|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Dy lajme nga Podujeva

Podujevë: Qytetin dhe disa fshatra i përfshiu mot i lig dhe vërshime

		Podujevë, 29 janar 2004 (TN) – Mbrëmë Podujevën e përfshiu një mot i lig i cili shkaktoi vërshime në qytet dhe disa fshatra. Drejtoria për Mbrojtje Civile dhe Emergjencë në bashkëpunim me SHPK-në, Shërbimin e zjarrfikësve dhe TMK-në kanë intervenuar në disa raste kur uji kishte hyrë në oborre dhe shtëpi të disa dhjetra familjeve. “Në qytet kemi intervenuar në disa lokale dhe shtëpi ku kemi bërë thithjen e ujit, kurse në fshatra me ndihmën e NPKSH-së kemi hapur vija për të mënjanuar ujin nga oborret”, deklaroi Drejtori i DMCE Fatmir Gashi. KFOR-i çek e sllovak ka interevnuar në bodrumin e stacionit policor në Podujevë, kurse një ekip i TMK-së i Zonës së Pestë që ka intervenuar në fshatin Bradash në familjen 9 anëtarëshe të Faik Hotit, mirëpo dëme materiale nga vërshimet ka pësuar edhe familja 21 anëtarëshe e Rexhep Hotit nga Bradashi.

Sipas njoftimeve në terren probleme me vërshime ka pasur qyteti i Podujevës dhe fshatrat Bradash, Peran, Llapashticë e poshtme, Bellopoja, Tërrnava, një pjesë e Sfeçlës dhe në Batllavë komuniteti ashkali. Në Bellopojë dëme materiale kanë pësuar familjet e Sabri, Ejup, Bedri, Faik, Hasan e Agron Malokut.  Një problem shqetësues për këto lokalitete paraqet uji i puseve i cili aktualisht nuk mund të përdoret për pije, për çka Inspeksioni sanitar rekomandon qytetarët e këtyre fshatrave të vlojnë ujin e pijshëm

Sot pas vizitave të ekipit të DMCE-së drejtori Fatmir Gashi deklaroi se gjendja po stabilizohet dhe se niveli i ujit ka rënë. “Ka ende familje që kërkojnë ndihmë në thithjen e ujit apo në hapjen e vijave të lumenjëve”, tha z. Gashi. Ai njoftoi se DMCE po bën evidentimin e dëmeve si dhe në raste të shumta po u del në ndihmë qytetarëve.

Podujevë: Nisin punimet për asfaltimin e aksit rrugor Lluzhan-Bellopojë-Tërrnavë-Halabak

Podujevë, 29 janar 2004 (TN) – Me një solemnitet rasti, sot në fshatin Bellopojë nisën punimet për asfaltimin e aksit rrugor Lluzhan-Bellopojë-Tërrnavë-Halabak.

Nisjen e punimeve solemnisht e bënë zv. kryetari i komunës së Podujevës Agim Kikaj dhe këshilltari i Ministrit Morina z. Qemajl  Ahmeti. “Rrugët janë si arteriet. Ato do të thonë jetë dhe ky projekt ka rëndësi të veçantë për meset rurale për të ardhmen e tyre dhe ardhmërinë e fëmijëve”, tha ndër të tjera zv. kryetari i komunës Agim Kikaj duke shprehur optimizëm që do të gjenden forma dhe mundësi për vazhdimin e asfaltimit të kësaj rruge deri në fshatin Sharaban të komunës së Prishtinës. 

Sipas zyrtarëve të Drejtorisë për urbanizëm, shërbime publike dhe ambient të Podujevës ky projekt kap vlerën prej 605 mijë euro dhe në të kanë marrë pjesë Ministria e Postelekomunikacionit me 250 mijë euro, komuniteti me 160 mijë dhe komuna me 195 mijë. Projektin për asfaltimin e këtij aksi rrugor do ta realizojë firma “Papenburg & Adriani” nga Sojeva e Ferizajt, kurse afati për kryerjen e punimeve është një muaj e gjysmë.

Në këtë solemnitet morën pjesë edhe Skënder Gashi, këshilltar i Ministrit Morina, Drejtori i urbanizmit Hamdi Jaha, drejtori i DMPD-së Ahmet Ahmeti, biznesmenë dhe qytetarë të shumtë të kësaj ane.