", tha Çoviq.

 

 

Institucionet e Kosovës kundërshtojnë përfshirjen e "Qendrës koordinuese serbe" në dialogun për çështje teknike

 

Prishtinë, 17 shkurt 2004 - Institucionet e Kosovës edhe mëtutje kundërshtojnë që dialogu për çështje teknike me Beogradin të zhvillohet me të ashtuquaturën "Qendër kordinuese të Serbisë për Kosovën". Kryeministri Bajram Rexhepi thotë se institucionet e Kosovës nuk mund t'i ndalojnë takimet e Holkerit me Çoviqin, por rezultatet nga këto takime nuk do t'i obligojnë për asgjë institucionet e Kosovës.

Kryetari i Kuvendit të Kosovës Nexhat Daci tha se Kuvendi do ta mbështetë çdo vendim të Qeverisë së Kosovës. Në anën tjetër nënkryetar i LDK-së Kolë Berisha thotë se për aq sa varet nga pala kosovare LDK do të insistojë që të mos bisedohet me "Qendrën koordinuse serbe".

 

 

Shtabi i përgjithshëm i TMK-së arrestimet e pjesëtarëve të saj i cilëson si një goditje ndaj luftëtarëve të UÇK-së

 

Prishtinë, 17 shkurt 2004 - Shtabi i përgjithshëm i TMK-së arrestimet e djeshme të pjesëtarëve të saj i ka cilësuar si një goditje të re ndaj luftëtarëve të UÇK-së, arrestime këto të cilat dëmtojnë stabilitetin e TMK-s dhe zhvillimin e saj. Zëdhënësi i kësaj trupe, Shemsi Syla këtë e quan fushatë kundër TMK-së.

 

Ai thotë se Shtabi i TMK-së kategorikisht i hedh poshtë akuzat për krime lufte ndaj civilëve për të cilat akuzohen oficerët e UÇK-së dhe i konsideron këto akuza të padrejta dhe si përpjekje për të vënë balancë midis luftës së drejtë që ka bërë UÇK-ja dhe krimeve që ka bërë ushtria dhe policia serbe në Kosovë.

 

TMK-ja respekton ligjin dhe parimin se para ligjit të gjithë janë të barabartë, por është kundër standardeve të dyfishta dhe tendencave për të vënë balancë të paqëndrueshme, të cilat nuk e ndihmojnë procesin.

 

 

Të rinjtë e Gjilanit, Kumanovës dhe Preshevës ndërtojnë ura bashkëpunimi në rajon

 

Gjilan, 17 shkurt 2004 - Bashkëpunimi i komunave Gjilan-Preshevë-Kumanovë, një projekt ky që ka fituar përkrahje edhe nga Këshilli i Evropës, Pakti i Stabilitetit dhe Instituti Lindje-Përendim, ka vazhduar të marten në Gjilan, me një takim të të rinjve, të cilët kanë zhvilluar një debat rreth problemeve të përbashkëta si dhe bashkëpunimin e këtij mikroregjioni.

Programi ka për qëllim që t`i lehtësojë kontaktet ndërmjet këtyre komunave, pas konfliktit në të cilin ishte përfshirë ky rajon dhe t`i japë më shumë kuptim fjalës multietnicitet. Njëkohësisht synohet që në këtë mënyrë, duke inkurajuar takimet dhe dialogun ndërmjet të rinjve, t`iu ofrohet atyre mundësia të ndërtojnë një rrejt komunikimi të ndërsjellë në mikroregjion.

Delegacionet kanë qenë të përbëra nga të rinj shqiptarë, maqedonas, serbë, turq dhe romë dhe ata janë pritur edhe nga kryetari i komunës së Gjilanit, Lutfi Haziri, i cili i ka inkurajuar për përkrahjen që po i japin modelit bashkëpunues në rajon, në kuadër të proceseve intergruese që po zhvillohen në Evropën Juglindore.

Pjesëmarrësit i kanë shfaqur pikëpamjet e tyre rreth zhvillimit të rajonit si dhe bashkëpunimit vijues ndërmjet komunave Gjilan-Kumanovë-Preshevë.

 

 

Në Shtime u përurua Qendra Sociale, e cila do të përkujdeset për 35 mijë banorë

 

Shtime, 17 shkurt 2004 - Në Shtime u përurua Qendra sociale. Përurimi i këtij objekti dhe punësimi i stafit të ri do t'u mundësojë 35 mijë banorëve të Komunës të Shtimës të shpërndarë në 22 fshatra shërbime më cilësore dhe më efikase e asistencë sociale. Ndërtimin e këtij objekti e financoi Banka Botërore, ndërkaq truallin falas e dha Kuvendi komunal i Shtimes.

 

 

Regjistrimi i popullsisë është një nga prioritetet e Entit të Statistikës

 

Prishtinë, 17 shkurt 2004 - Enti i Statistikës së Kosovës në të ardhmen një nga prioritetet e tij do të ketë edhe regjistrimin e popullsisë si një projekt madhor për çdo vend. Ndërkaq, për Kosovën regjistrimi i popullsisë është tejet i rëndësishëm sepse ka shumë vite që Kosova nuk ka pasur regjistrim të popullsisë, më saktësisht që nga viti 1981.

 

Sipas drejtorit të këtij Enti, Hysni Thaçi, regjistrimi i popullsisë është një domosdoshmëri për instiucionet dhe për gjithë ata që u duhen të dhënat në vendimmarrjet e caktuara.

Ligji për regjistrimin e popullsisë është miratuar në parim nga Kuvendi i Kosovës vitin e kaluar, prandaj Enti i Statisktikës ka bërë të gjitha përgatitjet e duhura për këtë proces, ndërkohë që data e caktimit të regjistrimit është çështje politike të UNMIK-ut dhe të institucioneve vendore, thotë drejtori i këtij enti.

 

Thaçi tha se do të insistojë që regjistrimi të bëhet sa më parë, por kjo, tha ai, është kompetencë ekskluzive e UNMIK-ut dhe e shefit të tij, por edhe të institucioneve të Kosovës të cilat duhet të imponojnë një vendim të tillë.

 

 

Brovina: "Nuk jam anëtare e grupit punues për bisedime"

 

Prishtinë, 17 shkurt 2004 - Në kohën kur ende nuk ishte marrë vendim i plotë për nivelin e bisedimeve me Beogradin, u përmend edhe emri im në grupin negocues për bisedime për personat e rrëmbyer dhe të pagjetur gjatë luftës, thotë në një deklaratë Flora Brovina, kryesuese e Komisionit parlamentar për personat e rrëmbyer dhe të pagjetur gjatë luftës.

 

"Mendimin tim personal dhe si kryetare e Komisionit parlamentar për personat e rrëmbyer dhe të pagjetrur, e kam shprtehur qartë se për të rrëmbyerit gjatë luftës nuk mund të flitet si për një çështje teknike, por zbardhja e fatit të tyre duhet të jetë parakusht dhe hap i parë për krijimin e një atmosfere për bisedime", thotë zonja Brovina duke shtuar se qëndrimi i saj për këtë çështje është i qartë dhe i mjaftueshëm dhe e shpjegon pse nuk mund të jetë anëtare e grupit teknik për bisedime.

 

 

KK i Podujevës aprovoi buxhetin e komunës për vitin 2004

 

Podujevë, 17 shkurt 2004 - Kuvendi komunal i Podujevës në seancën e sotme të udhëhequr nga kryetari Agim Veliu aprovoi me shumicë votash buxhetin për vitin 2004, mori vendimin për emërimin e u.d së Kryeshefit të Ekzekutivit dhe për shpalljen e konkursit për këtë post.

 

Buxheti për vitin 2004 kap shumën prej 7.999.145 euro. Sipas vendimit të sotëm Granti i Qeverisë i aprovuar edhe nga Ministria për Ekonomi e Financa është 6.837.259 euro, ndërkaq që nga të hyrat vetjake komuna e Podujevës planifikon të inkasojë 1.161.866 euro.

Gjithashtu sot Kuvendi komunal i Podujevës emëroi njëzëri për ushtrues të detyrës së Kryeshefit Ekzekutiv z. Mehmet Gashi, drejtor i drejtorisë për buxhet e financa si dhe mori vendimin për shpalljen e konkursit për postin e Kryeshefit të ekzekutivit.

 

 

Del Ponte thotë se po hetohen dy raste për krime lufte në Kosovë gjatë viteve 1998/1999

 

Hagë, 17 shkurt 2004 - Kryeprokurorja e Tribunalit të Hagës, Karla del Ponte në një intervistë për Agjencinë franceze të lajmeve AFP ka deklaruar se po hetohen dy raste për krime lufte në Kosovë gjatë viteve 1998/1999, ku të akuzuarit janë shqiptarë të Kosovës.

 

Sipas zonjës Del Ponte ajo ka hasur në vështirësi në rastet në fjalë për shkak të tërheqjes së bashkësisë ndërkombëtare. Deri më tash tre shqiptarë janë arrestuar nga Gjykata e Hagës dhe asnjë prej tyre nuk i ka pranuar akuzat.

Ndërkaq, administrata e OKB-së në Kosovë ka deklaruar në përgjigje të ankesave të zonjës Del Ponte se bashkëpunimi i UNMIK-ut me Gjykatën e Hagës është i shkëlqyer, por prokurorja nuk ka thënë nëse ishte UNMIK-u apo KFOR-i ata që hezitonin, por ka përdorur termin bashkësia ndërkombëtare.

 

 

Nano i hapur për hetim anti-korrupsion

 

Tiranë, 17 shkurt 2004 - Kryeministri shqiptar Fatos Nano ka thënë se është i hapur ndaj hetimeve lidhur me akuzat e opozitës për përfshirje në korrupsion. Ai tha se qeveria është e angazhuar në luftën kundër korrupsionit, monopoleve e të lidhjes së politikës me krimin.

"Jam i hapur... të ballafaqohem dhe të hetohem në çdo instancë për çfarëdo pretendimi," tha zoti Nano duke reaguar ndaj akuzave të kreut të Partisë Demorkatike të opozitës Sali Berisha.

"Nuk do të heq për asnjë sekondë dorë nga përdorimi i të gjitha instrumentave ligjorë që i jep qeverisë dhe mazhorancës kushtetuta për të luftuar korrupsionin, kriminalitetin, evazionin, kontrabandën, konfliktet e interesave, monopolet në treg dhe sidomos çdo lidhje kriminale të politikës së regjimit të Berishës me korrupsionin dhe trafiqet në ekonomi," tha kryeministri shqiptar.

Kreu i PD-së këmbëngul vazhdimisht se rritja e fundit e çmimeve, të bukës dhe shërbimit të telefonisë fikse, është rezultat i monopoleve të vendosura nga njerëz të kryeministrit Nano.

 

 

Mark Camaj ambasador i ri i Unionit serbo-malazez në Tiranë

 

Beograd, 17 shkurt 2004 - Presidenti i Unionit të Serbisë dhe Malit të Zi Svetozar Maroviq ka emëruar Mark Camajn ambasador të ri të këtij unioni në Tiranë. Camaj është profesor i të drejtës ndërkombëtare në Fakultetin Juridik të Podgoricës. Në postin e ambasadorit në Shqipëri Camaj erdhi pas Cafo Kapetanoviqit, i cili ishte funksionar i Partisë Socialiste Popullore.

 

 

Policia malazeze ka arrestuar një shtetas shqiptar me dy kg heroinë

 

Podgoricë, 17 shkurt 2004 - Në Podgoricë është arrestuar shtetasi shqiptar nga Tirana Bashkim Doko (40) për shkak të trafikut me drogë. Me rastin e arrestimit tek ai policia ka gjetur 2 kg e 33 gram heroinë, vlera e të cilit në treg është 100 mijë euro, njoftojnë mediat malazeze.

 

Doko kishte qenë i pëcjellë nga policia për gjashtë muaj me radhë dhe që prej një viti po jetonte në një paralagje të kryeqytetit malezez në një banesë me qira. Bashkim Doko është arrestuar më 13 shkurt në lokalitetin Tuz afër Podgoricës.

 

 

Presidenti maqedonas nuk e ka nënshkruar Ligjin për zyrtarizimin e Universitetit të Tetovës

 

Shkup, 17 shkurt 2004 - Presidenti maqedonas Boris Trajkovski nuk e ka nënshkruar Ligjin për zyrtarizimin e Universitetit të Tetovës për shkak të presioneve, që i bëhen atij nga partia opozitare maqedonase VMRO-DPMN. Kështu ka bërë të ditur me një komunikatë kabineti i Presidentit maqedonas.

 

 

Qindra anëtarë të sindikatave të Maqedonisë kanë protestuar në Shkup

 

Shkup, 17 shkurt 2004 - Pas përfundimit të djeshëm të grevës së arsimtarëve në Maqedoni prej dje një grevë kanë paralajmëruar makinistët e trenave. Në anën tjetër qindra anëtarë të sindikatave të Maqedonisë kanë protestuar dje në Shkup, duke parakaluar para disa ministrive dhe ndërtesës qeveritare.

 

Ata kërkuan respektimin e marrëveshjes sociale dhe kolektive, të nënshkruara me Qeverinë, si dhe ndalimin e zvogëlimit të të drejtave të punëtorëve. Lidhja e Sindikatave të Maqedonisë, ka kërkuar edhe zgjidhjen e statusit të punëtorëve të ndërmarrjeve falimentuese, si dhe nuk pranojnë largimin nga puna të punonjësve nga sektori publik. Në mesin e protestuesve shumica ishin punëtorë të arsimit.

 

 

Opozita kërkon një qeveri teknike që do të përgatiste kushtet për zgjedhjet e ardhshme në Shqipëri

 

Tiranë, 17 shkurt 2004 - Në një tryezë të opozitës demokratike në Tiranë u kërkua që në Shqipëri të krijohet një qeveri teknike, e cila siç është thënë, do të përgatiste kushtet për zgjedhjet e ardhshme. Kryetari i Partisë Demokratike Sali Berisha tha se kjo qeveri mbi të gjitha do të përgatiste vendin për zgjedhje të lira dhe të ndershme.

 

Idenë për një qeveri teknike e mbështeti edhe kryetari i Partisë Republikane Fatmir Mehdiu, i cili shfaqi mendimin se qeveria socialiste duhet doemos të largohet. Kryetari i Partisë Lëvizja e Legalitetit, Ekrem Spahija gjithashtu tha se protestat me moton: "Nano ik", duhet të zhvillohen në të gjithë Shqipërinë, duke përfshirë edhe organizatat joqeveritare.

Protesta që do të zhvillohet më 21 shkurt me moton: "Nano ik", sipas partive opozitare, pritet të jetë më e madhja. Kjo lëvizje, sipas kryetarit të PD-së, është e diktuar nga shumë faktorë, por mbi të gjitha për korrupsionin e madh, që ekziston dhe faktin, që ndaj personave të korruptuar, nuk është marrë asnjë masë ligjore.

 

 

Vritet një ushtar amerikan

 

Bagdad, 17 shkurt 2004 - Nga shpërthimi i një bombe skaj rrugës është vrarë një ushtar amerikan në veri të Irakut, thanë sot zyrtarët ushtarakë amerikanë. Ky është ushtari tretë që është vrarë brenda 24 orëve të fundit, njofton Rojter.

 

 

Të paktën 17 persona kanë humbur jetën në Brazil

 

Rio de Zhanejro, 17 shkurt 2004 - Të paktën 17 persona kanë humbur jetën dhe 25 janë lënduar kur kamioni me punëtorë rrëshqiti nga rruga në një kanal në Brazilin verilindor.

Kamioni trasportonte rreth 50 punëtorë në plantazhin e portokalleve, kur shoferi humbi kontrollin, u rrokulls disa herë dhe rrëshqiti në kanal.

 

 

Të paktën 25 ushtarë amerikanë janë plagosur në një aksident në Kuvajt

 

Kuvajt, 17 shkurt 2004 - Të paktën 25 ushtarë amerikanë janë plagosur kur autobusi i tyre u rrokullis afër bazës ajrore amerikane në veri të Kuvajtit, ka thënë zëdhënësi ushtarak amerikan të martën, njofton Rojter.

Incidenti ka ndodhur të dielën afër bazës ajrore Ali al-Salem, 45 mila në veri të qytetit të Kuvajtit, tha kapiteni Randal Baukom.

 

 

Paralajmërim britanik për sulme në Arabinë Saudite

 

Londër, 17 shkurt 2004 - Ministria e Jashtme britanike ka paralajmëruar se beson që terroristët mund të jenë duke planifikuar sulme të reja në Arabinë Saudite. Ajo ka përsëritur gjithashtu paraljamërimin e saj kundër udhëtimeve jo të domosdoshme në këtë vend.

Ministria e Jashtme nuk hyri në hollësi se çfarë e shtyu atë të bënte paralajmërimin e ri se terroristët mund të jenë "në fazat përfundimtare" të përgatitjes së sulmeve.

Edhe në të shkuarën ka pasur paralajmërime të tilla për Arabinë Saudite dhe vitin e shkuar ndodhën sulme serioze kundër disa zonave të banuara në maj dhe nëntor, ku gjetën vdekjen më shumë se 50 vetë.

 

 

Holanda do të kthejë azilantë

 

Amsterdam, 17 shkurt 2004 - Parlamenti holandez pritet të votojë lidhur me një ligj të debatueshëm të paraqitur nga qeveria e qendrës së djathtë që do të çojë në përzënien e mijëra azil-kërkuesve të cilëve u janë refuzuar kërkesat.

Ky ligj e ka ndarë thellë shoqërinë holandeze që ka famën për tolerancë dhe e ka vënë qeverinë dhe opozitën ballë për ballë në një sitem politik të njohur për konsensus.

Çështja e kthimit të 26 mijë azilkërkuesve në vendet e tyre ka dominuar axhendën politike për muaj të tërë.
Politika e re e qeverisë ka mbështetje nga një shumicë në parlament, por shumë në shoqërinë holandeze e kundërshtojnë, si Këshilli i Kishave dhe një numër i madh kryetarësh bashkie.

Komisioneri i lartë i OKB-së për refugjatët, holandezi Ruud Lubbers, ka bërë thirrje për kujdes.

 

 

Arrestohen 5 veta për vrasjen e Akila al-Hashimit

 

Bagdad, 17 shkurt 2004 - Në Irak, zyrtarët thonë se kanë arrestuar 5 irakianë në lidhje me vrasjen vitin e kaluar të një anëtareje të Këshillit Qeverisës. Zyrtarë të Ministrisë së Brendshme thanë të hënënse të dyshuarit, të cilët nuk u identifikuan, ishin arrestuar në fillim të shkurtit në qytetin Amarah, rreth 300 kilometra në jugperëndim të Bagdadit.

Anëtarja e Këshillit Qeverisë, Akila al-Hashimi u qëllua disa herë me armë zjarri kur persona të paidentifikuar i dolën asaj në pritë më 20 shtator. Ajo vdiq pas pesë ditësh.

 

 

Khatami bën thirrje për pjesëmarrje në votime

 

Teherean, 17 shkurt 2004 - Presidenti i Iranit Mohamed Khatami u ka bërë thirrje njerëzve të kapërcejnë apatinë e tyre lidhur me zgjedhjet parlamentare të së premtes dhe të votojnë me shumicë për të parandaluar pakicën e djathtë që të marrë pushetin.

Presidenti, që vetë u zgjodh për të sjellë më shumë demokraci, tha se një rezultat i tillë nuk do të ishte në interes të Iranit. Deputeti reformist Reza Jusefian, i cili është skualifikuar nga gara, është kundër thirrjes së presidentit për të shkuar në votime.

"Deputetët kanë deklaruar se sipas mendimit të tyre këto zgjedhje nuk janë të drejta sepse nuk ka konkurencë të vërtetë midis dy rivalëve," tha ai.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |