Përmbajtja:

• Presidenti Ibrahim Rugova të dielën shpallet Senator Nderi i Evropës

• U ndërpre seanca e sotme e Kuvendit të Kosovës

• Qytetarëve të Kosovës iu dhuruan 500 karroca invalidësh

• K.Islami: Statusi përfundimtar i Kosovës është çështje që i përket banorëve të saj dhe bashkësisë ndërkombëtare

• Në Mitrovicë u bë ndërrimi i komandës së KFOR-it

• UNMIK-u hedh poshtë pohimet e Qeverisë së Kosovës për vizitën e Lamsdorfit dhe Fuçit në Nju-Jork

• Qeveria ka miratuar projektligjin për hotelieri dhe nismën e projektligjit për ekzekutimin e sanksioneve penale

• Busek thotë se Pakti i Stabilitetit do t'i ofrojë ndihmë Kosovës në marrjen e kredive të jashtme

• Grupi i Lartë Punues për TMK-në ka shqyrtuar financimin e TMK-së

• Përfaqësuesi i UNMMIK-ut tha në Stokholm se Kosova është një shembull i mirë që të ndalet spastrimi etnik

• Në mars fillon ndërtimi i Memorialit Kombëtar të UÇK-së

• Grupi punues për zgjedhje do t'i dorëzojë Holkerit rekomandimet e sistemit proporcional

• Podujevë: Qytetin dhe disa fshatra i përfshiu moti i lig dhe vërshimet

• Në Gjakovë u përkujtua pesëvjetori i rënies heroike së Gaspër Karaqit

• Banorët e trevës së Rugovës kundërshtojnë Projektligjin mbi Parkun Nacional Bjeshkët e Nemuna

• Gjilan: Ulje e ndjeshme e shkallës së natalitetit

• Burim Demiri fitues i çmimit të parë në "Fest Flaka 2004"

• Po i zhvillon punimet seanca e Kuvendit të Kosovës

• Programi i LDK-së u hap perspektivë të rinjve

• Komisioni parlamentar takohet me familjarët e të zhdukurve serbë

• Në Gjykatën Themelore të Shkupit vazhdoi gjykimi kundër 10 shqiptarëve nga Maqedonia dhe Kosova

• Komiteti maqedonas i Helsinikit pohon se në vitin e kaluar nuk është realizua asnjë premtim i pushtetit

• Dhjetë veta të vrarë në një sulm vetëvrasës në Jerusalem

• Ish-kryeinspektori amerikan i armëve bëri thirrje për një hetim të pavarur

• Takim Bush-Erdohan në Shtëpinë e Bardhë

• Sekretari i ri i Përgjithshëm i NATO-s bën vizitën e parë në SHBA

• Kryetari i kompanisë së BBC-së dha dorëheqje

• Shkëmbim të burgosurish Hezballah-Izrael

• Të paktën 19 imigrantë janë zhdukur në Detin Egje

• Në një seri sulmesh është vrarë një pjesëtar i forcave irakiane

• Njëmbëdhjetë veta janë plagosur në një shpërthim në qytetin Bakuba

• Sot në Bruksel Kofin Ananit iu dorëzua Çmimi Saharov

Presidenti Ibrahim Rugova të dielën shpallet Senator Nderi i Evropës

 

Bruksel, 29 janar 2004 - Presidenti i Kosovës Ibrahim Rugova po qëndron në Belgjikë për një vizitë disaditëshe. Presidenti Rugova sot mori pjesë në ceremoninë e dorëzimit të Çmimit Saharov sekretarit të përgjithshëm të OKB-së, Kofi Anan. Ibrahim Rugova poashtu është një nga laureatët e këtij Çmimi prestigjioz të Parlamentit Evropian. Gjatë një kokteji që shtroi kryetari i Parlamentit Evropian Pat Koks me rastin e dorëzimit të këtij çmimi, mori pjesë edhe Presidenti Rugova, i cili me këtë rast pati takime të shkurta me sekretarin e përgjithshëm të OKB-së Kofin Anan, shefin e politikës së jashtme të BE-së Havier Solana dhe me komesionerin evropian Kris Paten.   Poashtu Presidenti Rugova me këtë rast takoi edhe bashkëshorten e Serzho de Melos së ndjerë, të cilës i shprehu ngushëllime. Gjithashtu Presidenti Rugova ishte në drekën që shtroi Havier Solana për nder të Kofi Ananit, pas ceremonisë së dhënies së Çmimit Saharov.

 
Presidenti Rugova nesër do të takohet me ministrin e Punëve të Jashtme të Belgjikës, Lui Mishel.

Ndërkaq, të dielën më 1 shkurt, në një ceremoni që do të zhvillohet në orën 11.00 në qytetin Atverpen të Belgjikës, Prsidenti Ibrahim Rugova do të shpallet Senatori Nderi i Evropës.

 

 

U ndërpre seanca e sotme e Kuvendit të Kosovës

 

Prishtinë, 29 janar 2004 - Kuvendi i Kosovës, pas shumë mospajtimeve të shprehura gjatë seancës, nuk miratoi sot ligjin për Odën Ekonomike të Kosovës. Seanca u ndërpre për shkak të mosharmonizimit të qëndrimeve të Komisionit parlamentar për ekonomi dhe të deputetëve.

Mosmarëveshjet nuk u zgjidhën as në takimin e kryeparlamentarit Daci me shefat e grupeve parlamentare dhe përmes votimit u vendos që seanca të ndërpritet.

 

 

Qytetarëve të Kosovës iu dhuruan 500 karroca invalidësh

 

Prishtinë, 29 janar 2004 - Fondacioni i Karrocave Invalidore dhe Kisha e Jezus Krishtit të të Shenjtëve të Ditës së Fundit në një ceremoni të zhvilluar sot në Prishtinë, u dhuruan 500 karroca invalidësh qytetarëve të Kosovës.

Shefja e Zyrës amerikane në Prishtinë zonja Marsi Ris tha se këto dhurata u mundësojnë personave të hendikepuar lëvizjen e lirë nëpër shtëpitë e tyre dhe në publik dhe kështu bëhet hapi i parë i integrimit të tyre në një shoqëri të gjerë.

 

Ky donacion i 500 karrocave për invalidë do të ndihmojë shumë persona B posaçërisht fëmijë - në mënyrë që ata të rikthejnë lëvizshmërinë e tyre dhe të marrin pjesë në jetën shoqërore të Kosovës, tha zonja Ris.

Donacionin e pranoi Halit Ferizi, kryetar i Asociacionit të Paraplegjikëve dhe Fëmijëve të Hendikepuar të Kosovës (HENDIKOS).

Në këtë ceremoni morën pjesë dhe folën shefi i UNMIK-ut Hari Holkeri, kryeministri i Kosovës dhe pjesëmarrës të tjerë.

 

 

K.Islami: Statusi përfundimtar i Kosovës është çështje që i përket banorëve të saj dhe bashkësisë ndërkombëtare

 

Tiranë, 29 janar 2004 - Ministri i Punëve të Jashtme të Shqipërisë, Kastriot Islami foli sot para korit diplomatik të akredituar në Tiranë. Me këtë rast ministri Islami foli edhe për Kosovën, duke thënë se për Shqipërinë ka qenë prioritare edhe ndjekja me vëmendje të veçantë e ecurisë së marrëdhënieve dhe bashkëpunimit me Kosovën, e përfshirjes së saj në proceset integruese evropiane.

"Qëndrimi ynë ka qenë dhe mbetet kurdoherë në interes të respektimit të plotë të rezolutës së OKB-së dhe për përmbushjen e standarteve të përcaktuara nga OKB-ja përpara statusit përfundimtar", tha Islami, duke shtuar se "mbetemi të palëkundur në qëndrimin tonë se statusi përfundimtar i Kosovës është çështje që i përket banorëve të saj dhe bashkësisë ndërkombëtare që administron atë sikurse vazhdojmë të shprehemi të bindur se pa zgjidhjen përfundimtare të këtij statusi nuk mund të ketë stabilitet dhe integrim rajonal".

Sipas Islamit, angazhimi në vazhdimësi i diplomacisë shqiptare gjatë vitit 2003 ka qenë maksimal dhe konstant në drejtim të influencimit pozitivisht tek të gjithë faktorët politikë shqiptare të Kosovës dhe tek të gjithë faktorët e tjerë politikë ndikues, për të inkurajuar proceset integruese të Kosovës, mbështetjen pa rezerva dhe bashkëpunimin më të ngushtë me UNMIK-un dhe bashkësinë ndërkombëtare, përmbushjen e standarteve të njohura.

 

Në këtë strategji, tha ai, nxitja dhe mbështetja e autoriteteve kosovare në përgatitjen e tyre për zhvillimin e dialogut politik me Beogradin, mbetet prioritet.

 

 

Në Mitrovicë u bë ndërrimi i komandës së KFOR-it

 

Mitrovicë, 29 janar 2004 - Me nje ceremoni të zhvilluar sot në Mitrovicë u bë ndërrimi i komandës së Brigadës shumëkombëeshe veri-lindje.

Duke folur në këtë ceremoni, komandanti i KFOR-it Holger Kamerhof tha se Mitrovica është dhe do të mbetet në qendër të vemendjes së paqeruajtësve.

 

Ai lavdëroi punën e tyre në këtë sektor të ndieshëm, duke thënë se ushtarët e KFROR-it bashkë me organizmat e tjera kanë punuar me përkushtim për ruatjjen e qetësisë në Mitrovicë. Sipas tij, kjo ka bërë që qarkullimi mbi urën kryesore në Ibër të jetë i mundur për të gjithë qytetarët.

Përndryshe komandën e kësaj brigade sot e mori gjenerali francez Zavaje Mishel, duke e zëvendësuar kështu gjeneralin e gjertanishëm Bernar Ratel.

 

 

UNMIK-u hedh poshtë pohimet e Qeverisë së Kosovës për vizitën e Lamsdorfit dhe Fuçit në Nju-Jork

 

Prishtinë, 29 janar 2004 - Vizita e shefit të Shtyllës së Katërt të UNMIK-ut, Nikolas Lamsdorf dhe shefes së AKM-së, Marie Fuçi në Nju-Jork bëhet për konsultime të rregullta dhe jo për të bërë presion mbi Qeverinë e Kosovës që të heqë dorë nga kërkesat e veta, thanë zëdhënësit e UNMIK-ut në Kosovë.

Zëdhënësi i Shtyllës së katërt të UNMIK-ut tha në një konferencë për gazetarë se vizita e Lamsdorfit dhe e Fuçit për në Nju-Jork është vetëm pjesë e konsultimeve të përhershme të zyrtarëve të kësaj administrate dhe selisë së saj qendrore dhe nuk ka ndonjë prapavijë tjetër, sikur konsideron Qeveria e Kosovës.

 

 

Qeveria ka miratuar projektligjin për hotelieri dhe nismën e projektligjit për ekzekutimin e sanksioneve penale

 

Prishtinë, 29 janar 2004 - Qeveria e Kosovës ka ndërprerë dje mbledhjen e saj të rregullt dhe të njëjtën do ta vazhdojë të premtën, pasi kryeministri Bajram Rexhepi i është dashur të takohej me shefin e UNMIK-ut, Hari Holkeri rreth mundësive për financimin e TMK-së.

 

Qeveria ka miratuar projektligjin për veprimtari hoteliere e turistike dhe nismën e projektligjit për ekzekutimin e sanksioneve penale.

Përndryshe kryeministri e ka njoftuar dje kabinetin edhe me planin nacional për barazi gjinore të hartuar nga UNIFEM-i. Ky dokument tha zëdhënësja Kusari prezenton format optimale për përfaqësimin e femrës në shoqëri dhe institucione.

 

 

Busek thotë se Pakti i Stabilitetit do t'i ofrojë ndihmë Kosovës në marrjen e kredive të jashtme

 

Prishtinë, 29 janar 2004 - Koordinatori i Paktit të Stabilitetit për Evropën Juglindore, Erhard Busek, në përfundim të vizitës dyditëshe në Prishtinë, theksoi se në mars të këtij viti Kosova mund të fitojë statusin e vëzhguesit të Qendrës për Luftë kundër krimit të organizuar, me seli në Bukuresht.

Sipas Busekut, Pakti i Stabilitetit do t'i ofrojë ndihmë Kosovës në marrjen e kredive të jashtme për të financuar projektet e infrastrukturës së rrugëve. Ai ka theksuar se përveç këtyre mundësive po diskutohen edhe modalitetet për inkurajimin e investimeve evropiane në Kosovë.

 

 

Grupi i Lartë Punues për TMK-në ka shqyrtuar financimin e TMK-së

 

Prishtinë, 29 janar 2004 - Grupi i Lartë Punues për TMK-në ka zhvilluar edhe një takim ku ka shqyrtuar financimin e TMK-së për vitin 2004. Komandanti i TMK-së, gjeneral Agim Çeku tha se derisa qeveri të vendeve evropiane tashmë kanë filluar ndarjen e mjeteve për TMK-në, megjithatë në këtë takim është konsideruar se ato mjete nuk janë të mjaftueshme.

 

Kështu që është ngritur çështja e ndarjes së mjeteve nga buxheti i Kosovës. Si mjete të domosdoshme gjenerali Agim Çeku theksoi se TMK-së për këtë vit i nevojiten 15 milion euro.

Lidhur me këto kërkesa kryeministri Bajram Rexhepi tha se në parim e mbështet kërkesën për ndarjen e mjeteve, por Qeveria do të takohet këtë të premte për ta shqyrtuar pikërisht këtë çështje.

 

Ndërkaq, shefja e Zyrës së Misionit amerikan në Kosovë, Marsi Ris tha se Qeveria amerikane për tri vite ka qenë në ballë të atyre vendeve që e kanë ndihmuar TMK-në, ndërkaq tash e tutje, siç tha zonja Ris, kjo detyrë do t'u kalojë edhe qeverive tjera.

 

Por kjo nuk do të thotë se Qeveria amerikane nuk do të mbështesë edhe mëtutje TMK-në. Në këtë aspekt u tha dje se Qeveria gjermane ka ndarë 800 mijë euro, ndërkaq ato britanike dhe italiane nga nga 200 mijë euro.

 

 

Përfaqësuesi i UNMMIK-ut tha në Stokholm se Kosova është një shembull i mirë që të ndalet spastrimi etnik

 

Prishtinë, 29 janar 2004 - Zhan Kristian Kadi, shef i Shtyllës së parë të UNMIK-ut në Forumin Ndërkombëtar në Stokholm prezentoi Kosovën si një shembull të bashkësisë ndërkombëtare në arritjen e ndaljes së spastrimit etnik dhe parandalimit të ripërsëritjes së këtij fenomeni.

 

Kosova është një shembull i mirë se çfarë bashkësia ndërkombëtare dhe Kombet e Bashkuara kanë arritur që të ndalin pastrimin etnik dhe krijimin e instrumenteve të cilat do të parandalonin ripërsëritjen e tij, ka thënë Kadi.

 

 

Në mars fillon ndërtimi i Memorialit Kombëtar të UÇK-së

 

Skënderaj, 29 janar 2004 - Komiteti Kombëtar për Memorialin e UÇK-së nënshkroi kontratën për ndërtimin e Memorialit Kombëtar të UÇK-së (në komunën e Skënderajt) me firmën "Dreni Engineering", e cila u zgjodh nga 10 firma që konkurruan për ndërtimin e projektit.

Sponsori kryesor i projektit të Memorialit Benito Mares tha, se "Dreni Engineering" u zgjodh sepse ata kanë përvojë dhe njohuri teknike që nevojitet për kompletimin e projektit. Ata poashtu na prezentuan neve një listë me referenca shumë të mira.

Z.Mares, së bashku me disa amerikanë para pak kohësh kanë kontribuar 100,000 dollarë për "Fondin e Komitetit për Memorialin e UÇK-së", që do të mbulojë shpenzimet për ndërtimin e Memorialit.

 

Anëtari i bordit të Komitetit për Memorialin Fatmir Gashi me këtë rast shpalosi planet për fushatën e mbledhjes së fondeve shtesë nga qytetarët dhe kompanitë e Kosovës për t'u barazuar me kontributet nga Amerika.

Memoriali Kombëtar i UÇK-së fillon të ndërtohet në muajin mars për nder të ushtarëve të rënë gjatë luftës në Kosovë 1998 dhe 1999. Memoriali përmban një mur mermeri të zi me emrat e ushtarëve të rënë të gdhendur në të, dhe gjithashtu edhe monumentin "Varri i Ushtarëve të Paidentifikuar" i gjatë 15 metra me flakë të përjetshme.

Memoriali parashihet të hapet me një ceremoni rasti në qershor 2004, një datë që përputhet me përvjetorin e pestë të përfundimit të luftës.

 

 

Grupi punues për zgjedhje do t'i dorëzojë Holkerit rekomandimet e sistemit proporcional

 

Prishtinë, 29 janar 2004 - Grupi punues për zgjedhje do t'i dorëzojë shefit të UNMIK-ut nga mesi i shkurtit rekomandimet mbi procesin e ardhshëm zgjedhor.

 

Ndërkohë, një anëtar i Grupit punues për zgjedhjet citohet të ketë thënë se shumica e anëtarëve në këtë grup janë pro që kryeadministratorit t'i rekomandohet sistemi proporcional me lista të hapura në zgjedhje. Sven Lindholm, zëdhënës i Misionit të OSBE-së tha dje se rekomandimet për zgjedhjet shefit të UNMIK-ut do t'i bëhen nga mesi i shkurtit.

 

 

Podujevë: Qytetin dhe disa fshatra i përfshiu moti i lig dhe vërshimet

 

Podujevë, 29 janar 2004 - Mbrëmë Podujevën e përfshiu një mot i lig, i cili shkaktoi vërshime në qytet dhe në disa fshatra.

Drejtoria për Mbrojtje Civile dhe Emergjencë në bashkëpunim me SHPK-në, Shërbimin e zjarrfikësve dhe TMK-në kanë intervenuar në disa raste kur uji kishte hyrë në oborre dhe shtëpi të disa dhjetra familjeve.
KFOR-i çek e sllovak ka intervnuar në bodrumin e stacionit policor në Podujevë, kurse një ekip i TMK-së ka intervenuar në fshatin Bradash.

Sipas njoftimeve nga terreni, probleme me vërshimet ka pasur qyteti i Podujevës dhe fshatrat Bradash, Peran, Llapashticë e poshtme, Bellopoja, Tërrnava, një pjesë e Sfeçlës dhe në Batllavë komuniteti ashkali.

Një problem shqetësues për këto lokalitete paraqet uji i puseve i cili aktualisht nuk mund të përdoret për pije, për çka Inspeksioni sanitar rekomandon qytetarët e këtyre fshatrave të vlojnë ujin e pijshëm.

 

 

Në Gjakovë u përkujtua pesëvjetori i rënies heroike së Gaspër Karaqit

 

Gjakovë, 29 janar 2004 - Në Gjakovë u organizua një akademi përkujtimore në pesëvjetorin e rënies heroike të dëshmorit dhe luftëtarit të lirisë Gaspër Karaqi. Në këtë tubim ishte i pranishëm edhe Mark Krasniqi, kryetar i Partisë Shqiptare Demokristiane të Kosovës.

 

Të pranishmit në këtë tubim përkujtues iu drejtuan ish-nxënësit e këtij mësuesi e patriotit të zellshëm. Poashtu foli edhe kryetari i Kuvendit komunal të Gjakovës Açif Shehu, i cili theksoi se Gaspër Karaqi ishte i pathyeshëm dhe konsekuent betimit të fjalës së dhënë.

 

 

Banorët e trevës së Rugovës kundërshtojnë Projektligjin mbi Parkun Nacional Bjeshkët e Nemuna

 

Pejë, 29 janar 2004 - Forumi i Intelektualëve të Rugovës ka organizuar dje një debat lidhur me projektligjin mbi Parkun Nacional Bjeshkët e Nemuna, ku morën pjesë banorë të shumtë të trevës së Rugovës si dhe krerët e Kuvendit komunal të Pejës. Edhe pse është përkrahur në parim projektligji për Parkun kombëtar Bjeshkët e Nemuna, ai ka shkaktuar shqetësime të mëdha në mesin e banorëve të trevës së Rugovës.

 

Në këtë debat banorët e kësaj treve unanimisht ishin kundër këtij projektligji, ngase siç theksuan ata frikohen se do t'i humbin pronat e tyre. Kryetari i Forumit të Intelektualëve të Rugovës, Hajdar Mekaj tha se banorët e rajonit të Rugovës janë të shqetësuar nga projektligji në fjalë, i cili i cënon interesat e banorëve të Rugovës, përkatësisht cënon pronat private.

Kryetari i komunës së Pejës Ali Lajçi tha se kjo është një nismë nga e cila nuk duhet shqetësuar sepse për këtë projektligj do të debatohet në komisionet parlamentare të cilat do të punojnë gjatë derisa ai të miratohet në Parlamentin e Kosovës. Lidhur me këtë çështje do të debatohet edhe në Asamblenë komunale të Pejës.

 

 

Gjilan: Ulje e ndjeshme e shkallës së natalitetit

 

Gjilan, 29 janar 2004 - Në bazë të një hulumtimi që kanë bërë mjekët e gjinekologjisë në Gjilan, shihet se gjatë katër viteve të fundit ka patur një ulje të ndjeshme të shkallës së natalitetit.

 

Dr. Shaban Rexhepi, shef i repartit të gjinekologjisë në spitalin rajonal të Gjilanit, gjatë një prezentimi të punës së këtij institucioni për vitin 2003, që ka bërë sot në një seminar, ku kanë marrë pjesë edhe specialistët e kësaj fushe nga Kroacia, dr. Ante Dragançiq, dr. Jelena Polak, dr. Shefqet Luli nga Prishtina si dhe pjesëmarrës të tjerë, tha se gjatë katër viteve të fundit këtu kanë lindur 13 mijë e 881 fëmijë.

Sipas dr. Rexhepit, personeli i këtij reparti vitin që shkoi ka kryer mbi 8 mijë shërbime të ndryshme mjekësore. Gjatë po të njëjtit vit, në këtë repart kanë lindur 2.872 nëna, kurse mortaliteti ka qenë 22,4 promila.

Dr. Ante Draginçiq dhe dr. Jelena Polak kanë mbajtur një ligjëratë për mjekët e Gjilanit dhe i kanë njohur këta me përvojën e tyre në Kroaci. Ata pohuan se janë të kënaqur me rezultatet që janë arritur nga kolegët e gjinekologjisë në spitalin e Gjilanit, ku lindin shumë gra edhe nga rajoni i Preshevës dhe Bujanocit.

 

 

Burim Demiri fitues i çmimit të parë në "Fest Flaka 2004"

 

Gjilan, 29 janar 2004 - Manifestimi "Flaka e Janarit 2004", ka vazhduar mbrëmë me programin "Fest Flaka", në të cilin me interpretimet e tyre në zhanrin e muzikës së lehtë dhe atë popullore janë paraqitur 17 solistë nga Anamorava.

Pas interpretimit të shtatmbëdhjetë këngëve, të cilat janë përcjellë nga Estrada muzikore e qytetit, juria ka zgjedhur më të mirët.

Burim Demiri, me këngën "Prej zemanit të djalërisë", ka fituar çmimin e parë për interpretim më të sukseshëm, derisa çmimin e dytë e ndanë solistët Rexhep Jashari dhe Remzi Leka, kurse tretin - Xhelal Ramadani dhe Avdi Latifi.

Manifestimi "Flaka e Janarit 2004" do të përmbyllet me orën e madhe letrare, si dhe ndarjen e çmimeve të konkursit shpërblyes, nesër më 30 janar 2004.

 

 

Po i zhvillon punimet seanca e Kuvendit të Kosovës

 

Prishtinë, 29 janar 2004 - Sot po i zhvillon punimet seanca e rregullt Kuvendit të Kosovës, ku në rend dite ka shqyrtimin e dytë të tri projektligjeve dhe shqyrtimin e parë të një projektligji.

Fillmisht që debat është zhvilluar rreth procedurës së shqyrtimit të dytë të Projektligjit për Odën Ekonomike të Kosovës, meqenëse pati mospajtime mes deputetëve të PDK-së dhe rekomandimeve të Komisionit për ekonomi dhe financa. Deputetët e PDK Bedri Selmani e Arsim Bajrami kundërshtaun qëndrimet e Komisionit përkatës, ndërkohë që ato i mbrojti Fatmir Rexhepi, anëtar i komisionit.

Rreth këtij projektligji disa sqarime të shkurta bëri edhe ministri i Ekonomisë dhe Financave Ali Sadria, i cili tha se nga ana e Qeverisë Kuvendit i është përcjellë vetëm një variant i këtij propjektligji, ndonëse ekzistojnë dy variante, duke kërkuar sqarime se pse nuk është bërë kjo.

Ndryshe, deputetët kërkuan që të shqyrtohen të gjitha amandamentet e arritura ndaj këtij projektligji.

 

 

Programi i LDK-së u hap perspektivë të rinjve

 

Prishtinë, 29 janar 2004 - Në një takim të Kryesisë së Degës IV të LDK-së në Prishtinë u diskutua kidhur me aktivitetin e saj e cila përfshin pjesën dërmuese të kryeqytetit të Kosovës. Kryetari i kësaj dege Shasivar Sadiku tha se, falë organizimit të mirë të LDK-së në përgjithësi, ajo ka mbështetje të fuqishme nga qytetarët, e në veçanti nga anëtarësia.

 

Ndërkaq, diskutuesit e tjerë kërkuan një trajtim më të angazhuar të institucioneve të Kosovës lidhur me hapjen e vendeve të reja të punës, si edhe me fatin e sistemit elektroenergjetik të Kosovës dhe privatizimin në përgjithësi.

Duke folur në këtë takim, anëtari i Kryesisë qendrore, Dr.Alush Gashi, pasi mbështeti angazhimin e kësaj Dege për organizim funksional, theksoi përkushtimin për zbatimin e Programit të partisë, që sipas tij, padyshim është më i miri nga të gjitha partitë politike.

 

Gashi u angazhua për përmirësimin e cilsisë së jetës për të gjithë qytetarët e Kosovës dhe shtoi se në këtë pikëpamje Programi i LDK-së u hap perspektivë të rinjve dhe kjo është arsyeja e interesimit të shtuar për LDK-në dhe për anëtarësim në të.

Dr.Gashi porositi të pranishmit që të përmbahen nga provokimet e të papërgjeshmëve, ngase qytetarët e Kosovës kanë përvojë me njerëzit e tillë, të cilët, siç tha, në synimet e tyre do të dështojnë.

 

 

Komisioni parlamentar takohet me familjarët e të zhdukurve serbë

 

Prishtinë, 29 janar 2004 - Komisioni parlamentar për të zhdukurit ka pasur një takim me familjarët e të zhdukurve serbë gjatë vitit 1998. Familjarët serbë kanë theksuar se në Kosovë ekzistojnë kampe në të cilat mbahen të afërmit e tyre. Udhëheqësja e komisionit për të zhdukur Flora Bronvina u shpreh se ky komision nuk ka të dhëna për ekzistimin e ndonjë kampi të atillë.

 

Kjo ishte atmosfera në të cilën u zhvillua takimi midis familjarëve të të zhdukurve serb në Kosovë dhe komisionit parlametar për të zhdukur. Familjarët e serbëve të zhdukur mendonin se komisioni paralmetar i Kosovës i ka të gjitha kopetencat dhe mund t'i gjejë të afërmit e tyre, ngase, siç pohonin ata, KFORI u ka thënë t'i drejtohen këtij komisioni.

 

Ndërsa përfaqësuesja e komisionit parlamentar për të zhdukurit Flora Brovina tha se këtë të drejtë e kanë institucionet ndërkombëtare në Kosovë.

Familjarët e serbëve të zhdukur insistonin që të afërmit e tyre të gjenden të gjall, me pretekstin se udhëheqësit e Institucioneve të Kosovës e dijnë ku gjenden ata. Komentet e këtilla të familjarëve serb zgjatën debatin për dy ore.

 

Ndërkohë zonja Brovina dhe anëtarët tjerë të Komisonit parlametar për të zhdukurit u sqaruan disa herë se edhe nënat shqiptare sikurse ato kërkojnë të afërmit e tyre që janë të zhdukur. Ata kërkuan nga serbet që nëse kanë informacione për shqiptarët e zhdukur t'i paraqesin ato tek komisioni për të zhdukur. Familjarët e serbëve të zhdukur kanë kërkuar të takohen edhe me kryeparlamentarin Daci.

 

 

Në Gjykatën Themelore të Shkupit vazhdoi gjykimi kundër 10 shqiptarëve nga Maqedonia dhe Kosova

 

Shkup, 29 janar 2004 - Në Gjykatën Themelore të Shkupit ka filluar procesi gjyqësor kundër 10 shqiptarëve, tre prej të cilëve janë nga Kosova, ndërkaq shtatë të tjerë janë nga rrethi i Tetovës dhe Gostivarit. Ata akuzohen për vepra të rënda penale, për rrëmbimin e një grupi të qytetarëve maqedonas gjatë vitit 2002 në rrugën Tetovë - Gostivar.

Sipas Gjykatës këtë akt të akuzuarit e kanë kryer si pjesëtarë të Armatës Kombëtare Shqiptare. Por dëshmitarët në seancën e djeshme mohuan të kishin parë të akuzuarit me emblemë të AKSH-së.

 

Në këtë seancë gjyqësore ishin të pranishëm vetëm Ferit Zeqiri, Muhamet Musliu dhe dy kushërinjtë Bedri dhe Nezet Ramaj nga fshati Uçë i Istogut të Kosovës, ndërkaq gjashtë të akuzuarit të tjerë edhe mëtutje ndodhen në arrati.

Seanca tjetër gjyqësore u caktua më 16 shkurt të këtij viti.

 

 

Komiteti maqedonas i Helsinikit pohon se në vitin e kaluar nuk është realizua asnjë premtim i pushtetit

 

Shkup, 29 janar 2004 - Raporti i Komitetit maqedonas të Helsinikit për të Drejtat e Njeriut thekson se në vitin e kaluar nuk është realizuar asnjë premtim i deklaruar i pushtetit maqedonas në fushën e përmirësimit të gjendjes ekonomike dhe të sigurisë, standardit jetësor.

 

Ky asociacion ka vlerësuar se në Maqedoni ka partizim të strukturës shtetërore, zhvillim të etnodemokracisë, në vend të demokracisë qytetare dhe mosfunskionim të shtetit ligjor. Po ashtu sipas Komitetit të Helsinkit nuk është bërë hap pozitiv në përmirësimin e marrëdhënieve ndëretnike në Maqedoni.

 

 

Dhjetë veta të vrarë në një sulm vetëvrasës në Jerusalem

 

Jerusalem, 29 janar 2004 - Të paktën dhjetë persona janë vrarë në një sulm vetëvrasës me bombë mbi një autobus në Jerusalem. Shpërthimi ndodhi në afërsi të rezidencës zyrtare të kryeministrit izraelit, Ariel Sharon. Policia thotë se janë plagosur shumë të tjerë.

Dëshmitarët thonë se shpërthimi shkatërroi autobusin.

Pjesë të trupit të të vrarëve janë shpërndarë gjithandej rrugës.

Sulmi i fundit me bombë në Izrael u krye një muaj më parë në Tel Aviv. Në atë sulm u vranë katër veta.

 

 

Ish-kryeinspektori amerikan i armëve bëri thirrje për një hetim të pavarur

 

Uashington, 29 janar 2004 - Duke dëshmuar të mërkurën para Komisionit të Senatit për shërbimet e armatosura, ish-kryeinspektori amerikan i armëve në Irak Dejvid Kej fajësoi gabimet e agjencive të zbulimit për dështimin që të gjendeshin armë të shkatërrimit në masë.

Kej tha se nuk ka gjetur armë të tilla në Irak, megjithëse ai dhe një numër qeverish, përfshirë edhe Shtetet e Bashkuara, besonin se këto armë ekzistonion.

Administrata e presidentit Bush kishte cituar agjencitë e zbulimi, që thoshin se Iraku kishte armë të tilla, si arsyen kryesore për fillimin e luftës.

Zoti Kej mbështeti thirrjet e demokratëve për një hetim të pavarur lidhur me punën e agjencive të zbulimit para fillimit të luftës.

 

 

Takim Bush-Erdohan në Shtëpinë e Bardhë

 

Uashington, 29 janar 2004 - Presidenti amerikan Xhorxh Bush e siguroi kryeministrin e Turqisë Rexhep Taip Erdohan se Shtetet e Bashkuara dëshirojnë që Iraku të qendrojë i paprekur si territor, megjithë kërkesat e kurdëve për më shumë autonomi.

Dy udhëheqësit u takuan të mërkurën në Shtëpinë e Bardhë për të diskutuar mbi Irakun, Qipron dhe çështje të tjera. Presidenti Bush tha se po e priste zotin Erdohan si mik dhe vuri në dukje se Turqia dhe Amerika e kuptojnë rëndësinë e luftës kundër terrorizmit.

Zoti Erdohan ka thënë se Turqia është e shqetësuar nga thirrjet e kurdëve irakianë për më shumë autonomi. Kryeministri turk u shpreh pas takimit me Presidentin Bush se Shtetet e Bashkuara dhe Turqia kanë pikëpamje të ngjashme lidhur me atë që ai e quajti "partneritet strategjik" për rindërtimin e Irakut.

 

 

Sekretari i ri i Përgjithshëm i NATO-s bën vizitën e parë në SHBA

 

Bruksel, 29 janar 2004 - Sekretari i ri i Përgjithshëm i NATO-s, Jap de Hop Sheffer, bën të enjten vizitën e tij të parë në Shtetet e Bashkuara që prej ardhjes në këtë detyrë.

Gjatë vizitës së tij 2 ditëshe në Uashington, Sheffer do të zhvillojë bisedime me presidentin Bush, sekretarin amerikan të Shtetit Kolin Pauell dhe me sekretarin e mbrojtjes Donald Ramsfeld. Bisedimet pritet të përqëndrohen në planet e aleancës për t=i shtrirë misionet paqëruajtëse në Afganistan si dhe në një propozim të Shteteve të Bashkuara që NATO-ja të dërgojë trupa në Irak.

 

 

Kryetari i kompanisë së BBC-së dha dorëheqje

 

Londër, 29 janar 2004 - Guvernatorët e BBC-së do të takohen sot në një atmosferë krize pasi kryetari i Korporatës, Gevin Dejvis, dha dorëheqje.

Ai u largua pasi korporata iu nënshtrua kritikave të ashpra në një raport mbi vdekjen e dr. Devid Kelit, një shkencëtari të qeverisë, i cili me gjasë kreu vetëvrasje pasi dha informacione vitin e kaluar rreth armëve të Irakut.

Raporti, që çoi drejt dorëheqjes së zotit Dejvis, u botua nga ish-gjykatësi Lordi Haton
Të gjitha shikimet janë kthyer nga BBC-ja për të parë nëse dorëheqje të tjera do të pasojnë atë të kryetarit, Gevin Dejvis. Bordi i Guvernatorëve të BBC-së, u takua mbrëmë vonë dhe do të takohet sërish sot për të vlerësuar zgjidhjen e tij.

 

 

Shkëmbim të burgosurish Hezballah-Izrael

 

Tel Avin, 29 janar 2004 - Dy aeroplanë ndodhen në rrugë e sipër për në Gjermani nga Lindja e Mesme, në kuadër të shkëmbimit të të burgosurve ndërmjet Izraelit dhe grupit guerilas libanez, Hezbollah.

Një nga aeroplanët la Beirutin duke pasur në bord biznesmenin e liruar izraelit dhe eshtrat e tre ushtarëve izraelitë, pasi militantët ia dorëzuan ato ndërmjetësit gjerman.

Aeroplani tjetër është në rrugë e sipër nga Izraeli dhe në të ndodhet grupi prej 30 të burgosurish arabë dhe një shtetasi gjerman, që u liruan nga burgu i Tel Avivit.

Sipas marrëveshjes, Izraeli pritet të lirojë më shumë se 400 militantë të burgosur arabë.

 

 

Të paktën 19 imigrantë janë zhdukur në Detin Egje

 

Athinë, 29 janar 2004 - Të paktën 19 imigrantë janë zhdukur të enjtën pasi që anija me 45 veta u përmbyt në detin Egje, njoftuan mediat greke.

Ndërkohë, 26 imigrantë janë përballur me dallgët e detit duke tentuar të notojnë deri në ishullin Petalia. Anija u fundos në detin e shqetësuar në rajonin Dyert e Karistout, në jug të ishullit Evia. Helikopterët dhe anijet shpëtimtare janë vënë në kërkim të të zhdukurve.

 

 

Në një seri sulmesh është vrarë një pjesëtar i forcave irakiane

 

Kirkuk, 29 janar 2004 - Në një seri sulmesh të enjtën është vrarë një pjesëtar i forcave irakiane të sigurimit, ndërkaq janë plagosur 13 të tjerë.

Në një sulm me granata në pikën e kontrollit afër Kirkukut, në veri të Irakut, është vrarë pjesëtari i mbrojtjes civile irakiane, njofton Rojter.

Në një sulm në një patrullë policore në Bakuba, janë plagosur dhjetë veta, dy prej tyre rëndë.
Në Basra, qytet që kontrollohet nga forcat britanike, në një shpërthim të bombës në rrugë janë plagosur tre kalimtarë irakianë.

 

 

Njëmbëdhjetë veta janë plagosur në një shpërthim në qytetin Bakuba

 

Bakuba, 29 janar 2004 - Njëmbëdhjetë veta janë plagosur sot në një shpërthim që ndodhi ndaj një patrulle policore në qytetin Bakuba, 60 km në veri të Bagdadit. Ishin sulmuar pjesëtarët e mbrojtjes civile irakiane gjatë një patrullimi të mëngjesit. Por, për momentin nuk dihet se çfarë e ka shkaktuar shpërthimin.

 

 

Sot në Bruksel Kofin Ananit iu dorëzua Çmimi Saharov

 

Bruksel, 29 janar 2004 - Sekretarit të përgjithshëm të OKB-së Kofi Anan sot në një ceremoni të zhvilluar në Parlamentin Evropian në Bruksel, iu dorëzua Çmimi Saharov.

Sekretari i përgjithshëm i OKB-së është nderuar me këtë çmim në shenjë nderimi për viktimat e sulmit terrorist në selinë e misionit të OKB-së në Bagdad, në vitin e kaluar, kur vdiq tragjikisht edhe Serzho Viera de Melo, i dërguari i OKB-së për Irak.

Përndryshe në fjalimin e tij, Kofi Anan foli për siç e quajti krizën e heshtur të të drejtave të njeriut, të cilën e cilsoi turp për botën e sotme. Anan me këtë rast bëri thirrje për përmirësimin e politikës ndaj emigrantëve dhe refugjatëve.

Parlamenti Evropian Çmimin Saharov e ndan për ato personalitete të cilat kanë kontribuar për paqe dhe të drejtat e njeriut në botë.

Në ceremoninë e sotme mori pjesë edhe Presidenti i Kosovës, Ibrahim Rugova, i cili është një nga laureatët e këtij çmimi prestiogjioz.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |