Përmbajtja:

• Presidenti Rugova përuroi sallën e renovuar të Kuvendit të Kosovës

• Presidenti Rugova përgëzoi Luan Krasniqin

• Luan Krasniqi riktheu titullin e kampionit evropian në boks

• Presidenti Rugova tha se Kosova gjithnjë e më shumë po gëzon përkrahje në botë në rrugën drejt pavarësisë

• Holkeri njoftoi për arrestimin e pjesëtarëve të TMK-së

• Është arrestuar komandanti i Zonës së dytë të TMK-së dhe shtatë pjesëtarë të tjerë të saj

• Gjilani dhe Lipjani dakordohen për ndërtimin e një rruge nga drejtimi i Zhegocit

• Filloi mermetimi i rrugës Zhegër - Shurdhan, e cila në të ardhmen parashihet të bashkohet me koridorin e tetë

• Holkeri takohet sot në Prishtinë me nënkryetarin e Qeverisë serbe

• Prizren: Është arrestuar komandanti i Zonës së dytë TMK-së dhe disa persona të tjerë

• Feler thotë se shkrimet për rrezikun e vrasjeve politike janë informata të dhëna nga policia e UNMIK-ut

• Angjela Xhozef thotë se të kërcënuarit me vrasje janë zyrtarë të lartë të LDK-së

• Parlamentarët kosovarë vizitojnë Shqipërinë

• Nisma "Për një Universitet TJETËRQYSH" të mërkurën organizon një prtestë në Prishtinë

• Në Ohër përfundoi punimet takimi për hartimin e strategjisë për zhvillimin e arsimit të lartë në Kosovë

• Në Gjilan vazhdon gjykimi kundër udhëheqësit të ish-UÇPMB-së

• Ndërpritet greva në Maqedoni, shkollat fillojnë punën

• Parlamentarë evropianë thonë se çamët në Greqi duhet t'i gëzojnë po ato të drejta, sikur grekët në Shqipëri

• Qytetarët shqiptarë në Maqedoni do të pajisen me dokumente të reja të udhëtimit

• Në Irak vriten dy ushtarë amerikanë

• Bremer flet për ndryshime të planeve

• Nisin bisedimet për Kashmirin

• Nga rebelimi i aborixhinëve dhjetra policë të plagosur në Sidnei

• Ka arritur në 38 numri i viktimave në Moskë

• Arrestohet edhe një zyrtar i lartë i ish-regjimit të Sadam Huseinit

• Vritet një ushtar amerikan dhe plagosen tre të tjerë

Presidenti Rugova përuroi sallën e renovuar të Kuvendit të Kosovës

 

Prishtinë, 16 shkurt 2004 - Me një solemnitet rasti sot u përurua salla e renovuar e Kuvendit të Kosovës, në të cilën merrnin pjesë përafqësuesit më të lartë të institucioneve vendore, por jo edhe kreu i UNMIK-ut. Përurimin e bënë Presidenti Ibrahim Rugova dhe Kryeparlametari Nexhat Daci. Presidenti Rugova tha se përurimi i sallës solemne të Kuvendit të Kosovës, është një moment solemn dhe ngjarje me rëndësi për institucionet demokratike dhe për popullin e qytetarët e vendit tonë dhe është një shenjë e progresit të Kosovës.

 

"Renovimi i sallës solemne të Kuvendit të Kosovës është ngjarje me rëndësi që tregon se institucionet e Kosovës janë të vendosura të krijojnë objekte pune dhe që do të jenë simbol i vendit tonë dhe i pavarësisë së tij", vlerësoi Presidenti Rugova, duke propozuar renovimin komplet të ndërtesës së Kuvendit për të krijuar më shumë kushte për punën e deputetëve si dhe për ndërtimin e Kryeministrisë dhe të ministrive të veçanta.

 

Presidenti Rugova përgëzoi Dacin për iniciativën që ka ndërmarrë për renovimin e sallës solemne të Kuvendit dhe që u krye me sukses.   Poashtu ai vlerësoi interierin e bukur e funksional me simbole të qëlluara historike të popullit të Kosovës që kanë hyrë edhe në historinë evropiane e perëndimore si dhe me simbolin e NATO-s që është bërë pjesë e historisë së Kosovës.   "Shpresoj se së shpejti këtu do t'i vendosim edhe simbolet shtetërore të vendit tonë, Kosovës", tha në fjalën e tij Presidenti Rugova.

 

Nga ana e tij kryeparlamentari Daci tha se sot po vendosen themelet për një punë më të përgjegjshme të parlamentit ndaj qytetarëve të Kosovës në bashkëpunim me bashkësinë ndërkombëtare.

 

"Institucionet e Kosovës nuk janë të gatshme që të bëjnë inxhinieing me kulturën shqiptare, me kulturën e traditën që është e pranuar edhe ndërkombëtarisht, sepse për muralet ndoshta profesionistët e artit mund të bëjnë vërejtje prefesionale, por jo edhe përmbajtësore", tha Daci duke aluduar më kritikat që u janë bërë muraleve të vendosura.

Kryeministri Bajram Rexhepi refuzoi të komentojë muralet e kuvendit duke mos dashur të komentojë qëndrimet e UNMIK-ut, por lavdëroi kushtet e krijuara për deputetët e Kosovës.

 

 

Presidenti Rugova përgëzoi Luan Krasniqin

 

Prishtinë, 16 shkurt 2004 - Presidenti i Kosovës Ibrahim Rugova e ka përgëzuar sot boksierin Luan Krasniqi për titullin kampion i Evropës në boks në kategorinë e rëndë.

"Me rastin e fitores së dytë të titullit kampion i Evropës në boks, Ju shprej urimet e mia të përzemërta dhe të popullit të Kosovës. Fitorja juaj e dytë e titullit kampion i Evropës është një nder për vendin tonë, Kosovën, dhe për të gjithë shqiptarët.

Duke Ju dëshiruar suksese të reja, Ju përshëndes përzemërsisht", thuhet në përgëzimet e Presidenti Rugova drejtuar Luan Krasniqit.

 

 

Luan Krasniqi riktheu titullin e kampionit evropian në boks

 

Shtutgart, 16 shkurt 2004 - Boksieri kosovar Luan Krasniqi me sukses ia doli që në një duel me boksierin turk Sinan Samil Sam, të rikthejë titullin e kampionit evropian në boks në kategorinë e rëndë, të cilin Krasniqi e kishte humbur në korrik të vitit 2002 nga polaku Pzhemisllav Saleta. Në meçin e zhvilluar në Shtutgart të Gjermanisë, i cili zgjati 12 raunde, Luan Krasniqi tregoi përqëndrim dhe përgatitje të lartë fizike dhe tekniko-taktike, të cilat ishin çelësi i tij drejt një suksesi të ri. Në përfundim të meçit, 2 gjyqtarë i japin pikën Luanit, kurse njëri mendon se meçi ishte i barabartë. Ky boks-meç është përcjellë me interesim të madh përmes TV edhe në Kosovë. Pas përfundimit të boks-meçit grupe të mëdha tifozësh kanë festuar gajtë natës nëpër rrugët e Prishtinës, por edhe në qytetet e tjera të Kosovës.

 

  

Holkeri njoftoi për arrestimin e pjesëtarëve të TMK-së

 

Prishtinë, 16 shkurt 2004 - Shefi i UNMIK_ut Harri Holkeri i ka informuar personalisht Presidentin Ibrahim Rugova, kryeministrin Bajram Rexhepi dhe udhëheqësit tjerë politikë të Kosovës për arrestimet e bëra sot heret në mëngjes.

"Një numër i anëtarëve të TMK-së janë arrestuar sot. Arrestimet janë bërë për shkak të një numri krimesh, ku janë përfshirë edhe vrasje të kosovarëve", thuhet në njoftim.

Lidhur me këto arrestime, Holkeri ka theksuar se ky veprim është marrë për shkak të krimeve të kryera nga personat e arrestuar dhe nuk ka të bëjë me organizatën të cilës ata i përkasin tash apo me organizatën në të cilën kanë qenë në të kaluarën.

"Kjo nuk ka të bëjë në asnjë mënyrë me padi kundër TMK-së", ka theksuar Holkeri.

Ai ka thënë se e respekton TMK-në dhe ky arrestim nuk duhet të konsiderohet si përulje e atyre që shërbejnë në këtë organizatë dhe kjo nuk duhet të ndikojë në arritjet dhe në sukseset e TMK-së. Holkeri ka siguruar se të arrestuarit do të trajtohen në mënyrën e duhur, sipas ligjeve në fuqi.

 

 

Presidenti Rugova tha se Kosova gjithnjë e më shumë po gëzon përkrahje në botë në rrugën drejt pavarësisë

 

Prishtinë, 16 shkurt 2004 - Presidenti i Kosovës Ibrahim Rugova, me t'u kthyer dje nga vizita e tij disaditëshe në Madrid të Spanjës, tha se Kosova ka gjithnjë e më shumë po gëzon përkrahje në botë në rrugën drejt pavarësisë. "Kam takuar kryetarë e kryeministra të shumë vendeve dhe ata janë të kënaqur me përparimin që kemi arritur në Kosovë", tha Presidenti Rugova.

 

Duke folur për takimin e liderëve nga mbarë të Internacionales Demokratike të Qendrës, ai tha se ky është një union i madh i grupeve politike nga të gjitha kontinentet, duke shtuar se në kontaktet e tij me shumë personalitete i ka njoftuar ata me përparimin që janë arritur në objektivat për zhvillim ekonomik dhe integrim të komuniteteve.

"Kam kërkuar në këto takim që sa më shpejt të njihet pavarësia e Kosovës, pra njohja formale e pavarësisë. Shumë miq përshëndesnin këtë dhe thoshin se ende nuk qenka bërë, ngase kanë menduar se ky proces është kryer (dhe defakto është kryer) në vitin 1999", theksoi presidenti Rugova.

 

Poashtu ai tha se vendet e ndryshme kanë qëndrime shumë pozitive për Kosovën dhe janë të kënaqur me progresin që është arritur në Kosovë dhe premtuna përkrahje.

Presideni Rugova ishte në Madrid me ftesë të Kryeministrit spanjoll për të marrë pjesë në takimin e rregullt të Internacionales Demokratike të Qendrës. Në këtë takim kanë marrë pjesë edhe liderët e partive demokristiane e popullore nga vendet e Evropës, Amerikës, Afrikës e Azisë.

 

 

Është arrestuar komandanti i Zonës së dytë të TMK-së dhe shtatë pjesëtarë të tjerë të saj

 

Prizren/Prishtinë, 16 shkurt 2004 - Sot rreth orës 9,00 të mëngjesit është arrestuar komandanti i Zonës së dytë të TMK-së, gjeneralbrigade Selim Krasniqi, bashkë me disa oficerë të lartë dhe pjesëtarë të kësaj zone, para hyrjes së Brigadës shumkombëshe Jug-perëndim në Prizren.

 

Këtë lajm e ka konfirmuar zëdhënësi i Zonës së dytë TMK-së, Enver Cikaçi, i cili ka thënë se gjeneral Krasniqi është arrestuar bashkë me eskortën e tij nga karabinierët italianë në Prizren, kurse arrestime ka pasur edhe në dy njësitë e TMK_së në Rahovec dhe në Lubizhdë.

 

Përveç gjeneral Selim Krasniqit janë arrestuar edhe eprorët: Milaim Latifi e Xhevat Elshani, si dhe pjesëtarët e TMK-së: Shemsi Sinani, Mustafë Thaçi, Ukë Morina, Bashkim Morina e Manush Shamolli.

Urdhëri për arrestimin e tyre është lëshuar nga një gjykatës ndërkombëtar e që ka të bëjë me akuza gjatë luftës.

Zëdhënësi i TMK-së Shemsi Syla e ka kofirmuar lajmin për arrestimin e komandantit të Zonës së dytë të TMK-së, gjeneralbrigade Selim Krasniqi, i cili është arrestuar bashkë me shoqëruesit e tij. "Deri më tash janë arrestuar gjashtë pjesëtarë të tjerë, emrat e të cilëve ende i kemi marrë.

 

Shpresojmë se e vërteta do të dalë ne shesh dhe këtë do ta thotë drejtësia, pasi që ata janë vetëm të dyshuar. Mendoj se gjithçka që flasim tani është herët, por ne jemi bërë pothuajse imunë ndaj këtyre arrestimeve.

 

Na duket se i përgjan edhe arrestimeve të tjera, të cilat bëhen kohë pas kohe dhe në fund s'ka asgjë konkrete. Andaj shpresojmë që e drejta do të triumfojë dhe kjo do të jetë vetëm një dyshim", ka thënë zëdhënësi Syla, duke komentuar arrestimet e sotme.

Ndërkaq, zëdhënësi i policisë rajonale të UNMIK-ut Mihael Krojshpanher thotë se janë arrestuar katër persona nga policia ndërkombëtare në bashkëveprim me pjesëtarët e KFOR-it. "Këta të arrestuar janë të dyshuar për krime serioze, për vrasje dhe viktimat e tyre janë shqiptarë kosovarë", ka thënë ai, duke shtuar se të gjithë të arrestuarit janë anëtarë të TMK-së.

 

Operacioni i arrestimit ka kaluar pa rezistencë. Ky operacion i policisë dhe i KFOR-it nuk është i drejtuar kundër TMK-së, por kundër individëve", ka theksuar zëdhënësi Krojnshajnher.

 

 

Holkeri takohet sot në Prishtinë me nënkryetarin e Qeverisë serbe

 

Prishtinë, 16 shkurt 2004 - Shefi i UNNMIK-ut, Hari Holkeri do të takohet sot në Prishtinë me shefin e "Qendrës koordinuese të Serbisë për Kosovën", Nebojsha Çoviq. Siç është paralajmëruar në këtë takim do të flitet rreth bisedimeve ndërmjet Prishtinës dhe Beogradit për zgjidhjen e çështjeve teknike të interesit të përbashkët.

 

 

Gjilani dhe Lipjani dakordohen për ndërtimin e një rruge nga drejtimi i Zhegocit

 

Gjilan, 16 shkurt 2004 - Komuna e Lipjanit është e interesuar të ketë lidhje më të shkurta rrugore me Gjilanin, sepse është i vetmi regjion në Kosovë, me të cilin ajo kufizohet, ndërsa duhet të komunikojnë ndërmjet vete nga drejtimi i Prishtinës ose Ferizajt.

Ndërtimi i një rruge më të shkurtër ndërmjet këtyre dy komunave fqinje, është nevojë e kahershme, për shkak se disa fshatra të zonës përendimore të Gjilanit, kanë lidhje familjare me komunën e Lypianit dhe një numër i madh i tyre gravitojnë rregullisht në tregun e atjeshëm, ose vijojnë nëpër shkolla.
 

Kryetari i komunës së Lipjanit, Xhevat Olluri, në një takim që pati të premtën me kryetarin e komunsë së Gjilanit, Lutfi Hazirin, ku ai erdhi me bashkëpunëtorët e tij për të biseduar rreth mundësive për ndërtimin e rrugës Gjilan-Lipjan, nga drejtimi i Zhegocit ose Vërbicës, tha se vetëm me komunën tuaj, tash për tash nuk kemi lidhje të drejtpërdrejta.

Edhe komuna e Gjilanit do të ketë interesin e saj në këtë rrugë, sepse në relacion më të shkurtër do të lidhet me magjistralen dhe me komunën e Lypianit, ku gjendet aeroporti i Prishtinës, shpella e Gadimes, shtëpia korrektuese dhe nga do të kalojë edhe autoudha Tiranë-Durrës-Prishtinë.

Lutfi Haziri tha se edhe Gjilani është i interesuar të ketë lidhje më të mira me Lipjanin dhe u dakordua me z. Olluri për nënshkrimin e një marrëveshje të mirëkuptimit ndërmjet këtyre dy komunave për ndërtimin e rrugës Gjilan-Ponesh-Zhegoc-Sllovi-Lipjan, e cila do t`i dërgohet edhe Ministrisë së Transportit dhe Telekomunikacionit për mbështetje.

 

 

Filloi mermetimi i rrugës Zhegër - Shurdhan, e cila në të ardhmen parashihet të bashkohet me koridorin e tetë

 

Gjilan, 16 shkurt 2004 - Projekti i rrugës së gjatë 8 kilometra financohet nga Ministria e Transporteve dhe Telekomunkacionit, në vlerë 527 mijë Euro, ndërsa realizohet nga kompania vendore "Bejta Comerc" e Gjilanit.

Halit Zymberi, drejtor i Shërbimeve Publike tha se rregullimi i kësaj rruge ka rëndësi të madhe jo vetëm për banorët e kësaj treve, por edhe për komunën e Gjilanit, sepse hapë perspektivë për zhvillimin e Grykës së Karadakut.

 

Në fazën e dytë parashihet asfaltimi i rrugës Gjilan - Stançiq, e cila, sipas parallogarisë do të kushtojë mbi 11 milionë euro, por që i krijon Kosovës mundësi të kyçjes në koridorin e tetë ndërkombëtar në relacion më të shkurtër, përmes Kumanovës.

Punimet në këtë rrugë kanë ngjallur shpresat e mbi 10 mijë banorëve të Grykës së Karadakut se një ditë mund të kthehen në vendlindjen e tyre, të cilën janë detyruar ta braktisin për shkak të kushteve të vështira për jetë.

Pronari i kompanisë "Bejta Comerc", Bejtullah Kçiku thotë se në bazë të projektit do të bëhet zgjerimi i rrugës, hapja e kanaleve anësore për ujëra, vendosja e gypave dhe përgatitja e saj deri në fazën për asfaltim. Në të ardhmen e afërt, kjo rrugë do të jetë e nivelit ndërkombëtar dhe mjaft e rendësishme jo vetëm për Gjilanin dhe Kosovën, por edhe rajonin.

 

 

Prizren: Është arrestuar komandanti i Zonës së dytë TMK-së dhe disa persona të tjerë

 

Prizren, 16 shkurt 2004 - Në orët e hershme të mëngjesit sot në Prizren është arrestuar gjeneral Selim Krasniqi, komandant i Zonës së dytë të TMK-së dhe disa persona të tjerë. Sipas njoftimeve të para, ata janë arrestuar të bazë të akuzave për krime lufte dhe krime kundër njerëzimit gjatë viteve 1998/99.

Arrestimi i tyre është bërë në bazë të një fletarrestimi nga Tribunali i Hagës, ndërkaq në arrestimin e tyre kanë marrë pjesë pjesëtarët e policisë së UNMIK-ut dhe të KFOR-it.

 

 

Feler thotë se shkrimet për rrezikun e vrasjeve politike janë informata të dhëna nga policia e UNMIK-ut

 

Prishtinë, 16 shkurt 2004 - Komesioneri i Policisë ndërkombëtare në Kosovë, Shtefan Feler, ka deklaruar zyrtarisht se shkrimet e publikuara për rrezikun e vrasjeve politike të tre funksionarëve të lartë të Lidhjes Demokratike të Kosovës, janë informata të dhëna nga policia e UNMIK-ut, por ka shtuar se megjithë këtë ai nuk i ka autorizuar dhe as që ka qenë në dijeni të publikimit të tyre.

 

Në deklaratën e tij, Feler thotë se policia e tij në punën e saj të përditshme merr informacione të ndryshme për vepra të mundshme kriminale, të cilat në raste të caktuara mund të paraqesin kërcënim për individë të caktuar. Ai thotë se në disa raste për këto informacione do të jepen hollësi, por në disa raste të tjera ato do të jenë të fshehta.

Shtefan Feler ka shprehur keqardhjen e tij që aktivitetet e policisë janë zbuluar në rastin e publikimit të informatës në gazetat kosovare. Kjo, sipas tij, do të krijojë një pasqyrë të gabuar të opinionit për punën e policisë dhe nivelin e informacioneve që ajo posedon.

 

 

Angjela Xhozef thotë se të kërcënuarit me vrasje janë zyrtarë të lartë të LDK-së

 

Prishtinë, 16 shkurt 2004 - Angjella Xhozef, asistente e komesionerit të policisë ndërkombëtare në Kosovë, Shtefan Feler, duke komentuar shkrimet në mediat e Kosovës për kërcënimin me likuidim të tre funksionarëve të lartë të LDK-së, ka thënë:

 

"Nuk mund të jap asnjë emër por mund të them se ata janë zyrtarë të lartë të LDK-së. Atentati është një krim madhor dhe ne do të bëjmë gjithçka që të shmangim një gjë të tillë. Është detyrë jona që të shpëtojmë jetët dhe këtë po e bëjmë".

 

Zyrtarja Xhozef konfirmon se kjo pikë është diskutuar në takimin ndërmjet Holkerit, Felerit dhe Thaçit.

"Vetë fakti se burimi i informacionit del nga policia në gazeta tregon se është marrë si rast shumë serioz nga ana e policisë ndërkoimbëtare", ka thënë zyrtarja Xhozef.

 

 

Parlamentarët kosovarë vizitojnë Shqipërinë

 

Prishtinë, 16 shkurt 2004 - Komisioni për Transport dhe Telekomunikacion i Kuvendit të Kosovës i udhëhequr nga Edita Tahiri, kryetare, prej sot po qëndron në një vizitë disa ditëshe në Shqipëri me ftesë të Komsionit për Transport dhe Telekomunikacion të Kuvendit të Shqipëris.

 

Vizita e parlamentarëve kosovarë ka për qëllim thellimin e bashkëpunimit me Komisonin përkatës të Kuvendit të Shqipërisë, si dhe këmbimin e përvojave të punës. Gjatë kësaj vizite, e cila do të zgjasë deri më 19 shkurt delegacioni kosovar do të vizitojë Hekurudhën e Shqipëris, Drejtorin e Rrugëve të Shqipërisë, Post Telekomin dhe Aeroporitn e Tiranës.

Parlamentarët e Kuvendit të Kosovës do të kenë edhe një takim me kryetarin e Kuvendit të Shqipërisë, Servet Pëllumbin, thuhet në një njoftim të Kuvendit të Kosovës.

 

 

Nisma "Për një Universitet TJETËRQYSH" të mërkurën organizon një prtestë në Prishtinë

 

Prishtinë, 16 shkurt 2004 - Të motivuar kryekëput nga gjendja e tejrëndruar që mbisundon në krejt Universitetin e Prishtinës, nisma "Për një Universitet TJETËRQYSH", organizon protestën "5n'12" (12 pa pesë minuta), si reagim ndaj vazhdimit të kësaj status quoje me protagonist kryesor - udhëheqësinë e UP-së.

 

Protesta mbahet të mërkuren, më 18 shkurt, duke filluar që në orën 11:30, në platonë para Bibliotekës Kombëtare, për të vazhduar pastaj pesë minuta para orës dymbëdhjetë përpara objektit të Rektoratit të Universitetit të Prishtinës.

Forma e të protestuarit do të jetë e natyrës ekzkluzivisht joviolente. Ajo do të përfshijë fishkëllimat me pip dhe hedhjen e aeroplanëve të letrës në drejtim të Rektoratit, të cilët do të jenë nga letrat e rubrikave të indeksëve, me ç'rast në secilën prej tyre do të jetë e shkruar kërkesa - "Tjetërqysh". Protesta do të zgjasë dhjetë minuta.

Për çfarëdo ekscesi eventual e të padëshirueshëm që do të mund të ndodhë gjatë protestës, e që tejkalon kufijtë e mënyrave të të protestuarit të parapara më lart, nisma TJETËRQYSH nuk ndjehet përgjegjëse, thuhet në një komunikatë të kësaj nisme.

 

 

Në Ohër përfundoi punimet takimi për hartimin e strategjisë për zhvillimin e arsimit të lartë në Kosovë

 

Ohër, 16 shkurt 2004 - Në Ohër përfundoi punimet takimi për hartimin e strategjisë për zhvillimin e arsimit të lartë në Kosovë për periudhën 2005-2015. Në këtë dokument-kornizë që u hartua në Ohër, thuhet se Kosova është shoqëri e integruar në hapësirën evropiane të arsimit të lartë ku dija dhe kërkimi shkencor janë në funksion të zhvillimit të qëndrueshëm shoqëror dhe ekonomik.

Objektiva e strategjisë së arsimit të lartë në Kosovë ka për qëllim ngritjen e kapacitetit për punë kërkimore dhe shkencore, ngritjen e besueshmërisë për institucionet e larta arsimore dhe krijimin e mekanizmave për sigurimin dhe menaxhimin e efektshëm të burimeve dhe mjeteve financiare buxhetore për zhvillimin e arsimit të lartë në Kosovë.

 

Ky projekt që është hartuar në Ohër do të prezentohet në Konferencën Ndërkombëtare për Arsim të Lartë që do të mbahet në prill të këtij viti në Prishtinë.

 

 

Në Gjilan vazhdon gjykimi kundër udhëheqësit të ish-UÇPMB-së

 

Gjilan, 16 shkurt 2004 - Në Gjilan sot vazhdon seanca gjyqësore kundër udhëheqësit të ish-Ushtrisë Çlirimtare për Preshevë, Medvegjë e Bujanoc Shefket Musliut dhe katër bashkëpunëtorëve të tij. Ai akuzohet për rrëmbim dhe armëmbajtje pa leje.

 

 

Ndërpritet greva në Maqedoni, shkollat fillojnë punën

 

Shkup, 16 shkurt 2004 - Sindikata e arsimit në Maqedopni i ka dhënë fund grevës 15 ditore pasi kishte arritur një marrëveshje me Qeverinë maqedonase. Nga dita e sotme fillon puna në të gjitha institucionet arsimore në shkollat fillore dhe ato të mesme, në arsimin e lartë si dhe në ato kulturore e shkencore, ndërkohë që bisedimet me qeverinë do të vazhdojnë.

 

 

Parlamentarë evropianë thonë se çamët në Greqi duhet t'i gëzojnë po ato të drejta, sikur grekët në Shqipëri

 

Athinë, 16 shkurt 2004 - Çamët në Greqi duhet t'i gëzojnë po ato të drejta që i gëzon pakica greke në Shqipëri. Kështu theksohet në rekomandimin e një grupi parlamentarësh evropianë që i kanë propozuar komesionerit të Bashkimit Evropian, përgjegjës për marrëdhënie me Jashtë, Kris Paten.

 

Eurodeputetët Marko Panella dhe Olivie Dupyi theksojnë se vetëm kur pakica kombëtare çame në Greqi dhe ajo greke në Shqipëri do t'i gëzojnë të njëjta të drejta, vetëm atëherë marrëdhëniet ndërmjet Greqisë dhe Shqipërisë do të jenë vërtetë të forta dhe të sinqerta.

 

 

Qytetarët shqiptarë në Maqedoni do të pajisen me dokumente të reja të udhëtimit

 

Shkup, 16 shkurt 2004 - Qytetarët shqiptarë në Maqedoni pritet që së shpejti të pajisen me dokumente të reja të udhëtimit që do të jenë edhe në gjuhën shqipe. Ministria e Punëve të Brendshme të Maqedonisë ka bërë të ditur se është në përfundim të projektit për nxerrjen e këtyre dokumenteve të udhëtimi për qytetarët shqiptarë, gjë që parashikohet në Marrëveshjen e Ohrit.

 

Kjo Ministri ka hartuar propozimligj të ri për dokumente të reja të udhëtimit që gjatë javës së ardhshme do të shqyrtohet në Parlamentin maqedonas. Sipas këtij propozimligji të ri në ballinën e dokumenteve të udhëtimit parashihet të përdoret gjuha shqipe krahas asaj maqedonase dhe angleze.

 

Po ashtu edhe në brendi të këtyre dokumenteve të gjitha të dhënat do të shënohen në gjuhën shqipe.
Ndërkaq, zyrtarët ndërkombëtarë theksojnë se një masë e tillë e afron Maqedoninë edhe më shumë në integrimin me Bashkimin Evropian.

Opozita maqedonse ka kundërshtuar përdorimin e gjuhës shqipe në ballinë të dokumenteve të reja të udhëtimit, duke vlerësuar se kinse në këtë mënyrë dëmtohen interesat e popullsisë maqedonse.

 

 

Në Irak vriten dy ushtarë amerikanë

 

Bagdad, 16 shkurt 2004 - Në Irak, dy ushtarë amerikanë u vranë dhe pesë u plagosën nga dy shpërthime në pjesën qendrore të vendit.

Sulmi i parë ndodhi sot në mëngjes, kur një autokolonë ushtarake u godit nga një shpërthim në Bagdat, duke vrarë një ushtar dhe plagosur një tjetër. Pa kaluar një orë, në qytetin Bakuba, 60 kilometra në veri të kryeqytetit, një shpërthim tjetër la një ushtar amerikan të vrarë dhe 4 të plagosur.

 

Zyrtarët ushtarakë amerikanë thanë se dy irakianë u ndaluan pas sulmit të dytë.

Të dy shpërthimet ndodhën në të ashtuquajturin Trekëndësh Sunit, ku kryengritësit ndërmarrin shumicën e sulmeve kundër forcave të koalicionit në Irak.

 

 

Bremer flet për ndryshime të planeve

 

Bagdad, 16 shkurt 2004 - Shtetet e Bashkuara thonë se mund t'i pranojnë ndryshimet në mekanizmin e transferimit të pushtetit në duart e irakianëve. Megjithatë ato do të vazhdojnë të jenë të angazhuara në gritjen e një asambleje të tranzicionit në Irak deri në fund të muajit qershor.

Administratori Pol Bremer deklaroi se mund të bëhen ndryshime në planin e tanishëm për asamblenë.

Këto ndryshime, sipas tij do të përcaktohen gjatë mbledhjeve të zhvilluara në nivel lokal apo konferencave partiake.

"Duam të mos e lëvizim datën. Është një procesi i komplikuar këtu dhe ajo që ju preferoni janë zgjedhjet", thotë Bremer.

 

 

Nisin bisedimet për Kashmirin

 

Islamabad, 16 shkurt 2004 - Zyrtarë indianë dhe pakistanezë takohen të hënën në fillim të një procesi që shpresohet se mund të çojë drejt zgjidhjes afatgjatë ndërmjet dy kundërshtarëve rajonal.

Një delegacion i qeverisë së Indisë ndodhet në kryeqytetin pakistanez, Islamabad, për bisedime treditore që kanë për qëllim hapjen e rrugës drejt negociatave paqësore.

Kjo është hera e parë që të dyja palët takohen që nga përfundimi pa sukses i lëvizjes paqësore tre vjet më parë në qytetin indian Agra.

 

 

Nga rebelimi i aborixhinëve dhjetra policë të plagosur në Sidnei

 

Sidnei, 16 shkurt 2004 - Të paktën 50 policë janë plagosur në qytetin australian Sidnei gjatë një proteste që kishte si preteksr vrasjen e një 17-vjeçari aborixhin.

Policia tha se më shumë një qind vetë morën pjesë në aktet e dhunës ku u përdorën shishe me benzinë, u qëllua me tulla, fishekzjarre si edhe iu vu zjarri një stacioni treni.

Dhuna shpërtheu kur 17-vjeçari, Thomas Hiki vdiq duke ngarë biçikletën e tij, - siç pretendohet, - teksa përpiqej t'i shpëtonte ndjekjes së policisë. Policia i ka mohur akuzat.

Opozita thotë se shkaku i protestës është pakënaqësia për neglizhencën e autoriteteve vendase ndaj komunitetit aborigjen në provincën Redfern, ku edhe u zhvillua protesta.

 

 

Ka arritur në 38 numri i viktimave në Moskë

 

Moskë, 16 shkurt 2004 - Sipas njoftimeve më të reja numri i viktimave të shembjes së kupolës së një akuaparku në Moskë ka arritur në 38, ka thënë prefekti i Moskës. Bëhet e ditur në spital ndodhen 68 njerëz, pesë prej tyre në gjendje kritike. Në mesin e tyre rreth 27 fëmijë, njofton Rojter.

 

 

Arrestohet edhe një zyrtar i lartë i ish-regjimit të Sadam Huseinit

 

Bagdad, 16 shkurt 2004 - Policia e Irakut ka arrestuar një zyrtar të lartë të partisë Baath, shumë të kërkuar nga ushtria amerikane. Bëhet fjalë për Mohamed Ziman Abdul Razak, i cili ndodhet i 41 në listën prej 55 zyrtarëve më të kërkuar të regjimit të Sadam Huseinit.

 

 

Vritet një ushtar amerikan dhe plagosen tre të tjerë

 

Bagdad, 16 shkurt 2004 - Një ushtar amerikan është vrarë sot në qendër të Bagdadit, kur një sulmues ka aktivizuar një bombë skaj rrugës, duke plagosur me atë rast edhe tre të tjerë, kanë thënë zyrtarët ushtarakë amerikanë.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |