Përmbajtja:

• Presidenti Rugova foli sot në Kongresin e Inernacionales Demokratike të Qendrës në Madrid

• Përfaqësuesit e partive kryesore - LDK-së, PDK-së dhe AAK-së janë për fillimin e bisedimeve me Beogradin

• Të hënën bëhet hapja solemne e Sallës së renovuar të Kuvendit të Kosovës

• Anëtarët e Qverisë së Kosovës do ta bojkotojnë takimin e Bordit të AKM-së

• F. Sejdiu: "Qendra Koordinuese serbe" nuk mund të zhvillojë biseda për Kosovën

• Përfaqësuesit e koalicionit serb "Kthimi" kanë miratuar propozimin për planin e implementimit të standardeve

• Nënshkruhet një marrëveshje ndërmjet Kosovës, Unionit Serbi - Mali i Zi dhe Shqipërisë kundër krimit të organizuar

• Sipas KFOR-it çek e sllovak Podujeva ndër rajonet më të qeta në Kosovë

• Takim i MASHT-it me drejtorë të rajonit të Gjilanit

• Vijuesit e kursit multietnik morën sot diplomat nga përfaqësuesi i Zyrës amerikane

• Armët ilegale paraqesin rrezik për të ardhmen e Kosovës, thotë komandanti amerikan Ponsini

• Përfaqësuesit e Parlamentit holandez vizituan Kuvendin komunal të Prishtinës

• Mbahen pesë punëtori regjionale për parimet udhëzuese të Kombeve të Bashkuara për zhvendosjen e brendshme

• Komuna e Podujevës nis përgatitjet për aerofotografimin e terrenit dhe zonave kadastrale

• Hani i Elezit: Duhet të paguajnë për programin TV që nuk e shikojnë

• Në Tokio do të mbahet takimi ministror për forcimin e marrëdhënieve ekonomike në Ballkanin Perëndimor

• Në Maqedoni greva e përgjithshme në arsim, shkencë dhe kulturë ende vazhdon

• Një polic ushtarak amerikan është vrarë dhe të dy të tjerë janë plagosur

• Të paktën dy afganë janë vrarë e gjashtë të tjerë janë plagosur

• Arrestohet një ushtar amerikan për spiunazh

• Uashingtoni beson se Irani vazhdon përpjekjet për prodhimin e armëve bërthamore

• Kërkohet ndalimi i klonimit riprodhues

• Kodi i Windows jashtë Microsoft-it

• Pas një sulmi me bombë vdes ish-presidenti çeçen

Presidenti Rugova foli sot në Kongresin e Inernacionales Demokratike të Qendrës në Madrid

Madrid, 13 shkurt 2004 - Presidenti i Kosovës Ibrahim Rugova, foli sot në Kongresin e Inernacionales Demokratike të Qendrës (IDC), i cili i zhvilloi punimet më 12 dhe 13 shkurt 2004 në Madrid, e ku morën pjesë edhe shumë burrë shtetesh e liderë nga vende të ndryshme të botës.   Ndryshe, fjalën përmbyllëse në këtë takim e mbajti kryeministri i Spanjës Hoze Maria Aznar, i cili u rizgjodh kryetar i kësaj Internacionale. Poashtu sot folën edhe disa kryeministra nga vende të ndryshme të Evropës, Amerikës Latine dhe të Afrikës, si dhe Mariano Rahoi kandidat për kryeministër të Spanjës. Presidenti Rugova fillimisht në fjalimin e tij falenderoi IDC që LDK-në e ka pranuar në gjirin e saj para shumë vitesh.   Në vazhdim të fjalës së tij, Presidenti Rugova tha se për 10 vjet LDK-ja organizoi rezistencën e popullit kundër dominimit të huaj dhe e krijoi shtetin e Kosovës, i cili në botë u njoh si "shtet i shqiptarëve të Kosovës" dhe si "shtet paralel i Kosovës" dhe poashtu e mbrojti këtë shtet më 1998 kur u bë agresion i armatosur i Beogradit, të cilin e ndërpreu intervenimi i NATO-s.

Presidenti Rugova pastaj foli për katër vite e gjysmë të Kosovës në liri, për zhvillimin ekonomik dhe për objektivat për të ardhmen. Poashtu Presidenti foli edhe për sukseset që janë arritur në Kosovë edhe në shumë fusha të jetës si dhe për bashkëpunimin me UNMIK_un.

"Ne po punojmë për njohjen formale të pavarësisë së Kosovës sa më shpejt", tha Presidenti Rugova dhe theksoi: "Pavarësia do t'i përshpejtonte proceset e brendshme demokratike dhe ekonomike dhe do të qetësonte rajonin dhe këtë pjesë të Evropës Juglindore. Pra, një Kosovë e pavarur e integruar në BE, në NATO dhe në miqësi të përherëshme me SHBA".

- Edhe në këtë takim të liderëve të IDC-së dëshiroj të theksoj - tha Presidenti Rugova - se ne gjithmonë duhet të angazhohemi që problemet t'i zgjidhim me mjete paqësore politike. Por, kur kjo bëhet e pamundshme atëherë lufta apo intervenimi në emër të paqes e të demokracisë është një çëshjte e drejtë. Vendi im Kosova është shembulli më i mirë për këte, - nënvizoi Presidenti Rugova.

Në fund të fjalimit, Presidenti Rugova, duke ju drejtuar kryeministrit spanjoll Aznar tha: "Nuk e harroj kurrë pritjen që më keni bërë në vitin 1999 në Madrid, kur vendi im ishte në luftë dhe populli në eksod. Ju falemnderit për përkrahjen tuaj gjatë luftës dhe pas luftës në rindertimin e Kosovës".

Presidenti Rugova në margjina të Kongresit të IDC-së pati takime të ndryshme me liderët pjesëmarrës në këtë takim. 

Përfaqësuesit e partive kryesore - LDK-së, PDK-së dhe AAK-së janë për fillimin e bisedimeve me Beogradin

Prishtinë, 13 shkurt 2004 - Përfaqësuesit e partive kryesore - LDK-së, PDK-së dhe AAK-së - janë takuar sot me shefin e UNMIK-ut Hari Holkeri, dhe kanë rikonfirmuar qëndrimin e tyre për fillimin e bisedimeve me përfaqësuesit e Beogradit. Por ata kanë kundërshtuar paralajmërimet që e ashtuquajtura "Qendër koordinuese serbe për Kosovën" të jetë palë në dialog midis Prishtinës dhe Beogradit.

Nënkryetari i LDK-së Kolë Berisha tha se akoma nuk është caktuar data dhe vendi se ku do të zhvillohen bisedimet e para. Zoti Berisha theksoi se "Qendra koordinuese" nuk mund të jetë palë në këto bisedime me Kosovën.

"Personaalisht kërkova që Qendra koordinuese nuk duhet të jetë në dialog", tha Berisha, duke shtuar se është kërkaur që serbët e Kosovës të koalicionit "Kthimi" të jenë pjesë e palës kosovare të bisedimeve.

Poashtu edhe lideri i PDK-së Hashim Thaçi dhe ai i AAK-së Ramush Haradinaj thanë se kundërshtojnë bisedimet me Qendrën koordinuese serbe. Thaçi e Haradinaj janë angazhuar për implementimin e standardeve për Kosovën.

Në këtë takim me Holkerin morën pjesë edhe përfaqësuesit serbë, të cilët janë angazhuar për fillmin e këtyre bisedimeve mes Prishtinës dhe Beogradit.

Të hënën bëhet hapja solemne e Sallës së renovuar të Kuvendit të Kosovës

Prishtinë, 13 shkurt 2004 - Të hënën, më 16 shkurt, në orën 12:00 do të bëhet hapja solemne e Sallës së renovuar të Kuvendit të Kosovës, ku do të marrin pjesë të gjithë deputetët.

Janë ftuar të marrin pjesë edhe strukturat e UNMIK-ut, përfaqësuesit e institucioneve vendëse, përfaqësuesit e Zyrave diplomatike dhe të institucioneve të tjera ndërkombëtare në Kosovë, përfaqësuesit e KFOR-it, të Policisë së UNMIK-ut, TMK-së , SHPK-së etj, thuhet në një njoftim të Shërbimit të Kuvendit.

Anëtarët e Qverisë së Kosovës do ta bojkotojnë takimin e Bordit të AKM-së

Mitrovicë, 13 shkurt 2004 - Kryeministri i Kosovës Bajram Rexhepi konfirmoi qëndrimin e Qverisë se anëtarët e saj do të vazhdojnë bojkotimin e takimeve të Bordi të AKM-së.

Ai e arsyetoi këtë veprim me domosdoshmërinë e ndryshimit të gjendjes në Agjencinë Kosovare të Mirëbesimit dhe vazhdimin e privatizimi. Ai i bëri këto komente gjatë vizitave që i bëri shoqatave të dala nga lufta.

Zërat se mund të ketë ndryshime në Bordin e AKM-së i quajti fontanë dëshirash të njeriut që flet pa kompetencë. "Lambsdorf as që i ka vendosur dhe as që mund t'i ndërrojë ata", u shpreh kryeministri Rexhepi. 

F. Sejdiu: "Qendra Koordinuese serbe" nuk mund të zhvillojë biseda për Kosovën

Prishtinë, 13 shkurt 2004 - Fatmir Sejdiu ekspert, juridik dhe anëtar i Kryesisë së Kuvendit të Kosovës tha se angazhimet e Hari Holkerit janë kontribut i mirëfilltë në ecjen përpara të proceseve.

Ai shtoi se "Qendra Koordinuese serbe" nuk mund të jetë në asnjë cilësi partnerësh dhe të zhvillojë biseda me Kosovën.

Arsyeja e parë është për shkak të vetë nivelit qeveritar, ngase ajo nuk është një strukturë qeveritare, por është një segment terciar i politikës serbe dhe faktori i dytë është se "Qendra koordinuese serbe" deri tash me qëndrimet e veta po ashtu ka qenë një nga faktorët që ka minuar të gjitha proceset në Kosovë, thekson z. Sejdiu. Ai ka shtuar se kjo qendër i ka ushqyer strukturat paralele serbe në Kosovë.

Përfaqësuesit e koalicionit serb "Kthimi" kanë miratuar propozimin për planin e implementimit të standardeve

Prishtinë, 13 shkurt 2004 - Përfaqësuesit e koalicionit serb "Kthimi" kanë miratuar dje në Mitrovicë propozimin për planin e implementimit të standardeve para statusit që do t'u dorëzohet autoriteteve ndërkombëtare në Kosovë.

 

Përfaqësuesit serbë në Kuvendin e Kosovës janë dakorduar që propozimet t'i parashtrohen shefit të UNMIK-ut Hari Holkeri, ambasadorëve të Grupit të Kontaktit, të Serbisë e Malit të Zi si dhe shefave të zyrave të tyre në Prishtinë.

 

 

Nënshkruhet një marrëveshje ndërmjet Kosovës, Unionit Serbi - Mali i Zi dhe Shqipërisë kundër krimit të organizuar

 

Prishtinë, 13 shkurt 2004 - Këto ditë do të nënshkruhet me Kosovën, Unionin Serbi - Mali i Zi dhe Shqipërinë marrëveshje bashkëpunimi ndërmjet të cilave konkretizohet lufta e këtyre shteteve kundër krimit të organizuar dhe trafiqeve të qenieve njerëzore.

 

Bajram Ibraj drejtor i përgjithshëm i policisë së Shqipërisë tha se sa i përket bashkëpunimit me Kosovën në fushën e krimit të organizuar më 5 janar ai ka zhvilluar në Prishtinë bisedime me krerë të lartë të policisë së UNMIK-ut dhe të Shërbimit Policor të Kosovës.

 

 

Sipas KFOR-it çek e sllovak Podujeva ndër rajonet më të qeta në Kosovë

 

Podujevë, 13 shkurt 2004 (QIK) - Gjendja e sigurisë në rajonin tonë të përgjegjësisë është e qetë dhe pa probleme, pos disa akteve të vogla kriminale, tha në konferencën e sotme për shtyp të KFOR-it çek e sllovak komandanti i Batalionit të Katërt, nënkoloneli Josef Kopecki i cili zëvendëson nënkolonelin Zdenek Havala deri në prill të këtij viti.

 

"Ne më shumë jemi të koncentruar në vijën kufitare dhe në qendër të qytetit ku situata është e qetë", deklaroi Kopecki duke pohuar se gjatë javëve të kaluara ka pasur një vrasje, disa incidente të vogla dhe tri raste të prerjes ilegale të druve.

Sipas nënkolonelit Kopecki, në bazë të statistikave, mund të thuhet se në Podujevë ka rënie të aktiviteteve kriminale dhe rajoni i kësaj komune, krahasuar me komunat tjera, është ndër rajonet më të qeta në Kosovë.

Batalioni i Katërt çek e sllovak përfundon misionin në prill të këtij viti dhe sipas nënkolonelit Kopecki kontigjenti i ardhshëm do të ketë një organizim tjetër.

 

 

Takim i MASHT-it me drejtorë të rajonit të Gjilanit

 

Gjilan, 13 shkurt 2004 - Në organizim të Ministrisë së Arsimit, Shkencës dhe Tekonologjisë si dhe Zyrës regjionale të arsimit, në Gjilan u mbajt një takim pune me drejtorët e shkollave fillore dhe të mesme të komunave Gjilan, Viti, Dardanë dhe Artanë dhe me drejtorë të Drejtorive Komunale, ku u folë për zbatimin e reformave në arsim.

Në fillim, Gjylshene Berisha nga zyra regjionale e arsimit foli rreth gjendjes aktuale të shkollave në rajon dhe theksoi angazhimin e mekanizmave dhe subjekteve arsimore për krijimin e rendit dhe disiplinës në institucionet arsimore.

Rajoni i Gjilanit ka 57 shkolla me mësim në gjuhën shqipe, prej tyre 10 janë të mesme, ku vijojnë 45.303 nxënës dhe me ta punojnë 2.097 mësimdhënës.

Në temën "Asgjë nuk ndodh në arsim, përderisa ajo nuk reflektohet te nxënësit" ligjëroi Isuf Zeneli nga Ministria e Arsimit. Ndërkaq Xhavit Rexhaj foli për rolin dhe zbatimi e reformës në arsim, me theks të veçnatë në rolin që kanë arsimtari, prindi dhe komuniteti për të pasur një shkollë më të mirë, më të reformuar dhe të atillë çfarë e kërkojnë nevojat e një shoqërie demokratike.

 

 

Vijuesit e kursit multietnik morën sot diplomat nga përfaqësuesi i Zyrës amerikane

 

Gjilan, 13 shkurt 2004 - Rreth 52 pjesëmarrës të një kursi tremujor multietnik në Gjilan për mësimin e gjuhëve shqipe, serbe dhe turke, të organizuar nga shoqata joqeveritare "Lansdown" kanë marrë sot diplomat, të cilat ua dorëzoi solemnisht përfaqësuesi i Zyrës amerikane, Majkëll Mekllelen.

Në një fjalë rasti para vijuesve të kursit, Majkll Mckllellen tha se vijuesit mund të jenë një shembull i mirë edhe për të tjerët në Kosovë. "Nxënësit e diplomuar sot kanë përfituar një shpirt të dytë ose të tretë, sepse njohuria mbi gjuhën e tretë u hap atyre mundësi që të fitojnë më shumë dituri për kulturën, traditën dhe njohuritë e popujve të tjerë" tha Mekllelen, duke shtuar se ata i kanë hapur vetës dyert për të mësuar më shumë, sepse ata besojnë në një Kosovë të hapur për të gjithë dhe në ardhmërinë e Kosovës.

Shaban Terziu, përgjegjës i shoqatës, "Lansdown", e cila tubon mbi 2100 anëtarë, prej tyre 1130 shqiptare, 864 serbë si dhe turq e romë, tha se kursi tremujor është finansuar nga Zyra amerikane në Prishtinë, ndërsa është vijuar nga 52 fëmijë të të gjitha komuniteteve, të cilët kanë mësuar gjuhën e njëri-tjetrit. Serbët e kanë mësuar gjuhën shqipe, shqiptarët gjuhën serbe dhe që të dy palët së bashku kanë mësuar gjuhën angleze, tha Terziu.

Ndërkaq, Veliçko Jovanoviq, profesor serb, tha se vijimi i kurseve ka treguar një interesim të madh tek nxënësit serb. Gjuha është mjet i mirë i komunikimit midis njerëzve dhe ky është rasti i parë që kontribuon nga bashkëjetesa mes shqiptarëve dhe serbëve, tha ai.

 

 

Armët ilegale paraqesin rrezik për të ardhmen e Kosovës, thotë komandanti amerikan Ponsini

 

Gjilan, 13 shkurt 2004 - Njerëzit të cilët mbajnë armë ilegale, nuk e duan paqen dhe ata paraqesin rrezik për të ardhmen tuaj, tha komandanti amerikan i kampit "Montith" në Gjilan, koloneli Alen Ponsini, në takimin e tij të fundit me gazetarë, para se të përfundojë misionin e tij paqeruajtës në sektorin lindor të Kosovës.

Ai tha se të shtënat e shumta me armë zjarri, që janë dëgjuar gjatë festive të fundivitit, kanë qenë arsye që KFOR-i të ndërmarrë disa bastisje të fshatrave. "Ne besojmë se qytetarët e sektorit të lindjes mbajnë shumë armë ilegale", tha koloneli Ponsini, sipas të cilit armë pa leje janë gjetur si te shqiptarët, ashtu edhe te serbët.

 

Duke i rikujtuar njerëzit e këtushëm për rrezikun që paraqesin armët ilegale, zyrtari i lartë ushtarak i KFOR-it tha se njerëzit që mbajnë armë janë kundër një ambienti të qetë dhe të sigurtë për të gjithë në Kosovë. Individët e tillë e pengojnë të ardhmen, përhapin mesazhe të dhunës edhe të urrejtjes dhe nuk e duan paqen, tha Ponsini.

Koloneli Alen Ponsini e ka lavdëruar popullatën vendore për kontributin që ajo ka dhënë në stabilizimin e situatës. Sipas tij, pjesa dërmuese e qytetarëve ka shfaqur besim te SHPK-ja dhe i kanë raportuar krimet, duke krijuar mundësi për të verpuar drejtësia dhe ligji. Raportimi i krimeve dhe aktiviteteve ekstremiste ka rezultuar me një zbritje të dukshme të sulmeve, hedhjeve të mjeteve ekpsloduese dhe vrasjeve.

Ndërkaq, në komentin e tij rreth procesit të kthimit, ai vlerësoi se ka një përparim të dukshëm.

 

Në Gjilan, Dardanë dhe Viti janë kthyer 538 persona të zhvendosur. Në pranverë janë planifikuar vizitat e disa familjeve, të cilat shpresojnë të kthehen. Edhe kjo është një shenjë e progresit dhe e arsyes që të vazhdojmë të shpresojmë për një të nesërme më të mirë në Kosovë, ka thënë më tutje, koloneli i KFOR-it amerikan.

Siç dihet KFOR-i amerikan në Kosovë do të bëjë edhe kompensimin për pronat të cilat i ka shfrytëzuar pas lufte në Kosovë. Koloneli Ponsini tha se Qeveria amerikane do të bëjë kompensim vetëm për tokat e shfrytëzuara nga forcat e SHBA-ve.

 

 

Përfaqësuesit e Parlamentit holandez vizituan Kuvendin komunal të Prishtinës

 

Prishtinë, 13 shkurt 2004 - Kryetari i Kuvendit Komunal të Prishtinës, Ismet Beqiri, zv.kryeshefi ekzektiv, Arsim Janova, si dhe Hajrush Bajraliu, kryetar i Grupit Parlamentar të LDK-së dhe Shemsi Veseli, kryetar i Grupit Parlamentar të PDK-së, pritën sot Gerrit Volk dhe Jan Dirk Blaauw, përfaqësues të Parlamentit të Holandës.

Beqiri i njoftoi mysafirët lidhur me organizimin e Asamblesë Komunale të Prishtinës, si dhe për të gjitha të rriturat dhe sfidat e Kuvendit Komunal të Prishtinës. Po ashtu ai tha se në kuadër të Asamblesë Komunale të Prishtinës janë të përfshira të gjitha strukturat politike, përfshirë këtu edhe minoritetet.

Kryetari i Prishtinës, Ismet Beqiri shprehu vullnetin për bashkëpunim me kryeqytetin, apo ndonjë qytet të Holandës për bashkëpunim më të theksuar dhe për binjakëzim të mundshëm.

Gerrit Volk foli për parapërgatitjen e një seminari që do të organizohet në qershor të këtij viti për zgjedhjet, ndërkaq këtë javë në takimin me ambasadorin holandez, ai tha se do t'ia përcjellin kërkesat për vendosjen e kontakteve të ndonjë qyteti të Holandës me Prishtinën.

 

 

Mbahen pesë punëtori regjionale për parimet udhëzuese të Kombeve të Bashkuara për zhvendosjen e brendshme

 

Prishtinë, 13 shkurt 2004 - Punëtoria e parë nga pesë sosh, përkitazi me parimet udhëzuese të Kombeve të Bashkuara lidhur me zhvendosjen brenda vendit, organizuar nga Komisioneri i Lartë i Kombeve të Bashkuara për Refugjatë (UNHCR) dhe Zyra e Komisionerit të Lartë të Kombeve të Bashkuara për të Drejtat e Njeriut (UNOHCHR), do të mbahet në Gjilan më 16 shkurt, dhe më pas punëtori të tjera do të mbahen në të gjitha regjionet.

Qëllim i punëtorisë është të ofrojë një njohje në lidhje me parimet udhëzuese të KB-ve për zhvendosjen brenda vendit dhe të sqarojë përgjegjësitë e niveleve të ndryshme të qeverisjes, të KB-ve, OJQ-ve, dhe palëve të tjera drejt sigurimit e të drejtave e të të zhvendosurve brenda vendit, e po ashtu edhe hetimin e rrugëve praktike më tutje.

 

Do të ketë, po ashtu, diskutime në lidhje me implementimin e parimeve udhëzuese. Pjesëmarrës do të jenë edhe zyrtarë të lartë të qeverisë, dhe përfaqësim të organizatave relevante të vendit dhe ndërkombëtare, thuhet në një komunikatë për media të UNHCR-it.

 

 

Komuna e Podujevës nis përgatitjet për aerofotografimin e terrenit dhe zonave kadastrale

 

Podujevë, 13 shkurt 2004 - Në bazë të planit dhe programit të Ministrisë së Shërbimeve Publike dhe Agjencionit Kadastral të Kosovës për rikonstruimin dhe azhurimin e kadastrit në Kosovë, komuna e Podujevës fillon përgatitjet realizmin e këtij projekti që ka të bëjë me rilevimin aerofotogrametrik të terrenit dhe zonave kadastrale.

Qëllimi i rilevimit aerofotogrametrik është harmonizimi i dokumentacionit kadastral me gjendjen në terren në mënyrë që qytetarët t'i realizojnë të drejtat e tyre më lehtë dhe më shpejt.

 

Aerofotografimi do të mundësojë edhe planifikimin hapësinor, mbledhjen e taksave si dhe planifikme tjera të rëndësishme, tha drejtori i drejtorisë për kadastër, gjeodezi dhe pronë i Podujevës Tahir Sahiti.

 

Ai tha se komuna do të themelojë shtabet për rilevim si dhe do ta bëjë përgatitjen e terrenit në bashkëpunim me pronarët e parcelave dhe AKK-në.

Aerofotografimi i fundit në Kosovë, sipas drejtorisë për gjeodezi kadastër dhe pronë është bërë në vitet e '60-ta.

 

 

Hani i Elezit: Duhet të paguajnë për programin TV që nuk e shikojnë

 

Hani i Elezit, 13 shkurt 2004 - Banorët e rajonit të Hanit të Elezit janë të revoltuar për shkak se në faturat e KEK-ut për muajin dhjetor duhet të paguajnë edhe taksën prej 3,5 euro për RTK, ndonëse programi i TV Kosovës nuk shihet fare në këto anë.

Qytetarët reagojnë ndaj taksës së tillë dhe kërkojnë nga KEK-u t'i lirojë nga ajo pagesë që të paktën të paguajnë për energjinë e shpenzuar. Ka raste që në faturat e energjisë elektrike të mos figurojë asnjë kilovatorë e shpenzuar, por konsumatori duhet të paguajë vetëm taksën e RTK-së.

Televizioni i Kosovës nuk ka bërë përpjekje të duhura që programi i saj të shihet në këto, ndonëse trumpeton çdo ditë se është "qind për qind" i Kosovës!

 

 

Në Tokio do të mbahet takimi ministror për forcimin e marrëdhënieve ekonomike në Ballkanin Perëndimor

 

Tokio, 13 shkurt 2004 - Ministria japoneze e Punëve të Jashtme ka bërë të ditur se më 5 prill do të mbahet takimi ministror ku do të diskutohet përforcimi i marrëdhënieve ekonomike në Ballkanin Perëndimor. Në këtë takim do të marrin pjesë ministrat e punëve të jashtme dhe të ekonomisë së Shqipërisë, Bosnje e Hercegovinës, Kroacisë, Maqedonisë, Serbisë e Malit të Zi, si dhe përfaqësuesve të vendeve të Evropës Juglindore.

 

 

Në Maqedoni greva e përgjithshme në arsim, shkencë dhe kulturë ende vazhdon

 

Shkup, 13 shkurt 2004 - Në Maqedoni greva e përgjithshme në arsim, shkencë dhe kulturë ende vazhdon, ndërkaq për shkak të saj tashmë tri javë nuk punojnë çerdhet, shkollat, institucionet kulturore dhe shkencore. Ndërkohë ende nuk ka paralajmërime për vazhdimin e negociatave ndërmjet sindikatës dhe Qeverisë.

 

 

Një polic ushtarak amerikan është vrarë dhe të dy të tjerë janë plagosur

 

Bagdad, 13 shkurt 2004 - Një polic ushtarak amerikan është vrarë dhe të dy të tjerë janë plagosur me rastin e aktivizimit të një mjeti shpërthyes të enjtën në mbrëmje në Bagdad, bëri të ditur ushtria amerikane.

"Një ushtar nga Brigada e 16-të është vrarë, kurse dy të tjerë janë plagosur kur mbi ta është hedhur një mjet shpërthyes, ndërsa ndodheshin në patrullim afër kaurtit Abu Garib në Bagdad", ka deklaruar sot zëdhënësi i ushtrisë amerikane.

 

 

Të paktën dy afganë janë vrarë e gjashtë të tjerë janë plagosur

 

Kabul, 13 shkurt 2004 - Të paktën dy afganë janë vrarë e gjashtë të tjerë janë plagosur të premtën në një shpërthim që ndodhi në pozicionin e ushtrisë qeveritare në Afganistanin Juglindor.

Shpërthimi ka ndodhur disa orë pasi që mbi 20 raketa u shkrepën mbi bazën ajrore në Khost, ku janë të vendosur ushtarët amerikanë, ka bërë të ditur policia afgane.

 

 

Arrestohet një ushtar amerikan për spiunazh

 

Uashington, 13 shkurt 2004 - Një roje amerikane i gardës, skuadra e të cilit po nisej për në Irak është arrestuar nën akuzat se po përpiqej t'i dërgonte informacione sekrete rrjetit të Al-Kaidas.

Ai është specialisti, Rajan Anderson, 26 vjeç. Ai po mbahet nën arrest në bazën e skuadrës së tij, Fort Lewis në shtetin e Uashingtonit.

Specialisti Anderson dukej se ishte objekt i një operacioni të ushtrisë amerikane, FBI-së dhe departamentit të drejtësisë.

Sipas zyrtarëve të Pentagonit, ai po përpiqej të hynte në chatroom-e ekstremiste të internetit dhe po përpiqej të vendoste kontakte me operativë të Al-Kaidas për të ofruar shërbimet e tij për dhënien e informacioneve.

Ata thonë se ai edhe është kthyer në mysliman. Si ekuivalenti i korporalit dhe anëtar i një ekipi të tankeve, aksesi i tij ndaj informacioneve sekrete ka qenë i kufizuar, por ai mund të ketë informacione mbi aftësitë dhe planet e skuadrës së tij që do të dislokohet në Irak muajin tjetër.

 

 

Uashingtoni beson se Irani vazhdon përpjekjet për prodhimin e armëve bërthamore

 

Uashington, 13 shkurt 2004 - Një diplomat i lartë amerikan tha se Uashingtoni beson se Irani vazhdon përpjekjet për prodhimin e armëve bërthamore.

Ndihmëssekretari i Shtetit, Xhon Bolton, tha se Shtetet e Bashkuara nuk kanë dyshim se Irani nuk po i përmbahet premtimit të bërë vitin e kaluar për të pezulluar programin e pasurimit të uraniumit.

Ai tha se inspektorët e Agjencisë Ndërkombëtare të Energjisë Atomike kanë gjetur skicat e impianteve të sofistikuar për pasurimin e uraniumit me synim prodhimin e bombës atomike.

Zoti Bolton e quajti këtë "një veprim tjetër mashtrues të Iranit" përsa i përket programit të tij bërthamor, për të cilin Teherani thotë se ka thjesht qëllime paqësore.

 

 

Kërkohet ndalimi i klonimit riprodhues

 

Seul, 13 shkurt 2004 - Shkencëtarët koreano-jugorë që me sukses klonuan embrione të njeriut për të marrë inde për studime shkencore, kanë bërë thirrje që të ketë një ligj që ndalon klonimin e foshnjeve.

Woo Suk Hwang që drejtoi studimin tha se klonimi riprodhues ishte gabim dhe çdo komb duhet ta nxjerrë atë jashtë ligjit.

Ai po fliste në një konventë shkencore të mbledhur në Seattle ku u bënë të ditura rezultatet e studimit.
Woo Suk Hwang i Universitetit Kombëtar të Seulit dhe kolegët e tij e morën materialin gjenetik nga qeliza normale të femrave donatore dhe e kombinuan atë me vezët e tyre.

Embrionet e përftuara pastaj u zhvilluan që të prodhonin inde që mund të ndahen në çdo ind qelizor.
Qëllimi është që ato të përdoren për të zëvendësuar indet që nuk funksionojnë tek pacientët e sëmurë.

 

 

Kodi i Windows jashtë Microsoft-it

 

Uashington, 13 shkurt 2004 - Gjiganti kompjuterik, Microsoft ka pranuar se disa nga informacionet themelore të sistemeve kompjuterike të tij janë bërë të njohura në internet.

Ai thotë se kodi i burimit për sistemin operues të Windows po përhapet në mënyrë të paligjshme.

Microsoft përpiqet të mbajë sekret kodin për sistemin e Windows. Ai është ekuivalenti i ADN-së për kompjuterat dhe tashmë firma ka frikë se po të bjerë në duar të gabuara, kodi mund të përdoret për të infiltruar miliona kompjuterë në gjithë botën.

Më shumë se 90% e kompjuterave të botës përdorin Windows. Kodi i cili u shfaq në faqet e internetit është baza e Windows 2000 dhe Windows NT.

 

 

Pas një sulmi me bombë vdes ish-presidenti çeçen

 

Doha, 13 shkurt 2004 - Ish-presidenti çeçen Zelimkan Jandarbajev ka vdekur pas një sulmi me bombë mbi veturën e tij, i thanë Frans Pressit burimet spitalore me kusht anonimiteti.

Jandarbajev prej tri vitesh jetonte në kryeqytetin e Katarit, Doha. Ai me insistimin e Rusisë ishte futur në listën e Kombeve të Bashkuara të grupeve dhe individëve që kanë lidhje me rrjetin terrorist Al Kaida.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |