Përmbajtja:

• Të ftohtit ka mbërthyer edhe Kosovën

• Kris Paten: Qytetarët e Kosovës mund të udhëtojnë në Evropë me dokumentet e UNMIK-ut

• Vendet e Kuintit dhe Kryeministri i Kosovës u shprehën optimistë për zabtimin e draft-planit për standardet

• Analisti amerikan Baskin thotë se qëndrimet e Kombeve të Bashkuara për Kosovën duhet të qartësohen

• Punëtorët së shpejti do t'i kenë nga Trusti i Kursimeve Pensionale pasqyrat mbi kontributet e tyre

• Drejtues të antimafias italiane do ta ndihmojnë Shqipërinë në hartimin e një ligji antimafia

• Zyrtarët e Bankës Botërore nënshkruan një kredi për financimin e një termocentrali në Vlorë

• Dy të vrarë dhe 33 të plagosur në një shpërthim në qytetin irakian Samara

• Ushtarët izraelitë kanë vrarë dy palestinezë

• Në aksidentin e një autobusi danez tre veta kanë humbur jetën dhe 42 janë lënduar

• Kryeinspektori për armët në Irak largohet

• Ekipi i OKB-së ka mbërritur në Bagdad

• OBSH njofton edhe për 6 viktima nga gripi i shpendëve

• NASA thotë se komunikimi me robotin Spirit në përgjithësi është ndërprerë

• Presidenti Bush: lufta kundër terrorizmit po e shkatërron al-Kaidën

Të ftohtit ka mbërthyer edhe Kosovën

Prishtinë, 24 janar 2004 - Prej disa ditësh Kosovën, mu sikur edhe rajonin e Evropës Juglindore, e ka mbërthyer një mot i ftohtë, me erëra të ftohta e të fuqishme dhe me temperatura shumë të ulta, por me reshje të dobta dëbore.

Mbrëmë dhe sot në Kosovë ka mbretëruar një mot shumë i ftohtë, i shoqëruar me erë të fuqishme. Temperatura ka zbritur deri në minus 11 gradë Celsius, ndërkaq ftohtësia e erës (Chilli factor) ka qenë deri në minus 25 gradë, varësisht nga fuqia e saj.

Ky mot i ftohtë do të zgjasë deri të martën, kur pritet një ngritje e temperaturës.

Ngrohja qendrore e qytetit të Prishtinës nuk funksionon si duhet. Ndërkaq, ata që ngrohen me energji elektrike përballen me reduktimet gjatë ditës 1 me 5 në favor të dritave, ndërsa gjatë mbrëmjes 2 me 4.

 

Kris Paten: Qytetarët e Kosovës mund të udhëtojnë në Evropë me dokumentet e UNMIK-ut

 

Bruksel, 24 janar 2004 - Pas një refuzimi kategorik që u bë pak ditë më parë nga Prodi dhe Solana, kërkesës së shqiptarëve për t'iu lehtësuar regjimi i vizave të udhëtimit në Evropë, e njëjta përgjigje u dha këto ditë për shqiptarët e Kosovës edhe nga komesioneri i Bashkimit Evropian, Kris Paten.

 

Ky i fundit në një letër që i ka dërguar euro-deputetit, Olivie Dypyi, thekson se me përjashtim të Kroacisë, qytetarët e vendeve të tjera të Ballkanit Perëndimor, përkatësisht të Shqipërisë, Maqedonisë dhe Kosovës, Serbisë dhe Malit të Zi, si dhe të Bosnjes, duhet të kërkojnë viza udhëtimi tremujore për në vendet e BE-së pranë ambasadave ose konsullatave përkatëse.

 

Ndërkaq, për viza udhëtimi në Evropë duhet justifikuar kërkesa që duhet plotësuar disa kritere. Sa i takon mundësisë së punësimit në vendet e BE-së kjo mund të arrihet veçse në rast se një firmë evropiane i garanton punë të sigurtë apo sezonale një qytetari të vendeve të Ballkanit.

 

Me këtë rast, komesioneri Kris Paten nënvizon se qytetarët e Kosovës mund të udhëtojnë nëpër vendet e Eropës me dokumentet që UNMIK-u u jep atyre. Por si për pasaportat e vendeve të tjera joanëtare të BE-së kjo nuk mjafton, por ka nevojë për një vizë të një vendi anëtar të BE-së.

Këto deklarata të komesionerit Paten erdhën pas një letre që i kishte dërguar atij Olivie Dypyi. Eureodeputeti belg ka shprehur në këtë letër shqetësimin e tij për papunësinë e lartë në Kosovë, e shoqëruar kjo me një zhvillim të ultë ekonomik.

 

Si zgjidhje ai ka propozuar mundësinë e lejimit të qytetarëve të Kosovës të udhëtojnë dhe të punësohen në vendet e BE-së. Pra siç shihet përgjigja e zyrtarëve të BE-së ka qenë pothuajse krejtësisht negative, thuhej në një njoftim të transmetuar mbrëmë në "Dojçe vele".

 

 

Vendet e Kuintit dhe Kryeministri i Kosovës u shprehën optimistë për zabtimin e draft-planit për standardet

 

Prishtinë, 24 janar 2004 - Përfaqësësuesit e pesë vendeve të Kuintit më me ndikim në Kosovë dhe kryeministri Bajram Rexhepi u shprehën optimistë se draft-plani për implementimin e standardeve do të jetë i gatshëm së shpejti.

 

Pas takimit të djeshëm me përfaqësuesit e Kuintit, grupeve punuese dhe kreun e UNMIK-ut, Rexhepi tha se shpreson që draft-plani do të marrë edhe mbështetjen e KS të OKB-së dhe Grupit të Kontaktit në mënyrë që të fillojë edhe zbatimi i tyre.

Njëri nga përfaqësuesit e vendeve të Kuinti-it, shefi i Zyrës britanike, Mark Dikonson gjithashtu shprehu keqardhje për mospjesëmarrjen e serbëve në grupet punuese.

 

Megjithatë ai shprehet i kënaqur me punën e deritashme në këtë proces. Sipas tij mospjesëmarrja e atyre që kanë vendosur kështu është mëkat për ta dhe për jetën e përditshme të njerëzve që përfaqësojnë, apo që thonë se përfaqësojnë.

 

 

Analisti amerikan Baskin thotë se qëndrimet e Kombeve të Bashkuara për Kosovën duhet të qartësohen

 

Uashington, 24 janar 2004 - Opsionet e Kombeve të Bashkuara për Kosovën duhet të qartësohen, thotë Mark Baskin studiues në qendrën ndërkombëtare "Uodro Uilson" në Uashington. Sipas këtij analisti mbetet e papërcaktuar mënyra se si do të bëhet vlerësimi i këtyre standardeve.

 

Në një intervistë dhënë "Zërit të Amerikës" analisti Baskin thotë se çështja e standardeve për Kosovën nuk është thjesht një provë politike për Kosovën, por është një provë për të zhvilluar kompetencat në disa fusha të administrimit.

Ai veçoi dy gjëra rreth standardeve: "Së pari është për të ardhur keq që as Qeveria e Serbisë dhe as udhëheqja e koalicionit serb "Kthimi" nuk kanë pranuar të bashkëpunojnë me grupet e punës të ngritura për standardet. Kjo do të thotë se ato nuk do të jenë aq të efektshme për të përcaktuar nëse qeveria ka ndërmarrë hapa të duhur për të siguruar fillimin e bisedimeve.

 

Së dyti po t'i shikosh me vëmendje standardet, ato kanë nevojë për qartësime të mëtutjeshme. Nuk është ende plotësisht e qartë se si do të vlersohet përmbushja e tyre, si do të përcaktohet për shembull nëse zgjedhjet do të jenë plotësisht demokratike e kështu me radhë", thotë analisti Baskin.

 

 

Punëtorët së shpejti do t'i kenë nga Trusti i Kursimeve Pensionale pasqyrat mbi kontributet e tyre

 

Prishtinë, 24 janar 2004 - Punëtorët së shpejti do t'i kenë pasqyrat e llogarive individuale mbi kontributet e tyre pensionale. Trusti i Kursimeve Pensionale është në përfundim e sipër të procesit të shpërndarjes së pasqyrave të para të llogarive individuale që përfshinë periudhën nga një gushti 2002 deri më 30 prill 2003.

 

Drejtoresha e Trustit Arieta Kushutova ka thënë në një konferencë me gazetarë se 82 mijë pasqyra janë gjeneruar dhe u janë shpërndarë punëdhënësve nëpërmjet të cilëve do t'i marrin punëtorët.

 

 

Drejtues të antimafias italiane do ta ndihmojnë Shqipërinë në hartimin e një ligji antimafia

 

Romë, 24 janar 2004 - Drejtues të antimafias italiane do të vizitojnë javën e ardhshme Tiranën për ta ndihmuar Shqipërinë në hartimin e një ligji antimafia. Zëvendësprokurori i antimafias italiane Françesko Mantori do të diskutojë me ministrin shqiptar të Drejtësisë Farmir Xhafaj rrugët dhe mënyrat e rezistencës italiane në këtë aspekt.

Xhafaj e kishte quajtur si emergjencë hartimin e një ligji të tillë për Shqipërinë në një letër dërguar krerëve të antimafias italiane.

 

 

Zyrtarët e Bankës Botërore nënshkruan një kredi për financimin e një termocentrali në Vlorë

 

Tiranë, 24 janar 2004 - Zyrtarët e Bankës Botërore nënshkruan me një delegacion shqiptar kredinë për financimin e një termocentrali, që do të ndërtohet në Vlorë dhe që ata shpresojnë se do të zbusë problemin e mungesave kronike të energjisë elektrike në Shqipëri.

 

Zyrtarët shqiptarë ia hedhin fajin për krizën kthimit të shpejtë të kërkesave të popullatës dhe mungesës për një kohë të gjatë të projekteve të reja energjetike në vend.

 

 

Dy të vrarë dhe 33 të plagosur në një shpërthim në qytetin irakian Samara

 

Samara, 24 janar 2004 - Të paktën dy veta janë vrarë dhe 33 të tjerë janë plagosur sot në mëngjes në një shpërthim të një automobili në qytetin irakian Samara, njofton Rojter.

Burimet ushtarake amerikane kanë njoftuar se hetimet për shpërthimin janë duke u zhvilluar, i cili ka ndodhur para ndërtesës së policisë në këtë qytet, që ndodhet 100 km në veri të Bagdadit.

 

 

Ushtarët izraelitë kanë vrarë dy palestinezë

 

Gaza, 24 janar 2004 - Ushtarët izraelitë kanë vrarë sot në mëngjes dy palestinezë në lindje të qytetit Gaza, mësohet nga burimet spitalore pelestineze. Mirëpo, identifikimi i viktimave civile ka qenë i vështirë për shkak të plagëve të rënda që u janë shkaktuar, thanë burimet.

Ndërkaq, sipas një njoftimi të ushtrisë palestineze, palestinezët nuk kanë qenë të armatosur, por gjoja mbanin dylbi dhe telefonë celularë gjë që është kuptuar si shenjë e mundshme se po planifikonin një sulm. Incidenti ka ndodhur në afërsi të murit të sigurisë që po e ndërton Izraeli, ndërkaq ushtria pohon se ka marrë paralajmërime se esktremistët po planifikonin një sulm.

 

 

Në aksidentin e një autobusi danez tre veta kanë humbur jetën dhe 42 janë lënduar

 

Berlin, 24 janar 2004 - Tri gra kanë humbur jetën dhe 42 vetë janë lënduar sot nga përplasja e një autobusi turistik danez me dy kamionë në austradën midis Berlinit dhe Nyrmbergut në Gjermani, ka bërë të ditur policia. Shkaku i aksidenitit nuk dihet, por duket se kamionët për shkak të ndonjë arsye ishin ndalur në rrugë.

Në autobusin danez ndodheshin 60 pasagjerë, kryesisht të rinj. Nga tri gra që kanë humbur jetën është edhe shoferja e autobusit.

 

 

Kryeinspektori për armët në Irak largohet

 

Bagdad, 24 janar 2004 - Kryeinspektori amerikan armët në Irak, Dejvid Kej, ka dhënë dorëheqjen shtatë muaj pas fillimit të një operacioni - që deri tani ka qenë i pasuksesshëm - për të gjetur armët e shkatërrimit në masë të Irakut.

Zoti Kej i tha agjencisë së lajmeve Rojters se nuk besonte që Iraku të kishte stoqe të mëdha të armëve kimike e biologjike. Dhe ai nuk besonte, gjithashtu, se kishte pasur prodhim në shkallë të gjerë që nga fundi i luftës së gjirit në vitin 1991.

Kej do të zëvendësohet nga Çarls Dulfer, ish-inspektor i lartë i OKB-së për armët.

 

 

Ekipi i OKB-së ka mbërritur në Bagdad

 

Bagdad, 24 janar 2004 - Një ekip nga OKB-ja ka mbërritur në Irak për të filluar përgatitjet për një kthim të mundshëm të personelit të OKB-së atje. Personeli i OKB-së u tërhoq pas një sulmi shkatërrues ndaj selisë së saj në Bagdad gushtin e kaluar.

Mbërritja e këtij ekipi ndodh në një kohë që amerikanët po presin një vendim nga OKB-ja nëse do të shqyrtojë mundësinë e mbajtjes së zgjedhjeve të drejtëpërdrejta brenda katër muajve të ardhshëm. Kjo është një kërkesë e shumicës shi'ite irakiane që nuk dëshirojnë më që të dominohen nga myslimanët suni siç ishin nën regjimin e Sadam Huseinit.

 

 

OBSH njofton edhe për 6 viktima nga gripi i shpendëve

 

Gjenevë, 24 janar 2004 - Organizata Botërore e Shëndetësisë (OBSH) ka konfirmuar se një 13-vjeçar vietnamez ka vdekur për shkak të gripit të shpendëve. Ky rast e çon në gjashtë numrin e viktimave nga kjo sëmundje në këtë vend.

OBSH thotë se djali vdiq në Qytetin Ho Shim Min në jug të vendit, ndërsa pesë rastet e tjera në Vietnam ishin në veri të vendit.

Kjo epidemi ka prekur disa vende aziatike. Autoritetet tailandeze konfirmuan të premten se dy fëmijë ishin sëmurë nga gripi i shpendëve.

Ata njoftuan gjithashtu se një person që ishte besuar se e kishte këtë virus, kishte vdekur nga pneumonia. Gripi i shpendëve ka prekur tashmë pula në Japoni, Tajvan, Kore e Jugut, Kamboxhia si dhe në Vietnam.

 

 

NASA thotë se komunikimi me robotin Spirit në përgjithësi është ndërprerë

 

Hjuston, 24 janar 2004 - Agjencia amerikane e hapësirës NASA thotë se komunikimi me robotin eksplorues Spirit në përgjithësi është ndërprerë me sa duket për shkak të problemeve me programin kompjuterit të robotit.

Të premtën, Spirit dërgoi të dhëna në tokë për herë të parë që nga e mërkura, por zyrtarët e misionit thonë se nuk presin që roboti me 6 rota të rifillojë shërbimin së shpejti.

Një robot i dytë amerikan është planifikuar të mbrrijë në Mars te shtunen për të vazhduar kërkimet për kushte që do të bënin të mundur jetën në planetin e kuq.

Ndërkohë, shkencëtarët evropianë thanë se sateliti i tyre Mars Ekspres, ka zbuluar molekula uji të ngrira poshtë sipërfaqes në polin jugor të planetit. Këto zbulime konfirmojnë prova të mëparshme për shenja të ekzistencës së ujit nga një satelit amerikan.

 

 

Presidenti Bush: lufta kundër terrorizmit po e shkatërron al-Kaidën

 

Uashington, 24 janar 2004 - Presidenti amerikan Xhorxh Bush thotë se lufta kundër terrorizmit e udhëhequr nga Shtetet e Bashkuara po e shkatërron ngadalë por me vendosmëri rrjetin terrorist al-Qaida.

Ai tha sot në Washington, në një konferencë të Kryetarëve të Bashkisë, se drejtuesit e rrjetit terrorist mund të jenë ende aktivë, por operativët e rangjeve të mesme, siç tha ai, janë nxjerrë jashtë loje.

Presidenti tha se lufta kundër terrorizmit është e një lloji të ri që kërkon metoda të reja.

Ai iu referua konkretisht Ligjit Patriot, që zgjeron kompetencat e agjencive të ruajtjes së rendit për të gjurmuar terroristët.

Veprimtarët e të drejtave civile thonë se Ligji Patriot shkel liritë bazë, por presidenti tha përsëri sot se nuk duhet lejuar shfuqizimi i tij.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |