Përmbajtja:

• Rater: Ekstremistë nga të dyja anët e qytetit të Mitrovicës mund ta rikthejnë dhunën

• Pjesëtarët e KFOR-it në Prishtinë ka zbuluar një mjet shpërthyes

• Zjarri që shpërtheu në Vushtrri ka shkaktuar vetëm dëme të mëdha

• Në klubin rinor "Vala 2000" në Shirokë të Therandës ka ndodhur një shpërthim i fuqishëm

• Prizren: Nuk duhet lejuar antiinstitucionalistët të krijojnë anarki

• Monitoruesit e KMDLNJ vlerësojnë se KK i Gjilanit ka punuar në frymë tolerante dhe demokratike

• Qeveria e Tirolit të Austrisë ndihmon Podujevën

• Personat me aftësi të kufizuara kërkojnë një tretman më të mirë nga institucionet e Kosovës

• Në Komunën e Gjakovës po bëhen përpjekje për ndihmë familjeve në asistencë sociale

• Tiranë: Operacion i gjerë policor kundër trafiqeve

• Pritet të shpallet një listë me emrat e politikanëve maqedons, të cilëve u ndalohet hyrja në vendet e BE-së

• Sot në Tiranë fillon konferenca rajonale për luftën kundër pastrimit të parave dhe terrorizmit

• Ministrat e jashtëm të BE-së debatojnë sot rreth gjendjes në Ballkanin Perëndimor

• Në Maqedoni fillon greva e punëtorëve të arsimit të pakënaqur me pagat

• Nënpresidenti amerikan Çeni thekson rëndësinë e nxitjes së demokracisë në Lindjen e Mesme

• SHBA: Të paktën 15 veta kanë vdekur nga stuhia e dimrit

• Stokholm: Si të parandalohet gjenocidi

• Japonia dërgon edhe 600 trupa në Irak

• Dy irakianë janë vrarë dhe dy të tjerë janë lënduar rëndë

• Në xhami vriten dy vetë në një qytet gjerman

• Në Çeçeni janë vrarë katër ushtarë rusë

• Një irakian është vrarë dhe dy të tjerë janë plagosur

• Kolin Pauell mbërriti në Moskë

• Vdes fëmija nga virusi i shpendëve

• Kofi Anan do të dërgojë një mision në Irak

• Këshilli Mbikqyrës Islamik i Iranit i ka vënë veton një projektligji

Rater: Ekstremistë nga të dyja anët e qytetit të Mitrovicës mund ta rikthejnë dhunën

 

Mitrovicë, 26 janar 2004 - Elementët ekstremistë nga të dyja anët e qytetit të ndarë të Mitrovicës si dhe armët e shumta ilegale në duart e civilëve mund ta kthejnë sërish dhunën në këtë qytet, tha komandanti i Brigadës shumëkombëshe veri-lindje, gjenerali francez, Bernar Rater, vetëm disa ditë pa i dhënë fund misionit të tij në krye të kësaj brigade.

Gjenerali Rater tha se KFOR-i bashkë me forcat e tjera të sigurisë po punojnë ngushtë për të identfikuar elementët ekstremistë në Mitrovicë. "Nëse në një moment KFOR-i vlerëson se duhet ndërhyrë, ne do ta bëjmë këtë", theksoi ai dhe përkujtoi misionin që ka KFOR-i për krijimin e një mjedisi të sigurtë në tërë Kosovën.

Rater prej katër muajsh ka komanduar me këtë brigadë, ndërkohë që atë do ta zëvendësojë poashtu një gjeneral francez.

 

 

Pjesëtarët e KFOR-it në Prishtinë ka zbuluar një mjet shpërthyes

 

Prishtinë, 26 janar 2004 - Në afërsi të ndërtesës "Sllovenia sport", pjesëtarët e Batalionit suedez të KFOR-it dje rreth orës 14.00 kanë zbuluar një mjet shpërthyes, i cili brenda një orë është bërë deaktivizimi pa pasoja në njerëz.

 

Mirëpo, gjatë deaktivizimit është mësuar se në kutinë e gjetur nuk ishte ndonjë material i rrezikshëm shpërthyes. Gjatë një ore sa zgjati deaktivizimi i kësaj kutie u bllokuan rrugët përreth, ndërkaq trafiku u vështirësua dukshëm.

 

 

Zjarri që shpërtheu në Vushtrri ka shkaktuar vetëm dëme të mëdha

 

Vushtrri, 26 janar 2004 - Nga një zjarr që ka shpërthyer dje në një kompleks të banesave në Vushtrri janë shkaktuar dëme të mëdha materiale, ndërkaq viktima në njerëz nuk ka pasur falë intervenimit të shpejtë të një njësiti të zjarrëfikës.

 

Zjarri kishte shpërthyer si pasojë e një defekti elektrik dhe ka përfshirë dy shitore, ku janë shkaktuar dëme të konsiderueshme materiale dhe një zyrë e kadastrit të komunës së Vushtrrisë ku janë djegur disa dokumente.

 

 

Në klubin rinor "Vala 2000" në Shirokë të Therandës ka ndodhur një shpërthim i fuqishëm

 

Therandë, 26 janar 2004 - Në klubin rinor "Vala 2000" në Shirokë, parlagje e Therandës, ka ndodhur një shpërthim i fuqishëm që shkaktuar vetëm dëme materiale, por pa pasoja në njerëz. Në këtë klub në çdo fundjavë tubohen për t'u argëtuar shumë të rinj nga shumë mjedise të Therandës.

Në stacionin e atjeshëm policor nuk kanë dhënë ndonjë njoftim për këtë shpërthim, duke thënë se rasti është nën hetime.

 

 

Prizren: Nuk duhet lejuar antiinstitucionalistët të krijojnë anarki

 

Prizren, 26 janar 2004 - Në sallën e mbushur përplot me të rinj në Shtëpinë e Kulturës në Prizren, në organizim të Forumit të Rinisë të LDK-së, u mbajt debati me të rinjtë "2004 viti i LDK-së - viti juaj". Nderim Gashi, kryetar i degës së FR të LDK-së në Prizren, tha se për një dekadë e gjysmë të aktivitetit të LDK-së pjesë e saj janë edhe të rinjtë.

 

Duke e marrë shembull seancën e fundit të Kuvendit te Kosovës, Gashi theksoi se nuk do të lejohet që antiinstitucionalistët e djeshëm dhe të sotëm t'ua prishin ëndrrat të rinjve. "Ne do të jemi aktivë në zhvillimet pozitive në Kosovë', tha ai.

Në këtë takim të rinjtë i përshëndeti edhe Eqrem Kryeziu, kryetar i Kuvendit Komunal në Prizren, i cili pasi shprehu kënaqësinë që është në mesin e të rinjve, falenderoi zotin që është gjallë në shënimin e 15-vjetorit të partisë, sepse siç tha, disa u vranë në luftë e disa pas luftës. Kjo nuk është fushatë, shtoi më tej z.Kryeziu, ky është një vit jubilar për LDK-në.

 

"Nëse dikush e merr si fushatë le ta marrë, por ne nuk e kemi ndërmend të heshtim. Lidhja Demokratike u farkua nëpër fazat më të rrezikshme që mund t'i kalojë një popull", tha Kryeziu dhe shtoi: "Sot, duhet të përqëndrohemi t'i mënjanojmë dukuritë negative". Duke falenderuar FR për aktivitetin e madh, Eqrem Kryeziu theksoi se LDK-ja nuk do të ishte ajo që është pa Forumin e Rinisë.

Ndërkaq, Lulzim Zeneli, kryetar i FR të LDK-së, në fjalën e tij theksoi se ky debat është pjesë e projektit të punës së Forumit. Takimi i sotëm është një mesazh i qartë për dinamikën e shtuar në të gjitha rrafshet. Dega e FR në Prizren është model për të gjitha organizimet në Kosovë, tha ndër të tjera Lulzim Zeneli, duke e potencuar të dhënën se rinia është katalizator i proceseve pozitive.

 

 

Monitoruesit e KMDLNJ vlerësojnë se KK i Gjilanit ka punuar në frymë tolerante dhe demokratike

 

Gjilan, 26 janar 2004 - Këshilli për Mbrojtjen e të Drejtave dhe Lirive të Njeriut në Gjilan, në një raport të publikuar për punën e Kuvendit Komunal, komitetet dhe drejtoritë, ka vlerësuar se është punuar në frymë tolerante dhe demokratike, por ka shtuar se shumica e këshilltarëve kanë qenë pasivë nëpër mbledhje, gjatë vitit 2003.

Përndryshe, Kuvendi Komunal i Gjilanit, sipas monitoruesve të këtij Këshilli, ka përmbushur planin vjetor të punës për vitin 2003, duke mbajtur 12 seanca të rregullta dhe 2 tjera të jashtëzakonshme.
Vërejtja e Këshillit është se ka munguar njoftimi publik paraprak për kohën dhe vendin e mbajtjes së seancave, sikundër që, thuhet në këtë raport, nuk iu janë dërguar materialet 7 ditë para mbledhjeve as këshilltarëve komunalë.

Përfaqësuesit e Këshillit kanë monitoruar në disa raste edhe procedurat e hapjes së ofertave për tenderë në zyrën e prokurimit dhe vlerësim i tyre është se nuk ka patur parregullësi.

Përgjithësisht, mbledhjet e Kuvendit janë përshkuar nga një frymë tolerante dhe demokratike dhe të gjithë këshilltarët komunalë kanë patur mundësi që të marrin fjalën dhe t`i paraqesin pikëpamjet e tyre për temat që kanë qenë në rend dite.

Këshilli e ka vlerësuar si një të arritur të madhe të Kuvendit Komunal në Gjilan transparencën me publikun, e cila realizohet përmes faqes së internetit.

 

 

Qeveria e Tirolit të Austrisë ndihmon Podujevën

 

Podujevë, 26 janar 2004 - Kryetari i komunës së Podujevës Agim Veliu ka biseduar me zyrtarin e Qeverisë së Tirolit Peter, Logar për ndihmën e vazhdueshme që Tiroli i Austrisë po i jep komunës së Podujevës, planet për ndihmën e sivjetme në turizëm, blegtori e bujqësi dhe fusha të tjera.

 

"Qëllimi i vizitës ka të bëjë me ndihmën që Tiroli vazhdon të japë në bujqësi dhe blegtori në rajonin e Orllanit, në kuadër të zhvillimit të projektit turistik", deklaroi z. Logar.

Qeveria e Tirolit kohëve të fundit ndihmoi fermerët nga rajoni i Orllanit, pastaj Shërbimin e zjarrfikësve, por edhe komunën e Podujevës.

 

 

Personat me aftësi të kufizuara kërkojnë një tretman më të mirë nga institucionet e Kosovës

 

Prishtinë, 26 janar 2004 - Personat me aftësi të kufizuara në Kosovë kërkojnë një tretman më të mirë nga institucionet e Kosovës. Kategoria e këtyre personave u takojnë moshave të ndryshme, duke filluar nga nxënësit e shkollave fillore e deri tek ata më të vjetër.

 

Personave me aftësi të kufizuara u është cunguar e drejta për të lëvizur dhe ato lëvizje janë të kufizuara, andaj ata kërkojnë nga institucionet një tretman më të mirë.

 

 

Në Komunën e Gjakovës po bëhen përpjekje për ndihmë familjeve në asistencë sociale

 

Gjakovë, 26 janar 2004 - Në Komunën e Gjakovës po bëhen përpjekje për ndihmë familjeve në asistencë sociale. Për këtë qëllim Kuvendi komunal ka investuar 30 mijë euro. Megjithëkëtë, në strehimoren kolektive në dalje të Gjakovës i quajtur "Fshati i sllovenëve" në në kushte të vështira jetojnë 25 familje pa çati mbi kokë dhe fëmijë jetimë. Ata jetojnë në kushte të rënda dhe në baraka improvizuese.

 

Ndryshe, komuna e Gjakovës renditet ndër komunat më të shkatërruara nga lufta. Edhe mëtutje të parindërtuara mbeten 950 shtëpi, kurse familje të shumta kërkojnë strehim edhe gjatë këtyre ditëve me borë dhe acar.

 

 

Tiranë: Operacion i gjerë policor kundër trafiqeve

 

Tiranë, 26 janar 2004 - Policia shqiptare ndërmori të dielën një operacion në shkallë të gjerë kontrolli në të gjithë vendin që nisi që në orët e para të mëngjesit dhe përfshiu të gjitha rrethet e Shqipërisë.

Në të u angazhuan një numër i madh forcash policore, mbi 1800 përfshirë edhe ato të njësive speciale. Mbi 180 automjete të Shqipërisë ushtruan kontrolle në akset kryesore rrugore, ndërsa 19 mjete lundruese patrulluan të gjithë vijën bregdetare që nga Veriu në Shkodër deri në Sarandë në Jug të vendit.

Si rezultat i këtij aksioni u bllokuan gjashtë motoskafe, ndërsa në pikat kufitare u bë i mundur bllokimi i disa personave që përpiqeshin të kalonin ilegalisht.

Kështu në portin e Durrësit, policia arriti të bllokojë 17 udhëtarë nga Kosova në momentin që ata po hipnin në tragetin e linjës në drejtim të Italisë.

Ndërsa në Jug të vendit ui kapën tre persona që po përpiqeshin të kalonin ilegalisht kufirin drejt Greqisë.

Gjatë kontrolleve të ushtruara në akset rrugorre, policia ka bërë të mundur, bllokimin e 32 automjeteve, të cilat rezultojnë me dokumenta të falsifikuara.

Në operacionin e së dielën u arrestuan edhe dy persona, të cilët prej kohësh ishin shpallur në kërkim nga drejtësia shqiptare, nën akuzën e organizimin dhe favorizimit të trafikut.

 

 

Pritet të shpallet një listë me emrat e politikanëve maqedons, të cilëve u ndalohet hyrja në vendet e BE-së

 

Bruksel, 26 janar 2004 - Bashkimi Evropian pritet të shpallë sot një listë me emrat e disa politikanëve në Maqedoni, të cilëve u ndalohet udhëtimi dhe hyrja në vendet e BE-së.

 

Sipas zëdhënëses së Komisionit Evropian, në këtë listë përfshihen disa emra të ish-zyrtarëve të lartë apo politikanëve në Maqedoni, të cilët kohët e fundit janë shquar për qëndrime radikale apo për kundërvënie të hapur të Marrëveshjes së Ohrit, apo që bëjnë deklarata politike për rrezikun ose nevojën e ndarjes së Maqedonisë. Aprovimi i kësaj liste, e cila thuhet se tashmë është hartuar në selinë e BE-së, pritet të shpallet sot gjatë takimit të ministrave të jashtëm të BE-së në Bruksel.

Zëdhënësja e Komisionit Evropian, Ema Udvin thotë se deri më tash kanë qenë Shtetet e Bashkuara të Amerikës që patën shpallur listë të zezë për disa nga ish-zyrtarët maqedonas, apo edhe ish-anëtarët e Ushtrisë Çlirimtare Kombëtare, të cilëve u ishte ndaluar udhëtimi për në SHBA.

 

Por lista që pritet të aprovohet sot ndryshon disi nga ajo amerikane, pasi atu kihen parasysh edhe ndryshimet e fundit politike që kanë ngjarë muajt e fundit në këtë vend ballkanik. Prandaj ka shumë mundësi që disa emra të janë hequr dhe disa të jenë shtuar në përputhje edhe me qëndrimet e fundit të politikanëve në Shkup.

 

 

Sot në Tiranë fillon konferenca rajonale për luftën kundër pastrimit të parave dhe terrorizmit

 

Tiranë, 26 janar 2004 - Sot në Tiranë fillon konferenca rajonale dyditore për luftën kundër pastrimit të parave të pista dhe terrorizmit. Në këtë konferencë marrin pjesë përfaqësues të njësive të shërbimeve sekrete financiare nga Bullgaria, Bosnja e Hercegovina, Maqedonia, Kroacia, Serbia dhe Mali i Zi, Rumania si dhe këshilltarë të Departamentit të Shteteve të Bashkuara, përfaqësues të Misionit të asistencës policore të komunitetit evropian dhe ekspertë nga zyra e OKB-së kundër drogës dhe krimit.

 

 

Ministrat e jashtëm të BE-së debatojnë sot rreth gjendjes në Ballkanin Perëndimor

 

Bruksel, 26 janar 2004 - Ministrat e punëve të jashtme të Bashkimit Evropian do të mbledhen sot në Bruksel për të diskutuar rreth gjendjes në Ballkanin Perëndimor. Ata do të diskutojnë edhe rreth heqjes e ndalimit për shitjen e armëve ndaj Kinës, të cilat ishin vendosur pas ngjarjeve të Tijen Amenit më 1989.

 

 

Në Maqedoni fillon greva e punëtorëve të arsimit të pakënaqur me pagat

 

Shkup, 26 janar 2004 - Sot në Maqedoni fillon vala e re e grevës të punëtorëve të arsimit e mbështetur nga sindikatat e pavarura të arsimit, shkencës dhe kulturës. Mbi 35 mijë punëtorë të këtij sektori kanë kërkuar nga Qeveria e Maqedonisë që të përmirësohet pozita e arsimtarëve, të cilët janë të pakënaqur me lartësinë e pagave.

 

 

Nënpresidenti amerikan Çeni thekson rëndësinë e nxitjes së demokracisë në Lindjen e Mesme

 

Romë, 26 janar 2004 - Nënpresidenti amerikan Dik Çeni mbrojti luftën e udhëhequr nga Shtetet e Bashkuara në Irak dhe theksoi rëndësinë e nxitjes së demokracisë në Lindjen e Mesme. Duke folur para udhëheqësve politikë dhe atyre të biznesit në Romë, Çeni falenderoi Italinë për mbështetjen e saj në luftën në Irak dhe në atë kundër terrorizmit.

 

Ai tha se njerëzit e qytetëruar kudo qofshin duhet të bëjnë gjithçka për të mposhtur terrorizmin dhe për të ndalur përhapjen e armëve të shkatërrimit në masë. Zoti Çeni tha gjithashtu se nxitja e demokracisë në Lindjen e Mesme është kyçi për të fituar luftën kundër terrorizmit në një plan më të gjerë.

 

 

SHBA: Të paktën 15 veta kanë vdekur nga stuhia e dimrit

 

Karolina Jugore, 26 janar 2004 - Të paktën 15 veta kanë vdekur nga përplasjet e makinave, si pasojë e rrugëve të ngrira. Ndërkaq me dhjetra fluturime janë anuluar ose janë mbyllur nga Misuri e deri në Karolinën Jugore.

Stuhia e dimrit ka përfshirë bregun lindor të Amerikës, duke pamundësuar qarkullimin në trafik, njofton rrjeti televiziv CNN.

 

 

Stokholm: Si të parandalohet gjenocidi

 

Stokholm, 26 janar 2004 - Në hapje të Konferencës ndërkombëtare në Stokhlom për parandalimin e gjenecidit, sekretari i përgjithshëm i OKB-së Kofin Anan tha se nuk ekzistojnë probleme më të rëndësishme as obligime për Kombet e Bashkuara nga pengimi i gjenocidit. "Ngjarjet e vitit 1999 në Jugosllavi dhe në Ruandë posaçërisht, janë të pandershme.

 

Bashkësia ndërkombëtare ka pasur qëllim të qartë që të pengojë ato ngjarje, por i mungonte vullneti", ka thënë Anan. "Në Ruandë më 1994 dhe në Serbrenicë më 1995 kemi pasur trupa paqësore në terren, atje ku akti i gjenocidit është bërë, por në vend që t'i forconim, ne i tërhoqëm", tha Anan.

Gjatë kësaj konference treditore, në të cilën marrin pjesë përfaqësuesit e mbi 50 shteteve, do të shqyrtohen mënyrat për pengimin e gjenocidit, të spastrimit etnik dhe të vrasjeve masive.

 

 

Japonia dërgon edhe 600 trupa në Irak

 

Tokio, 26 janar 2004 - Kryeministri japonez Juniçiro Koizumi ka miratuar dërgimin në Irak të një kontigjenti prej 600 ushtarësh dhe kështu për herë të parë pas Luftës së Dytë Botërore forcat mbrojtëse japoneze do të gjenden në zonën e operacioneve luftarake.

Kryeministri japonez më herët kishte marrë mbështetjen e partnerëve të tij të koalicionit për dërgimin e trupave tokësore në misionin jolftarak në Irak.

Pararoja e forcave japoneze tashmë ndodhet në Irak për të vlerësuar rrethanat nën të cilat do të veprojnë trupat kryesore.

Detyrë kryesore e trupave japoneze do të jetë furnizimi me ujë të pijshëm dhe nevoja mjekësore, por trupat janë të aftësuara që në rast të sulmit të përgjigjen me zjarr.

 

 

Dy irakianë janë vrarë dhe dy të tjerë janë lënduar rëndë

 

Bagdad, 26 janar 2004 - Dy irakianë janë vrarë dhe dy të tjerë janë lënduar rëndë të hënën kur njëri prej tyre, duke dalë nga autobusi, shkeli në një mjet shpërthyes në jug të Bagdadit, njofton policia e Irakut.
Policia dyshon se ky mjet shpërthyes është kurdisur në mënyrë që të shkelë kolona ushtarake amerikane e cila rregullisht lëviz nëpër atë rrugë.

 

 

Në xhami vriten dy vetë në një qytet gjerman

 

Gelsenkirhen, 26 janar 2004 - Një burrë 59-vjeçar, pas lutjes së mëngjesit, ka vrarë sot në një xhami dy burra duke i qëlluar në kokë, në qytetin gjerman Gelsenkirhen.

Zëdhënësi i policisë ka deklaruar se pas këtij akti vrasësi ka shkuar në shtëpi, por nuk u ka bërë rezistencë policëcve që kishin shkuar ta arrestonin. Në njoftimin e policisë thuhet se nuk dihet motivi i kësaj vrasjeje të dyfishtë.

 

 

Në Çeçeni janë vrarë katër ushtarë rusë

 

Moskë, 26 janar 2004 - Katër ushtarë rusë janë vrarë dhe katër të tjerë janë plagosur nga shpërthimi i një bombe në rrugë, në Çeçeninë Jugore, kur andej po kalonte një kolonë ushtarake.

Ushtarët i takonin divizionit 42 të motorizuar dhe ndërsa po qarkullonin të shoqëruar nga policia te gryka afër vendit Kiri në rrethin Shatoj, shpërtheu bomba, citohet të ketë thënë përfaqësuesi i grupacionit të armatës ruse në Kaukazin Verior.

 

 

Një irakian është vrarë dhe dy të tjerë janë plagosur

 

Bagdad, 26 janar 2004 - Një irakian është vrarë dhe dy të tjerë janë plagosur gjatë të shtënave të ushtarëve amerikanë afër bashkisë së qytetit Kirkuk. Nsërkaq afër Bagdadit është sulmuar një kamion që po transportonte material për ushtrinë japoneze, kurse është vrarë shoferi jordanez, ka bërë të ditur Ministria e Jashtme japoneze.

 

 

Kolin Pauell mbërriti në Moskë

 

Moskë, 26 janar 2004 - Sekretari amerikan i Shtetit, Kolin Pauell, ka mbërritur në Moskë për takime me presidentin rus, Vladimir Putin, dhe me zyrtarë të tjerë të lartë.

Dy janë çështje që do të dominojnë në këto takime - roli i Rusisë në Gjeorgjisë dhe gjendja ku ndodhet demokracia ruse dhe duket se rreth tyre të dyja palët mund të shkëmbejnë fjalë të ashpra.

Pauell ka paralajmëruar se do t'u bëjë thirrje rusëve të mbajnë premtimet për të tërhequr trupat e tyre nga Gjeorgjia, por duket se presidenti Putin nuk ka gjasë ta presë këtë në gjunjë, duke marrë parasysh faktin se ai aktualisht po përballet me çështjen e rizgjedhjes.

 

 

Vdes fëmija nga virusi i shpendëve

 

Bankok, 26 janar 2004 - Një djalë 6-vjeçar është bërë viktima e parë e gripit të shpendëve në Tajlandë.
Vdekja e fëmijës, nga provinca Kançanaburi e çon në shtatë numrin e personave që kanë vdekur në vendet e prekura më keq nga virusi, Tailanda dhe Vietnami.

Gjashtë prej viktimave që ka shkaktuar deri tani gripi i shpendëve, janë fëmijë.

 

 

Kofi Anan do të dërgojë një mision në Irak

 

Nju Jork, 26 janar 2004 - Diplomatë të Kombeve të Bashkuara thonë se Sekretari i Përgjithshëm Kofi Anan do të njoftojë këtë javë se do të dërgojë një mision në Irak për të vlerësuar mundësitë për zhvillimin e zgjedhjeve para 30 qershorit, afati i caktuar për kalimin e pushtetit.

Me këtë vendim do të plotësohej kërkesa e administratës së presidentit Bush dhe Këshillit Qeverisës të Irakut. Zyrtarët amerikanë kishin thënë më parë se zgjedhjet e përgjithshme të drejtë për drejta para 30 qershorit do të ishin të pamundura.

Shtetet e Bashkuara kërkojnë t' japin fund ndërhyrjes në Irak brenda qershorit, duke i kaluar pushtetin një qeveria irakiane të zgjedhur përmes një seri konferencash rajonale.

 

 

Këshilli Mbikqyrës Islamik i Iranit i ka vënë veton një projektligji

 

Teheran, 26 janar 2004 - Ligjvënësit iranianë thonë se Këshilli Mbikqyrës Islamik me pikëpamje konservatore i ka vënë veton një projekt-ligji që kishte për synim të dobësonte rolin e këshillit në procesin e zgjedhjeve parlamentare.

Ligjvënësit dhe njoftimet bënë dje të ditur se këshilli me 12 anëtarë i cilësoi ndryshimet ligjore si në kundërshtim me kushtetutën dhe me ligjet islamike të Iranit. Këshilli ka fuqinë t=u vërë veton ligjeve të miratuara nga parlamenti i mbizotëruar nga reformistët.

Në një sesion urgjent dje parlamenti miratoi një ligj për reforma i cili nuk do t'i lejonte Këshillit të skualifikonte kandidatët për poste të zgjedhura, me përjashtim të rastit të kriminelëve.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |