|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Karitasi i Prishtinës dhe donatorët ndihmojnë 32 familje skamnore llapjane

Podujevë, 27 janar 2004 (TN) – Kordinatori i “Caritas”-it në Lluzhan Zejnun Bunjaku njoftoi sot se kjo organizatë e Prishtinës përmes donatorëve nesër do të ndihmojë me gjëra ushqimore 32 familje llapjane me gjendje të rëndë sociale.

“Familjet e përzgjedhura në bazë të kriterit social janë ndihmuar kryesisht me gjëra ushqimore dhe mjete higjienike në mbi 20 fshatra të komunës sonë”, tha z. Bunjaku. Ai njoftoi se kjo ndihmë është rezultat i donacioneve të Ndërmarrjeve tregtare: “Melicom”, “Vëllezërit Musliu”, autoservisit “Shlëzeni” nga Sallabaja dhe afarsitëve Tefik Mustafa e Shefki Hyseni nga Penuha. Shpërdarja e këtyre ndihmave do të bëhet të enjten, në deponë e kësaj organizate në Lluzhan njoftoi kordinatori i Karitasit Zejnun Bunjaku.

Karitasi i Prishtinës përkujdeset për shumë familje skamnore llapjane që nga viti 1999 kur është hapur nëndega në Lluzhan. Sipas Zejnun Bunjakut Karitasi i Prishtinës deri më tash ka ndihmuar 8248 familje me gjendje jo të mirë sociale, kurse prioritet u është dhënë familjeve që rrisin jetimë.