|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Prizren: Në organizim të Forumit të Rinisë të LDK-së u mbajt debati me të rinjtë "2004 Viti I LDK-së - Viti i Juaj"

26 janar 2004 / TN

 

Nuk do t'i lejojmë antiinstitucionalistët të krijojnë anarki

 
Në sallën e mbushur përplot me të rinj në Shtëpinë e Kulturës në Prizren, në organizim të Forumit të Rinisë të LDK-së, u mbajt debati me të rinjtë "2004 Viti i LDK-së - Viti i Juaj", sepse këtë vit po e shënojmë 15-vjetorin e themelimit  të LDK-së, tha në fillim të fjalës se tij Nderim Gashi, kryetar i degës së FR të LDK-së në Prizren.

 

Ai theksoi se për një dekadë e gjysëm të aktivitetit të LDK-së pjesë e saj jemi edhe ne të rinjtë. Duke e marr shembull seancën e fundit të Kuvendit te Kosovës, Gashi theksoi se nuk do të lejohet qe antiinstitucionalistët e djeshëm dhe të sotëm t'ua prishin ëndrrat të rinjve. Ne do të jemi aktiv në zhvillimet pozitive në Kosovë.

 

Në këtë takim të rinjtë i përshëndeti edhe Eqrem Kryeziu, kryetar i Kuvendit Komunal në Prizren i cili pasi shprehu kënaqësinë që është në mesin e të rinjve falemnderoi zotin që është gjallë në shënimin e 15 vjetorit të partisë sepse siç tha ai disa u vranë në luftë e disa pas luftës.

 

Kjo nuk është fushatë shtoi më tej z.Eqrem Kryeziu, ky është një vit jubilar për LDK-në. Nëse dikush e merr si fushatë le ta marr,  nuk ka rëndësi por ne nuk e kemi ndërmend të heshtim. Lidhja Demokratike u farkua nëpër fazat më të rrezikshme që mund t'i kaloj një popull: Që nga robëria e egër, lufta deri te anarkia e pasluftës. Sekreti i mbetjes gjallë të LDK-së, janë njerëzit me guxim dhe të ndershëm.

 

Sot, vijoi më tej Eqrem Kryeziu duhet të përqëndrohemi t'i mënjanojmë, t'i margjinalizojmë dukuritë negative. Ne sot duhet të kemi kujdes, siç e tha Berluskoni në kremtimin e 10-vjetorit të themelimit të partisë së tij, duhet të kemi kujdes nga stalinistët pa stalinizëm. Duke falënderuar FR për aktivitetin e madh Eqrem Kryeziu theksoi se: LDK-ja nuk do të ishte ajo që është pa Forumin e Rinisë.

 

Ndërsa Lulzim Zeneli, kryetar i FR  të LDK-së, në fjalën e tij theksoi se ky debat është pjesë e projektit të punës së Forumit. Takimi i sotëm është një mesazh i qartë për dinamikën e shtuar në të gjitha rrafshet. Dega e FR në Prizren është model për të gjitha organizimet në Kosovë, tha ndër të tjera Lulzim Zeneli duke e potencuar të dhënën se rinia është katalizator i proceseve.