Përmbajtja:

• Holkeri shpall të pavlefshëm edhe një vendim të Kuvendit të Kosovës

• Shefi i Zyrës gjermane sqaron deklaratën e tij rreth statusit final të Kosovës

• Mes Kosovës dhe Shqipërisë paralajmërohet nënshkrimi edhe i dy marrëveshjeve në fushën e ekonomisë

• Busek ndodhet për një vizitë dyditore në Kosovë

• Karitasi dhe donatorët ndihmojnë 32 familje skamnore të Llapit

• Kan Ros thotë se Holkeri nuk do të bëjë vlersimin e standardeve për Kosovën në seancës e KS

• Marrëdhëniet ekonomike dhe politike ndërmjet Shqipërisë dhe Kosovës janë në nivelin e duhur, thotë Angjeli

• Grupi punues për sektorin e energjetikës i ka kërkuar Qeverisë për nevojat e KEK-ut 62.7 milionë euro

• Gjykimi ndaj Shefket Musliut dhe katër të tjerëve fillon në Gjilan më 4 shkurt

• Drejtor i Entit të Statistikës së Kosovës është emëruar Hysni Thaçi

• Në Istog një polic ndërkombëtar ka plagosur me armë zjarri një të sëmurë mental

• Unioni i Studentëve të UT mbajti një manifestim për zyrtarizimin e këtij universiteti

• Ministrat e jashtëm të Bashkimit Evropian do të përqëndrohen edhe në situatën e përgjithshme në Kosovë

• Dy irakianë janë vrarë dhe dy të tjerë janë plagosur afër qytetit Falluxha

• Gjashtë veta janë vrarë në Gjeorgji

• Në Kairo vdesin katër vetë nga shembja e një ndërtese

• Një ushtar kanadez është vrarë në Kabul

• SHBA rishqyrton informatat e paraluftës

• Kompleksi i selisë së koalicionit goditet me raketë

• Iran: Presidenti nuk pranon dorëheqjen e disa zyrtarëve të lartë

Holkeri shpall të pavlefshëm edhe një vendim të Kuvendit të Kosovës

 

Prishtinë, 27 janar 2004 - Shefi i UNMIK-ut, Hari Holkeri, ka shpallur të pavlefshëm vendimin e Kuvendit të Kosovës për zgjedhjen e Zehra Elezit si anëtare të Kryesisë së Kuvendit. Në një letër dërguar kryeaparlamentarit Nexhat Daci, Holkeri e quan vendimin e Kuvendit si jokushtetues.

"Vendimi i marrë nga Kuvendi lidhur me emërimin e përfaqësuesve të komuniteteve në postin e antarëve të Kryesisë sipas marrëveshjes për rotacion është jovalid", thuhet në letrën e Holkerit drejtuar Dacit.

Ndërkohë, kjo çështje është diskutuar edhe në mbledhjen e sotme të Kryesisë së Kuvendit. Këshilltari politik i kryeparlametarit, Ramush Tahiri tha se Daci ka vendosur që të përgjigjet më shkrim letrës së Holkerit. Gjithashtu ai tha se kjo çështje do të diskutohet edhe në mbledhjen e ardhshme të Kryesisë së Kuvendit duke mos e përjashtuar mundësinë e përsëritjes së procedurës së votimit.

 

 

Shefi i Zyrës gjermane sqaron deklaratën e tij rreth statusit final të Kosovës

 

Prishtinë, 27 janar 2004 - Shefi i Zyrës gjermane në Prishtinë, Peter Rondorf, duke u përgjigjur në reagimet rreth deklaratës së tij se statusi final i Kosovës nuk mund të përcaktohet jashtë vullnetit të Serbisë, ndër të tjera thotë:

"Janë të befasueshme shqetësimet rreth deklaratës sime se Serbia dhe Mali i Zi do të marrin pjesë gjatë zgjidhjes së çështjes së statusit të Kosovës. Askush nuk mund të besojë se do të ishte një zgjidhje e statusit të Kosovës që nuk i merr parasysh interesat e fqinjëve, gjithashtu edhe të Serbisë dhe Malit të Zi, mund të ketë qëndrueshmëri.

 

Një zgjidhje e tillë do të bartte në vete embrionin e një përçarje të re. Natyrisht se duhet të merren parasysh dëshirat e popullit të Kosovës.

 

Sa më shumë që janë përmbushur standardet aq më shpejt do të arrihet kompromisi", thotë Rondorf dhe thekson se bashkimi i Gjermanisë është një shembull i mirë për këtë. Gjermania ka marrë parasysh interesat e Bashkimit Sovjetik, ashtu që Moska së fundi nuk mundi ta refuzonte vullnetin e popullit gjerman.

Përfundimisht çdo zgjidhje përfundimtare e statusit për Kosovën duhet të ketë pëlqimin e të gjithë anëtarëve të Grupit të Kontaktit dhe të gjithë anëtarëve të përhershëm të Këshillit të Sigzrimit të OKB-së, thotë ai.

 

Çdo politikan në Kosovë e di dhe se do të duhej ta dinte se kjo ka edhe si pasojë faktin se mendimi i Beogradit do të ketë ndikim nëse jodirekt atëherë indirekt dhe nuk do të duhej mbyllur sytë para realitetit, ka thënë shefi i Zyrës gjermane Peter Rondorf.

 

 

Mes Kosovës dhe Shqipërisë paralajmërohet nënshkrimi edhe i dy marrëveshjeve në fushën e ekonomisë

 

Prishtinë, 27 janar 2004 - Ministri shqiptar i Ekonomisë Anastas Angjeli ka biseduar sot me zyrtarin e lartë të Shtyllës së katërt të UNMIK-ut Andrej Vitkovski. Bashkëbiseduesit ranë dakord për vazhdimin e bashkëpunimit mes Kosovës dhe Shqipërisë.

 

Ata gjithashtu janë pajtuar për formimin e një komisioni për mbikqyrjen e implementimit të Marrëveshjes së tregtisë së lirë. Ndërkaq, Vitkovski paralajmëroi nënshkrimin e dy marrëveshjeve të tjera në fushën e ekonomisë - për mbrojtjen e investimeve dhe për eliminimin e taksave të dyfishta.

Ministri Angjeli sot i dha fund vizitës së tij në Kosovë.

 

 

Busek ndodhet për një vizitë dyditore në Kosovë

 

Prishtinë, 27 janar 2004 - Koordinatori i Paktit të Stabilitetit Erhard Busek sot e nesër do të qëndrojë në Prishtinë. Busek do të takohet me kryeadministratorin Hari Holkeri, me kryeministrin Bajram Rexhepi dhe me koordinatorin e Kosovës me Paktin e Stabilitetit Besim Beqaj.

 

 

Karitasi dhe donatorët ndihmojnë 32 familje skamnore të Llapit

 

Podujevë, 27 janar 2004 - Kordinatori i "Caritasit" Zejnun Bunjaku tha se kjo organizatë e Prishtinës përmes donatorëve nesër do të ndihmojë me gjëra ushqimore 32 familje llapjane me gjendje të rëndë sociale.

 

Familjet e përzgjedhura në bazë të kriterit social janë ndihmuar kryesisht me gjëra ushqimore dhe mjete higjienike në mbi 20 fshatra të komunës së Podujevës, thotë ai. Kjo ndihmë është rezultat i donacioneve të ndërmarrjeve tregtare: "Melicom", "Vëllezërit Musliu", autoservisit "Shkëlzeni" nga Sallabaja dhe afaristëve Tefik Mustafa e Shefki Hyseni nga Penuha.

Karitasi i Prishtinës përkujdeset për shumë familje skamnore llapjane që nga viti 1999 dhe deri më tash ka ndihmuar 8248 familje me gjendje jo të mirë sociale, kurse prioritet u është dhënë familjeve që rrisin jetimë.

 

 

Kan Ros thotë se Holkeri nuk do të bëjë vlersimin e standardeve për Kosovën në seancës e KS

 

Prishtinë, 27 janar 2004 - Zyrtari i lartë i UNMIK-ut në Prishtinë, Kan Ros ka deklaruar se më 6 shkurt, kur mbahet sesioni i Këshillit të Sigurimit të Kombeve të Bashkuara, kryeadministratori i Kosovës Hari Holkeri nuk do ta bëjë vlerësimin e standardeve për Kosovën, siç ishte paralajmëruar më herët.

 

Është thënë se kjo gjë do të bëhet në mbledhjen e ardhshme të KS pas tre muajsh. Sipas z. Kan Ros, koordinator për strategjit në Zyrën e shefit të UNMIK-ut, në raportin e Hari Holkerit para KS që do ta mbajë më 6 shkurt do të përfshihet një përmbledhje e përgjithshme e zhvillimeve në Kosovë, duke i përmendur edhe standardet, por pa u përcaktuar një raport i detajizuar, siç e parasheh dokumenti standardet për Kosovën.

 

 

Marrëdhëniet ekonomike dhe politike ndërmjet Shqipërisë dhe Kosovës janë në nivelin e duhur, thotë Angjeli

 

Prishtinë, 27 janar 2004 - Ministri i Ekonomisë së Shqipërisë Anastas Angjeli, i cili ndodhet për një vizitë dyditëshe në Kosovë, thotë se marrëdhëniet ekonomike dhe politike ndërmjet Shqipërisë dhe Kosovës, janë në nivelin e duhur. Ndërkaq, nënshkrimin e Marrëveshjes së tregtisë së lirë vitin e shkuar ndërmjet të dy vendeve e vlerësoi të një rëndësie të veçantë.

Këtë deklaratë ministri Angjeli e bëri pas takimit me kryeministrin e Kosovës, Bajram Rexhepi. Ai theksoi se Marrëveshja e tregtisë së lirë me Kosovën është prioritet i Qeverisë së Shqipërisë dhe sipas tij nuk do të ketë ndryshime në këtë marrëveshje, por vetëm zgjerim, pasurim dhe zbatim të saj.

Ndërkaq, kryeministri Bajram Rexhepi ka thënë pas takimit se rezultatet e deritashme të zbatimit të kësaj marrëveshjeje janë inkurajuese dhe bashkëpunimi ekonomik me Shqipërinë do të thellohet edhe më shumë në të ardhmen.

Angjeli ka biseduar edhe me ministrin e Tregtisë dhe Industrisë Ali Jakupi.

 

 

Grupi punues për sektorin e energjetikës i ka kërkuar Qeverisë për nevojat e KEK-ut 62.7 milionë euro

 

Prishtinë, 27 janar 2004 - Grupi punues për sektorin e energjetikës, i formuar kohë më parë me iniciativën e Qeverisë së Kosovës, pas analizës së nevojave të KEK-ut dhe projekteve të planifikuara për tejkalimin e situatës, i ka rekomanduar Qeverisë shumën prej 62.7 milionë euro si shumë reale për mbulimin e shpenzimeve.

 

Kjo shumë do të mbulonte shpenzimet operative për gjashtë muaj, projektet pë investime kapitale sipas prioriteteve për vitin 2004, duke përfshirë këtu edhe situatën në fshatrat në afërsi të minierave, thuhet në një komunikatë për media të lëshuar nga Qeveria e Kosovës.

 

 

Gjykimi ndaj Shefket Musliut dhe katër të tjerëve fillon në Gjilan më 4 shkurt

 

Prishtinë, 27 janar 2004 - Pas dhjetë muajsh mbajtje në paraburgim, Shefket Musliut, ish-komandant i Ushtrisë Çlirimtare për Preshevë, Medvegjë e Bujanoc dhe katër ish-luftëtarëve të tjerë, i është caktuar gjykimi, ka bërë të ditur avokati Masar Morina.

 

Trupin gjykues ndaj këtij grupi do ta udhëheqë një gjyqtar ndërkombëtar, ndërkaq gjykimi do të mbahet në Gjykatën e Qarkut në Gjilan dhe do të fillojë me 4 shkurt.

 

 

Drejtor i Entit të Statistikës së Kosovës është emëruar Hysni Thaçi

 

Prishtinë, 27 janar 2004 - Drejtor i Entit të Statistikës së Kosovës është emëruar Hysni Thaçi, ekonomist, i cili është dëshmuar i suksesshëm në shumë institucione të tjera, thuhet në një komunikatë për media të Entit të Statistikës së Kosovës.

 

 

Në Istog një polic ndërkombëtar ka plagosur me armë zjarri një të sëmurë mental

 

Istok, 27 janar 2004 - Në Istog një polic ndërkombëtar ka plagosur me armë zjarri Mustafë Çapkunajn (1950). Njoftohet se Mustafa është i sëmurë mental dhe kishte sulmuar me gurë policin ndërkombëtar.

 

Ndërkaq, ky i fundit në vetëmbrojtje e kishte qëlluar atë me revole. Po ashtu bëhet e ditur se i plagosuri është dërguar në Qendrën emergjente në Pejë ku i është nënshtruar një ndërhyrjeje kirurgjike dhe jeta e tij nuk është në rrezik.

 

 

Unioni i Studentëve të UT mbajti një manifestim për zyrtarizimin e këtij universiteti

 

Tetovë, 27 janar 2004 - Unioni i Studentëve të Universitetit të Tetovës ka tbuar dje disa mijëra shqiptarë në sheshin e qytetit të Tetovës për të festuar së bashku zyrtarizimin nga shteti të pesë fakulteteve të këtij unviersiteti.

 

Studentët lexuan telegram-urimet e universiteteve të Tiranës, Prishtinës, Shkodrës, Elbasanit, ku të gjithë i uronin Universitetit të Tetovës suksese dhe studentëve mirëqenie.

Në mesin e atyre që i përgëzonin studentët dhe drejtuesit e Universitetit të Tetovës ishte edhe kryetari i Partisë Bashkimi Demokratik për Integrim Ali Ahmeti.

Drejtuesit e Universitetit të Tetovës bëjnë të ditur se rreth 400 studentë të diplomuar, rreth 13 mijë janë regjistruar deri më sot, ndërkohë që i ndjekin studimet në mënyrë aktive 500 studentë, prej tyre 10 për qind janë nga Kosova, Shqipëria, Lugina e Preshevës dhe Mali i Zi.

 

 

Ministrat e jashtëm të Bashkimit Evropian do të përqëndrohen edhe në situatën e përgjithshme në Kosovë

 

Bruksel, 27 janar 2004 - Ministrat e jashtëm të Bashkimit Evropian në takimin e filluar në Bruksel diskutuan për gjendjen në Balllkanin Perëndimor. Bëhet e dituar se ata do të përqëndrohen edhe në situatën e përgjithshme në Kosovë.

 

Pritet që ata të përsërisin mundësinë e arritjes së standardeve të cilat janë të domosdoshme për vlerësimin pozitiv të rrethanave në Kosovë për vitin 2005 të cilat më vonë mund të krijojnë kushte për fillimin e debatit rreth statusit përfundimtar të Kosovës.

Maqedonia do të jetë gjithashtu temë e diskutimeve, sidomos do të diskutohet rreth paralajmërimeve të këtij shteti që të aplikojë për anëtarësim në Bashkimin Evropian, iniciativë kjo e cila aktualisht nuk ka përkrahje të madhe në radhët e BE-së, ngase konsiderohet si kërkesë tejet e hershme.

 

 

Dy irakianë janë vrarë dhe dy të tjerë janë plagosur afër qytetit Falluxha

 

Falluxha, 27 janar 2004 - Dy irakianë janë vrarë dhe dy të tjerë janë plagosur nga sulmuesit në një pikë kontrolli afër qytetit Falluxha.

Stacioni televiziv arab Al Xhazira njofton se dy policët e plagosur ndodhen në gjendje kritike në spitalin e Falluxhës.

 

 

Gjashtë veta janë vrarë në Gjeorgji

 

Tbilisi, 27 janar 2004 - Gjashtë veta janë vrarë nga sulmues të armatosur, të cilët kishin sulmuar një fshat në Gjeorgji, afër kufirit me rajonin e Abhazisë, ka bërë të ditur përfaqësuesi i policisë.

Sulmi është incidenti i parë serioz që nga marrja e detyrës së presidentit të ri të Gjeorgjisë Mihail Sakashvili.

 

 

Në Kairo vdesin katër vetë nga shembja e një ndërtese

 

Kairo, 27 janar 2004 - Katër veta kanë vdekur nga shembja e një ndërtese 12 katëshe të hënën në mbrëmje në një paralagje të Kairos, pasi që në katet e poshtme kishte shpërthyer një zjarr. Ndërkaq 11 veta janë zënë nën rrënojat, ka bërë të ditur policia.

Me atë rast janë lënduar mbi 40 veta.

Zjarri ka shpërthyer në një restoran të ushqimit të shpejtë në lokalin përdhesë, për ç'arsye shumë banorë të kateve të sipërme braktisën ndërtesën.

 

 

Një ushtar kanadez është vrarë në Kabul

 

Kabul, 27 janar 2004 - Një ushtar kanadez është vrarë dhe dy të tjerë janë plagosur sot në mëngjes në Kabul në një sulm vetëvrasës. Tre ushtarët ndodheshin në patrullim në një lagje të kryeqytetit, kur u ishte afruar një burrë me eksploziv të lidhur rreth brezit, të cilin e aktivizon, njofton Frans Press.

 

 

SHBA rishqyrton informatat e paraluftës

 

Uashington, 27 janar 2004 - Shtetet e Bashkuara do të rishqyrtojnë informatat e shërbimeve të zbulimit rreth armëve të Sadam Huseinit, që u përdorën për të justifikuar pushtimin e Irakut.

Shtëpia e Bardhë tha se do të krahasojë informatat e para luftës, me ato të Grupit Vëzhgues të Irakut, i cili po kërkon dëshmi të armëve kimike a biologjike.

Zëdhënësi i Shtëpisë së Bardhë, Skot Mekllellen tha se tashmë ka nisur rishikimi i disa informatave të paraluftës.

Por ai shtoi se qeveria amerikane qëndron ende pas vendimit të vet për të rrëzuar ish-udhëheqësin irakian, Sadam Husein.

 

 

Kompleksi i selisë së koalicionit goditet me raketë

 

Bagdad, 27 janar 2004 - Forcat amerikane në Irak thonë se një raketë ra të hënën vonë brenda kompleksit të selisë së koalicionit të udhëhequr nga Shtetet e Bashkuara, por nuk shkaktoi viktima dhe as dëme.
 

Sulmi u krye disa orë pas shpërthimit të një bombe në anë të rrugës që shkaktoi vdekjen e një irakiani, i cili po ulej nga një autobus në qytetin Ramadi, në perëndim të Bagdadit. Incidenti ndodhi brenda zonës së njohur si Trekëndshi Suni, ku sulme të veçanta guerile kanë lënë të vrarë të paktën 6 policë irakianë që nga e diela.

 

 

Iran: Presidenti nuk pranon dorëheqjen e disa zyrtarëve të lartë

 

Teheran, 27 janar 2004 - Agjencia iraniane e lajmeve bën të ditur se presidenti reformist i Iranit, Muhamed Khatami, nuk ka pranuar dorëheqjen e disa zyrtarëve të lartë, të zhgënjyer nga skualifikimi i mijëra kandidatëve reformistë për në zgjedhjet e përgjithshme të muajit tjetër.

Khatami iu përgjigj një letre të dërguar nga zyrtarët dhe u kërkoi atyre që të qendronin në detyrë.

Në njoftim thuhet se presidenti u zotua se do të ngulë këmbë në nevojën për zhvillimin e zgjedhjeve të lira dhe të drejta.

 

Sipas agjencisë iraniane të lajmeve, presidenti Khatami është ankuar edhe se stacionet radiotelevizive shtetërore po i censurojnë deklaratat e tij, në të cilat bëhet thirrje për rishqyrtimin e vendimit për skualifikimin e kandidatëve.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |