Përmbajtja:

• Presidenti Rugova mbërriti në Madrid, ku do të marrë pjesë në takimin e liderëve të IDC-së

• NATO mund të reduktojë edhe më forcat e KFOR-it në Kosovë

• Në Gjakovë u mbajt debat i hapur i FR të LDK-së me të rinjtë e këtij qyteti

• "Rilindja" më 12 shkurt nuk do të shënojë 59-vjetorin e themelimit

• Vendosen kontakte mes afaristëve të Kosovës dhe atyre të Austrisë

• Vizitë e suksesshme e serbëve të zhvendosur në fshatin Livadicë

• KFOR-i kontrollon shtëpitë e disa përfaqësuesve lokalë në Zhegër

• Në Gjilan formohet shoqata për mbrojtjen e ambientit

• Holkeri thotë se dialogu ndërmjet Kosovës dhe Serbisë mund të nisë brenda muajit shkurt

• Ministria për Ekonomi dhe Financa ka bërë të ditur se suficiti për vitin 2003 është 75 milionë euro

• Një delegacion i Pentagonit dhe i Komanadës për Evropën është takuar me komandantin e TMK-së

• Në listën e zezë të Uashingtonit gjenden Menduh Thaçi, Abdyl Jakupi dhe Xhezair Shaqiri

• BE publikoi listën e zezë për Maqedoninë me personat që u ndalohet hyrja në vendet anëtare të BE-së

• Dega e LDK-së në Gjilan fare nuk është e befasuar me akuzat shpifëse të Degës së PDK-së

• Bugajski: Në Shqipëri kërkohen ide të reja

• Rivendoset prania diplomatike amerikane në Libi

• Asambleja Kombëtare franceze shprehet për ndalimin e simboleve fetare në shkollat shtetërore

• Në Bagdad janë vrarë sot 44 ushtarë të rinj irakianë

• Uesli Klark ka heqë dorë nga gara për kandidatin presidencial

• Trupat izraelite kanë vrarë sot të paktën 9 palestinezë

• Shpërthim i ri në Bagdad - 25 irakianë të vrarë

• Ka arritur në 47 numri i viktimave në sulmin e sotëm vetëvrasës në qendër të Bagdadit

• Kryeministri palestinez është i gatshëm të takohet me kryeministrin izraelit

• Të paktën 13 palestinezë të vrarë

• Hamasi i kërcënohet Izraelit

Presidenti Rugova mbërriti në Madrid, ku do të marrë pjesë në takimin e liderëve të IDC-së

 

Madrid, 11 shkurt 2004 - Presidenti i Kosovës Ibrahim Rugova ka udhëtuar sot për në në Spanjë.
Me ftesë të z. Hoze Maria Aznar, kryeministër i Spanjës dhe kryetar i Internacionales Demokrate të Qendrës (IDC), Presidenti Rugova merr pjesë në takimin e IDC-së në nivel të kryetarëve të shteteve dhe qeverive, që mbahet në Madrid më 12 dhe 13 shkurt, thuhet në një njoftim të Zyrës së Presidentit të Kosovës.

Siç mësohet, Presidenti Rugova do të takohet me kryemnistrin aktual të Spanjës Hoze Maria Aznar dhe me kandidatin për kryeministër të këtij vendi, Mariano Rahoi (Rajoy).

Presidenti Rugova herën e fundit e ka vizituar Spanjën në vitin 1999, kur është takuar me kryeministrin Aznar dhe me mbretin e Spanjës Huan Karlos.

 

 

NATO mund të reduktojë edhe më forcat e KFOR-it në Kosovë

 

Prishtinë, 11 shkurt 2004 - Sekretari i përgjithshëm i NATO-s, Jap de Hop Shefer dhe komandanti i përgjithshëm i forcave të NATO-s për Evropë, gjenerali Xhems Xhons, kanë bërë të qartë se Aleanca është në proces e sipër të transformimit dhe synon të lëvizë drejt një efikasiteti më të madh dhe më fleksibil, tha sot para mediave zëdhënësi i KFOR-it, Kris Tomson.

Poashtu ai tha se të gjitha vendet e NATO-s, si dhe shtetet e reja anëtare, ndodhen në fazën e reduktimit dhe rekrutimit të forcave të tyre, duke i bërë ato më profesionale.

Zëdhënësi Tomson tha se prodhimi i vjetër i sistemeve të armatimit të vendeve të ish-Paktit të Varshavës është hequr nga perdorimi, dhe është zëvendësuar me prodhime të teknologjise së lartë. Ndërkaq, shtabet qendrore janë duke u shpërbërë apo duke u shkrirë në mënyrë që struktura komanduese të jetë më efikase dhe më pak burokratike, tha ai.

Edhe KFOR-i ka bërë racionalizimin e tij që nga mbarimi i luftës ne Kosovë. Në fillim të misionit KFOR-i kishte rreth 50 mijë trupa tokësore, tanke dhe mjete të tjera të rënda ushtarake, theksoi Tomson, për të shtuar se tani situata në Kosovë ka ndryshuar.

 

Tani KFOR-i ka racionalizuar prezencën e vet deri në shkallën me 18 mijë trupa të këmbësorisë se lehtë, të përkrahura nga forcat rezervë të horizontit, por që mund të ruajnë një ambient të qetë dhe të sigurt, nënvizoi Tomson.

Ai tha se për NATO-n përdorimi i forcës ushtarake mbetet opsioni i fundit por, në rast nevoje, forcat e Aleancës janë në gjendje të vihen në lëvizje shumë shpejt.

 

 

Në Gjakovë u mbajt debat i hapur i FR të LDK-së me të rinjtë e këtij qyteti

 

Gjakovë, 11 shkurt 2004 - Me pjesëmarrjen e shumë të rinjve, në sallën e pallatit të kulturës "Asim Vokshi" në Gjakovë u mbajt një takim takim të hapur. Ishte i pranishëm edhe kryetari i FR të LDK-së Lulzim Zeneli, deputetja e Kuvendit të Kosovës Mevlyde Saraçi, nënkryetari i LDK-së, dega në Gjakovë Afrim Sulejmani.

Në fjalën përshendetëse, kryetari i FR të LDK-së Lulzim Zeneli u fokusua në ngjarjet kapitale për vitin 2004, duke veçuar si shumë të rëndësishme zgjedhjet nacionale të këtij viti, duke e cilësuar angazhimin e të rinjve në këtë process si shumë domethënës dhe kërkoi një pjesëmarrje më të madhe të të rinjve në të gjitha proceset politike dhe shoqërore. Ai gjithashtu vuri në pah edhe shumë aktivitete dhe projekte të Forumi të Rinisë për këtë vit.

Kishte pyetje nga më të ndryshmet të drejtuara për kreun e Forumit të Rinisë të LDK-së në mesin e të cilave u përmendën edhe çështja e personave të zhdukur, privatizimi, luftimi i dukurive negative, mungesa e kushteve për studime, realizimi i projekteve komunale, mungesa e vendeve të reja të punës, statusi politik i Kosovës etj.

 

 

"Rilindja" më 12 shkurt nuk do të shënojë 59-vjetorin e themelimit

 

Prishtinë, 11 shkurt 2004 - Festa tradicionale e Ditës së Rilindjes në këtë 12 shkurt, të 59-vjetorit nuk mbahet, shtyhet në pritje që të jetë edhe festë e ridaljes së gazetës së parë të përditshme të Kosovës. Në vend të çfarëdo manifestimi, feste a proteste, bordi i "Rilindjes" përkujton:

"Edhe pas dy vjet nga mbyllja e detyrueshme e gazetës tradiconale 'Rilindja', të larguar padrejtësisht nga shtëpia e saj, UNMIK-u që mori Pallatin e Rilindjes për ndërtesë qeveritare, e as Qeveria e Kosovës, nuk bënë zgjidhjen alternative të premtuar dhe si obligim për të drejtën ligjore. Por, besojmë se dita e ridaljes - festa e 'Rilindjes' do të jetë së shpejti.

Në kërkim të krijimit të kushteve për ridalje 'Rilindja' ka marrë letër përkrahëse nga Kryeadministratori i OKB në Kosovë, Harri Holkeri, i është drejtuar edhe Agjencisë Kosovare të Mirëbesimit (AKM), dhe i ka paraqitur UNMIK-ut dokumentet e kërkuara që dëshmojnë të drejtën që pret ta realizojë".

"Mbyllja e një gazete në mënyrën si u mbyll *Rilindja+ nuk do të duhej të ndodhte në një vend demokratik e ligjor. Konsiderojmë se kjo mbyllje shkatërruese është shkelje e rëndë e të drejtës njerëzore, edhe e të drejtës legjitime e integritetit të një institucioni shumë të rëndësishëm të Kosovës", konstatohet mes tjerash në komunikatë të bordit të "Rilindjes".

 

 

Vendosen kontakte mes afaristëve të Kosovës dhe atyre të Austrisë

 

Vjenë, 11 shkurt 2004 - Instituti për Menaxhim dhe Inxhiniering të Ndërmarrjes (IEME), me qëllim që të mbështesë ekonominë kosovare, në bashkëpunim me partnerin e vet austriak WIFI Austria International Know How Transfer (IKT), organizoi një vizitë disaditëshe afariste në Vjenë të Austrisë.

Vizita në Austri kishte për qëllim vendosjen e kontakteve në mes të afaristëve të Kosovës dhe atyre të Austrisë në fushat ku ekziston interesi i dyanshëm, shkëmbimi i përvojave apo edhe krijimi i mundësive për biznese të reja.

Nesër pritet që grupi i afaristëve kosovarë të kthehet në Prishtinë.

 

 

Vizitë e suksesshme e serbëve të zhvendosur në fshatin Livadicë

 

Podujevë, 11 shkurt 2004- Një grupi punues komunal për kthimin e personave të zhvendosur në takimin e sotëm vlerësoi të suksesshme vizitën e gjashtë serbëve në fshatin Livadicë e cila u realizua gjatë ditës së djeshme.

Përfaqësuesi e KFOR-it dhe të SHPK-së raportuan për gjendjen e qetë të sigurisë që po mbretëron në komunën e Podujevës. Kurse përfaqësuesja e UNHCR-it znj. Paula Babos raportoi për vizitën "Shko dhe shiko", e cila ishte shumë mirë e organizuar dhe e realizuar pa kurrfarë problemi.

"Vizita në Livadicë ishte shumë e mirë dhe njerëzit që vizituan fshatin ishin të lumtur që u kthyen në vendet e tyre dhe vizituan pronat, varret si dhe u takuan me fqinjët, tha përfaqësuesi i serbëve Millomir Jovanoviq, duke pohuar se ky ishte mendim i gjithë pjesëmarrësve të vizitës.

Zv.kryetari i komunës Agim Kikaj kërkoi nga GPK që të mos keqinterpretohen përpjekjet për krijimin e atmosferës e cila është ndërtuar në GPK por edhe në Komisionin punues si dhe vlerësoi se vizita e suksesshme e projektit "Shko dhe shiko" është rezultat i përbashkët.

Në takimin e sotëm të Grupit punues komunal për kthimin e të zhvendosurve morën pjesë edhe përfaqësues të UNHCR-it, KFOR-it, NKMDLNJ-së, SHPK-së, subjekteve politike të komunës, Care international, etj, ndërkaq që ishte e habitshme mungesa e organizatorëve të vizitës, Këshillit Danez për Refugjatë dhe UMCOR-it.

 

 

KFOR-i kontrollon shtëpitë e disa përfaqësuesve lokalë në Zhegër

 

Gjilan, 11 shkurt 2004 - Sot në mëngjes është kontrolluar nga ushtarët e KFOR-it kryetari i bashkësisë vendore në Zhegër dhe anëtari i Kuvendit Komunal në Gjilan, Rrahim Bajrami si dhe disa shtëpi të tjera në këtë fshat të Grykës së Karadakut.

Sipas Rrahim Bajramit, udhëheqësi i njësitit ushtarak e ka justifikuar kontrollimin me faktin se mbrëmë në këtë fshat ishin provokuar dhe gjuajtur me gurë disa serbë lokalë, ndërsa ata, të shoqëruar nga KFOR-i, po i vizitonin pronat e tyre në Zhegër.

Rrahim Bajrami tha se në këtë bastisje janë përfshirë edhe Sokol Godeni, zëvendëskryetar i nëndegës së LDK në Zhegër, Sabri Idrizi, ofiqar si dhe disa shtëpi të tjera.

Kryetari i Bashkësisë vendore në Zhegër thotë se nuk janë njoftuar paraprakisht nga KFOR-i për këto vizita të shoqëruara të serbëve lokalë, në mesin e të cilëve, sipas Bajramit, ka edhe të atillë që kanë marrë pjesë në luftë, ose i kanë ndihmuar paramilitarët serbë.

 

 

Në Gjilan formohet shoqata për mbrojtjen e ambientit

 

Gjilan, 11 shkurt 2004 - Si kudo në botë, edhe në Kosovë, gjithnjë e më shumë po thellohet vetëdija e qytetarëve për ambientin dhe rëndësinë e pazëvendësueshme që ka ai për ekziztencën tonë. Një shoqatë, e cila i ka paracaktuar vetes për detyrë mbrojtjen e ambientit, është formuar dje edhe në Gjilan.

Avdyl Aliu, kryetar i shoqatës "Athili", e cila ka një bord prej 9 anëtarësh, thotë se qëllim kryesor kanë edukimin e qytetarëve për më shumë përkujdesje ndaj ambientit, në të cilin po jetojmë të gjihtë se bashku dhe kemi obligim t`ua trashëgojmë në gjendje më të mirë atyre që do të vijnë pas nesh.

Këtë qëllim, sipas Avdyl Aliut, shoqata "Athili" do të përpiqet ta realizojë përmes debateve të ndryshme nga kjo fushë, por nuk do të mungojnë as idetë dhe projektet konkrete për pastrimin e ambientit, mbrojtjen e sipërfaqeve të gjelbërta si dhe rikultivimin dhe gjelbërimin e sipërfaqeve të reja.

 

 

Holkeri thotë se dialogu ndërmjet Kosovës dhe Serbisë mund të nisë brenda muajit shkurt

 

Londër, 11 shkurt 2004 - Shefi i UNMIK-ut, Hari Holkeri, tha se plani i zbatimit të standardeve do të mund t'i paraqitet Këshillit të Sigurimit brenda tre apo katër javësh.

 

Ai i deklaroi BBC-së se dialogu ndërmjet përfaqësuesve të Kosovës dhe atyre të Serbisë mund të nisë brenda muajit shkurt dhe se Prishtina, sipas sygjerimit të tij, mund të ishte mikpritëse e këtij raundi bisedimësh. Holkeri i bëri këto komente pas një takimi në Londër me ministrin britanik për Evropën Denis Mekshejn.

I pyetur se cilat janë përparësitë që i ka potencuar disa herë kur të kthehet në Kosovë, Holkeri ka thënë: "Unë kam shumë gjëra urgjente për të bërë. Natyrisht se zbatimi i planit të standardeve është njera nga këto gjërë, por kemi nevojë urgjente t'i qasemi problemit të privatizimit dhe të vazhdojmë me të", ka thënë z. Holkeri.

 

Ai ka shtuar se do të përqëndrohet në procesin e dialogut meqë ka shumë shumë gjëra për t'u bërë dhe siç tha do të jetë në kontakt me Beogradin me qëllim që të fillojë dialogu sa më shpejt të jetë e mundur.

Holkeri tha se nuk dëshiron të japë ndonjë datë të saktë për fillimin e dialogut, ngase, siç tha, është gjithmonë e rrezikshme të spekulohet rreth kësaj, por shtoi se janë shumë afër mundësisë që të fillojë dialogu. Në lidhje me vendin e takimit ndërmjet delegacionit të Prishtinës dhe Beogradit, Holkeri tha se "ideja origjinale është që vendi të jetë Prishtina dhe Beogradi".

 

 

Ministria për Ekonomi dhe Financa ka bërë të ditur se suficiti për vitin 2003 është 75 milionë euro

 

Prishtinë, 11 shkurt 2004 - Ministria për Ekonomi dhe Financa ka bërë të ditur se suficiti për vitin 2003 do të jetë 75 milionë euro. Raporti përfundimtar buxhetor pritet të përpilohet më 31 mars të këtij viti.
Në një konferenë me gazetarë u tha se më 31 dhjetor 2003 në llogaritë bankare të Qeverisë kanë qenë 332 milionë euro, shumë kjo e cila është spekuluar të jetë suficit i vitit të kaluar.

 

Mirëpo, nga kjo shumë duhet zbritur mjetet e ndryshme siç janë mjetet e zotuara për kontrata dhe zotimet e papaguara të Qeverisë qendrore 166 milionë euro, apo gjithsej bashkë me mjete të tjera 257 milionë eruo, për të mbetur 75 milionë që paraqet tepricë apo suficit, thanë zyrtarët e Ministrisë së Ekonomisë dhe Financave.

Përndryshe të hyrat e përgjithshme për periudhën 12-mujore të vitit 2003 kanë qenë 589, 7 milionë euro, që rezulton se ato janë vetëm një për qind më të larta se të hyrat e parashikuara buxhetore me rishikim të buxhetit.

 

 

Një delegacion i Pentagonit dhe i Komanadës për Evropën është takuar me komandantin e TMK-së

 

Prishtinë, 11 shkurt 2004 - Një delegacion i lartë i Pentagonit dhe Komandës ushtarake amerikane për Evropën është takuar me komandantin e Trupave Mbrojtëse të Kosovës, gjeneral Agim Çekun. Për takimin që u zhvillua prapa dyerve të mbyllura në komunikatën e TMK-së thuhet se është biseduar për të arriturat dhe synimet e kësaj organizate.

 

 

Drejtuesit e arsimit të Kosovës biseduan me drejtorët e shkollave të rajonit të Pejës

 

Pejë, 11 shkurt 2004 - Drejtuesit e Ministrisë së Arsimit, Shkencës e Teknologjisë, zhvilluan dje në Pejë një takim me drejtorët e shkollave fillore e të mesme të kësaj komune, pastaj Istogut, Klinës dhe Deçanit.

 

Në qendër të këtij takimi ishte roli i reformave në arsimin fillor dhe ndikimi i punës së drejtorëve të shkollave si transmetues kryesor të informacioneve dhe politikave të ndryshimeve në procesin arsimor.

 

 

Në listën e zezë të Uashingtonit gjenden Menduh Thaçi, Abdyl Jakupi dhe Xhezair Shaqiri

 

Uashingon, 11 shkurt 2004 - Shtetet e Bashkuara të Amerikës zgjerojnë listën e personave të padëshiruar nga Maqedonia. Kështu nga ky vend në listën e zezë të shpallur nga Departamenti Amerikan i Thesarit janë:

 

Menduh Thaçi, zëvendëskryetar i Partisë Demokratike Shqiptare, Avdyl Jakupi, i njohur si komandant "Çakalla" dhe kreu i Partisë Demokratike Kombëtare, Xhezair Shaqiri.

 

Në bazë të këtij vendimi të Uashingtonit këtyre personave do t'u bllokohet çdo pasuri që mund të kenë në Amerikë dhe shtetasve amerikanë u ndalohet të kryejnë transaksione financiare me ta. Poashtu thuhet se paqja dhe stabiliteti në Evropë janë ndër interesat jetike të Qeverisë amerikane dhe zbatimi i plotë i Marrëveshjeve të Dejtonit dhe Ohrit janë kritike në këtë drejtim.

 

 

BE publikoi listën e zezë për Maqedoninë me personat që u ndalohet hyrja në vendet anëtare të BE-së

 

Bruksel, 11 shkurt 2004 - Bashkimi Evropian publikoi edhe zyrtarisht të ashtuquajturën listë të zezë për Maqedoninë me personat që u ndalohet hyrja në vendet anëtare të BE-së. Zyrtarët evropianë thanë se kjo masë ka një efekt dymbëdhjetëmujor dhe se do të ndryshohet vazhdimisht, ndoshta duke shtuar edhe emra të tjerë.

 

Kjo listë e zezë është titulluar: "Masa shtrënguese kundër ekstremistëve në Maqedoni", në të cilën janë përfshirë 12 persona të cilëve nuk do t'u lejohet të udhëtojnë në vendet anëtare dhe kandidate të BE-së.

Duke argumentuar këto masa ndëshkuese, BE-ja në një deklaratë të posaçme thekson se pavarësisht nga përmirësimi i situatës në Maqedoni, disa individë vazhdojnë të ndërmarrin aktivitete të dhunshme apo t'i kundërvihen në mënyrë të përsëritur dhe të qëllimshme vënies në jetë të Marrëveshjes së Ohrit, në të cilën mbështetet stabiliteti, integriteti territorial, pandashmëria dhe karakteri shumëkombësh i Maqedonisë.

Me këtë rast Këshilli i Ministrave të Bashkimit Evropian nënvizon edhe njëherë tjetër se stabiliteti dhe normalizimi i jetës në Maqedoni kalon nëpërmjet vënies në jetë plotësisht të Marrëveshjes së Ohrit.

Siç është bërë e njohur në listën e ndalim-udhëtimit për në vendet e BE-së gjenden emrat:

 

Gafurr Adili, i njohur si komandant "Vardari" i AKSH-së nga Kërçova,

Hamdi Bajrami, i njohur si komandant "Breza",

gjenerali nga Shqipëria Spiro Butka,

Goran Giorgevski, ish-pjesëtar i njësitit policor "Luanët" nga Kumanova,

Xhemail Hyseni,

Abdyl Jakupi, i njohur si komandant "Çakalla"

Daut Rexhepi, i njohur si komandant "Leka"

Sahit Rushitit,

Izair Samiu,

Goran Stojkov,

Fadil Sylejmani, ish-rektori i Universitetit të Tetovës dhe

Gjyner Sylejmani.

 

Në fund të kësaj deklarate BE-ja nënvizon se vetëm në raste të veçanta siç është përshembull pjesëmarrja në ndonjë konferencë, që do të ndihmonte dialogun politik, demokracinë, forcimin e të drejtave të njeriut, si dhe stabilitetin e Maqedonisë, personat e sipërshënuar mund të lejohen të udhëtojnë në vendet anëtare të BE-së.

 

 

Dega e LDK-së në Gjilan fare nuk është e befasuar me akuzat shpifëse të Degës së PDK-së

 

Gjilan, 11 shkurt 2004 - Dega e LDK-së në Gjilan fare nuk është e befasuar me akuzat shpifëse të Degës së PDK-së. Një gjë e tillë madje është pritur duke i parë edhe monstrat e ngjashme nëpër shumë komuna tjera të Kosovës.

 

Andaj strategjisë shpifëse, si një nga armët më të njohura të PDK-së, domosdo që është dashur t'i bashkangjitet edhe dega e saj në Gjilan për ta plotësuar kështu mozaikun e një fushate të pashpallur dhe tepër të hershme parazgjedhore, thuhet në një komunikatë të degës së LDK-së në Gjilan.

"Sikur mos të ishte konsiderata ndaj opinionit publik dhe anëtarësisë sonë, fare nuk do duhej të merremi me shpifjet e tyre më të reja, mjeshtri kjo e përsosur për këtë parti. Shihet mirëfilli se realizimi i 180 projekteve vetëm në vitin e kaluar apo i mbi 460 projekteve qëkur ka ardhur në pushtetin komunal dega e LDK të Gjilanit, i ka trazuar tej mase këta opozitarë, të cilët natyrisht nuk dinë të gjejnë mjete dhe mënyra për të ardhur në pushtet sepse është vota e qytetarëve që përherë i stopon.

Dhe, pikërisht për ta manipuluar këtë qytetar i cili di të vlerësojë punën e bërë dhe ka fuqi e kulturë për ta pranuar rezultatin e arritur, përdoren një varg shpifjesh, si në rastin e verifikimit të anëtarësisë së LDK-së dhe regjistrimit të anëtarëve të rinj, ashtu edhe në përpjekjet e administratës komunale për ta rritur profesionalizmin dhe efikasitetin në punë bashkë me përgjegjësinë po edhe për ta orientuar një buxhet komunal tashmë të aprovuar, në përmbushjen e kërkesave dhe prioriteteve në bazë të një programi elektoral të votuar nga qytetarët", theksohet më tutje në komunikatë.

"Asnjëherë nuk kemi pasur nevojë ta përdorimin kushtëzimin për anëtarësim në LDK me ndonjë vend pune, joshje tjetër apo edhe asfaltim rrugësh si ka trumbetuar e po trumbeton kjo Degë e PDK.
Ndërsa të thuash se edhe shërbimet në administratë komunale kushtëzohen me anëtarësim në LDK kjo s'është tjetër pos një marri e radhës që shprehet dhe fantazohet nga opozitarët e Gjilanit.

Po t'i përdorësh deklaratat e shpifura apo të manipuluara si në dy rastet e paraqitura edhe përmes masmediave, kjo s'është gjë tjetër pos verbëri politike dhe tentativë për të ardhur në pushtet pa i zgjedhur mjetet".

"Dega e LDK-së gjatë vitit të kaluar njëmend ka pasur plasaritje brenda radhëve të saj në mesin e këshilltarëve në Kuvendin e Komunës por, fatmirësisht këto aspak nuk janë reflektuar në punën e ekzekutivit gjilanas përkundër tentativave.

 

Për këtë flasin faktet të cilat në vazhdimësi i janë prezentuar opinionit publik nga ana e udhëheqësve komunal po edhe vetë Kuvendit të Komunës.

Kjo flet edhe për një transparencë të madhe që gjitherë ka qenë edhe moto e Degës së LDK-së në Gjilan po edhe e udhëheqjes komunale", theksohet në komunikatë.

"Ne e kuptojmë këtë reagim të PDK-së dhe këto shpifje të reja për të cilat më kompetente për t'u përgjigjur është udhëheqja komunale, si një shqetësim dhe trazim i madh që ka shkaktuar tash yshtja e madhe e qytetarëve dhe veçmas e të rinjëve për t'u anëtarësuar në LDK".

"Deri më tash, gati në çdo lokalitet mbi 80% për qind e moshës mbi 18 vjeç po e ridëshmon dhe po e gjenë besimin në LDK.

Sikur mos të ishte punuar me sukses , nuk do të vërehej ky masivizim kaq i madh për të qenë anëtarë i LDK-së", thuhet në fund të komunikatës së Degës së LDK-së në Gjilan.

 

 

Bugajski: Në Shqipëri kërkohen ide të reja

 

Uashington, 11 shkurt 2004 - Eksperti i Qendrës për Studime Strategjike dhe Ndërkombëtare me seli në Ushington, analisti Janosh Bugajski, duke shfaqur qëndrimin e tij rreth zhvillimeve të fundit në Shqipëri ka thënë se kërkohen ide të reja dhe siç tha, ndoshta një rol më i madh për një brez të ri politikanësh, përndryshe Shqipëria mund të mbetet prapa vendeve të tjera të rajonit. Analisti Bugajski i bëri këto komente në një intervistë dhënë "Zërit të Amnerikës".

Sipas tij është e rëndësishme që politika të mbahet në kornizën e institucioneve dhe jo të nxirret në rrugë për të mos lejuar krijimin e një situate të rrezikshme.

"Të protestosh nuk ka asgjë të keqe, por mendoj se brenda kufijve të sistemit demokratik nuk duhet të lejohet të hyjsh me forcë në institucionet qeveritare apo në parlament për të zëvendësuar me dhunë një udhëheqës të caktuar politik", thotë Bugajski.

Ai shtoi se Shqipëria po qëndron në vendnumëron dhe po kalon nga një minikrizë në minikrizë tjetër, nga një akuzë në nje tjetër.

Po në këtë intervistë Bugajski shfaqi edhe qëndrimet e tij të njohura rreth statusit përfundimtar të Kosovës, përkatësisht angazhimet e tij për pavarësinë e saj.

 

 

Rivendoset prania diplomatike amerikane në Libi

 

Tripoli, 11 shkurt 2004 - Shtetet e Bashkuara rivendosën praninë e tyre diplomatike në Libi, ndërkohë që kryeministri britanik, Toni Bler, shpreson të bëjë së shpejti një vizitë në këtë vend afrikan në kuadër të përpjekjeve për ta kthyer atë në gjirin e komunitetit ndërkombëtar.

Departamenti amerikan i Shtetit njoftoi të martën se një diplomat amerikan po punon pranë ambasadës belge në Tripoli, prania e parë diplomatike amerikane në atë vend që nga viti 1980.
Zyrtarët thonë se parashikojnë që edhe diplomatë të tjerë amerikanë të vizitojnë Libinë në një të ardhme të afërt dhe që Libia të vendosë së shpejti praninë e saj diplomatike në Uashington.

 

 

Asambleja Kombëtare franceze shprehet për ndalimin e simboleve fetare në shkollat shtetërore

 

Paris, 11 shkurt 2004 - Asambleja Kombëtare franceze u shpreh me shumicë votash për ndalimin e simboleve fetare nëpër shkollat shtetërore. Me këtë hap mendohet se do t'u vihet pre tensioneve mes minoriteteve fetare si hebrejve apo muslimanëve.

 

Bëhet fjalë për ndalimin e simboleve të tilla si kryqet, shamitë e kokës të femrave muslimane, apo festet që mbajnë në kokë besimtarët çifutë. Nxënësit që nuk e respektojnë këtë rregull mund të përjashtohen prej shkollës.

Kryetari i parlamentit Zhan Lui Debre tha se shkollat publike janë një vend ku mësohet dhe jo vend për të ushtruar veprimtari militante fetare.

 

Kryeministri francez Zhan Piere Raferën e përshëndeti këtë vendim. Sistemi i republikës franceze që parashikon një ndarje të prerë mes shtetit dhe festë mori një mbështetje të fortë prej këtij vendimi. Si instancë e fundit pritet vendimi i senatit.

 

 

Në Bagdad janë vrarë sot 44 ushtarë të rinj irakianë

 

Bagdad, 11 shkurt 2004 - Një atomobil bombë ka shpërthyer sot afër qendrës së rekrutimit të ushtarëve të rinj irakianë në Bagdad, duke vrarë 44 veta. Me këtë sulm, bilanci i përgjakshëm është - 100 të vrarë brenda 24 orëve.

"Ka qenë një sulm vetëvrasës nga një njeri i vetëm", tha për Rojterin koloneli amerikan Ralf Bejker. Shumica e viktimave ishin rekrutë të rinj.

"Ka qenë një sulm kundër irakianëve" tha Bejker. Automobili ishte i mbushur me 300- 500 kg eksploziv plastik të përzier me municion artilerik, me "efekt vrasës" maksimal.

 

 

Uesli Klark ka heqë dorë nga gara për kandidatin presidencial

 

Uashington, 11 shkurt 2004 - Ish-komandanti i NATO-s Uesli Klark ka heqë dorë nga gara për kandidat të Partisë Demokratike për president të SHBA-ve. Klark hoqi dorë nga kandidatura pasi kandidati tjetër Xhon Keri dje fitoi më shumë vota në zgjedhjet partiake në shtetet jugore Virxhinia dhe Tenesi.

 

Senatori Keri deri më tash ka marrë përkrahjen në 12 nga 14 shtetet, ku deri më tash janë mbajtur zgjedhjet partiake për kandidatin presidencial amerikan nga radhjët e demokratëve.

 

 

Trupat izraelite kanë vrarë sot të paktën 9 palestinezë

 

Gaza, 11 shkurt 2004 - Trupat izraelite kanë vrarë sot të paktën 9 palestinezë në qytetin e Gazës, duke akuzuar ekstremistët palestinezë se kishin hapur zjarr të parët. Forcat izraelite kishin shkuar për të shkatërruar celulat militante përgjegjëse për sulmet me granata në kolonitë hebraike në rripin e Gazës.

Burimet palestineze thonë se ushtarët izrealitë hynë në kuartin lindor të qytetit Sixhaj dhe hapën zjarr në një pikë policore palestineze dhe vranë një polic. Militantë të armatosur palestinezë luftuan kundër izraelitëve, por me atë rast vriten edhe tetë palestinezë të tjerë, njofton Rojter.

 

 

Shpërthim i ri në Bagdad - 25 irakianë të vrarë

 

Bagdad, 11 shkurt 2004 - Një makinë bombë ka shpërthyer në qendër të kryeqytetit irakian, Bagdad, i dyti shpërthim brenda dy ditësh. Një zëdhënës i forcave amerikane tha se 25 irakianë janë vrarë në shpërthim, i cili ndodhi jashtë qendrës kryesore për rekrutim të Ushtrisë irakiane. Shpërthimi u dëgjua në gjithë Bagdadin qendror.

Nuk është ende e qartë nëse ishte sulm vetëvrasës.

Shpërthimi vjen një ditë pasi pesëdhjetë veta, shumica civilë irakianë, u vranë në një shpërthim jashtë stacionit policor në qytetin Iskandarija në jug të Bagdadit. Shumica e të vrarëve dhe të plagosurve në shpërthim po prisnin në rradhë për të aplikuar për punë.

 

 

Ka arritur në 47 numri i viktimave në sulmin e sotëm vetëvrasës në qendër të Bagdadit

 

Bagdad, 11 shkurt 2004 - Ka arritur në 47 numri i viktimave në sulmin e sotëm vetëvrasës me autobombë në qendër të Bagdadit, njofton Rojter.

Përfaqësuesi ushtarak amerikan ka njoftuar se sulmi vetëvrasës është kryer para qendrës së rekrutimit ushtarak irakian, ku me qindra njerëz pritnin të paraqiten në armatën e re të Irakut.
Zëdhënësi ushtarak amerikan ka thënë se rebelët po e ndryshojnë taktikën, duke sulmuar tani forcat irakiane të sigurimit.

 

 

Kryeministri palestinez është i gatshëm të takohet me kryeministrin izraelit

 

Romë, 11 shkurt 2004 - Kryeministri palestinez Ahmad Kurei ka deklaruar sot se është i gatshëm të takohet me kryeministrin izraelit Ariel Sharon kah fundi i shkurtit ose në fillim të marsit. Ai njëherit paralajmëroi për pasojat e aksioneve ushtarake izrealite sikur ai i kryer në Rripin e Gazës ku u vranë 13 palestinezë.

"Nëse çdo gjë do të jetë në rregull, jam i gatshëm për takimin me Sharonin kah fundi i shkurtit ose fillimi i marsit", ka thënë Korei pas biseidemeve me shefin e diplomacisë italiane Franko Fratini.

 

 

Të paktën 13 palestinezë të vrarë

 

Gaza, 11 shkurt 2004 - Trupat izraelite kanë vrarë sot të paktën 13 palestinezë dhe kanë plagosur 25 të tjerë, gjatë shkëmbimit të zjarrit në pjesën lindore të qytetit të Gazës, thonë dëshmitarët dhe burimet spitalore.

Mjekët thanë se 12 palestinezë, përfshirë edhe të paktën pesë persona të armatosur dhe një polic janë vrarë në këtë qytet. Një tjetër ishte vrarë gjatë ndërhyrjes së izraelitëve në kampin e refugjatëve Rafah.

Në mesin e të vrarëve është edhe Mohamed Hils (18), i biri i Ahmedit, një nga liderët e organizatës Fatah të Jaser Arafatit në Rripin e Gazës, njoftojnë agjencitë e lajmeve.

 

 

Hamasi i kërcënohet Izraelit

 

Gaza, 11 shkurt 2004 - Organizata radikale palestineze Hamas është kërcënuar sot me sulme të reja kundër izraeliëtve, si përgjigje ndaj operacionit ushtarak izraelit në qytetin e Gazës, në të cilin janë vrarë të paktën 13 palestinezë.

"Rezistenca palestineze do t'ia japë armikut një leksion që nuk do ta harrojë", ka deklaruar një zyrtar i panjëjtësuar i Hamasit.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |