Përmbajtja:

• Presidenti Rugova: Në katër vjet e gjysmë në liri Kosova ka pasur një progres të madh në të gjitha fushat e jetës

• Presidenti Rugova foli para një grupi studentësh evropianë

• Holkeri e Daci takohen sot në një drekë pune

• Holkeri ka hartuar një urdhëresë administrative për rregullat e raportimit financiar të partive politike

• Kuvendi miratroi sot dy projektligje

• M. Fuçi: Akuzat e kryeministrit Rexhepi nuk janë të bazuara në fakte

• FR i LDK-së të premtën organizon një takim të hapur me të rinjtë e Podujevës

• Rreth 15 mijë nënshkrime janë mbledhur në peticionin për gjetjen e pengjeve të pagjetura në Podujevë

• Presidenti i Kosovës Ibrahim Rugova sot flet para Kuvendit të Kosovës

• Kreu i NATO-së thotë se viti 2005 në Kosovë është moment i vlerësimit të rëndësishëm për shqiptarët

• Kongresistët Hajd dhe Lantosh thanë se është koha që SHBA-të të përkrahin pavarësinë e Kosovës

• Bordi i Drejtorëve të AKM-së nuk mori ndonjë vendim për zhbllokimin e procesit të privatizimit

• Në pesë shkolla të komunës së Prizrenit mësimi po zhvillohet me planprogramet e Serbisë

• Analisti i njohur Zhak Rupnik thotë koncepti i pavarësisë së kushtëzuar për Kosovën është zgjidhja më e mirë

• Dy serbë janë arrestuar lidhur me rastin e zjarrvënies në ndërtesën e Gjykatës në veri të Mitrovicës

• Tiranë: 12 klandestinë për të cilët dyshohej se janë mbytur në detin Jon janë gjallë

• Dy ushtarë amerikanë janë vrarë nga një sulm me mortaja

• Guerilët kanë vrarë katër gra irakiane në një bazë ushtarake amerikane

• Shkencëtari "i pabindur" për bombën

• Bush përsëriti temat që preku gjatë fjalimit të tij mbi gjendjen e vendit

• Kuvajti dhe Arabia Saudite janë të gatshme të pakësojnë borxhin e Irakut

Presidenti Rugova: Në katër vjet e gjysmë në liri Kosova ka pasur një progres të madh në të gjitha fushat e jetës

 

Prishitnë, 22 janar 2004 - Presidenti i Kosovës Dr. Ibrahim Rugova në seancën e sotme të Kuvendit të Kosovës mbajti fjalimin vjetor. Në fillim të fjalimit të tij, Presidenti Rugova vlerësoi se në këto katër vjet e gjysmë në liri Kosova ka pasur një progres të madh në të gjitha fushat e jetës, duke shtuar se këto ishin vite të forcimit të lirisë, të sigurisë, të ekonomisë dhe të demokracisë. Ndërkaq, duke folur për periudhën dyvjeçare të ndërtimit të institucioneve shtetërore të Kosovës, ai tha se se këto institucione kanë funksionuar me sukses.

 

"Kjo ishte një periudhë e konsolidimit të institucioneve nacionale të Kosovës", tha Presidenti Rugova, duke veçuar punën e Kuvendit të Kosovës që ka miratuar me dhjetëra ligje sistemore dhe ligje të tjera si dhe rezoluta e deklarata të ndryshme në interes të qytetarëve të vendit tonë.

 

Njëherit theksoi se gjatë kësaj kohe Kuvendi i Kosovës ka kultivuar frymën dhe funksionimin demokratik të institucionit. Gjithashtu ai tha se edhe Qeveria me të gjitha ministritë ka funksionuar mirë dhe ka arritur të jetë një ekzekutiv i qëndrueshëm.

 

"Presidenti i Kosovës është kujdesur për funksionimin e institucioneve dhe i ka ndihmuar ato me ide e propozime dhe ka luajtur rolin reprezentativ të popullit dhe të gjithë qytetarëve në vend dhe jashtë. Prioritet kryesor ka qenë ruajtja dhe forcimi i stabilitetit politik dhe shtetëror të vendit. Mund të themi se kemi fituar një përvojë të mirë në funksionimin e pushtetit legjislativ, ekzekutiv dhe reprezentativ si dhe të vendosjes së shtetit ligjor", theksoi Presidenti Rugova.

Në vazhdim të fjalimit të tij, Presidenti i Kosovës foli për aspektin ekonomik, në të cilin, siç tha, Kosova ka pasur progres, duke veçuar sektorin privat në të gjitha fushat, i cili përbën gjysmën e ekonomisë. "Gjatë kësaj kohe kosovarët kanë treguar shpirtin e tyre ndërmarrës dhe dinamik. Element me rëndësi është edhe buxheti i Kosovës, që mblidhet nga të ardhurat vetjake, çfarë tregon se Kosova është në gjendje të funksionojë si shtet", nënvizoi Dr.Rugova.

Si segment me rëndësi në fushën financiare Presidenti theksoi konsolidimin e bankave në sektorin privat, për të cilat tha se duhet të lidhen me bankat ndërkombëtare dhe të ndihmojnë ekonominë e Kosovës dhe qytetarët përmes kredive të ndryshme për prodhim. "Do të bëjmë më shumë në stimulimin e eksportit të prodhimeve kosovare në tregjet ndërkombëtare dhe t'i zvogëlojmë barrierat e ndryshme, që e pengojnë këtë veprimtari", tha Presidenti.

Pasi vlerësoi përmirësimin e infrastrukturës së përgjithshme rrugore, ai veçoi si prioritet realizimin e projekteve të rëndësishme, si pjesën kosovare të Autostradës Prishtinë B Durrës që ka edhe karakter ndërkombëtar, ndërkaq në trafikun ajror veçoi themelimin e kompanisë ajrore kosovare dhe me modernizimin e aeroportit të Prishtinës.

Në vazhdim të fjalimit të tij, Presidenti Rugova tha se është forcuar siguria publike. "Policia e Kosovës sot ka një kontigjent të qëndrueshëm, që duhet të specializohet për detyra të ndryshme. Trupat Mbrojtëse të Kosovës kanë arritur fazën e organizimit dhe do të kenë përkrahjen tonë në konsolidimin dhe profesionalizimin e tyre, që të jenë forcë e aftësuar për detyrat e veta dhe forcë mbrojtëse në të ardhmen", nënvizoi Presidenti i Kosovës.

Presidenti pastaj foli veç e veç për fushat e ndryshme të jetës në Kosovë, për arsimin, shëndetësinë, çështjet sociale, të bujqësisë, të mbrojtjes së ambientit, të sportit e të kulturës, për të theksuar: "Në mënyrë të veçantë do të theksoja se gjatë kësaj periudhe është forcuar mendimi për njohjen formale të pavarësisë së Kosovës".

Duke folur për periudhën e ardhshme të zhvillimit të Kosovës, Presidenti Rugova tha se gjatë këtij institucionet e Kosovës do të koncentrohen më shumë në zhvillimin ekonomik, në procesin e privatizimit, në sigurimin e investimeve dhe në përkrahjen e sektorit privat dhe në krijimin e vendeve të reja të punës për të rinjtë e vendit.

 

Vemendje të veçantë, tha ai, do t'i kushtohet zgjidhjes së problemit të energjetikës që është element kyç për zhvillimin ekonomik të Kosovës, duke shtuar se duhet menduar edhe për forma të tjera të energjisë alternative.

"Në planin e brendshëm do të vazhdojmë të punojmë në integrimin e grupeve etnike apo minoriteteve në shoqërinë dhe shtetin e Kosovës dhe në garantimin dhe mbrojtjen e tyre. Njëherësh e dëshirojmë një vullnet më të madh të minoriteteve për integrim në shoqërinë dhe shtetin e Kosovës", theksoi Presideti Rugova.

Ndërkaq, në planin e prezentimit të Kosovës në botë, Dr. Rugova tha se një kujdes të veçantë do të ketë për mundësitë e përfaqësimit të Kosovës, përmes hapjes së zyrave në botën e jashtme apo formave të tjera, sepse, si tha, kjo është një çështje vitale për Kosovën në këtë fazë të zhvillimit. "Ne do të kërkojmë një liberalizim të vizave, sidomos për njerëzit e biznesit të Kosovës me vendet e BE dhe me SHBA", tha ai.

Ndërkaq, duke folur për bartjen e kompetencave, Presidenti tha se kjo do të bëhet me një veprim të përbashkët me UNMIK-un me qëllim të shtimit të efikasitetit të institucioneve të Kosovës dhe ky do të jetë një proces që duhet zhvilluar së bashku, tha ai dhe shtoi:

"Një element tjetër me rëndësi do të jetë puna në vlerësimin e standardeve të paraqitura, të atyre që i kemi përmbushur dhe të atyre që do t=i përmbushim në bashkëpunim me UNMIK-un, OSBE-në dhe me KFOR-in.

 

Ne mendojmë se këto standarde janë në të mirë të zhvillimit dhe të prosperitetit të vendit tonë, e jo punë e nisur prej fillimit, sepse të gjithë e kemi pranuar se Kosova ka pasur progres, të cilin duhet fuqizuar", theksoi Presidenti Rugova për të nënvizuar:

 

"Njëherësh ne do të punojmë dhe insistojmë në njohjen formale të pavarësisë së Kosovës, e cila gjë do të shpejtonte dhe stabilizonte proceset e brendshme ekonomike e demokratike dhe do të qetësonte këtë pjesë të Europës e të botës dhe popullin e Kosovës.

 

Një Kosovë e pavarur, demokratike e paqësore e integruar në BE, në NATO dhe në miqësi permanente me SHBA që është vullnet politik i popullit dhe i qytetarëve. Vëmendje të veçantë do t'i kushtojmë kultivimit të marrëdhënieve të mira me fqinjëtë e vendit tonë dhe t'i përparojmë ato, çfarë është politikë nacionale e Kosovës".

Duke folur për zgjedhjet e dyta nacionale në Kosovë që do të mbahen në vjeshtë, Presidenti shprehu bindjen se ato do të jenë zgjedhje të mira e të qeta, sepse tash Kosova ka një eksperiencë të mirë në këtë plan, duke bërë thirrje që të gjithë të kontribuojmë në këtë drejtim. "Kosova e ka dhënë tashmë këtë provim. Do thënë se Kosova po hyn në fazën e një vendi normal dhe është e gatshme t'i pranojë obligimet ndërkombëtare", theksoi Presidenti i Kosovës.

 

Gjithashtu tha se duhet angazhuar në ndriçimin e fatit të të zhdukurve, duke përkujtuar me pietet të lartë të gjithë ata që ranë për lirinë, pavarësinë dhe demokracinë e vendit tonë, the mes tjerash në fjalmin e tij para deputetëve të Kuvendit të Kosovës, Presidenti Ibrahim Rugova.

 

 

Presidenti Rugova foli para një grupi studentësh evropianë

 

Prishtinë, 22 janar 2004 - Presidenti i Kosovës, Dr. Ibrahim Rugova, foli sot (e enjte) para një grupi të madh studentësh evropianë për gjendjen në Kosovë, të arriturat, dhe vizionin për të ardhmen e vendit tonë.

Studentët e programit evropian për nivel magjistrature (MA) në të drejta të njeriut dhe demokratizim po qëndrojnë për një vizitë njëjavore në Kosovë.

Duke folur para studentëve, në një takim që u mbajt në ambientet e selisë qendrore të UNMIK-ut në Prishtinë, Presidenti Ibrahim Rugova foli për të arriturat e vendit tonë në këto 4 vjet e gjysmë në liri.
 

Presidenti Rugova tha se institucionet e Kosovës do të punojnë bashkë me UNMIK-un për të siguruar bartje të më shumë kompetencave dhe, për rrjedhojë, qeverisje më efektive të vendit.

Kosova e pavarur, e integruar në BE dhe NATO, dhe në miqësi të përhershme me SHBA-të, është zgjidhja për Kosovën, tha Presidenti Rugova, duke shtuar se njohja formale e pavarësisë së Kosovës do të shpejtonte proceset e brendshme dhe do të qetësonte këtë pjesë të Evropës.

President i Kosovës u përgjigj në pyetjet dhe interesimet e një numri studentësh evropianë.

 

 

Holkeri e Daci takohen sot në një drekë pune

 

Prishtinë, 22 janar 2004 - Shefi i UNMIK-ut, Hari Holkeri dhe kryetari i Parlamentit të Kosovës, Nexhat Daci, do të takohen sot në një drekë pune. Tema kryesore gjatë kësaj dreke pritet të jetë iniciativa e Parlamentit të Kosovës për ndryshimin e Kornizës Kushtetuese.

 

Izabel Karlovic, zëdhënëse e UNMIK-ut ka thënë se gjatë kësaj dreke Holkeri dhe Daci do të diskutojnë për situatën politike dhe ndryshimet në Kornizën Kushtetuese.

 

 

Holkeri ka hartuar një urdhëresë administrative për rregullat e raportimit financiar të partive politike

 

Prishtinë, 22 janar 2004 - Kryeadministratori i Kosovës, Hari Holkeri ka hartuar një urdhëresë administrative ku renditen rregullat e raportimit financiar të partive politike me qëllim të ngritjes së transparencës.

"Kjo masë e plotëson vakuumin plotësues në fushën e financave të partive dhe presim që ai të pasohet me një rregullore gjithëpërfshirëse brenda disa muajsh", ka thënë Suzan Karduf, kryesuese e Departamentit të Zgjedhjeve pranë OSBE-së.

 

Sipas kësaj urdhërese partitë politike janë të obliguara të paraqesin raporte financiare vjetore për vitin 2002/2003 deri në fund të shkurtit të vitit 2004.

 

 

Kuvendi miratroi sot dy projektligje

 

Prishtinë, 22 janar 2004 - Kuvendi i Kosovës në seancën e sotme me shumicë votash miratoi në parim Projektligjin për tregti me naftë dhe derivate të naftës dhe Projektligjin për kinematogafinë.

Ndërkaq, javën e ardhshme do të shqyrtohet Projektligji për Odën Ekonomike të Kosovës.

 

 

M. Fuçi: Akuzat e kryeministrit Rexhepi nuk janë të bazuara në fakte

 

Prishtinë, 22 janar 2004 - Duke shfaqur qëndrimin e saj për akuzat e Qeverisë së Kosovës, drejtoresha e AKM-së, Maria Fuçi në një intervistë dhënë BBC-së tha tha se privatizimi është një proces politik intensiv dhe shtoi se edhe në vende të tjera ku ka punuar ka hasur në probleme të ngjashme, por ndoshta jo në këtë ekstrem. "Unë thjesht jam duke bërë punën për të cilën më kanë angazhuar dhe më duket se jemi duke bërë përparim", thotë zonja Fuçi.

Në pyetjen se akuzat vijnë nga institucionet e larta, përfshirë këtu edhe Kryeministrin e Kosovës, zonja Fuçi thotë: "Akuzat e z. Rexhepi nuk janë të bazuara në fakte dhe unë i kam përmendur ato në letrën time dërguar z. Lamsdorf dhe z. Holkeri, ku i kam mohuar ato.

 

Ato kishin të bënin me faktin se unë kam qenë e përfshirë në projektet e Bankës Botërore dhe Komisionit Evropian në Bosnje dhe në Serbi dhe nëse kjo më përjashton mua nga angazhimi në Kosovë, atëherë edhe donatorët do të duheshin të përjashtoheshin. Nëse puna ime në këto projekte nënkupton konflikt interesash, atëherë nuk mbeten shumë vetë që mund të punojnë në Kosovë", thotë zonja Fuçi.

Megjithatë, ajo tha se do të vazhdohet me takime individuale me anëtarët e Bordit të AKM-së dhe shpreson që në një fazë të ardhshme do të arrihet një koncensues.

 

 

FR i LDK-së të premtën organizon një takim të hapur me të rinjtë e Podujevës

 

Prishtinë, 22 janar 2004 - Në 15-vjetorin e themelimit të LDK-së me moton "2004 viti i LDK-së - Viti Juaj", Forumi i Rinisë i LDK-së nga 15 janari 2004 zhvillon takime të hapura me të rinjet nëpër të gjitha komunat e Kosovës.

Takimet e Kryesisë qendrore të FR të LDK-së me të rinj zhvillohen në formë të bashkëbisedimit të hapur - komunikimit interaktiv.

Në këto takime të Forumit të Rinisë, të rinjtë do të kenë rastin të japin kontributin e tyre në zhvillimin dhe avansimin e proceseve në Kosovë.

Takimi i radhës mbahet të premtën (23 janar) në kinosallën e qytetit në Podujevë dhe fillon në orën 17.00.

 

 

Rreth 15 mijë nënshkrime janë mbledhur në peticionin për gjetjen e pengjeve të pagjetura në Podujevë

 

Podujevë, 22 janar 2004 (QIK) - Kordinatori për fshatrat i komunës së Podujevës Latif Mehmeti njoftoi sot se ka mbledhur mbi 10 mijë nënshkrime gjatë aksionit për mbledhjen e nënshkrimeve në peticionin për pengjet e pagjetura nga Kosova.

"Aksioni ynë që ka filluar para dy muajve është duke u realizuar në bashkëpunim me udhëheqësit e Komiteteve dhe përfshinë qytetin e Podujevës dhe 41 fshatra", tha z. Mehmeti duke pohuar se listat po nënshkruhen në dy objekte të Kuvendit komunal.

 

Ndërkaq, kryetari i Nënkëshillit për Mbrojtjen e Lirive dhe të Drejtave të njeriut në Podujevë Ahmet Hasani njoftoi tha se ky nënkëshill në bashkëpunim me vullnetarët e ICAN-it ka grumbulluar gjithësej 4050 nënshkrime në peticionin për gjetjen e pengjeve dhe të zhdukurve nga Kosova.

 

Aktualisht në komunën e Podujevës NKDLMNJ dhe institucionet komunale kanë grumbulluar afro 15 mijë nënshkrime.

Aksioni për nënshkrimin e peticionit do të vazhdojë deri në fund të muajit.

 

 

Presidenti i Kosovës Ibrahim Rugova sot flet para Kuvendit të Kosovës

 

Prishtinë, 22 janar 2004 - Presidenti i Kosovës Ibrahim Rugova, në seancën e sotme do të mbajë fjalimin vjetor para Kuvendit të Kosovës, në të cilën do të flasë për objektivat e institucioneve të Kosovës për këtë vit.

Përndryshe, në këtë seancë deputetët do të diskutojnë edhe për Projektligjin për tregti me naftë dhe derivate të naftës si dhe për Projektligjin për kinematografi.

 

 

Kreu i NATO-së thotë se viti 2005 në Kosovë është moment i vlerësimit të rëndësishëm për shqiptarët

 

Bruksel, 22 janar 2004 - Sekretari i përgjithshëm i NATO-s Jap Hop de Shefer dhe shefi i diplomacisë evropiane Havier Solana në një takim të përbashkët të NAT0-s dhe BE-së janë zotuar se do të vazhdojnë bashkëpunimin edhe në përpjekjet për stabilizimin e rajonit të Ballkanit.

 

Në një konferencë për gazetarë, përfaqësuesi i lartë i BE-së, Havier Solana dhe Sekretari i Përgjithshëm Shefer kanë thënë se në rajonin e Ballkanit duhet të vazhdojnë reformat dhe problemet të zgjidhen nëpërmjet dialogut.

I pyetur nëse në proceset në Kosovë ndikon situata aktuale në Serbi, Shefer ka thënë se të gjitha zhvillimet politike atje nuk mund të konsiderohen se nuk kanë ndikim edhe në zhvillimet në Kosovë.

 

Ka lidhje të ngushtë ndërmjet këtyre të dyjave, ka thënë Shefer. Ai theksoi se edhe gjatë vizitës së tij në Kosovë javën e shkuar ka bërë apel të qartë që serbët e Kosovës duhet të marrin pjesë në procesin e implementimit të standardeve për Kosovën.

 

Shefer ka shtuar se pala shqiptare nuk duhet të qëndrojë duarkryq sepse ka punë të rëndësishme para vetes, sepse viti 2005 është momenti i vlerësimit të rëndësishëm në veçanti për shqiptarët, ka thënë kreu i NATO-s.

 

 

Kongresistët Hajd dhe Lantosh thanë se është koha që SHBA-të të përkrahin pavarësinë e Kosovës

 

Uashington, 22 janar 2004 - Vetëm dy orë para se presidenti Bush të fillonte fjalimin e tij drejtuar kombit amerikan, organizata lobiste Lidhja Qytetare Shqiptaro-Amerikane zhvilloi një takim në një nga sallat e selisë së Kongresit për të diskutuar mbi shqetësimet e kësaj shoqate dhe veçanërisht mbi statusin e Kosovës.

 

Me këtë rast dy anëtarë me ndikim të Kongresit amerikam në një letër dërguar kolegëve të tyre u kanë bë thirrje që të bashkohen me ta në përkrahje të Projektrezolutës së paraqitur vitin e kaluar për mbështetjen e pavarësisë së Kosovës.

Kryetari i Komisiomnit për Marrëdhënie me Jashtë Henrih Hajd dhe anëtari i këtij Komisioni Tom Lantosh thonë në atë letër se arritja e qëndrushmërisë politike dhe ekonomike në Kosovë dhe Ballkan kërkon më shumë se sa ndihmë rindërtimi.

 

Ajo kërkon zgjidhjen e statusit përfundimtar të Kosovës. Në këtë letër thuhet se është koha që Shtetet e Bashkuara të shpallin përkrahjen e tyre për pavarësinë e Kosovës, duke iu përmbajtur parimeve që ato vetë i kanë njohur se e drejta e vetëvendosjes është e drejtë themellore e të gjithë popoujve.

Drejtori politik i personelit të Komisionit të Kongresit për marrëdhënie me jashtë Bat King u shkëput për disa minuta nga puna e tij për t'u tranmetuar shqiptaro-amerikanëve mesazhin e ligjvënësve Hajd dhe Lantos:

 

"Jemi të kënqur që miqtë tanë shqiptaro-amerikanë ndodhen këtu në këtë ngjarje të veçantë pasi gjendja në Kosovë dhe në mbarë Ballkanin ku jetojnë shqiptarët është shumë e rëndësishme për Shtetet e Bashkuara, ashtu si edhe qëndrushmëria dhe e ardhmja e asaj pjese të botës", tha z. King, transmetoi "Zëri i Amerikës".

 

 

Bordi i Drejtorëve të AKM-së nuk mori ndonjë vendim për zhbllokimin e procesit të privatizimit

 

Prishtinë, 22 janar 2004 - As në takimin e djeshëm të Bordit të Drejtorëve të AKM-së nuk u mor ndonjë vendim për zhbllokimin e procesit të privatizimit. Shefi i Shtyllës së Katërt të UNMIK-ut Nikolas Lamsdorf tha se është diskutuar për ndërmarrjet publike dhe shoqërore, për çështjen e përgjegjësive, si dhe për shqyrtimin e ofertuesit të dytë të lartë.

 

Në këtë mbledhje ishte i pranishëm vetëm përfaqësuesi sindikalist Bahri Shabani, ndërkaq munguan dy anëtarët e Qeverisë, ministrat Ali Sadriu dhe Ali Jakupi, pa të cilët, siç tha Lamsdorf, nuk mund të merrej asnjë vendim.

Sipas tij, tenderi për 19 ndërmarrje do të shpallet në javën e ardhshme. Ai shtoi se për herë të parë kanë diskutuar për ndryshimet e domosdoshme në politikat operacionale dhe rregullat e tenderit, por këto diskutime sipas tij do të vazhdojnë me secilin anëtar të Bordit të AKM-së veç e veç.

 

 

Në pesë shkolla të komunës së Prizrenit mësimi po zhvillohet me planprogramet e Serbisë

 

Prizren, 22 janar 2004 - Në pesë shkolla të Komunës së Prizrenit mësimi po zhvillohet me planprogramet e Serbisë, megjithë insistimin e Ministrisë së Arsimit që mësimi të zhvillohet me plan-program të Kosovës.

 

Kryesisht bëhet fjalë për ato shkolla në fshatrat e banuara me goranë dhe boshnjakë si në Gorë të Dragashit, në Restelicë, Brod, Vraniq, Rapçë dhe në Krushë. Një zyrtar për zhvillimin e arsimit në komunën e Prizrenit konfirmon se këto shkolla punojnë me planprograme të Serbisë, ndonëse Ministia e Arsimit të Kosovës atyre u ka dërguar me kohë tekstet mësimore falas me planprogram të Kosovës.

Njoftohet se personeli i këtyre shkollave merr rrogë nga Serbia dhe të njëjtit arsimtarë marrin rroga edhe nga Ministria e Arsimit të Kosovës. Gjithashtu thuhet se këto shkolla furnizohen me tekste nga Beogradi të cilat kanë hyrë në Kosovë ilegalisht, ndërkaq përmbajtjet e tyre janë të papranueshme për aktualitetin e sotëm në Kosovë.

 

 

Analisti i njohur Zhak Rupnik thotë koncepti i pavarësisë së kushtëzuar për Kosovën është zgjidhja më e mirë

 

Prishtinë, 22 janar 2004 - Analisti i njohur, Zhak Rupnik, ka promovuar dje në Bibliotekën Kombëtare në Prishtinë veprën e tij në gjuhën shqipe "Ditari ballkanik", ku flet për rrjedhat në ish-Jugosllavinë e shpërbërë.

 

Në këtë libër Rupnik përkrah konceptin e pavarësisë së kushtëzuar për Kosovën si zgjidhja më e mirë e statusit përfundimtar të saj. Rupnik me analizat e tij është një autor i mirënjohur për opinionin e Kosovës.

 

 

Dy serbë janë arrestuar lidhur me rastin e zjarrvënies në ndërtesën e Gjykatës në veri të Mitrovicës

 

Mitrovicë, 22 janar 2004 - Dy serbë janë arrestuar lidhur me rastin e zjarrvënies në ndërtesën e Gjykatës në veri të Mitrovicës më 6 janar të këtij viti, të cilëve u është caktuar paraburgimi prej 30 ditësh për shkak procedurës së hetimeve, theksoi Trejsi Beker, zëdhënëse e policisë së UNMIK-ut në Mitrovicë.

 

Sipas saj, arrestimi i këtyre dy serbëve po e ndihmon procesin e zhvillimit të hetimeve, që është në vazhdim e sipër dhe ndoshta do të ketë edhe arrestime të tjera. Zëdhënësja Beker tha se te njëri nga të arrestuarit janë gjetur disa gjësende të cilat janë vjedhur në ndërtesën e Gjykatës.

 

 

Tiranë: 12 klandestinë për të cilët dyshohej se janë mbytur në detin Jon janë gjallë

 

Tiranë, 22 janar 2004 - Në Tiranë ka arritur dje një lajm i cili i ka dhënë fund një ankthi. Më 9 janar drejt Italisë përveç gomonës së aksidentuar ku humbën jetën 21 veta, ishte nisur edhe një gomone tjetër e cila ka mbërritur në Itali.

 

Kështu 12 shkodranë që janë ndodhur në atë gomonë kanë mbërritur në tokën italiane, konfirmojnë të afërmit e tyre. Ky lajm është mësuar nga të afërmit rreth 11 janarit, por nuk u publikua prej tyre nga droja e vështirësive që mund t'u dilnin refugjatëve.

Pas përplasjes me dallgët, gomonja e paaksidentuar e nisur rreth 20 minuta para të parës, është kthyer pas për t'u kthyer sërish më vonë, deklarojnë të shpëtuarit. Pas marrjes së lajmit nga gomonja e dëmtuar se po vinte policia për ndihmë, gomonja tjetër ka vazhduar rrugën për në Itali.

 

 

Dy ushtarë amerikanë janë vrarë nga një sulm me mortaja

 

Bagdad, 22 janar 2004 - Dy ushtarë amerikanë janë vrarë dhe një tjetër është plagosur rëndë nga një sulm me mortaja mbi një bazë amerikane afër qytetit Bakuba, njofton Rojter.

"Gjatë mbrëmjes së fundit ne kemi pasur një sulm me mortaja mbi bazën operative afër Bakubës, ku janë vrarë dy ushtarë nga divizioni i katërt dhe një tjetër është plagosur rëndë", tha majorja Xhoslin Eberli, zëdhënëse e divizionit të katërt.

 

 

Guerilët kanë vrarë katër gra irakiane në një bazë ushtarake amerikane

 

Falluxha, 22 janar 2004 - Guerilët kanë vrarë katër irakiane dhe kanë plagosur gjashtë të tjera në një sulm mbi një bazë amerikane në perendim të Bagdadit, njofton Rojter. Incidenti ka ndodhur kur guerilët hapën zjarr ndaj një minibusi në të cilën ndodheshin 9 irakiane të punësuara në bazën ushtarake amerikane.

Policia ka thënë se kjo është hera e parë që punëtorët irakianë që punonin në bazën ushtarake amerikanë kanë qenë në shenjestër të sulmit. "Supozojmë se autobusin e sulmuan guerilët që e dinin se punojmë për amerikanët", tha një nga gra e plagosur irakiane.

 

 

Shkencëtari "i pabindur" për bombën

 

Seul, 22 janar 2004 - Një nga shkencëtarët amerikanë në zë që vizitoi Korenë e Veriut, thotë se ai nuk u bind se vendi mund të prodhojë bombë bërthamore.

Shkencëtari i njohur për çështjet bërthamore, që vizitoi kompleksin kryesor bërthamor të vendit, tha se i është treguar një substancë, që nga zyrtarët atje u përshkrua si pluton.

Ky është një nga përbërësit kryesor të armëve bërthamore.

Shkencëtari, Siegfried Hecker, në rrëfimin e parë pas vizitës në Korenë e Veriut, tha para një komisioni të senatit amerikan se ai nuk ka prova për natyrën e substancës, por tha se në të ndodheshin gjurmë radioaktiviteti.

 

 

Bush përsëriti temat që preku gjatë fjalimit të tij mbi gjendjen e vendit

 

Uashington, 22 janar 2004 - Zyrtarisht presidenti amerikan Xhorxh Bush nuk ka filluar ende fushatën për t'u rizgjedhur. Por ndërsa udhëton në shtete të ndryshme të Amerikës, duke folur rreth politikave dhe propozimeve të tij, ai flet me pasion rreth çështjeve të rëndësishme për votuesit amerikan.

Në Ohajo, për shembull, një shqetësim i madh është humbja e vendeve të punës në sektorin e prodhimit gjatë viteve të fundit. Shkalla e papunësisë në këtë shtet është ngritur nga 3,9 përqind në 5,7 përqind që kur zoti Bush filloi nga detyra në vitin 2001. Presidenti pranoi ekzistencën e këtij problemi dhe premtoi të ndihmojë.

 

 

Kuvajti dhe Arabia Saudite janë të gatshme të pakësojnë borxhin e Irakut

 

Kuvajt, 22 janar 2004 - Udhëheqësit e Kuvajtit dhe të Arabisë Saudite thonë se janë të gatshëm të shqyrtojnë pakësimin e ndjeshëm të borxhit prej miliarda dollarësh që Iraku u ka vendeve të tyre.

Princi saudit i kurorës, Abdullah bin Abdul Aziz tha se Rijadi do të hyjë në negociata. Ai i bëri këto komente dje pas bisedimeve me të dërguarin e posaçëm amerikan, Xhems Bejker.

Zoti Bejker vizitoi po dje Kuvajtin, ku kryeministri i atij vendi u zotua të pakësojë borxhin e Irakut nëse parlamenti e miraton një gjë të tillë.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |