|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Dy lajme nga Podujeva

Podujevë: Bordi Drejtues mori vendime që përparojnë projektin turistik të Liqenit të Batllavës

Podujevë, 28 janar 2004 (TN) –  Bordi Drejtues për zhvillimin e rajonit të Batllavës i kryesuar nga kryetari i këtij bordi dhe kryetar i komunës Agim Veliu në takimin e sotëm mori vendime të rëndësishme që përparojnë projektin për zhvillimin turistik dhe ekonomik të këtij rajoni.

Bordi drejtues mori vendim që për sezonën turistike të shpallet tenderi për 40 kiosqe që do të mund të vendosen në Liqenin e Batllavës në bazë të kritereve të përcaktuara ku përparësi do të kenë vendorët. Në lidhje me këtë u formua Komisioni 5 anëtarësh që do të vendosë për kriteret dhe lejet për këto kiosqe në bazë të Rregulloreve të miratuara nga Kuvendi komunal. 

“Ndër vendimet  kryesore që mori Bordi drejtues janë hapja e sezonit më 24 prill, dhënja e lejeve apo licencave për një numër të caktuar të kiosqeve në bazë të kritereve, tatimimi i aktiviteteve që shtojnë buxhetin për investime të mëtejshme, krijimi i konceptit për heqjen e mbeturinave me qëllim të ruajtjes së ambientit dhe veçanërisht të ujit të pijshëm”, tha kryetari i Bordit Agim Veliu.

Ndërkaq zyrtari i Qeverisë së Tirolit të Austrisë z. Logar tha se ka përparime në krahasim me vitin e kaluar, por se është menduar që projekti do të ecë me hapa më të mëdhenj. Kurse menagjeri i Info Qendrës Agim Abdullahu tha se qëllimi i projektit nuk është rritja e buxhetit financiar, por ndryshimet më të mëdha në rajonin e Orllanit me rrethinë, përmirësimi i ofertës për vizitorët, përmirësimi i kushteve të jetës së vendasve, krijimi i vendeve të reja të punës për banorët lokalë, etj. me qëllim të zhvillimit ekonomik dhe turistik të rajonit të Liqenit të Batllavës.

Në takim u diskutua poashtu edhe për përmirësimin e infrastrukturës dhe kushteve në plazhe, ndërtimin e fushave sportive, platformave notuese, organizimin e shpëtimtarëve, kalendarin dhe aktivitetet lokale e regjionale, organizimet e ndryshme, etj.

___________

Podujevë: Muzeu i Kosovës dhe DRKS hapin ekspozitën “Lufta e popullit shqiptar në Kosovë kundër pushtimit serbokomunist, nëntor 1944 – shkurt 1945”

Podujevë, 28 janar 2004 (TN) - Muzeu i Kosovës në bashkëpunim me Drejtorinë për kulturë, rini e sport të Podujevës, sot hapi ekspozitën tematike “Lufta e popullit shqiptar në Kosovë kundër pushtimit serbokomunist, nëntor 1944 – shkurt 1945”. Duke hapur ekspozitën, kryetari i komunës së Podujevës Agim Veliu tha se ekspozita e sotme paraqet ngjarje në planin kulturor, ndërkaq si qasje e dokument paraqet dëshmi të orientimit të drejtë të shkencës. “Ngjarjet e situatat e njeriut tonë në histori, personalitetet historikë të etapave të ndryshme do hetuar e studiuar me kujdes, paanshëm e në kontekstin e dhënë, duke avansuar një filozofi historie mbi faktin.

Koha sot, hapësirat e lirisë, mundësojnë që puna të kryhet më mirë e me drejtësi, që shkenca ka për objekt”, tha Veliu duke pohuar se projektet kësodore të institucioneve shkencore do të kenë mbështetjen edhe  financiare të institucioneve të Kosovës.

Ndërkaq drejtori i DRKS-së Nexhmi Balaj tha se kjo ekspozitë është e para e këtij lloji që po hapet pas luftës në Podujevë. Kjo ekspozitë përveç fotografive të luftës kombëtare paraqet edhe faktografi historike për një periudhë të cilën disa nga historianët tanë nuk e trajtuan si duhet e që paraqet pjesën më të mirë të historisë kombëtare.

“Ekspozita për luftën kombëtare me zero idelologji pos figurës së Shaban Polluzhës, prezanton fakte të sulmeve serbe në rajonin e Llapit gjatë periudhës ’44-’45, por edhe figura të Lëvizjes Nacionale e Demokratike Shqiptare nga kjo anë, si: Jahja Fusha, Hoxhë Visoka, Nuhi Gashi, Bahtir Dumnica, Ismajl Hoxha, Ukshin Kovaçica dhe figura tjera eminente të NDSH-së”, tha Balaj.

Autori i ekspoiztës Mehmet Gjoshi tha se kjo ekspozitë pasqyron një periudhë të historisë çlirimtare e cila në kohën e psuhtetit komunist është vlerësuar në baza ideologjike dhe jo shkencore. “Me k’të eskpozitë tematike Muzeu i Kosovës është përpjekur të korrigjojë padrejtësinë e anatemimit të luftës kombëtare me çka për herë të parë kjo pjesë e historisë tonë është trajtuar në baza shkencore”, tha autori Gjoshi.

Në pjesën e parë të ekspozitës prezantohet roli i Ushtrisë për Mbrojtjen Kombëtare të Kosovës dhe i forcave vullnetare për mbrojtjen e kufijve veriro dhe veri-lindor të Kosovës, kurse në pjesën tematike paraqiten materiale muzeore që pasqyrojnë pushtimin e Kosovës nga forcat serbokomuniste në nëntorin e vitit 1944.

Një vend i veçantë në k’të ekspozitë i është kushtuar prezantimit të ideologëve të luftës kundër pushtimit serbokomunist si dhe rezistencës së NDSH-së, si Bedri Pejani, Ferat Draga, Selman Riza, Halim Spahia, Xhafer Deva, Ibrahim Lutfiu, Ymer Berisha, At Bernard Llapi si dhe Adem Gllavicës, Qazim Llugaxhiut, Mulla Idrizit, Hysen Tërpezës, Abdyl Durës, Riza Gogës, Adem Vocës, Ahmet Selacit, Bahtir Dumnicës, Osman Bunjakut, Demë Ali Pozharit, Ukë Sadikut, Zhukë Haxhiut, Shaban Polluzhës, Miftar Bajraktarit, Mehmet Gradicës, etj.

Këto grupe të armatsoura shqiptare kishin filluar rezistencën spontane kundër formacioneve pushtuese serbokomuniste e veçanërisht kundër grupeve të vetmuara të këtyre formacioneve që nga mesi i nëntorit të vitit 1944, në shumë anë të Kosovës, ku dalloheshin sulmet në formacionet e dislokuara në relacionin Prishtinë-Gjilan në Anamoravë, në Drenicë, në Llap dhe në Shalë të Bajgorës.

Autori i kësaj ekspozite Mehmet Gjoshi tha se kjo ekspozitë për herë parë është hapur në Muzeun e Kosovës në Prishtinë, pastaj në Skënderaj, Gjakovë dhe kjo është hera e katërt në Podujevë, por mendohet të hapet edhe në komunat tjera.