|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Intervistë me presidentin e Kosovës Ibrahim Rugova

Rugova: BE të mos ketë frikë nga integrimi i Ballkanit

31 janar 2004 / TN   Erisa ZYKAJ, korrespondente nga Brukseli PYETJE: Zoti president, ju keni qenë vetë fitues i çmimit "Sakharov" në vitin 1998. Si u ndiet sot në dorëzimin e këtij çmimi sekretarit të përgjithshëm të Kombeve të Bashkuara, Kofi Annan? PRESIDENTI RUGOVA: Është një ngjarje me rëndësi. Është një kënaqësi e veçantë që këtë çmim e merr Kofi Annan, i cili është një njeri që ka bërë shumë për paqen në botë dhe për Kosovën. Kisha një përjetim të veçantë në takimin me gruan dhe me djalin e Sergio Vieira de Melo, të cilit i jepet çmimi dhe që fatkeqësisht humbi jetën në Bagdad.   Ai ka bërë shumë për Kosovën, si administrator i parë i Kombeve të Bashkuara. Unë do ta ftoj shumë shpejt bashkëshorten e Sergio de Melo në Kosovë që të marrë medaljen për shërbim civil ndaj popullit të Kosovës, të cilën ia kisha rezervuar Sergio de Melos.

Parlamenti Evropian më ka dhënë çmimin "Sakharov" në vitin 1998 dhe unë u ndjeva i nderuar. Natyrisht sot ndihem shumë më mirë, sepse në vitin kur unë e kam marrë këtë çmim, Kosova ka qenë në luftë. Sot Kosova është e lirë, ndaj dhe pjesëmarrja ime sot në Parlamentin Evropian është domethënëse, sepse tregon që lidhja e Bashkimit Evropian me Kosovën vjen gjithnjë duke u forcuar.

 

Problemi që duhet të zgjidhim tani është ai i njohjes formale të pavarësisë së Kosovës. Njohja e pavarësisë do të zgjidhte shumë probleme të brendshme të Kosovës, qofshin ato demokratike, ekonomike, apo të sigurisë. Madje njohja e pavarësisë së Kosovës do të qetësonte edhe Ballkanin, Shqipërinë, Maqedoninë, Malin e Zi dhe Serbinë dhe gjithë Evropën Juglindore.

Unë kam insistuar për njohjen e drejtpërdrejtë të pavarësisë së Kosovës edhe në bisedimet që kam patur me shumë miq këtu si me vetë sekretarin e përgjithshëm të Kombeve të Bashkuara, Kofi Annan, presidentin e Parlamentit Evropian, Pat Cox, përfaqësuesin e lartë të politikë së jashtme të BE, Havier Solana.

 

PYETJE: Mesazhi i Kofi Annan ishte një mesazh shumë human drejtuar Evropës, që ajo t'i hapë dyert emigracionit të ligjshëm. Çfarë mendoni ju për këtë?

PRESIDENTI RUGOVA: Është një mesazh shumë interesant dhe i drejtë. Pavarësisht nga problemet e shumta që ka patur Evropa me emigracionin klandestin dhe që kjo ka ndikuar në konceptin e shteteve evropiane përballë këtij problemi, mendoj që ky koncept duhet të rishikohet. Unë kam kërkuar një liberalizim të vizave për popullin e Kosovës, ashtu siç ka kërkuar edhe Shqipëria dhe shtete të tjera të Ballkanit.

 

Mendoj se Bashkimi Evropian nuk duhet të frikësohet nga hapja. Sekretari i përgjithshëm i Kombeve të Bashkuara e ka trajtuar këtë problem në këndvështrimin e emigracionit, ndërsa unë po insistoj në një këndvështrim tjetër, që është ai i integrimit. Bashkimi Evropian nuk duhet të frikësohet nga integrimi i vendeve të Ballkanit.

Duhet të mundësohet integrimi i tyre edhe pa i përmbushur detyrimisht kushtet që BE ka vënë që tani, siç janë kushtet për plotësimin e standardeve, apo ato të Paktit të Stabilitetit. Unë mendoj se këto kushte mund të plotësohen gradualisht.

 

Për këtë kemi edhe një shembull konkret që lidhet me futjen e Spanjës, Portugalisë dhe Greqisë në Bashkimin Evropian. Kur janë bërë anëtare të kësaj organizate, këto vende kanë qenë në një situatë më të keqe sesa vendet e Ballkanit. Prandaj vendet e Ballkanit duhet të pranohen sa më shpejt.

 

PYETJE: A do të merrni pjesë në kongresin e Partisë Popullore Evropiane në Bruksel?

PRESIDENTI RUGOVA: Po, jam i ftuar i nderit në këtë kongres, që zhvillohet në 4 dhe në 5 shkurt. Ne kemi aplikuar si parti që të bëhemi anëtarë të kësaj partie të madhe dhe të rëndësishme në gjirin e Parlamentit Evropian dhe besoj se procedura e pranimit në këtë parti do të mbarojë shpejt.

 

 

PYETJE: Këtë radhë ju keni ardhur për të marrë edhe një titull tjetër, apo jo. Për çfarë titulli bëhet fjalë?

PRESIDENTI RUGOVA: Është titulli "senator nderi i Evropës" dhe do të më dorëzohet në Anvers në 1 shkurt nga fondacioni i senatorëve të Evropës, ku ju ftoj të merrni pjesë. Do të ketë një ceremoni me këtë rast. Kjo është një shenjë e lidhjes më të madhe midis Bashkimit Evropian dhe Kosovës dhe unë ndihem shumë i nderuar.