Përmbajtja:

• Kryeparlamentari Daci priti ambasadorin e NATO-s në Shkup

• Kryeministri Rexhepi u ka dhënë përkrahje nënave të të zhdukurve për zbardhjen e fatit të tyre

• Novicki i shkruan kryeministrit Rexhepi në lidhje me trajtimin e personave të mbyllur në Klinikën Psikiatrike

• Ministria e Ekonomisë dhe e Financave ndau dhjetë bursa për studentët e Universitetit Amerikan

• Busek thotë se Pakti i Stabilitetit do ta ndihmojë Kosovën në përmbushjen e standardeve

• Grupi Ndërkombëtar i Krizave: statusi i Kosovës është problemi më i rëndësishëm në Ballkan

• Të rinjtë e Mitrovicës kanë potencial që të ndikojnë pozitivisht në dinamizimin e rrjedhave në vend

• Instituti Gjyqësor i Kosovës organizoi një seminar për njohjen e dy kodeve të reja penale

• Podujevë: Muzeu i Kosovës hapin ekspozitën "Lufta e popullit shqiptar në Kosovë... 1944 B 1945"

• OSBE: Shqipëria të parandalojë kontrabandimin e drogës, trafikimin e njerëzve

• Shqipëria ka nderuar me dekoratën më të lartë Rvin Dervishin që u vra në Irak

• Në Serbi janë marrë në pyetje 65 ekzekutues të drejtpërdrejtë ose pjesëmarrës në vrasjen e civilëve shqiptarë

• Vazhdon greva e arsimtarëve në Maqedoni për të tretën ditë me radhë

• Zbatimi i Marrëveshjes së Ohrit është në fokus të përpjekjeve që Maqedonia të ofrohet drejt BE-së

• Ministri i Drejtësisë së Maqedonisë ka nënshkruar kërkesën për ekstradimin nga Kosova të Xhemail Hyseinit

• Presidenti amerikan ka kërkuar tri kushte për vazhdimin e ndihmës Serbisë

• Në listën e zezë të BE-së do të gjenden 10 persona nga Maqedonia

• Katër të vdekur në Bagdad nga shërthimi i autobombës

• Një ushtar britanik është vrarë në Kabul

• Ushtarët izraelitë kanë vrarë tre palestinezë

• Bler përballon sprovën e pare

• Senatori Kerri fiton në Nju Hempshër

• Dy shpërthime në Irak vriten 6 amerikanë

• Komponentet e programit libian të armëve bërthamore sillen në SHBA

• Ervin Dervishi, ushtari shqiptaro-amerikan që dha humbi jetën në Irak

• Në Itali janë arrestuar me qindra persona dhe janë konfiskuar mijëra kilogramë drogë

• Të paktën tetë palestinezë janë vrarë në Gaza

Kryeparlamentari Daci priti ambasadorin e NATO-s në Shkup

 

Prishtinë, 28 janar 2004 - Kryetari i Kuvendit të Kosovës Nexhat Daci priti sot ambasadorin e NATO-s në Shkup Nikolas Bigman. Kryeparlamentari Daci dhe ambasadori Bigmen biseduan për zhvillimet e fundit në rajon, me theks të veçantë për zhvillimet në Kosovë dhe Maqedoni.

Ambasadori Bigman tha se qëllimi i vizitës së tij ishte që të njoftohej me rrjedhat e situatës në Kosovë. "Çfarëdo që ndodh këtu është shumë e rëndësishme për Maqedoninë sepse këto janë dy vende fqinje dhe do të jenë fqinje të mirë edhe në të ardhmen", tha Bigmn.

Nga ana e tij, Daci theksoi nevojën e një bashkëpunimi edhe më të mirë me Maqedoninë si vend fqinj, ndersa kërkoi nga ambasadori Bigman që NATO-ja të jetë e pranishme në Kosovë edhe për një kohë.

 

 

Kryeministri Rexhepi u ka dhënë përkrahje nënave të të zhdukurve për zbardhjen e fatit të tyre

 

Prishtinë, 28 janar 2004 - Kryeministri i Kosovës, Bajram Rexhepi, në një takim që kishte me grupin e organizatës joqeveritare "Thirrjet e nënave" edhe njëherë ka siguruar ato për përkrahjen dhe për mbështetjen të cilën jep Qeveria për çështjen e të zhdukurve.

 

Zëdhënësja e Qeverisë Mimoza Kusari tha se kjo nuk është brengë vetëm e familjeve të të zhdukurve, por do të jetë brengë dhe dhembje për të gjitha institucionët e Kosovës derisa kjo çështje të mos zgjidhet.

 

 

Novicki i shkruan kryeministrit Rexhepi në lidhje me trajtimin e personave të mbyllur në Klinikën Psikiatrike

 

Prishtinë, 28 janar 2004 - Ombudspersoni i Kosovës Marek Antoni Novicki i ka dërguar një letër kryeministrit të Kosovës Bajram Rexhepi në lidhje me trajtimin e personave të mbyllur në Klinikën Psikiatrike në Prishtinë. Sipas mjekëve që punojnë në klinikë, thotë Novicki, personat e lartpërmendur janë të vendosur në të njejtin repart të klinikës sikur edhe pacientët e rëndomtë psikiatrikë.

 

Ombudspersoni thotë se situata momentale nuk guxon të vazhdojë, ngase siç thonë mjekët, prezenca e pjesëtarëve të armatosur të forcave të sigurimit i shqetëson pacientët e rëndomtë të vendosur në të njejtin repart. Në këto rrethana, thotë ai, është e pamundshme të kryhen analizat e duhura psikiatrike siç janë të urdhëruara nga ana e gjykatave.

Novicki thekson se "kjo situatë në Klinikën Psikiatrike kërkon reagim të menjëhershëm dhe adekuat nga ana e autoriteteve dhe institucioneve përgjegjëse", duke kërkuar nga Qeveria e Kosovës që të ndërmarrë hapa të nevojshëm derisa instituti i ri i mjekësisë ligjore të fillojë së funksionuari, shkruan mes tjerash Novicki në letrën dërguar Kryeministrit Rexhepi.

 

 

Ministria e Ekonomisë dhe e Financave ndau dhjetë bursa për studentët e Universitetit Amerikan

 

Prishtinë, 28 janar 2004 - Ministria e Ekonomisë dhe e Financave ka krijuar fondin për ndarjen e bursave për dhjetë studentë, të cilët do të studiojnë në Universitetin Amerikan në Kosovë.

 

Ministri i Ekonomisë dhe Financave Ali Sadriu ka thënë se ky fond u themelua në ditën kur ish-Presidenti i Shteteve të Bashkuara të Amerikës Bill Klinton kishte vizituar Kosovën. Zgjedhjen e këtyre studentëve të cilët fituan dhjetë bursat e para e ka bërë komisioni i përbërë nga Ministria e Arsimit dhe Universiteti amerikan.

 

 

Busek thotë se Pakti i Stabilitetit do ta ndihmojë Kosovën në përmbushjen e standardeve

 

Prishtinë, 28 janar 2004 - Koordinatori i Paktit të Stabilitetit për Evropën Juglindore, Erhard Busek, pas takimeve në Prishtinë me kryeadministratorin e Kosovës, Hari Holkeri dhe me kryeministrin Bajram Rexhepi, ka theksuar se do ta ndihmojë Kosovën në përmbushjen e standardeve të përcaktuara nga bashkësia ndërkombëtare.

 

Busek vlerësoi se muajve të fundit në fakt ka pasur progres, duke përfshirë këtu edhe Kosovën. Ai ka theksuar se qëllimi kryesor i Paktit të Stabilitetit në punën e tij në Kosovë është që të mos lejohet që Kosova të jetë një vrimë e zezë në Evropë.

 

Busek ka thënë se Pakti do ta ndihmojë Kosovën duke arritur marrëveshje për tregti të lirë me vendet fqinje, mundësinë e nënshkrimit të memorandumi të tregti, të energjisë elektrike në rajon, si dhe përfshirjen e Kosovës në tryezën për luftimin e krimit të organizuar. Pra, Pakti i Stabilitetit ka një varg projektesh dhe në këto hyn edhe Kosova, thotë Busek.

Gjithashtu ai vlerëson se që nga shtatori kur ka qenë për herë të fundit në Kosovë është arritur mjaft progres, duke nënvizuar se kjo mund të quhet një storie e suksesshme që është arritur me përkrahjen e UNMIK-ut.

 

 

Grupi Ndërkombëtar i Krizave: statusi i Kosovës është problemi më i rëndësishëm në Ballkan

 

Bruksel, 28 janar 2004 - Grupi Ndërkombëtar i Krizave konstaton se gjatë këtyre 15 muajve të fundit situata në Maqedoni dhe Bosnje ka njohur përmirësime, ndërkaq në Serbi dhe Shqipëri ajo ka shënuar hapa prapa.

Grupi Ndërkombëtar i Krizave në raportin e saj po ashtu konstaton se zgjidhja e statusit të Kosovës është sot problemi më i rëndësishëm në Ballkan.

 

 

Të rinjtë e Mitrovicës kanë potencial që të ndikojnë pozitivisht në dinamizimin e rrjedhave në vend

 

Mitrovicë, 28 janar 2004 - Dje në Mitrovicë u prezentua projekti "2004 viti i LDK-së - viti juaj", ku u zhvillua një debat i Kryesisë qendrore të FR të LDK-së me të rinjtë e këtij qyteti.

Këtë takim e hapi kryetari i degës i Forumit të Rinisë në Mitrovicë Safet Kamberi, ndërsa të pranishmit më pas i përshëndeti edhe nënkryetari i Kuvendit Komunal të Mitrovicës z. Mursel Ibrahimi.

Kryetari i FR të LDK-së Lulzim Zeneli theksoi se është një rast i veçantë që të debatohet për të gjitha çështjet që i preokupojnë të rinjtë e këtij qyteti. "Kosova ka hyrë në një proces i cili është përcaktues për të ardhmen e saj dhe Mitrovica ka potencial rinor që të ndikojë pozitivisht në dinamizimin e rrjedhave në vend, fakt ky që është argumentuar shumë herë dhe sot po rikonfirmohet", tha z. Zeneli.

 

Ai në vazhdim tha se Kosovës dhe perspektivës së saj i nevojitet një qeverisje stabile dhe efikase, qeveri që me punën e vet do të reflektonte përgjegjësi ndaj qytetarëve të Kosovës.

Të rinjtë e LDK-së kanë barrën dhe përgjegjësinë që të jenë katalizator të këtyreve proceseve.Takimi i sotëm është një rast i mirë të afirmojmë politikat e të rinjëve të LDK-së dhe të përcjellë mesazhin shumë të qartë pro një dinamike më të theksuar në të gjitha proceset në vend, theksoi në fjalën e tij kryetari i FR të LDK-së Lulzim Zeneli.

Në vazhdim nga ana e pjesëmarrësve në debat u shtruan për diskutim një varg çështjesh që janë preokupuese për të rinjtë dhe qytetin e Mitrovices.

Duke u përgjigjur në një pyetje rreth çështjes së Mitrovicës dhe statusit final të Kosovës, Lulzim Zeneli theksoi se sot është më së e qartë se pavarësia e Kosovës është alternativë e vetme dhe se nuk mund të ketë stabilitet dhe perspektive për rajonin jashtë vullnetit politik të popullit të Kosovës dhe se nuk mund të ketë stabilitet pa zgjidhjen e çështjës së Mitrovicës.

Lidhur me aktivitetin e FR të LDK-së dhe planet për të ardhmën në këtë debat informoi nënkryetari i FR të LDK-së,Sejdë Tolaj.

 

 

Instituti Gjyqësor i Kosovës organizoi një seminar për njohjen e dy kodeve të reja penale

 

Prishtinë, 28 janar 2004 - Instituti Gjyqësor i Kosovës ka organizuar një seminar për njohjen e dy kodeve të reja penale të Kosovës: Ligjit penal dhe atij të procedurës penale të Kosovës. Qëllimi i këtij seminari ishte që t'i njoftojë të gjithë ata që janë të përfshirë në gjyqësinë kosovare me risit në dy kodet e reja para se ato të hyjnë në fuqi më 6 prill.

Në këtë seminar u tha se kodi i ri i procedurës penale parasheh një rritje të dukshme të kompetencave të prokurorit publik krahasuar me me ligjin e aplikueshëm e të cilat kryesisht kanë të bëjnë me procedurën e hetimeve.

 

 

Podujevë: Muzeu i Kosovës hapin ekspozitën "Lufta e popullit shqiptar në Kosovë... 1944 B 1945"

 

Podujevë, 28 janar 2004 - Muzeu i Kosovës në bashkëpunim me Drejtorinë për kulturë, rini e sport të Podujevës, sot hapi ekspozitën tematike "Lufta e popullit shqiptar në Kosovë kundër pushtimit serbokomunist, nëntor 1944 B shkurt 1945".

Kjo ekspozitë është e para e këtij lloji që po hapet pas luftës në Podujevë. Kjo ekspozitë përveç fotografive të luftës kombëtare paraqet edhe faktografi historike për një periudhë të cilën disa nga historianët tanë nuk e trajtuan si duhet e që paraqet pjesën më të mirë të historisë kombëtare.

Autori i kësaj ekspozite Mehmet Gjoshi tha se kjo ekspozitë për herë parë është hapur në Muzeun e Kosovës në Prishtinë, pastaj në Skënderaj, Gjakovë dhe kjo është hera e katërt në Podujevë, por mendohet të hapet edhe në komunat tjera.

 

OSBE: Shqipëria të parandalojë kontrabandimin e drogës, trafikimin e njerëzve

Tiranë, 28 janar 2004 - Shqipëria duhet ta reduktojë varfërinë e përhapur në mënyrë që ta parandalojë kontrabandimin e drogës, trafikimin e njerëzve dhe format e tjera të kriminalitetit, ka njoftuar sot Organizata për Siguri dhe Bashkëpunim në Evropë.

Këto komente u bënë në momentin kur qeveria, me ndihmën e ekspertëve të Shteteve të Bashkuara dhe të Italisë po përgatitet ta paraqesë reformën që ka për qëllim ndalimin e trafikimit të njerëzve, terrorizmin dhe krimin e organizuar. Poashtu planifikohet luftimi i korrupsionit në radhët e policisë dhe të zyrtarëve të tjerë.

 

Shqipëria ka nderuar me dekoratën më të lartë Rvin Dervishin që u vra në Irak

Tiranë, 28 janar 2004 - Shqipëria ka nderuar me dekoratën më të lartë një imigrant shqiptar në Shtetet e Bashkuara, që u vra në Irak duke shërbyer në forcat amerikane. Ervin Dervishi, 21-vjeçar, është vrarë të shtunën kur disa sulmues me predhë goditën autblindën e tij.

Zëdhënësi i qeverisë shqiptare, Aldrin Dalipi ka thënë se Ervin Dervishi është shpallur martir i kombit. Ervin Dervishi kishte shkuar në SHBA në vitin 1999, pasi kishte fituar lotarinë imigruese, ndërsa shtetas amerikan u bë kur iu bashkua ushtrisë së Shteteve të Bashkuara.

 

Në Serbi janë marrë në pyetje 65 ekzekutues të drejtpërdrejtë ose pjesëmarrës në vrasjen e civilëve shqiptarë

 

Beograd, 28 janar 2004 - Një dikaster për krimet e luftës në Ministrinë e Brendshme të Serbisë deri më tash ka marrë në pyetje 65 persona të cilët janë ekzekutues të drejtëpërdrejtë apo pjesëmarrës në vrasjen e civilëve shqiptarë, kufomat e të cilëve u zbuluan në varrezën masive në Batajnicë.

 

Sipas prokurorisë në 707 kufoma të zbuluara në Batajnicë afër Beogradit deri tash janë identifikuar 186, ndërkaq familjeve në Kosovë iu dorëzuan 120 trupa të pajetë.

  

 

Vazhdon greva e arsimtarëve në Maqedoni për të tretën ditë me radhë

 

Shkup, 28 janar 2004 - Në Maqedoni për të tretën ditë me radhë po vazhdon greva e arsimtqrëve dhe e punonjësve të kulturës të pakënaqur me rrogat e vogla.

Sindikata thotë se në grevë janë përfshirë 35 mijë mësues dhe personel tjetër arsimor në 558 institucione shtetërore, në të cilat rrogat mujore janë 150 dollarë.

Njoftohet se qeveria dhe sindikata nuk kanë arritur ende ndonjë marrëveshje për ndërprerjen e grevës.

 

 

Zbatimi i Marrëveshjes së Ohrit është në fokus të përpjekjeve që Maqedonia të ofrohet drejt BE-së

 

Shkup, 28 janar 2004 - Përfaqësuesi i posaçëm i Bashkimit Evropian në Maqedoni Aleksis Bruns ka thënë se zbatimi i Marrëveshjes së Ohrit është në fokus të përpjekjeve të vendit për t'u afruar drejt Bashkimit Evropian.

 

Komentimi i përfaqësuesit Bruns erdhi me rastin e vendimit të djeshëm të BE-së për t'i vënë në listën e zezë disa politikanë dhe gazetarë të cilët e pengojnë Marrëveshjen paqësore të Ohrit. Bruns së shpejti largohet nga Maqedonia.

Ndryshe, Bashkimi Evropian ka emëruar përfaqësues të vetin të posaçëm në Maqedoni Soren Peterson, i cili ishte në poste të larta në misionet e Komesariatit të Lartë për Refugjatë në Ballkan.

 

Pas luftës në Kosovë ai kishte qëndrim kritik për qeveritë e vendeve të NATO-s, duke i akuzuar ato se nuk po financonin sa e si duhet për krijimin e kushteve për jetesë të shqiptarëve në Kosovën e pasluftës.

 

 

Ministri i Drejtësisë së Maqedonisë ka nënshkruar kërkesën për ekstradimin nga Kosova të Xhemail Hyseinit

 

Shkup, 28 janar 2004 - Ministri i Drejtësisë së Maqedonisë Hixhet Memeti e ka nënshkruar kërkesën për ekstradimin nga Kosova të Xhemail Hyseinit, të njohur si komandant "Xhejmi She".

 

Kjo kërkesë nëpërmjet Ministrisë së Jashtme të këtij vendi dhe rrugëve diplomatike do t'i dorëzohet administratës së UNMIK-ut, ndërkaq ekstradimi i Hyseinit nga Kosova për në Maqedoni do të bëhet nëpërmjet Interpolit. Xhemail Hyseini nga Kumanova akuzohet nga gjykatat maqedonase për shpërthimet e ndodhura kohë më parë në qendër të Kumanovës dhe në hekurudhën që e lidh Shkupin me Beogradin.

 

 

Presidenti amerikan ka kërkuar tri kushte për vazhdimin e ndihmës Serbisë

 

Uashington, 26 janar - Presidenti amerikan Xhorxh Bushk ka kërkuar tri kushte për vazhdimin e ndihmës Serbisë. Kushti i parë është bashkëpunimi me Gjykatën Ndërkombëtare Penale me ish-Jugosllavinë, përfshirë marrjen e të gjitha masave të mundshme për arrestimin dhe transferimin në Hagë të Ratko Mlladiqit.

 

Kushti i dytë është marrja e hapave në harmoni më Marrëveshjen e Dejtonit për përfundimin e ndihmës financiare, politike, të sigurisë e ndihmave të tjera të Serbisë, për institucionet e ndara të Republikës serbe në Bosnje e Hergecogvinë.

 

Ndërkaq kushti i tretë është marrja e hapave për zbatimin e politikës e cila shpreh respektimin e të drejtave të pakicave dhe sundimin e ligjit, duke përfshirë edhe lirimin e të burgosurëve në burgjet e Serbisë.

 

 

Në listën e zezë të BE-së do të gjenden 10 persona nga Maqedonia

 

Bruksel, 28 janar 2004 - Burimet e Bashkimit Evropian thonë se në listën e zezë të BE-së do të ndodhen rreth 10 persona nga Maqedonia dhe theksojnë se ata vërtet janë njerëz të "këqinj dhe negativë". Këto burime kanë theksuar se për ata që përcjellin situatën në Maqedoni, kur të dëgjojnë për për cilët emra është fjala nuk do të ketë kurrëfarë befasie.

 

Me këtë BE-ja mendon se u ka bërë të qartë atyre që pengojnë zhvillimin demokratik të Maqedonisë dhe zbatimin e Marrëveshjes së Ohrit se nuk do të tolerohen.

 

Madje, zyrtarët e BE-së thanë se shumë prej personave që janë në atë listë, kanë lidhje të ngushta me krimin e organizuar dhe me rrjetin e mafiozëve, gjithnjë duke insistuar që të mos përmendin emra për derisa të mos kryhet e gjithë procedura e adaptimit të kësaj liste të zezë, e cila do të bëhet publike në mbledhjen e parë të ministrave të jashtëm të BE-së në Bruksel.

 

 

Katër të vdekur në Bagdad nga shërthimi i autobombës

 

Bagdad, 28 janar 2004 - Nga shpërthimi i një autobombe sot para një hoteli në qendër të Bagdadit, i cili frekuentohet nga perëndimorët, janë vrarë katër veta dhe është shkatërruar pjesërisht ndërtesa trikatëshe, njofton AP.

Komanda e ushtrisë amerikane dhe policia irakiane njoftuan se janë vrarë tre irakianë. Të paktën 17 veta të plagosur janë transferuar në spitale. Recepcionisti i hotelit tha se është vrarë edhe një mysafir nga Afrika Jugore.

 

 

Një ushtar britanik është vrarë në Kabul

 

Kabul, 28 janar 2004 - Një ushtar britanik është vrarë dhe të tre të tjerë janë plagosur ngë një sulm të sotëm vetëvrasës në Kabul, njofton Rojter.

Një anëtar i milicisë talibane është përgjegjës për sulmin kundër paqeruajtësve të NATO-s, i cili u bë vetëm një ditë pasi një ushtar kanadez dhe një civil afgan u vranë në një sulm tjetër vetëvrasës poashtu në Kabul.

 

 

Ushtarët izraelitë kanë vrarë tre palestinezë

 

Gaza, 28 janar 2004 - Ushtarët izraelitë sot kanë vrarë tre palestinezë gjqtë një konflikti që shpërtheu kur tanket hynë në paralagjen e Gazës, bënë të ditur mjekët palestinezë.

Burimet ushtarake izraelite njoftuan se palestinezët kishin hapur zjarr ndaj një kolonie hebraike në atë rajon.

 

 

Bler përballon sprovën e pare

 

Londër, 28 janar 2004 - Kryeministri britanik, Toni Bler, mbijetoi të martën testin e parë, në atë që thuhet se është java më e vështirë e tij. Ai mbijetoi një votim në parlament ku shumë deputetë të partisë së tij votuan kundër. Votimi për masat e reja në financimin e arsimit të lartë kaloi vetëm me 5 vota më shumë.

Partia Laburiste në pushtet ka shumicën prej më shumë se 160 votash.

 

 

Senatori Kerri fiton në Nju Hempshër

 

Nju Hempshër, 28 janar 2004 - Senatori Xhon Kerri fitoi zgjedhjet paraprake në Nju Hempshër, fitorja e tij e dytë me radhë në garën për emrimin si kandidat i Partisë Demokratike për president.

Pas numrimit të votave nga 80 për qind e zonave elektorale, Senatori i shtetit Maseçusets kryeson me 38 përqind, i pasuar nga ish guvernatori Houard Din me 26 përqind.

Gjenerali në pension Uesli Klark dhe senatori Xhon Eduards i Karolinë së Veriut janë mbërthyer në një garë të fortë për vend të tretë. Senatori Xhozef Liberman i shtetit Konektikat u radhit i pesti, por ai u tha simpatizantëve të tij se do ta vazhdojë fushatën.

 

 

Dy shpërthime në Irak vriten 6 amerikanë

 

Bagdad, 28 janar 2004 - Në Irak, 6 ushtarë amerikanë mbeten të vrarë të martën në sulme guerile, ndërkohë që një ekip i Kombeve të Bashkuara arriti në Bagdad për të vlerësuar gjendjen për mundërsinë e kthimit të personelit të saj ndërkombëtar.

Zyrtarë të Pentagonit thonë se tre ushtarët humbën jetën të martën vonë nga shpërthimi i një bombe në anë të rrugës në afërsi të kryeqytetit irakian. Po dje, tre ushtarë të tjerë amerikanë u vranë kur makina e tyre u godit nga një shpërthim i fuqishëm në Khaldija.

Rrjeti televiziv CNN me bazë në Amerikë tha se dy punonjës të tij u vranë dhe një tjetër u plagos të martën në një pritë jashtë Bagdadit.

 

 

Komponentet e programit libian të armëve bërthamore sillen në SHBA

 

Tripoli, 28 janar 2004 - Administrata e Presidentit Bush thotë se komponentet e programit libian të armëve bërthamore janë transferuar në një vend të sigurt në Shtetet e Bashkuara. Zëdhënësi i Shtëpisë së Bardhë, Skot Mekllellen, e bëri të ditur të martën arritjen e komponenteve.

Ai e cilësoi këtë zhvillim si një shenjë të përparimit të Libisë drejt zbatimit të marrëveshjes me Shtetet e Bashkuara dhe Britaninë për të asgjësuar armët e saj të ndaluara.

 

 

Ervin Dervishi, ushtari shqiptaro-amerikan që dha humbi jetën në Irak

 

Uashington, 28 janar 2004 - Departamenti amerikan i Mbrojtjes njoftoi për vdekjen e ushtarit Ervin Dervishi në Irak. Ervin Dervishi, 22 vjeç, me origjinë nga Shqipëria, humbi jetën të shtunën, kur automjeti me të cilin po udhëtonte ai, u sulmua në qytetin Baji në Irak.

 

Ervini shërbente në Irak me divizionin e katërt të këmbësorisë. Ervini emigroi në Shtetet e Bashkuara në vitin 1999 së bashku me familjen, e cila është vendosur në qytetin Forth Worth të Teksasit.

 

Në Itali janë arrestuar me qindra persona dhe janë konfiskuar mijëra kilogramë drogë

 

Romë, 28 janar 2004 - Në Itali janë arrestuar me qindra, ndërkaq në vendet e tjera mbi 40 persona dhe janë konfiskuar mijëra kilogramë drogë në aksionin e madh ndërkombëtar kundër tregtisë me drogë, u bë e ditur sot në Romë.

Ky është vetëm bilanci i parë i operacionit të quajtur "Decollo" (Fluturimi), me të cilin është ndaluar tregtia e vlefshme me miliona dollarë që ka shërbyer për financimin e grupeve paramilitare në Kolumbi.

 

 

Të paktën tetë palestinezë janë vrarë në Gaza

 

Gaza, 28 janar 2004 - Të paktën tetë palestinezë janë vrarë gjatë një ndërhyrjeje të ushtrisë izraelite në Rripin e Gazës.

Dëshmitarët thanë se ishte dëgjuar një shpërthim i zhurmshëm, që ishte pasuar nga një këmbim i ashpër zjarri armësh e mortajash, kur izraelitët po kryenin një operacion me tanke dhe buldozerë.

Ushtria izraelite tha se po bënte përpjekje të shkatërronte një celulë militante palestineze në lagjen al-Zeitun në Gaza City, të akuzuar se ka kryer sulme kundër një vendbanimi hebre në Netzarim.

Punonjës lokalë të mjekësisë thanë se luftimet ishin më të rëndat në Gazë për më shumë se një muaj.

Armata izraelite ka bërë të ditur se trupat e saj u janë përgjigjur sulmeve të militantëve palestinezë.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |