Podujevë: LDK mbajti takim në Nëndegën e Bërvenikut

Podujevë: LDK mbajti takim në Nëndegën e Bërvenikut

Podujevë, 22 janar 2004 (QIK) – Grupi punues për përcjelljen e punës në Nëndegë i udhëhequr nga anëtarët e Kryesisë së Degës së LDK-së në Podujevë, Nexhmi Balaj e Ahmet Ahmeti mbajtën sot një takim me kryesitë e aktiveve të Nëndegës së Bërvenikut e ku morën pjesë edhe veprimtarë tjerë të LDK-së.

Në këtë takim pune zv. kryetari Ymer Zeqiri i njoftoi anëtarët e Kryesisë së degës së LDK-së për aktivitetin e Nëndegës së Bërvenikut, kurse u diskutua gjithashtu për intensifikimin e aktivitetit të LDK-së në terren si dhe për detyrat, obligimet dhe përgjegjësitë e Nëndegëve e aktivive në kontekst të aktualitetit të përgjithshëm.

Për aktivitetin politik të Degës të pranishmit i njoftoi z. Ahmet Ahmeti, kurse për të arriturat e pushtetit komunal foli z. Balaj. “Propaganda e egër që po bëhet kundër LDK-së dhe institucioneve qendrore e lokale duke keqpërdorur mediat, fjalën e lirë por edhe foltoren e organit më të lartë ligjvënës të Kosovës paraqet një zakonshmëri për forcat politike që kaherë kanë filluar fushatën në prag të fushatës parazgjedhore”, u deklaroi të pranishmëve z. Ahmeti.

Ai tha se pavarësisht kësaj fushate veprimtarët, aktivet, Nëndegët dhe vetë Dega e LDK-së duhet të kryejnë detyrat e veta dhe të mos merren me gjëra që nuk u bëjnë nder askujt dhe as atyre që plasojnë akuza dhe gënjeshtra të tilla. Veprimtarët dhe anëtarësia e LDK-së në rajonin e Bërvenikut vlerësuan punën e pushtetit komunal por kërkuan kujdes më të madh për atë zonë kufitare në parandalimin e lëvizjes së popullatës.

Në fund të takimit anëtarët e Kryesisë së degës së LDK-së Nexhmi Balaj dhe Ahmet Ahmeti iu përgjigjën pyetjeve dhe interesimeve të pjesëmarrësve të këtij takimi që kishin të bëjnë me përparimin e punës së LDK-së por edhe të institucioneve lokale.