Cilat mund të jenë arsyet e deklaratës së shefit të Sigurimit Serb, Stojanoviq?

Koment

Cilat mund të jenë arsyet e deklaratës së shefit të Sigurimit Serb, Stojanoviq?

5 shkurt 2004 / TN

Deklaratat e tilla duhet analizuar nga të gjithë, edhe nëse janë vetëm lojë e politikës serbe për të përfituar politikisht në raport me Kosovën. Për ta zbuluar saktësinë e deklaratës së Stojanoviqit, qendrat ndërkombëtare të vendosjes duhet të dërgojnë në Kosovë edhe specialistë të CIA-s dhe të FBI-së. Hapin e parë, që është shumë i rëndësishëm për të ardhur deri tek e vërteta a blofiliteti i kësaj deklarate, ato duhet ta bëjnë duke kërkuar nga Gjykata e Hagës urgjentisht arrestimin e tij, sepse Stojanoviq ka qenë i implikuar në vrasjen e shumë shqiptarëve.

Shkruan: Nazmi LUKAJ

Shef i Sigurimit të “Ushtrisë Serbo-Malazeze”, koloneli Momir Stojanoviq, deklaroi këto ditë botërisht në një intervistë dhënë agjensisë serbe “Tanjug”, se ky sigurim ka infiltruar njerëzit e vet në Kosovë. Deklarata e Stojanoviqit, për të cilin thuhet se ekzistojnë dëshmi për pjesëmarrjen e tij në vrasjen e shumë shqiptarëve që nga vitet e 80-ta, e deri në përfundim të luftës në qeshor të vitit 1999, mund ta ketë bazën në disa rrafshe:

Mund të jetë dhënë vetëm për ta vazhduar Serbia lojën e vet përçarëse. Pra, që shqiptarët, si edhe gjatë kohës kur ajo ishte e pranishme në Kosovë, të bëjnë me gisht nga njëri- tjetri. Dhe, kështu, të krijohet ajo atmosfera e paraluftës, prej së cilës Serbia do të nxjerrte rezultat të favorshëm, sepse shumë aktivistë politikë do t’i frenonin veprimet e tyre, nga frika e shërbimit sekret serb. Po edhe më tepër: që populli ta humbë besimin në krerët e partive politike, ku Stojanoviqi ka deklaruar se ky shërbim i ka njerëzit e vet. Humbja e besimit në ta do të ndikonte në një masë të madhe që populli të mos dalë në zgjedhje, e kështu të dështojnë këto në tetor të këtij viti. Dështimi i tyre do t’i jepte kohë Serbisë për të ndërmarrë hapa të rinj për stopimin e procesit të pavarësisë së Kosovës.

Ka mundësi që pohimet e tij të jenë të vërteta, sepse krimet që janë bërë pasluftës, mund të jenë të dirigjuara nga shërbimi sekret serb, dhe të jenë realizuar nga ndonjë segment i shërbimeve sekrete shqiptare të pasluftës. Në këto shërbime sekrete janë aktivizuar më së shumti njerëz që kanë pasur lidhje direkte me aparatin shtetëror serb. Të këtillët, nga ndejat me inspektorët e lartë serbë, kanë shkuar direkt në luftë. Mu këta, kanë qenë edhe njerëzit më të vrazhdë, pra ata që më së shumti kanë bërë krime në bashkëkombasit e vet gjatë luftës. Një pjesë e madhe e tyre sot kanë krijuar pasuri të madhe. Këta ka gjasa shumë të mëdha që të jenë agjentë të Serbisë. Pos këtyre, në këtë shërbim mund të jenë të inkuadruar edhe biznismenët e mëdhenj, që edhe paraluftës, edhe tash, kanë grumbulluar një pasuri shumë-shumë të madhe. Të këtillët, janë nën mbrojtjen e disa komandantëve të njohur të luftës, për shkak se këtyre ua dedikojnë një pjesë të kësaj pasurie. Pastaj, mund të jenë edhe disa tregtarë më të vegjël, që shpesh shkojnë në Rozhajë për të bërë tregti, e që edhe më parë kanë pasur lidhje direkte me inspektorët serbë. Po të jetë i vërtetë ekzistimi i shërbimit sekret serb, atëherë edhe shumë gjëra të tjera që kanë ndodhur në Parlamentin tonë, si mosngritja e deputetëve të opozitës në këmbë për kryetarin Rugova, kërkimi i llogarisë për korrupsion, pasi deputetët serbë nuk u ngritën në këmbë për t’i nderuar viktimat e Reçakut etj., mund të jenë pikërisht shkaku i ndikimit të dikujt me influencë në këto parti, që ka lidhje me shërbimin në fjalë.

Deklarata e Stojanoviqit mund të jetë dhënë edhe për ta përforcuar politikën e Beogradit te populli serb se gjoja Serbia është efikase në Kosovë, me qëllim që t’ia ushqejë më fuqishëm ëndrrën për të. Pra, që ai të shpresojë më tepër se Serbia po i bën të gjitha përpjekjet që ta rifusë Kosovën në juridiksionin e vet.

Mund të jetë edhe lojë e Serbisë që të shkaktojë panik tek strukturat e KFOR-it e UNMIK-ut, dhe për t’i diskredituar këto tek shqiptarët se nuk janë duke bërë asgjë në Kosovë.

Të shkaktojë panik tek qendrat ndërkombëtare të vendosjes, në mënyrë që këto ta përshpejtojnë aktivitetin e tyre për ta realizuar një zgjidhje të ndërmjetme, që do t’i konvenonte vetë Serbisë.

6. Ose të krijojë përshtypjen tek shqiptarët se atdhetarët e vrarë pasluftës janë viktima të shërbimit sekret serb, në mënyrë që t’i krijojë mundësi shërbimeve sekrete shqiptare të vazhdojnë me vrasje, për të marrë krimi përmasa edhe më të mëdha në Kosovë, dhe këtë ta shfytëzojë Serbia për interesat e saj. Pra, që të pohojë, si deri më tani, se Kosova nuk bën të bëhet shtet, pasi nuk mund ta ndalë krimin. Dhe, se vetëm Serbia mund ta bëjë këtë gjë.

Mund të jenë edhe arsye të tjera pse Stojanoviq ka lëshuar këtë deklaratë, por këto mund të jenë ato kryesoret. Sidoqoftë, deklarata e tij duhet elaboruar nga ekspertët tanë ushtarakë, nga ekspertët e policisë së UNMIK-ut, të SHPK-së, të TMK-së dhe nga të gjithë analistët në Kosovë, për të nxjerrë konkludime për vërtetësinë ose blofilitetin e saj. Deklaratat e tilla duhet të analizohen nga të gjithë, edhe nëse janë vetëm lojë e politikës serbe, për të përfituar politikisht në raport me Kosovën.

Për të zbuluar saktësinë e deklaratës së Stojanoviqit, qendrat ndërkombëtare të vendosjes duhet të dërgojnë në Kosovë edhe specialistë të CIA-s dhe të FBI-së. Hapi i parë, që është shumë i rëndësishëm për të ardhur deri tek thelbi i kësaj deklarate, duhet të jetë që ato të kërkojnë nga Gjykata e Hagës arrestimin e tij, sepse ai është i njohur si kriminel lufte. Gjatë hetimeve atje, shumë shpejt mund të nxjerret vërtetësia a blofiliteti i deklaratës së tij. Kjo, e para.

E dyta, duhet të kërkojnë strikt nga Serbia që ta ndalë hapërimin e saj me shërbime sekrete në Kosovë, sepse ky territor kontrollohet nga KFOR-i dhe UNMIK-u. Dhe po qe se konstatohet se vërtetë shërbimi sekret serb ka infiltruar rrjetin e vet të spiunazhit në Kosovë, atëherë këto qendra duhet të vendosin masa shumë të rrepta ndaj Serbisë, dhe njëkohësisht të nguten me shpalljen e Pavarësisë së Kosovës, me krijimin e së cilës ky rrjet do të shthurrej menjëherë, bashkë me të gjitha rrjetet e tjera në Kosovë. Vërtetësia e ekzistimit të këtij rrjeti serb të spiunazhit në Kosovë, do të zbulonte edhe shumë gjëra me rëndësi për Kosovën. Në radhë të parë, do të zbulonte se vrasjet e disa serbëve këtu janë bërë pikërisht nga ky shërbim.