Artemive duhet t'u mshelen rrugët për të diskutuar për Kosovën

OPINIONE

Artemive duhet t'u mshelen rrugët për të diskutuar për Kosovën

2 shkurt 2004 / TN
Ka mjaft priftërinj serbë që sot vendin nuk do të duhej ta kishin në kishë, por në Gjykatën e Hagës, për ndikimin e tyre të madh që kanë pasur në politikën serbe shoveniste antishqiptare. Dhe, do të ishte shumë më e ndershme që këto qarqe të fillojnë të mendojnë në këtë aspekt, se sa t'i lejojnë ata që me fjalimet e tilla të ngritin tensione në Kosovë.
Shkruan: Nazmi LUKAJ
Peshkopi serb, Artemie, edhe dje mbajti një diskutim në Amerikë, ku shfaqi opinionin e tij për Kosovën dhe gjendjen e serbëve këtu, të cilën e përshkroi tejet tragjike. Po ashtu, edhe me këtë rast, ashtu si më parë, bëri apel që të mos pavarësohet Kosova, për shkak se paraqitka rrezik të madh për krejt rajonin!!!

Nuk është e çuditshme që ky dhe artemitë e tjerë bëjnë këso propagante antishqiptare, për ta stopuar procesin e pavarësisë së Kosovës, por është duke na habitur fakti se pse po i lejohet këtij që të prezentojë gënjeshtra antishqiptare, kur dihet se për krejt gjakderdhjen në Kosovë pikërisht këta artemijë e mbajnë përgjegjësinë më të madhe, sepse e kanë përkrahur fuqishëm politikën e terrorit të Millosheviqit. Këta janë edhe baza më e madhe e politikës antishqiptare të tij, dhe që edhe sot nuk po e lënë politikën serbe të demokratizohet.

Artemia dhe artemitë e tjerë, në vend se t'i kërkojnë falje popullit shqiptar për gjenocidin që ka bërë Serbia në të, vazhdojnë përpjekjet e tyre të mëparshme antishqiptare. Dhe, kështu, çdo ditë e më tepër po i provokojnë rëndë ndjenjat e shqiptarëve. Ky, pardje, në Amerikë, veç që të ndikojë të mos pavarësohet Kosova, plotësoi edhe pak gënjeshtrën e tij dhe të qarqeve më ekstreme serbe se këta " janë në një gjendje të keqe në Kosovë". Gënjeu dhe do të gënjejë vazhdimisht në përpjekjen e tij dhe të politikës serbe që të stopohet procesi i pavarësisë së Kosovës.

Kjo tendencë e tij dhe e politikës serbe në këtë drejtim, duhet përfundimisht të kuptohet nga krejt diplomacia botërore, e cila nuk duhet të lejojë në asnjë vend të botës që artemitë të mbajnë fjalime të trilluara për gjendjen e serbëve në Kosovë, dhe t'i japin opinionet e tyre që të mos pavarësohet Kosova. Diskutimet e tilla, si të Artemisë, veç sa do t'i bëjnë dëm proceseve demokratike në Kosovë, sepse mund t'i acarojnë marrëdhëniet etnike.

Artemia dhe artemitë e tjerë duhet të ndalohen përfundimisht nga të gjitha qaqet diplomatike të botës, nëse janë të interesuara që të arrijnë rezultate në Kosovë, sepse fjalimet e tilla rrënojnë synimin e tyre për një Kosovë demokratike. Këtij dhe të artemive të tjerë, këto qarqe duhet t'ua thonë haptaz se janë fajtorë për atë që ka bërë Milosheviqi në Kosovë, dhe si fajtorë nuk kanë të drejtë më të paraqesin opinionet e tyre për të, për shkak se ata janë dëshmuar gjithmonë si priftërinj që kanë marrë pjesë në platformat antishqiptare.

Diplomacia botërore, jo vetëm që nuk duhet t'u japë më hapësirë, por duhet të bëjë presion të vazhdueeshëm në artemitë që ata ta pranojnë fajin që kanë për terrorin që ka ushtruar Milosheviqi në shqiptarë. Prej tyre, duhet të kërkojnë që të luajnë rol pozitiv në këtë aspekt. Është koha e fundit që qarqet ndërkombëtare ta kuptojnë këtë.

Madje, duhet ta kenë të qartë edhe një punë: ka mjaft priftërinj serbë që sot vendin nuk do të duhej ta kishin në kishë, por në Gjykatën e Hagës, për ndikimin e tyre të madh që kanë pasur në politikën serbe shoveniste antishqiptare. Dhe, do të ishte shumë më e ndershme që këto qarqe të fillojnë të mendojnë në këtë aspekt, se sa t'i lejojnë ata që me fjalimet e tilla të ngritin tensione në Kosovë. Sepse është shumë e dhimshme që fajtorët të flasin edhe më tutje për një vend ku janë angazhuar dhe vetë për ta gjakosur. Shumë shumë e dhimshme. Dhe, e pakuptueshme.