E shtune, 14 shkurt 2004

E shtune, 14 shkurt 2004

Përmbajtja:

Holkeri ka kërkuar që të hiqen pikturat e vendosura në hollin e sallës së Kuvendit të Kosovës
Grosman thotë se Beogradi nuk ka të drejtën e vetos
USAID-i thotë se amerikanët do të tërhiqen nga Kosova atëherë kur ajo mund të qëndrojë në këmbët e veta
Ristarton blloku B1, ndërpritet importi dhe reduktimet e energjisë elektrike
Rinia e Dardanës e aftë për t'u përballur me të gjitha sfidat
Ende nuk dihet nëse sistemi zgjedhor në Kosovë do të jetë me lista të hapura apo të mbyllura
Ministria e Shëndetësisë ka nënshkruar një marrëveshje për shërimin e pacientëve në Francë
Kryetari i PLK-së falënderoi Zvicrën për kontributin që ka dhënë dhe po jep për Kosovën
Vrasësit e Bahti Elshanit u dorëzuan në policinë e Prizrenit
Ministri shqiptar i rendit ka qëndruar në selinë e Agjencinë evropiane e njohur se Europol në Hagë
Parlamenti aprovoi deklaratën për aplikimin e Maqedonisë në Bashkimin Evropian
Të paktën 21 veta janë vrarë dhe 35 të tjerë janë plagosur në Falluxha
Një ushtar amerikan është vrarë dhe nëntë të tjerë janë plagosur në Afganistan
Janë mbytur 20 anëtarët e ekuipazhit të anijes bullgare
Policia spanjolle ka konfiskuar pesë tonë kokainë
Ramsfeld mbron politikën e Guantanamos
Bëhet e ditur dosja ushtarake e Bushit
Qipro pranë bashkimit
Festohet Shën Valentini

Holkeri ka kërkuar që të hiqen pikturat e vendosura në hollin e sallës së Kuvendit të Kosovës

Prishtinë, 14 shkurt 2004 - Kryeadministratori i Kosovës, Hari Holkeri në një letër dërguar kryetarit të Kuvendit të Kosovës Nexhat Dacit ka kërkuar që të hiqen nga Kuvendi pikturat e vendosura në sallën e renovuar të hiqen ose të ndryshohen.

Z. Holkeri i cilësoi këto piktura si monoetnike, duke paralajmëruar se nuk do të marrë pjesë në ceremoninë e inaugurimit të sallës së renovuar që pritet të bëhet të martën nëse nuk përmbushet kërkesa e tij.
Një zyrtar i lartë i Kuvendit të Kosovës i ka hedhur poshtë vlerësimet e Holkerit dhe ka thënë se pikturat e vendosura në hollin e sallës nuk do të hiqen e as nuk do të ndryshohen.


Grosman thotë se Beogradi nuk ka të drejtën e vetos

Nju Jork, 14 shkurt 2004 - Nënsekretari amerikan i Shtetit, Mark Grosman, në një editorial të botuar në gazetën "Uoll strit xhornal", shkruan se gjatë vizitës së tij në nëntorin e kaluar në Kosovë, kishte propozuar implementimin e standardeve.

"Nëse implementohen standardet e OKB-së për demokraci, rregull të lgjit, të drejta të minoriteteve dhe reforma ekonomike deri në mesin e vititi 2005 bota do të jetë e gatshme të fillojë bisedimet për statusin e ardhshëm të Kosovës", thotë Grosman, duke shtuar se janë vendosur standarde të qarta. Sipas tij, kosovarët mund të përmbushin ato standarde.
"Beogradi nuk ka të drejtën e vetos, por suksesi i iniciativës kërkon përkrahjen më të gjerë, përfshirë këtu edhe atë të liderëve politikë të Beogradit", tha nënsekretari amerikan Grosman.


USAID-i thotë se amerikanët do të tërhiqen nga Kosova atëherë kur ajo mund të qëndrojë në këmbët e veta

Prishtinë, 14 shkurt 2004 - Kreu i USAID-it për Kosovë, Dejll Fajfer ka thënë se privatizimi në Kosovë duhet të vazhdojë menjëherë, duke shtuar se organizmi, të cilin e drejton, nuk mund të pajtohet me shumë nga propozimet për ndryshimet që aktualisht ndodhen në tavolinë, tha Fajfer.

Ai i bëri këto komente i nxitur nga iniciativa e menaxhmentit të AKM-së dhe shefit të Shtyllës së Katërt të UNMIK-ut për ndryshimin e procedurave të privatizimit. Fajfer thekson se amerikanët do të tërhiqen nga Kosova vetëm atëherë kur ajo mund të qëndrojë në këmbët e veta.


Ristarton blloku B1, ndërpritet importi dhe reduktimet e energjisë elektrike

Prishtinë, 14 shkurt 2004 - Së shpejti pritet të ristartojë blloku B1 i termocentralit "Kosova B", i cili ka qenë jashtë prodhimit prej më se një vit e gjysmë. Sipas zëdhënësit të KEK-ut, Bektesh Rrudhani, me ristartimin e bllokut B1, që pritet të bëhet më 21 shkurt, do të ndërpritet importi i energjisë elektrike si dhe reduktimet.
Të përkujtojmë se blloku B1 kishte dalë jashtë prodhimit pas goditjes së rrufesë këtu e 17 muaj më parë dhe ristartimi i tij ishte prolonguar disa herë. Kapaciteti i këtij blloku është 250 deri më 270 megavatorë energji elektrike.


Rinia e Dardanës e aftë për t'u përballur me të gjitha sfidat

Dardanë, 14 shkurt 2004 - Në vazhdën e takimeve që po zhvillon kryesia e FR të LDK-së në kuadër të projektit "2004 Viti i LDK-së - Viti Juaj", dje në ambientin e Shtëpisë së Kulturës në Dardanë, Dega e Forumit të Rinisë të LDK-së, organizoi takimin me të rinjtë e këtij qyteti.

Në mesin e shumë të rinjve në këtë takim ishte I pranishëm edhe kryetari I Forumit të Rinisë të LDK-së z.Lulzim Zeneli, kryetari i KK të Dardanës Shaip Surdulli, njëherësh edhe kryetar i degës së LDK-së në këtë komunë dhe zyrtarë të tjerë të LDK-së dhe të FR-së.
Këtë takim e hapi Jeton Biçkaj, kryetar i FR të LDK-së në Dardanë.
Lulzim Zeneli, kryetar i FR të LDK-së, në fjalën e tij tha se takimi i sotëm është në kuadër të një projekti të FR-së, për një komunikim të drejtpërdrejtë me të rinjtë që përmes këtij takimi të shfaqën opinionet në mënyrë të hapur dhe të njihen më për së afërmi me të gjitha problemet, brengat dhe shqetësimet që janë aktuale.

Këto takime vijnë si domosdoshmëri e kohës dhe vetëveprimit politik jo vetëm të FR të LDK-së, por edhe në nivel të institucioneve, u shpreh ai. "Ne e dimë se po hymë në një fazë që është vendimtare për institucionet e Kosovës dhe për tërë popullin e Kosovës në përgjithësi, prandaj kontributi i çdo të riu në çdo proces është shumë domethënës", deklaroi Zeneli.

Ai tha se duhet të ketë një formulë të përbashkët për eliminimin e problemeve dhe duhet një angazhim më i madh i të rinjve, institucioneve, qeverisë në të gjitha nivelet. "Ne jemi dëshmitarë të ngjarjeve politike në tërë vendin prandaj, Kosovës sot i nevojitet një qeverisje stabile, efikase një qeverisje që me punën e vet do të reflektonte përgjegjësitë në të gjitha nivelet", tha Zeneli, duke shtuar se të rinjtë duhet të plasojnë porosi të qarta jo vetem në nivel të subjektëve politike, por edhe në nivelet të institucioneve.
Shaip Surdulli, shprehu mendimin se LDK-ja e degës së Dardanës ka shpresat në FR të LDK-së, që ai të angazhohet që atë energji të rinisë ta shfrytëzojë në mënyrë që të freskohet me aktivistët nga radhët e saj. "FR i LDK-së është subjekt që artikulon kërkesat e të rinjve përmes punës dhe projekteve të tyre", theksoi ai. Interesimi i të rinjve për këtë debat ishte shumë i madh për çka dëshmojnë edhe pyetjet e shumta që iu shtruan të pranishmëve.
Duke iu përgjigjur një varg pyetjesh që iu drejtuan atij, Lulzim Zeneli tha se prioritet fundamental është edhe problemi i papunësisë që do të figurojë edhe në të ardhmen, por do bërë presion që në të gjitha format t'i kontribuohet stabilitetit politik dhe ekonomik.
Ndërsa anëtarja e kryesisë Malsore Gashi duke folur rreth përfaqësimit të femrave në FR të LDK-së, tha se femrat janë të përfaqësuara në të gjitha nivelet e organizimit të FR të LDK-së, duke filluar nga Këshilli i Përgjithshëm, Kryesia e poashtu edhe në nivel të degëve ku femrat udhëheqin me disa degë. Ajo tha se i inkurajonte femrat e Dardanës që të kyqeshin në FR të LDK-së, ngase me të vërtetë do ta merrnin vendin të cilin do ta meritonin me punën e tyre.


Ende nuk dihet nëse sistemi zgjedhor në Kosovë do të jetë me lista të hapura apo të mbyllura

Prishtinë, 14 shkurt 2004 - Në organizim të Iniciativës Kosovare për Shoqëri Civile dhe të OSBE-së në Prishtinë është debatuar për sistemin e zgjedhjeve në Kosovë. Përfaqësues politikë e jopolitikë kanë diskutuar për mangësitë dhe përparësitë e sistemit proporcional, i cili do të aplikohet edhe në zgjedhjet e tetorit. Ende nuk dihet nëse ai do të jetë me lista të hapura apo të mbyllura.

Në këtë tryezë të rrumbullaktë u tha se gjedhja e sistemit zgjedhor është ndër vendimet më të rëndësishme institucionale e shoqërore për çdo demokraci. Po ashtu u theksua se organizimi i zgjedhjeve është një proces i komolikuar i cili kërkon zgjidhjen e një mori problemesh politike dhe teknike.
Shumë diskutues u angazhuan për sistemin zgjedhor me lista të hapura. Njëhërësh u paraqit edhe propozimi që në zgjedhje të aplikohet pragu prej 1 për qind, i cili do të lejonte fitimin e vendeve në Kuvend.


Ministria e Shëndetësisë ka nënshkruar një marrëveshje për shërimin e pacientëve në Francë

Prishtinë, 14 shkurt 2004 - Ministria e Shëndetësisë ka nënshkruar një marrëveshje me një qendër spitalore të Francës për shërimin e pacientëve kosovarë në këtë vend.

Programi i përcaktuar në katër faza ka filluar qysh në vitin 2000 dhe tash është në fazën e dytë, ndërkaq do të zgjasë deri në fillim të vitit 2005. Njoftohet se të hënën do të udhëtojnë për në Francë edhe gjashtë fëmijë me sëmundje kardiologjike si dhe deformime urologjike.
Njoftohet se deri më tash janë mjekuar më shumë 50 fëmijë në spitale të ndryshme të Francës dhe Anglisë.


Kryetari i PLK-së falënderoi Zvicrën për kontributin që ka dhënë dhe po jep për Kosovën

Bern, 14 shkurt 2004 - Delegacioni i Partisë Liberale të Kosovës, i kryesuar nga Gjergj Dedaj, u prit dje në Ministrinë e Punëve të Jashtme të Zvicrës në Bern. Në bisedë me drejtorin politik të kësaj Ministrie Divier Kasot, Gjergj Dedaj falënderoi Zvicrën për kontributin që ka dhënë dhe po jep për progresin demokratik në Kosovë.

Ai me këtë rast shfaqi nevojën edhe për nevojën e hapjes së zyrës së Kosovës në Bernë, që do të ishte në funksion të rregullimit të dokumentacioneve të udhëtimit për mërgimtarët e Kosovës, të cilët punojnë dhe jetojnë në Zvicër.
Njoftohet se zyrtarët e larët në Bernë njoftuan se Zvicra edhe në të ardhmen do të luajë një rol të rëndësishëm për progresin, paqen dhe sigurinë në Kosovë.


Vrasësit e Bahti Elshanit u dorëzuan në policinë e Prizrenit

Prizren, 14 shkurt 2004 - Dorasit të cilët të enjtën në mëngjes e goditën për vdekje Bahti Elshanin, pasi ia kishin plaçkitur dyqanin në fshatin Medvec të Komunës së Prizrenit, pas 24 orësh, janë dorëzuar vulnetarisht në policinë rajonale të Prizrenit.
Sipas zëdhënësit të SHPK-së, Fatmir Gjurgjealit, dorasit janë dorëzuar në stacionin e policisë rajonale dhe se ata janë Arsim Maliqi, 25-vjeçar dhe Hamit Mustafa 18-vjeçar Randobravë i Komunës së Prizrenit.


Ministri shqiptar i rendit ka qëndruar në selinë e Agjencinë evropiane e njohur se Europol në Hagë

Hagë, 14 shkurt 2004 - Ministri shqiptar i rendit Ingli Toska ka qëndruar në selinë e Agjencisë së përbashkët të agjencive evropiane e njohur se Europol në Hagë. Ai ka vizituar këtë organizëm për të forcuar bashkëpunimin në luftën kundër krimit të organizuar. Vizita e ministrit Toska u bë menjëherë pas një raporti të Europolit për krimin e organizuar në Shqipëri në të cilin theksohej ndër të tjera se krimi në Shipëri kërcënon sigurinë dhe destabilitetin e BE-së.
Burimet zyrtare në Haga, ku e ka selinë ky organizëm panevropian, bëjnë me dije se qëllimi i kësaj vizite ka të bëjë me shkëmbimin e informacioneve dhe ndihmën që mund t'i japë Europoli në luftimin e dukurive të tilla siç janë lufta kundër trafiqeve, si ato me kladenstinë si dhe lufta kundër terrorizmit.


Parlamenti aprovoi deklaratën për aplikimin e Maqedonisë në Bashkimin Evropian

Shkup, 14 shkurt 2004 - Deputetët e Parlamentit maqedonas në seancën e djeshme me 85 vota pro aprovuan deklaratën për aplikimin e Maqedonisë në Bashkimin Evropian. Në këtë deklaratë thuhet se ajo buron nga qëndrimi i përbashkët i qytetarëve për integrim në BE me qëllim të ngritjes së standardeve ekonomike dhe politike, si dhe përmbushjes së kritereve evropiane, të cilat garantojnë prosperitet ekonomik, stabilitet politik, demokraci, liri dhe siguri.
Mirëpo, gjatë debatit deputetët shqiptarë kërkuan zbatimin e Marrëveshjes së Ohrit, që sipas tyre është rruga më e mirë që shpie drejt integrimeve evropiane.
Nga ana tjetër kryeministri maqedonas, Branko Cërvenkovski ka bërë të ditur se më 26 shkurt të këtij viti zyrtarisht do t'ia paraqesë kryesueses së BE-së, Qeverisë irlandeze, kërkesën për anëtarësimin e Maqedonisë në Bashkimin Evropian.


Të paktën 21 veta janë vrarë dhe 35 të tjerë janë plagosur në Falluxha

Falluxha, 14 shkurt 2004 - Të paktën 21 veta janë vrarë dhe 35 të tjerë janë plagosur gjatë një sulmi të kryengritësve kundër një stacioni policor dhe ndërtesës qeveritare të shtunën në qytetin Falluzha, njofton Rojter.
Ndërkaq sipas AP, rreth 50 sulmues, pasi kanë hasur në rezistencë të dobët, kanë hapur zjarr me armë automatike dhe me mortaja. Ata kanë hyrë dhomë për dhomë. Në atë momnet në stacionin policor ndodheshin pesë policë.
Sulmuesit kanë shtënë duke thirrur "Allahu akbar" (Zoti është i madh) dhe kanë liruar 100 të burgosur, ka thënë një polic me kushte anonimiteti.
Poashtu janë vrarë edhe dy nga sulmuesit, kurse disa të tjerë janë arrestuar pasi më parë ishin plagosur.


Një ushtar amerikan është vrarë dhe nëntë të tjerë janë plagosur në Afganistan

Ghazni/Afganistan, 14 shkurt 2004 - Një ushtar amerikan është vrarë dhe nëntë të tjerë janë plagosur nga shpërthimi i një mine në Afganistanin Lindor, ka bërë të ditur ushtria amerikane të shtunën.
Shpërthimi ka ndodhur të premtën pasdite afër qytetit Ghazni, 150 km në jug të kryeqytetit Kabul, ka thënë Den Gejxh, zëdhënës i Komandës qendore të ushrisë amerikane. Katër nga nëntë të plagosurit, janë trajtuar në vendin e ngjarjes, ndërkaq të tjerët me helikopter janë transferuar në një spital në bazën kryesore amerikane në Bagram.


Janë mbytur 20 anëtarët e ekuipazhit të anijes bullgare

Sofje, 14 shkurt 2004 - Të gjithë 20 anëtarët e ekuipazhit, 18 marinarë bullgarë dhe dy ukrainas, janë mbytur kur anija e tyre u fundos gjatë shtrëngatës në Bosfor, ndërkohë që ekipet e shpëtimit hoqën dorë nga kërkimet e mëtejshme, kanë bërë të ditur zyrtarë bullgarë.
Asnjë nga të mbijetuarit e anijes, e cila lundronte nën flamurin e Kmaboxhës, nuk është gjetur pas kërkimeve njëditore, ka njoftuar zëdhënësi i Ministrisë bullgare të Punëve të Jashtme.


Policia spanjolle ka konfiskuar pesë tonë kokainë

Madrid, 14 shkurt 2004 - Policia spanjolle ka konfiskuar pesë tonë kokainë të cilën e zbuloi në një anije peshkatarësh në ujërat ndërkombëtare dhe ka arrestuar shtatë anëtarët e ekuipazhit kolumbian.
Në një njoftim të qeverisë theksohet se kokaina është kofiskuar dje në anijen që lundronte me flamurin e Belizes drejt Spanjës, por që ishte në lidhje me narko kartelin e Kolumbisë dhe me grupin gueril marksist FARK, njofton Rojter.


Ramsfeld mbron politikën e Guantanamos

Uashington, 14 shkurt 2004 - Sekretari amerikan i mbrojtjes, Donald Ramsfeld ka mbajtur një fjalim ku ka mbrojtur politikën e administratës amerikane mbi të burgosurit e huaj që mbahen në Guantanamo.
Ai ka ofruar ndoshta mbrojtjen publike më të kuptueshme nga gjithë zyrtarët e tjerë amerikanë. Ai argumentoi se të ndaluarit mbahen pasi SHBA është përfshirë në një luftë të vërtetë dhe që vazhdon.

Ramsfled këmbënguli se mbajtja e tyre është në përputhje me ligjin ndërkombëtar të luftës.


Bëhet e ditur dosja ushtarake e Bushit

Uashington, 14 shkurt 2004 - Shtëpia e Bardhë ka vepruar për t'i dhënë fund një debati që po rrethon atë se si presidenti Bush kaloi vitet e luftës së Vietnamit.
Presidenti Bush nuk ka luftuar gjatë luftës në Vietnam. Në vend të kësaj ai iu bashkua Gardës Kombëtare. Nga shumë në atë kohë, kjo rrugë u pa si mënyrë për të shmangur vajtjen në luftë.
Por demokratë të lartë tani kanë rigjallëruar akuzat se edhe kur ishte në gardën kombëtare, presidenti Bush nuk u paraqit për të kryer detyrën.
Ata e kanë akuzuar atë se në atë kohë ai po punonte në një fushatë politike, kur supozohej se do të pilotonte avionë.


Qipro pranë bashkimit

Nju Jok, 14 shkurt 2004 - Të dy palët në ishullin e ndarë të Qipros do të rifillojnë bisedime të plota mbi një plan për riunifikimin, një sukses i madh që mund t'i japë fund pothuajse 30 vjet ndarjeje.
Marrëveshja erdhi pas tre ditë takimesh në Kombet e Bashkuara në Nju- Jork. Sekretari i përgjithshëm i OKB-së, Kofi Anan tha se tani ishte momenti që Qipron të ribashkohej deri në një maj kur të anëtarësohet në BE.
Nëse ishulli nuk bashkohet, atëherë vetëm pjesa greke e ishullit do të anëtarësohet, duke lënë Qipron turke të izoluar.
Bisedimet do të rifillojnë të enjten në Nikozi dhe të dy palët janë të mendimit se për çështje për të cilat nuk bien dakord, do të vendosë sekretari i përgjithshëm.


Festohet Shën Valentini


5 mijë çifte kanë marrë pjesë duke thyer rekordin e vitit të kaluar që mbahej nga Santiago në Kili.
Në Indi, dita e të dashuruarve është ngjarje e madhe. Por disa militantë hindu kanë ndaluar dyqanet të shesin kartolina për Shën Valentinin dhe paralajmëruar çiftet se ata do t'i venë shenja në fytyrë nëse veprojnë jo siç duhet.
Në Bangladeshin konservator, disa gazeta po tregojnë se ku çiftet mund të takohen në mënyrë sekrete.
Autoritetet saudite i kanë ndaluar festimet e kësaj dite duke e quajtur festë pagane, megjithatë në shtetet fqinje të Gjirit, shumë ngjarje speciale janë organizuar.
Përsa i përket Evropës dhe SHBA-së, kjo është ditë plot ngjarje. Vetëm në Britani 4 miliardë dollarë do të harxhohen në kartolina, trëndafila të kuq dhe darka në restorante me qirinj.
Dhe megjithë barazinë që duhet të ketë midis femrave dhe meshkujve, janë meshkujt ata që zakonisht paguajnë në këtë ditë.