Përmbajtja:

• Presidenti Rugova: BE nuk duhet të frikësohet nga hapja ndaj shteteve të rajonit të Ballkanit

• Holkeri ka takuar përfaqësuesit e partive kryesore para shkuarjes në Nju Jork

• Kryeparlamentari Daci priti ish-shefin e OSBE-së, Uiliam Uoker

• Qeveria e Kosovës në vazhdimin e mbledhjes së 84 ka shqyrtuar disa çështje

• Ros i impresionuar me punën e grupeve punuese

• Novicki i shkruan Kadisë për personat që janë kthyer nga burgjet serbe më 2002

• Gjenerali Bronstrom vizitoi Podujevën

• Lutfi Haziri merr pjesë në një konferecë në Londër për Mitrovicën

• Asambleja e Prishtinës shqyrtoi disa çështje të infrastrukturës komunale

• Gjilan: Gjysma e buxhetit do të investohet në projektet kapitale

• Zeneli: Rinia e Kosovës ka potencial dhe energji që të përballet me të gjitha sfidat që u takojnë të rinjve

• Në Ulqin do të qëndrojnë 200 fëmijë jetimë nga Kosova

• Për festën e Bajramit ndihmohen shumë familje dhe fëmijë jetimë të Llapit

• Ministri i Arsimit tha se institucionet arsimore nuk kanë kushte për shërbime fetare

• Në Prishtinë një grup shkrimtarësh dhe përkthyesish themeluan PEN-Qendrën e Kosovës

• Mbrëmë në Prishtinë u ndezën qirinj në shenjë nderimi për ushtarin shqiptaro-amerikan të vrarë në Irak

• Në Pejë është arrestuar Blerim Berisha, ish-pjesëtar i UÇK-së

• Armët që janë përdorur gjatë luftës nga UÇK do të ruhen në Muzeun e Kosovës

• Serbët e Kosovës ripërsërisin të mos marrin pjesë në grupet punuese për standardet

• Grupi i parë i policëve të Bashkimit Evropian ka arritur në Shkup dhe Tetovë

• Evropa e mbërthyer nga të ftohtit dhe dëbora

• Hamasi kërcënohet me rrëmbimin e ushtarëve izraelitë

• Kanibali gjerman dënohet me 8 vjet burgim

• Një gueril është vrarë dhe një tjetër është plagosur në Irak

• Të paktën 14 veta kanë humbur jetën nga rrëshqitja e dheut në Indonezi

• Në Afganistan u vranë 7 ushtarë amerikanë nga një shpërthim aksidental

• Inkursion i forcave izraelite në Betlehem

• Sekretari i ri i Përgjithshëm i NAT0-s po viziton Shtetet e Bashkuara

• Rajs: Jo hetimeve të pavarura për armët irakiane

Presidenti Rugova: BE nuk duhet të frikësohet nga hapja ndaj shteteve të rajonit të Ballkanit

 

Bruksel, 30 janar 2004 - Presidenti i Kosovës Ibrahim Rugova tha se ka kërkuar një liberalizim të vizave për popullin e Kosovës, ashtu siç ka kërkuar edhe Shqipëria dhe shtetet e tjera të Ballkanit. "Mendoj se Bashkimi Evropian nuk duhet të frikësohet nga hapja ndaj shteteve të rajonit të Ballkanit.

 

Sekretari i përgjithshëm i Kombeve të Bashkuara e ka trajtuar këtë problem në këndvështrimin e emigracionit, ndërsa unë po insistoj në një këndvështrim tjetër, që është ai i integrimit", i ka thënë Presidenti Rugova r gazetës "Bota sot".

Gjithashtu Presidenti Rugova ka theksuar se Bashkimi Evropian nuk duhet të frikësohet nga integrimi i vendeve të Ballkanit, por duhet të mundësohet integrimi i tyre edhe pa i përmbushur detyrimisht kushtet që BE-ja i ka vënë që tani.

"Mendoj se këto kushte mund të plotësohen grdualisht. Për këtë kam edhe një shembull konkret që lidhet me futjen e spanjës, Portugalisë dhe të Greqisë në Bashkimin Evropian.

 

Kur janë bërë anëtare të kësaj organizate, këto vende kanë qenë në një situatë më të keqe se sa vendet e Ballkanit. Prandaj, vendet e Ballkanit duhet të pranohen sa më shpejtë", the mes tjerash Presidenti Rugova.

 

 

Holkeri ka takuar përfaqësuesit e partive kryesore para shkuarjes në Nju Jork

 

Prishtinë, 30 janar 2004 - Shefi i UNMIK-ut Hari Holkeri ka takuar sot përfaqësuesit e tri partive kryesore - LDK, PDK dhe AAK - dhe i njoftoi ata rreth raportit për Kosovën që do ta paraqesë para Këshillit të Sigurimit të OKB-së, më 6 shkurt.

Ndërkaq, përfaqësuesit e tri partive kërkuan nga Holkeri që në Nju Jork të marrë edhe ndonjërin nga përfaqësuesit e institucioneve të Kosovës. Ndonëse zëri i Holkerit nuk është zëri i Kosovës, ata thanë megjithatë se ai do të prezentojë realitetin në Kosovë dhe progresin e arritur.

Holkeri ka pasur një takim edhe përfaqësuesit e koalicionit serb "Kthimi".

 

 

Kryeparlamentari Daci priti ish-shefin e OSBE-së, Uiliam Uoker

 

Prishtinë, 30 janar 2004 - Kosova ka hyrë në një fazë të zhvillimit të saj kur kërkohet një depërtim ndërkombëtar i institucioneve të Kosovës, prandaj kemi nevojë për ndihmën e miqëve të verifikuar, është shprehur kryetari i Kuvendit të Kosvës, Nexhat Daci, në takim një me ish-shefin e OSBE-së Uiliam Uoker.

 

Daci ka shprehur mirënjohejen e thellë për gjithë atë që ka bërë zoti Uolker për Kosovën dhe popullin e saj dhe është shprehur se populli i Kosovë do t'i jetë për jetë mirënjohës.

Ish-ambasadori Uoker, i cili është anëtar i një grupi në Universitetin e Harvardit për lobim në SHBA dhe ndihmë institucioneve të Kosovës për procese pozitive e për depërtim ndërkombëtar të Kosovës, është angazhuar për sigurimin e përkrahjes së liderëve botërorë për avancimin e statusit të Kosovës.

Kryeparlamentari Daci e ka mbështetur angazimin e këtij grupi dhe të zotit Uoker dhe është zotuar se bashkërisht do të bëjnë punë të mirë për Kosovën.

 

 

Qeveria e Kosovës në vazhdimin e mbledhjes së 84 ka shqyrtuar disa çështje

 

Prishtinë, 30 janar 2004 - Qeveria e Kosovës në vazhdimin e mbledhjes së 84 ka shqyrtuar disa çështje. Ajo ka formuar Komisionin Ndërministror për përgatitjen e prioriteteve të Qeverisë dhe ka
shqyrtuar raportin e procesit të njësisë Qendrore të Prokurimit, i prezentuar nga përfaqësuesi i prokurimit.

 

Në mbledhje u diksutua mjaft në lidhje me këtë raport, për parregullsitë apo moskompletimet e dokumetacioneve, sepse raporti nuk ka qenë i plotë. Nëse ka elemente të shkeljeve, atëherë do të zbatohen procedurat ligjore, u tha në mbledhje.

Nga nëngrupi për Energjetikë, u shqyrtuan sygjerimet e dhëna Qeverisë për projektet e KEK-ut.

Ministrat do të paraqesin qëndrimin e Qeverisë në Këshillin Ekonomik Fiskal.

U shqyrtua edhe kërkesa e UNMIK-u drejtuar Qeverisë për projekte të TMK-së për vitin 2004. Qëndrimi i Qeverisë është afirmativ të përkrahet kjo kërkesë, por duhet të shkohet në procedurë të rregullt buxhetore.

 

 

Ros i impresionuar me punën e grupeve punuese

 

Prishtinë, 30 janar 2004 - "Jam shumë i impresionuar me punën e grupeve punuese, por jam i frikësuar nga disa raste", ka thënë Kan Ros, koordinator për strategji në zyrën e shefit të UNMIK-ut. Por ai
megjithatë ka paralajmëruar se plani për implementimin e standardeve do të finalizohet në mesin e muajit shkurt.

 

Sipas zotit Ros, plani përveç që synon përmirësimin e standardeve të jetesës dhe funksionimit demokratik të institucioneve në Kosovë, në të njëjtën kohë e përgatit Kosovën për statusin përfundimtar.

UNMIK-u dhe Qeveria, thotë ai, po bashkëpunojnë ngushtë në hartimin e planit dhe në procesin e standardeve, duke lavdëruar Kryeministrin dhe stafin e tij dhe duke kritikuar disa ministra të kabinetit të tij, por pa dhënë emrat e tyre.

Ros u bëri thirrje serbëve që t'i bashkohen punës së grupeve punuese, por po qe se refuzojnë, puna do të vazdojë edhe pa ta.

"Ne bezojmë thellë se është në të mirë të serbëve që të marrin pjesë në proces, që të jemi të sigurt se zëri i tyre po dëgjohet", tha Ros.

 

 

Novicki i shkruan Kadisë për personat që janë kthyer nga burgjet serbe më 2002

 

Prishtinë, 30 janar 2004 - Institucioni i Ombudspersonit në Kosovë është momentalisht duke i shqyrtuar disa çështje serioze lidhur me personat që në vitin 2002 janë kthyer në Kosovë nga burgjet në Serbi.

Në letrën që Ombudspersoni i Kosovës, Marek Anroni Novicki, i ka dërguar z. Zhan Kristian Kadi, zëvendësit të shefit të UNMIK-ut për Polici dhe Drejtësi, mes tjerash ai kërkon të informohet për mënyrën në të cilën UNMIK-u paramendon të vazhdojë punën mbi rastet penale të personave, procedurat penale kundër të cilëve ende nuk kishin përfunduar me aktgjykim të formës së prerë në kohën kur është marrë vendimi për t'i kthyer ata në Kosovë nga burgjet në Serbi.

 

 

Gjenerali Bronstrom vizitoi Podujevën

 

Podujevë, 30 janar 2004- Kryetari i komunës së Podujevës Agim Veliu bisedoi sot me komandantin e Brigadës Shumëkombëshe Qendra, gjeneralin Anders Bronnstrom me bashkëpunëtorë.

 

Veliu e njoftoi gjeneralin Bronstrom me situatën e përgjithshme në komunën e Podujevës si dhe të arriturat e deritanishme, si për bashkëpunimin e mirë me administratën e UNMIK-ut dhe KFOR-in çek e sllovak.

Ndërkaq, gjenerali Bronstrom tha se ka ardhur të takojë kryetarin e komunës së Podujevës dhe përfaqësuesit e UNMIK-ut, të policisë e KFOR-it për t'u infiormuar drejtëpërdrejtë me situatën në komunën e Podujevës.

 

Ai tha se nga raportet e KFOR-it çek e sllovak shihet se situata është e mirë dhe Podujeva është vend i qetë dhe i sigurtë. Bronstrom e vlerësoi të mirë bashkëpunimin mes komunës dhe KFOR-it, UNMIK-ut dhe policisë.

Në këtë takim morën pjesë edhe përfaqësuesi i UNMIK-ut Shahzad Khan Bagash, komandanti i stacionit policor në Podujevë Reinmann Bernd dhe ushtarakë të KFOR-it çek e sllovak.

 

 

Lutfi Haziri merr pjesë në një konferecë në Londër për Mitrovicën

 

Gjilan, 30 janar 2004 - Gjatë të dy ditëve të kësaj fundjave, në Londër do të mbahet konferenca për Mitrovicën, në të cilën, së bashku me kryeminstrin e Kosovës, Bajram Rexhepi, do të marrë pjesë edhe Lutfi Haziri, kryetar i Asociacionit të Komunave të Kosovës.

Para nisjes z. Haziri tha se konferenca organizohet nga "Wilton Park" dhe ka mbështetjen edhe të qeverisë angleze dhe asaj norvegjeze, ndërsa aty do të diskutohet problemi i Mitrovicës.

Mitrovica vazhdon të mbetet edhe më tutje një sfidë e madhe jo vetëm për Kosovën, e cila nuk ka mundur ende ta shtrijë pushtetin e saj në pjesën veriore, por edhe për administratën ndërkombëtare, e cila nuk ka kontroll të plotë në atë pjesë.

 

 

Asambleja e Prishtinës shqyrtoi disa çështje të infrastrukturës komunale

 

Prishtinë, 30 janar 2004 - Në mbledhjen e parë të sivjetshme Asambleja Komunale e Prishtinës shqyrtoi disa çështje, me theks të veçantë planifikimit të rregullimit të infrastrukturës komunale, pas reshjeve të shumta të shiut ditëve të fundit dhe të përmbytjeve të shumë lagjeve të Prishtinës dhe të pjesëve rurale.

Në mbledhje u tha se rregullimi i rrjetit të kanalizimit do të jetë prioritet gjatë këtij viti.

Gjithashtu në mbledhje u përcaktuan edhe tarifat e kompensimit të tokës që shfrytëzohen për nevoja publike, u përcaktua lokacioni për ndërtimin e xhamisë në fshatin Bardhosh dhe iu nda parcela Klubit Futbollistik "2 Korriku" për ndërtimin e fushës së sportit.

 

 

Gjilan: Gjysma e buxhetit do të investohet në projektet kapitale

 

Gjilan, 30 janar 2004 - Kryetari i komunës së Gjilanit, Lutfi Haziri është takuar mbrëmë me drejtuesit e institucioneve kryesore për rajonin e Gjilanit dhe ka biseduar rreth objektivave të përbashkëta si dhe obligimet në përmbushjen e standardeve, të cilat kërkohen prej kosovarëve nga bashkësia ndërkombëtare.

Objektivat kryesore të komunës për vitin 2004 janë përmirësimi i infrastrukturës, shërbimet publike dhe arsimi. Deri në qershor ne planifikojmë t`i realizojmë edhe 74 projekte nga mjetet e zotuara. Rreth 50 për qind e buxhetit komunal është destinuar për investime kapitale.

 

Njëri nga projektet më të rëndësishme për këtë vit do të jetë rizhvillimi i qendrës së qytetit në hapësirën nga arkivi rajonal e deri te kampi "Montith", tha Haziri.

Gjilani shpreson që sivjet do të arrijë t`i sanojë edhe pasojat e tërmetit të 24 prillit 2002, pasiqë është lejuar edhe ndihma e premtuar më herët nga kryeparlamentari Nexhat Daci, në shumë prej 3 milonë e 700 mijë euro.

Rëndësi të veçantë për ne ka mbështetja nga qeveria amerikane, e cila përmes donacioneve do ta ndihmojë zhvillimin e komunës së Gjilanit edhe gjatë viteve të ardhshme, ka thënë Lutfi Haziri.

Edhe komandanti i TMK-së, Zona e 6-të, Imri Ilazi, nënkoloneli i SHPK-së, Reshat Maliqi, kryetari i gjykatës së qarkut, Ymer Huruglica, kryeprokurori Sabit Maliqi, drejtori i spitalit regjional, dr. Ukshin Ismajli drejtori i Qendrës për mbrojtje sociale, Arben Mehmeti dhe të tjerët kanë folur për aktivitetet e institucioneve që i drejtojnë ata.

 

 

Zeneli: Rinia e Kosovës ka potencial dhe energji që të përballet me të gjitha sfidat që u takojnë të rinjve

 

Klinë, 30 janar 2004 - Në vazhdën e takimeve që po zhvillon kryesia e FR të LDK-së në kuadër të projektit "2004 Viti i LDK-së - Viti Juaj", dje në ambientin e Kuvendit Komunal, Forumi i Rinisë i LDK-së në Klinë, organizoi takimin me të rinjtë, ku u shprehën kërkesat, sugjerimet dhe kritikat e të rinjve dhe u identifikuan problemet që i preokupojnë ata.

 

Në mesin e shumë të rinjve ishte edhe nënkryetari i KK të Klinës Prenk Gjetaj, njëherësh edhe kryetar i degës së LDK-së në këtë komunë. Arben Limani, kryetar i FR të LDK-së në Klinë përshëndeti kryesinë qendrore të FR të LDK-së, për këtë iniciativë të qëlluar.

Ndërkaq, Lulzim Zeneli, kryetar i FR të LDK-së, tha se takimi i sotëm është në kuadër të një projekti për një komunikim interaktiv me të rinjtë që përmes këtij takimi të shfaqën opinionet e të rinjve dhe të njihen të gjitha problemet dhe brengat që janë aktuale. "Këto takime vijnë si domosdoshmëri e kohës dhe vetveprimit politik jo vetëm të FR të LDK-së, por edhe në nivel të institucioneve", - u shpreh ai.

 

"Ne e dimë se po hymë në një faze që është shumë vendimtare për institucionet e Kosovës dhe për tërë popullin e Kosovës në përgjithësi, prandaj kontributi i çdo të riu në çdo proces është shumë domethënës", theksoi Zeneli. Ai tha se duhet të ketë një formulë të përbashkët për eliminimin e problemeve dhe duhet një angazhim më i madh i të rinjve, i institucioneve, i qeverisë në të gjitha nivelet.

Duke iu drejtuar të rinjve të Klinës, Zeneli tha se rinia e Klinës dhe e Kosovës në përgjithësi ka një potencial dhe energji që të përballet me të gjitha sfidat që u takojnë të rinjve. Të rinjtë duhet të plasojnë mesazhe të qarta jo vetem për subjektet politike, por edhe në nivelet institucionale për një nagazhim më proaktiv, përfundoi ai.

Prenk Gjetaj, shprehu mendimin se LDK-ja e degës së Klinës ka shpresat në FR të LDK-së, që ai të angazhohet që atë energji të rinisë ta shfrytëzoj në mënyrë që të freskohet me aktivistët nga radhët e saj.

Ndërkaq, nënkryetari i FR Sejdë Tolaj tha se prioritet i FR të LDK-së, është realizimi i këtij projekti nëpër qendrat e Kosovës për të pasur një pasqyrë të saktë se çka është aktuale nëpër komunat përkatëse.

 

 

Në Ulqin do të qëndrojnë 200 fëmijë jetimë nga Kosova

 

Prishtinë, 30 janar 2004 - Kryetari i SHKA "Zana" në Ulqin, Munib Abazi përmes një letre e ka njoftuar KMDLNJ-në në Prishtinë se gjatë prillit, në bashkëpunim me Ulqin Biznes Asociacionin dhe OJQ-të e tjera nga Ulqini do të organizojë manifestimin "Ditët e Kulturës dhe Turizmit në Kosovë".

Tash sa vjet në Ulqin organizohet manifestimi tradicional "Të gjithë për turizëm", me të cilin faktikisht shënohet hapja e sezonit turistik. Ky manifestim do të përcillet me një varg aktivitetesh të ndryshme kulturore.

Gjithashtu, edhe sivjet, në periudhën 5 - 10 maj në Ulqin do të qëndrojnë 200 fëmijë jetimë nga Kosova, të cilët do të jenë mysafirë të familjeve ulqinake.

Z. Abazi i është lutur KMDLNJ-së që të ndihmojë në organizimin e dërgimit të këtyre fëmijëve në Ulqin.
Vjet, në organizimi të KMDLNJ-së, në Ulqin kanë qëndruar 120 fëmijë jetimë nga Kosova.
KMDLNJ thotë se përzgjedhjen e fëmijëve jetimë që do të qëndrojnë në Ulqin do ta bëjë me qendrat rajonale dhe nënkëshillat e saja në terren.

 

 

Për festën e Bajramit ndihmohen shumë familje dhe fëmijë jetimë të Llapit

 

Podujevë, 30 janar 2004 - Komiteti i Botës Islame-IWC me rastin e festës së Kurban Bajramit do të shpërndajë mish për 600 familje prej të cilave 257 fëmijë jetimë, njoftoi menaxhri i Lagjes Kuvajtiane në Podujevë z. Rashid Gjaroun.

 

Ai tha se vlera e kësaj ndihme është mbi 5 mijë euro, kurse IWC sot shpërndau edhe 203 palë këpucë për bonjakë në vlerë mbi 1 mijë euro dhe 70 palë tjera për gratë që rrisin fëmijë jetimë.

Sekretari i Këshillit të Bashkësisë Islame i Podujevës z. Muhamet Hoxha njoftoi se organizata për ndihmë dhe zhvillim AMercy-USA@ ka dhuruar mish për 220 familje, kryesisht skamnore.

Me rastin e Kurban Bajramit familja e Mujo dhe Muamer Qosiqit nga Bosnja të punësuar në Steyr të Austrisë kanë dërguar në Podujevë 700 euro për shpërndarjen e mishit për familjet me gjendje jo të mirë sociale.

 

 

Ministri i Arsimit tha se institucionet arsimore nuk kanë kushte për shërbime fetare

 

Prishtinë, 30 janar 2004 - Ministri i Arsimit, Shkencës dhe Teknologjisë, Rexhep Osmani dhe kryetari i Bashkësisë Islame të Kosovës, Naim Tërnava kanë biseduar për mundësinë e kryerjes së riteve fetare në institucionet arsimore.

 

Ministri Osmani thotë se institucionet arsimore nuk kanë kushte për shërbime fetare, por besimtarëve do t'u kriojohen mundësi që t'i kryejnë ato në objektet fetare brenda orarit të mësimit e të punës në faltoret publike. Ai po ashtu ka theksuar se shkollat publike do të jenë të përmbajtura nga çdo lloj veprime që shpien në ndonjë propagandë të caktuar fetare.

Ndërkaq, myftiu Naim Tërnava ka thënë se besimtarët islamë kërkojnë që ritet fetare praktike t'i kryejnë brenda institucioneve arsimore e publike dhe, sipas tij, kjo nuk do të thotë që institucionet arsimore mund të shndërrohen në xhami.

 

 

Në Prishtinë një grup shkrimtarësh dhe përkthyesish themeluan PEN-Qendrën e Kosovës

 

Prishtinë, 30 janar 2004 - Në Bibliotekën Kombëtare dhe Universitare të Kosovës një grup shkrimtarësh dhe përkthyesish themeluan PEN-Qendrën e Kosovës dhe zgjodhën Bordin drejtues prej shtatë anëtarësh: Ali Podrimja, Mehmet Kraja, Agim Gjakova, Musa Ramadani, Basri Qapriqi, Ibrahim Berisha dhe Avni Spahiu. Kryetar i Bordit u zgjodh Basri Qapriqi, nënkryetar Avni Spahiu dhe sekretar i përgjithshëm Agim Gjakova.

 

 

Mbrëmë në Prishtinë u ndezën qirinj në shenjë nderimi për ushtarin shqiptaro-amerikan të vrarë në Irak

 

Prishtinë, 30 janar 2004 - Disa dhjetëra qytetarë ndezën qirinj mbrëmë para Teatrit Kombëtar në Prishtinë në shenjë nderimi për ushtarin shqiptaro-amerikan, Ervin Dervishi, i cili u vra në Irak ditë më parë.

 

Homazhet u organizuan nga Asociacioni kosovar i Altantikut së bashku me të rinjtë evropianë për siguri në Kosovë, ndërkaq i pranishëm ishte edhe shefi i Zyrës së Shqipërisë në Kosovë, Bashkim Rama.

 

Ai tha se rënia e Ervinit në shërbim të paqes tregon se shqiptarët u janë mirënjohës Shteteve të Bashkuara për kontributin e dhënë në çështjen e Kosovës.

Ervi Dervishi shërbente si ushtar i Shteteve të Bashkuara në misionin paqeruajtës në Irak.

 

 

Në Pejë është arrestuar Blerim Berisha, ish-pjesëtar i UÇK-së

 

Pejë, 30 janar 2004 - Në Pejë është arrestuar Blerim Berisha, ish-pjesëtar i UÇK-së, i cili sipas policisë së UNMIK-ut, dyshohet për "aktivitete terroriste", duke mos dhënë detaje të tjera.

Fillmisht lajmin për arrestimin e Blerim Bershës e bënë të ditur familjarët e tij, të cilët 24 orë nuk kanë ditur se ku ndodhet ai.

Zëdhënësi i policisë Xhoel Singëlton vetëm ka konfirmuar arrestimin, duke thënë se rasti po hetohet në Prishtinë.

 

 

Armët që janë përdorur gjatë luftës nga UÇK do të ruhen në Muzeun e Kosovës

 

Prishtinë, 30 janar 2004 - Në bazë të një marrëveshjeje ndërmjet Muzeut të Kosovës, TMK-së dhe KFOR-it rreth 63 ekzemplarë të llojeve të ndryshme të armëve, të cilat janë përdorur gjatë luftës kundër pushtuesit nga Ushtria Çlirimtare e Kosovës prej dje do të ruhen në Muzeun e Kosovës.

Në mesin e këtyre armëve do të jenë tre ekzemplarë armësh kalibra të mëdha, të cilat Muzeu i Kosovës nuk i ka pasur.

Shefi i sektorit të historisë në Muzeun e Kosovës Sadik Krasniqi tha se kjo mundëson ruajtjen e armëve të cilat paraqesin historinë më të re kombëtare dhe si të tilla kanë vlera të padiskutueshme.

 

 

Serbët e Kosovës ripërsërisin të mos marrin pjesë në grupet punuese për standardet

 

Prishtinë, 30 janar 2004 - Serbët e Kosovës thonë se mbeten në qëndrimet e mëparshme për të mos marrë pjesë në grupet punuese për implementimin e standardeve për Kosovën pa plotësimin e kushteve të tyre. Zyrtarët e UNMIK-ut ndërkaq thonë se kërkesat e serbëve mund të shtrohen vetëm në forumin e duhur, pra në grupet e përbashkëta punuese.

Dragisha Kërstoviq, shefi i grupit parlamentar "Kthimi" ka thënë se nuk do të ketë pjesëmarrje pa plotësimin e disa parakushteve. Sipas tij nuk ka ndodhur kurrëfarë ndryshimi në dokumentin e quajtur standardet, prandaj edhe qëndrimi i tyre, tha ai, ka mbetur i pandryshuar.

 

Ai shtoi se ditët e fundit kanë pasur takime të shumta me koordinatorin e Paktit të Stabilitetit, Erhard Busek, me koordinatorin e UNMIK-ut për standardet Kan Ros, ku përfaqësuesit e koalicionit "Kthimi" kanë mbetur në qëndrimet e tyre të mëparshme.

 

 

Grupi i parë i policëve të Bashkimit Evropian ka arritur në Shkup dhe Tetovë

 

Shkup, 30 janar 2004 - Grupi i parë i policëve që janë pjesë e Misionit të Bashkimit Evropian janë vendosur dje në stacionet e policisë në Shkup dhe Tetovë. Ky hap është pjesë e misionit njëvjeçar "Proksima" që synon aftësimin e policisë maqedonase dhe do të ndihmojë Maqedoninë në mbrojtjen e kufijve dhe luftën kundër krimit të organizuar.

 

 

Evropa e mbërthyer nga të ftohtit dhe dëbora

 

Londër, 30 janar 2004 - Temperturat e ulta dhe bora që po bie anembanë e Evropës, kanë paraliziuar trafikun në pjesët veriore të kontinentit.

 

Sipas njoftimeve më të reja të agjencive të lajmeve gjatë natës dhe pasditës së djeshme janë anuluar ose janë shtyrë shumë fluturime nga Londra, Brukseli dhe Moska, ndërkaq trafiku rrugor dhe hekurudhor është çrregulluar ose përkohësisht është ndërprerë në shumë vende evropiane.

 

Nëpër rrugë ka tollovi të paparë, meqenëse temperaturat e ulta janë shoqëruar edhe me reshjet e dëborës.

 

 

Hamasi kërcënohet me rrëmbimin e ushtarëve izraelitë

 

Gaza, 30 janar 2004 - Lideri shpirtror i Hamasit ka thënë se grupi militant palestinez do të rrëmbejë ushtarët izraelitë për t'i shëkmbyer me palestinezët e burgosur nga Izraeli, njofton Rojter.

Sheiku Ahmed Jasin u ka thënë gazetarëve në qytetin Gaza se "nuk ka zgjidhje për çështjen (e palestinezëve) e të burgosur përveç në kapjen e ushtarëve të armikut dhe shkëmbimin e tyre me tanët".

 

 

Kanibali gjerman dënohet me 8 vjet burgim

 

Berlin, 30 janar 2004 - Një gjykatë në Gjermani dënoi me tetë vjet e gjysmë, Armin Meiwes, i akuzuar se ka vrarë dhe ngrënë një njeri.

Meiwes, 42 vjeç pranoi se kishte vrarë dhe ngrënë, Bernd Juergen Brandes, pas kryerjes së marrëdhënieve seksuale me të dhe orëve të tëra sado-mazoizmi. Megjithatë, ai këmbënguli se viktima kishte kërkuar vullnetarisht që t'i nënshtrohej dhunës vdekjeprurëse. Procesi gjyqësor ndaj kanibalit, ka qënë më senzacionali në Gjermani, që prej dekadash.

Vendimi i gjykatës ishte shumë larg kërkesës së prokurorëve që i pandehuri të burgosej përjetësisht për vrasje për motive seksuale. Inxhinieri i kompjuterave, i cili gëzonte një reputacion të mirë, vrau dhe hëngri Bernd Brandes, tre vjet pasi kishte vendosur në internet një njoftim ku kërkonte vullnetarë që pranonin të haheshin.

 

 

Një gueril është vrarë dhe një tjetër është plagosur në Irak

 

Kirkuk, 30 janar 2004 - Një gueril është vrarë dhe një tjetër është plagosur në sulmin ndaj pjesëtarëve të mbrojtjes civile irakiane, të cilët ndihmojnë forcat amerikane afër Kirkukut, njofton Frans Press.

"Bazën tonë që ndodhet në Sulejman Beg, në jug të qytetit Kirkuk, e kanë sulmuar gjashtë persona.

 

Jemi përgjigur me zjarr dhe me atë rast është vrarë një person dhe një tjetër është plagosur. Të tjerët kanë ikur", ka thënë gjenerali Anuar Hama Amin.

 

 

Të paktën 14 veta kanë humbur jetën nga rrëshqitja e dheut në Indonezi

 

Xhakartë, 30 janar 2004 - Të paktën 14 veta kanë humbur jetën, në mesin e tyre edhe disa fëmijë gjatë rrëshqitjes së dheut nga shpërthimi i vullkanit në ishullin Flores në Indonezi.

Rrëshqitja e dheut në krahinën Purvorexho në ishullin Java ka ndodhur mbrëmë dhe me atë rast pothujase dy fshatra janë mbuluar me baltë dhe gurë. Në mesin e viktimave janë edhe pesë fëmijë të moshës nën dhjetë vjeç.

 

 

Në Afganistan u vranë 7 ushtarë amerikanë nga një shpërthim aksidental

 

Kabul, 30 janar 2004 - Forcat amerikane në Afganistan thonë se një shpërthim shkaktoi vdekjen e 7 ushtarëve amerikanë dhe plagosjen e 3 të tjerëve në afërsi të një depoje armatimi në jug të Afganistanit.

Komanda qendrore amerikane me anë të një deklarate njoftoi ushtarët u vranë ndërsa po punonin afër një depoje armësh dje mbasdite në provincën Ghazni. Nga shpërthimi u plagos edhe përkthyesi afgan, ndërkohë që një ushtari amerikan nuk i dihet fati.

Autoritetet lokale afgane kanë thënë se shpërthimi ka qenë një aksident.

 

 

Inkursion i forcave izraelite në Betlehem

 

Betlehem, 30 janar 2004 - Zyrtarë palestinezë thanë se forcat izraelite kanë hyrë në Betlehem pasi një autor sulmesh vetëvrasëse vrau 10 veta në Jeruzalem.

Zyrtarët thanë se automjete të ushtrisë izraelite dhe ushtarë hynë në Betlehem në orët e para të mëngjesit. Inkursioni u zhvillua disa orë pasi grupi ekstremist palestinez Brigadat e Martirëve Al-Aksa mori përgjegjësinë për sulmin e se enjtes dhe njoftoi se autori i sulmit ishte nga zona e Betlehemit.

 

 

Sekretari i ri i Përgjithshëm i NAT0-s po viziton Shtetet e Bashkuara

 

Uashington, 30 janar 2004 - Jap de Hop Shefer, ish-ministër i jashtëm i Holandës po zhvillon vizitën e tij të parë në Shtetet e Bashkuara që pasi u bë Sekretar i Përgjithshëm i NATO-s më 5 janar. Vizita e tij dy ditëshe do të përfshijë një takim me presidentin Bush sot në Shtëpinë e Bardhë.

Aleanca me 19 anëtarë ka ndryshuar shumë që pas shpërbërjes së bllokut sovjetik. Kjo organizatë do të zgjerohet me 7 vende ish-komuniste nga Evropa qendrore dhe lindore.

Natoja, që dikur ishte e përqëndruar në mbrojtjen e Evropës perëndimore dhe Amerikës së Veriut, tani ka trupa që shërbejnë në misione në Kosovë, Afganistan dhe Bosnje-Hercegovinë.

 

 

Rajs: Jo hetimeve të pavarura për armët irakiane

 

Uashington, 30 janar 2004 - Këshilltarja e presidentit Bush për Sigurimin Kombëtar Kondoliza Rajs, i hodhi poshtë kërkesat për hetime të pavarura lidhur me informacionet e zbulimit për armët që zotëronte Iraku, për të cilat ka patur kritika se ishin të pasakta.

E intervistuar nga rrjetet televizive, zonja Rajs tha se një hetim i pavarur nuk është i nevojshëm pasi CIA, Agjencia Qendrore e Zbulimit, ka filluar hetime të brendshme.

Ajo tha se e vërteta për armët e shkatërrimit në masë të Irakut ndoshta nuk do të mësohet kurrë pasi shumë dokumente dhe të dhëna të tjera u shkatërruan në plaçkitjet që pasuan ndërhyrjen amerikane vitin e kaluar.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |