Përmbajtja:

• Daci e Fieski biseduan për standardet dhe për zgjedhjet nacionale

• Rexhepi përgëzoi Pollozhanin për zyrtarizimin e Universitetit të Tetovës

• Rexhepi këmbëngul për largimin e menaxheres së AKM-së, Marie Fuçi

• KFOR-i në Zveçan zbuloi 12 kg drogë sintetike

• Novicki i shkruan Sekretarit të Përgjithshëm të NATO-s

• Administrata tatimore vitin e kaluar ka inkasuar 105 milion euro dhe 20 milion euro

• Komisari Feler edhe një viti në krye të policisë së UNMIK-ut

• Mbrëmë në Tregun e Podujevës ka shpërthyer një zjarr i madh

• Në Prishtinë u varros veprimtari Musa Hoti, i vrarë në Bruksel

• Ministria e Mjedisit paraqiti në një debat publik projektligjin për parkun kombëtar Bjeshkët e Nemuna

• Në Vushtrri u mbajt manifestimi "Flaka e janarit" kushtuar vëllezërve Gërvalla

• Në Graçanicë është zbuluar një sasi të konsiderueshme të municionit

• Strategjia afatmesme e zhvillimit ekonomik është e domosdoshme për secilin vend

• Ekspertë nga vende të rajonit po debatojnë në Sarajevë për liberalizimin e regjimit të vizave

• Prokurori i përgjithshëm maqedonas thotë se janë ngritur akpadi kundër disa gjykatësve për shpërdorim

• Misioni policor i Bashkimit Evropian në Maqedoni vazhdon kompletimin e personelit prej 200 policësh

• Shqyrtohet nostrifikimi i diplomave të studentëve të Malit të Zi që kanë studiuar në universitetet e Shqipërisë

• Anan: Nuk duhet lejuar botën të kthehet në konkurencë të egër të bazuar mbi ligjet e xhunglës

• BE i mbyll dyert shpendëve nga Tajlanda

• Nga zjarri në Indi mbi 50 persona kanë humbur jetën

• Bush tha se përpjekjet amerikane e kanë ulur rrezikun terrorist

• Kryeministri indian takon kashmirasit

• Zyrtar i OKB-së takon amerikanët për Irakun

• Debat i demokratëve para votimeve në Nju Hampshair

• NASA ka filluar të marrë sinjale nga sonda Spirit në Mars

Daci e Fieski biseduan për standardet dhe për zgjedhjet nacionale

 

Prishtinë, 23 janar 2004 - Kryetari i Kuvendit të Kosovës Nexhat Daci priti sot shefin e OSBE-së në Kosovë Paskal Fieski, me të cilin ka biseduar për përmbushjen e standardeve, për zgjedhjet nacionale që do të mbahen sivjet si edhe për sistemin e ri zgjedhor.

Paskal Fieski tha se sistemi elektoral për zgjedhjet e parlajmëruara në vjeshtë do të jetë i ndryshëm nga ai i zgjedhjeve të para, ndërkohë që edhe kësaj radhe OSBE do jetë organizatore e zgjedhjeve nacionale në Kosovë.

Por, ai tha se ende nuk është përcaktuar modeli i sistemit zgjedhor, për të cilin do të vendoset në muajin e ardhshëm.

"Me siguri sistemi zgjedhor do të jetë i ndryshëm nga ai i mëpërshmi dhe ne duhet ta presim mesin e muajit shkurt, kur kryeadministratori Holkeri do ta nëshkruajë rregulloren për zgjedhjet e vjeshtës 2004", është shprehur Fieski.

Ai hodhi poshtë mundësinë që Kuvendi i Kosovës të miratojë një ligj për zgjedhjet, meqenëse sipas tij, kjo është kompetencë e rezervuar i PSSP-së.

 

 

Rexhepi përgëzoi Pollozhanin për zyrtarizimin e Universitetit të Tetovës

 

Prishtinë, 23 janar 2004 - Ministri i Arsimit, Shkencës dhe Teknologjisë Rexhep Osmani, ka përgëzuar ministrin e Arsimit të Maqedonisë z. Aziz Pollozhani, si dhe rektorin e Universitetit të Tetovës, me rastin e zyrtarizimit të Universitetit të Tetovës. Në përgëzimet e Rexhepit thuhet se me zyrtarizimin e Universitetit të Tetovës "realizohet një ëndërr dhe e drejtë legjitime juaja".

"Konsiderojmë se, zyrtarizimi i këtij Universiteti është një sukses për gjithë shoqërinë maqedonase dhe tregues pozitiv se rajoni ynë po integrohet në shoqërinë evropiane", thekson ministri Rexhepi në përgëzimet drejtuar homologuit të tij Aziz Pollozhani.

 

 

Rexhepi këmbëngul për largimin e menaxheres së AKM-së, Marie Fuçi

 

Prishtinë, 23 janar 2004 - Pas një takimi me shefin e UNMIK-ut Hari Holkeri dhe të përfaqësuesve ligjorë, kryeministri Bajram Rexhepi tha Qeveria edhe më tej këmbgul për largimin e menaxheres së AKM-së, Marie Fuçi.

Rexhepi tha se Holkeri tashmë e ka marrë me seriozitet këtë çështje dhe se shumë shpejt kryeadministratori do të dalë me një qëndrim të caktuar. Megjithëse kjo është çështje e komplikuar, tha Rexhepi, mirëpo në këtë mënyrë nuk mund të vazhdojë procesi i privatizimit. Ai tha se edhe po qe se do të ketë presione nuk do të heqë dorë nga qëndrimi i tij.

Sipas Rexhepit edhe punëtirët e UNMIK-ut duhet të përgjigjen për gabimet e tyre. "Pavarësisht se punëtorët e UNMIK-ut kanë një lloj imuniteti, askush nuk është i paprekshëm dhe ai që bën gabime duhet të përgjigjet pçër gabimet e veta, sepse në këtë mënyrë ruhet edhe kredibiliteti i UNMIK-ut", është shpreehur Rexhepi.

 

 

KFOR-i në Zveçan zbuloi 12 kg drogë sintetike

 

Mitrovicë, 23 janar 2004 - KFOR-i në Zveçan ka zbuluar një qese plastmase me rreth 12 kg droge sintetike që dyshohet të jetë amfetaminë, njoftuan burimet e policisë në Mitrovicë.

"KFOR-i ia dorëzoi substancën e gjetur policisë dhe pas analizës që i është bërë, policia ka konfirmuar se substanca e dyshuar ishte amfetaminë", citohet të ketë thënë Arbër Beka, zëdhënës i SHPK-së për rajonin e Mitrovicës.

Qesja e plastmasës me amfetaminë ka qenë e fshehur në tokë. Policia nuk ka raportuar për ndonjë person të arrestuar lidhur me këtë rast.

 

 

Novicki i shkruan Sekretarit të Përgjithshëm të NATO-s

 

Prishtinë, 23 janar 2004 - Ombudspersoni i Kosovës Marek Antoni Nowicki i ka shkruar një letër Sekretarit të Përgjithshëm të NATO-s Jap de Hop Shefer, për shkak se një numër i madh i banorëve të Kosovës kanë humbur anëtarët e tyre të familjes gjatë sulmeve ajrore të NATO-s në vitin 1999.

 

"Shumë nga këto raste kanë të bëjnë me incidentet për të cilat NATO ka pranuar të kenë qenë gabime B siç është shembulli me bombardimin e autobusit të udhëtarëve mbi një urë afër fshatit Lluzhan, që shkaktoi 47 vdekje dhe më shumë plagosje, apo bombardimi i postës në qendër të Prishtinës", shkruan Novicki.

"Deri më tani, përpjekjet e këtyre personave për të marrë ndonjë lloj të kompensimit apo njohjes publike nga NATO-ja për humbjet e tyre kanë qenë të kota, pasi që kanë hasur në heshtje të plotë nga ana e NATO-s", thotë më tutje Novicki dhe konstaton që "familjet e viktimave janë duke pritur më shumë se katër vjet për të pranuar një njohje zyrtare të dhembjes si pasojë e këtyre incidenteve tragjike". Prandaj, ai e konsideron të rëndësishme ta ngrisë këtë çështje përsëri.

Ndonëse Novicki pranon se nuk ka juridiksion zyrtar mbi NATO-n apo cilëndo nga shtetet anëtare të saj, ai e konsideron detyrë morale që si Ombudsperson i Kosovës të mos lejojë që fati i këtyre njerëzve të harrohet. "Institucioni i Ombudspersonit në Kosovë është i gatshëm të shërbejë si pikë kontakti mes NATO-s dhe familjeve të viktimave nësë kjo kërkohet nga cilado palë", thotë mes tjerash Novicki në këtë letër.

 

 

Administrata tatimore vitin e kaluar ka inkasuar 105 milion euro dhe 20 milion euro

 

Prishtinë, 23 janar 2004 - Administrata tatimore prezentoi sot arritjet dhe objektivat për të ardhmen, katër vjet pas themelimit. Ky organ i politikës fiskale në Ministrinë e Ekonomisë dhe Financave është një ndër dy burimet kryesore për plotësimin e buxhetit të të Kosovës.

Ministri i Ekonomisë dhe Financave, Ali Sadriu, shpreson që funksionimi i administratës tatimore do të shmangë abuzimet dhe se Ministria që ai drejton është e orientuar në forcimin e bindjes se shtigjet për mundësitë e abuzimeve duhet të mbyllen me ndihmën e administratës tatimore.

Ndërkaq, duke folur për sfidat që e presin këtë administratë gjatë këtij viti, drejtori Mustafë Hasani veçoi procesin e ngadalësuar të aprovimit të ligjeve dhe udhëzimeve, përdorimin i keshit në afarizimin e përgjithshëm kosovar, regjistrimin e ngadalshëm të bizneseve, ndryshimet e përkohshme dhe të përhershme nga Agjencioni i Regjistrimit të Biznesit dhe mallrat në tregun e zi.

Gjithashtu u tha se administrata tatimore planifikon implementimin e ligjeve për tatim në të ardhura dhe shuarjen e tatimit të paragjykuar si një tatim i veçantë.

Ndryshe administrata tatimore gjatë vitit 2003 ka inkasuar 105 milion euro dhe 20 milion euro kontribute pensionale.

 

 

Komisari Feler edhe një viti në krye të policisë së UNMIK-ut

 

Prishtinë, 23 janar 2004 - Shtefan Feler, komisar i policisë së UNMIK-ut do të jetë edhe një vit në krye të kësaj policie. Kështu u vendos në Këshillin e Sigurimit të OKB-së në Nju Jork, ku Feler kishte raportuar për gjendjen e sigurisë në Kosovë për vitine e kaluar.

Ndryshe, Feler në këtë post ndodhet prej dy vjetësh dhe në mars duhej t'i skadonte mandati dyvjeçar.

 

 

Mbrëmë në Tregun e Podujevës ka shpërthyer një zjarr i madh

 

Podujevë, 23 janar 2004 - Mbrëmë në rrethana të panjohura në Tregun e Podujevës ka shpërthyer një zjarr i madh, i cili ka përfshirë disa lokale afariste që ndodhen në hapësirën e tregut.

Në vendin e ngjarjes kanë dalur forca të mëdha të SHPK-së, të Shërbimit të Zjarrëfikësve dhe forcat e KFOR-it të cilat kanë bërë përpjekje të mëdha për ta shuar zjarrin. Sipas parashikimeve të para ky zjarr ka shkaktuar dëme të mëdha materiale, por fatbardhësisht nuk pati viktima në njerëz falë edhe faktit se në kohën kur kishte shpërthyer lokalet afariste ishin të mbyllura.

 

 

Në Prishtinë u varros veprimtari Musa Hoti, i vrarë në Bruksel

 

Prishtinë, 23 janar 2004 - Dje në Prishtinë u varros veprimtari politik Musa Hoti, i cili ditë më parë në rrethana të panjohura u vra në Bruksel, ku edhe ka jetuar prej shumë vitesh.

Në ceremonialin e varrimit bashkëpunëtorë dhe njerëz të veprave të Hotit e vlerësuan lart kontributin e tij kombëtar. U tha se aktiviteti i tij patriotik i nisur në Kosovë, vazhdoi edhe për 25 vjet në Bruksel dhe vende të tjera evropiane.

 

 

Ministria e Mjedisit paraqiti në një debat publik projektligjin për parkun kombëtar Bjeshkët e Nemuna

 

Prishtinë, 23 janar 2004 - Ministria e Mjedisit dhe Planifikimit Hapësinor ka organizuar dje në Prishtinë një debat publik rretht projektligjit për parkun kombëtar të Bjeshkëve të Nemuna me banorë të kësaj zone dhe përfaqësues të komunave Pejë, Istog, Deçan e Gjakovë.

Ministri Ethem Çeku tha se askujt në zonën nuk do t'i cënohet prona private. Ai ka thënë se Bjeshkët e Nemuna, si rajon përgjithësisht i pandryshuar me vlera të shumëfishta natyrore dhe me ekosisteme të ruajtura, shpallet park kombëtar. Ky park i mbrojtur me ligj ka 46 mijë hektarë. Sipas Çekut, parku Bjeshkët e Nemuna është pasuri që i tejkalon kufijtë e Kosovës.

 

 

Në Vushtrri u mbajt manifestimi "Flaka e janarit" kushtuar vëllezërve Gërvalla

 

Vushtrri, 23 janar 2004 - Në qendrën e kulturës në Vushtrri u mbajt dje manifestimi "Flaka e janarit", i cili do të bëhet tradicional do të zgjasë tri ditë. Me një fjalë rasti u paraqit edhe Muharrem Shabani, kryetar i Kuvendit komunal, i cili tha se "vëllezërit Gërvalla ndër të parët kanë dhënë jetën për lirinë e Kosovës, andaj është detyrë jona t'i kujtojmë dëshmorët".

 

 

Në Graçanicë është zbuluar një sasi të konsiderueshme të municionit

 

Graçanicë, 23 janar 2004 - Forcat policore dhe ato të KFOR-it kanë zbuluar në Graçanicë një sasi të konsiderueshme të municionit. Operacioni i kontrollit ndodhi pas informatës nga një qytetarë nëpërmjet telefonit se në një fushë janë vërejtur disa gjëra të dyshimta.

 

Një zëdhënëse e policisë citohet të këtë thënë se me të marrë këtë informatë të mërkurën në mbrëmje policia ka dalë në vendngjarje dhe i ka sanuar ato.

 

 

Strategjia afatmesme e zhvillimit ekonomik është e domosdoshme për secilin vend

 

Prishtinë, 23 janar 2004 - Strategjia afatmesme e zhvillimit ekonomik është e domosdoshme për secilin vend, por përpilimi i një strategjie të qëndrueshme mund të bëhet vetëm me angazhimin e institucioneve shkencore të Kosovës, siç është Akademia e Shkencave, Universiteti, institutet e ndryshme dhe ekspertë të lëmive të ndryshme.

 

Kështu thanë ekspertët e fushave ekonomike në një takim në Prishtinë, ku debatuan për strategjinë e hartuar kohë më parë nga Ministria e Tregtisë dhe Industrisë.

"Me strategjinë zhvillimore duhet t'u jepet përparësi degëve prodhuese që janë bartëse të ekonomisë dhe që mund ta çojnë Kosovën përpara, tha kryetari i Lidhjes së Ekonomistëve të Kosovës, Nuri Bashota, duke e cilësuar strategjinë hartuar nga Ministria e Tregtisë dhe Industrisë të mangët.

 

 

Ekspertë nga vende të rajonit po debatojnë në Sarajevë për liberalizimin e regjimit të vizave

 

Sarajevë, 23 janar 2004 - Ekspertë nga tetë vende të rajonit dje në Sarajevë kanë biseduar për liberalizimin dhe harmonizimin e regjimit të vizave në Evropën Juglindore. Në këtë takim po marrin pjesë përfaqësuesit e Greqisë, Turqisë, Rumanisë, Bullgarisë, Serbisë e Malit të Zi, Shqipërisë, Maqedonisë, Bosnje e Hercegovinës dhe Kroacisë në rolin e vëzhguesve.

 

 

Prokurori i përgjithshëm maqedonas thotë se janë ngritur akpadi kundër disa gjykatësve për shpërdorim

 

Shkup, 23 janar 2004 - Prokurori i përgjithshëm i Maqedonisë Aleksandar Përçevski thotë se janë ngritur akpadi kundër disa gjykatësve dhe funksionarëve të tjerë në qeveri për shpërdorim posti. Ai përmendi disa raste konkrete, ku janë shkelur procedurat gjyqësore, për çka ka akuzuar gjykatës e gjykata, por pa përmendur emra konkretë.

 

Sipas tij, është një rast ku Gjykata e Kumanovës ka bërë lëshime serioze, duke ia kthyer 14 herë pasaportën një shqiptari të akuzuar për vrasjen e kushëririt të tij edhe pse ai vetë ua kishte dorëzuar pasaportën organeve të ndjekjes. Prokurori përmendi edhe disa raste të tjera ku gjykatat i zvarrisin lëndët për arsye personale, ose shpallin akvendime për lirimin e të akuzuarve dhe për këtë e njoftojnë prokurorinë e përgjithshme vetëm pas një muaji e gjysmë, por edhe pas një viti!

Prokurori Përçevski tha se janë ngritur nga ana e qytetarëve akuza kundër 47 gjykatësve, 10 prokurorëve, 41 zyrtarëve të Ministrisë së Punëve të Brendshme dhe kundër zyrtarëve të tjerë të lartë shtetëror, ndërkaq 2 apo 3 prej tyre janë hedhur poshtë si të paargumentuara.

Prokurori Përçevski tha se janë ngritur akpadi kundër 824 personave për shpërdorim postesh, ndërkaq 39 prej tyre ndodhen në paraburgim. Ai nuk e përjashtoi mundësinë e korrupsionit brenda disa gjykatave të vendit.

 

 

Misioni policor i Bashkimit Evropian në Maqedoni vazhdon kompletimin e personelit prej 200 policësh

 

Shkup, 23 janar 2004 - Misioni policor i Bashkimit Evropian në Maqedoni vazhdon kompletimin e personelit prej 200 policësh. Zëdhënësja e Bashkimit Evropian tha në Shkup se edhe mëtutje në Maqedoni janë duke ardhur pjesëtarë të Misionit policor të BE-së i titulluar "Proksima" që për momentin numëron 71 policë të uniformuar nga 19 shtete.

 

 

Shqyrtohet nostrifikimi i diplomave të studentëve të Malit të Zi që kanë studiuar në universitetet e Shqipërisë

 

Podgoricë, 23 janar 2004 - Ministri për Mbrojtjen e të Drejtave të Grupeve Nacionale dhe Etnike në Mal të Zi, Gëzim Hajdinaga tha se është takuar me rektorin e Universitetit të Malit të Zi Lubisha Stankoviq dhe ka biseduar rreth nostrifikimit të diplomave të studentëve që kanë studiuar në universitetet e Shqipërisë.

 

Z. Hajdinaga tha se ka kërkuar nga Stankoviq të ulet në minimum kufiri i dhënies së ndryshimeve të provimeve për nostrifikimin e diplomave, sidomos për ata studentë që kanë mbaruar studimet në Shkodër. Sipas tij rektori Stankoviq ka deklaruar se kushdoqoftë që të dorëzojë kërkesën për nostrifikim autoritetet do t'ia përmbushin atë kërkesë sa më shpejt.

 

 

Anan: Nuk duhet lejuar botën të kthehet në konkurencë të egër të bazuar mbi ligjet e xhunglës

 

Davos, 23 janar 2004 - Sekretari i Përgjithshëm i Kombeve të Bashkuara, Kofi Annan, u ka thënë udhëheqësve politikë dhe afaristë në Forumin Ekonomik Botëror në Zvicër se eliminimi i varfërisë dhe përmirësimi i shëndetësisë dhe arsimit duhet kthyer në krye të rendit të ditës të bashkësisë ndërkombëtare.
Anan tha se këto çështje kishin rënë në hije nga lufta në Irak dhe lufta e udhëhequr nga amerikanët kundër terrorizmit.

Ai bëri thirrje që t'i jepej fund subvencioneve në bujqësi dhe tha se duhej bërë përpjekje për të mos lejuar botën të kthehej në atë që e quajti konkurencë të egër të bazuar mbi ligjet e xhunglës.

Fjalimi i zotit Anan do të zhgënjejë Shtetet e Bashkuara që kishin shpresuar për një përgjigje ndaj kërkesës së saj për dërgimin e një ekipi të OKB-së në Irak për të hulumtuar mundësinë e mbajtjes së zgjedhjeve brenda disa muajve të ardhshëm, thotë BBC.

 

 

BE i mbyll dyert shpendëve nga Tajlanda

 

Bruksel, 23 janar 2004 - Bashkimi Evropian ka shpallur një ndalim të importeve të shpendëve dhe prodhimeve të shpendëve nga Tajlanda pasi zyrtarët tajlandezë konfirmuan dy rastet e para të njerëzve të prekur nga gripi i shpendëve.

BE-ja pesëmbëdhjetë anëtarëshe është importuesi më i madh i pulave nga Tajlanda pas Japonisë, e cila shpalli ndalimin e saj të enjten.

Gripi i shpendëve ka prekur shpendët në Japoni, Tajvan, Kore të Jugut - si dhe në Vietnam, ku ka shkaktuar edhe vdekjen e pesë personave.

Organizata e OKB-së për Ushqim dhe Bujqësi i tha BBC-së se testet kanë treguar se edhe në Kamboxhia ka shpërthyer gripi i shpendëve.

Njoftimi ishte lajm shkatërrimtar për industrinë e shpendëve në Tajlandë e cila eksporton pula në vlerë prej më shumë se një miliardë dollarë në vit.

 

 

Nga zjarri në Indi mbi 50 persona kanë humbur jetën

 

Bombei, 23 janar 2004 - Mbi 50 persona kanë humbur jetën, ndërksa një numër i madh është lënduar nga një zjarr që shpërtheu gjatë ceremonisë së martesës në Indi. Shkak i zjarrit ka qenë një kontakt i shkurtër i energjisë në sallën ku zhvillohej ceremonia e martesës, thonë zyrtarët lokalë.

 

Shumë mysafirë vdiqën edhe për shkak të panikut, në përpjekje për të ikur nëpër dyert e ngushta të sallës në tempullin Hindu në qytetin Shrinagar, ka deklaruar një zyrtar lokal. Në momentin e shpërthimti të zjarrit, në sallë ndodheshin rreth 500 mysafirë.

 

 

Bush tha se përpjekjet amerikane e kanë ulur rrezikun terrorist

 

Rosuell, 23 janar 2004 - Presidenti amerikan Xhorxh Bush e përqëndroi vemendjen tek lufta kundër terrorizmit, ndërkohë që ai i dha fund udhëtimit të tij në 3 shtete të rëndësishme për rizgjedhjen e tij, pas fjalimit mbi gjendjen e vendit, që mbajti të martën mbrëma.

 

Gjatë një ndalese më 22 janar në Rosuell të shtetit Nju Meksiko, presidenti bëri të ditur se do t'i kërkojë kongresit një shtim të ndjeshëm të fondeve për sigurimin kombëtar.

Presidenti Bush thotë se ai kërkon që kongresi të mbajë nën kontroll shpenzimet qeveritare, por fondet për luftën kundër terrorizmit janë një përjashtim i madh nga ky rregull.

Në një fjalim që mbajti para një audience e përbërë kryesisht nga studentë të Institutit Ushtarak të Nju Meksikos, zoti Bush tha se kërkon një shtim prej 9 presje 7 përqind në shpenzimet për programet që synojnë parandalimin e një sulmi tjetër terrorist në tokën amerikane.

 

Ai tha se fondet do të përfshihen në projekt-buxhetin federal për vitin e ardhshëm financiar, që ai do t’i dërgojë kongresit më 5 shkurt.

 

 

Kryeministri indian takon kashmirasit

 

Nju Delhi, 23 janar 2004 - Kryeministri indian, Atal Behari Vexhaji, ka pranuar të takohet me udhëheqësit e moderuar separatistë nga Kashmiri pas bisedimeve të suksesshme të enjten me zëvendësin e tij, L K Advani.

Ata dolën nga takimi me zotin Advani, që është një nacionalist hindur i vijës së ashpër, pasi ranë dakord për një deklaratë të përbashkët që bënte fjalë për dhënie fund të dhunës në Kashmir dhe vazhdimin e dialogut.

Qeveria Indiane ka zhvilluar bisedime me udhëheqësit e moderuar të Kashmirit për herë të parë në më shumë se një dekadë.

Ky zhvillim erdhi disa javë pasi India pranoi t'i diskutojë me Pakistanin mosmarrëveshjet rreth Kashmirit si pjesë e një dialogu të gjerë.

 

 

Zyrtar i OKB-së takon amerikanët për Irakun

 

Uashington, 23 janar 2004 - Këshilltari i lartë i Kombeve të Bashkuara për paqe dhe siguri, Lakhdar Brahimi, ka zhvilluar bisedime rreth Irakut me zyrtarë të lartë amerikanë.

Zoti Brahimi ka diskutuar për rolin e Kombeve të Bashkuara në të ardhmen e Irakut, mes të tjerëve, dhe me sekretarin e Shtetit, Kolin Pauell dhe këshilltaren për Sigurinë, Condoleezza Rice.

Kundërshtimi në rritje ndaj planeve të koalicionit amerikan për të ngritur një qeveri të përkohshme në Irak pa mbajtur zgjedhje të përgjithshme, duket se e ka detyruar Uashingtonin të kërkojë përfshirje më të madhe të OKB-së.

Takimi i zotin Brahimi me zyrtarët amerikanë është një tregues tjetër i entuziazmit të ri të Uashingtonit për përfshirje të OKB-së në Irak.

 

 

Debat i demokratëve para votimeve në Nju Hampshair

 

Uashington, 23 janar 2004 - Shtatë kandidatët që shpresojnë të jenë zgjedhja e Partisë Demokratike në SHBA për t'u përballur me presidentin Xhorxh Bush në zgjedhjet presidenciale kanë zhvilluar debatin e tyre të fundit para hapit tjetër të rëndësishëm në garën e tyre të votimeve në Nju Hampshair.

Debati i transmetuar në televizion u dominua nga pyetjet për Irakun, sigurinë kombëtare dhe ekonominë. Debati ishte i vagët, ndërsa të shtatë kandidatët u përpoqën të shmangnin ndonjë gabim të rëndë para votimit të së martës.

 

 

NASA ka filluar të marrë sinjale nga sonda Spirit në Mars

 

Hjuston, 23 janar 2004 - Agjencia amerikane e hapësirës NASA thotë se ka filluar të marrë sinjale nga sonda e saj në Mars, por shton se sonda nuk po dërgon të dhëna të kuptueshme.

Agjencia shkruan në faqen e saj elektronike se sonda Spirit përcolli një tingull të mprehtë dje, për të konfirmuar se kishte marrë një transmetim nga Toka.

Shkencëtarët thonë se Spirit po transmeton zhurma radioje. Por Nasa thotë se sonda nuk ka përcjellë të dhëna me kuptim që nga e mërkura. Agjencia thotë se shkencëtarët e saj po përpiqen të zbulojnë shkakun e problemit.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |