Përmbajtja:

• Presidenti Rugova përgëzon të gjithë besimtarët dhe qytetarët e Kosovës me rastin e Bajramit të Vogël

• Presidenti Rugova uroi kryetarin e Bashkësisë Islame të Kosovës

• Kryeministri Rexhepi përgëzoi qytetarët e Kosovës dhe kryetarin e BIK-së, me rastin e festës së Bajramit

• Ismet Beqiri përgëzoi qytetarët e Prishtinës për festën e Bajramit

• Presidenti Rugova bisedoi në Bruksel me ministrin e jashtëm belg, Lui Mishel

• Kofin Anan shpreh brengosje se në Kosovë nuk merren parasysh interesat e pakicave

• Të rinjtë e Deçanit debatuan në takimin e të rinjve me moton "2004 Viti i LDK-së B Viti Juaj"

• ProCredit Banka ka filluar e klientëve me kartelat maestro dhe master kartë

• Buxheti komunal i Ferizajt do të jetë rreth 10 milionë e gjysmë euro, apo 25 për qind më i madh se vjet

• Kuvendi komunal në Vushtrri me një votëbesim të deputetëve shkarkoi kryetarin Muharrem Shabanin

• Muharrem Shabani thotë se nuk është respektuar procedura për shkarkimin e tij

• Grupi zgjedhor do t'ia dorëzojë kryeadministratorit Holkeri rekomandimet mbi procesin e ardhshëm zgjedhor

• "Levizja 2004" ka kërënuar 30 profesorë të UP me likuidim fizik nëse deri më 1 shkurt nuk japin dorëheqje

• Në kufirin mes Shqipërisë dhe Kosovës së shpejti do të hapet një pikë e re kufitare

• Në Shkup u bë promovimi i 249 oficerëve të Ushtrisë maqedonase, 102 prej të cilëve janë shqiptarë

• Së paku tre të vrarë në Mosul

• Zgjedhjet e shkurtit jo legjitime

• Shtohen thirrjet për hetim të pavarur

• Rezolutë e re e Këshillit të Sigurimit

• Largohet edhe gazetari i BBC-së

• Presidenti Bush kërkon shpjegime mbi armët e shkatërrimit në masë të Irakut

• Shefer: NATO-ja mund të luajë një rol më të madh në Irak

Presidenti Rugova përgëzon të gjithë besimtarët dhe qytetarët e Kosovës me rastin e Bajramit të Vogël

 

Prishtinë, 31 janar 2004 - Presidenti i Kosovës, Ibrahim Rugova, përgëzon të gjithë besimtarët dhe qytetarët e Kosovës me urimet më të përzemërta me rastin e Festës së Bajramit të Vogël.

"Festa e Bajramit të Vogël është ditë e sakrificës për të mirën, për dëshirat, për mirëkuptimin dhe paqen midis njerëzve.

Dhashtë Zoti që Festën e ardhshme të Bajramit të Vogël ta presim me njohjen formale të pavarësisë së Kosovës", thuhet në përgëzimet e Presidentit Rugova drejtuar besimtarëve dhe qytetarëve të Kosovës.

 

 

Presidenti Rugova uroi kryetarin e Bashkësisë Islame të Kosovës

 

Prishtinë, 31 janar 204 - Presidenti Rugova i ka dërguar një urim edhe zotit Naim Tërnava, kryetar i Bashkësisë Islame të Kosovës, me rastin e Festës së Bajramit të Vogël, duke i shprehur urimet e tij të sinqerta dhe të popullit të Kosovës.

"E çmojmë lart rolin Tuaj në mirëkuptimin, tolerancën në mesin tonë në Ditën e kësaj feste të ndritur, si dhe përkrahjen Tuaj për pavarësinë e Kosovës.

Dhashtë Zoti që festën e ardhshme të Bajramit të Vogël, ta festojmë me njohjen formale të pavarësisë së Kosovës", thuhet në urimet e Presidentit Rugova dërguar kryetarit të Bashkësisë Islame të Kosovës, Naim Tërnava.

 

 

Kryeministri Rexhepi përgëzoi qytetarët e Kosovës dhe kryetarin e BIK-së, me rastin e festës së Bajramit

 

Prishtinë, 31 janar 2004 - Kryeministri i Kosovës, Bajram Rexhepi, ka përgëzuar qytetarët e Kosovës, me urimet më të sinqerta me rastin e festës së madhe të Kurban-Bajramit.

"Në këtë ditë të festive të besimtarëve myslimanë, që simbolizon sakrificën, solidaritetin dhe tolerancën për të gjithë njerëzit e botës, uroj që në familjet tuaja dhe në mbarë Kosovën të mbreterojnë këto vlera dhe virtyte larta humane.

Përkujtojmë me këtë rast se angazhimet tona dhe të Qeverisë së Kosovës do të jenë në shërbim të së mirës së përbashkët, të paqes e mirëqenies dhe të prosperitetit për të gjithë qytetarët e Kosovës", thuhet në urimet e kryeministrit Bajram Rexhepi.

Po ashtu Kryeministri Rexhepi ka përgëzuar edhe kryetarin e Bashkësisë Islame të Kosovës, Naim Tërnava, me ratrsin e Kurban-Bajramit.

 

"Le të konfirmohet edhe një herë vullneti i të gjithë kosovarëve për krijimin e një shoqërie demokratike e të integruar në rrjedhat evropiano-perëndimore, ku do të dominojnë fryma e tolerancës, humanizmit, bashkëpunimit dhe respektit njerëzor", thuhet në urimet e Bajram Rexhepit.

 

 

Ismet Beqiri përgëzoi qytetarët e Prishtinës për festën e Bajramit

 

Prishtinë, 31 janar 2004 - Kryetari i Kuvendit Komunal të Prishtinës, Ismet Beqiri, përgëzoi të gjithë qytetarët e Prishtinës me rastin e festës së Bajramit të Vogël, me urimet që kjo festë të sjellë paqe e lumturi midis njerëzve, pa dallim feje, race e religjioni.

 

"Urojmë që kjo festë të jetë urë bashkëpunimi, mirëqenieje e solidariteti midis njerëzve jo vetëm në kryeqytetin e Kosovës", thuhet në urmet e Ismet Beqirit, drejtuar qytetarëve të Prishtinës.

Kryetari i Prishtinës uroi edhe udhëheqjen e Bashkësisë Islame të Kosovës me seli në Prishtinë.

 

 

Presidenti Rugova bisedoi në Bruksel me ministrin e jashtëm belg, Lui Mishel

 

Bruksel, 31 janar 2004 - Presidenti i Kosovës Ibrahim Rugova, i cili po qëndron për një vizitë disaditëshe në Belgjikë, dje pasdite është takuar me ministrin e Punëve të Jashtme të Mbretërisë së Belgjikës, Lui Mishel.

Presidenti Rugova tha pas takimit se me ministrin Mishel ka biseduar për shumë çështje me interes të Kosovës dhe qytetarëve të saj. Përpos informimit rreth procesit të privatizimit, për transferin e kompetencave, plotësimin e standardeve dhe integrimin e minoriteteve, Presidenti tha se është diskutuar gjatë edhe për mundësi të investimeve belge në Kosovë.

Presidenti Rugova tha se ka kërkuar nga ministri i Jashtëm i Belgjikës edhe ndikimin e ti në liberalizimin e vizave për kosovarët për të udhëtuar në Bashkimin Evropian, si dhe për mundësinë e riaktivizimit të zyrës së Kosovës në Bruksel.

 

"Pra zyrën që e kemi pasur dhe tash duhet ta kemi këtu dhe në vende të tjera evropiane. Është një program që duhet ta zhvillojmë së bashku me UNMIK-un, që është në kompetenca të mia", ka thënë presidenti Rugova.

Poashtu, Presidenti ka theksuar në këtë takim se "është vullneti ynë dhe i popullit të Kosovës që Kosova të jetë sa më shpejt e pavarur dhe e integruar në Bashkimin Evropian dhe në NATO, si dhe në miqësi të përhershme me Shtetet e Bashkuara të Amerikës", tha presidenti Rugova, duke folur para gazetarëve në Bruksel.

Zyrtarët nga Ministria e jashtme e Belgjikës konfirmuan se ishte ky takim ku janë shtjelluar të gjitha çështjet porse shefi i diplomacisë belge ishte interesuar për mundësitë e bashkëpunimit ekonomik ndërmjet Belgjikës dhe Kosovës. Gjatë takimit Lui Mishel kishte premtuar se do të tentojë të inicojë këtë lloj bashkëpunimi, duke i cilësuar përparimet ekonomike si rrënjësore për zhvillimet në Kosovë.

 

Kërkesa e presidentit Rugova rreth hapjes së një zyre të Kosovës në Bruksel thuhet se ka gjetur mirëkuptim te ministri Lui Mishel, i cili ka premtuar që të shqyrtojë të gjitha mundësitë për realizimin e kësaj ideje.

Presidenti i Kosovës në orët e mbrëmjes është takuar edhe me kryetarin e Senatit belg që është dhoma e epërme e Parlamentit të Belgjikës.

Ndërkaq, të dielën, më 1 shkurt në qytetin Anvers, Presidenti Rugova do të shpallet Senetor Nderi i Evropës.

 

 

Kofin Anan shpreh brengosje se në Kosovë nuk merren parasysh interesat e pakicave

 

Nju-Jork, 31 janar 2004 - Sekretari i Përgjithshëm i OKB-së, Kofi Anan ka shprehur shqetësimet se liderët shqiptarë të Kosovës refuzojnë t'i marrin parasysh interesat e pakicave dhe po i tejkalojnë kompetencat. Anan tha se Parlamenti i Kosovës muajin e kaluar është përpjekur t'i pengojë serbët e Kosovës të votojnë në zgjedhjet parlamentare të Serbisë.

 

Ai tha se institucionet e përkohshme të Kosovës ende nuk kanë arritur të sigurojnë përkthimin e dokumenteve zyrtare nga shqipja në gjuhët tjera.Në raportin e tij Sekretari i Përgjithshëm gjithashtu u bën thirrje liderëve shqiptarë dhe të Beogradit të vazhdojnë sa më shpejtë që të jetë e mundur dialogun për çështjet praktike siç është kthimi i personave të zhvendosur.

 

 

"Levizja 2004" ka kërënuar 30 profesorë të UP me likuidim fizik nëse deri më 1 shkurt nuk japin dorëheqje

 

Prishtinë, 31 janar 2004 - Mbi 30 profesorë të Universitetit të Prishtinës janë kërcënuar me likuidim fizik, nëse nuk japin dorëheqje deri më 1 shkurt të këtij viti. Kërcënimet u kanë arritur dekanëve të fakulteteve nëpërmjet postës elektronike nga e ashtuquajtuar "Lëvizja 2004".

 

Policia thotë se po i zhvillon hetimet, por ende nuk ka të dhëna se kush fshehet pas kësaj organizate, ngase ato vijnë nga Interneti. Ndërkaq, Ministri e Arsimit, Shkencës dhe Teknologjisë thotë se nuk ka asnjë informacion rreth kësaj ngjarjeje.

Arsyet e kërcënimeve të "Lëvizjes 2004", sipas zyrtarëve të policisë, kanë të bëjnë punën e profesorëve me korrupsionin dhe me menaxhimin e dobët të Universitetit të Prishtinës. Kërcënime të tilla kanë marrë 13 profesorë të Fakultetit të Mjekësisë dhe 14 profesorë të Fakultetit të Shkencave Matematiko-Natyrore dhe 6 profesorë të Fakultetit Juridik.

 

 

Të rinjtë e Deçanit debatuan në takimin e të rinjve me moton "2004 Viti i LDK-së B Viti Juaj"

 

Deçan 31 janar 2004 - Kryesia e FR të LDK-së, pati një takim të hapur me të rinjtë e Deçanit me moton "2004 Viti i LDK-së B Viti Juaj" me rastin e 15-vjetorit të veprimit politik të LDK-së. Përpos anëtarëve të FR të LDK-së nga Kryesia qendrore, i pranishëm ishte edhe Lulzim Zeneli, kryetar i FR të LDK-së.

 

Takimin e shpalli te hapur Avni Tolaj, kryetar i degës së FR-së në Deçan, i cili pasi përshëndeti mysafirët i ftoi te rinjtë që të inkuadrohen në këtë debat, për t'i shprehur opinionet, kërkesat dhe kritikat e tyre.

 

Kryetari i FR të LDK-së, Lulzim Zeneli, duke iu drejtuar të rinjve deçanas, tha se ky projekt që po realizohet me përfshirje të gjerë nëpër të gjitha qendrat e Kosovës, është pjesë e programit për vitin 2004, që përmes një komunikimi interaktiv t'i nxjerrë në pah problemet, shqetësimet dhe preokupimet e të rinjve dhe kjo nismë FR është një hap që do t'i paraprijë shumë aktiviteteve për këtë vit.

 

"Duke ditur se Kosova po hyn në një fazë vendimtare të përcaktimit të së ardhmes dhe kahjes së saj, unë do të thosha se ky vit është shumë domethënës", - tha z. Zeneli, duke potencuar se Kosovës mbi të gjitha i nevojitet një qeverisje stabile dhe efikase.

 

Prandaj të gjitha këto, tha ai, japim argumente të mjaftueshme që të rinjtë duhet të jenë më shumë azhur në këtë drejtim dhe të reflektojnë fuqishëm opinionin e vet që do t'i kontribuonte jo vetëm procesit politik, por edhe të gjitha proceseve zhvillimore në Kosovë.

Në vazhdim kryetari i FR të LDK-së tha se në këtë vit mbahen zgjedhjet nacionale që janë të rëndësisë kapitale për Kosovën, prandaj në këto zgjedhje zëri i të rinjve duhet të dëgjohet shumë më tepër për vetë faktin se shumë nisma, shumë procese që kanë filluar dhe në këtë fazë që priten të fillojnë e kanë të bëjnë me përcaktimin e elementeve strategjike për Kosovën.

 

Ai kërkoi një mobilizim të gjithanshëm të potencialit të të rinjve, meqë të rinjtë kanë potencial për ta dëshmuar, dhe për të marrë përgjegjësi për të qenë pjesë e të gjitha proceseve.

Gjatë këtij debate u shtruan shumë çështje për diskutim nga të rinjtë e Deçanit, të cilave iu përgjigjën kryetari Zeneli dhe anëtarët e kryesisë të FR të LDK-së.

 

 

ProCredit Banka ka filluar e klientëve me kartelat maestro dhe master kartë

 

Prishtinë, 31 janar 2004 - ProCredit Banka ka filluar për herë të parë në Kosovë pajisjen e klientëve me kartelat maestro dhe master kartë, duke zgjeruar shërbimin për klientë me mundësi qasje në të hollat e tyre 24 orë në ditë në mbarë botën.

Duke përdorur kartelat ndërkombëtare e ProCredit Bank klientët do të kenë mundësi të shfrytëzojën përparësinë e pagesave dhe tërheqjes së parave në valuta të tjera me kurse këmbimi më të volitshme, tha drejtori i përgjithshëm i kësaj banke.

 

Sipas tij, mundësia e përdorimit të kartelave ndërkombëtare simbolizon edhe një hap përpara në rrugën drejt integrimeve ndërkombëtare dhe normalitetit. Brenda 24 orëve në mbarë botën klientët kosovarë do të kenë mundësi qasje në shërbimet e disa miliona tregëtarëve dhe 900 mijë bankokomateve.

 

 

Buxheti komunal i Ferizajt do të jetë rreth 10 milionë e gjysmë euro, apo 25 për qind më i madh se vjet

 

Ferizaj, 31 janar 2004 - Buxheti komunal i Ferizajt do të jetë rreth 10 milionë e gjysmë euro, që ndrysh nga viti i kaluar sivjet do të jetë 25 për qind më i madh. Ekzekutivi i Ferizajt Sahit Krasniqi në seancën e djeshme të Asamblesë komunale ka shpjeguar se si do të shpenzohet ky buxhet i cili do të dedikohet kryesisht për nevojat e administratës komunale.

 

Mbi 7 milionë euro janë të hyra nga granti i qeverisë, ndërkaq rreth 3 milionë euro të hyra nga burimet vetjake të komunës. Në seancën e djeshme deputetët kanë miratuar ndarjen e 170 mijë euro për investime të ndryshme në rregullimin e infrastrukturës së komunës së Ferizajt.

 

 

Kuvendi komunal në Vushtrri me një votëbesim të deputetëve shkarkoi kryetarin Muharrem Shabanin

 

Vushtrri, 31 janar 2004 - Kuvendi komunal në Vushtrri, me një votëbesim të kërkuar nga deputeti Ilmi Gërguri i LDK-së, shkarkoi nga pozita e kryetarit Muharrem Shabanin.

 

Ushtruesi i detyrës së kryetarit të Kuvendit komunal Shemsi Hajrizi ka deklaruar se është kërkuar shkarkimi i Muharrem Shabanit për shkak të bllokadës totale që i ka bërë Kuvendit komunal dhe këshillit ekzekutiv me shantazhe dhe kërcënime ndaj qeverisë komunale. Shkarkimi i kryetarit është i vlefshëm plotësisht, ngase për këtë shkarkim kanë votuar dy të tretat e këshilltarëve.

 

 

Muharrem Shabani thotë se nuk është respektuar procedura për shkarkimin e tij

 

Vushtrri, 32 janar - Në lidhje me shkarkimin e tij nga posti i kryetarit të Kuvendit Komunal të Vushtrrisë, Muharrem Shabani ka reaguar përmes një letre.

 

Ai thotë se për inicimin e procedurës për shkarkimin e Kryetarit të KK, anëtarët e Kuvendit Komunal duhet të paralajmërohet me kohë duke i dokumentuar shkaqet, arsyet dhe shkeljet ligjore të Rregullores 2000/45 dhe të Statutit të Komunës të cilat i ka bërë Kryetari.

Sipas Shabanit, kjo procedurë nuk është respektuar nga grupi i anëtarëve të Kuvendit Komunal të Vushtrrisë.

 

 

Grupi zgjedhor do t'ia dorëzojë kryeadministratorit Holkeri rekomandimet mbi procesin e ardhshëm zgjedhor

 

Pishtinë, 31 janar 2004 - Grupi Punues për Zgjedhjet e radhshme nacionale do t'ia dorëzojë kryeadministratorit Hari Holkeri rekomandimet mbi procesin e ardhshëm zgjedhor.

 

Nga këto rekomandime nuk ka dalë qëndrim i përbashkët sa i përket sistemit zgjedhor që do të përdoret në zgjedhjet e sivjeme.

 

Prandaj LDK-ja kërkon kësaj radhe në zgjedhjet e përgjithshme të përdore sistemi proporcional me lista të mbyllura, ndërkaq PDK-ja dhe AAK-ja pajtohen që kryeadministratorit t'i rekomandohet sistemi proporcionale me lista të hapura.

Dilema më e madhe mbetet sistemi që do të përdoret në zgjedhje. Deri tash OSBE-ja dhe UNMIK-u e kanë përkrahur sistemin proporcional me lista të mbyllura. Mirëpo, zëdhënësi i OSBE-së bënë me dije se ende nuk është vendosur për sistemin zgjedhor që do të përdoret sivjet.

Shuma e parave të ndara për zgjedhje të këtij viti është dyfish më e vogël se buxheti i zgjedhjeve të dyta komunale të cilat janë mbajtur në Kosovë në vitin 2002.

 

 

Në kufirin mes Shqipërisë dhe Kosovës së shpejti do të hapet një pikë e re kufitare

 

Tiranë, 31 janar 2004 - Në kufirin shtetëror të Republikës së Shqipërisë me Kosovën së shpejti do të hapet një pikë e re kufitare. Vendimi u mor në sencën e mbrëmshme të Qeverisë së Shqipërisë. Hapja e kësaj pike të re doganore përkon edhe me përfundimin e një vizite në Kosovë të ministrit të Ekonomisë Anastas Angjelit, ku u bisedua rreth zegjerimit të mëtejshëm të bashkëpunimit tregtar ndërmjet Prishtinës dhe Tiranës.

 

 

Në Shkup u bë promovimi i 249 oficerëve të Ushtrisë maqedonase, 102 prej të cilëve janë shqiptarë

 

Shkup, 31 janar 2004 - Në Shkup u bë promovimi i 249 oficerëve të Ushtrisë së Maqedonisë, 102 prej të cilëve janë shqiptarë. Zëvendësministri i maqedonas i Mbrojtjes Rizvan Sylejmani theksoi se Ushtria e Maqedonisë deri në vitin 2006 duhet të arrijë standardet e Aleancës Veriatlantike dhe 25 për qind e efektivit të saj duhet të jenë shqiptarë.

 

 

Së paku tre të vrarë në Mosul

 

Mosul, 31 janar 2004 - Një makinë bombë ka shpërthyer në Mosul duke vrarë së paku tre persona dhe plagosur shumë të tjerë.

Një njoftim e çon numrin edhe në nëntë të vdekur. Shpërthimi i fuqishëm ndodhi jashtë një stacioni policie në qendër të Mosulit duke thyer xhamat e dritareve përreth zonës.

Dëshimtarët thanë se një makinë kaloi një barrikadë sigurie para stacionit të policisë para se të shpërthente, por kjo nuk është konfirmuar nga autoritetet.

Personeli irakian i sigurisë vazhdimisht është objekt sulmi në Irak. Ministri i brendshëm irakian tha se më shumë se 300 policë janë vrarë deri më tani nga bombat dhe sulme të tjera që pas rrëzimit të Sadam Huseinit.

 

 

Zgjedhjet e shkurtit jo legjitime

 

Teheran, 31 janar 2004 - Qeveria iraniane ka thënë se zgjedhjet parlamentare që do të mbahen muajin tjetër nuk do të ketë legjitimitet pasi Këshilli i Gardianëve i kontrolluar nga konservatorët konfirmoi se do të mbajë vendimin i cili ndalon mijëra kandidatë.

Agjencia zyrtare e lajmeve, IRNA citoi presidentin Muhamed Khatami i cili tha se negociatat me Këshillin e Gardianëve janë në rrugë pa krye.

Ministri i brendshëm që ishte me zotin Khatami tha se nuk kishte mundësi që të mbaheshin zgjedhje të lira dhe konkuruese.

 

 

Shtohen thirrjet për hetim të pavarur

 

Uashington, 31 janar 2004 - Administrata e Presidentit amerikan Xhorxh Bushit po i reziston thirrjeve për një hetim të plotë të pavarur mbi dështimin e informacioneve sekrete mbi Irakun.

Demokratët e ndiejnë se Presidenti është në pozicion mbrojtës. Ata mezi po presin të kthejnë çështjen e armëve të shkatërrimit në masë në atë lloj pike të nxehtë politike që ka qenë në Britani.

Këtë fundjavë, Hauard Din, ish-guvernatori i Vermontit dhe kritik prej kohësh i luftës do të shkojë në stacione televizive me shpresë për të ringjallur ofertën e tij për president dhe pritet që kërkesa për një hetim të plotë, të pavarur të jetë pjesë qëndrore e sulmit të tij ndaj Shtëpisë së Bardhë.

Këshilltarët e Presidentit nga ana e tyre janë të kënaqur të mbrojnë vendimin për luftë dhe ata janë përgatitur për argumentet lidhur me gjuhën e përdorur para luftës.

 

 

Rezolutë e re e Këshillit të Sigurimit

 

Nju Jork, 31 janar 2004 - Këshilli i Sigurimit i OKB-së ka votuar unanimisht për të bërë publike dhe fajësuar vendet që dështojnë të raportojnë në atë se si po e luftojnë ato terrorrizimin ndërkombëtar.

Kjo rezolutë e re ka si qëllim të inkurajojë qeveritë në përforcimin e sanksioneve kundrë al-Kaidas dhe talebanëve duke kërcënuar të bëjë publike ata që dështojnë ta bëjnë këtë.

Më shumë se gjysma e shteteve anëtare të OKB-së nuk kanë dorëzuar raportet mbi atë se çfarë po bëjnë për të ngrirë pronat, apo embargot e armëve.

Rezoluta e fundit do të thotë se komiteti mbikqyrës i al-Kaidas i OKB-së do të ketë mundësi të qarkullojë një listë me emra vendesh që nuk dorëzojnë raportin deri në fund të marsit.

 

 

Largohet edhe gazetari i BBC-së

 

Londër, 31 janar 2004 - Gazetari i BBC-së, Endrju Gilligan që u kritikua ashpër nga një hetim pas vdekjes së shkencëtarit të qeverisë, David Kelli, ka dhënë dorëheqjen.

Gilligan pranoi se një pjesë nga versioni i lajmit se qeveria kishte zbukuruar informacionet sekrete mbi armët e Irakut kishte qenë gabim dhe ai kërkoi falje për këtë.

Megjithatë ai kritikoi konkluzionet e hetimit të Lordit Haton duke thënë se BBC-ja kolektivisht u bë viktimë e një padrejtësie të thellë.

Dy nga figurat më të larta të korporatës kanë dhënë dorëheqjen pas kritikave të forta për standartet editoriale në raportin Haton.

 

 

Presidenti Bush kërkon shpjegime mbi armët e shkatërrimit në masë të Irakut

 

Uashington, 31 janar 2004 - Presidenti amerikna Xhorxh Bush tha se kërkon të dijë, siç u shpreh ai, faktet rreth dështimit për të gjetur armë të shkatërrimit në masë në Irak.

Duke u pyetur dje nga gazetarët në se do të mbështeste një hetim të pavarur rreth informacioneve të agjencive të zbulimit para luftës në Irak, presidenti nuk u përgjegj drejtpërdrejtë, por tha se dëshironte të krahasonte informacionin e administratës së tij rreth Irakut para luftës me përfundimet e Grupit të Vëzhgimit në Irak, të mbështetur nga Shtetet e Bashkuara.

Ish-kryeinspektori amerikan i armëve David Kay tha këtë javë se informacioni i zbulimit amerikan rreth armëve të shkatërrimit në masë të Sadam Huseinit ishte Apothuajse i gjithi i gabuar@. Zoti Kay shtoi se do të mbështeste një hetim të pavarur rreth mospërputhjeve.

 

 

Shefer: NATO-ja mund të luajë një rol më të madh në Irak

 

Uashington, 31 janar 2004 - Sekretari i Përgjithshëm i NATO-s, Jap de Hop Sheffer tha se Aleanca ndëratlantike mund të luajë një rol më të madh në Irak, nëse një gjë e tillë do të kërkohej nga qeveria e përkohshme e Irakut. Shefer bëri dje vizitën e tij të parë në Shtëpinë e Bardhë, ku u takua me presidentin Bush.

Ai tha se gjatë takimit udhëheqësit diskutuan çështje të ndryshme si nga operacionet në Ballkan, marrëdhëniet e NATO-s me Rusinë si dhe zgjerimin së shpejti të Aleancës me shtatë anëtarë të rinjë.
Por bisedimet kryesisht u përqendruan rreth Afganistanit dhe Irakut ku Shtëpia e Bardhë pret një angazhim më të madh të NATO-s.

Presidenti Bush e falenderoi aleancën për marrjen e komandës mbi një forcë ndërkombëtare të sigurisë në Afganistan dhe përkrahjen që i ka dhënë ajo një force ndërkombëtare të udhëhequr nga Polonia.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |