|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Dy lajme nga Podujeva

Kryetari Agim Veliu priti komandantin e BSHQ-së gjeneralin Anders  Bronnstrom

		Podujevë, 30 janar 2004 (TN) – Kryetari i komunës së Podujevës Agim Veliu priti sot komandantin e Bashkësisë Shumëkombëshe të Qendrës, gjeneralin Anders  Bronnstrom me bashkëpunëtorë. Në k’të takim kryetari Veliu e njoftoi gjeneralin Bronstorm me situatën e përgjithshme në komunën e Podujevës si dhe të arriturat e deritanishme. “Biseduam poashtu për sigurinë, bashkëpunimin e mirë me administratën e UNMIK-ut dhe KFOR-in çek e sllovak, për zhvillimin ekonomik dhe punësimin që janë faktorë të stabilitetit dhe të progresit”, tha kryetari Veliu pas takimit.

Ndërkaq gjenerali Bronstorm deklaroi se ka ardhur të takojë kryetarin Veliu dhe përfaqësuesit e UNMIK-ut, të policisë e KFOR-it për tu infiormuar drejtëpërdrejtë me situatën në komunën e Podujevës. “Sipas raporteve nga KFOR-i çek e sllovak mendoj se situata është e mirë dhe Podujeva është vend i qetë dhe i sigurtë.

Mendoj se është një bashkëpunim i mirë në mes komunës dhe KFOR-it, UNMIK-ut dhe policisë dhe se ka përkrahje për zhvillimet pozitive”, tha gjenerali Bronstorm. Ai tha se sheh një ardhmëri pozitive për Podujevën edhe pse duhet punuar në zhvillimin ekonomik që do të mundësojë punësimin dhe natyrisht edhe stabilitetin në planin e sigurisë dhe të paqes.

Në takimin e sotëm morën pjesë edhe përfaqësuesi i UNMIK-ut Shahzad Khan Bagash, komandanti i stacionit policor në Podujevë Reinmann Bernd dhe ushtarakë të KFOR-it çek e sllovak.

Me rastin e Festës së Kurban Bajramit Komiteti i Botës Islame dhe donatorë tjerë ndihmojnë shumë familje dhe fëmijë jetimë të Podujevës

Podujevë, 30 janar 2004 (TN) – Komiteti i Botës Islame-IWC me rastin e festës së Kurban Bajramit do të shpërndajë mish për 600 familje prej të cilave 257 fëmijë jetimë, njoftoi menagjeri i Lagjes Kuvajtiane në Podujevë z. Rashid Gjaroun. Ai tha se vlera e kësaj ndihme është mbi 5 mijë euro, kurse IWC sot shpërndau edhe 203 palë këpucë për bonjakë në vlerë mbi 1 mijë euro dhe 70 palë tjera për gratë që rrisin fëmijë jetimë. 

Sekretari i Këshillit të Bashkësisë Islame i Podujevës z. Muhamet Hoxha njoftoi se organizata për ndihmë dhe zhvillim “Mercy-USA” ka dhuruar mish për 220 familje, kryesisht skamnore.

Me rastin e Kurban Bajramit familja e Mujo dhe Muamer Qosiqit nga Bosnja të punësuar në Steyr të Austrisë kanë dërguar në Podujevë 700 euro për shpërndarjen e mishit për familjet me gjendje jo të mirë sociale.